أي واحد فينا سوى كان بنت أول ولد اكيد كان في يوم من الايام اعجبت ليك لشخص معين وهو كمان اعجب بيك .. وتطور هذا الاعجاب الى حب
انتهى بالزواج او نسأل الله السلامة بالشاكوش
نحن كمجتمع شرقي كما يقولون في الغالب بنكتم مشاعرنا وبنتردد في البوح بيها يمكن السبب خوف من الانكسار والهزيمة .. او انو الطرف التاني ما حاسي نفس الاحساس او يمكن يكون كبرياء يمنعنا من اظهار اعجابنا ومصارحة الاخرين به .. وناس الكبرياء ديل خصوصاً دائماً بكون هم المعذبون في الارض وفي اكثر الاحيان مصيرهم يحبو ويحبو في حنانهم لغاية ما يخطفوها او يخطفوه منو/منها ويعيشو الحسرة والندم ..
وفي نوع تاني ناس دبلوماسيين وديل منتشرين بالكوم ناس التلميحات ما بحبو المخاطرة وما بفكو آخرهم بالساهل للطرف التاني ودي عند البنات اكتر حاجة تكون مكسرة فيك لكن ما توريك لو ما كشفت اوراقك كلها
طيب
افرض انك معجب بواحدة وبتحبها ولمحت ليها اكتر من مرة بس هي عاملة (اضان الحامل طرشة) وحالفة يمين بالله ما تفهم ..
تسوي شنووووووووووو؟
هل بتغامر وتكشف كل اوراقك؟؟
ام انك تفضل متابعة التلميح واحتمال انها تفهمك قبل ما تغامر ؟؟
ولا بتطفش .. وتخلي ما بالقلب بالقلب.. وتقفل على الموضوع ؟؟
في واحد اخونا كدة ومافى داعي لذكر الاسامي لانو قالو السترة والفضيحة متباريات المهم الراجل كان بحب واحدة موت وكل يوم بالليل يقول لي بكره بصارحها واليحصل يحصل والصباح يبقى مسكين ومما يشوفا تدخل فيه الرجفة ينسى حتى اسمو ومرت الايام شهر ورا شهر ورا شهر لغاية ما تم سنتين حتى بعد كدة صاحبنا اتشجع وكشح مشاعرو ...
وجات الفضيحه
قالت ليهو انا بعتبرك زي أخوى
وانتهت القصه
وصاحبنا النفسات الدخلت فيه لغاية حسي ما مرقت
رد مع اقتباس
المفضلات