كعادة أهلنا السودانيين، ذهبت مع عائلتي لزيارة منزل احد الاصدقاء للسلام والتعرف على عائلته التي حضرت لتوها من السودان، وطبعا سلمنا على زوجته وأولاده والونسة جرت وسألناها عن الاهل بالسودان وكيف حالهم وكنا سعيدين جدا اننا نتعرف عليهم ونعرف شيء عن حال الاهل.
بعد دقائق دخل علينا ابن الاخ الصديق وهو طفل صغير عمره حوالي 9 سنوات، سلم علينا وجلس يستمع الى الونسة والنقاش الدائر حول السودان والتغيرات الحاصلة وحرصنا الشديد لمعرفة كل شيء عن البلد بكل شوق خاصة عن التطورات الاخيرة التي حصلت ولم نسمع أو نعرف عنها أي شيء.
سألت الطفل عن اسمه وبدأت اداعب فيه بالسؤال عن وجه الاختلاف بين السودان وبين مدينتنا. قال لي الطفل والله بلدكم دي جميلة جدا وكمان عجبتني شديد. أنا بشوف ناس كثيره راكبه عربات وشوارعكم نظيفة وكهربتكم ما بتنقطع.
كلام يطلع من طفل زي ده، أنا قلت أكيد الطفل ده يكون ذكي وبيفهم كويس. جلس الطفل يشاهد التلفاز ويظهر انه كان متابع برنامج للاطفال جذب كل انتباهه. بعد لحظات ادار وجهه ناحيتي مبتسما.. وفي سخرية قال لي "عمو .. الاولاد الشايفهم في التلفزيون ديل الظاهر عليهم – حناكيش – ".
قمت ضحكت معاهو – مكابره ساكت – لكن ما كنت فاهم كلمة – حناكيش دي معناها شنو. والشيء اللى خلاني اغتاظ اكثر انه أبوه كان بيضحك في كلامه وأنا ما فاهم حاجه.. زي الاطرش تبع الزفة.
سألت أبو الطفل بصوت خافت حتى لايسمعني الطفل ويقوم يضحك على ويعمل لي فضيحة.. وقلت ليه يا أخوي أنحنا ما فاهمين ولدك ده بيقول في شنو، انتو الاثنين فقط اللى فاهمين الموضوع وبتضحكوا.. ما تشرح لينا كلمة حناكيش دي شنو؟.
أبو الطفل بدل ما يفهمني المعني، قام هو ذاته يضحك على وقال لي غريبه؟؟.. بالله من جد ما بتعرف معنى كلمة حناكيش شنو؟؟.. قلت ليه خلينا من حركاتك دي كدى اشرح لينا معنى الكلمة.. شرحها لي وقال حناكيش جمع حنكوش والحنكوش هو الشخص العامل فيها – مرتاح ومروق خالص -.
قلت ليه يا خي انحنا غايبين عن البلد فترة طويلة وبالله اتكلموا لينا بلغة نقدر نفهما. قال لي انتو غايتو فايتاكم حاجات كثيره ومافيش حل غير انكم تسافروا السودان تتعلموا كلمات جديدة وتجوا راجعين ثاني.
والله فعلا فايته علينا حاجات زي دي كثيره وما تقولوا لي بالغت لو قلت ليكم أنا أثناء دخولي في البورد لاحظت في كلمات تستعمل ما قادر أفهمها مثل الكلمات التالية:
لووووووووووووووووووول
خخخخخخخخخخخخ
وغيرها؟؟؟؟؟؟
واللى يصلى على النبي.. عايزين لينا واحد -حنيكيش - كده يفهمنا اللغة الفاتت علينا دي ويزودنا بكلمات اخرى حنكوشيه علشان نقدر نتساير مع الزمن.
ولكم ودي،
عزيز
هيوستن - تكساس
رد مع اقتباس
المفضلات