رائعنا هيثم عبد العال ساتي : وبعد
أهلا بكم مجدداً من بياتكم القاسي علينا من فترة فها هو الشتاء يرحل وفي خواتيمه ولا عذر من التسبب به شكلاً وموضوعاً بلغتكم القانونية أمام حيثياتنا ووقائعنا وأسانيدنا ودفوعنا وصحة إستدلالالتنا القائمة على صحيح الهدي والأسباب فهلا دلفتم فنحن يا سيدي :
كم نشتاق لبوحك الجاي والقبيل
غناوي ومواقف سمحة بالحيل
وأنت جمال ملامحنا الباقي فضل
من ود بلد خيرو وصل وإتفرق
يستحيل وأنت خريف تغادر بيوتنا
ولشتولنا الدابها نية تفوت
أحاجينا اليدوبها بدت.. بقت سكات نضم
وشبعت موت
فوق عناقريب البيوت
تفوت ومعاك فاطنة السمحة
و الشاطر حسن دريباتو لسة قدامو نيئة
في مشوار طويل لمشروع حضاري
موعود موجود مفقود
ملوهو تكبير وتهليل
للشاطر و فاطنة السمحة
ما ختوا خاطر لأحلامهم الصغيرة الحلوة
بقت واقع مسكين ماثل
هروب من نهار بلد مائل
لقلق غربة اوراقو ما بلمها فائل
وحاتك ما تغيب أكثر من الفات ....
لسه باقي شوية فينا .....الفات الفات
ولو في أيدينو ....أقل من سبع لفات
والفيل الفيل في يدينو
وعمي عمر بياع الزيت
طلق ... وباع البيت ...الكان
تحت عمود كهرباء لسة منور
وسط بيوت فريق مضلم لسة متصبر
مستني جمرة خبيثة لضوئه تكسر
مناهو في رفع العزاء يكون بس منور
فوق بيوت الفريق الضلمة
والله عمودا فيهو شوية نخوة
متمنى متين عنو تزيح العتمة
ويسمر مع صغار
في شليل وينو خطفو الدودو
شليل وين راح خطفو التمساح
شليل ما هب وراح وشليل ما أكلوا تمساح إلا في مخيلة صغار
تمساحنا الخرافي نكرة وسط تماسيح كثيرة
بحق وحقيقة سرقت منا حتى الفكرة
و أحلام الكبار لسة بتستنى
مسكين الظلام الغطى جنبات ....بلدنا
بكذبة تمكنا ....
رد مع اقتباس
المشاركة الأصلية كتبت بواسطة مرتضى يوسف العركي
المفضلات