والله انت بتحبو الشمارات وأنا بحب الذكريات
طبعا انا اقصد يوم دخلت المدرسة الابتدائية ومن حسن حظي كانت مدرسة جبرونا الابتدائية وانا كنت ساكن بجوار محطة آخر الشارع بشارع سنكات جبرونا ( والحقيقة انا ماعارف سنكات دي جات من وين ) طبعا محطة آخر الشارع كانت مع بداية مدرسة الكورة وانت جاي من السوق الكبير متجه لجبرونا والشارع كان بيقفل عند مدرسة الكورة للبنات يعني كانت في حيطة بين مدرسة الكورة ومدرسة بانت الابتدائية للاولاد وبصات جبرونا كانت بتلف يمين عندما تصل محطة آخر الشارع
المهم دخلوني المدرسة متأخر والدراسة فاتتني بحدود عشرة أيام وأول ما دخلت الفصل قعدت أبكي لاني لقيت ناس كبار في الفصل وخاصة في الصف الاخير تعرف كان في منو من العتاولة ؟
كان هناك ابراهيم كشك ومدني كشك والفاتح موسى واخرين ولاانسي الاستاذ حيدر يوسف جاب لي حلاوة كرملا عشان اسكت
وكانت ايام جميلة وكانت المدرسة جميلة وفيها الطوب مضروب بالجير ومغزوز في الارض علي اشكال ورسومات وكان الناظر فى ذلك الوقت العمري والاساتذة كما ذكرت حيدر يوسف وبابتوت وأبوسمرة والفراش حاج احمد وستات الفطور 1ــ عيوشة 2 ــ صبرة ( والدة التاج وكان بنقول ليه التاج صبرة ) 3 ـــ والشول . وطبعا كان استاذ حيدر يوسف عنده فلقة والفلقة طبعا عبارة عن عصاية في وسطها حبل مربوط بطرفينه وكان بيدخل رجول الواحد فينا اذا غلط وينادي اتنين من خط ميه غربا طبعا ابراهيم كشك والفاتح موسي مابيصدقوا يجوا رافعين الفلقة يعني رجولنا فوق وايادينا مالاحقة الواطة وهاك ياعلقة ( طبعا خط ميه غربا معروف في الجغرافيا )
وكان بيدرس معانا في الفصل احمد عبدالله ( الاستاذ بالمدرسة الشرقية الآن )
والثلاثي المذكورين أعلاه وعادل احمد ابراهيم من التجارب وموسي عواض ومحمد ابوالعاص ومن جبرونا صلاح أخو امامه وكان عندها روضة في جبرونا وفي سنة رابعة جانا جلال أجعص ومن ضمن الحصص في سنة تالتة كانت حصة الطبيعة وكانت من اجمل الحصص وكان استاذ الطبيعة بيطلب مننا نجيب ريش الطيور ورجول الطيور وكنا بنمشي الجبل وطبعا الجبل في مدني معناه المكان الذي يجمع ويحرق فيه ناس البلدية اوساخ مدينة مدني كلها وكان هذا الجبل غرب المدرسة يعني جنب سوق جبرونا وكنا هناك نلقي الفلاتة يبحتوا وكنا نلقي طير السنبر وابو مركوب وكنا اذا تشاكلنا نقول للواحد طالعني الجبل والله انا ما عارف كتبت الكلام دا كيف تقول سكران
بالله قولوا ماشاء الله مانتلحس
وبالله اكتبوا رايكم وذكرياتكم واستفساراتكم حتي تشجعونا نكتب
رد مع اقتباس
المفضلات