شكيتك لي مالك روحي يا كلب بتول . . كلب بتول المدوعل هجم الراجل هجيمة السواد و الرماد . . حاج خدر سيد الدكان جاء يتدبى بي عند بيت بتول . . و بيت بتول في زقاق . . و الزقاق ضيق . . و الكلب مدوعل و شراني . . و حاج خدر خوّاف . . الكلب نفش شعرو . . و مرق سنيناتو في السهلة . . و قام علي حاج خدر قومة العدو . . و حاج خدر المخضوض غلبو البسويهو . . و كباهو جااااااااز راصو عديييييل . . و ما لقى ليهو جيهة يجري عليها . . انعصر علي حيطة بيت بتول . . و كرعينو سابت . . و برك في الواطة . . و قعد يهابش في الواطة . . كان يلقى ليهو حجر يفلع بيها كلب الجن دا . . و الا كان يلقى ليهو قبضة تراب يكتحو بيها . . لاكين ما لقى ليهو شيء ينجدو غير خشمو . . و حاج خدر بعد لقى خشمو . . قرر أن يفتحه على أوسع أبوابه مستجيراً . . وااااااااااااااااااااااااااااااااااااااااااااااااا ااااي . . شفتو جنس النصيبة دي؟؟؟؟ . . و كلب بتول بعد سمع قولة (واي) زات الايقاع السباعي العاتي . . قعد يضحك علي حاج خدر . . و قرر يترك حاج خدر في حالو . . و حاج خدر لملم باقي كرعينو و قعد يتلفت يمكن يكون في زول شافو أو سمعو . . و لكنه لم يجد جنس بشر . . برم شنبو و نفخ سدرو و قعد يقدل في نص الزقاق.
و أمام دكان حاج خدر . . بتول المدوعلة ست الكلب المدوعل جات تقدل مثل كلبها . . وقفت قدام حاج خدر و صاحت به و هي شذرانة . . يا حااااااااج خيييييدر . . يا حاج خييييدر . . يا خدووووووري . . حاج خدر الفار قعد يلعب في عبو . . و قال ليها مهجوما و مخضوضاً . . ازيك يا بتول . . نعل مافي عوجة؟؟؟ . . قالت ليهو . . عوجة طب مافي . . لاكين أديني نص رطل هيل زيت سمسم . . حاج خدر يناولها نص رطل سمسم مرتاباً . . و بتول الشنافة تعاين لي نص الرطل . . و تقول لي حاج خدر و وشها مكرفس . . أجي يا حاج خدر . . أجي؟؟؟ . . هسع دا نص رطل دا؟؟؟ . . هسع دا بقدر أصم بيهو خشمي من الهجيمة الشفتها البارح في الزقاق ؟؟؟ .
خجيجة بت أخت بتول جات من بحر أبيض لزيارة خالتها بتول . . خجيجة مدعولة و مدردمة متل بتول و متل كلب بتول . . و خجيجة حوصة لاكين كلب بتول ما أحوص . . و خجيجة المراهقة داك الليلة تمرق من بيت بتول خالتها . . و تقيف في نص الزقاق الذي شهد موقعة (وااااااااااااااااااااااااااااااي) . . و شاء الله أنو يشوفوها نفرين . . و يحبوها نفرين . . شافها سعد ود حاج خدر القال (وااااي) من فوق حيطة بيتهم. . و كمان شافها سعيد ود عم سعد ود خدر القال (وااااي) برضو من فوق حيطة بيتهم . . سعيد رفع ليها ايدو و قال ليها : هللللللوووووو خجيجة . . . و خجيجة من يومها حوصة و نظرها طاشي . . لكنها تحب سعيد حباً جما . . خجيجة ترد التحية لسعيد . . و ترفع ليهو ايدها في لهفة و شوق . . أهليييييييييين يا أبو الشباب . . و يد خجيجة تترفع حسب احداثيات عيونها المشغلبات . . و في هذه الاحداثيات سعيد كان طاشي . . و تحية خجيجة يتلقاها سعد علي صمة خشمو . . شوفتو الهوبلي دا كيفن؟؟؟ . . و سعد يفرح بي حب خجيجة أم عين طاشة . . و ينبسط و سدرو ينشرح . . و سعيد يعصر ضنبو و ينزل من فوق الحيطة مزموماً مدحورا . . و عينيهو اليوم داك ما غمدن من سوات خجيجة . . اليوم التاني تاني خجيجة تقيف تاني في زقاق الهجيمة . . و سعيد و سعد لابدين في انتظارها . . و المرة دي سعد يرفع ليها ايدو مشتاقاً ولهانا . . و يقول ليها . . هااااااااااااااااااااي خجوووووو . . و خديجة من يومها مكجنة سعد . . و تقوم تدنقر في الواطة . . و تملئ ايدها تراب و تأشر لي سعد . . الترابة دي في خشمك . . لاكين قبضة التراب ما يشوفها سعد . . يشوفها سعيد المنحوس . . و سعيد تاني يرجع و ينبطح في سريرو محتاراً في قصف خجيجة العشوائي.
و زقاق الهجيمة يشهد هجيمة أخرى . . حاج خدر جابنو كرعينو بي زقاق (وااااااي) . . و لكن حاج خدر المرة دي ما يشوف كلب بتول . . و كلب بتول لابد في حفرة . . و حاج خدر يمشي في الزقاق متبختراً . . و الكلب ابن اللذينا يمرق من الحفرة . . و يكرر نفس الفيلم الهندي في حاج خدر . . و حاج خدر المرة دي ما يلقى خشمو عشان يسرخ بيهو . . لاكين لقى حيطة ود أخوهو سعيد المنحوس . . حاج خدر شب في حيطة ناس سعيد المنحوس. . و سروالو وررررررر انشرط . . حاج خدر اتلفت بي قفاهو . . و قال . . علي النعمة يا بتول كان كنتي لابدة . . تكوني بالغتي.
. اليوم التاني خجيجة الحوصة بت بحر أبيض . . تجي لي دكان خدر و تقول لي حاج خدر . . يا حاج خدر . . بتول خالتي رسلتني ليك . . قالت ليك . . أديني زيت سمسم . . و بدل نص رطل خليهو رطل كامل . . و قلت ليك كان عندك شيء انشرط أنضم ليك ابرة بي خيت و جيبها عشان أخيتو ليك.
خجيجة تقرر ترجع بحر أبيض . . و لاكين قبل رجوعها لي بحر أبيض . . قررت تحسم موضوع حبها لي سعيد . . و توقف سعد عند حدو . . و قررت تكتب ليهم خطاب . . توضح فيهو اللبس الذي حصل . . و أنها بتموت في سعيد . . و بتكره سعد صاحب الحظية . . و كتبت خطاب . . يحوي مكنونات قلبها . . و مرقت في نص زقاق (وااااااي) . . و شافت سعيد لابد فوق حيطتم . . و شافت سعد لابد فوق حيطتم . . و كتبت في الخطاب . . يا القاعد فوق الحيطة البي يميني . . أنا بكرهك . . و يا القاعد فوق الحيطة البي شمالي . . أنا بحبك . . و خجيجة تخت الخطاب في نص زقاق (واااااي) . . و تغطي الخطاب بي درابة . . و تقوم جارية . . و سعد و سعيد يجوا جارين من عليائهم . . و يتشاكلوا في الخطاب . . و بعد مناتلة و معافرة . . سعد و سعيد يحتاروا في خطاب خجيجة أم عين طاشة . . وينو يمين خجيجة؟؟؟ . . و وينو شمال خجيجة ؟؟؟
و التسريبات مستمرة
رد مع اقتباس
المشاركة الأصلية كتبت بواسطة عبدالرحمن مدثر
المفضلات