نيمة العاقب وحكومة الولايه !!!
جاء موظف الولايه على عجل يتبعه ثلة من العساكر وقد عقدت الدهشة وجوه الجالسين فى ذلك المكان الذى يشع بهجه ويقطر حبورا...
موظف الولايه : يا اخوانا لو سمحتو تخلوا لينا المكان ده!!!
رد احدهم باستغراب : قلته شنو يا اخوى؟؟؟؟ وياتو مكان ده النخليهو ليكم ؟؟؟؟
موظف الولايه : نحن عندنا امر اخلاء من المجلس يدعمه خطاب من حكومة الولايه نفسها !!!
رد احد الجلسين فى غيظ : يا اخوى كدى براحه فهمنا الحاصل ؟؟؟؟
موظف الولايه : يا اخوى اخلى المكان وبعدين لو عندك استفسار
امشى استفسر هنالك!!! محل الناس بى تستفسر يا اخوى !!!
بى نمشى مالنا ما بنمشى!!!!
كان ذلك المكان موضوع النقاش وعاء يستوعب كل التعابى وغير التعابى بكل اريحيه ...
كان المكان عبارة عن نيمه وارفة الظلال .. كثيفة الاغصان ...
تستوعب كل العابرين بها لترمى بظلها الوارف بعيدا الى امد غير معلوم ...
كان الكل يحب الجلوس فيها والتحلق حولها وتبادل الاراء وتفريج الهموم والضحك من الاعماق ...
كانت كالنيل فى صفائها .. وكالقمر فى بهائها ... عندما تمر بالقرب منها تحس بجمال الدنيا كله ...
ريحة الدعاش ... تلفحك من كل جانب ...
وطيبة اهلنا الحنان تدعوك للجلوس ولو الى حين ....
توجه نفر كريم من قاطنى ظل النيمه الى حكومة الولايه لاستطلاع الامر ( وتقصى الحقائق)
هرج ومرج ساد المكان .. لا احد يريد ان يستمع لاحد ... ولا احد يدرى من هو الشخص المخول له بحل المشكله ....
بعد ساعات من الشد والجذب والانتظار الممل القاتل انبرى احد مسؤلى الولايه قائلا :
يا اخوانا كدى روقو شويه ... بعدين الموضوع ده ما عندنا نحن ... امشو المحليه بتحلو ليكم
طيب ياخ ما كان تقولو لينا كده من الاول ؟؟؟ !!!
اسى قلنا ليكم يا اخوى !!!! امشو المحليه واطرحو ليها موضوعكم !!!
وكان ما حلتو يا اخوى ؟؟؟؟
لو ما حلتو تنصاعو للاوامر وتخلو المكان .!!!
نحن اخلاء ما بى نخلى !!!
توجه الجميع الى مبنى المحليه عسى ولعل ... وهنالك قابلهم الضابط المسئول ودون ان يلقى عليهم التحيه خاطبهم قائلا:
يتفضلوا اثنين منكم على مكتبى لو سمحتو ؟؟؟
انبرى اثنان من رواد النيمه لعرض مشكلتهم لذلك الضابط ..
يا اخوانا انتو ما عارفين البتسو فيهو ده غلط ... وانو التجمهر ممنوع!!!
يا سعادتك نحن ما متجمهرين ... نحن عاوزين نعرف الحاصل شنو ؟؟
يا اخوانا بعد دراسة مستفيضه رات المحليه ان موقع النيمه مناسب جدا لاقامة مشروع استثمارى خدمى ضخم يخدم المحليه والولايه وبعدين الناس دفعوا خلاص وما عاوزين مشاكل
دفعوا شنو يا اخوى ؟؟؟ نحن النيمه ما بى نتنازل عنها ... ولو عاوزين تعملوا اى مشروع فى الف مكان غيرو ..!!!
المسئول : يا اخوانا بصراحه كدى النيمه دى بقت تشكل خطر على الامن العام !!!
الجمهره تحت ظلها زادت !!! وده مخالف للقانون!!!
يا اخوى جمهرة شنو؟؟؟؟ مكان هبابى مرشوش يستجم فيه الكل ويروحو عن همومهم تقول لى تجمهر !!! شايفنا مسورنها بى سلك شائك ؟؟؟ ولا ناصبين فيها كرسى نقاش ؟؟
المسئول : يا جماعة الخير الامر صدر خلاص ولازم تخلوا ... وبعدين يا اخوانا انا عندى اجتماع ... عن اذنكم
كان الجميع فى صدمه من حديث هذا المسئول .... والكل اصرارا فى مقاومة هذا القرار والمحافظه على النيمه ولمتها ....
جمع غفير احتشد فى ظل تلك النيمه .... علا الهتاف منددا بالقرار ....
حشد من العساكر طوقت المكان .... اجماع غريب لدى الكل بالتمسك بتلك النيمه ... حتى الاطفال والنساء ...
لا يدرى احد من اين اتت كل تلك الحشود والاصطفاف لمنع قرار الازاله ...
حشد من مصورى التلفزيونات العالميه .... لتصوير ذلك الحدث الذى اكتسب اهميه اخرجته من طور المحليه الى طور العالميه ...
. فى طرف قصى كانت تقبع جرافه عملاقه فى اتنظار اشارة البدء ...
الجو مشحون بالتوتر والكل فى ترقب وانتظار ....
حشد جماهيرى عريض التف حول النيمه مشكلا دائرة عملاقه ....
قبعات خضراء امتلاء بها المكان ... همهمات تصدر من جنود الاحتياطى المركزى ...
. هذا هو المشهد فى ذلك اليوم الخريفى
وقف صاحب النيمه فى تحدى ظاهر فى انتظار ما تسفر عنه الاحداث ....
فجأه تحركت الجرافه معلنة البدء فى ازاله ذلك العلم البارز ( النيمه ) .انتبه الكل وعيونهم على تلك الجرافه ...
بينما الكل فى ترقب والجو ينذر بعاصفه قويه ... هبطت طائره عاموديه وسط تلك الدائره التى شكلها النيامه ( نسبة الىنيمه ) ......
عدد من مسئولى الحكومه المركزيه يتقدمهم وزير كبير كانو اول النازلين من تلك الطائره
... تبعهم مسئول فى الامم المتحده بدرجة وزير وعدد من الفنانين العالميين سفراء النوايا الحسنه ..
. لا تستطيع ان توصف مدى الدهشه التى اصابت الكل من هذا التطور المفاجئ ...توقفت الجرافه فى منتصف الطريق ... و تقدم مسئول الامم المتحد ه نحو الجموع المحتشده واخرج من جيبه ورقه ناولها لصاحب النيمه العاقب ود المصباح وهو يقول له :
الف مبروك ... لن تزال النيمه .... لانه قد تم ادراجها ضمن التراث العالمى الذى يجب المحافظه عليه وهذه شهادة من منظمة التراث العالمى بذلك
رد مع اقتباس
المشاركة الأصلية كتبت بواسطة مدنيّة
المفضلات