ضيفة الكرسي الساخن لهذا الإسبوع الرائعة تشيزو

[LighT^RosE]

تعودنا في بداية القول أن نبدأ بسم الله الرحمن الرحيم
غاليتي مرحب بيك في الكرسي الساخن و إنشاءالله يكون برد و سلام عليك و صدقيني هو لذيذ خالص
كالمعتاد بوجه ليك أول سؤال و هو التعريف بالبطاقة الشخصية..
ولك مني كل الحب و الإحترام.

[wadmadani]

وتاني سؤال من باب المشاركه بس

اول ولد حا تسميهو منو

[aborawan]

في البدايه مرحب بيك في الكرسي وعايز منك في البدايه تحكي لينا كيف سجلتي في المنتدى وكيف سمعتي عنو ؟


عايز منك تختاري لينا 5 من الاعضاء و 3 من العضوات وتكتبي لينا مقابل كل عضو تعليق مناسب على شخصيته على حسب احساسك وحسب الانتي متوقعاه للعضو سواء بتعرفيه او ما بتعرفيه

كمان عايزك توصفي لي شعورك وانتى ضيفه الكرسي للاسبوع ده ويادوب انتى في البداية


كمان عايز اعرف مدى الاستفادة الاستفدتيها من المنتدى خلال تواجدك في الايام القليلة الفاتو ديل وهل كونتي علاقات من المنتدى

[waheeb]

وسؤالي ليك عاوزه تدرسي شنو في المستقبل ان شاء الله؟ ولو جاك ود الحلال الان بتقبليهو ولا بتقولي دايره أقرا؟
مع تحياتي.........

[حنيني اليك]

بعد السلام والتحيه

رايك شنو في الفتن البتحصل الايام دي في السودان

والحل شنو في نظرك؟


هل يوجد شبه بين بوش وبين شارون والبشير؟

تحياتي ولنا عوده

[LighT^RosE]

weeeeenk ya cshizo ta3ali rode saree3

[schizo]

بسم الله الرحمن الرحيم
بعد الود والتحية....
بشكركم على استقبالكم الحافل لي ده بهذا الكم من الاسئلة===>ودا حالتو نحن لسة في البداية
وعلشان ما اطول عليكم..
يلا نبدا بسم الله

البطاقة الشخصية مع اني ذكرتها سابقا ياlight rose ...نقولا تاني مع شوية اضافات:

الاسم:منى محمد احمد
العمر:16سنة و3شهور تقريبا
المرحلة الدراسية:الثانوية......بالتحديد في الصف الثاني.
الحالة الاجتماعية:آنسة.
مكان الاقامة الحالية:السعودية_ المنطقة الشرقية.
الهوايات:القراءة وكتابة الخواطر .....وفي غيرهم كتير لكن انا اخترت اهم اتنين.


ولنا عودة

[طارق التوم]

الظاهر انو سخانة الكرسى مع رمضان شردو تشيزو المهم رايك فى صفحة ودمدنى بكل صراحه اعضاء ومواضيع
وكل المنى وكل الامانى الممكنه

[schizo]

والله يا المشتاق عندك اسئلة كده بتعرف ليها براك....
والله مع انو الموضوع دا ما خطر على بالي لكن لمن شفت سؤالك اول اسم خطر على بالي محمد....

ولو سألتني عن السبب بقول ليك يمكن لأنو الاسم دا منتشر في عائلتنا بشكل ما طبيعي



لنا عودة....

[حنين]

تشيزو سلام كتير والله وسؤالى هو كم عدد سنين الغربه وما ناوين ترجعو وبرضو رائك شنو فى تأثير الغربه على الشباب

[schizo]

بالنسبة لاستاذنا ابو روان:
طبعا حكاية تسجيلي في المنتدى دي اقترحا لي الوالد
لانو هو من المتابعين لموقع ودمدني والمنتدى.....لكن للاسف انو ما مسجل
وانا ما كنت عارفة اي شي عن المنتدى دا ...
فهو اقترح علي انو اشارك فيهو وافيد واستفيد....


بالنسبة لسؤالك التاني انا كنت بفضل انك ما تحدد لي العدد
لكن بما انك حددتو وانتهينا حا ابدا بسم الله...
أولا:Light roseD( رأيي فيك .. انسانة مبدعة .. ومرحة ..وكتاباتك رائعة ..وعندك شخصية ممتازة ..ولكن بلمس فيك شوية حزن ..طبعا دا ما بمنع كونك مبدعة جدا جدا جدا في كتاباتك و ردودك لانو الابداع بعض الاحيان بتولد من احاسيس زي الحزن مثلا ..ممكن يكون عندك هدف .. لكن لسه ما أتوصلت ليهو..... أمممممم :: طبعا دا الحاضر في بالي حاليا وصدقيني انتي اغلى من كده بكتييييييير..لكن والله ضاعت الكلمات وخانتني الجمل .. ان شاء الله ما تزعلي منى لانو دا رأي بكل صراحة ..

تانيا روبي(انتي انسانة صاحبة سلوك رفيع، بتقدري تصححي وتحاسبي نفسك بنفسك بدون توجيهات اي زول. وما بتتعاملي مع اي انسان.....لانك بتفتشي دايما لانسان متوافق معاك أو متعادل معاك في القدرة العقلية. بتنجذبي للناس بسرعة شديدة ودا ما بفضل الجمال الخارجي لكن بفعل السحر للعقلية المقابلة. الأنجذاب الحسي ما مهم بالنسبة ليك بالدرجة الأولي. وبتحتاجي بإستمرارانك تثبتي انك الأفضل خاصة لنفسك. عندك العقلية المتفتحة والرومانسية برضو....انشا الله يكون كلامي غالبيتو صاح )).

تالتا حلوة وامورة(انا بتوقع أنك كتومه ، ومنطويه علي نفسك وخجوله. جذابه جداً وحساسه وعطوفه، لكن ما بتسمحي لنفسك أنك تكون كده إلا مع وجود أصدقائك والناس البتحبيهم. عندك من الصبر ما يكفي عشان تلقي الصديق او الصديقة الوفية بالنسبة ليك. كريمه جداً وناكره لذاتك في سبيل انك ترضي غيرك. طيبه بطبيعتك وحلوة المعاشرة و انا متأكدة انك حا تكوني صديقة ورفيقة ممتازة لاي زول يختارك....وانشاء الله اكون ما خبصت وجبت الشمال في الجنوب والشرق في الغرب ))


لنا عودة

[schizo]

معليش كان في تعبيرات طلعت بالغلط

[schizo]

ونرجع نكمل لابو روان

ابوروان ===>مين قدك يا عم((طبعك رومانسي وعاطفي جدا.(( شريكة حياتك)) مكانتا واهميتا فوق كل شي عندك. عندك قاموس الحب الخاص بيك .ب تحب في شريكة حياتك أنو تبادلك نفس شعورك بنفس الكمية او بزيادة . الحب هو الطاقة بالنسبة ليك ومع انك عارف ومتأكد انو حبيبتك بتموت فيك لكنبتميل تتأكد دايما انو هل حبك مقدر من الطرف التاني ولا لا......وياريت اكون قدرت على جزء بسيط من شخصيتك)

امير عبدالباقي ((بتوقع انك متفائل والحماس ماليك، مبدع وخلاق ، شخصيتك بتجذب الحواليك لانهم بحسو باحساسك الدافي. أنت أستاذ بفطرتك وبتحب دايما أنك تشارك الجميع بحكمتك وعلمك . مهما عملت ، فأنت بتفرض احترامك كمثل أعلى للناس عشان ينتهجو اسلوبك......وياريت اكون جبتك صاح)


ولنا عودة

[schizo]

نرجع ونكمل

بالنسبة لابوريلان ((بتوقع انك أنسان حساس , وحذر , ومنتبه وعملي
وشاطر ,و موهوب , و متواضع ... وانت ما من النوع البيقيم
صداقاتو بسرعة أو بطريقة سهلة , لكن وفائك لاصحابك واحبابك شديد وبتتوقع منهم يعاملوك بنفس الطريقة .......والناس البعرفونك عز المعرفة عارفين ومتأكدين انو صعب يهزو ثقتك في الناس البتحبهم .....لكن انت برضو صعب عليك جدا انك تصدق الانسان اذا حصل موقف هز فيهو ثقتك بيهو......===>ولا دكتورة نفسية صح؟؟ ))


اخونا زيكو منيب ((رايي انك شخصية نشيطة , حيوية , ممتعة , مسلية , عملية , ودايماً مبتسم....بتحب تجذب الانتباه , وفوق ده انت انسان متوازي وما بتحب تزعج الناس..... ودا البيخليهم يتأقلموا ويندمجو معاك بسرعة.....وانت بتحاول دايماً تبهج الغير وتساعدهم وترفع من معنوياتهم وبتميل للمجاملة جدا.....ودا كلو عشان ما تجرح مشاعر اي انسان حتى لو كان على حسابك.....واتمنى اني اكون قدرت على جزء معين فيك))


ولنا عودة

[schizo]

واخيرا وليس اخرا وهيب ((انا شايفة انو شخصيتك اجتماعية من الدرجة الأولى، محبوبة من الكل عشان بشاشتك وابتسامتك الدايمين، وغالبا ما بتكون الملجأ لاصحابك البعانو من ضغوطات نفسية ومشكلات اجتماعية عشان طريقتك في الوصول لقلوبهم ببساطة شديدة وبسلاسة أسلوبك وسلامة أفكارك ورغبتك الأكيدة والواضحة في التواصل مع كل الحواليك........وطبعا كلامي بكون فيهو الصح وفيهو الغلط ))


بالنسبة لشعوري وانا في الكرسي الساخن يا ابوروان
ما بنكر انو في شوية توتر لكن والله بقدر ما انا متوترة بقدر ما انا سعيدة لجلوسي فيهو

وبالنسبة للحاجات الاستفدتها من المنتدى في فترة وجودي فيهو...حاجات لاتعد ولا تحصى
لكن اهم ما فيها اني كونت صداقات انا سعيدة بيها جدا وقريت مواضيع ساعدتني سواء في حياتي الخاصة او في دراستي.....


ولنا عودة

[مازن الجمّال]

رايك شنو في البوتقة التعجبية!!؟؟

[بابكر]

عاوزك يجاوبى على سؤال rastan man وبس خلاص

[زيكو منيب]

اهلا وسهلا با ختنا منى

انتي قلتي من هواياتك الخواطر

ممكن تكتبي لينا وحده

[schizo]

رجعنا ونبدا بالرد على سؤال وهيب
بالنسبة لعايزة ادرس شنو في المستقبل دي فأنا مترددة مابين الطب((عشان هو رغبة امي وابوي)) والهندسة((عشان عائلتنا كلها تقريبا هندسة مع اختلاف المجالات طبعا))
لكن انا شخصيا ما منحازة لاي من الوجهتين
وربنا يسهل

وبالنسبة لحكاية ود الحلال دي
انا من رايي انو البت اذا كان عندها طموح وإرادة ورغبة في التفوق والنجاح يعني عايزة تكمل دراستا وتجيب شهادة عاليه انها ماتتزوج لأنو الزواج عندو مسؤوليات والتزامات مابتتوافق مع الدراسه .
لكن لو كان ود حلال فعلا زي ما قلت وفاهم الموقف كويس.....ليه لا.....


ولنا عودة

[schizo]

بالنسبة لاخونا حنيني اليك
والله ورطتني بسؤالك ده لانو انا معلوماتي سياسياً ضعيفة شديد وحدي مادة التاريخ البنقراها دي
كن بحاول اقول اي شي
بالنسبة لسؤالك الاول
والله انا ما فهمت قصدك بالفتن لكن بجاوبك بالحاجة الفهمتها
السودان في الفترة الاخيرة دي بمر بأخطر المراحل في تاريخو السياسي، وللأسف أنو البحصل في السودان دا بحصل بصمت وبدون اي ضجيج إعلامي، زي الكأنو حاصل بموافقة ومباركة الشعب السوداني، والملف السوداني كلو في يد أمريكا من خلال وكلائها في منطقة ((كينيا)) المختصة بملف الجنوب، و((تشاد)) المختصة بملف دارفور..'.ومن هنا انا عايزة اوضح انو كل الحاصل دا بسبب امريكا.....هي طبعا مغطية على نفسها بقولها انو هي السبب في عقد اتفاقية السلام وكلام زي دا
لكن لو جينا للواقع.....بنلقى انها بتشجع الفتن دي بطريقة غير مباشرة عشان تصل لهدف معين.
ولو جينا للسببب بنلقى انو سبب قديم جدا....وهو انو امريكا عايزة تنهي كل الدول المعارضة او دول الرفض.........زي العراق((وقدرو عليها)) وسوريا وليبيا.....وغيرهم كتير.....وطبعا السودان واحد من الدول دي.

ولنا عودة

[schizo]

نتابع ونجاوب على سؤالك التاني
طبعا انا لغاية هسي ما عارفة البشير دا علاقتو ببوش وشارون شنو
وعايزاك تقول لي انت اذا في وجه شبه بينو وبينهم مخفي علي
لكن بالنسبة لوجه الشبه بين بوش وشارون
في وجه شبه كبير بين شخصية بوش وشارون، وفي توافق وتطابق فوق التصور بين نفسياتم وغاياتم، وبين وسائلم لتحقيق غاياتم واهدافم. وفي نفس الفترة الطلع بيها شارون بمشروعو الدموي طلع بوش بمشروعو الناري
وبعدين على رأس اوجه التشابه بينم انو هم الاتنين معاديين للاسلام والمسلمين....


اعفوني من الاسئلة السياسية تاني

لنا عودة

[schizo]

الغالي طارق التوم
والله ود مدني بمنزلة بيتي التاني
والاعضاء اقل ما يمكن ان يقال عنهم انهم رائعين بمعنى الكلمة
ولو قعدت اتكلم سنين لقدام ما بقدر اوصف روعتكم
ربنا يخليكم ويديمكم لي



اخوي العزيز حنين
انا تقريبا عايشة في الغربة سنين عمري كلها.....يعني حتى ولادتي كانت بره.
ورجعتنا دي انشاء الله حا تكون بعد سنتين.....
وبالنسبة لتأثير الغربة في منها الشي الايجابي وفي منها الشي السلبي
وسواء كان الشي ايجابي او سلبي فدا بيحددوهو الاب والام من خلال تربيتهم لابنائهم

لنا عودة

[schizo]

بالنسبة لاستفسار rasta man المدعوم من جهة اخونا بابكر
انا رايي انو البوتقة التعجبية هي قيم اروستقراطية بحتة معلقة بالواقع الافلاطوني
وهي ذات استرتيجيات بروتوكولية متكاملة تتيح للجميع فرصة استنفاذ اللامنتمين لهذه الفئة......دا رايي باقتضاب شديد


لنا عودة

[schizo]

رجعنا لزيكو منيب
تكرم عيونك يا زيكو....ودي خاطرة عشان خاطرك:


أمل انت ام الم.....شهد انت ام سهد......داء انت ام دواء
اخبرني من تكون؟؟؟؟؟من انت؟؟؟؟؟كي اعرفك بنفسي.....
كيف يقال ان الزمان كفيل بأن يشفي ويضمد كل الجراح؟؟
وجراحي فيك ازداد نزفها مع مرور الزمان....
نسيت كل شيء الا انت.....لم انساك.....
بقيت انت كما انت
تتحدى في الزمان.......وتتحدى في النسيان
وانا كما انا
انزف في جراحك صريعة في ذكراك
الى الان ما زالت ايامي خالية خاوية
الى الان ما زالت عيوني شاكية باكية
تمر الايام وانا بعيدة عنك كأنها لا تمر
جمرك يتأجج في صدري
لهيبك يلفح تفكيري
ذكرياتك تقلق مضجعي
حبك لغم يهدد حياتي ،اي خطوة مني كفيلة بان تفجره فيفجرني
عليلة متشافية انا بعدك


يا ريت تعجبك

[بابكر]

الرائعه تشيزو عند ك كم اخ وماهو ترتيبك فى الاسره وماهو عمل الوالد تلاته اسئله عاوز الاجابه عليهم