[color="blue"]كــلام الـطــيــر
(( المسرح خالي ..شجرة تتوسط المسرح ..))
نسمع صوت من خارج المسرح ..
السمبيرية ام قدوم ، عيش ابوي متين بقوم ؟؟ بقوم باكر مع العساكر ..
( يدخل جاريا ))
( يحاحي الطير الوهمي ) حي حي ياطير .ز طير ياطير ، طير بعيد ، القندول لسه نيئ. ما نجض ياطير
يا طير السجم والرماد طير بعيد ..
اليوم كلو نحاحي في الطير . وقتين الطير ياكل العيش ، نحن ناكل شنو ؟؟ناكل السجم والرماد ..ناكل
نـيـم .. وانت ياطير مالقيت الا ترك في في عيش ( ود الهميم ) الراجل الطيب ود القبايل ، ما عندك عيون
يا طير ..مالك ما شايف الحواشة دييك مالكم ما ركيتوا فيها ..حواشة الزول المسيخ البخيل ، الهفتان ,,ماشايفين
حواشتو .كان زولا زينا واحد طيب .لمن كان فقران زينا .. اول ماعرف درب القروش ، والمال جرا في يدو ،
الزول اتبدل بقى يلعب بالقروش لعب ، وغير هديماتو ، ورفع نخرتو ، ببقى سلامو من طرف ييدو ، وكلامو مع
الخلق بالقطارة ـ تلغراف ـ عديل ـ كلمة ، ونقطة ، ـ تمد ليهو يدك بالسلام الزين وتكتر في سلامك وتختار الكلام الطيب ...
ـ ازيك يالطريفي ودالحاج الطيب ، كيف حالك ، كيف اصبحت ، طيب ابوي ؟
ـ أهلا
ـ فرد كلمة ـ اهلا ـ بتطلع منو مسيخة ـ اهلا
ـ قدر ما تسلم عليهو ، تترحم عليهو وعلى اهلوا وعلى ابوه وابو ابوه ، تبارك ليهو في تجارتو وقروشو ،
ارد عليك بي فرد كلمة ،
ـ اهلا
وكان زولا مسكين ومحتاج عدمان الحبة ، مر عليهو قدام دكانو ، مد ليهو يدو وقال :
ـ اعطينا مما اعطاك الله
الطريفي يدخل يدو في جيوبو كلها يفتشها ، ساعة يفتش للفكة ، كل ما يلقى قروش ورق الفها ويصرها
ويرجعها محلها ويفتش للقرش واب قرشين الفريني ولمن يلقاه ،يمد يدو براحةوالقرش زي الملصق في
يدو ، والحركة دي بعملها كل سنتين مرة يعني في السنتين حـسـنـة ..وكان الشحاد وقفتوا طالت وما لقى الطريف قروش ما بقولو كلمة طيبة يطيب بيها خاطر الواقف زمن . ولا حتى كلمة مسيخة بس يأشر بي يدو ليهو يفوت ..
هسي ياطير دحين ما شايف حواشتو ؟؟ ركوا فيها وعدموها الحبة ، كان تبقى ليهو زكاة . اصلو لابعرف الزكاة ولا
بدي الصدقة ,, والله قالوا ليك الصدقة تديها الشفع وتبين في صحتك ورزقك .....
اها خُم وصُر جاتك في السكر وجابت ليك السكر والضغط وضيق الخولق ..
الطريفي يا ناس خزن السكر في الحوش الوراني في بيتو . كان جا علينا وقت شربنا الشاي بالبلح والسكر في الحوش الوراني ماعارف خبرو غير النمل ..جات المطرة بعد جفاف ، المطرة الجات وحات شيخي حسن ودحسونة ، دفقت
السما موية كانت ماسكاها من زمن المحل الطول فكت علينا مطر ما شوفنا زيو الا لمن كنا صغار ، برق المع اشيل
موبة عينك .. ورعد .. الشفع ادسو منو تحت العناقريب ...
انا الوحيد الواقف في نص الحلة ، ارقص تحت المطر البرق إجلد فيني بي صوتو والرعد يخلف لي في الإيقاع
وانا ارقص تحت المطر . مطر الخير ، اتبلت الأرض المشققه وناشفه ، وانا في رقيصي حاضر ، الواطة بتتعجن
بي موية السما وتبقى طين . طين اسود ... الشقوق تحضن في المويةالصافية وتتلم طين ..الأرض بتتجهز لي عرس
التيراب ......
يا مطيرة صبي لينا
في عينينا
يا مطيرة ...
وانا في عز رقيصي يوم عرس المطرا لي ألأرض ، اسمع ليك الكوراك ، اناقايل النسوان بزغردن زغاريد العرس
لكن دي ما زغاريد ده كوراك عديل ، جاي من بيت الطريفي وجريت لقيت الناس قدامي جارية ودخلنا بيت الطريفي المافي زول دخلوا من ما مات ابوه الحاج الطيب ....
دخلنا لقينا الطريفي واقف مذهول وسط الشوالات نص الحوش عيونو مفتحة لكن ما كا بشوف غير قروشو الضاعت
السكر بتماص مع المطرة لاقادر يتحرك يمين ولا شمال لاقادر ارفع شوال ولا قادر اكورك ولا قادر يبكي ، والناس
من حولوا اول ماشافوا المنطر وقالوا هيلا هيلا ايشلوا في الشوالات من نص الحوش ويختو في الصالة الكبيرة البرندة في لحظة، اتملت يالشوالات مافي واحد فيهم مدا يدو على شوال ، السكر الماشافوا زمن ، مافي يد اتمدت عليهو والطريفي واقف في نص الحوش زي الهمبول لابنش ولابهش ..
الشوالات الباقية اتماصت وتحتها الموية جارية طاعمة وسكر ( ود الصبر المخرف ) الوحيد الواقف حدا الشوالات
ويضوق في الموية التحت الشوالات ويقول : الموية هنا طاعمة ولي هنا طاعمة
والناس تضحك ــ
وانا قعدت ارقص في الموية الطاعمة ،السكر ..العيش يا ناس بكرة بقوم طاعم وحلو والفريك بكرة ماعايز ليهو سكر
والناس تضحك علينا الأتنين ـ المخرف والمجنون ...
وعلى ايقاع ضحكهم رقصت ورقصت في عرس المطرا للواطة .. رقصت ورقصت والكل يرقص معاي انا وود الصبر
والرقيص بقى عدوى ورقصوا الناس ونسوا السكر والطريفي والحلة واتحول الضحك لي رفيص وبقيت اعلي في صوتي واقول ليهم الليلة كلنا مجانييين في يوم عرس المطرة لي الأرض ..
طير يا طير طير بعيد ......[/color]
رد مع اقتباس
المفضلات