أول شيء نوضح معنى كلمة ( سكسكا ) دي ، عشان في ناس معانا حيجيبوا لينا هوا ساي .
سكسكا دي يعني الرقيص (dancing ) بإخلاص وتفاني .
آها يا جماعة ، أخوك واللي هو أنا وأعوذ بالله من كلمة أنا ، كانت طايرة لي سكسكا في رأسي ده ليهو 3 سنوات ، ولحسن الحظ ولا سوء الحظ ما عارف . . . صادفت عرس بتاع بت الجيران ( بنت الجيران دي زمان كانت الجكس بالمناسبة ) ، نرجع لموضوعنا ، مشيت الحفلة قبل الفنان ما يطلع لقيت الناس دي ما قاعدة في الكراسي منتظرين الفنان يبدأ بفارق الصبر ( ياحليل زمن التقل) بدء الفنان ( بإعتبار هو فنان يعني ) بأغنية ( بلة يا بلة ويييينو بلة – بلة ود عشة ويييينو بلة سائق الرقشة ويييينو بلة - دق الرقم جللا ) والناس دي بقت تتلولح وتنطط وتسكسك تدريجياً لغاية من وصل الفنان للغنية التانية ( طبعاً بدون فاصل ) وكانت أغنية ( عايزا تبقى خوة )، ( طبعاً دي ما أسماء للغنيات لكن دي كل كلماتها )، قلت ما علي من الأغنيات الهابطة دي المهم ( أتفشى ) وأطير السكسكا دي من رأسي بأي شكل . . . ودخلت مكان الرقيص وكانت زي ( دوري الدرجة التالتة ) الغبار ده لغاية السما ، وقبل أغنية ( عايزا تبقى خوة ) ما تنتهي جاني ( ربو حاد ) قربت أروح فيها رقدت 24 ساعة في المستشفى بسبب ( عايزا تبقى خوة ) دي .
آها أقدم ليك النصحية المجانية دي ، لو عايز ترقص في السودان يستحسن تلبس (كمامة) ولو عندك إمكانية ألبس معاها ( جونتيات ) ، لأنو الرقيص في السودان أخطر من (الحمى النزفية) أو ( الحمى المالطية ) أو ( حمى الوادي المتصدع ) حسب ما يراهو المسؤولين مناسباً .
رد مع اقتباس
المشاركة الأصلية كتبت بواسطة MUSAB24
المفضلات