زواج المغترب

[عوض صقير]

الغربة والأغتراب فى مجملها عبارة عن معاناة وحرمان .... وبعد عن الوطن ... والأهل ... والأحباب .... والجيران ... ومن ضمن المعاناة التى يواجهها المغترب عندما يفكر فى الزواج ... أختيار الزوجة هى المعضلة الأساسية التى تواجه المغترب ... وعندما يعلن أستعداده للزواج ... يبدأ أهله وزويه بعمل نفير وتوزع المهام للجميع للشروع فى البحث عن عروس لأبنهم المغترب الذى لاتسعفه أجازته المحدودة فى عمل ذلك ... ومن هنا يبدأ البحث وتجميع الصور .... وشرايط الفيديو وغيره من الأشياء التى تساعد فى أختيار العروس .. وهناك كثير وكثير جدا من أخوانا المغتربين مروا بهذه التجربة الغاسية التى تسلبه فيها الغربة والبعد عن الوطن من أهم حقوقه وهى أختيار العروس المناسبة ... وهناك من المغتربين من يشاهد زوجته لأول مرة عندما يذهب المطار لأستقبالها أو عندما يذهب أجازة للوطن .... والزواج بهذه الطريقة وزى مابقولوا بطيخة مقفولة وعامل الحظ يتحكم فيه بدور كبير ................. ولا رأيكم شنو ياشباب

[مدنيّة]

والله الزواج بالطريقة دي حاجة صعبة

بس المغترب دا ما عنده بنات اهل ولا بنات جيران ولا زملاء دراسة من زمن الدارسة عشان يختار منهم !!

اللجوء للصور وشرائط الاعراس فيها مخاطرة كبيرة وقد لا تحمد عقباها

[عوض صقير]

فعلا يامدنية المسألة صعبة وفيها تحديد مصير ولكن الظروف هى سيدة الموقف وهى التى تتحكم فى المغترب يميناً ويساراً

[مصعب الريح]

والله الزواج بالطريقة دي حاجة صعبة

بس المغترب دا ما عنده بنات اهل ولا بنات جيران ولا زملاء دراسة من زمن الدارسة عشان يختار منهم !!

اللجوء للصور وشرائط الاعراس فيها مخاطرة كبيرة وقد لا تحمد عقباها

الأخت مدنية :
بالنسبة لبنات الاهل طبعاً بعض الناس يتخوفوا من الامراض الوراثية وبالنسبة لزملاء الدراسة يعني الواحد بعد التخرج من الجامعة يكون عمره 24 سنة + سنتين خدمة بالاضافة للسنوات التي يعيشها المغترب في بلاد الغربة لكي يقوم بتكوين نفسه يكون عمره في 35 سنة وايضاً تكون زميلته في نفس السن يعني 35 سنة فيقوم المغترب باستبعاد زملية الدراسة .
ولكي كل الشكر والتقدير

[مدنيّة]

وبالنسبة لزملاء الدراسة يعني الواحد بعد التخرج من الجامعة يكون عمره 24 سنة + سنتين خدمة بالاضافة للسنوات التي يعيشها المغترب في بلاد الغربة لكي يقوم بتكوين نفسه يكون عمره في 35 سنة وايضاً تكون زميلته في نفس السن يعني 35 سنة فيقوم المغترب باستبعاد زملية الدراسة .

تتخيل يامصعب انه دا (35) سن الزواج الحالي في السودان بالنسبة للبنات !!

دا اذا اتزوجوا طبعا

[صلاح الدين محمد]

مولانا / عوض

حقيقة البوست حيوي واجتماعي مي المية

وبقي حقيقة معاشا ( الزواج بالصورة والفيديو + الزواج من موقع زواج في النت )

وانا عرف ناس كتيرين الواحد بنزل اجازة عشان ادور عروس وسبحان الله تلقي الواحد

في المناسبات زي الرايح ليو زول ببحلق في البنات واسال ده بت منو ومتزوجا ولا لا وصاحبتا منو

وفي النهاية يرجع بخفي حنين بدون اي نتيجة وفي النهاية اتوكل ويشوف الصور والفيديو

[Qusai Syd-Ahmed]

الموضوع ممتاز
وأنا أرى أن الزواج قسمة ونصيب ومهما تعددت الطرق فأنت تتزوج من كتبها لك الله .وهنالك عديد من الزواجات التى تمت لأزواج بعد قصة حب أو أنههم متواجدون فى نفس المنطقة ولم يكلل لها النجاح .والعديد من المغتربين الذين كان زواجهم من أيسر مايمكن .المهم هو أن يفهم الزوجين ماهية الحياة الزوجية وكيفية إدارتها وأن ينسوا الأحلام الوردية التى تكتب فى الكتب وتروى فى الأفلام والمسلسلات .
وفى الماضى كان الزوج لايلتقى زوجته إلا يوم العرس .فهل رأيتم كيف كانت الحياة الزوجية بين أجددادنا وحبوباتنا وأبائنا و أمهاتنا.
وجددودنا زمان وصونا

[عبدالرحيم سعيد]

يأخي ده كلو كوم والفلوس المطلوبة منو كيمان الحمدلله تزوجنا قبل الاقتراب بس امضاء الاجازة بقي يكون الزواج الثاني

[Qusai Syd-Ahmed]

وقصة الزواج من شرائط الفديو والصور والحفلات غير سليمة وربنا يقول أسالو أهل الذكر يعنى بعد ألإعتماد على الله تأخذ مشورة الوالد والوالدة والأخت والخالات.

وأكرر إنو القصة توفيق من الله .وعفواً إن ذكرت شأن خاص فأنا غخترت زوجتى من بعد سنة من الإغتراب ولحظة إختيارها كانت فى اقل من خمس دقائق ومن غير صور وفديو وإلتقيتها لأول مرة لأسمع رأيها.
وأنا أحمد الله كل يوم على أن وهبنى الزوجة الصالحة.
وأقول للذين لم يزجوا بعد إستعينو بالله وأرضوا والدليكم تيسر أمور زواجكم

[abomazeen]

أخي العزيز عوض صقير
لك مني التحية والتقدير

لاشك وكما تفضلت أن الغربة والاغتراب في مجملها عبارة عن معاناة وحرمان وبعد عن الوطن والأهل والأحباب .... الخ حديثك الطيب !!
وقد عزفت على وتر في غالية من الأهمية ألا وهو مسألة الزواج وكيفية اختيار الزوجة للمغترب ؟؟

وهناك صنفين من المغتربين :
أولاً : صنف يرضى باختيار الزوجة من قبل أهله بصورة عامة بغض النظر هل أمه أو أخته أو أبيه أو غيرهم من سيختار له ( لا هم كثيراً ) طالما هو مقتنع بالمبدأ والفكرة من الأساس ... وهذا الصنف من البشر (دعنا نستبدل هنا كلمة بشر عوضاً عن المغترب لان المهم هنا مناقشة رضا الطرف الأول بفكرة الاختيار من قبل الأهل كتعميم للموضوعية ) هو يريد أن يتزوج وخلاص ينتهي الأمر بمعنى أن الاختيار منتهي ؟؟ ماذا عنها لا يدري شيئاً ؟؟ سلوكها قبل الزواج ماضي سابق مجهول بالنسبة له ؟؟ مدى التجانس والألفة بينهم مش مهم حالياً ؟؟ الحب المتدفق عطشاً ليكون جدول نقاء وصفاء لحياتهم بعد الزواج لا يبالي له معياراً ؟؟ ( أنا أكيد أؤمن بأن الأهل كلهم يريدون الخير كل الخير لأبنائهم – وخصوصاً في مسائل الزواج واختيار الزوجة ) يبحثون عن الأفضل أخلاقاً ونسباً وحسباً وأيضاً جمالاً وهذه حقيقة غير قابل للنقاش !!! ولكن هو يريد ذلك يعني زوج وبعد ذلك يصير خير ؟؟؟ نعم هناك نوع هكذا من هذه البشرية والملة ؟؟ فلا تتعجب عزيزي من ذلك !!!

ثانياً : يملك قرار الأمر بيده ... يعرف عن ماذا يبحث ؟؟؟ من تكون ؟؟؟ يدري أنه مكتمل العقل ويستطيع أن يميز من ستكون زوجته ... من ستكون أم أبنائه !!! متزن حكيم ... يعرف حقيقة الاختيار السليم ... لا ينجرف وراء شرائط الفيديو ولا باب الترشيحات والتسجيلات للاعبين ( أقصد الجميلات ) ..

إذن عزيزي المسائلة نسبية في فهم عملية الاختيار في حد ذاتها فما أراه أنه بعيداً عن المنطق والمعقولية والقبول قد يجده غيري الغاية المنشودة والأمل المنتظر ...

هذا حسب رأي و زاوية رؤيتي (وقد تكون هناك غمامة صيف أمام ناظري)آمل التصحيح وإزالة الغشاء الترابي إن وجد وإن كنت أشك في ذلك ؟

أحبائي جميعاً لكم مني فائق التقدير والاحترام وآسف على الإطالة وللحديث بقية أخرى .

أبو مازن

[mohammedfatah]

والله ياعوضنا انا حاسى انو انتا قديم وحكاية الصور و الفديو بقت شوية قديمة ولا شنو اسع طبعا المغترب برجع عشان يعرس فالخبر اول ما ينتشر كل ام ومرات البنات زاتم بيجهزوا نفسهم استعدادا للعريس المغترب ومن المطار يبدا يشوف البنات دى فلانة ودى علانة ___ المهم المحزن فى الموضوع انو البنت بترضى وتعرس وفجاة تجى الغربة تلاقى بلاوى الدنيا والعلامين والشى الشافتوا فى السودان والكلام عن وضع العريس يطلع كلو غلط وتبدا تواجه الماساة ودى حاجى حاصلة وانا شاهدتا بنات كتير بعد ما جو هنا لقو انو العريس المحترم كان بكذب حتى على اهلوا الماعارفين الحقيقة انو ولدهم ماشغال كويس او مديون او عرس بالدين وتبدا المعاناة
عشان كدا والله النصيحة لبنات السودان اسالو عن المغترب قبل ما توافقوا وما تغشكم الشنط والملابس الجميلة والهندام الراقى
وربنا يحفظ الجميع

[بابكر]

الاخ الوفى عوض
لك التحيه والشوق
موضوع الزواج بقى حاجه تانيه والله البنات بقن يقلعن الواحد عينك يا تاجر وما بينتظرن لمن يخطبوهن !! والحكايه بقت موبايلان ورسائل متبادله !!والله لو كنت راجل مره زينا كده ومديت رأسك تلقى عشره يمسكوا فيك !! وتفتش لى البحلك !!

[هشام السماني إبراهيم]

والله يا استاذنا العزيز ظاهر الزواج عن طريق الصورة واشرطة المناسبات انتشرت انتشار كبير وكما تفضلت وذكرت الحظ بيلعب دور كبير في مثل هذه الزيجات .

وزواج الاقارب كما ذكر مصعب

بالنسبة لبنات الاهل طبعاً بعض الناس يتخوفوا من الامراض الوراثية

وطبعا مافي كل الاسر بس جزء لازم نحسبو

وفي ما يخص العروس المرسولة لزوجها وهو لم يراها وهي كذلك بطلقو على الارسالية دي اسم ((طرد))

بس الحل شنو (( نعمل شنو ))

ربنا يكون في عون الجميع

[mahagoub]

الموضوع متشعب لاكن فى النهاية قدر ومكتوب فى ناس عايزة الشكل وفى ناس عايزه الجوهر برضو نرجع انو مهما كان اختيارك اختيار اهلك فهو موضوع زى البطيخه انت وحظك وربنا يسعد الجميع