ضيف الكرسي الساخن هذا الاسبوع

[aborawan]

ضيفنا لهذا الاسبوع هو صاحب وسام التمييز الاخ امبر عبدالباقي على كل من ليهم اى استفسار او سؤال للاخ امير بالدخول والاستفسار عن ما يريدون معرفته عن العضو امير لكم منى خالص التحايا واتمنى اني اكون وفيت وكفيت اثناء فترة جلوسي على الكرسي

تحياتي حبايب قلبي

طبعاً حا ابدا انا بسؤال خفيف كده البطاقة الشخصية اخوي امير
الاسم :
تاريخ الميلاد : الحقيقي طبعاً
الحالة الاجتماعية :
لو كنت متزوج اسماء اطفالك لوكنت ما متزوج عايز تسمي منو

[امير عبدالباقي]

مشكور اخوي ابوروان لااختيارك لي للجلوس في الكرسي
الاســــــــــــم :- امـــــــــــــــير عـــــــبدالـــــــــباقي
تاريخ الميلاد :- ودمدني 27/12/1967
الحاله الاجتماعيه :- متزوج
اسماء الاطفال ريان ورحيق ورغد ورهف
مشكور ابوريان

[aborawan]

ماشاء الله ربنا يحفظم ليك ويخليهم ليك ياابوريان ويتربو في عزك ادي الفرصة لغيري في السؤال وارجع ليك مرة تانية

[أبوريلان]

الأخ أمير صباح الفل

أتمنى أن تصف شكلك تماما ؟

بماذا تفكر الآن ؟

حسب ماذكرت لديك أربعة بنات ربنا يحفظهم ليك ماهو توقعك للمولود الخامس ذكر أم أنثى ؟

[امير عبدالباقي]

شكرا ابوريلان لسوالك
اصف شكلي اعتقد صعب لكن احاول
ماسمين ولاضعيف
مربوع القامه ؛ الجسم متناسق وماعندي كرش
لدي جلحات ؛ اخوك وسيم جدا صاحب عيون كبيره وناعسه قول ماشاءالله
اكبر اخوتي ؛بعدي اخوين توام ؛ ثم بنت ؛ ثم ولد ؛ثم بنت
ما افكر فيه الان ؟ الفاكس بتاع المكتب حصل فيه عطل الان افكر كيف اصلحه
اما عن توقيعي للمولود الخامس هذا من عند الله وحده عالم الغيب ؛ وصدقني احتمال اوقف عند هذا الحد من الزريه ؛والله ياابوريلان البنات نعمه من الله وربنا يحفظهم لي والله احن من البنات مافي ؛ عني اخوي عنده ولد وبنت الولد ضغير 5 سنوات لكن مكره حياته مره قالي خد الولد واعطيني بنتين
لك كل الشكر حبيبي

[admin]

ابو الراء (كل اسماء بناتك يبدو بحرف الراء) مرحبا بك على الكرسي الساخن .. وان شاءالله تكون عامل حسابك وجاي مردف وهاك الاسئلة دي :-
1- ماهي خطتك المستقبلية بخصوص الاغتراب؟
2- هل تعجبك تجربة الاخرين في تربية وتعليم ابنائهم في الغربة ام تعتقد ان تربيتهم وتعليمهم في وطنهم افضل حتى وان فقد الوالد اغلب اوقات السنة؟
3- لو جيت المكتب الصباح ولقيت انو جاءك خطاب بانك فزتا في اللوتري انتا واسرتك .. هل ستسافر وتبدا المشوار من جديد؟ ولا وضعك في بلد الاغتراب الحالي مرضى بالنسبة لك ويحقق كافة طموحاتك؟
4- ما رايك في التعليم للبنات ؟ هل تعتقد ان البنات نجحوا في التخصصات ذات الطبيعة الخشنة ميكانيكا ، كهرباء، مدنيه ، مساحة .. ام تعتقد ان هنالك تخصصات لايجب ان تكون متاحه للجنس اللطيف؟
5- اخيرا هل انت مع ختان الاناث ام ضد ذلك؟ ولم؟

ارجو اني ما اكون تقلتا عليك انا غايتو بتمني يجيبو لي بنت لكن الاسئلة اعله فعلا مهمه للجميع وكنا عايزين نعرف وجهة نظرك المحايدة في الموضوع
ربنا يخليك لاولادك ويخليهم ليك ويتربو في عزك

[مزوني]

وينك يا اخوي امير
رد سريع انا منتظر
عندي سؤال؟

[امير عبدالباقي]

اخوي ابوبكر مشكور علي الاسئله وانشاء الله تجد الاجابه بكل صراحه ومابحب الواحد يكون زي ود المويه انشاء الله نكون عند حسن ظنكم
الاجابه الاولي
خطتي المستقبليه والله بسيطه جدا الواحد يعمل ليه حاجه كويسه في الوطن عشان يرجع
السوال التاني
والله تربيه اولاد المغتربين ماعجباني بصراحه لانو فيها دلع زياده شديد والولد خاصه ؛من المفترض ان تكون هناك اجازه سنويه ينزلو فيها عشان يتشربو من العادات السودانيه من منبعها ؛ وذا مانزلو للسودان في اوقات الاجازات يعلمهم علي الاعتماد بالزات كيف يجد لهم بعص الشغل
اما بخصوص تعليمهم وتربيتهم في السودان في غياب الاب لا اوافق عليها اطلاقا لان التربيه من غير راعي مشكله كبيره ولك هذه القصيده تعبر عن الحال
رسالة خاصة من زوجة مغترب
مـعـزره لــو مــا كــان مـنـي الـكلام فـره
والــخــطــاب كــاتــبــاه مـــطـــره
حـــــرام انـــــت مــنــنـا تــبــرا
خـمـسه سـنـين تـفـوت تـجي فـيها فـد مـره
وراك انــا كــم شـقـيت وعـشـت فــي مـره
تـعـب مــع الـصـغار الـهـم لـلـعيون قــره
بــخـاف الــغـرق الــزول الـغـاص وري دره
قــالـوا ادب الـصـغـار والـعـقـده ومـخـضره
حـلـيـل الــزمـن زي خــاطـري مــا نـفـرا
خـمـسه سـنـين غـيـاب مــا بـتـحملا حـره
انــا الـحـاضنه الـعـزاب وامـالـي مـحـتضره
وانــت الـفـي الـنـعيم مـاخاتي لـلحساب بـكره
مـسـكـينه الـتـقـول فــي الاغـتـراب سـتـره
وتـتـناسا الـقـروش فــي يــوم تـكون ضـره
حـلـيـل زمــنـك وقــت عـايـشنا بـالاجـره
يــا ريـت لـو مـا عـرفت ومـاكان مـرق بـره
الـكاتمه فـي جـواي كـتير مـتملك الجوف والعصب
مـا كـنت دايـره اقـول لـيك لـكن لسان الحال غلب
مـا بـنسي يـوم ودعـتنا وسـافرت فـي غره رجب
خـلـيت الــدار وراك حـزيـن والـدمـع انـسكب
ولـلـه لــولا الـضـروره انــا مـا كـان كـتب
خـايفه فـي غـيابك الـضاع اكـون ضعفا ا لمكتسب
الـيـوم داك هـنـوني نـاس الـبلد شـايقيه وعـرب
قـالوا مـبروك وخـير جاك ربنا اكتب سلامته الاغترب
قـالـوا يــا دوب نـجم الـسعد طـلا بـعد احـتجب
يــادوب بـالك اسـتريح تـنسي الـعزابات والـتعب
وفـضلت احـسب فـي الـشهور قاعده في نيران لهب
صـابره حـريصه عـلي الـولاد لايـبقوا لـلريح مهب
سـديـتها خـانـك قـامـيها بـواجـبي كــأم واب
والأسـره يـضنيها الـمسير تـتهاوي لـو مافيها رب
و والله مــا بـنـكر جـميلك بـرضو ثـناك وجـب
مـوكب هـداياك ما انقطع كان ستره في الزمن الصعب
لابـسين و مـاكلين والـنعيم فـي يـوم مـا نـضب
وعـايـشين عـيشه الـمترفين مـا الـطبع اتـخرب
وحـامـدنه ولـلـه كــان لـلأكـل الـتين والـعنب
والـجـناين شـيـلها مـتـكي بـالـفواكه والـرطب
الـبيت مـفرش بـالحرير وفـي ايـدي لابـسها الدهب
لـكن خساره علي محل عايش سيده خمسه سنين عزب
الـشي الـمهم مـا قـلت ليك وانت ليه ما اظن حسب
كـبروا الـصغيرونين خلاص وخايفه ليهم الطبع الكعب
وصـلوا مـرحله الـخطر والأمـن مـا زال مـستتب
وانـا كـنت قادره عليهم زمان لكن بعد ما كبروا اتغلب
حـصـلني قـبل الـجد يـفوت دوبـهم فـوق الـعتب
قـبال نـحصد الـخير ندم وما بجدي كان لومته وعتب
خايفه ليهم الطيش في الدروس وما برضي لو واحد رسب
خـوفني والـمتعبني وكـبير بـعدين امـرقوا بـلا ادب
وريــتـك الـحـاصـل دون ثـــوره وغــضـب
شـأن الـحديث مـا ابـقي نـي والواحه يكتنفها الجدب
انـا قـلبي مـا زال لسع حي ونجمي الملهلج ما غرب
ومـا كـانت عـايزه اقـولا ليك لكن لسان الحال غلب
وأخـر كـلامي تـرده لـي لا ابـقي بـكره انا السبب
لسان حالة زوجة سافر زوجها وتاهة في دهاليز الغربة ارسلت له هذه الرسالة
السوا ل التالت
والله ياابوبكر حتي الان ماقدمت للتري لكن اذا جاني بابقول لا
السوا ل ا لرابع
والله البنات نجحو في جميع التخصصات وفي بعض التخصصات فاقو علي الرجال
السوال الخامس
انا ضد ختان البنات ولا اناقش فيه
مشكور اخي

[مزوني]

طبعا يا أمير مابتختلف معاي انه انه لكل انسان ماضي
وزي ما يقول المثل اللي ما عندو ما ضي ما عندو جديد
طيب يا طويل العمر
ممكن تحكي حاجة عن ماضيك هنا
خاصة في الثانوية
وبالتحديد سنة تالتة
ورحلة الهند بالمختصر المفيد
وعلى مهلك
"وسلامتكم"

[114]

عزيزي أمير

1- اين تقيم حالياً؟
2- كيف ولماذا اخترت هذا المكان لاغترابك؟
3- ماذا تفضل: البيبسي أم الكركدي؟ ولماذا
4- ما دمت انت وسيم كده- حسب وصفك لنفسك- ليه ما بقيت دون جوان؟
5- وأحكي لينا- بس من غير ام ريان تسمع- بعض شلهتة البنات بيك
6- ودرست الجامعة وين؟ ياتو بلد ويا تو مدينة وياتو جامعة

اتخيل لي كفاية كده عشان ادي الفرصة للباقين، وشكرا على سعة صدرك

[أبوريلان]

أبو ريان مشكور على الرد الظريف يا وسيم

بس خليك مع مزونى و 114 ولنا عودة .

[امير عبدالباقي]

مشكور مزوني علي الاسئله
اولا درست الثانوي في السعوديه وفي المدينه المنوره واعتقد انك درست في السعوديه يعني مافيها مواقف تحكي
ام عن دراستي في الهند
اولا الهند بلد جميله جدا وتعتبر من اجمل البلاد في العالم ؛ اول ماوصلت طبعا استقبلوني اولاد مدني هناك وذهبنا من بومبي الي مدينه اسمها بونا جلست فيها يومين ومنها الي مدراس مدينه ساحليه سكانها سمر
من موسسي رابطه ابناء مدني بالهند ؛ تقلتد منصب سكرتير عام الرابطه بمدرس
ومسئول شئون الطلبه بالاتحاد الطلابي السوداني بالسفاره السودانيه بالهند
اما عن تكمله الدراسه ستجد الاجابه عنها عن طريق اسئله 114
لك كل الود والتقدير اخي

[امير عبدالباقي]

لك كل الود اخي 114
اولا الاقامه الحاليه بالطائف
ثانيا انا مااخترت مكان الاغتراب ؛ انا جيت السعوديه صغير مرفق مع الوالد وكنا بالمدينه المنوره وهم الان بالمدينه جميع العائله
ببسي ولا كركدي طبعا كركدي ليه ماعشان اقوليك اقطع الببسي عشان امريكي لا والله بس في يوم كان في برنامج علمي وكان بتكلم عن اضرار الببسي هل تصدق ان الببسي ياكل جدار المعده من قوته ولي مواخذه احسن منظف لمراحيض المياه وتسليكها
اما السوال 4- 5 حكايه الوسامه دي بس قلتها دعابه لابوروان فقط
اما الدراسه كانت بالهند في مدينه مدراس باقليم تملنادو الجامعه اسمها تكراج كلج
مشكور 114 علي الاسئله وتكون راضي علي الاجابه

[aborawan]

ياراجل برضو الوسامة في شنو التواضع ده الغير طبعي ده ياخي

[admin]

الاخ امير شكرا على الاجابة

[امير عبدالباقي]

مشكور ابوبكر
نحن تحت الخدمه

[aborawan]

امير بصراحة شديدة وبدون لف ولا دوران اكتر شخصية في المنتدى ما بترتاح ليها او بالاحرى ما متكيف ليها ؟ قول الصراحة واياك من السياسة بتاعت الزوغان ولي عودة انشاء الله

[امير عبدالباقي]

كل المنتدى حبايب قلبي واستحالة اكره لي زول من بيتنا لانو المنتدى ده بيتي الكبير

[aborawan]

طبعاً معليش يا حلوين السؤال اساساً معروفة اجابتو لانو الكل هنا حبايب بعض ومستحيل تكون في بغضاء او مشاحنات بين الاخوان والحبايب

[مازن الجمّال]

يا امير ..

انا بسعلك .. اكلت سندوتشات من الشول قبل كدا ولا لأ ؟!!

[114]

شكرا يا أمير الحسن على الإجابة
وانا مشيت الهند برضو، عشان كده سألتك عنها، مشيت شهر فبراير الماضي 2004 ، بومباي وبعدين بونا، وبعدين قوى الساحلية الجنوبية، طبعا اجمل الثلاثة هي قوى
وبرضو اول سنين غربتي في السعودية كانت في الطائف المأنوس، يا بختكم، برااااااااااااااااااااااااد ساكت (براد) دي بلغة اهل الطائف نفسهم، يعني الجو بارد

[امير عبدالباقي]

اخي Rasta man
اكلت من الشول مره او مرتين ؛ كنا بنتعشه عند التوري دائما
ماتلف ودور انت قلت انت من فريقنا عرفني بي اسمك
او رسل عن طريق AMIRDAF@HOTMAIL.COM
لك الشكر

[امير عبدالباقي]

114 لك الشكر اجزله
فعلا الهند جميله وقويْ من اجمل ممدن الهند
وعرفت من بعض الاخوه بانك كنت في الطائف وساكن الحويه
والطائف الايام دي اخر حلاوه فاقداك

[مازن الجمّال]

وحات الله يا امير انت ما جايب خبر ..

ايميلك مضاف عندي في الماسنجر ليك سنتين واتراسلنا مع بعض لاكتر من مرة ..

وطوالي بخش معاك ما سنجر

لاكين سجارتك شكلها سمحة ..

من ابو التومة دي ولا من وين !!؟؟



راســــ ــــتا

[aborawan]

امير طبعاً الشباب هنا فى المنتدى كلهم اخوان بعض يعني الكل حبايب بس طبعاً اكيد بتكون بترتاح لبعض الاعضاء اكتر المهم باختصار سؤالى اذكر لينا اسم عضو من بترتاح ليه جداً وبتكون متكيف وانتو بتدردش معاه ما يفوتك عايزين عضو من الشباب بذكر الاسم وكمان من الجنس اللطيف تختار لينا واحدة انت بترتاح ليها جدا وبتكون سعيد بالحديث معاها وما تخاف ام ريان نايمة زي المواعيد دي