ياناس منتدي ودمدني رايكم شنو في الزواج من اجنبية

[انيس التوم]

اخوتي واحبائي منتدي ودمدني رايكم شنو في الزواج من اجنبية خصوصا وانتي في بلد ما عربي ونسبة الاسلام فيه بسيطة وانوا البت دي وقفت معاك مواقف جميله جداً ومواقف بالجد في بلد زي دي صعب ولاحظ هي مامسلمة لكن ممكن مع مرور الزمن والتاثير تسلم باذن الله انا عايز رايكم بصراحة .

[حافظ الليبى]

اخ انيس
والله فى الحقيقه انا عن نفسى بقول ليك ادخل طوالى وربنا يوفقق

[الطويل]

هوووووووووى ياانيس

اوعك تعمل كدى

أحسن من بنات بلدنا مافى

[الفارس البنفسجي]

المواقف الإنسانية التي تقفها إمرأة
مع رجل ليست دافعاٌ قوياً ً للزواج
بها.

للزواج معايير كثيرة وكلنا ثقة
انك تدري بها.

وأنت لو خايف على نفسك كلم
اهلك في السودان يرسلو ليك ست
البنات.وأكيد بتلقى الراجل الواعي اللي
يوافق أنو يديك بنتو في ظروفك دي.

أما قضية أسلامها فيمكن أن تتم دون
أن تتزوج منها ويمكن أن تقتنع به بحيث
يصبح خيار مناسب لها في الدنيا والآخرة

[Madanawi]

الأقربون أولى بالمعرووووووووووووووف

طالما انك نويت الزواج .. وهو بلا شك عمل خير

عليك بذات الدين تربت يداك .. وتخيّر فان العرق دسّاس!!

[باسطه]

السلام عليكم ورحمة الله وبركاته
أخي أنيس عن نفسي لاأحبذ الزواج بالأجنبية
من ناحية أنها غير مسلمة وبالتحديد إذا لم تكن من أهل الكتاب فديننا الإسلامي يحرم علينا الزواج منهم .
أما من ناحية الفكرة بحد زاتها فهية برأيي أنها ملزمة فلو إفترضنا إنك إتزوجته أجنبية هل حتعيش العمر كلو معاها خارج وطنك أم حتقدر تجيبة السودان وتعيش معاك العمر كلو هناك؟؟؟
بعدين ياأخي أنيس بنات بلدنا فيهم الأصالة وطيبة القلب وماحأقدر أقول فيهم الكتير كفاية إنو في عروقهم دم الوطن ومن الأسباب برضو مستقبل أولادك حيكون شكلو كيف في السودان؟؟؟ أنا بشوف إنك حتعاني كتير ياأخي .
وبما إنو ده زواج كلامي ده كان مجرد راي وطالما الزواج هو نصف الدين فبشوف إنك تسأل ربنا فهو العندو الراي الحكيم يعني إستخير ياأخي .
وربنا يكتب ليك الفيهو الخير ويوفقك .

[mohamed]

من أهل الكتاب فديننا الإسلامي يحرم علينا الزواج منهم
basta
?who said that

[شبارقاوية]

لا ولا ولا والف لا
احسن من بت بلدك مافى

[شبارقاوية]

لا ولا ولا والف لا
احسن من بت بلدك مافى
واقل حاجة تحصل الاجنبية تشيل شنطتها وتفكك عكس الهواء

[تايقر]

الارتباط لايعرف الزمان والمكان وهى مسألة معادلات بينك وبين نفسك لو حسيت انها المناسبة بالنسبة ليك فتوكل على بركة الله وربنا يوفقك

[مختار بازى]

يا انيس تعال البلد ساااااااااااااااااااااااي
اخوك حجز ليك وحدة شرط وبالمرة تتسدي لي صحبك بتاع ناس الخليج

[غيداء نورالدين]

يا انيس انا مع شبارقاوية ومختار وابو رانيا
احسن من بنات بلدك مافي

[معتزودمدنى]

انيس والله انت زول حبيب وغالى ومشاورتك لينا دى بتدل على صدق مشاعرك تجاه اخوانك فى المنتدى.
اما بخصوص الزواج من اجنبية انا ما معاك فى الموضوع دا. وفى اسئلة كثيرة لازم انت تجواب عليها قبل الاقدام على الزواج ومنها:
انت ماحترجع السودان تانى؟؟؟؟؟؟؟؟
هل الزوجة الاجنبية عندها استعداد تعيش معاك فى السودان؟؟؟؟؟؟؟؟
اولادك من الزوجة الاجنبية هل حيرجعوا معاك السودان؟؟؟؟
هل الزوجة والاولاد حيقدروا يعيشوا فى السودان؟؟؟؟؟ ناموس وحر وموية المطر مالية الشوارع وكل يوم انقلاب!!!
واذا حصل خلاف لاقدرالله بينك وبين زوجتك الاولاد حيكون مصيرهم شنو؟؟؟ اذا كنت هناك حتسيبهم؟؟؟ واذا كنت فى السودان حتسيبها تاخدهم وتسافر لاهلها؟؟؟؟؟؟
أخوى انيس نحنا صراحة ماعاوزين السودان يفقدك ولامدنى تفقدك لانوصراحة فى ناس كتير خاضوا التجربة دى وماقدروا يرجعوا السودان تانى لانو مافى زول بيسيب اولادو.
وبالنسبة لوقفة البت معاك دا ما معناه تمشى تحبها والسودان دا يا اخوى فيهو حور عدييييييييييييل.
على كل انت فكر فى الموضوع بعقلك من كل النواحى.
ومن قلبى ليك بتمنى تسعد دوام تتهنى
اخوك معتز

[عاشق ابوالسيد]

اخوي انيس لك التحيه علي طرح الموضوع
انا بشوف بت البلد زيها مافي لانها بتعرف عادتنا وتقاليدنا
لكن لو الغربه طولت والزوله اخلاقه كويسه ممكن تدخل الاسلام
بتكون كسبته اجرين كملته نصف دينك وادخلته انسان الاسلام
دي وجهة نظري انا قابله للتأيد او التنديد
تسلم يا غالي

[عبدالرحيم سعيد]

ياجماعة ااسأل ذوالخبرة في المجال 0واستغفر الله اعمل بهذا المجال ثلاثون عام كلام الفارس عين الحقيقة والعواطف في هذه المسائل مابتنفع والزواج في كل فاشل فاشل فاشل وتبقي المحاكم والنفقات وكسر الظهر يااخي بلدنا فيه المسلمة والسوداء والبيضاء والقصيرة والطويلة 0مقنع سابل عين تدنقر من واليهم وين نلقاهم بره وطبع زين والجن التعرفو ولا الجن الماتعرفو اخي انيس0

[المكاشفى]

يااخوانا هوى انيس ده متزوووج ومن اجنبيه
يعنى كفايه تجريح وبعد ده نقد بناء يعنى صاحبى اكلها


العزيز انيس صاحبى الوفى بعرفك اكتر من روحك راجل حساس
ووفى حتى ولو على نفسك مالك المره لقيت منها شين
جاى ورى تشاور فى الجماعه الكلام طبعا جايط وملخبط
انو البره بتقبل بى وضعنا هنا وانت جايينا تانى وله وصلت التيرمنال
وله وله الامور جاطت عندك وله انا مافاهم
ياولدنا اجمد واسبت وعندك منها تيمان زى الورد

[طارق محمد الحسن]

الاخ انيس واللة موضوع الزواج من اجنبية دا موضوع شائك منها النظرة الاجتماعية وثانيا العادات والتقاليد السودانية يعنى بااواضح كدا الزواج من اجنبية ماحبابو وبلدنا فيها خير كتير فى ببناتهال والشاعر اسحق الحلنقى قال فى قصيدتو بنحب من بلدنا مامن برا البلد سودانية تهوى عاشق ودبلد فى عيون المفاتن شى ماليهو حد ولو انت متزوج من اجنبية تكون شربت وماحاتروا ابدا والجاتك فى ماللك سامحتك

[هيثم بابكر]

يااخوي ياود التوم انا كنت قايلك بتقصد بالزواج باجنبية دي يعني من برة مدني ،،،،،،،،،، شفت العنصرية دي كيف ،،،، واتاريك انت بتقصد من بعييييييييييييييييييييد اوووووووووووووووووك ؟؟؟؟؟

[ود المطامير]

عندها أخت ؟

[محمد الفاضل]

اخ انيس قال الرسول صلي الله عليه وسلم في معني الحديث تنكح المراه لاربع لمالها ونسبها وجمالها ولدينها واظفر بذات الدين تربت يداك ) صدق رسول الله كدي ياودالتوم خد قلبك في الرحمن وحاول عمل مقارنه وانت انشاء الله تصل للرأي الصائب وتشكر علي هذا الطرح وبجد هذا موضوع قيم يحتاج للمناقشه ولو بتشاهد برنامج مراسي الشوق في تلفزيون السودان تشوف العجب وتسلم اخي

[معتز الريح]

الأخ الحبيب أنيس ..
موضوع في السلك ..

عندي مداخله بسيطه ..
تعرف واحده من المشاكل الكتيره في زواج الأجنبية ..
أنو بعد وفاة الزوج حتاخد أولاده وتمشي أهلها ..
يعني مافي واحد حيشيل اسمك بين أهلك ..
وحاجات تانية كتيره سأعود لذكرها

[معتزودمدنى]

يااخوانا هوى انيس ده متزوووج ومن اجنبيه
يعنى كفايه تجريح وبعد ده نقد بناء يعنى صاحبى اكلها


العزيز انيس صاحبى الوفى بعرفك اكتر من روحك راجل حساس
ووفى حتى ولو على نفسك مالك المره لقيت منها شين
جاى ورى تشاور فى الجماعه الكلام طبعا جايط وملخبط
انو البره بتقبل بى وضعنا هنا وانت جايينا تانى وله وصلت التيرمنال
وله وله الامور جاطت عندك وله انا مافاهم
ياولدنا اجمد واسبت وعندك منها تيمان زى الورد

انيس والله لو كلام المكاشفى دا صاح تكون بالغت عدييييييييييل
لانى شايفك الليلة شايل واحد من التيمان
يعنى دى شورة تحصيل حاصل؟؟
على العموم يتربو فى عزك

[نور عبدالله]

هوووووووووى ياانيس

اوعك تعمل كدى

أحسن من بنات بلدنا مافى

ابورانيااااااا والله الاعتراف ده حقو نسجلو صورة وصوت كمان هههههههههه

[نور عبدالله]

بصراحة الانسان اذا لقى الزوجه المناسبة معاهو اعتقد مافي مشكلة انو يرتبط بيها طالما هو واثق فيها تمام الثقة .

[ترنيمه حزن]

والله يا اخ انيس احسن من بنات بلدك مافي ....
لكن انت استخير وانشالله يكون ليم الفيهو الخير