الحلقة الاولي *
منذ ان كان صغيراكان كباشا حاجة ما معقولة زول لعاب الكاس دا بيجيبو براة ما عايز اي مساعدة من زول يمسك الكورة دي من القون للقون ما يفكها الا لما الحكم يصفر قون طريقتو كدا في الكورة بما ان فريقة كان بيعتمد عليهو اعتماد كلي كان بيلعب بدون حارس ما دام الكورة الوقت كلو مع كباشا وهو من صغير كان الناس بتكلمو عنو دا قالو حاجة ما معقولة ماردونا جديد في الكورة السودانية ..يا الزول دا رجع لينا زمن ناس جكسا وقاقرين
الحلقة الثانية*
الفرق الصغيرة في المدينة بدأت تطارد (كباشا) ..وهو عمرو لم يتجاوز ال 14 سنة الفرق كلها تطارد فية عشان تسجلو الي ان وقع في فريق( الدلجة ) احد فرق المدينة المشهورة وبلعب في الدورى الممتاز للفشخرة الكذابة
الحلقة الثالثة*
من اول موسم وقع فيهو مع فريق (الدلجة) بدات الانظار تتجة نحو كباشا واندية القمة فريقي (الحمام الميت) (وصف الجريد) بدآ يرصدان النجم كباشا الجرايد تكتب عنة وهو يجيب في الاقوان ويعمل حاجات رونالدينو ما يعملا :وفريق (الحمام الميت ) (وصف الجريد) يتابعان ويرصدان النجم كباشا وبدات المفاوضات معة قبل سنوات من تاريخ اطلاق سراحة ..نادي (الحمام الميت ) اشتري ليهو (بيت ) من اربعة طوابق وكل ما كباشا يجيب قون يبنو ليهو طابق زيادة وناس فريق (صفق الجريد) كمان ما قصروا يشيلو ويدوهو في الشيكات والكاش .. وكباشا كمان يلعب علي الحبلين وعد ناس (الحمام الميت ) انة ما ح يوقع الا معاهم وقال لي ناس (صفق الجريد) اصلو ما ممكن انا العب في فريق غيركم ..
الحلقة الرابعة*
اقتربت التسجيلات والصحف بدت تنشر في صور كباشا اشكال والوان صورة واضع يدو في خدو وصورة تانية بيتكلم بالموبايل واسرة كباشا كمان ما قصرت الحلة كلها عملوا معاها حوارات ولقاءات.. جرايد (صفق الجريد) قالت الزول دا من صغير كان بيشجع في في (صفق الجريد) وجرائد (الحمام الميت) كمان جابت تصريح من الاسرة بيقول انو الزول دا من في بطن امو بشجع (الحمام الميت) وادارة صفق الجريد قالت خلاص نحنا حسمنا امر تسجيلو والمسالة مسالة وقت وصحافة (صفق الجريد) قالت الزول دا موجود معانا ولن يوقع في حتة تانية غير فريقنا ...والجماهير مسكينة الجرايد تلعب بيها مرة يقولوا كباشا في الفاشر ومرة في دنقلا وهو اترية في (دمشق) والجرايد تلعب باعصاب الجماهير يوم كباشا تحت قبضة (صفق الجريد) ويوم تحت سيطرة (الحمام الميت)
الحلقة الخامسة*
جاءت التسجيلات وتم الخطف فريق خطف اللاعب وفريق خطف اخوة والاتحاد العام خطف ابوة.. والظاهر اللاعب دا الفرق اتقسموة فريق شال الرأس وفريق شال الجلد والعضم شالو الجزار والسلطة اتدخلت وساعدت فريق (الحمام الميت) وناس (صفق الجريد) هددوا بتدخل الامم المتحدة في الموضوع دا المهم في النهاية وقع كباشا لاحد الفرق بعد ان قبض نصف مليار جنية وبيت وعربية وشيكات واجبة السداد
الحلقة السادسة
بدأكباشا يظهر في الصحف ويصرح فيها ..انا ..وانا.. واليوم كلو لافي بي عربيتو وبتكلم بالموبابل وحائم من حفلة لي حفلة..
الحلقة الاخيرة
قبل ان يكمل كباشا ست شهور تم شطبة ورجع تاني يلعب في فريق (الدلجة)
- منقــــــــــــــــــــــــــــول-
رد مع اقتباس
المشاركة الأصلية كتبت بواسطة مدنيّة
المفضلات