صحيفة اسبوعية سياسية اجتماعية تهتم بأخبار أعضاء المنتدى، وسياسة المنتدى
(رئيس التحرير + المدير + الغفيركلو) شبارقة
مساعدو غفير التحرير : أبورجاء ، مدناوي و هلمجرا
العدد العاشر ـ الثامن من مايو آيار سنة الفين وسبعة ميلادية
كلمة غفير التحرير:
الإخوة والأخوات رواد المنتدى ، بعد النجاح الذي حققه العدد التاسع ، نأتيكم بهذا العدد الجديد في ثوبه القشيف آملين أن ينال رضاكم ، أبقوا داخلين (الله يحلنا من لسناتكم).
الشمارات الإشتماعية:
مدنية ماسكاها حمى المغتربين ـ حسب غباها ـ دايره تغترب بأي طريقة عشان تضرب البروست وتتسوك بالمعجون المضاد للقشرة ـ عفواً المضاد للأكسدة،وتغسل بالصابون البودرة المعطر ، أصلها زهجت من خالتي فاطنة (نوع من الصابون البلدي) ومن هذا المنطلق ـ والناس كلها منطلقه الزمن دا ـ نعلن دعمنا لمدنية بدستة من معجون C جنال وكرتونة صابون بودرة معطر، أما بالنسبة للجداد، فالجداد البلدي أحسن يا مدنية أضبحي وابلعي بالهنا والبطحاء.
جيفارا البديري شغلوهو ناس الحيكومة جاسوس على المعارضة، وكلفوهو بالبحث عن جنا المطامير ، ولم يتردد في تعليق بوست قدر الليلة وباكر يناشد من رأي أو سمع أو شم شيئاً عن ود المطامير (شم دي حلوة مش!) أن يخبره فوراً لأنه أصبح عميلاً سرياً للحيكومة.
reem قالت عايزة تجرب معزتها عند الناس قدر شنو، نزلت بوست قالت أنا طالعة من المنتدى وما راح تشوفوني تاني وودعت الناس، والناس زعلت وطلعوا كلهم بيعزوها إلا أنا قعدت منطط عيني ماسك وردة (بيضاء) في يدي اقطع صفقة أقول بتطلع ، أقطع صفقة أقول ما بتطلع ، اقطع صفقة أقول بتطلع أقطع صفقة أقول ما بتطلع لمن قلبي قرب يقيف، ولكن الحمدلله المسعلة طلعت كلها فبركة في دربكة ، بس فكرت قلت لو في واحد من الشباب قال طالع أقطع شنو؟؟
عمر سعيد النور قعدوهو على الكرسي الملهلب ، وخجلااااااااااان من ولدو وليد أبو قرط (لكن يا جماعة وليد أبو قرط دا مش أبوهو أبو قرط طلع ولد عمر سعيد النور كيف!!؟؟ حكمتو بالغة)، المهم خايف يشاتر بكلام أو يحكي حاجات حصلت زماااااااااااان يقوم ينوم ليهو بي علقة من المدام ، الناس كلهم متحفزين وجاهزين للأسعلة المولِّعه، يا ربي بيجي يوم يكون فيهو ولدي معاي في المنتدى دا وأخجل منو جنس خجلة صاحبنا من ولدو !!
المسافر دايماً يشاتر في سفراته من حيطة الجالوص الى غيرها من المشاترات،،،، هذه الأيام مسافر في قصة النسيبة (النصيبة) ، خايف يجيب في الشنطة حاجة تزعلها، خايف يقول كلمة في لحظة دقسه تعكننا، خايف منها كلها على بعضها، ، النصيحة ليك يا المسافر من زول لا عرّس لا شاف النسايب: تعرس وتستلم مرتك وتطفش من البلد ، وخلي نسيبتك تأكل نارا، هي تنبح وانت مااااااااااشي!
عصام الدين عموش تم قبضه متضهباً هو والعضو سوباوي والعضو عوض صقير في أحدى حفلات الجبجبه بالرياض، واضعين نصب أعينهم المثل الشهير (بلداً ما بلدك أمشي فيها عريان) لكن طلع في القطر مفتش وتم قبضهم متلبسين واعترفوا بالضهب مع سبق الإصرار والترصد.
طلال الحاج (ما بتاع الجزيرة واحد تاني في منتدانا) مشى السودان وقضى اجازة كلها مساككا وجري ، سكوهو ناس الالزامية ، بعد شوية قبضوهو ناس الضرائب، والمغتربين و..... الخ ، لمن جا راجع يتكلم عن رجل حوت وامرأة أبو الرقيع ، الله يستر من وهم البرندات (مرض نفسي)!!
بورتبيل وصلاح فتحو بوتيك لبيع الكلام الجميل ، زوووووووووول قال ليهم كراعكم في نخرتكم ما في، الناس جاريه لأبو الرجاء ، عفواً أبو الرخا ((حوش القرقراب و(جر) الكراب)) ، والذي حقق نجاحاً منقطع النظير بلغ فوق الستمائة تريليون جنيه منتدياوي (عملة المنتدى)، وطالع في الكفر يا أبو رجوية ، أيامك يا مان.
العضو الرائع جداً صالح شرف ذو القلم الذهبي، المذيع العبقري ، مسكتو حالة نفسية زي المسكتني يوم شاكوش بت الحاج (كائن خرافي)،( أديها شاكوش تمسكني أنا حالة نفسية !!) المهم قرر عدم الكتابة عشان الناس مطنشاهو برغم الروائع التي يكتبها ، نقول ليهو يا زول يا صالح طول حبالك واجدع ليك عنقريب (قد) تحت ضل شدرة سوق ام دفسو ولا في حوش القرقراب ، ولا أدخل بوتيك بورتبيل وريح دماغك ،، أنسى المرض النفسي زي أخوك ما بسوي ، ما براك المجنون!! كلنا صواميلنا ملكلكة !!
مهيرة وأميمة عشرية ، زي الملكة اليزابيث ، يظهروا مرة في السنة ويختفو بقية الفصول الأربعة ، نزّلو في الفترة الأخيرة مواضيع قوية جداً في المنتدى العام ، بت عبود تتكلم عن إشادة الصحافة السودانية بمنتديات ودمدني ، ودا موضوع يسر البال ـ أفرحوا يا ناس حيكومتنا ـ وبت عشرية ـ والية المنتدى الثقافي ـ تتكلم عن موضوع الصداقة السودانية الاسرائيلية ، ودا كلام كبير ، يعني البهايم ديل ما لقو يصادقوا الا الإسرائيليين، والله لو صادقوا القطط المتشردة وسموها جمعية أصدقاء (الكدسة الشماسة) كان يكون أحسن!!
العضو أبو شوتال داير يتكلم اللهجة السودانية في البلدان الخليجية!! اتخيلوا معاي يا جماعة انو زار بتاع البقالة الخليجي وقال: عليك الله أديني ظهره وشمار وهبهان ، ودايرك توصف لي طواحين العيش بي وين عشان كرعي انهردن من اللف ومسكتني ورده وخشمي نشف نشاف جيب شبارقة ... بيفهم حاجة؟؟؟ خليك واقعي يا ابو شوتال!
الشمارات السياسية:
في سابقة مشهودة قررت الحيكومة التخلي عن بعض مبادئها ، حيث قال الناطق الرسمي باسم حيكومة الهنا (الفارس البنفسجي) (ما عارف سر التسمية دي شنو!!،، ليه ما يكون أخضر بني أزرق أبيض، ألوان حلوه .. ما علينا نربط الحمار محل ما يحب سيد الكارو) أكد أنه ليس بالضرورة أن تكون جميع مواضيع المنتدى ذات طابع جدي، بل هنالك متسع لكثير من الأشياء ذكر منها جريدتنا الغراء ، حيث صنفت من ضمن الأشياء الأخرى ، عموماً ما علينا صنفونا هنا أو هناك نحن في النهاية معارضة صريحة لنظام المنتدى، (معارضة سلمية طبعاً) ما ناس جدّيع حجار ، وغازات مسيلة للدموع وكلام زي دا ، ومن هنا ندعو الجميع للإنضمام الينا بما فيهم أعضاء حيكومتنا!!
الشمارات الأدبية:
(شمارات أدبية؟!! أول مرّة أسمع بيها ، عموماً ما علينا .. يلا)
حلمان أنا وقصة قصيرة جداً من البوستات الرائعة التي حظيت بقراءات متكررة في المنتدى الثقافي، الناس عايزة السريع وخفيف دائماً ، (مشروع قصة) بوست من انتاج شبارقة لكنو أخذ حظوا من الطناش ، يا أخوانا ما معقولة زورونا مرة (على وزن أسمعني مرة).
خاتمة:
من عز البلاد هاجرت بره مرقتَ
سكيت القرش لما الرويس انحتَّ
فاتن كم سنين لا غنيت ولا عرستَ
أبقو طيبين،،،
رد مع اقتباس
المشاركة الأصلية كتبت بواسطة نزار حسن محمد
....
...
المفضلات