من عاداتنا السودانيه

[امير عبدالباقي]

الاخوه الاعضاء لكم كل الود
حبيت من الجميع المشاركه بأبداء رائ حتي نستفيد من وجهات النظر في واحده من عاداتنا السودانيه

وهي : نجد في المناسبات المختلفه افراح ام كانت اتراح نجد حاجه اسمها ( الخته ) اي دفع قروش لصاحب المناسبه
في العرس نجد الكشف في يوم الحنه عند العريس وفي العقد وكتب الكتاب عند العروسه
وفي حاله الولاده يضعون القروش تحت مخده (النفساء ) يوم السمايه .
وفي يوم ختان الاولاد ايضا يحت المخده .
مثل هذه العادات موجوده في كل الشعوب لكن مابتكون قروش بتكون حاجه عينيه مثلا في السعوديه تجد الناس بتجيب شاي وسكر والبعض خرفان اذا كانو من اهل العريس
فعلا عاداتنا حلوه مابتجدها في في اغلب الدول
سوالي ليه الناس اتعودت علي ان تكون المشاركه في الافراح والاتراح قروش ومن وين جات هذه العاده ارجو من الجميع المشاركه
معليش اذا ماوفيت الموضوع حقو الكلام طار من راسي كان في كلام كتير
عاداتنا السمحه

[مدناوية]

الأخ أمير
عادتنا السودانية سمحة لو مابالغنا فيها
أعتقد أنو مسألة الخته دي جات من ترابط الشعب السوداني الحنين
الناس بتساعد بعض في المناسبات وكل زول بالحاجة البقدر عليها
لأنو زي ماأنت عارف المناسبات الزمن دا بقت مكلفة جداً والقروش هي الوسيلة الأفضل للمجاملة
لأنك أنت مابتكون عارف الشخص محتاج لشنو بالضبط ولمن تديهو الكاش في يدو هو بتصرف وبجيب الناقص
ربنا يكتر الأفراح ويقلل الأتراح
وشكراً



ربنا يديم المعروف

[كاتم الأحزان]

اخ امير موضوعك جميل
وزي ماقلت فعلا عاداتنا حلوه مابتجدها في في اغلب الدول

وبالنسبة لي الناس اتعودت تخت قروش انا في راي انو القروش
احسن حاجة عشان ماتحرج الزول امكن تجيب ليهو حاجة يكون هو ما محتاجه
بالتالي حيشيلا عشانك لكن القروش بتدي الزول الحرية يعمل بيها الحاجة الدايرة
ممكن يشتري وممكن يخليها المهم انت بتديهو راحتو وهو حر
انت بتكون عملتا العليك بالمشاركة والزول استفاد من القروش

[امير عبدالباقي]

الاخوه
نفحات الصباح وكاتم الاحزان
مشكورين علي المرور والمشاركه الجميله هي فعلا القروش بتساعد الزول في مناسبتو ويشوف الناقص ليهو شنو ويتمو ؛ لكن انا بسال من وين جات العاده دي لينا ولا دي حقتنا نحنا ومافي منافس

[خالد عبدالماجد]

العزيز أمير عبدالباقي
حكاية دفع المال في المناسبات ربما تكون ميزة سودانية خالصة نشأت من ترابط السودانيون وتكافتهم لإنجاز أعمالهم الإجتماعية . فمثلما وجد النفير وكان تجمع كم هائل من الناس في مراسم الدفن والتشييع وجدت هذه السنة الحميدة وبإعتقادي أن بها الكثير من الميزات تجعل من واجبنا المحافظة عليها والحرص على أستمراريتها فهي من العادات السودانية السمحة التي لايوجد مثيل لها في غيرنا ممن البلاد ومن شأنها أن تساعد كثيراً في تحقيق أهداف إجتماعية طيبة وبها يكون تحقيقنا لقول المولى عز وجل ( وتعاونوا على البر والتقوى ولاتعاونوا على الإثم والعدوان )
أما لماذا كان تخصيصنا للنقد دون سواه من الأشياء العينية فأؤيد رأي الأخ كاتم الأحزان فيما ساقه .
ولك أخي أمير التحية على الموضوع الهادف .

[خالد أحمد الصول]

المسلم أخو المسلم تراحما و تكاتفا و عونا و السودانيين اكثر من يطبق هذا القول لان مبدأ الاسرة الممتدة لازال مترسخ في عاداته و رغم أن هناك عادات كثيرة إندثرت برغم من معانيها الحلوه الراقية فقد كان الاباء يأكلون جميعا في ديوان واحد و يشربون حتي شاي الصباح في لمه حلوه مباركة يباركها الله و يبارك لهم في رزقهم و زريتهم ...تبدلت هذه العادات بعادات أسواء وهي الشعور بالأرستقراطية و التعالي و قفل البيبان و الاكتفاء بالتلفزين و القنوات الفضائية و تفضيلها علي التزاور و صلات الارحام

[ود المطامير]

ذكرتنى يا الحبيب أمير بيوم عرسى
أبوى ... كل نص ساعه يمشى يشيك على حركة سير الكشف حق الخته , وعلامات الإنزعاج باديه على محياه , ما هو طالب الحلِه كلها والظاهر حركة الخته ماشه حبوبه دبويه وأنا أضحك فى سرى وبعدما اللمّه إنتهت سألتو ..
_ أها يا حاج الكشف جاب ليك كم ؟
_ جاب لى كم ؟ علىّ الطلاق أكتر من سبعه شالوا من جيبى وختوهوا لى فى الكشف !!
((( و بعد كم يوم لاقونى ناس كتيرين إعتزروا لعدم جيتهم لعرسى عشان ماعندهم حق الخته )))

[عزيز عيسى]

أميرنا الأمير،

يا سلام عليك يا أمير مواضيعك دائما (ملهلبة)..
فعلا كما ذكر الأخوان بأن عادتنا السودانية بالجد سمحة ويجب المحافظة عليها..
لأنه قدر ما طفنا في الدنيا دي ما لقينا زيها..
ففي رأي هذه العادات ليست مستوردة بل نابعة من صميم واقع الشعب السوداني الطيب
وترابطه مع بعضه البعض في كافة أنواع المناسبات.. وأصبحت متوارثة بين الأجيال..
وعلى الرغم من تغير الزمن وتبدل الأحوال لا أدري إن كان مثل هذه العادات متواجدة
حتى الآن أم لا..
من ضمن هذه العادات الجميلة وحتى عهد قريب بالنسبة للشخص الذي يريد أن يتزوج يطبع كروت دعوة يكتب عليها:

يسرنا أن ندعوكم لحضور حفل المرطبات الذي يقام بمناسبة تأهيل أبننا...
على كريمة السيد.. وذلك في يوم.... في تمام الساعة..
والعاقبة عندكم في المسرات
تقام حفلة المرطبات أو كما يسميها البعض الآخر حفلة الشاي في الشارع أمام منزل العريس..
ويأتي المعازيم من المعارف والأصدقاء والأهل وتوزع عليهم المرطبات مثل الببسي كولا
والميرندا والكيك.. ثم بعد ذلك يبدأ المعازيم بالتحرك ناحية الكشف للمشاركة بدفع مبالغ
من المال كل حسب قدرته..
يعني العريس مطلوب منه إنه يتوكل على الله ويعزم على العرس ما فيش مشكلة ممكن
يتزوج بالعون الذاتي.
غايتو الواحد فينا لما كان صغير كان طول الوقت تلقاهو حايم جمب برميل الحاجة الباردة
وعينو أبدا ما تزح من الكيك زي الصقر.. بمجرد ما يدوه كيكة وقزازة ببسي يأكل الكيكة
(ويقرطع) القزازة بسرعة ويقوم جاري فرحان..
أيضا زمان كان في حاجة إسمها (الشعقيبة) تدفع عند الختان..
تخرج البنات في الشوارع وإذا صادفن أي واحد كبير يطالبوه بدفع (الشعقيبة)..
المهم تدفع أي حاجة ريال.. طرادة.. خمسين قرش.. جنيه..
ولو ما دفعت الله قال بقولك يشيلوا حسك.. وممكن يطلقوا فيك أغنية.
تصدق أنا لحدي الآن زعلان من صالح أبوشوارب وودالصول لأنهم ما دفعوا
لي (الشعقيبة) في يوم خيتاني.

[امير عبدالباقي]

الاخوه الغالين
ودكسلا خالد
صول سودان
ودالمطامير
عزيزنا ودعيسي
كم كانت فرحتي وانتم تتجولون وتسردون في هذا البوست ؛ الذي اضاءه بوجودكم العامر وكم سررت بمداخلاتكم وقفشاتكم الحلوه
فعلا دي عادتنا الحلوه ونتمني ان لاتندثر مع زحمه الحياه كما قال اخونا صول سودان
لكن ياعزيز الكلمه دي اول مره اسمع بيها جبتها من وين وبتعني شنو النشوف ابوشوارب بقول شنو عنها (الشعقيبه) والله غلبتني عديل كده

[صالح ابوشوارب]

الاخ العزيز امير
شكرا ليك وشكرا للاخوان المشاركين وشكرا للفرده عزيز . طبعا يا امير (الشعقيبه) هي كانت عندما البت يطهروها بتكون قاعده في البيت وصاحبات البت يشيلوا صينيه فيها بلح وحلاوه كريكاب ( اوع يا امير تقول لي كريكاب دى شنو ) ويلفوا على الفريق والاهل ويقدموا الصينيه للزول ويقولوا ليه عايزين (الشعقيبه) يقوم يشيل بلحة ويخت قروش .. وطبعا يا عزيز يوم طهورك نسيت ! ما ختيت ليك ( فرينى )

[سواااح]

طبعا انا زول قراية سااااي

اها بس بنجي نشوف البسوا فيها

قصدي البتكتبو فيهو ..

[Jamal Elmahi]

يا أمير الحسن لو تسمح ظروفك تغير لينا موضوع الختّه لي شعقيبه...النعمو شباب الربّه أبو الله جابو والخواجه بياجدو راحتم في المواضيع دي...هسه يا أمير في زول جاب سيرة عجايز...أقول ليك شباب الربّه تقول العجائز...الله يسامحك يا أمير لكن الفيك أنعرفت ...ويوم طهور الله جابو كان مالقيت مفاتيح بيتكم ومفاتيح الفريق أختفت بقدرة قادر أمشو كوسوها عند ناس الله جابو...بكونوا سرقوا ليهو العاده والمابلقوهو في بيتو عشان يديهم العاده مفتاحو الله معاه...وحكمة الله هسه قالو بدل مفتاح البيت بقوا يسرقوا الموبايل ...شدّه وغسيل عدّه....

مشاققه...
الشعقيبه لي زمن ما شفتها ياربي يكون طهور البنات خلوهو وبرضو العاده في طهور الاولاد يعميني فيها ياربي طهور الاولاد برضو خلوهو...الشئ خواجات ساي ...

ود الماحي

[امير عبدالباقي]

الاخ (العم ) العزيز ابوشوارب

شكرا لك كثير للتوضيح ومداخلتك الجميله لكن والله يطرشني ماسمعته بحاجه اسمها كربكاب الا حسي دي نوعه شنو عليك الله

الحبيب سواح

سنو يعني بتقراء واتدينا حاجه كدي

الاخ ودالماحي

يازول مالك عاوز تجيب لي المشاكل حسي انا قلت في ناس عجائز مابراهم بجيبوها لنفسهم مره الشعقيبه ومره كربكاب ماعارفين المره الجايه بقولو لينا شنو جديد
لكم الف تحيه

[عزيز عيسى]

يا أمير،

أنا كنت فاكرك زولا نجيض وناقش حاجات أكثر من أخوك الخواجة..
لكن خذلتني وطلعت حنكوش متحنكش..
فضحتني مع ودأبوشوارب وودالماحي حتى حلاوة كريكاب ما قادر تنطقها..
عامل لي لسانك الألجن دا.. إسمها كريكاب مش كربكاب.. الظاهر عليك
نفسك في كباب.. يا بتاع كبدة الإبل إنت.
هسع لو كان أكلت حلاوة كريكاب وحلاوة موز وحلاوة لكوم وحلاوة مريسة
ومعاهو بسكويت كرم اللذيذ داك كان عرفت تنطق الإسم.
غايتو ودهاشم وودالصادق لو سمعوا الحكاية دي بيشيلوا حالك يا أمير..
يا ودأبوشوارب عليك الله دا كلام..كدي لو في جيبك واحدة من الحلاوات
الفوق ديل أدي أمير واحدة خليه يحلي.

[محمد السر احمد]

اخونا طبعا حركة الخته جميله وذات مدلول اجتماعي جميل لكن جد محرجة في بعض الاحيان

[بنت الرفاعي]

هي فعلا عادة جميلة وأسمحوا لي أحكي ليكم القصة دي:
في سنة 2006وبعد اغتراب طويل جا لي أهلو أهلوا قالوا ماحايرجع بدون ما يتزوج وهو ما عندوا حق العرس!!!! المهم ما اهتموا للشغلانية دي وقالوا الله كريم قدر العندوا جابوا لي الشنطة والعرس كان طوالي بعد اسبوعين تقريبا طبعا الفلس كان ضارب زي ماقلت ليكم, العرس جا بدوا الشغلانية كلها ديون لحدي الخضار وجاهم لحظهم عجل هدية والحاجة العجيبة أبو الولد العزومة ماخلا ليهو حلة عندوا فيها ناس وبالمساجد كمان والعرس تم والرجال ماشاءالله ختوا ختتهم وبعد العرس من قروش الختة حلحلوا الديون كلها وأدوا أبو الولد من الباقي والولد ذاتوا أدوهوا حق الفندق والأيام القاعدة!!!!
احسن حاجة عملوها مسكوا الكشف لزول عاقل وعرف كيف يتصرف ويوزع القروش وبكدة طلع العرس بلا أي خسائر تذكر!!
وتسلم أخوي على الموضوع.