ناس نحنا و واقعين فوق محنة . . شاحد الله بي بركة سيدي الحسن . . يفك ليكن محنتكن. . و تاني محنة خترية زي دي ما تكاجركم . . و لا تتعارض ليكن فوق الدرب . . و يفك محنة مذيعاتنا النديانات . . خسوساً مذيعتنا الخدورية . . الشديدة . . المبغبغة . . غادة عربي قطعة الشيكولاتة . . و ما نشوف يدها أم حنة منقوشة . . قاعدة فوق جضمها الأملاس الطري . . و يا كوصر بيومي انتي بالذات الله يفك ليك محنتك المشاترة . . كيتن عليك . . عشان تسيبي السرحان و الشردان البتسوي فوقو في برنامج شوارد . . . . في ظمتكم فيكن واحد لاحظ محنة كوصر بيومي حلوة كيفن ؟؟؟ . . وحات سيدي الحسن . . محنة تكوي في الجضم . . بري بري بري . . غايتو انا محنتها دي . . ما بقدر أعاين ليها مرتين . . كوصر دي هي مراة محنة بس . . أنا غايتو قررت كان سافرت السودان اتكسر و اتفن لي ناس التلفزيون في خشم بابن . . و أقعد اكتب شعر . . و اتغزل فوق محنتها دي. . داك الليلة . . كنت فاتح التلفزيون . . و اتمعن فوق محنة غادة عربي . . المراة كلمة كلمتين تخت طراطيف أصابعينها فوق حنكها المدهش . . في ظمتي الحنة مو حنة . . و الدهب مو دهب . . و الحنك مو حنك . . و الجضم وقعت وراء النبي منو . . قطع برجل . . غايتو اليوم داك استمتعت بي محنة غدوية حتى الثمالة . . و بالليل كانت السهرة . . برنامج شوارد . . الله بسعلني كمان كوصر بيومي تقول لي غدوية انتي شنو . .. . كوصر المحنة بتجلعها . . و بتعذبها عذاب الله أكبر . . غايتو هي ملكة المحنة السودانية دون منازع . . غدوية الخدورية مراة بوبارة ساكت . . و ما قاعدة في الواطة . . محنتها فالصو . . بتتمحن عشان نشوف الحنة و الدهب و نموت بي شوقا . . لكن كوصر بيومي . . بتتمحن خلقة كدا بس . . اليوم داك . . من محنة غدوية لي محنة بت بيومي . . شلت هم كبير خلاس . . قلت يمكن ناس الخرتوم ديل . . المحنة بقت عندهم موضة. . بعدين كان الواحد القدر وداهو الخرتوم . . و ما اتمحنت قدامن . . يقولوا دا زول طرة ساكت. . و متخلف . . المحنة ما بعرفها . . شن فايدتو . . عشان كدا اسحن لي اتعلم المحنة هنا قبلي في السعودية دي . . قبل نمشي لي بلد المحن داك . . أها بقيت كل ما أنوم . . أنوم ممحن . . و كان صحيت أصحى ممحن . . و كان في يوم صحيت و لقيت روحي ما ممحن . . أقوم سريع سريع أخت خمستي فوق اتنيني. . و كان انتكيت . . انتكي و يدي في جضمي . . ذي المراة النفسا . . و في المكتب . . أقعد في الكرسي . . و قبل أخلف كراعي . . اتظكر كوصر بيومي . . أقوم أخلف يدي و أختها فوق حنكي . . و كان المدير سألني دا شنو . . أقول ليهو دي محنة . . انت مالك و مالي . . لكن يا أخوانا . . أمس اكتشفت أنو كوصر بيومي دي . . محنتها دي مو موضة زي ما كنت فاكر . . شايلة راصها القدر طبق الكسرا المعلق وراها دا . . برنامج شوارد . . ما يعزلوا ليهو عيلا . . الجلابة المُكان . . الواحد يجي خيمة كوصر بيومي . . و سروالو كاري بي الواطة . . و يقعد في البرش و يتشتح قدام كوصر بيومي . . عاد كيفن المراة دي ما تتمحن . . واحد يتشتح ليها بي يمينها و التاني بي شمالها . . و التالت يقاصدها عينك عينك . . وحات الله حاجة تحير . . أنا كان في بكانا . . اتمحن بي يديني الاتنين . . الله بسعلني . . في مرة . . استضافت ليها اتنين من شعراء بحر أبيض . . اتنييييين . . مكان و غلاد . . جواها داخلين يهدروا . . انبطحوا الاتنين قدام بت بيومي . . و المرأة الفوراوية ست الجبنة . . جابت ليهن الجبنة . . واحد فيهم . . استغفر الله . . ماسك تكة سروالو و يلولح فوقا لحدي السهر انتهت . . و التاني شايل ليهو جك موية في يدو . . و قعدوا الاتنين ينضموا فوق أهلن العرب . . و بت بيومي اتمحنت . . ختت راسها الغليد فوق راحت يدها . . و شبّحت عويناتا . . ومحنتها كل ما ليها ماشة زايدة . . الراجل يقول في الشعر و يلولح في تكت سروالو . . و جاي الخيمة شبعاااااان . . كل راس دقيقة يدشا . . عاااااااااااع . . عااااااااااع . . عااااااااااع . . و الراجل المعاهو . . شوف عيني . . قدر ما صاحبو يدشا يمد ليهو جك الموية الشايلو في يدو . . و صاحبنا يكرررع في الموية . . الحقيقة حاجة بطالة خلاس . . و حات إسم الله المراة الفوراوية ست الجبنة . . اليوم داك تعبوها جنس تعب . . لسة تلاقيها تداعي فوقن . . قدر ما تقعد فوق بنبرا . . الراجل القاعد يدشا و يترع دا . . يدق ليها الواطة بي عكازو . . و يلولح ليها في تكتو . . الفوراوية مسيكينة . . تجري تجيب ليهو الجبنة . . غايتو ناس التلفزيون ديل . . صحي حاقرين بي ست الجبنة دي جنس حقارة . . يا ربي قاعدين يصرفوا ليها ماهية كم؟؟؟ . . في ظمتي . . ناس دارفور ديل محنوا ناس الأمم المتحدة كلهم . . هسي كان فكروا لي الفوراوية ست الجبنة دي . . يقوموا يوصلوا قضيتها لي الأمم المتحدة . . و يقولوا مظلومة و حقوقها مهضومها . . و يمكن قضيتها تدخل تبع مفاوضات السلام مع الحيكومة . . و يطالبوا بي محاكمة عمر الجزلي و كوصر بيومي في لاهاي . . و تاني نحنا نقول حليلك يا محنة كوصر.
رد مع اقتباس
المشاركة الأصلية كتبت بواسطة نزار حسن محمد
المفضلات