السلام عليكم
وأنا أبحر فى أفق شبكة العنكبوت الرحبة والمشربكة وأحوم من بيت لبي...
أقصد من منتدى لمنتدى فجأة إنتفضت كمن لدغة عقرب , معقول أحوم من
بيت لبيت ذى المشّاطة وما حصل يوم فكرت أزور بيت أهلى العُزاز علىّ
دول ؟! ما مدنى الحبييبة دى أنا سكبت على طُرقاتها أجمل سنوات العمر
وكم كان يوم المُنا يوم يرسلونى مدنى أفرح وأنبسط على الآخر , مدنى الحبيبة
أفضالها علىّ كثيرة وعلى الطول ركبت بكسى من الشرفة بركات قلت أمشى
أزور الحبايب ديل وأسلم عليهم , أها فى الكبرى يوقفنى ليك (المُشرف )
ويسألنى إسمك ورقمك السرى وعنوانك ذى التقول شايل بضاعة مهربّة
أها قال لى أستنى شوية وإستنيت يوم كامل حتّين بعد داك قال لى أدخل مدنى
ترحب بيك , باللّة بس قطعت الكبرى كدا (أول صفحة أفتحها) أكان ألقى ليك
واحد ومعاهو أصحابة شايلين العكاكيز وقال لى .
_ عرفناها مزاحمتكم لينا فى شوارعنا , كمان جيتوا تزاحمونا فى أسامينا ؟
واحد معاة قال لى ,
_ هى وكالة من غير بواب ؟
واللى بيمينى قال ,
_ الكبرى دا من يوم ما سوّهو ما جاب لينا غير المشاكل .
وهجت ليك فيهم .
- أسمعوا هِنا هوووى , الكبرى جاب الخير , يعنى الشيّة المزمزتها أمس خروفها
سقيتو وأكلتو إنت؟ ما سارحين بيهو نحنا فى الخلا يوماتى , والجدادة اللى
خليت عضامها ذى المساويك شتت ليها العيش إنت ؟ ما جات من الشرق
مربوطة برة البص لما وصلت سوق الملجة وصلت عريانة الهوا ما خلّى
فيها ولا ريشة .
مع الصوت العالى إتلمّوا الأجاويد وأكبر واحد فيهم قال لى ,
_ خلاص يا ولدى مدنى بترحب بيك وأخوك دا صاح بشبهك لكنو أطول منك
بالألف والللام عشان كدا كل واحد ليهو إسمو والصور بتفرق بينكم .
_ لا ياعم . إفتح اللّة , الصور الناس ما بشوفوها إلا لمّا يفتحوا المقال
والمسافر دا إمكن فى ناس ما بحبوة وكدا بضيع على الزبائن .
نط المسافر فى رقبتى وقال لى ,
_ جديد لنج وكمان لميض ؟ أمشى غير إسمك .
_أغير إسمى وأضيع خروفين السماية حقتى ساكت ؟
_ ياخى العربى دا جانا من وين؟ نجيهو بجاى يجينا بيجاى دا شنو دا ؟
_ ياخى الغلط من المشرف كان من الأول يقول لى الأسم دا موجد شنو
يعنى الألف واللام ؟ شيلتهم وختتهم واحد
_ واللّة عربى فصيح كمان
_ يازول عربى ولأ حساب وهادى قعدة فى الكبرى وعلىّ الطلاق مانى
قايم من هِنى إلا ناس المنتدى ديل يشوفوا لى حل .!!!
وتحياتى
رد مع اقتباس
المفضلات