الدبـّاي سكن جوة الدولاب . . الدبـّاي عشعش و بيض جوة البترينة . . الدباي مدّسي جوة المتبخ . . دا كلو كان زمان . . هسي الدبـّاي دخل عصر العولمة . . و بقى ما قاعد يدسا . . بقى دبـّاي متقلقص و فاهم . . و ما بخاف من قولة كخخخ . . و لا قاعد يدسا جوة المتبخ ذي زمان . . ياكل مع الواحد في طبق واحد . . و يعيش معاهو في اوضة واحدي . . و في سرير واحد . . بختكم يا عزابة الهنا . . لقيتو ليكن شيء يملئ السرير الوسير . . عليكن الله شفتو دبـّاي الزمن دا مودينا لي وين؟؟؟ . . أنا قايتو كنت بخاف من الدبـّاي . . و بكجنو و بكجن خلقتو دي . . الله يقبحو . . داك الليلة و انا جاي من الشغل . . لقيت لي دباية متشعلقة في باب الشقة بتاعتي . . وقفت بعيد منها و اتخذت ساتر . . قعت أعاين ليها من بعيد لي بعيد . . و هي متشعبطة في الباب و تقاوم في الوقوع . . فجعة . . الدباية دي كراعها الورانية انزلقت . . و جات واقعة في الوطة هردلب . . غمرت . . وحات الله حننتني . . و دموعي جرن . . قلت استاجر فوقا . . جبت لي دلقان لفيتو فيها . . دخلتها في أوضتي . . و ختيتها في علبة سجاير . . و هي لسة غمرانة من الوقعة . . جريت البقالة جبت ليها علبة زبادي . . قالوا الدبـّاي بحب الزبادي . . ختيت ليها نقيطة هيلة زبادي جمب راسها . . و غتيتها بي طرف الدلقان . . و مسحت دموعي ورقدت في سريري . . و أنا شاعر بالأسى لهذه الدبـّاية المسكينة . . اليوم التاني صحيت من النوم لقيتها تفرفر جوة علبة السجاير . . و فاردة يديها تتمغى . . اتكيفت . . و قعدت اعرض في نص الأوضة من الفرحة . . جبت ليها باقي علبة الزبادي من التلاجة و قعت أرضّع فيها . . الدبـّاية دي بعد يومين فنترب قامت . . و طلعت من علبة السجاير و قعدت جمبي في سفرة الاكل . . اتشعلقت في وركي . . و مدت لي يدها . . دموعي رقرقن من منظرها . . و شحدت الله . . ربي لا تحرم بيت من الاطفال . . قمت مديت ليها حتة طماطاية قعدة تلحس فوقا . . اليوم التاني الدبـّاية بلغت العافية . . و بقت تطلع بي رقراق الباب و تمشي للبنغالي الجخسة جاري . . و تقيل عندو النهار كلو. . باليل تجي راجعة اوضتي و ترقد في علبة السجاير . . الحكاية دي حيرتني . . و الفار بدأ يلعب في عبئ . . و قلت لازم أعرف الدباية بت اللذينا دي قاعدة تمشي وين . . قعدت اتجسس عليها . . لحدي ما شفتها دخلت شقة البنقالي الجخسة . . قعدت أعافر في باب شقة البنغالي لامن فتحتو . . دخلت وراها . . لقيتها عايشة غراميات مع ضكر دباي غليد جنس غلد . . تقول بلحة بركاوي . . دا ظنيتو البوي فيرند بتاعها . . زعلت جنس زعل . . و الزعلني اكتر . . انو الموعد الغرامي دا تم في شقة البنغالي الجخسة . . رفعت نعالي و كنت داير احكم عليها بالإعدام . . لكن نعلت ابليس . . و قلت في سري . . هن نسوان الزمن دا بقن هاملات و مطلوقات و زايعات . . البحمي دبـّايتي من الهملة و الانطلاقة شنو . . رجعت شقتي و انا شاعر بالرضاء عن دبـايتي الدايرة تأمن مستقبلها . . اليوم التاني جابت معاها البوي فيرند بتاعها . . و قعدت تعاين لي و تحندكني بيهو . . دخلتو معاها جوة علبة السجاير . . و بالليل اسمعن يسكسكن و يضحكن و يسون في البدع . . و انا فرحان لأني قدرت أجمع حبيبين جوة علبة سجاير واحدة . . اليوم التاني . . الدبـّاية رسلت لي أمها و أبوها جابتن . . و رسلت في طلب عماتها و خالتها . . علبت السجاير انملت دبـّاي لي حدها . . قلت استاجر فوقم . . أبني ليهم صالون . . جبت لي كرتونة صابون . . و فرشتها ليهم . . و عملت لي العريس و العروس جناح خاص لي شهر العسل . . لكن ظنيتو معشر الدبـّاي دا مو مودب . . يوم جيت . . فتحت الكرتونة . . ظبطت دبـّايتي في وضع غير شرعي مع اربعة ضكور غلالالالاد . . و نضيفين جنس نضافة . . عضيت اصبعي من الزعل . . جبت لي كيس نايلن و عملت ليهن حملة مداهمة . . و خميت الضكور ديل و رميتهم في اوضة البنغالي الجخسة . . لكن دبـّايتي بعد يومين بطنها اتنفخت و بقت كبيرة . . ظنيتها حملت منهن بالحرام . . الكرتونة حقت الصابون بعد يومين . . انملت دبـّاي . . و الدبايات الضكور ظنيتن زعلن من رميتي ليهن في اوضة البنغالي الجخسة . . عملن غسيل مخ لي الدبـّاي حقي . . هسي من رمضان دا دخل . . الدباي دا اختفى من شقتي كلوكلو . . ما قاعد يظهر عيلا مع اذان المغرب . . وكتين الأذان يقول الله أكبر . . الدباي دا يقول . . و ما رميت إذ رميت و لكن الله رمى . . و يجي طاير و يقع لي في كباية العصير . . و جزء قاعد ينفذ عمليات انتحارية في كوم العصيدة . . و جزء الآخر ليهو دقن و شنب . . واقف بعيد يتفرج . . يضحك علي و يمد لي في لسانو . . يا ربي يكون دبـّّاي البنغالي الجخسة دا تابع لي تنظيم القاعدة؟؟؟ . . و لله في الدبـّاي شؤون.
رد مع اقتباس
المشاركة الأصلية كتبت بواسطة Jamal Elmahi
المفضلات