يسلم عمرك

 للشاعر : صالح فرح صالح

 

يسلم عمرك ماقصرت لاجافيتنا ولا اتنكرت
لما الناس اتناسوا العشره جيت سالمتنا مااتأخرت
***
لمن كنت بعيد ومسافر فقدنا هواك بالجد ياحبيب
نجم السعد الزارنا عشانك لملم ضيوا وفاتنا مغيب
كتر خيرو الزمن الساقك رد غيابك وجابك طيب
زى ما انت ما اتغيرت
***
شفت الدنيا وراك شن سوت بعد الريده علينا اتقوت
الغلطات الكانت عابره بات قاسيه ما بتتفوت
لمن جيت والبسمه معاك ضحكت لينا الدنيا وضوت
قلنا اريتك لو بدرت
***
كان لملمت شتات فرقتنا وكان ضويت فى ليلنا نجوم
وكان عينينا الصبحت ساهره عرفت تانى حلاوة النوم
وكان احبابنا اتحاشو اللوم لو شرفتنا زاير يوم
وكان ياحليلك ما اتحسرت
***

صالح فرح صالح / العين

 

 

راسل الكاتب

محراب الآداب والفنون