|
قراء ودمدنى المثقفين كل سنة وانتوا
طيبين وكل عيد وانتوا مجتمعين على الخير والمحبة والجمال والاخاء هذه
عيديتى لكم مع خالص تقديرى
وتحية خاصة لكتاب المحراب المميزى النكهة ولكل الاصدقاء بالمحراب وقصيدة لم
تكتب لاحدما فى خاطرى
طريف باكى وخديد سيال
خشيم شاكى
وتعب غربة
وعذاب وحدة
انشغالات بال
مع الاطيار انا الحاكى
حبيب الروح بعادك طال
********************
سعيد عيدك
بعد ترجع الم عيدى مع جيتك
بعيد رغم البعد والنو حبيبنا
عمرنا ، بنريدك
دوام بنقيف على الاطلال
جوا الخاطر طلل ماطر
وريد هطال
نزور بلدك
سفين بحار
ندور فيها
مع الاخيار
محطة محطة يا انت
عيون مشتاق زول عازم
ولا مهزوم ولا منهار
بنملا ايدينا نديها
سلام طيبين
يرددوا انتوا يا الحلوين
جدا جيتو
دروب مدنى
وعد الطين
ودار حامد
خدار كسلا
وديار ام زين
تناديكم
حبيب حقانى بملا العين
بناديكم
يقول ليكم :
خلق الله
الضلام ستار
تضم شوقك قراب عطشان
تخت القربة فى خشمك
وتتمتم بى حروف اسمك
تشوف رسمك
ولا تروى
تفكر فى الرجوع تنوى
يزيد عشمك
تقيف تقوى
وتسطر فى الورق احساس
تقول كاتلنى فيها هوى
ايا الخدير رؤاك دوى
بدور عمق القليب مأوى
غرامنا حوى
عشان ريدك بموت انا فى بنات حواء
تروح فى مدار
تقدم كل اوراقك
طلب هام لى اجازة صريح
تشيلو الريح
مناك فى العودة يبقى سراب
تطل هدأة ضراك خراب
تعود شقيان
وتغرق فى وساد حزنك
وتقفل باب
براك تبكى
ولا يدخل عليك انسان
ولا تشرك معاك اصحاب
ولا تناضم
ولا تناقش
ولا تكالم
ولا تهذر
ولاتحاكى
تقول ما ردت الاكى
وشايل الشوق متل واقف فى صخرة جمار
**************************
طريف باكى وخديد سيال
خشيم شاكى
وتعب غربة
وعذاب وحدة
انشغالات بال
مع الاطيار انا الحاكى
حبيب الروح بعادك طال
|
