زهجة غربة
كعادة معظم المدن تكون الشوارع متخصصة في سلعة معينة - مثلا يكون هناك شارع معروف بمحلات الجملة لبيع الأواني المنزلية وشارع اخر معروف بتخصصه في المعدات الصناعية وشارع معروف بمحلات إكسسوارات السيارات والأجهزة الكهربائية ولوازم الإنارة وهكذا ....
المهندس أحمد ....سوداني استقر به الحال أخيرا بأن عمل بمحل كبير مرموق في أحد تلك الشوارع المتخصصة .... في شارع اختص فقط بالمعدات الصناعية ... كل الشارع معدات صناعية وأدوات صيانة ، كمبروسورات دريلات مفكات زرادية طقوم حبات مفاتيح عجلات عفريتات صواريخ جلخ وصنفرات ...الخ معدات ولا شيء غير المعدات ...لا مطعم ولا بقالة ...
جلس في المحل الكبير على كرسيه على كاونتر المبيعات، وحوله في فترينات العرض مثبتة مختلف الادوات الصناعية للبيع ....
كانت الساعة تشير إلى الثامنة صباحا ... فتح المحل باسم الله وجلس على الكرسي يتناول قهوة الصباح ينظر يمينا ويسارا متفحصا ما هو معروض وأتذكر عندما دخلت عليه كانت خلفه مباشرة المعروضات بالتحديد دريل كبيرة وحجر جلخ وماكينة صنفرة وشوية مبارد من شركات مختلفة وعلى يمينه كومبروسور هواء وعلى يساره ماكينة غسيل السيارات ... بمعنى أن الوسط من حوله كله كان معدات صناعية
دخلت انا ...جئته قاصدا مكانه وأحمل له شيكا بمبلغ محترم ثمن بضاعة اشترتها شركتنا منه...فسلمت عليه : السلام عليكم ورحمة الله
صاحبنا شارد الذهن ...يفكر في شنو ما عارف
الشكل واضح سوداني والعمر يدل على انه زول قديم هنا ...بس ياربي يكون شاغلو شنو
لم يرد التحية ...مسكين "أقول في سري" يكون ضربوه هناك في السودان في احد مشاريعه أو يمكن يكون مؤجر في الخرطوم وأولاده هناك والإيجار كل شهرين زائد 15 % أو يكون عندو حافلة هناك باعوها ليهو عشان يسددوا بيها مخالفات الحافلة المرورية أو يسددوا بيها تكاليف صيانتها زمان .... المهم صاحبنا مشغول شديد
تاني مرة ... السلام عليكم يااااا زول
بي خلعة كدا "وعليكم السلام ورحمة الله "
ايوة كدا ...صاحبنا فتح ....وذهنو رجع ليهو ، كان شارد وين دا؟؟؟ ما مشكلة ؟؟ سأحاول أن أنسيه هذه الهموم وأطلع بيهو شوية من روتين العمل وأخليهو يحس أن هناك ناس أتعس وضعا من حالته هذه ... نعم ...سأعمل له هزة عنيفة في تفكيره ...وسوف ينسى هذا الهدوء الذي يحيط به وهذا الشرود الذهني الطويل ...يجب أن ينسى كل هواجسو وينسى كل همومو ... أو أغير مسارها....
طبعا هذه هي المرة الأولى التي التقيه فيها ...فهو لا يعرفني ولا أعرفه ...رد التحية وكان الارتياح باديا في عينيه ...قد يكون ذلك لانه تأكد أني سوداني ...أو قد يكون حسب ما يرى أنني زبون مهندم وشخصية قد يخرج مني بصفقة كبيرة ....
اتفضل اجلس ...
فجلست ...
ينتظر مني أن أبادره بمقصدي من هذه الزيارة ....
جلست ولم انطق بكلمة ...
صاحبنا منتظر برضو ....أهلا وسهلا شرفت والله ....تشرب شنو قهوة ولااا شاي ؟؟؟
لم أجاوبه ....
بدأ يشك في أمري
أهلا وسهلا ...شرفت والله
وبدا ينظر لي خلسة من قدمي إلى راسي
وبدأت أنا انظر في بضاعته مرصوصة على الفترينات وعلى طاولات العرض دريل ومكابس هواء ومولدات كهرباء صغيرة وماكينات لحام ودكاكات تربة وماكينات قص النجيل وتاكد تماما انني فهمت كل بضاعته المعروضة...
فاستعدلت ووجهت وجهي إليه موحيا باني اريد التحدث إليه
وصاحبنا انشرح صدره وترك كل شيء واصبح موجها كل اهتمامه نحوي مهيئا نفسه كنوع من الاحترام لاستقبال السؤال مني أو أي كلمة .... سؤال واحد وجهتو ليهو بصوت عالي وبكلمات واضحة .... خربط كل كيانو...
يا دكتور ما بنلقى عندكم تيراب طماطم أو حليب أبو صرة؟؟؟
نعم نعم؟؟؟؟ دكتور وتيراب طماطم وحليب كمان أبوصرة ؟؟؟؟
لا حول ولا قوة الا بالله
الله يلعن الغربة .... دا ود ناس ... هندام وشخصية .... اتلحس
لحستو الغربة ....لحست مخو ....
الله يلعن الغربة
دا أهلو تلقاهم منتظرينو
ويمكن كمان يكون عندو اولاد بهناك بيدرسو في الجامعات وعاوزين ملايين
يكون يا ربي دا حصل ليهو الحصل لي دا؟؟ ضربو مشاريعو هناك أو باعوهم عشان يسددوا بيها ضرائب المشاريع ذاتن... أو يا ربي دا يكون ادوهو ارض مغتربين ودفع فيها الوراهو وقدامو ولقاها أخيرا في الخلاء لا موية ولا نور ولا مواصلات؟؟؟ لا دا اتلحس خاااالص ...أكيد مصيبتو اكبر .....يكون يا رب دا من تجار الشمال الكانو في جوبا وخسروا كل شيء بعد الاستفتاء ؟؟؟ يكون عملوا فيهو شنو يا رب!!!!!
لا حول ولا قوة الا بالله ...الله يرجعنا لبلدنا سالمين وغانمين
سالمين بس !!! ...غانمين دي ذاااااتا ما عاوزنها للبنشوفو دا
دا أهلو ذاتم خلوهو يطلع ليه؟؟؟؟ وهسع يارب يكون فاااطر أم جيعان وهل هو بيعرف مكان سكنو ؟؟؟ ولو عارف هل بيقدر يصل وهل عندو حق الليموزين؟؟؟
لا حول ولا قوة الا بالله .... دا صباح شنو دا ؟؟؟؟؟
يا زول خلينا نجيب ليك فطور وبعدين نشوف الطماطم والحليب ابو صرة ....وشايفو يتحسس في جيوبو عشان يديني الفيها النصيب أو يؤجر لي سيارة توديني مكان اهلي واقترب مني كانه يريد التأكد من اني إمكن أكون سكران
لا والله ما قاعد افطر من فترة طويلة من بعد بكرة زمن استفتاء نيفاشا والهولوكوست وطالبان الجانجويد
تأكد صاحبنا أن الموضوع ما فيهو سَكَر بس اتأكد تماما أن الاسلاك كلها ضاربة مع بعضها ضربة قوية ...كمان جابت ليها استفتاء واتفاقية نيفاشا أكيد دا من تجار الشمال الانضربو ...وشوف كمان سفر عبر االتاريخ هنااااك لمحرقة اليهود وتعريج على افغانستان وحرب بوش مع طالبان ورجوع فورا لمشكلة دارفور...دا مخو كلو حروب ومحارق وانفصال ....والله دا اتخج خجة ...من قوتها يمكن ذاتنا نتخج معاهو!!!! احسن نخارجو من هنا سريع سريع أو ستتدهور الحالة ويمكن يقوم يكسر لينا بضاعتنا دي ويصبح المكان حراج من جديد ... قال شخصية قال
خلاص ما دام ما عاوز فطور .... انت ساكن وين عشان نرجعك لمكانك وتشيل معاك الطماطم وكرتونة الحليب ابو صرة من شجرة أمو طاااااازج
لا لا ..أنا ما طالع من هنا أبدا ؟ الجنوب وانفصل ...أرجع لشنو؟
يعني لو ما رجعت من هنا الجنوب ح يرجع؟
يمكن يرجع ...لو ساعدناهم وعملوا دولة قوية ديمقراطية وبها كل المقومات وشالوا حكاية احساسهم هذا غير المبرر بالدونية وانهم مظلومين ...فيمكنهم بعد ذلك الرجوع لنا في أي شكل كونفدرالية أو تعاون موسع أو صداقة خاصة أو تذكار الملح والملاح
والله كلامو هنا عديييل ... وعين العقل ....بس أخاف يخربط تاني ... احسن أجاريهو ... مااااا الحكمة من أفواه المجانين ...هذا مثلٌ قد يكون صحيحا هذه المرة ...فقال لي : طيب انت رايك شنو لو اصبحوا دولة قوية ودخلوا عندهم الاسرائيليين بشكل رسمي وبدأوا يحيكون ضدنا المشاكل وما تركونا في حالنا وشالوا مننا موية النيل؟
يا اخي اسرائيل دي لو عاوزة تدخل أي مكان ح تدخلو ...ما عاوزة صداقة ولا عاوزة تاشيرة ولا تحتاج لانفصال عشان تدخل هناك ...واقرب دليل مقتل المبحوح في دبي ...دخلوا البلد وسكنوا الفنادق وحاموا الشوارع وعملوا عملتهم وطلعوا ...وقبل كدا في تونس نفس الشيء وفي يوغندا في مطار عنتبي ...وقد تكون هنا في الخرطوم ....وبعدين اسرائيل قاااعدة في القاهرة واسرائيل موجودة في الأردن ... وما مرتاحين هناك...فعاوزهم يجوا جنوب السودان ولجوبا ويكونوا مرتاحين ؟؟؟ ديل أحرص الناس على حياة فاين الحياة هنا لياتوا ويعيشونها؟؟؟ دا كلام بتاع تخويف فقط ...ولو جات اسرائيل أو كل الاسرائيلين وسكنوا عندنا فأنا أؤكد ليك أن طيبة الشعب السوداني سوف تجعل من الاسرائيلين شعبا طيبا ويمكن ينسوا يهوديتهم ذاتها أو يطلبوا الانفصال ...أما حكاية موية النيل دي فانا اعتقد انهم حتى لو قلنا لهم خذواا كل الماء الذي ياتينا من النيل الابيض فان السودان لن يتاثر فمياه الازرق تمثل أكثر من 70% من حصتنا فهل سيحولوا النيل الازرق عندهم؟ وبعدين ياخي نحن عندنا المصدر الاقوى والدائم لا نيل ابيض ولا أزرق ...عندنا مصدر الماء ...الاستغفار ...استغفروا ربكم انه كان غفارا ...يرسل السماء عليكم مدرارا ... السماء مش النيل ...
يا خي دا كلام أكثر من معقول .... طيب مالو كان ملخبط في البداية ؟؟؟ والناس زمان ما كانت بتستغفر؟
انا كلامي من البداية كان عديل.... نعم كانوا يستغفرون ولكن ليس بطريقة تعبدية مقصودة ...يجب أن يكون الاستغفار هو شعار هذه المرحلة ...استغفار في كل زاوية في كل مكان وفي كل لحظة في المدرسة في الشارع في البيت وعند النوم كمان ... وتكون صلاة الاستسقاء واجبة علينا كل شهر مرة والجميع رجال ونساء وشباب واطفال يشاركون فيها وبطريقة مقننة وفي كل مكان حتى في الجو ... ولامن سألتك من تيراب الطماطم كنت قاصد .
تيراب طماطم كيف وأنا ببيع معدات صناعية ؟؟ وبعدين عاوزك تقول لي رايك شنو في الجنسية المزدوجة دي للجنوبيين؟
تيراب طماطم لانك سوداني ...فكتير من المحلات تلقاها لبيع الملابس ...تعاين شوية كدا تلقاها لبيع العملة وفيها يباع التمباك وتعاين شوية كدا تجد زيت وطحنية وعسل ومجلات وكتب وكسرة وابري وبطاقات جوال وشرائح ...كلها للبيع..فليه ما أسألك عن تيراب الطماطم وانت سوداني بتبيع الزراعات والحصادات ومكائن قص الشجر والنجيلة ورشاشات المبيدات والسمَّادات ...أيهما أقرب هذا لتيراب الطماطم أم التمباك لحفرة الدخان؟ ونرجع للجنسية المزدوجة ... طبعا هذا حق ... فالجنوبي الذي يسكن في الشمال ويريد البقاء في الشمال بعد الانفصال كسوداني فما المانع في ذلك؟ الدستور والمواثيق الدولية والعرف وطيبتنا تكفل له ذلك ... بل على العكس تماما علينا أن نشجعه بالبقاء هنا فهو اخ وارتضى العيش بيننا فلا يحق لنا أن نرغمه على عيش هناك قد توجس منه خيفة ... يجب أن يحتفى بمثل هذا الشخص... وهو جسر للتواصل مع من آثر الابتعاد عنا فقد يأخذنا إليه أو يعيده الينا ... ثم أن ذلك ليس بدعة بل هناك كثيرون بيننا يحملون جنسيات غير سودانية بالإضافة إلى الجنسية السودانية في القرى وليس في المدن فقط ... ونحن ما زلنا بلدا كبيرا يحتاج إلى التعمير فلا نضيق بابا خلقه الله واسعا ....
والله كلام معقول ....طيب انت ناديتني بيااا دكتور فهل انا دكتور؟ ورأيك شنو في مشكلة أبيي؟
نواصل ...
رد مع اقتباس
المشاركة الأصلية كتبت بواسطة ahmed algam
المفضلات