انا ماشي نيالا أو أو

[عباس الدسيس]

اول ما اتعينت في البنك الزراعي علي فرع زالنجي كان في طيران لمدينة نيالا علي ما اعتقد نصف شهري او اسبوعي الجماعه ناس البنك ادونا قروش التذكره ومصاريف الرحله من نيالا الي زالنجي معاي واحد زميلنا تم تعينه في وظيفة محاسب الزول ده لي شقاوتوا باراني انا قال لي نمشي نجيب التذاكر قلت ليهوا انا اكلت قروش التذاكر من زمان ديني نمشي نركب القطر درجة ثالثه اول ماهيه اديك قروشك... مشينا ركبنا القطر والله رجلك مافي حته تختها فيها كمان نسيت.... الزول اداني القروش اجيب تذاكر القطر برضو اكلت القروش وسددت بعض الديون قبل السفر اتقابلنا تاني يوم قلته ليهوا القطر بعد اطلع من الخرطوم السطوح يا بطل.....
قبل ما نصل نيالا نتونس شويه مع التحيه لاهلنا في منطقة غرب دارفور بالاخص زالنجي ونتمني ان يعم السلام ربوع الوطن الحبيب ... طبعا قبل الحركات دي كان في النهب المسلح بعدين قالوا الجماعه بتاعين النهب المسلح وقفوا لوري نزلوا الجماعه منوا عشان اشيلوا ما خف وغالي ثمنه لسؤ الحظ اللوري كان شايل ناس تعبانين مفلسين عدمانيين وقفوهم صف لقوا عندك قريشات يتم اخلاء سبيلك ما عندك تتعرض لاستجواب باهانات وضرب اول واحد لقو عندوا قريشات شالوها منوا قالوا ليهو يلا شتت اخونا مشي البعدوا لابس نظيف وقيافه الجماعه كانوا راكبين في اللوري عامل ليهم فيها عنتر شايل معاهوا (( تجتجي )) التجتجي اسم للمسدس التصنيع المحلي..... اللوري ماشي كل مره اقول ليهم ... وله ناس نهب ديل الا ما نلاقيهم اشوفوا نأمل فيهم كييف.... اخونا فتشوا لقوا ما عندوا قروش شايل معاهوا تجتجي الحاجه دي زعلت ناس النهب المسلح مسكوا الراجل ضربوا ضرب غرائب الابل قالواليهوا اقيف بي هنا براك بنجيك راجعين تاني وقف بره الصف بعدوا مرأ بتاع النهب المسلح بعد فتشا ما لقي حاجه قال ليها انت اسمك منوا يا الما عندك حاجه قالت ليهوا فاطنه قال ليها الله زي اسم امي خلاص انتي امشي بعدا في الصف راجل اول حاجه طاخ ادوهوا كف طلع العندك يا زول تعال بعد داك شوف الشلاليت قال ليهم يا جماعه دقيقه الجماعه افتركوا الراجل عندوا قروش داسيهم وقفوا من الضرب قال ليهم يا جماعه ما سألتوني من اسمي قالوا ليهوا اها خلصنا اسمك منوا قال ليهم اسمي ابكر تحت تحت بقولوا لي فطين......... اها رجعوا للراجل بتاع التجتجي بعد الضرب قالوا ليهو طلع الجلابيه والعراقي والسروال والمركوب خلوهوا زي ما الله خلقوا قالوا ليهوا ارقص بعد ما تعب من الرقيص ادوهوا توجيهات قالوا ليهوا من هنا لي بيتك جري ما تتلفت وراء كان اتلفت وراء بتلقي رصاصه في راسك اخونا ما صدق قام جاري صوف لما وصل البيت توووووش دخل القطيه لقي زوجتوا وقف قداما عريان قالت ليهوا ده شنو يا ادم إريان ما لابس هديمات ولابس طاقيه في راسك..... قال ليها ديل ناس النهب لاكن هن كان رجال كا يهبشوا طاقيه ده........
ونواصـــــــــــــــــــــــــــــــــــل.......

[ابوالنور]

ومستنينك يا ود الدسيس

[عباس الدسيس]

وسوف نواصل يا ابو النور القطر لسع ما اتحرك مع شكرنا لكم بالمرور

[moh_alnour]

قال ليها ديل ناس النهب لاكن هن كان رجال كا يهبشوا طاقيه ده

عالم جبنات ترقص وما تختشيش بس ما تكون دا أنت ؟ منتظرنك يا ود الدسيس

[عباس الدسيس]

الله اديك العافيه يا ود النور فاصل ونواصل

[بت الشبارقه]

الفاصل دا مالو طول كده

[عباس الدسيس]

بت الشبارقه سلام متشكرين علي المرور الفاصل ده حدو قريب بس انتي تابعي معانا

[عباس الدسيس]

القطار المر *** فيه مر حبيبي
بالعلى ما مر *** يا الشلت مريودي
في الرصيف مستني **** وللثواني احاسب
امتى يظهر نورو *** الليه ديمة اراقب
القى فيه هناى *** يلقى فيني هناهو
ننسجم لريدنا *** الكان يا مريودي
الاشرجي تراه *** للاشارة اداهو
فتحوا السنفور *** لمروره براهو
قلبي زاد خفقانه *** و زاد كمان في ولاه
للحبيب الماري *** الليهو زاد شوقي
القطار يتهادى *** حل في وادينا
يلا نجري نشوفه *** المن زمان ناسينا
في السلامة سلامة *** اه انا الجنيتها
في المحطة بكيتها *** يا القطار تدشدش
يا الشلت مريودي

ركبنا القطر ولا يزال القطار يقطع ظلمات الليل من حوله في ثقة واستقرار دفعاني لئلا أنظر للوقت أسندت ظهري لحائط القطار.. فأنا راكب ليس له تذكره ولا مقعد.. ا اكتفيت بالجلوس على حقيبة صغيرة أحملها تضم بعض الملابس وأشياء أخرى لا قيمة لها وأسندت ظهري إلى جدار العربة الخلفي. تحرك القطار وسط ضجيج المسافرين وصراخ المودعين وبعد ان اسدل الليل استاره سكنت علي جوانب القطار الهدؤ والسكينه ..لا حديث.. لا همسات.. لا ضحكات... لا شيء على الإطلاق أكثر من صوت عجلات القطار علي السكه حديد وهو يرتفع وينخفض ويهتز يمنيا وشمالا ...... بدأ النوم يسري في اعين الجميع .... قلته لي زميلي بعد ده نتوجه للسطح نوم هنا مافي طلعنا السطح طريقة النوم واحد انوم والثاني احرسوا عشان ما اقع من القطار اتفقنا اول نومه لي انا ما مضت نصف ساعه علي نومتي اشعر بيد تهزني فتحت عيني علي رجل شرطه يحمل بسطونه ... ليه انتو مسطحين ما عارفين التسطيح ممنوع .... انا اسفين يا سعادتك اصلوا احنا طلبه.... رجل الشرطه : طيب يلا معاي.
تم اعتقالنا في القطر للمخالفه وتوجهنا الي سجن القطر.
اجمل مافي سجن القطر ممكن تنوم قلت لي زميلي اهو الله فتحا علينا بي محل فاضي ننوم فيهو ... عند الاستجواب تم سؤالنا عن التذاكر وهي ايضا اصبحت مخالفه ثانيه... وجدنا شرطي اعلي درجه من الذي اعتقلنا وهو الذي سألنا عن التذاكر فاجبناه ليس لدينا تذاكر سأل الشرطي الذي احضرنا .... ديل شنو الجبتهم لينا ديل .... الشرطي الاخر طلبه .... خليهم اقعدو جوه هنا....نمنا نومه زي مابقولوا لي سابع نومه صحيت علي رائحه اكل وصوت فكفكت عامود كانت غلطة احد رجال الشرطه قال اتفضلوا احنا ما قصرنا في التفضل جينا ناكل معاهم الاعلي درجه قال لينا انتو ما مسلمين غسلوا يديكم الوسخانات ديل من كلاموا تشعر الراجل ما عايزنا ناكل معاهو..... بعدالاكل مشينا نمنا ... اها بقينا ننتظر العواميد بتاعت ناس الشرطه البتجيهم من المحطات كل ما القطر اخذ ليهو سنده اجينا بالشباك عامود اتغيرت طريقة العيزومه من ناس الشرطه اول كان بقولوا اتفضلوا نقوم جري علي الاكل بقي اقولوا جماعتك ديل نايمين ولا شنو في اللحظه دي نعرف فيها اكل نغسل ايدينا عشان ما نحرج .... شويه كده نسمع همس نبرة الجماعه نايمين اختفت توجد فقط اصوات كركبه ورائحه اكل اقول لي زميلي جماعتك جابو الاكل ننزل مع الجماعه في الوليمه.... الاعلي درجه المسأله دي مله منها سال الشرطي الجابنا ليهو قال ليهو ديل قلته طلبه : قال ليهوا ايوه سعادتك..... الاعلي درجه ديل طلبه عليك الله ولا نشالين تذاكر ما عندهم اكلوا اكلنا كلوا عذبونا بالشخير رجعهم السطوح ولا نزلهم اي محطه جايه المهم ما عايز اشوف الجماعه ديل بعد عشره دقائق انشاءالله ترميهم بالشباك ده.