النتائج 1 إلى 6 من 6

الموضوع: دردشة بين التعازي

     
  1. #1
    فخر المنتديات
    Array الصورة الرمزية النور محمد يوسف
    تاريخ التسجيل
    Aug 2007
    الدولة
    قرية أم تريبات
    المشاركات
    1,040

    دردشة بين التعازي

    ونسة في بيت العزاء عن البقر المسروق
    كانت لحظة مؤلمة ....... الجميع يتقاطرون لتعزية ابن المرحومة في وفاة أمه... وتمر الساعات والناس اتعشوا تب وشوية شوية تبدا الحركة تخف ....والناس في لمتهم ديك يبدأوا في الونسة العادية تكسيرا للوقت في انتظار أي قادم قد ياتي .... وتبدا الونسة ...لا قيود ولا تحفظات ....فالقصد الترحم على الميت وقد حصل ....بقي التساؤل بين الحاضرين .... وكا ن ود الشيخ جائي من السودان بعد تمضيته اجازته بين الاهل بالسودان..... فالي أضابير الونسة:

    - آ أزول الحمد لله على السلامة....قالوا لي جيت يوم الثلاثاء بالليل ونزلت العمل طوالي في الصباح عشان ماتضيع منك الجمعة....
    - آآي والله....اخوكم جاء مديون شديد....
    - أكيد البنيان أتعبك ....
    - لا حرَّم لا بنيت ولا حاجة..... وكمان ادينت 20 مليون.....
    - أصولو عملت شنو !!! عرست التالتة؟؟؟
    - والله ولا حاجة
    - طيب مديون ليه؟ أكيد اشتريت ليك بقر!!
    - بقر شنو ؟؟؟ بقري المعاي زاتو طلق ولا بقرة مافضلت فيهو ....(40 ) بقرة . كلهن سرقوهن....
    - سرقوهن!!! دا كلام شنو .... عسه عليك الله البيدخل منطقتكم دي منو عشان يسرق؟؟؟؟ وكمان بقر!!!
    - والله السرقن واحد ربيناهو عندنا وزوجناه وقعد معانا 30 سنة.... واصلوا التهمة ما جات فوقو......لكن طلع هو الحرامي
    - اها ان شاء الله تكونوا لقيتوا البقر؟؟؟؟
    - لقيناهو شنو....أنا على الطلاق بهايمي الباقيات...الصغيرا صغيرا من عتود الى نعجة وقعنا ليك فيهن ضبح ...يوماتي .... لناس كفارة كفارة ... وغير حق البنزين لناس الفزعة.....وبعد ما لقينا الناس الضبحوا بقرتين ثلاثة من البقر المسروق.... القاضي ختاهم ليك في الحبس واعترفوا بذبح شوية منهن....قالوا جابهن ليهم فلان.....القاضي اصر عليهم انو البقر كلو عليهم....فرحنا شوية.....وبقوا قاعدين ليك في الحراسة ....وتعال شوف اللجاويد كل يوم من حتة ... كيمان كيمان يجو للوالد ...عشان نتنازل و نفك الناس ديل من الحراسة....وهاك يا ذبائح ....ابوي الشيخ راجل كريم ما ممكن ضيوفوا امشوا بلا ذبيحة .... وناس حمد لله على السلامة من كل الحلااااال....فبعد ""كفارة كفارة" جانا كمان دور" بركة اللقيتوهن"....ضبايح ....ومرات مبيت كمان.....وعلي الطلاق السخيلات كملن قرضوهن ليك تب....ففي الاخر قلت لابوي .....
    هوي ....أنا بقري دا عفيتو لله تعالى....ما عاوزو..تب.......أتعوضو في جناي....
    ومشيت عملت التنازل وفكيت الناس من الحراسة ... بس ساكت عشان ارتاح مع عيالي في اجازتي ....
    آها قالو بيشتروا لي عجيلات... اتعوض بيهن البقيرات....قلت ليهم لا ...لا حرّم ....بقر هنا تب ما يخش زريبتي تاني.....
    - آها سويت شنو ؟؟؟....
    - والله دخلت في حاجة تانية ....أخواني....
    أخواني حالفين يقتلوا الحرامي لو لمو فيهو.....
    والله بقيت في حوسة وهَمْ شديد .....فكل يوم أخواني فارين بالحلاااال يفتشوا عليهو..... وانا خاتي ايديني في قلبي ....والله حق المحامي يدافع عنهم ما عندي لوكتلوهو........ربك صاحب حكمة ...اتاريهو الحرامي كان عيان راقد في المستشفى .... وأهلوا ذاتو ما عارفين .....بس يجينا ليك خبرو...
    مات....الحمد لله .....موت الله ساكت....
    والله ارتحت راحة كاني لقيت بقري ... أخواني.....كان ممكن يروحو فيها لو لقوا الحرامي دا.....والله انبسطت تب .... هَمْ وانتهى ....ونسيت ليك البقر والسخيلات ....لكن الدين عليا عليا وتب ما في عوجة....والبقر ...الله يقطع البقر ويقطع تربيتو.

    - أحد الحاضرين يعمل مداخلة:
    والله كان تسوي زي ما عمل ود عمك الشويطين داك..... صبح الصباح لقا حمارتو ما في ....قص الدرب هنا وهنا عرف أنو الحمارة دي انسرقت.....كتلا في نفسو....ما كلم ليهو زول .....قال يا أخوي انا ما بقدر على كفارة كفارة وحق السكر ما عندي ....طلَّق ثمن حمارتين ما يكفيهن ... واعي .....كان بقيراتك ديل تكتلن في حشاك وتسكت....

    - 40 بقرة كبفن اكتلن في حشاي......حاراا شديد..... لكين لو خيروني هسه ....بكتلن تب في حشاي وعلي الطلاق إمكن كمان أدفع للحرامي الفرق ....بس ما اكون مديون.

    يتداخل احد الحاضرين:
    - انتو والله قصتكم دي زي قصة محطة التلفزيون الأهلية ...جات زمان في التلفزيون....
    - ودي كيف دي كمان ؟؟؟؟
    - القصة أنو قالوا كان في زول ...مسكين جد ...كل يوم يخرج من البيت يفتش عن شغل....ما يلقى ويجي راجع تاني .....والصباح تاني امشي يفتش.....وما عندو في بيتو أي حاجة كان بس قميصو وبنطلونو اللابسن....وبقن قديمات ومشرطات ...وفي يوم من الايام لقى ليهو بنطلون وقميص ... من احد أصحابو .....غايتو أحسن من حقاتو....قام غيَّر وملَّص المشرطات ....لمَّاهن وخلا المشرطات في البيت وطلع يفتش عن شغل....آها .... اثناء غيابو داك دخل ليك حرامي في البيت ....وفتش ليك كل البيت ما لقى أي حاجة الا القميص والبنطلون القديمات الزمان ديلك ....شالن وطلع....في طلوعو داك شافتو ليك زوجة المسكين...وضربت الكوراك ...حرامي حرامي ....وجااا ليك الناس...كورجة....ورا الحرامي أشي شلوت وشي بنية وشي تفة وتفوا ليك الحرامي دا تفة شديدة وفي الآخر سلموهو الشرطة عشان البنطلون والقميص .... بعد داك دا يكلم التاني والناس بدت تجي لبيت المسكين دا ... تحمدل السلامة ....وسكر وشاي من الدكان.....أشي شاي وشي عصير (شربات) وبلح وحلاوة....بعد شوية زولك جاااا....دخل البيت ......لقى ليك اللمة
    - في شنو؟؟؟؟ في شنو يا جماعة؟؟؟
    - ها زول الحمد لله على السلامة .....الحرامي دخل بيتك و قبضوهو وما شال أي شي غير بنطلون وقميص رجعوهن منه.....فحمد لله على السلامة....
    - حرامي مين وقميص مين وبنطلون مين !!!! نحنا ما عندنا حاجة زاتو يسرقا حرامي ......
    اتلفت جاي وجاي شاف ليك الناس ....دا ماسك ليك كباية شاي يشرب ودي موية.....وشفع شايلين ورق الحلاوة ...شال ليك عكازو ووقع ليك في زوجتو ضرب ...لَبْ لب...القال ليك كوركي منو !!!! حرامي ! ياريت لو شالك انت زاتك وريحنا منك خشمك الهش دا.... ما يشيلو القميص والبنطلون...الله يشيلك من الدنيا دي كلها....الله لا كسَّبك ....المكشرة ....الغبشا ما ملسا...

    بعد شوية زولك هِداا شوية كدا وقام مشاا الى الدكان ....سيد الدكان مما شافو ...ها زول حمد لله على السلامة ...الحرامي دخل بيتك وجلدوهو ليك جلدة تمام .....بس يستاهل....لاكين حسابك الليلة طار فوق ....ناس بيتك شالو سكر وشاي وعصير و....و..و....و .... فحسبها ليك المسكين لقاها حاجة كتيرة خلاص... طلع من الدكان ...وبعكازو ..... لب لب في أي واحد من أولاد الحي يلاقيهو في الشارع يديهو بالعكاز لب لب .....الجابك لينا شنو...لب لب ....طالبنا كفارة ....لب لب ....وكمان عصير و شاي.... لب لب لب.

    آها يا جماعة ......أنا اتأخرت ولازم أمشي الآن .....الله يرحم المرحومة ويسكنها فسيح جناته وانتا يا ود الشيخ الله يعوضك في بقيراتك. ويسدد ليك ديونك.....مع السلامة 00000



    النور

  2.  
  3. #2
    فخر المنتديات
    Array الصورة الرمزية مدنيّة
    تاريخ التسجيل
    Jul 2006
    الدولة
    محل الرئيس بنوم والطيارة بتقوم
    المشاركات
    18,647

    النور مرحب بيك معانا في المنتدي

    وسعيدين بانضمام قلم مميز مثل قلمك

    ماسردت هو واقع معاش
    نسال الله الهداية للجميع
    لك شكري وتقديري

    كل إنـــ(انا امراة لاتنحنى كى تلتقط ماسقط من عينيها)ــــاء بما فيه ينضح
  4.  
  5. #3
    فخر المنتديات
    Array الصورة الرمزية عثمان جلالة
    تاريخ التسجيل
    Jun 2007
    الدولة
    أم تريبات
    المشاركات
    3,822

    الرائع أبو محمد .... قصة حقيقية وواقعية ... للمعاش .. وصورة مقلوبه .. من كل الاتجاهات ... وسخريه مضحكه ... رغم جو الحزن ... في بيت البكا ... وربنا يصلح الحال ... ويدينا بس العافيه ...

    تعرف .... أسي هناك ... في الحله ... أبوات البنات الزي ... وزيك ... كان البت جاها عريس يفضل حسب الواقع الحالي .... كتمان الموضوع ...... لحدي يوم العرس .. من بنات الدلوكه والشاي والقهوة .... وغيرا ... يعني موت وخراب ديار عشان كده جات مقولة (يلا برا لمه عرس وتمه)

    بسم الله .... إبتديت متل البرق لاحت

    فى الشين والفسل بقينا نتباحت

    طال الكان قصير والعالى إتاحت

    والصولات حليلن ملكتن راحت

    *****************
    ومن يتهيب صعود الجبال ......... يعش أبد الدهر بين الحفر
  6.  
  7. #4
    عضو مميز
    Array الصورة الرمزية فراس
    تاريخ التسجيل
    Jun 2009
    المشاركات
    544

    استاذي النور محمد يوسف


    لك التحية والاحترام والتقدير

    قصة تحكي عن واقع معاش بكل هذه التفاصيل

    احد الاخوان حكي لي قصة في نفس السياق

    في السابق ايام انعدام السكر كان احد الرجال يعمل تاجر كبير

    تاجر كبير في ذلك الوقت تعني تاجر خضار او شي من

    هذا القبيل في يوم من الايام احضر معه جوال للسكر وكان

    هذا حدث في قريتهم وكان احد الجيران يشاهد الجوال وهم

    ينزلوه من ضهر الحمار واستبشر خيرا بان مشكلة سكر الجبنة

    اليوم قد حلت دخل الي زوجته لتناوله كوب فارغ لياتي بالسكر

    من جاره ولكن عندما ذهب اليه رفض ان يعطيه حتي مقدار فنجان

    مماترك الرجل يغلي من الداخل وذهب جهز حمارة وذهب الي القري

    المجاورة واشاع بان التاجر الكبير قد توفي اليوم وكسرت كل القري

    في بيت التاجر لكن وجدوة لم يمت واجبر صاحب البيت ان يكرم كل

    الضيوف ولم يتبقي له رطل من السكر والرجل يشاهد المنظر من

    علي البعد وهو يضحك لما حدث ويشير اليه بالكوب الفارغ

    لو مليت لي كبايتي دي دا كلو ماكان حصل ليك

    تسلم وتقبل مروري

    انت من وين يابنية وناوية على وين السفر
    قلت لي مدني الجميلة مدني يا أجمل خبر
  8.  
  9. #5
    عضو ذهبي
    Array الصورة الرمزية عاطف عولي
    تاريخ التسجيل
    May 2009
    الدولة
    مدني مارنجان حلة حسن محطة الصهريج جوار نادي حلة حسن
    المشاركات
    5,739

    استاذي النور محمد يوسف


    لك التحية والاحترام والتقدير


    تصوير دقيق لواقع الحال ومقدرات تفوق حد الوصف علي تطويع الحرف والكلمة.


    لكن يا أستاذي مش دا الفهم السايد في انو اللمة للتخفيف عن اهل الميت. ويتكلموا في كلوا تجارة وشيكات وسرقة بقر وعربات . عشان ما يقعدوا مبلمين وكلوا واحد يعاين للتاني. اخير يمرقوا اهل المرحوم من الجو الحزين.

    وبرضو اخيرمن بي غادي.

    وياريت تنقل كاميراتك الي الحوش التاني لي جوا عندهن هن وتورينا الحاصل في الحوش داك شنو؟

    لا تقرأ وترحل ساهم برد أو موضوع وتذكر جهد غيرك في كتابة المواضيع ومساعدة الأخرين

    [IMG]
  10.  
  11. #6
    عضو فضي
    Array الصورة الرمزية أشرف صلاح السعيد
    تاريخ التسجيل
    Aug 2009
    الدولة
    مدنى حى الزمالك
    المشاركات
    2,086

    أستاذنا النور سلام وتحايا..
    مشتاقين وإن شاء الله ما منعنا من ابداعاتك خير..
    بشكر اخى ود عولى النكش المشاركة دى وعرفنا بيها وتبدو من اوائل مشاركاتك بالمنتديات حسب رد الاخت مدنية..
    والله القصة يا ها زاتا "ميتة وخراب ديّار" ..
    أراك قد عكست فكر يحسبه البعض محسوب لنا رغم العكس..التوادد والتراحم عندما ينقلب الى عبئ ثقيل أخير عدمو..للأسف الشديد هناك صور ومشاهد عديدة بمجتمعاتنا يحاول البعض إصباغ الحنية وتماسك المجتمع والسمات الجميلة إليها رغم نفيها للأساسيات المهمة التى يجب علينا إحترامها والإهتمام بها من اجل دفع مجتمعاتنا للأمام كالخصوصية مثلا..نجدنا قد إستغنينا عنها وكشطناها تماما من قواميسنا ..غرفة النوم مشاعة للجميع بما فيها من خصوصياتها..النفاج المشرع بابه "دا اذا كان عندو اصلا باب" على طول اليوم والليلة وإلزامية نساء البيت بالإحتشام المتواصل حتى ببطون بيوتهن التى غدت بيوت الجميع ..وتأهب رجال البيت على مدار ال 24 ساعة لاستقبال الضيوف دون نيل قسط ولو بسيط من الراحة يعينهم لتجديد نشاطهم للقيام بأعمالهم وتلبية احتياجات عوائلهم..
    التراحم والتكافل فى كثير من الأحيان إنقلب للضد ..فالفكرة منه التخفيف على المصاب ماديا او نفسيا ولكن ما نشاهده قد تحول لتكليف المصاب الى جانب مصابه خسائر اخرى ومصاريف وعبئ آخر على أعصابه "ياربى بقدر اكفى الناس ديل؟"..والاشكالية الحقيقية بأن الطرح لا يخطط له كالفرح..فهو دوما مفاجئا للناس وهذا ما يزيد الطين بلة..
    علينا كجيل فيه الكثير من المتعلمين وبعض من واعيين تغيير كثير من الافهام المغلوطة والمعكوسة والمتأصلة بالعديد من مجتمعاتنا بأسلوب غير مصادم وبروية وسلوك وانتهاج الصحيح من الفكر البسيط والمفيد لأن التغيير للموروث القديم لمجتمعات عاطفية كما نملك يحتاج سنون لتغييره..
    استاذنا دوما نجد بين ثنايا كتاباتك دعوات تجديدية نستفيد منها بأسلوبك المتصالح والمتسامح..
    شكرا لك..

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
by boussaid