أم سلمة قالت لي . . يا فيفيد كان الله جابك صادي السودان . . ما تجي كاتل هيمتك . . لازم تجي داخل البلد و انت مادي كرشك قدامك . . و رافع وشك فووووق . . و طوطح يدينك الطوال ديل . . و أقدل متضرعاً في مشيتك . . عشان نسوان البلد يعرفن . . فيفيد الما خمج جاء . . بقى سمح . . و جاب السمح بالردوم.
لي يومين كلام أم سلمة دا بحسب فوقو . . وديتو يمين وديتو شمال . . لكن ما داير يقع لي فوق فهم . . أم سلمة البوبارة دي يخربها . . قاعدة فوق الصقية . . ما ها خابرة أنو فيفيد في السعودية بقى زي حبل الغسيل . . لا كرش قدام و لا كرش وراء . . أفطح من جهات الله الأربعة . . عضيمات غلاد كاسيهن جلد رهيف . . غايتو ماني خايف عيلا من الجماعة الملاعين ديل يكونوا حدثوها بي حبل الغسيل الملولو. عاد يا كيفن بعد العمر دا . . و بعد الضعفة المشاترة دي . . أمد ليها كرشي و أتفنس ليها قدام النساوين. .
مدة الكرش و الفنسة مقدور عليها . . لكن في اللوال قبل أمشي السودان بدور أسوي لي عملية تجميل لإزالة الأقواس . . ما تقولوا لي عملية شنو؟ . . و أقواس شنو؟. . وحات الرسول أزعل منكن جت.
مديرنا السعودي في المكتب . . اسمو أبو نايف . . القبحة فوق وشو . . قدر ما ينضم و يقول شيء الموظفين في المكتب قرقرقرقرقرقر . . يقعدوا يقرقروا و يضحكوا بي طول حسهم . . عليكن الله شفتوا العوارة دي؟ . . أنا وحّدي الما بضحك . . يقوم يشوفني ما قاعد أضحك متل باقي الموظفين . . يقعد ييكرفس لي في وشو . . و يحدر فيني حدرة العدو . . يقول للموظفين و هو يصرصر في وجهه الأملس خلي الحبوب . . ويش بو الزول . . ليش ما يظحك . . أقولكم عشان تاني الزول يظحك أخسمولوا راتبو. . الله يرتبك يوم القيامة في خطرات أبو لهب . . قول آمين يا الأملس.
بس المعايش جبارة . . و أكل العيش داير معافرة . . و خسم الماهية مع نهاية الشهر . . زي الراجل المستني مرتو تجيب ليهو الجنا . . قامت سقطت جناها في الشهر التامن . . و أنا النصيحة لله حسبت ماهتي المخصومة مني بي سبب عدم الضحك . . لقيتها ممكن تجيب لي تلاتة ألف حقت طوب أحمر في الشهر . . كان ضربت التلاتة ألف حقت الطوب دي في اتناشر شهر . . يبقى سنتي بي ستة و تلاتين الف حقت طوب أحمر . . ستة و تلاتين الف طوبة مخصومة مني بي سبب عدم الضحك . . مش عليكن الله كنت بنيت بيتي و مشيت لي أم سلمة أقدل في نص الشارع؟؟؟.
أها . . السنة الفاتت حسبتها كويس . . و غررت أحافظ علي طوبي اللحمر الباقي لي . . و أضحك مع الضاحكون . . و أطرّم مع المتطرمون . . و أتجّهم مع المتجهمون . . أزعل لي زعل أبو نايف . . و أضحك لضحكه . . و أبكي لبكائه . . يعني أبو نايف الأملس دا كان قال ليهو نضمي . . كان بضحّك و الا ما بضحّك . . أنا أقوم أضحك مع الضاحكون . . هن أحسن مني بي شنو . . العندي عندهم . . و الماهية عشان الواحد يستلمها نضيفة دايرة وش حركي . . ينفرد و ينصرّ في رمشة عين حسب ما يتطلبه الموقف.
هسع من كترة الضحك و التبسّم قامن لي قوسين مقحوفات غلالالالاد . . القوسين ديل حاوطن خشمي . . الخشم بقى زي برش حفر الدخان . . قوس باليمين و قوس بالشمال . . مع فتحة النخرة و كرفيسة الحنك القوسين ديل ينشافن من بعيد دائرة كاملة . . مركزها الخشم و طول قطرها عشرة سنتمتر كركرب . . و خشمي بقى واقع بين قوسين . . ما قلت ليكن داير لي عملية إزالت أقواس؟.
النصيبة إنو أبو نايف دا كان ضحكت ليهو في موقف غير مضحك . . يركب راصو الأملس . . و يقول إنت بتجاملو . . و يقوم يخصم ليك طوبك اللحمر . . و كان سكت في موقف هو شايفو مضحك . . يقول الزول بتبهلل عليهو . . أي انت يا زول يا عيفة يا إضينة تعتبر كلام أبو نايف مسخرة . . يقوم برضو يخصم طوبك اللحمر.
النصيبة لله أنا الكلام دا أكتشفتو بعد القوسين العراض الحاوطن لي خشمي . . و سربن و ملن وشي لط . . هسي لي سنة من التضحك و التبسم . . بقيت كان أبو نايف دا قال ليهو كلمة ساكت . . بقوم بضحك بي قوس واحد لزوم الزوقة . . و أقفل قوس التاني . . كان طلع الكلام فيهو ضحك . . أفتح القوس التاني . . و أضحك بي طول حسي . . و كان طلع كلام فيهو تطرم . . أمس الأقواس . . و أكرفس وشي كلو من جبهتو لي حنكو. و بما أنو عيني اليمين جفنها مرخي. . و تجيد التصرصر . . بقيت القوس اليمين بستخدموا لي زعل أبو نايف . . و عيني الشمال المفرهدة . . استخدمها لي فرحو . . نعمل شنو طوبنا ضايع أوانطة.
هسي باقيلكم يا جماعة كان مشيت السودان بعد خطوط الكنتور الفوق وشي دي . . و أمشي لي أم سلمة مفنوس . . و مادي كرشتي المافيشة قدامي . . با قيلكم الناس تقول فيني شنو؟.
فيفيد
المصدر الرئيسي
مجلة البهلة الإلكترونية
http://www.albahala.com/index.php?in...w_single&ide=5
رد مع اقتباس
المشاركة الأصلية كتبت بواسطة Madanawi
المفضلات