دعوة للشاعر / إسحق الحلنقي

[سحابة صيف]

الإخوة والأخوات في المنتدي ... سلامات

مؤمن تماما أنا بتفرد الشاعر الغنائي / إسحق الحلنقي ... وفي تقديري الشخصي .. إن معظم الأغاني الجميلة واللي الي الآن في دواخل الأغلبية من الشعب السوداني ... هي من أشعار / إسحق الحلنقي ،، ويشهد الله .. حبينا كسلا من السواقي لغاية الجبل علشان الحلنقي والحلنقة (بالرغم إني من مدني).. عموما ... ده نداء للجميع ... للبداية في جرد إشعاره المغناة من معظم الفنانيين السودانيين ..،، ونداء خاص لشباب مدني في الأمارات العربية المتحدة لمحاولة التواصل معاه في المنتدي ....،،،،


كل الود

[القناص فوزي]

والله بكلامك شوقتني لسماع أشعاره
ويالله يا أخوان أمتعونا بما تفضل به أخي ((((((((( سحابة صيف ))))))))))))
أخوكم
القناص فوزي

[صائغ الحروف]

ياحبيب ردورد الامانى الحلوه
فى اعماقى فتح
وابتدى القلب الى عاش
عمرو فى اهات يفرح

[همس الشوق]

هجرة عصافير الخريف في موسم الشوق الحلو
هيج رحيلا مع الغروب احساس غلبني اتحملو
التحية الى المبدع اسحق الحلنقي..........

[عشوشه]

كلنا عرفنا كسلا من اشعار الحلنقى
لو مغلطنا وما مصدقنا اسال العنبه الرامية فى بيتنا
اسحاق الحلنقى متواجد فى البلد بعد ان قال انه طلق الغربه
وغنى له فرفور ما مشكله
المشكله شوفتك بقت هى المشكله

[سحابة صيف]

بتتعلم من الأيام ... مصيرك بكره تتعلم
وتعرف كيف يكون الريد .... وليه الناس بتتالم

[ابراهيم]

سحابة صيف لك التحية .. ومشكور على هذا الموضوع

اسحق الحلنقى .... كلما اسمع هذا الاسم يتملكني شعور بالأشياء الجميلة ..فراشات تحلق حول الازاهر عصافير ملونة فرحة تطير هنا وهناك فهو فنان الطبيعة بسحرها وجمالها .. ويتبين ذلك في انتمائه..لطبيعة كسلا البكر .. ومدني الجميلة فهو فنان شفاف تأتيه المفردة حينما يودها فثراه الوجداني وموهبته الكتابية ديدنه في الكتابة دوماً

ابدع الحلنقي في "الابيض ضميرك" التي شدي بها المبدع الطيب عبد الله

و"البلوم في فرعه غنى" التي غنانا بها الراحل الجابري

وتأثرني هذه الأبيات من اغنية "بتتعلم" التي اكتملت لوحتها حينما شدى بها الموسيقار محمد الأمين

متين عرف الهوى قلبك

متين فاضت بآهاته

متين سهّر عيونك

ليل طويلة ساعاته

وحاتك لسا ما بتقدر

تقاسم قلبي دقاتو

ومصيرك

بكرة

تتع
لم

[سحابة صيف]

الأخوة والأخوات في المنتدي .. فوزي ، همس الشوق، عشوشة ، ابراهيم .. خالص التحايا...

في جلسة في إشراقة من إشراقات تلفزيون السودان المحدودة ... .. الشاعر/ الحلنقي في ضيافة / حسين خوجلي ( بالرغم من إختلافات الناس الكتيرة والواضحة مع حسين خوجلي إلا أنه محاور خطير جداً .. ).. أثير موضع إختلاف الشاعر / الحلنقي مع مدير الإذاعة السودانية في السبعينات علي ما اذكر ... هدد مدير الإذاعة بوقف جميع أغاني الحلنقي ... رد الحلنقي كان ..(( لو أوقفت إذاعة أغنياتي .. ح تذيع النشرة بس في إذاعتك دي )).. الشاهد هنا كمية ألأشعار المغناة للحلنقي ...
عشوشة ... إغنية ( حبيت عشانك كسلا) في فترة مجدها .. كانت تطلب من المستمعين أكتر من أي إغنية تانية ...(( والعهدة علي الرواة .. حسين خوجلي + الحلنقي))..
إستقار الحلنقي في السودان .. خبر جميل ... ياريت ناس المنتدي في السودان يواصلونا معاه......


كل الود

[ضياء الدين احمد]

الاخ العزيز سحابة صيف زي ما قلت الحلنقي متفرد
وكنت قد اتصلت به مرارا وقد دعاني الي منزله ان واتتني الظروف وذهبت الي العين وقد قابلته كثيرا في سباقات الخيول الا ان المقام لم يكن مناسبا لكي نتحدث عن الثقافة والشعر وانا اشهد ان الرجل بسيط جدا وتلقائي وودود
وملئ بالابداع والروعه وربنا اخليهو لينا