الحب في زمن الجامعة .. أفراح وأتراح ..

[معتز الريح]

زي ما بقولوا الجواب باين من عنوانو ..
وانا بقول البوست حقي باين من عنوانو ..

بغض النظر عن صدق العلاقة من عدمها .. ولكن ..

[معتز الريح]

* واحد يحب زميلتو في نفس الدفعة وهدفهم الزواج ..
وهو طالب لا حول له ولا قوة .. ولا يملك مستقبله ..
وهي متمسكة به .. وترفض كل من تقدم لها ..
واهلها تعبوا من النصح ..

ما تنسوا لكل قاعدة شواذ ..

[معتز الريح]

لو تجاوزنا .. مسألة انهم قدر بعض ..
(الداخل الجامعة ماتيور ما معانا) ..

ولو كان ود ناس وبعد ما اتخرج ما عاين لأصغر منها ..

[تباريح الهوى]

مشكور يارائع على الموضوع طبعاً الموضوع ده حساس خالص وكل طالب او طالبة بينظرو ليه نظره مختلفة بعضهم بعتبروا تقضية زمن لحدى مايتخرجوا او يتخارجو وده بكون حدو باب الجامعة وديل بسموا (حب الكلالى) ( والكلالى جمع كلية) والبعض الاخر جادي شوية وهنا الارتباط بكون بين برومه وسنير سنيرا يعنى بكون بينهم كم دفعة، وفى ناس من دفعة واحدة بتعمل علاقة جادة وصادقة . ولسان حاله بقول (هم البريد فى يوم مابدور اشوف قدامو)
غايتو وجهة نظرى انو الحب الصادق مابعرف لازمن ولامكان ومابفرق بين ده صغير اوكبير وفى كتير من العلاقات الصادقة احتوتا جدران الجامعة وكانت نهاية الزواج .
بس فى مشكلة حقيقة الزمن ده مااى زول فهمو للحب ان نهايتو تكون زواج ديل نقول عليهم شنو؟
ومبرارتم (ليس الحب رواية شرقية بختامها تتزوج الابطال هو الابحار دون سفينة وشعورنا ان الوصول محال ) ديل يكونوا ماجادين ولاكيف ؟
دمتم بود

[رضا حسن محمد]

الجنا دة قاصدنى عديل
خلاص ختنى مع لكل قاعدة شواذ

[معتز الريح]

بعتبروا تقضية زمن

الحبيب تباريح الهوى ..
كتير جداً جداً بعتبروا تقضية زمن ..
وعندهم حب الجامعة لا بد منه ..
ولزوم تكملة طقوس انو طالب في الجامعة ..
وده إذا كان بحب من دفعتو ولا من الناس الوراهم ..
الكلام كتير .. والحالات كتيرة وحنناقشهم خطوة بخطوة ..

[معتز الريح]

الجنا دة قاصدنى عديل
خلاص ختنى مع لكل قاعدة شواذ

والله يا رضا انا ما قايلها دفعتك ..
وانت الحمد لله بأولادك ربنا يحفظهم ..
لكن الأداك قروش العرس منو؟؟ ..

وعشان هي دفعتك .. قادره عليك ..
وبعدين خريجين الستينات ما معانا ..
الحياة كانت ساهلة والزمن كان بخيرو ..

[رضا حسن محمد]

والله يا رضا انا ما قايلها دفعتك ..
وانت الحمد لله بأولادك ربنا يحفظهم ..
لكن الأداك قروش العرس منو؟؟ ..

وعشان هي دفعتك .. قادره عليك ..
وبعدين خريجين الستينات ما معانا .. الزمن كان بخيرو ..

هى ما دفعتى هى بيوراى
يل خوى الستينات دى انا لسع ما اتولدت

[معتز الريح]

الغريبة يا رضا
البنات كلهم بدخلوا الجامعة وبقولوا مخطوبات ..

[خالد النور]

زي ما بقولوا الجواب باين من عنوانو ..
وانا بقول البوست حقي باين من عنوانو ..

بغض النظر عن صدق العلاقة من عدمها .. ولكن ..

جاى تفتش الماضى، خلاص الماضى ولا زمان

يا معتز مالك جاى تفتح جروح إندملت

[رضا حسن محمد]

الغريبة يا رضا
البنات كلهم بدخلوا الجامعة وبقولوا مخطوبات ..

عشان يحرروا السوق
انت يا فردتى
الامدرمانية المقطعاك النمة لاقيتة وين

[رضا حسن محمد]

جاى تفتش الماضى، خلاص الماضى ولا زمان

يا معتز مالك جاى تفتح جروح إندملت

لا تنكى الجرح القديم فاننى ودعت ليلا مظلما وثقيلا

[مختار بازى]

والله لو داير الجد يا معتز في الزمن الحالي هسة بقي زيو زي اي مادة يعني شيء كدا حتمي في الجامعة
( والماتيور ) برا من الاصطاف دا ؟؟؟ القال منو في عينة كدا بتخش ماتيور عشان تحب تاني وياريت لو بيحب ليهو سنيورة لا والله تلقاهو معلق ليهو في برلومة زي البرلومة ولو ما بخاف الكضب اقول ليك لي هسة قاعد يقرا!!!

[عثمان جلالة]

لكن لقيتك ختري يا معتز ... تنكت ساي .. غايتو زمنا نحن في أواخر التسعينيات .... زمن الحالة سعبه خالص .. ما شفت ولا لقيت تجربة ناجحة لكن كان في حب ... صادق .. الحب البعمل رعشه وحمى داك .. شفتو .. لكن في الزمن دا ... زمن الغبار العالق ... كل السألتو .. قال ما في حوجة ليهو ... لأنو الواقع بقى مادي .. جدا .. وبكل معطياتو ..

معتز ... بت أمدر مان دي منو

[samar_taha]

أخي معتز
فعلاً هناك علاقات جادة في الجامعة وتستمر الى ما بعد الجامعة بقليل من الصبر من الفتاة وأهلها وقليل من الإجتهاد من الشاب وتتم على أروع ما يكون , و أنا شخصياً شهدت العديد من القصص المماثلة التي تكللت بالزواج ولله الحمد
ولكن
أيضا هناك قصص جادة ولم يكتب لها النجاح وذلك نتيجة لانهزامها للظروف الإقتصادية والإجتماعية , وبيني وبينك يا معتز نحن للأسف مجتمعنا ما بيرحم وأول ما البت تخلص الجامعة أهلها يقعدوا ينقوا فيها ويضغطوا عليها عشان توافق على أقرب عريس متقدم ليها خصوصا لو كان مغترب .
أما العلاقات غير الجادة فهذه أيضا موجودة وتنتهي بسهولة وسرعة تماما كما بدأت وتذهب غير مأسوفاً عليها .
يعني ما في قاعدة معينة تحكم الموضوع وما نقدر نقول علاقات الجامعة كلها جادة و لا كلها ما جادة انما تختلف حسب طبيعة الأشخاص وظروفهم وحسب التساهيل

[معتز الريح]

يا معتز مالك جاى تفتح جروح إندملت

يا خالد أنت جادي ؟؟ ..
كنت مكيس وجادي حتعرس ؟؟ ..
ومن الدفعة ولا برلومة ؟؟

[معتز الريح]

عشان يحرروا السوق

ومرات بطيروا الحمام ..
يعني تكون عايزه توزعك بالبارد كده وما تديك أمل ..
تقول ليك أنا مخطوبة ..

والعايزه تخلي خط رجعة ..
تقول ليك مرتبطه بره ..

كل بنات الجامعة في سنة البرليم
يا مخطوبات يا مرتبطات بره الجامعه ..

لكن تعال شوف السمستر التاني !!!!

[معتز الريح]

والله تلقاهو معلق ليهو في برلومة زي البرلومة !!!

والله برلومة معقولة .. بس يكون جادي ..
وبعدين السناير ما بقعوا إلا تكون البرلومة قاطعة ..
وشغالين قص للبرالمة ..
تكون انت مكسراك بت دفعتك ..
ويجيك سنير بهدوء يحاورها منك ..

لكن عمرك شفت برلوم خطف ليهو واحدة من سنير ؟؟..
والله العظيم في ..

[مختار بازى]

والله برلومة معقولة .. بس يكون جادي ..
وبعدين السناير ما بقعوا إلا تكون البرلومة قاطعة ..
وشغالين قص للبرالمة ..
تكون انت مكسراك بت دفعتك ..
ويجيك سنير بهدوء يحاورها منك ..

لكن عمرك شفت برلوم خطف ليهو واحدة من سنير ؟؟..
والله العظيم في ..

والله هدا القدامك دا

[معتز الريح]

فعلاً هناك علاقات جادة في الجامعة وتستمر الى ما بعد الجامعة بقليل من الصبر من الفتاة وأهلها وقليل من الإجتهاد من الشاب وتتم على أروع ما يكون , و أنا شخصياً شهدت العديد من القصص المماثلة التي تكللت بالزواج ولله الحمد

أكيد في .. لكن نسبتهم بسيطه ..

أيضا هناك قصص جادة ولم يكتب لها النجاح وذلك نتيجة لانهزامها للظروف الإقتصادية والإجتماعية ,

إييييييييييييك .. كتير ..

لكن يا سمر بالمنطق والعقل .. وحكاية عمر البت وقروش الولد والعرس والمسئوليات .. يعني لو كانت دفعتو صعبة والله لكن ما مستحيلة ..

[معتز الريح]

والله هدا القدامك دا

اها بقيتوا اتنين

[صديق بلال]

بالنسبة لموضوعك يا أخ معتز الريح... أنا شخصيا لم أجربه لأن نظام التعليم في السعودية غير مختلط... ولهذا لا أستطيع أن أخوض معكم في المناقشات الدائرة فيما بينكم... وإنني في الحقيقة مستمتع بتلك المناقشات... وعلى فكرة مثل هذا الموضوع المطروح كنا نشاهده فقط عبر التلفاز في المسلسلات والأفلام العربية فهي قريبة من الواقع على ما أظن... وعموما إنني وجدت في تعليق وتعقيب الأخت سمر طه شيئا من المنطق والواقع...

[معتز الريح]

الحبيب صديق بلال ..
الدراسة المختلطه .. عالم وحياة صغيرة ..
تؤهلك للاختلاط بأناس من بيئات مختلفة ومفاهيم مختلفة ..
والدراسة الجامعية أول عتبات الاختلاط ..
لها الكثير من الفوائد والسلبيات ..
وهنا نناقش بعض السلبيات بعين طلبه عاشوا هذه الفترة ..
ولك الشكر على مشاركتك ..

[nasir]

لو تجاوزنا .. مسألة انهم قدر بعض ..
(الداخل الجامعة ماتيور ما معانا) ..
اخي ود السناهير ممكن استعمل حق الفيتو
جاى تفتش الماضى، خلاص الماضى ولا زمان
يا معتز مالك جاى تفتح جروح إندملت هي اتراح وافراح
( والماتيور ) برا من الاصطاف دا ؟؟؟ القال منو في عينة كدا بتخش ماتيور عشان تحب تاني وياريت لو بيحب ليهو سنيورة لا والله تلقاهو معلق ليهو في برلومة زي البرلومة ولو ما بخاف الكضب اقول ليك لي هسة قاعد يقرا!!! وانا واحد منهم
لك الود اخي ود السناهير

[محمد أحمد الشيخ]

يا ود الريح الأخبار العندنا
قالو كنت قاشي بنات الجامعة كلهم