الاخوه والاخوات في المنتدي
في مثل بقول الما عاوزك ما عاتبك
او الما دايرك مالامك
انا امكن من الجدد في المنتدي جيت ولقيت المنتدي رائع
وبقي اهتمامي بالمنتدي لدرجة انو نسيت باقي المنتديات الخارج
منتدي مدني الجميل
وبكل الصدق والصراحه اتشرفت بي انو اكون معاكم عشان اتعلم منكم روعة
الكلمه الانيقه اللقيتا ساكنه عندكم
وعشان المنتدي يبقي زي ما اتمناهو وزي ما اي واحد فيكم بتمناهو
انا الليله عندي صوت لوم ليكم
واتتمني انو ما تزعلوا مني فوالله لو ما قلبي علي المنتدي
كنتمريت مرور الكرام
وبتمني انو تشاركوني في النقاش عشان نبقي مدني في سمعتا الحلوه وصورتا عند الكل
ونزيد الثقه للما عرفو مدني انو يتعرفو عليها من خلال المنتدي
والمسؤليه عليكم كبيره في مواصلة ازدهار مدني لانو المنتدي بحمل اسما
يلا تعالوا اقول ليكم علي العتاب
اول حاجه النقاش في المنتديبي صراحه شكرنا للزول الكتب الموضوع واثناءنا علي كتابة موضوع
اكتر من انو نناقش الموضوع من كلو جوانبو ونطلع بي خلاصة تاكد انو نحن عاوزين نعالج قضايا
وحتي نوري الزول البقرا منتدانا اننا جادين وعاوزين نقدم رؤيه نخدم بيها الموضوع المطروح
وبنكون شكرنا الكاتب بي طريقه غير مباشره لانو شاركناهو النقاش
واهم حاجه اننا نطلع من النقاش بي حاجة تكون خلاصه
وفي مواضيع الواحد بقراها وبتمني انو يعرف الاستنتاج والخلاصه وما بلقاها
الحاجه التانيه نحن بنمثل مدني المفروض نوري نبذه عنها نخليها ثابته علي الرئيسيه تحكي للناس
تاريخ مدني وموقعا من الخارطه وتوري الخاشي الموقع اصالة مدني ونسيجا الاجتماعي
وكل حاجه عن مدني وده واجب بسيط نقدمو لي هذه البقعه الحلوه
الملاحظه التالته حقو اي فنان من الجزيره نعمل ليو بوست بي نبذه عنو وتعريف ليو وكده نكون قدمنا ليو شكر لي مساهمتو في رفعة اسمنا كابناء للجزيره
وملاحظة تانيه بتخص المشرفين علي الموقع وهي خدمة الدردشه الكتابيه الراقيه
بتعرف الناس بي بعضا وممكن نناقش فيها موضوعاتنا بي صوره اوسع
وفي ملاحظه تانيه انو المنتدي ما فيو صور كافيه توري مدني للعالم حقو الناس المقيمين في مدني يدعمو المنتدي بكميه من الصور الراقيه عشان الناس الطولوا من مدني وبي الزات المغتربين
القو فيها سلواهم وتعينهم علي الغربه
بسسس يااخواني ده العتاب الحبيت اوريهو ليكم
واتاكدوا انو قلبي علي المنتدي زيكم رغم اني من الناس الاتعرفوا بالمنتدي قريب
ولو كلامي ده ضايقكم جد بالجد حا اتاسفليكم
وليكم الشكر علي الحروف الحلوه
رد مع اقتباس
المشاركة الأصلية كتبت بواسطة خالد هاشم علي
المفضلات