كلمات كتبتها في زمان مضى الي صديق ... لا زال كما الانبياء يأكل الطعام ويمشي في الاسواق
لساك مجدع ..
في العتامير الحريق
أنساك مزعزع وصاري في طرفك طريق
الاك موزع ..
شكليش تلاقيلك رفيق
في العتمة ضلك منكرب ..
سابقك علي الشمس الطشيش
ضهب المداخل والرمض ..
وهن الخطيوات .. الدويش
رهق احتمالك للمشي ..
زامل عذاب كونك تطيش
صحرا قدامك .. وراك ..
حسرة تملالك عمر ..
ويضيع عشم انك تعيش
شكليش تلاقيلك رفيق ..
والضلمه فاتحالك سما
العبرة سادالك طريق
والجرح قدامك رمى
قدرك تشيل حلم البريق ..
والسكة في عيونك ... عمى
تسكن تفاصيلك ... تضيق
تعرف ملامحك ... تسأما
تتناطى للحرف الشليق
والحزن في جوفك سما
شكليش تلاقيلك رفيق
ما ادلهمت في فيافيك الحقيقة ..
وصاحب الخطوة التعب ..
من غربه او طولة مشي
وانسكنت بلا وطن ..
يدي المسافرين الهوية ويدي لي جسدك وشي
وانتظرت براك قطار ..
في سكه لا جابت غريب ..
لا مرة صافاها المشي
يا ضل مساماتك عليك ..
رقراق غباين وانهزام
تحتك مشاويرك نجيع ..
ومغموتة في كفك غمام
لملم فضاءاتك هزيع ..
واحزم مواعيدك ................ قيام
المفضلات