المساعد الشخصي الرقمي

مشاهدة النسخة كاملة : خواطر وذكريات من المرحلة الدراسية Flashback


عزيز عيسى
29-03-2006, 05:47 AM
المراحل الدراسية سواء كانت مرحلة الأولية أو الأبتدائية أو الوسطى أو الثانوية العامة الى الثانوية العليا كانت من أمتع المراحل التي قضيناها في حياتنا.. أتاحت لنا هذه المراحل تكوين علاقات وصدقات مع أعداد كبيرة من التلاميذ مازلت أذكر الأسماء الكاملة لمعظمهم عن ظهر قلب.. حتى طريقة تصرفاتهم وتعاملهم مع الأساتذة وبقية زملائهم من التلاميذ..

أذكر لما كنا تلاميذ صغار في مدني وبعد إنتهاء الدوام اليومي المدرسي نضع كتبنا وكراساتنا مع قلم الرصاص وقلم الحبر السائل والمحبرة وكذلك (اللستيكة) الممسحة أو المساحة و(البراية).. و(فيش) زجاج الببسي والميرندا.. و(البلي) من أجل اللعب والتسلية.. بالإضافة الى (سرقة) كمية من باقي الطباشير المكسر الذي يخلفه الأستاذ أمام السبورة بعد إنتهاء الحصة بغرض (الشخبطة) التي كنا نجد فيها متعة وملذة خاصة وغاية من الإستمتاع في التعلم علي الخط..

كنا نقوم بوضع هذه اللوازم المدرسية داخل شنطة المدرسة.. الشنطة كانت عبارة عن قطعة من قماش (الدمورية) تشبه الجراب، يفصلها (الترزي) أو الخياط حسب رغبة التلميذ خاصة من ناحية عدد (الجيوب) والحجم والحمالة.. وكواحد من التلاميذ كنت أزين شنطتي (الدمورية) من الخارج برسومات وخطوط جميلة بارزة وعريضة منسقة تحمل الإسم وأزهار وورود بألوان جذابة وأنيقة تسر الناظرين.. تماما كما يفعل أصحاب البصات التجارية - كنوع من الإعجاب بالباص خاصة إذا كان البص جديد - بكتابة جمل عجيبة ينبه بها الركاب مثل: العفش داخل البص على مسؤولية صاحبه: أو عنوان لأغنية مثل: الحنينة السكرة.. سواح.. أو نوع من مشاغلة البنات مثل: نظرة يا جميل.. بسمة وما شابه ذلك.

نحمل شنطنا ذات الحمل الثقيل بالكتب والدفاتر (كراسات) الحساب و(كراسات) العربي ونخرج في الصباح الباكر مسرعين من منازلنا نمشي في الطرقات لنتلقي بباقي رفاقنا التلاميذ، نصحبهم ونسير سويا في الدرب في إتجاه المدرسة..
بعد لحظات من وصولنا الى المدرسة يدق جرس الحضور الاول معلنا بدء اليوم الدراسي.. نتحرك كلنا في خطى مسرعة ناحية ساحة كبيرة داخل حرم المدرسة لنقف في صفوف منتظمة شبيهة بصفوف العساكر.. يمنع الكلام منعا باتا خلال تلك اللحظات.. بعدها يبدأ التلاميذ في ترديد نشيد تحية العلم.. بعد الإنتهاء من النشيد مباشرة يشير الأستاذ (أبو الفصل) الى أحد التلاميذ ويمسى(الألفا) قائد التلاميذ لقراءة (ينده) دفتر الأسامي للتأكد من الحضور و الغياب، ثم يبدأ بعدها الأستاذ بتفتيش ملابس التلاميذ للتأكد من النظافة. (ويا ويل من يكتشف الأستاذ ملابسه متسخة أو (مكرمشة) غير مكوية.. يعاقب التلميذ بالجلد أمام جميع التلاميذ.. وبعد ذلك يطلب من التلاميذ الإصغاء لكلام الأستاذ أو ناظر المدرسة ليقوم بالإعلان عن المستجدات في الساحة المدرسية. وبعدها القيام بحركات رياضية خفيفة تنشيطية (صفا.. انتباه) يسمح بعدها السماح للتلاميذ بالإنصراف والدخول الى الفصول في خطوات عسكرية منتظمة..

والى اللقاء مع ذكريات أخرى من أيام الدراسة.
عماد الصادق
29-03-2006, 06:22 AM
عزيزنا
إمتدادا لتلك الأيام الخوالي..
وأنا قريت الابتدائي بكساب الجعليين .. وكنت ساكن كساب الدناقلة...
والإثنين شرق النيل (سنار المدينة)
كنا بنمشي كداري مشوار يجي زي 15 كيلو أو أزيّد..
وشنط الدمورية.. والمرتاحين الزي حلاتي كانت مصنوعة من الدبلان!!!
والباتا الرهيبة لمن نغسلها بنديها ليك طباشير للتبييض ..
ونواصل ...
عزيز عيسى
29-03-2006, 06:55 AM
عزيزنا
إمتدادا لتلك الأيام الخوالي..
وأنا قريت الابتدائي بكساب الجعليين .. وكنت ساكن كساب الدناقلة...
والإثنين شرق النيل (سنار المدينة)
كنا بنمشي كداري مشوار يجي زي 15 كيلو أو أزيّد..
وشنط الدمورية.. والمرتاحين الزي حلاتي كانت مصنوعة من الدبلان!!!
والباتا الرهيبة لمن نغسلها بنديها ليك طباشير للتبييض ..
ونواصل ...
عمدتنا الدفعة،
عليك دينك مش حرام عليك تغيب عننا المدة الطويلة دي.
أتاريك كنت مكمل طباشير المدرسة كلو في الباتا..
أخير أنحنا كنا بنشخبط بيه في الحيط.
زمان الشنط كانت دمورية ودبلان.. والتعليم في قمته..
واليوم الحناكيش شايلنها شنط (سمسونيت)
والتعليم وصل الى أدني المستويات..
بالمناسبة لما كنت صغير زرت كساب
لكن ما عارف هي كساب الدناقلة أم كساب الجعليين
ومكثت فيها لمدة يومين كانت من أجمل وأمتع الأيام..
ذهبت إليها مع أقاربي لزيارة خالتي إسمها سعاد محمد فضل السيد
كانت تعمل أستاذة هناك..
أذكر وصلناها في المساء بعد مغيب الشمس
وقبل أن تطأ أقدامنا مدخل المنزل الذي كانت تسكنه الخالة
جاء الجيران بخروفين وضبحوهم أمامنا وطلبوا مننا أن نمر من فوقهم
لدخول البيت.. استمتعنا في تلك الليلة مالذ وطاب من الأكل والشواء
والأجمل من ذلك كانت لمة الناس الطيبين حولنا..
أيام لن أنساها أبدا..
ما أكرمكم يا أهل كساب.
عماد الصادق
29-03-2006, 07:27 AM
عزيزنا الدفعة ...
الغياب ما بيدنا.. الأحوال النفسية غير مستقرة..
طوالي بنحسب فيها عاوزين نرجع .. عاوزين نرجع..
بس لحدي هسه ما دايره تلفق!!!

كساب الزرتها دي أكيد كساب الجعليين ...
لأ،ها هي الكان فيها المدارس..
حقتنا نحن الدناقلة كان فيها محطة القطر..
إسمها في الشهادة كساب الدوليب ..
بعدين في كساب تالثة اسمها كساب قربي

طبعا الزمن داك كان الزي الجلابية والعمة..
ولفة العمة في الراس .. لازم واحد يساعدك ...
كيف !!!
يمسك طرف العمة وويطبقوها لحدي ماتبقى رقيقة..
ثم بعد ذلك يبدأ بلفها على الرأس ..
والراس يبقى زي الزول الفالقينو ورابطين ليهو راسو بالشاش....
ولا أنسى ونحن راجعين في الحر داك .. وتجي اللواري المحملة بالبطيخ..
ويجدعونا ببطيخة .. وما ألذها بطيخة..
ولا ست الفول في نص المسافة بناخد لينا معاها جمة..
وطبعا في بعض الطلبة مرتاحين ..
عندهم مواصلات .. الله يكرمك (حمير)
وطبعا اللي عندو حمار الزمن الطيب داك .. مرتاح وحنكوش كمان!!!

ووالله ونحن جايين كمان بتلاقينا أشجار الهشاب..
والله فيها حلاة صمغ .. سكر ساي...

وبتذكر حق الفطور كان قرشنص (قرش ونص) ولا فريني مرات...
ومرات بنشيل معانا عمودنا باقي العشا .. ولا باقي ملاح بايت
مرة بالكشرة ومرة عيش باللبن..
وكان عندنا في المدرسة حاجة اسمها الوينا (بعملوها من الدخن)
والتحلية حلاوة قصب...

أما تفتيش النضافة يوم السبت والثلاثاء..
وفي الطابور ترفع الجلابية ويشوفو حتى لباسك .. (قايل الحكاية لعب)
وأضافرينك .. ويا ويكلك لو عامل ليك تفة زي مايكل جاكسون كده..
وكانت الدراسة مختلطة.. ومابتذكر صراحة البنات كانو بفتشوهم كيف!!!

تعرف أنا حتى اليوم مرتبط بحكاية النظافة والغيار للهدوم بيوم السبت والثلاثاء
مش حاجة غريبة..

ونواصل ...
عزيز عيسى
29-03-2006, 11:13 AM
الله يبعد عنك أوهام الحالات النفسية
ويا أبو الشباب أعمل بنصيحة المثل (دنيا فرندقس.. دردقي بشويش) لأنها ما بتستاهل..
ولو أديتها بالبوز كل شيء بمشي تمام.
أول مره أعرف إنو في أكثر من كساب واحدة..
طيب في كم كساب شرق خزان سنار؟
المدارس زمان علمتنا الانضباط في كل شيء..
وجلابية المدرسة طبعا بيضاء كان الواحد يغسلها بالظهرة (النيلة) لتصبح ناصعة البياض..
ولو ما لقيت مكوة مولعة تقوم تطبقها وتختها تحت المخدة لغاية الصباح..
ويا سلام عليك يا عماد.. ذكرتني بالبطيخ.. زمان بعد اجازة المدارس كنت بحب أسافر الى سنار المدينة لقضاء فترة اجازتي هناك..
كنت بمشي مع أصحابي خارج حي (فنقوقة) ننتظر اللواري المحملة بالبطيخ من الجروف وننادي فيهم –
يا عمي عليك الله أرمي لي بطيخة – يقوموا يرموا لينا أكبر بطيخة.. نقوم نجري عليها ونأكلها..
تلقى البطيخة باردة وزي العسل.. يا لها من أيام.
والدتنا عليها رحمة الله كان ورثت من والدها مجموعة بيوت وأراضي وجروف في سنار..
البطيخ كان يزرع ويحصد ويرسل لنا لوري محمل لغاية مدني.. تقوم الوالدة تقول ليهم وزعوا البطيخ كلو علي الجيران..
بالله شفت زمن الرخا والعز كان كيف؟..وعلشان أنحنا كنا صغار الاملاك دي كلها ( إتلحست)..
المرحوم بروفسير محجوب عبيد طيب الله ثراه أيام كان بيتعالج في هيوستن أثناء الونسة جاءت مناسبة عن
معاناة الطلبة في ايجاد مواقف للسيارات حول جامعة هيوستن..
قال لي بطريقة وكأنه يسخر من الحناكيش زمان في الجزيرة كنا بنقطع مسافات بعيدة عدم المؤاخذة بالمواصلات -
راكبين الحمير - علشان نصل المدرسة.. تلقى الطلبة بتسابقوا علي المواقف يقصد مرابط الحمير علشان كلو واحد
يربط حماره بالقرب من الفصل.. قال لي أثناء الحصة كنا تسمع الحمير تنهق وكل شيء عادي مثل أي أشخاص بيضربوا في البوري.
Jamal Elmahi
29-03-2006, 11:44 AM
أما تفتيش النضافة يوم السبت والثلاثاء..
وفي الطابور ترفع الجلابية ويشوفو حتى لباسك .. (قايل الحكاية لعب)
وأضافرينك .. ويا ويكلك لو عامل ليك تفة زي مايكل جاكسون كده..
وكانت الدراسة مختلطة.. ومابتذكر صراحة البنات كانو بفتشوهم كيف!!!

تعرف أنا حتى اليوم مرتبط بحكاية النظافة والغيار للهدوم بيوم السبت والثلاثاء
مش حاجة غريبة..

ونواصل ...

الاعزاء الخواجه عزيز وعمده...
يعني في داعي تحرجونا وتدخلونا في أضافرينا قدّام الحناكيش...
يوم النضافه دا ذي يوم القيامه...لانو الواحد بكون عندو سروال واحد شاكيهو أيام الله السبعه ...يعني حيكون نضيف كيف؟؟؟ والله الاستاذ كان فتشوهو يلقو سروالو ليهو عطرابه...غايتو كنّا لمّا السروال يكون مابتقابل ويكون يوم نضافه بنخليهو في البيت ونمشي أم فكّو...يقولو ليك أرفع الجلابيه طوالي ترفع...يقوم الاستاذ ينهرك نزّل الجلابيه ينزّل هدادك...لكن برضو نهره أخير من علقه....

ود الماحي
أبوبكرحامد
29-03-2006, 08:45 PM
الاعزاء الخواجه عزيز وعمده...
يعني في داعي تحرجونا وتدخلونا في أضافرينا قدّام الحناكيش...
يوم النضافه دا ذي يوم القيامه...لانو الواحد بكون عندو سروال واحد شاكيهو أيام الله السبعه ...يعني حيكون نضيف كيف؟؟؟ والله الاستاذ كان فتشوهو يلقو سروالو ليهو عطرابه...غايتو كنّا لمّا السروال يكون مابتقابل ويكون يوم نضافه بنخليهو في البيت ونمشي أم فكّو...يقولو ليك أرفع الجلابيه طوالي ترفع...يقوم الاستاذ ينهرك نزّل الجلابيه ينزّل هدادك...لكن برضو نهره أخير من علقه....

ود الماحي
ود الماحى ............. اجازى محنك آلمسخوت هههههههههه
والله ضحكتا لمن دموعى جرن هوى ياناس استغفروا
أبوبكرحامد
29-03-2006, 08:51 PM
المراحل الدراسية سواء كانت مرحلة الأولية أو الأبتدائية أو الوسطى أو الثانوية العامة الى الثانوية العليا كانت من أمتع المراحل التي قضيناها في حياتنا.. أتاحت لنا هذه المراحل تكوين علاقات وصدقات مع أعداد كبيرة من التلاميذ مازلت أذكر الأسماء الكاملة لمعظمهم عن ظهر قلب.. حتى طريقة تصرفاتهم وتعاملهم مع الأساتذة وبقية زملائهم من التلاميذ..

أذكر لما كنا تلاميذ صغار في مدني وبعد إنتهاء الدوام اليومي المدرسي نضع كتبنا وكراساتنا مع قلم الرصاص وقلم الحبر السائل والمحبرة وكذلك (اللستيكة) الممسحة أو المساحة و(البراية).. و(فيش) زجاج الببسي والميرندا.. و(البلي) من أجل اللعب والتسلية.. بالإضافة الى (سرقة) كمية من باقي الطباشير المكسر الذي يخلفه الأستاذ أمام السبورة بعد إنتهاء الحصة بغرض (الشخبطة) التي كنا نجد فيها متعة وملذة خاصة وغاية من الإستمتاع في التعلم علي الخط..

كنا نقوم بوضع هذه اللوازم المدرسية داخل شنطة المدرسة.. الشنطة كانت عبارة عن قطعة من قماش (الدمورية) تشبه الجراب، يفصلها (الترزي) أو الخياط حسب رغبة التلميذ خاصة من ناحية عدد (الجيوب) والحجم والحمالة.. وكواحد من التلاميذ كنت أزين شنطتي (الدمورية) من الخارج برسومات وخطوط جميلة بارزة وعريضة منسقة تحمل الإسم وأزهار وورود بألوان جذابة وأنيقة تسر الناظرين.. تماما كما يفعل أصحاب البصات التجارية - كنوع من الإعجاب بالباص خاصة إذا كان البص جديد - بكتابة جمل عجيبة ينبه بها الركاب مثل: العفش داخل البص على مسؤولية صاحبه: أو عنوان لأغنية مثل: الحنينة السكرة.. سواح.. أو نوع من مشاغلة البنات مثل: نظرة يا جميل.. بسمة وما شابه ذلك.

نحمل شنطنا ذات الحمل الثقيل بالكتب والدفاتر (كراسات) الحساب و(كراسات) العربي ونخرج في الصباح الباكر مسرعين من منازلنا نمشي في الطرقات لنتلقي بباقي رفاقنا التلاميذ، نصحبهم ونسير سويا في الدرب في إتجاه المدرسة..
بعد لحظات من وصولنا الى المدرسة يدق جرس الحضور الاول معلنا بدء اليوم الدراسي.. نتحرك كلنا في خطى مسرعة ناحية ساحة كبيرة داخل حرم المدرسة لنقف في صفوف منتظمة شبيهة بصفوف العساكر.. يمنع الكلام منعا باتا خلال تلك اللحظات.. بعدها يبدأ التلاميذ في ترديد نشيد تحية العلم.. بعد الإنتهاء من النشيد مباشرة يشير الأستاذ (أبو الفصل) الى أحد التلاميذ ويمسى(الألفا) قائد التلاميذ لقراءة (ينده) دفتر الأسامي للتأكد من الحضور و الغياب، ثم يبدأ بعدها الأستاذ بتفتيش ملابس التلاميذ للتأكد من النظافة. (ويا ويل من يكتشف الأستاذ ملابسه متسخة أو (مكرمشة) غير مكوية.. يعاقب التلميذ بالجلد أمام جميع التلاميذ.. وبعد ذلك يطلب من التلاميذ الإصغاء لكلام الأستاذ أو ناظر المدرسة ليقوم بالإعلان عن المستجدات في الساحة المدرسية. وبعدها القيام بحركات رياضية خفيفة تنشيطية (صفا.. انتباه) يسمح بعدها السماح للتلاميذ بالإنصراف والدخول الى الفصول في خطوات عسكرية منتظمة..

والى اللقاء مع ذكريات أخرى من أيام الدراسة.


كانت لنا ايام ................ فى القلب ذكراها
سلام عليك ياعزو وانت تعيد للاذهان ذكرى تلكم الايام الخوالى ، وهى بلا شك مفيدة لاجيال الشباب للوقوف على الظروف التى مررنا بها فى مراحلنا الدراسية وهى على قسوتها لم تقعد بنا عن مواصلة الدراسة والتحصيل الاكاديمى .
أبوبكرحامد
29-03-2006, 08:57 PM
عزيزنا الدفعة ...
الغياب ما بيدنا.. الأحوال النفسية غير مستقرة..
طوالي بنحسب فيها عاوزين نرجع .. عاوزين نرجع..
بس لحدي هسه ما دايره تلفق!!!

...
بالله ياعماد هسى لو ميتلك زول وقريت الكلام الكاتبو ود الماحى تسوى شنو غير تضحك .
والله ياعماد المنتدى ده اصبح بيمثل لينا مركز علاج نفسى واهو بنتلاقى وبنضحك
غصباً للظروف والحال الحرن
خليك قريب ياعمدة و............ كلنا فى الفقر شرق
خالد هاشم علي
29-03-2006, 10:51 PM
الاعزاء الخواجه عزيز وعمده...
يعني في داعي تحرجونا وتدخلونا في أضافرينا قدّام الحناكيش...
يوم النضافه دا ذي يوم القيامه...لانو الواحد بكون عندو سروال واحد شاكيهو أيام الله السبعه ...يعني حيكون نضيف كيف؟؟؟ والله الاستاذ كان فتشوهو يلقو سروالو ليهو عطرابه...غايتو كنّا لمّا السروال يكون مابتقابل ويكون يوم نضافه بنخليهو في البيت ونمشي أم فكّو...يقولو ليك أرفع الجلابيه طوالي ترفع...يقوم الاستاذ ينهرك نزّل الجلابيه ينزّل هدادك...لكن برضو نهره أخير من علقه....

ود الماحي


ههههههههههههههههههههههههههه الله يجازي محنك ياجمال ... بس اوع تقول لي مدرستك كانت مختلطة زي ناس عمدة
عماد الصادق
29-03-2006, 10:58 PM
عزيزنا.. ودالماحي .. ودالمأذون
اللي يبعد الأوهام.. ياريت تكون أوهام..
كثيرا وكثيرا جدا الواحد وهو في بلاد الغربة
إنها مرحلة استعداد... يعني زي السبق !!!
عشان كده الواحد رغم السنين الطويلة في الهم..
بس لسه ماقادرين نضرب بيهو عرض الحائط!!!

البيت المدرسة البيت اليبت الشغل المدرسة البيت الشغل البيت
(ده مشوار يومي عدا الخميس مافي مدرسة والجمعة لا مدرسة ولا مشغلة)
وباقي المشاوير خليها مرة ثانية..
بعدين في ماسبق ذكره .. مابتلاقي لا حبيب ولا غريب.. ولا عملت المشاوير دي
من غير ما تشتم حد .. هذا إنجااااز ...
باقي الكلام تعال دكان ود البصير خلينا نتفشى شوية ونطلع النيكوتين!!!


نرجع لأيام زمان الحلوة..
بتذكر زمان أولى ابتدائي
بطلع من البيت وبغشى ابن خالتي
وهو الآن بأمريكا ممكن تسأل منو جلال
عشان نمشي المدرسة سوا
ألقاهو ليك خاتنو في الطشت وبحمموا فيه
ولا بشطفو فيهو لسه.. وطبعا استناهو
لحدي ما أشد معاهو العمة ونركب الهوا..

مرة بتذكر ونحن بنمشي بموازاة السكة الحديد
جا هوا قرّب اجدعنا في البحر (النيل الأزرق)
إلا إدارينا بالطندب..
والطندب ده فيهو الحنبك
والحنبك لونه أحمر..
زي الكرز...

والعجب العجيب اللالوب
هسه اللالوب ماشايفه ... دحين يكون انقرض..

ثلاثة كساب شرق النيل
أول واحدة بعد ماتقطع الخزان فيها محطة للقطار
دي كساب الدوليب (الدناقلة) معقلنا
بعدها كساب الجعيليين سندة للقطر
بعدها كساب قربي (سكانها من الفلاته)
بعد داك كم قرية صغيرة ثم قرية كبيرة اسمها الشيخ طلحة
بعدها قلاديمة ثم السوكي وبعدها الدندر
والله أعلم
ده كلو شرق النيل
والشارع ده حسب مارسخ في ذهني
هو الذي جاب المثل ( بيجي الخريف واللواري بتقيف!!)

الجروف اللي بتقول عليها دي يا عزيز في غرب النيل أو شرقه
كان فيها جنس بطيخ .. وعجور والدردقو..
هسه مافي دردقو في خيار...
هسه المولد فيهو الدردقو بالشطة والملح..
عليك الله يا ود الماحي ريقك ماجرى..

هسه شفع الزمن ده قاعدين يمشو المولد يجيبو العرايس والحصين!!!
الواحد يخت حصانة في الفترينة حقت العدة .. وكل يوم يكسر حته..
النمل ياكل وهو ياكل ..

نواصل...
صالح ابوشوارب
30-03-2006, 01:55 AM
الاخوان عزيز ودالماحي عماد الصادق ود الماذون
لكم التحية وتشكرات
اولا رجعتونا للذكريات
كنا في الصباح لمن نمشى لمدرسة جبرونا الابتدائية من جنب محطة ود قيحة نكشف الشارع اذا في بص جاى
في يوم من الايام وقفنا نشوف في بص جاى وفعلا جا بص وبعد ما وصل محطتنا قمنا قلنا ليهو ( تتسابق معانا يا عم نحن ماشين جبرونا ) السواق قام يعاين لينا بحرقه والظاهر الباص ابى يدور يقوم الكمسارى يجيب المنفلة ابو طارة وفيها حبل ونقوم نساعد الكمسارى ونشد معاهو الحبل ( واحد ... اتنين .... تلاته .. وررررررررر ) خلاص البص دور ونقوم نقول للسواق يلا ونمشى كدارى
كنا نصل المدرسة ونحن شايلين قرش الفطور او فردة عمود واول حاجة نسويها نقوم نشوف في زاوية البرندة في كم عمود وكورية بغطاها طبعا الجماعة جايبين العشا البايت ( مرة واحد من اولاد التجارب جاب لينا ملاح بامية مخومر ( ضارب ) لكن برضو انهضم ههههههه ماشاء الله كانت لنا بطون تاكل ملاح ضارب وروب مضروب وموز مضرب ومنقة مضربه وكنا في ساعة الفطور نتلم ونجمع الضارب والمضروب ونعمل عجنة !!!
عماد الصادق
30-03-2006, 02:28 AM
أبوشوارب العزيز
وخالد هاشم اللذيذ
غايتو اليوم الخميس والساعة خلاص اتنين ونص وخير ختام
ما جادت به نخرة اللمين .. إن شاء الله ما نتذكرها ونحن
قاعدين ناكل .. قول آمين يا ودهاشم...
سلام للحناكيش ونشوفكم تامين وسالمين
elfatih61
30-03-2006, 02:44 AM
ذكريات أيام الدراسة عجيبة 00 من الحاجات الماقادر انساها
أول ما جيت القاهرة وسكنت في (حي روكس) وكان معنا ناس الله يطراهم
بالخير مجدى المدني وأخوه معتز ومحمد خضر (الناظر) وأخوه الفاتح خضر
وهاشم من أولاد الدباغة وبهاء الدين برضو من الدباغة وكانت شلة رائعة جدا
وكان أخونا هاشم ده (ملك العضة) هو المشرف دائما على الاكل 00 وهو أكبر
واحد فينا كدهو بحب الاكل والمطبخ شديد 00 فكانت على اخر الشهر كده
التحويلات بتخلص والمؤن الغذائية في البيت بتخلص 00 والبرد شديد ولازم الواح
يأكل 00 فكان هاشم الله يطراه بالخير وهو صاحب التصرف 00 طبعا الاكل سليقه
ماجي في اقلب الاحيان 00 فكان صاحبنا يشترى (فرخه) حيــه ويشرف على ذبحها
وتجهيزها بالمحل 00 والحكمة في (حيــه) عشان تكون طاعمة موش ذي المثلج
المهم يدخل المطبخ يقطع البصل والبندوره ويديها مويـه كثيره وبهارات ويخت
الخليط ده في النار 00 لمن يغلى يجي دور الفرخة المسكينة (يمسكها من أرجلها
وباقيها في الحلة تغلي لمدة 10 دقائق كده 00 يقوم ينشل الفرخة المسكينة
ويلفها مرة أخرى في الكيس ويدخلها الثلاجـــة -- وهو يبتسم يقول لينا خلوها
بكره بنحتاج ليها 00 يسقي لينا باقي الشروبة ديك بالعيش والغريبة بتطلع حلوه
بشكل غريب 00 المهم الفرخة يفضل يعمل بيها نفس العملية ثلاث مرات 00 لحى ما
لحمها يبقى ذي (العنكوليب) الممصوص حتى يحمرها لينا 00 هو بكون فضل فيها
طعم عشان يتحمر !! غايتو الله يديه العافيــة 00
تحياتي للاخوة الذين ورد ذكرهم 00
عزيز عيسى
30-03-2006, 07:56 AM
جمال الماحي.. الممسوخ..
والله يا جمال ضحكت لمان دموعي جرن.
يوم النظافة دا كلنا كنا بنخاف منو.. تلقى تلاميذ كتار بيجوا يوم
السبت فقط بسراويل نظيفة.. لكن باقي الاسبوع تشوف العجب.
السروال بيكون ملبوس لغاية ما الواحد يخلص من يوم (النبطشية)..
انتو عارفين جمال دا لسه محتفظ بالسروال قال للذكرى والتاريخ.
عزيز عيسى
30-03-2006, 08:00 AM
كانت لنا ايام ................ فى القلب ذكراها
سلام عليك ياعزو وانت تعيد للاذهان ذكرى تلكم الايام الخوالى ، وهى بلا شك مفيدة لاجيال الشباب للوقوف على الظروف التى مررنا بها فى مراحلنا الدراسية وهى على قسوتها لم تقعد بنا عن مواصلة الدراسة والتحصيل الاكاديمى .

ودالمأذون عندنا ذكريات وقصص كثيرة مع المدراس..
أقعدوا وأسمعوا.. بس ما تنسوا تحكوا لينا ذكرياتكم..
عزيز عيسى
30-03-2006, 08:08 AM
ههههههههههههههههههههههههههه الله يجازي محنك ياجمال ... بس اوع تقول لي مدرستك كانت مختلطة زي ناس عمدة

ودهاشم.. يشهد الله مشتاق ليك.. ومشتاق لباقي الاخوان أمير عبدالباقي أخباره مقطوعة
كلم أم هاشم تظبط السمك بيقوم يسمع سيرة السمك بيجي ناطي توووووش..
وطالما يا ودهاشم كنت بتقود مظاهرات أكيد عندك ذكريات جميلة مع المدارس
تعال يا شقي أمرق لينا المستخبيء.. في انتظار قفشاتك الحلوة وخلينا نضحك.
عزيز عيسى
30-03-2006, 08:22 AM
عمدتنا ودالصادق،
عليك الله قفشات ودالماحي دي ما خلتك تضحك وتنسى همومك..
أنحنا عايزين نشوفك سعيد والدنيا ما بتسوى شيء.


ألقاهو ليك خاتنو في الطشت وبحمموا فيه
ولا بشطفو فيهو لسه.. وطبعا استناهو
لحدي ما أشد معاهو العمة ونركب الهوا..

ضحكتني يا عماد.. بتخيل في المنظر دا والواحد خاتنو في الطشت
ويمسحوا ليه راسه بالصابون ويقعد يحك في عيونو ويكورك
ويدوه ليك خبطه خبطتين على ظهره ويقولوا ليه أسكت سكتك بلا.
عزيز عيسى
30-03-2006, 08:35 AM
--------------------------
ودأبوشوارب،


غايتو إنت وودالماحي الله يجازيكم وسختوا لي البوست بتاعي.. هههههه
الغريبة إتصل بي جمال وقال لي أجري ألحق شوف ودأبوشوارب كتب شنو؟
لكن يا صالح أنا لسه ما مسحت دموعي من الضحك على كلام جمال
المرة دي كنت بفرفر عديييل من الضحك..
والضحك الضحكتو اليوم لي زمن ما ضحكت زيو..
إستغفر الله العظيم..
غايتو أيام ما أحلاها.
عزيز عيسى
30-03-2006, 08:52 AM
ذكريات أيام الدراسة عجيبة 00 يسقي لينا باقي الشروبة ديك بالعيش والغريبة بتطلع حلوه
بشكل غريب 00 المهم الفرخة يفضل يعمل بيها نفس العملية ثلاث مرات 00 لحى ما
لحمها يبقى ذي (العنكوليب) الممصوص حتى يحمرها لينا 00 هو بكون فضل فيها
طعم عشان يتحمر !! غايتو الله يديه العافيــة 00
تحياتي للاخوة الذين ورد ذكرهم 00
الاخ الفاتح،
أسعدني مرورك وأنت تحكي لنا ذكريات أيام الدراسة العجيبة..
الراجل كان بيغش فيكم الفترة دي كلها وأنتو ما جايبين خبر..
طيب لما جاب ليكم الجدادة وهي محمرة إن شاء الله تكونوا تأكدوا
انها فعلا الجدادة.. احتمال يكون حمر ليكم قطعة بلاستك
زي طعم جداد الكويتية.
واصل معنا وأتحفنا بالمزيد لنستمتع بالقفشات الظريفة.

ودي،

عزيز
Jamal Elmahi
30-03-2006, 12:52 PM
ههههههههههههههههههههههههههه الله يجازي محنك ياجمال ... بس اوع تقول لي مدرستك كانت مختلطة زي ناس عمدة
أبو هاشم...هاأأأبوي بنات شنو ...نحن في الابتدائي كنا رجال بالغين الواحد ليهو غوفه.... ريحتنا ذي تيوس الزريبه...
غايتو كان ما دخلونا المدرسه والله كنته أكون سارح لي يوم الليله...قال أختلاط قال...

ود الماحي
Jamal Elmahi
30-03-2006, 01:26 PM
-------------------------------
/COLOR]

---------------------------------------- ود الماحي



ياشباب روقو المنقة الموضوع دا والله سمح ومميز ما تبوظوهو بالكلمات الما كريمة دي
admin
عزيز عيسى
30-03-2006, 02:11 PM
ودالماحي دا شنو؟..
دموعي كملن من الضحك
ولحدي الآن ما قادر إتمالك نفسي من كثرة الضحك.
غايتو الليلة دي من هسع ولغاية الصباح ناس المنتدى ديل
لو ما شطبوك انت وودأبوشوارب تاني ما حيشطبوكم أبدا.
الله يستر.
عزيز عيسى
30-03-2006, 02:27 PM
واحد من أصحابنا حكي لي قال كان في واحد من أخوانا الغبش مصاحب ليهو
طلبة حناكيش من أولاد المصارين البيض المرتاحين قاموا عزموه سباحة..
أخينا إفتكر الحكاية عوم في الترعة لبس عراقي وسروال طويل ومشي
عليهم ولاقاهم.. الجماعة حضروا كل واحد فيهم شايل ليه شنطة بداخلها ملابس..
وساقوه معاهم على نادي فيه حوض سباحة..
بعد شوية اصاحبو الحناكيش غيروا ملابسهم ولبسوا مايوهات..
أخينا قلع العراقي وقعد بالسروال..
الحناكيش وقفوا بالدور وكل واحد يطلع على المنصة
ويقفز يعمل diving ينط في حوض السباحة..
المهم جاء دور صاحبنا.. على شلاقتو طلع في آخر منصة وجاء ناطي عامل diving
وفي أثناء ما هو عامل diving السروال كان طاير بي حتة وهو طاير أم فكو بي حته تانية.
elfatih61
31-03-2006, 10:04 AM
أنتو 000 الله يلعن شيطانكم 00 والله انا بضحك من قصصكم دى
لمن وقعت من الكرسى ودموعي جارية 00 الوليه 00 عملت معاي
شمطه عايزه تعرف البضحكنى ده شنو !! وانا ما قادر أسكت عشان
أشرح ليها 00 هسه زعلت 00 !!
بالله ادونا المزيد 00 والله أيديكم العافية
صالح ابوشوارب
31-03-2006, 07:53 PM
اخواني الاعزاء

الله يجازيكم والله انا جيت الصباح وضحكت يا عزيز من رد ود الماحي والله بدموعا
لكن يا ود الماحي ما ذكرتنى بالاغنية ( يا اخوانا كان شفتو بوصف الشفتو ) انت يا اخوى ما خليت التضاريس الله يجازيك
( )
أبوبكرحامد
01-04-2006, 02:27 AM
ودالماحي دا شنو؟..
دموعي كملن من الضحك
ولحدي الآن ما قادر إتمالك نفسي من كثرة الضحك.
غايتو الليلة دي من هسع ولغاية الصباح ناس المنتدى ديل
لو ما شطبوك انت وودأبوشوارب تاني ما حيشطبوكم أبدا.
الله يستر.

والله ياعزيز ناسك ديل لابنفع معاهم شطب ولاشى - باقى لى الناس ديل خرفوا عديل وبقوا طالقين ساكت هههههههههه.
بعدين لاحظ انو العجايز ديل عندهم نكهة خاصة ، وشايف انضم ليهم الفاتح الضو " شكلوا من جيلكم " - بس بصراحة الراجل ده فيهو الكتير من عبق الماضى والحنية وهو مكسب لى " مجلس آباء المنتدى ".
elfatih61
01-04-2006, 03:21 AM
يا ود المأذون 00 ديل ما جيلي ولا حاجة ديل بقولوا ليك لمن كانو في الابتدائي
كان الواحد فيهم ليه (غوفا) 00 يازول ديل ناس عجائز شديد
يعنى ما إحتمال نكون بين جيلهم وجيل الحناكيـش 00 دي برضى بيها
لكن بس يا أبوبكر بنحب حكايات العجائز عشان كده إتأثرنا بيهم

وأشكرك على مجاملتك اللطيفة 00 بس ما تخومنا كدى ورينا إنت
حضرت زمن شنط الدمورية والكوريات البختوها جنت عمود برندة المدرسة
ولا شنو !! رينــا تاريخك !!
admin
01-04-2006, 10:05 PM
ياشباب روقو المنقة الموضوع دا والله سمح ومميز ما تبوظوهو بالكلمات الما كريمة
صالح ابوشوارب
02-04-2006, 01:02 AM
الأخوان الأعزاء
كنا بندرس في السنة الثالثة بالمدرسة الاهلية الوسطى ( ب ) وكان الدرس إجباري من خمسة عصرا حتى الساعة الثامنة مساء وكان شغال الفيلم الهندي ( جانوار ) في سينما الخواجة وما في طريقة نمشي السينما مع درس العصر ففكرنا ومعانا اخونا ابراهيم ( بلاش كامل الاسم ) وهو الان لواء شرطة في عمل اى شى حتى نلغى درس العصر واخيرا توصلنا الى فكرة جهنمية كانت حتودينا في 60 داهية وهي لصق السلك السالب والموجب بتاع مفتاح النور حتى يضرب الفيوز .. وفعلا لمينا السلكين لكن عينك ماتشوف الا النور اخدنا لينا جدعة والفيوز ضربت
وفي العصرية جينا الدرس وقعدنا نذاكر ومنتظرين الواطة تضلم وفعلا قبل المغرب الاستاذ عرف ان النور مقطوع وقال لينا يلا يا اولاد الليلة المذاكرة خلاص بكرة نكلم ناس الاشغال يصلحو الكهرباء
وفعلا جرينا جرى على السينما لكن لسوء الحظ لقينا باب السينما قفل .. لكن ....
بابكر
02-04-2006, 10:06 AM
ازيكم ياشباب
اسمعوا القصه دىحصلت معاى زمان والله لسه بتذكرها كانها حصلت اليوم
كنا فى مدرسة البوليس الابتدائيه00وكان هنالك ولد من اولاد المدرسه اسمو (( محجوب 00)) حاقر بى عديل كده 0يشيل منى اقلامى رجاله ساى 00ويدينى شلاليت بدون سبب 00وانا بصراحه كنت بخاف منو عديل 00لانو كان اعتى منى 00وهو طبعا لقى الفرصه فينى 0لانى بخاف منو00والله الحال هو نفسو الحال الى ان كملنا رابعه وامتحنا للوسطى00وطبعا بعد الامتحانات 00 تصفية الحسابات00 يعنى لو عندك تار بايت مع اى ولد 00الشكله بتدور
المهم00لقيت ليك ((محجوب)) الولد الحاقر بى عامل ليهو شكله مع ولد كنت انا حاقر بيهو يعنى كل يوم اديهو علقه
لقيت الولد ((يجلد )) ليك فى محجوب 00ومحجوب يصرخ ويتوسل وانا انظر للموقف 00 مندهش وغير مصدق عيناى00 يعنى الولد ده كان حاقر بى طيلة هذه المده (( اوانطه ))
المهم انتهت الاجازه 00 ودخلنا الوسطى
وطبعا انا من اليوم داك الغبينه كاتلانى00وانتهزت الفرصه فى الفسحه الاولى 0لاقيتو فى المزيره بيشرب مويه
قمت شلت كوز المويه منو وكشحتو بيهو فى وجهه00 ولمن ضربتو 00 اخينا00 بدأ يبكى ويتوسل00وطبعا من اليوم داك بقى صاحبى 00 بعد ما كان زالينى سنه كامله
يعنى انا كنت خايف بلا مبرر00ولوكان قويت قلبى وشاكلتو 00ماكان عشت فى الذل طيلة ذلك الوقت
elfatih61
02-04-2006, 10:34 AM
يا بابكر 00 ما قلت لينا وهســه (محجـــوب) ده وين 00
إنشاءالله يكون معانا في المنتدى 00 أكيد ح يطلع
درررر
Jamal Elmahi
02-04-2006, 12:17 PM
ياشباب روقو المنقة الموضوع دا والله سمح ومميز ما تبوظوهو بالكلمات الما كريمة

أفّو أأ ألادمن ...هاأأأزول كدي قول سلام...الوش المصرور ومكشّر أأأبوي ماحبابو...,وكلامك المابنبلع المتل القرض دا أأأبوي ماحبابو...والكلام الماكريم حاشانا....قول لينا الكلام الماكريم القاصدو أنت شنو؟؟؟ الكرم والكرامه نحن راضعنهن أأأبوي ما أتعلمناهن ...والاصل والاصاله حارسانا من ساسنا...وان داير تعلمنا الكلام الكريم عليّ الطلاق غلطان ...فدحين أأأبوي أنقرع... و أنت الماتبوّظ لينا قعدتنا دي... وان بقي عشان المنتدي منتداك وداير تطفّشنا فالمشتهي الحنيطير يطير...والمشتهي لوبه عفن يندفن...قصدنا أأألعشّاي نتونّس...نفضفض...نقلع الضحكه من الزمن الصعب...ونكوي الغربه بأبتسامه..وماناقصانا تكشيرتك دي...والفينا أأأبوي مكفينا...والمنتدي أأأبوي بخيت وسعيد عليك وما تنسي تعلّم الناس الكلام الكريم...

مشاققه....
باللسان الحلو وطاعم أأأبوي بتصل للدايرو...واللسان الحنضل تب ما حبابو...


ود الماحي
عماد الصادق
03-04-2006, 02:00 AM
أفّو أأ ألادمن ...هاأأأزول كدي قول سلام...الوش المصرور ومكشّر أأأبوي ماحبابو...,وكلامك المابنبلع المتل القرض دا أأأبوي ماحبابو...والكلام الماكريم حاشانا....قول لينا الكلام الماكريم القاصدو أنت شنو؟؟؟ الكرم والكرامه نحن راضعنهن أأأبوي ما أتعلمناهن ...والاصل والاصاله حارسانا من ساسنا...وان داير تعلمنا الكلام الكريم عليّ الطلاق غلطان ...فدحين أأأبوي أنقرع... و أنت الماتبوّظ لينا قعدتنا دي... وان بقي عشان المنتدي منتداك وداير تطفّشنا فالمشتهي الحنيطير يطير...والمشتهي لوبه عفن يندفن...قصدنا أأألعشّاي نتونّس...نفضفض...نقلع الضحكه من الزمن الصعب...ونكوي الغربه بأبتسامه..وماناقصانا تكشيرتك دي...والفينا أأأبوي مكفينا...والمنتدي أأأبوي بخيت وسعيد عليك وما تنسي تعلّم الناس الكلام الكريم...
مشاققه....
باللسان الحلو وطاعم أأأبوي بتصل للدايرو...واللسان الحنضل تب ما حبابو...
ود الماحي
عزيز عيسى
03-04-2006, 07:37 AM
أعزائي
يؤسفني جدا بأن يكون هذا البوست سببا في خلق نوع من سوء التفاهم
بين الاخوان.. كان هدفي الرئيسي من وراء ذلك البوست هو إعادة ذكريات الماضي الجميل
لنعيد جميعا ذكريات تلك الأيام الجميلة المثيرة والمتميزة في حياتنا حيث كانت لا تخلو
من الطرائف والصدف والمفارقات العجيبة والغريبة..
وكان اختياري لمرحلة الدراسة لأنني وجدتها أنسب فترة لسرد الذكريات لآنها أكثر المراحل التي تكثر
فيها المواقف الحرجة وقصدت أن يحكيها لنا أصحابها من الاخوة المتداخلين في جو من المرح..
إلا أن الاقدار شاءت بما لا تشتهي السفن.
على العموم أرجو أن استميحكم عذرا أيها الأخوة الاحباب في هذا المنتدى بأنني سأختفى
لبرهة من الزمن اعتبارا من اليوم الاثنين وذلك بسبب ظروف العمل التي تجبرني لحضور
كورس في مجال تخصصي العملي قد يستغرق ما بين شهرين الى ثلاثة أشهر
ويتطلب مني المتابعة والقراءة والمراجعة المستمرة
(وفي النهاية المسألة فيها إمتحان).. وسأعود حتما إن شاء الله لمواصلة المسيرة والمشوار
معكم في هذه الواحة التي جمعتنا أخوة أحبة من أجل المحبوبة مدني.
راجيا أن تدوم الآلفة والمحبة بين جميع الاخوان والاخوات.

مع فائق التحية والتقدير،

أخوكم الخواجة
عزيز
صالح ابوشوارب
03-04-2006, 09:57 AM
خلينا يا ود الماحي اخوى في ذكريات المدرسة كنا في سنة تالته ابتدائي وكانت الحصة حصة علوم والاستاذ طلب مننا نجيب ريش ومناقير طيور .. طبعا كان الجبل جنب مدرسة جبرونا .. واحد اخونا الله يرحمه جاب راس ابو السعن وخلى الفصل ريحته فطيس .. طبعا اليوم داك ما دخلنا الفصل !!!!
معتز حمدتو
03-04-2006, 11:24 AM
العزيز عيسي
رغم الفقد لمشاركاتك لكن دعواتنا لك بالتوفيق والتمثيل المشرف حيث انتم منارة من المنارات السودانية المدنية في الخارج لك كل الاماني والدعوات الصادقة بالتوفيق
أبوبكرحامد
03-04-2006, 09:00 PM
يا ود المأذون 00 ديل ما جيلي ولا حاجة ديل بقولوا ليك لمن كانو في الابتدائي
كان الواحد فيهم ليه (غوفا) 00 يازول ديل ناس عجائز شديد
يعنى ما إحتمال نكون بين جيلهم وجيل الحناكيـش 00 دي برضى بيها
لكن بس يا أبوبكر بنحب حكايات العجائز عشان كده إتأثرنا بيهم

وأشكرك على مجاملتك اللطيفة 00 بس ما تخومنا كدى ورينا إنت
حضرت زمن شنط الدمورية والكوريات البختوها جنت عمود برندة المدرسة
ولا شنو !! رينــا تاريخك !!

يافتوح انا درستا الإبتدائى فى مدرسة جبرونا ، وكان والدى الشيخ / حامد الأمين حامد ناظر المدرسة ، يعنى ود الناظر ، أذكر كان لدينا مدرس اسمه فتحى الميز وكان ينادينى " ود الناظر يالبيتكم كلو مناظر " ياحليل ايامنا ، وبعدين قبل الإبتدائى درستا الروضة فى بانت جوار طاحونة المحبوب وقصاد مدرسة أبوزيد المتوسطة.
بابكر
04-04-2006, 12:46 PM
الرائع توحه
الخواجه عزيز الفرده
القاضى ود الماذون
الفرده ود ابو شوارب
اللطيف خفيف الظل معتز- حمتو
لكم الحب اطنان باللورى والقندران
وسوف اسرد لكم مزيدا من طرائف الماضى ان شاء الله
اميمه عشريه
05-04-2006, 02:12 AM
ههههه الادمن يا جماعه قاعد بعاين ليكم ..والله رجعتونا للسودان قبال عصر عواسه الكسري الذهبي ياخي انتو قدام بشكل من ايام الكركاسات والدموريه والالفا واييييييييييييييك بتبالغو هههههههههههههههه
أبوبكرحامد
07-04-2006, 09:31 PM
نيابةً عن الرائع عزيز عيسى - المشغول هذه الأيام بكورس دراسى - نزجى الشكر لكل المتداخلين ، وشكراً لمرورك أميمة عشرية ، والناس ديل فعلاً قدام بس أنا مامعاهم لأنو أخوى الكبير رسلنى أجيب ليهو كتاب من عزيز وراجع بيتنا وامكن أغشى ناس دفعتنا الباشا وسامبا وسوباوى وفاتنة ومهيرة عشان اتونس معاهم فى صالون ناس مدنى السمحين ، وده طرفى من صالون ناس مدنى العجوزين " حلوة عجوزين دى ... امكن تشفع لينا مع الحناكيش ... ياى "
بابكر
08-04-2006, 08:11 AM
وده طرفى من صالون ناس مدنى العجوزين
هىىىىىىىىىىىىىىىىىىىىى يا ود امأذون اخير ليك ترجع وانت الحناكيش ديل ولا بتقدر عليهم ولاشى وياخوى النسى قديمه تاه
أبوبكرحامد
08-04-2006, 08:34 PM
وده طرفى من صالون ناس مدنى العجوزين
هىىىىىىىىىىىىىىىىىىىىى يا ود امأذون اخير ليك ترجع وانت الحناكيش ديل ولا بتقدر عليهم ولاشى وياخوى النسى قديمه تاه
كدى ياود الصول رجعتى خلها ، بس ورينى الشينين ديل جبتهم من ياتو كوشة " مقلب قمامة - لمن فاتهم حسن الإستمتاع بالسودان القديم "
شكيت محنك ياود الصول :) :)
elfatih61
12-04-2006, 07:21 AM
أخونا العزيز أبوبكر حامد (ود الناظر البيتكم كلو مناظر ) 00 كيف أخبارك
أستاذ (فتحي الميز) ده درسنى انا برضو في الإبتدائي لكن بالمدرســـة
الشرقيـة - السوق / يعنى أنت طلعت براءة من العجائز وأنا بقول ليــــك
الظرافة الفيك دى ظرافة ما بين جيليــن - جيل العجائز وديل الحناكيــــش
وأهو دليل براءاتك ظهر - اما ناس (بابكر) عليهم الأثبات وإلا ح نعتبرهـم
في جيل العجائز وعلى المتضررين اللجوء الى البحث عن الدلائل وأولاد
دفعتهم وجيلهم عشان نعرف حقائهم 00

التحية للجميع دون فرز
أبوبكرحامد
14-04-2006, 11:39 PM
أستاذ (فتحي الميز) ده درسنى انا برضو في الإبتدائي لكن بالمدرســـةالشرقيـة - السوق / يعنى أنت طلعت براءة من العجائز وأنا بقول ليــــك
الظرافة الفيك دى ظرافة ما بين جيليــن - جيل العجائز وديل الحناكيــــش
وأهو دليل براءاتك ظهر
يعنى يافتوح ياممسوخ عاوز تقول انو انا وانت اولاد دفعة ....... بلاش تورطنى الورطة دى ، وبلاش من حكاية انا والكاشف اخوى دى :) :)
elfatih61
15-04-2006, 03:32 AM
يا ود الناظر البتكم كلو مناظر 00 تعرف أنا الأيام دى قاعد
أفكر في طريقة أقسم بيها ناس المنتدى ديل على ثلاثة
أقسام "العجائــز - الحناكيـش والجيل الوسـط "
وانا يا غالي مهت وضبط ليك الطريق من هسه عشان تلملم
نفسك على أولاد جيلك تقوم تتنكر لينا بالسهولة دى يا
ود الناظر عايتو الفرصة مازالت متاحـة قدامك 0 والاختيار
مفتوح بس أوعك تخت لي نفسك مع
( حناكيــــــــــش المنتـــــدى )

لانو في ناس في المنتدى جاهزين بالرد والدلائـــل !!
اسامة
14-10-2007, 12:24 PM
الله يعافيكم اخوانى الاعزاء ويشرح صدوركم مثل ماشرحتوا صدورنا ويزيح همنا وهمكم ونرجوا المزيدمنكم .
((أبــوعاذر))
26-10-2007, 01:50 AM
لن ننسي اياما مضت مرحا قضيناها
mahagoub
26-10-2007, 03:17 AM
درست الوسطى بالاهليه الف (غرب)
طبعا اللبس كان جلاليب ساى , كانت فينا شوية شقاوه , انا واعز اصدقاى الرشيد وهو حالياً طبيب . لكن المدرسين كانوا شاكمننا عديل , واذكر منهم ابو القاسم , سربل , الزبير .
كان عندنا مذاكره لطلبتة الصف الرابع , واليوم داك كان فى فلم هندى حار وزوغت .
وفى الصباح فى الطابور ندهونى غياب , عرفت انو فيها كسره بقيت الف كايس ليا رادا مع اى واحد ما فى واحد قال ليا عينك فى راسك .
طلعت من الصف ومشيت للاستاذ وتحت نظر 12 فصل , اخوكم اخد ليه كسره كرهتو الهنود كلهم .
ولنا عوده مع الشايقية ست الفطور.
okasha
27-10-2007, 01:26 AM
والله العظيم من كلامكم دا انتو من زمن حفروا البحر


لكن نحنا زكرياتنا مع قدر الزمن بتاعنا الحديث دا

ودا دخول على الماشى كدا
ناصر عمر دبيب
12-11-2007, 08:12 AM
ياخي انتو قديمن خالص