المساعد الشخصي الرقمي

مشاهدة النسخة كاملة : من الذاكرة : ياريتك يا محمد مارجعت مدنــــــــــي


صالح ابوشوارب
18-03-2006, 09:51 AM
هذه قصة حقيقية كانت قبل عشرون عاما والاسماء لاتدل على اصحابها
استعملت فيها اللغة الدارجية واسم محمد لاني اشعر فيهم بالحنية ...
...........................

كان محمد ساكن مع أبوه وأمه في حي من أحياء مدني القديمة ومعه أربعة من أخواته في بيت ايجار متعدد الغرف.. ومشترك معاهم في السكن عائلتين و كانو بيسكنو في غرفتين فقط و( الادبخانة أو بيت الادب أو المستراح ) مشتركة بين العوائل الثلاثة
كان محمد بيسمع كل اخر شهر صاحب البيت وهو يطالب والده بالاجرة او اخلاء المنزل لانه تاخر في السداد وكان يتألم عندما يسمع والده يترجي صاحب المنزل بان يصبر عليه شوية
كان لمن يشوف أخواته الاربعة وهم نايمات كل اتنين في عنقريب والدنيا برد ومتغطيات بملاية وهو محشور وسطهم في الأووضة في البرد الشديد يتألم من هذا المنظر الكئيب وبعد تفكير يقوم يشيل عنقريبو ينوم بره الاووضه تحت الحيطة في هذا البرد القارص
كان محمد واخواته الاربعة يتلموا في الصباح مع امهم وخاتين وسطهم الكانون كل واحد مادى يده للنار من البرد الشديد وهم حارسين الشاى وكانت امهم تعاين ليهم وتعاين لرطل اللبن وتقول في سرها اللبن ما بيكفيهم وتقوم تزيد اللبن شوية موية وعيون الام تشوف فيها الحزن وهي تقول يا رب ارحمنا من الفقر
ربك رب الخير جاب لي محمد فيزا عمل للخليج ... فرح الوالد .. فرحت الوالدة .. فرحن الاخوات .. خلاص محمد حيغترب .. وداعا لبيت الايجار .. وداعا للعنقريب ..
محمد جهز نفسه و سافر للخليج وبعد سته شهور رسل ليهم شنطة صغيرة مع واحد من المغتربين ومصاريف تكفي شهرين وكان كل اربعة شهور يرسل ليهم شوية مصاريف
وفجاءة انقطعت الرسائل والمصاريف وبعد ستة سنة سمعوا ان محمد ولدهم عرس ليهو واحدة مصرية ابوها مغترب .. طبعا نسي العذاب ونسي الملايات ونسي الكانون ونسي بيت الايجار
اما ابوه وامه كل ما يجي مغترب يجروا يسالوا عنه وعن احواله يمكن يكون رسل ليهم جواب لكن كانوا بيرجعوا وهم بيبكوا
وكانوا اخواتو بينتظرو امهم متين تجى تجيب ليهم اخبارو .. ولكن كانوا بينصدموا ويرجعوا يدخلوا الاووضة يبكوا ..
ومرت الايام وكانت الام تنتظر اى مغترب يجى في الفريق تقوم تمشي تساعد ام المغترب عشان يدوها قطعة قماش تخيطا للبنات .. اخواتو لونهم تغير وجسمهم بقى هزيل .. خلوا المرقة وما قادرين يمشوا لاى مناسبة ..
محمد هناك جابو ليهو بتين حلوات . وعمل ليه شوية قروش وقام رسل لى اخو زوجته قروش يشترى ليهو شقة في القاهرة ورسل تاني يشترو ليهو العفش المهم كل شئ تمام في القاهرة
ولكن فجاءة بعد عشرة سنوات العلاقة بينوا وبين مرتو المصرية ساءت شديد وحصلت مشاكل كثيرة بعد ما والد المصرية مات حتى وصلت المشاكل للطلاق مرتين واخر مشكلة المصرية قالت ليهو لازم تسفرني القاهرة اشوف امي وارتاح شوية من المشاكل .. قام محمد سفرها هي والبتين
وانتظر ستة شهور زوجته ترجع ، لكن كانت تتعذر ليه بانها عيانه وحترجع الشهر الجاى واخيرا قرر محمد السفر للقاهرة في اجازتو السنوية ووصل القاهرة ومشي الشقة .. لكن زوجته استقبلتو بفتور وعاملتو معاملة الغريب وقالت ليهو انا ما بقدر اعيش معاك فلذلك احسن طلقنى و كل واحد يمشى لحالو
طبعا كلم اخوها يدخل واسطة لكن الاخو كان واقف مع اختو وقال ليهو خليها على راحتها واحسن ترجع تشوف اشغالك
وأخيرا اكتشف ان اخو زوجته كتب الشقة والعفش باسم اختو وهنا محمد مشى يشتكى في المحكمة يوم ورا يوم القضية تؤجل اسبوع اسبوعين تلاته حتى شعر ان اقامتو في الخليج انتهت وقروشو الشايلها بدت تنتهى
واخيرا ما لقى طريقه الا يرجع السودان وفعلا رجع لمدني .. ايد ورا .. وايد قدام .. وفي المغرب وقف التاكسي امام البيت .. اختو الصغيرة شافتوا .. قعدت تكورك يمه محمد جا .. يمه محمد جا .. جرن اخواتو الاربعة وحضنوهو .. يمه محمد جا .. وكانوا يبكوا من الفرح .. خلاص وصل الحبيب وصل الدخرى .. الام سمعت البنات وجات جارية تشوف محمد لكن عترت ليها طوبة ووقعت .. جرى محمد واخواتو رفعوا امهم .. وكانت تبكي وتقول حمدالله على سلامتك يا حشاى حمدالله على سلامتك الشفتك طيب كان منظر عجيب كانوا كلهم اتلفوا حول محمد وبقوا كتلة لحم واحده وكانت امو تردد حمدالله على سلامتك ياود بطنى كانت الدموع تنزل على راس محمد

اما انا لازلت اتذكر هذا المنظروانا ابكى وكنت اقول في نفسي ياريتك يا محمد مارجعت مدنــــــــــي
admin
18-03-2006, 11:24 PM
كيفك يا ابوشوارب .. قصة جميلة ومحزنة .. تسلم يدك
أبوبكرحامد
18-03-2006, 11:37 PM
تعرف ياشواربو لما اشوف مشاركاتك الجديدة بتردد ارد عليك موش لأنى بخلان بالرد ، هو غايتو احساس مابتوصفو الكلمات بس بشبهو بى زول ماسك سندوتش فى يدو وخايفو اكمل واقعد اقرِّم فيهو بالجمبات عشان احاسيهو لغاية آخر لقمة وامكن عاوز إحندك بيهو باقى الناس .
بعدين ياصالح أخوى اللغة الدارجية سمحة بالحيل لأنو فيها المحنة ، بعدين ياخى اللغة ذاتا شغلتا الأساسية إنو نوصل بيها إحساسنا ونعبر بيها عن الشى الجوانا - تعرف ياصالح فى حاجات عندنا فى السودان لو حاولت توصلا باللغة الفصحى بتفقد كتير من رونقا وجمالا ، يعنى ياصالح وبالواضح انت بس اكتب وكان كتبت بالهندى برضو بنشم انفاسك فى الشى البتكتبو .
برجع ليك تانى لى موضوع القصة بعد امشى اسوى لى كم رد على بقية المشاركات " شغل الإشراف إخلي الواحد إنطط زى أم العروس "
عزيز عيسى
20-03-2006, 05:32 AM
جرى محمد واخواتو رفعوا امهم .. وكانت تبكي وتقول حمدالله على سلامتك يا حشاى حمدالله على سلامتك الشفتك طيب كان منظر عجيب كانوا كلهم اتلفوا حول محمد وبقوا كتلة لحم واحده وكانت امو تردد حمدالله على سلامتك ياود بطنى كانت الدموع تنزل على راس محمد.

سلامات يا أبومنار،

قصة عاطفية مؤثرة جدا.. والشيء الذي حز في نفسي لحظة إلتفاف عائلة محمد حوله
وشمله بعطفهم وحنانهم وبالأخص الآم الحنينة المسكينة الصابرة..
هذا كله يعكس مدى طيبة الآهل وصفاء قلبهم ونقاء معدنهم..
وعلى الرغم من تجاهل محمد لهم في الغربة إلا أن ذلك اللقاء جعله يحس بأهمية
وجوده بينهم.. وأكد له أنه مهما حصل أنه واحد منهم يحبونه ويحيطونه بعطفهم.

وأكثر شيء كان مؤثرا وقعة الأم على الأرض حينما هبت مسرعة للقاء إبنها.

محمد لم يحسن التصرف.. كان عليه أن يحسن الى أهله وينفق المال علي أمه وأخوته
علي الأقل يكسب رضاء الوالدة.

الغربة والمادة غيرت أناس كثيرين جعلتهم (يتغابون العرفة) حتى الى أقرب الناس إليهم..
وهذه واحدة من الأمثلة..

نسأل الله العفو والعافية.

شكرا أخ صالح على هذه الروائع.
ضياء الدين احمد
20-03-2006, 05:58 AM
اولا التحيه للرائع الاخ الكبير ماعايز اقول عمو رغم انك صديق عمنا حسن وداعه
والله القصه مؤثره للحد البعيد والله الواحد عيونو رقرقن وذكرتنا البكاء زمان اثناء المسلسلات العربيه
وبالمناسبه القصه دي مفيده جدا لاهنا فيها عبر والله في نمازج كتيره جدا من اخوانا السودانين هنا في الغربه مودرين قروشهم وصارفنها علي الحبش والواحد تقلي اهلوا ساكنين في بيت ايجار وما خفي اعظم واديك العافيه اخونا صالح
خالد هاشم علي
20-03-2006, 11:38 PM
آآآآآآآآآآآآآآآآآآآآآآآآآآآآآآآآه ياصالح والله يارييييييييييييتك لو رجعت لي ورا وقطعت كف في الجنا اللي اسمو محمد ده. والله كان فشيت لي غبينتي دي
فوزيه
20-03-2006, 11:50 PM
الاخ ابوشوارب

لمست في قصصك الحنينيه والواقعيه ..

فيها الحزن ... فيها الفرح ...فيها السرد الجميل الممتع

قصت محمد ده الواقع الحاصل ..

ما ضروري يتزوجو ... بس دايما بتلقاهم بينقعطو عن اهلهم

والمصاريف دائما يودوها وراء وقدام في الفاضي

مع انو الاهل اولي بيها

كيف ينسو ديل اهلو .. ودي امو الحملتو وولدتو وربتو

كيف ينسي ده ابوه التعب ليل نهار عشان يبقي كبير

صبي يافع وينور ليهو مستقبلو ..

ما ان الاولان اسع انو يريحهم شويه ويشيل شويه مسؤليه البيت

واخوانو البنات والاولاد ..

اذا ما ساعدهم الولد منو بساعدهم راجل البت ولا زول غريب من بره

الما فيهو خير لاهلو ما فيهو خير لغيرو
Jamal Elmahi
21-03-2006, 05:38 PM
[QUOTE=صالح ابوشوارب]...
...........................



كان محمد واخواته الاربعة يتلموا في الصباح مع امهم وخاتين وسطهم الكانون كل واحد مادى يده للنار من البرد الشديد وهم حارسين الشاى وكانت امهم تعاين ليهم وتعاين لرطل اللبن وتقول في سرها اللبن ما بيكفيهم وتقوم تزيد اللبن شوية موية وعيون الام تشوف فيها الحزن وهي تقول يا رب ارحمنا من الفقر


ياسلام يابو شوارب والله تصوير ولا في الافلام...ومافي أجمل من شاي الكانون الاّ لحظات انتظارالشاي...وتقعد تقزقز في الشاي ذي قزقزت سندوتش ود المأذون...

أما محمد أريتو ما ولدي....والداب روحو قصّر من روحو...

تخريمه...مازلنا عشمانين تكمّل لينا ود قيحه....مع تأمين حصانه دبلوماسيّه ليك....

ود الماحي
صالح ابوشوارب
22-03-2006, 09:58 AM
كيفك يا ابوشوارب .. قصة جميلة ومحزنة .. تسلم يدك



الاخ العزيز بكرى
شكرا على الطلة وافتتاح المزاد
و تشجيعك لينا يخلينا نبحت في الماضي الجميل
صالح ابوشوارب
22-03-2006, 10:06 AM
تعرف ياشواربو لما اشوف مشاركاتك الجديدة بتردد ارد عليك موش لأنى بخلان بالرد ، هو غايتو احساس مابتوصفو الكلمات بس بشبهو بى زول ماسك سندوتش فى يدو وخايفو اكمل واقعد اقرِّم فيهو بالجمبات
برجع ليك تانى لى موضوع القصة بعد امشى اسوى لى كم رد على بقية المشاركات " شغل الإشراف إخلي الواحد إنطط زى أم العروس "



شكرا يا استاذ ابو بكر
دائما ننتظر ردودك وتعقيبك الذى لا يخلو من الاضافه والحندكة
وقبل ان يكتب الادمن وشخصك الكريم كنت ذى ام محمد كلما تسمع في مغترب تجرى تشوف ولكن ترجع بحسرة
فانا كنت اطل على البوست وما القى زول رد ارجع بحسرة لكن الادمن افتتح المزاد بمس كول فشكرا له و لك ومنتظرين
صالح ابوشوارب
22-03-2006, 10:15 AM
العزيز عزيز
شكرا للتحليل وما خليت حاجة والا تناولتها
تحياتي للاهل وربنا ما يحرمك من الحنية
صالح ابوشوارب
22-03-2006, 10:20 AM
[QUOTE=
والله القصه مؤثره للحد البعيد والله الواحد عيونو رقرقن وذكرتنا البكاء زمان اثناء المسلسلات العربيه
/QUOTE]

والله انا بقرأ ردك تأثرت ومرت مناظر قدام عيني جميله
وبرضو عينى رق رقت فشكرا ضياء وتحياتى للعروسة
صالح ابوشوارب
22-03-2006, 10:23 AM
آآآآآآآآآآآآآآآآآآآآآآآآآآآآآآآآه ياصالح والله يارييييييييييييتك لو رجعت لي ورا وقطعت كف في الجنا اللي اسمو محمد ده. والله كان فشيت لي غبينتي دي




والله يا خالد شعرت بيك .. لكن ذى دا أحسن تخليه لانك لو قطعت فيه كف تكون ريحتو
صالح ابوشوارب
22-03-2006, 10:28 AM
الاخ ابوشوارب



كيف ينسو ديل اهلو .. ودي امو الحملتو وولدتو وربتو

كيف ينسي ده ابوه التعب ليل نهار عشان يبقي كبير

صبي يافع وينور ليهو مستقبلو ..

ما ان الاولان اسع انو يريحهم شويه ويشيل شويه مسؤليه البيت

واخوانو البنات والاولاد ..

اذا ما ساعدهم الولد منو بساعدهم راجل البت ولا زول غريب من بره

الما فيهو خير لاهلو ما فيهو خير لغيرو



شكرا اختى فوزية على إضاءاتك وطلاتك
وفعلا تساؤلاتك تدل على حنانك واصلك السمح
تشكراتى عينى
صالح ابوشوارب
22-03-2006, 10:42 AM
شكرا يا جمال الوجود
اولا عندى ثلاثة محاور اتكلم فيها ( محاور دى ما لقيت ليها كلمة دارجية )
اولا خلينا من محمد دا هسي قلت لى تخت السفة وتحاورا بلسانك
مرة يمين ومرة يسار ويا حريف هل بتكون ناشفة ؟
وبعدين كل ما اشوف توقيعك (كراعك لا تلكز بها كلوة امرئ ) اقوم اتحسس كلوتى لانى مسلفة ههههههه
اما قصة ود قيحة انشاء الله قريب يا الحبيب
Jamal Elmahi
22-03-2006, 11:50 AM
شكرا يا جمال الوجود
اولا عندى ثلاثة محاور اتكلم فيها ( محاور دى ما لقيت ليها كلمة دارجية )
اولا خلينا من محمد دا هسي قلت لى تخت السفة وتحاورا بلسانك
مرة يمين ومرة يسار ويا حريف هل بتكون ناشفة ؟
وبعدين كل ما اشوف توقيعك (كراعك لا تلكز بها كلوة امرئ ) اقوم اتحسس كلوتى لانى مسلفة ههههههه
اما قصة ود قيحة انشاء الله قريب يا الحبيب

الاخ الحبيب...أخو الاخوان...أبو شوارب
ألمني وحزّ في نفسي موضوع نقل الكليه...وعليّ الطلاق أول مرّه أسمع بيهو اليوم ...فألف سلامه ليك وأنشاء الله أجر وعافيه ويكون اخر المرض...أعرف أنه جمعنا المنتدي لكن أشهد الله أنني أحبك كأخي تماماَ ودائماَ بسأل عنّك الخواجه عزيز...أتمني أنو خوتنا ما تكون داب المنتدي ...غايتو اتلومنا معاك ...ترقد مستشفي ياراجل ونحن ما جايبين خبر ...الله أنعل أبو دي خوّه دي...كان ما وصلناك بكراعنا كان علي الاقل وصلناك بالتلفون وهو أضعف الايمان...وأنت يا بوشوارب تستاهل كل خير وعلي الطلاق أنا كان كلوتي بتمشي معاك علي الطلاق مافي زول يديك كلوه غيري ...والله العظيم ما كشكره...المهم لو محتاج أي حاجه نحن أخوان بس أنت أطلب والبيناتنا عامره ويكون بينا اتصال ....


ود الماحي
عزيز عيسى
22-03-2006, 12:35 PM
الاخ الحبيب...أخو الاخوان...أبو شوارب
وعلي الطلاق أنا كان كلوتي بتمشي معاك علي الطلاق مافي زول يديك كلوه غيري ...والله العظيم ما كشكره...المهم لو محتاج أي حاجه نحن أخوان بس أنت أطلب والبيناتنا عامره ويكون بينا اتصال ....


ود الماحي
أبومنار،

بشهادة مني.. جمال دا صادق في كلامو.. وما بقولها ليك قدامو..
راجل من البطانة وإنت أدرى بأهل البطانة أهل الشهامة والكرم..
أخو أخوان.. وفي الكرم مافي زيو وما بقصر أبدا مع الآخوان..
وأنحنا بنعزو كثير.. ربنا يوفقه..
ونسأل الله الصحة والعافية للجميع.
معتز حمدتو
23-03-2006, 01:15 AM
تحية عطرة لابو شوارب
صراحتا ذكرتني لمت اخوتي عندما اصل السودان بكل الحب الفي الدنيا تقابلني الوالدة والوالد والاخوات ساعته بحس ان الانسان مفروض ما يفارق نهائيا لكن الله غالب .
وموضوعك جميل اخلي الواحد ارقرق مره واعيد حسابُ مليون مره قبل ما يقطع صديق خليك من الاهل وان شاء الله تكون افتهمت العبرة للاحباء
ولك الود
Jamal Elmahi
23-03-2006, 12:33 PM
أبومنار،

بشهادة مني.. جمال دا صادق في كلامو.. وما بقولها ليك قدامو..
راجل من البطانة وإنت أدرى بأهل البطانة أهل الشهامة والكرم..
أخو أخوان.. وفي الكرم مافي زيو وما بقصر أبدا مع الآخوان..
وأنحنا بنعزو كثير.. ربنا يوفقه..
ونسأل الله الصحة والعافية للجميع.



العزيز عزيز ...دا قليل مما عندكم ...ربنا يدوّم الاخوّه والمودّه والالفه...ويسلّم لينا أبوشوارب يارب....

جمال الماحي
صالح ابوشوارب
30-03-2006, 02:07 AM
اولا شكرا لابننا معتز وشرفتنا بطلتك

والله يا ودالماحى وعزيز
خليتونى ما قادر ارد كل يوم افتح البوست وارجع اقفله ما قادر ارد والله . فعلا انتو اخواني وما في شك يا ودالماحي في كلامك نحن بقينا اخوان وربنا يجمعنا في ساعة خير
Jamal Elmahi
30-03-2006, 03:38 PM
اولا شكرا لابننا معتز وشرفتنا بطلتك

والله يا ودالماحى وعزيز
خليتونى ما قادر ارد كل يوم افتح البوست وارجع اقفله ما قادر ارد والله . فعلا انتو اخواني وما في شك يا ودالماحي في كلامك نحن بقينا اخوان وربنا يجمعنا في ساعة خير

حباب أخوي أبشوارب....القلوب شواهد أأأبوي...وربنا يعمّر القلوب بالخوّه الصافيه ويدوّم المحبّه والمحنّه...واخرا كوم تراب أأألعشّاي...وما تنسانا من الدعوات الصالحه...والحي مصيرو يلاقي....

ود الماحي
بابكر
02-04-2006, 10:14 AM
شكرا أخ صالح على هذه الروائع
طبعا انا راجل حنين جدا والله انسجمت مع القصه لدرجة انى كنت اشوف الكانون قدامى وبيتهم التقول فى دردق شكرا ليك يارائع يا امير
سوباوي
02-04-2006, 09:25 PM
أستاذنا صالح أبو شوارب .. المحترم

المكتوب ده كلام معتق .. لأنو جاي طالع من ذاكرة عشرين سنة .. ولأنو معبأ

بأحاسيس مختلفة ومركزة كمان ... وفيه كثافة من المشاهد عميقة جداً .. وكل

مشهد فيه احساس ونكهة بتختلف من المشهد التاني لكن التنقل بيناتم سلس ..

والإحساس يبدأ متعاطف مع أسرة محمد .. ويتحور لإحساس بالأمل لمدة قصيرة

إلى أن يسيطر علينا إحساس الغبينة تجاه محمد والأنانية الاتعامل بيها قصاد

أسرته ..وأجمل ما في الموضوع عمنا أبو شوارب أنك ما شتتنا بالرغم من أنو

في أبواب كثيرة كانت ممكن تكون مدعاة لتسرب الاحساس من خلالها وكان

الواحد بيكون مستمتع نعم بالقصة لكن ما باحساس مركز .. يعني لو كان السرد

شمل مشاكل زوجته بتفاصيلها وموضوع المحاكم بكامل جرجرته وبعد كده عمل

شنو مع أولاده خلاهم للمصرية ولا أخذهم .. وإلى آخره لكنك يا عزيزي دخلت بنا

إلى بيت محمد وعاد محمد ووجدنا منتظرين في بيته ونحن نتابع ما خفي عليه

من أوضاع أسرته في فترة غيابه ... وما خفي على أسرته من تفاصيله في فترة

سفره .. وهذأ الضرب من ضروب السرد تحدث عنه العلامة سيد قطب .. في

كتابه التصوير الفني في القرآن والذي يتحدث فيه عن الصور البديعة والمشاهد

الحركية والتصوير الفني الذي يكتنفها .. فقسمها إلى مشاهد بديعة التصوير فمرة

تجد أن النظارة والبطل معلومة لديهم الأحداث وتفاجأهم النهاية معاً ومرة تجد أن

النظارة يعرفون النهاية مسبقاً حيث يتفاجأ بها البطل وأطراف الحوار .. ومرة

يعرفها البطل ويتفاجأ بها النظارة .. وكانت أمثلته في ذلك رائعة من القرآن كمثل

قصة الرجل الذي لم يستطيع صبرا فسأل لماذا يهد الحائط ولماذا تخرق السفينة

ولماذا ولماذا .. إلى أن عرفنا جميعاً ما المقصد .. والتصوير الفني في قصة

الأخوان الثلاثة الذين عزموا على أن لا يعطوا مسكيناً من حصاد حديقتهم

فأصبحوا ولم يجدو فيها شيئاً حيث أصابها وابل فأعدمها ..فكان النظاره يعرفون

ما حدث ليلاً وأبطال الرواية مغيبون تماماً عن ما حل بحديقتهم ..

وها أنت الآن تصور لنا كل مشاهد القصة ومحاورها تصويراً فنياً بديعاً .. ونحن

النظارة لدينا كل المشاهد وأبطال القصة تفاجئهم التفاصيل ...

فقط ما وددت قوله أن هذا العمل رائع لدرجة أنك تسمع صوت المؤجر والحجة

الضاربة مع أبو محمد ويتراى للأعين شكل الغرفة الواحدة ومنظر البنات وصوت

صفير الشتاء .. وكل تفاصيل أسرة محمد ...

أستاذنا وعمنا صالح أبو شوارب لك الود والتحية أين ما كنت ورجاء لا تحرمنا

من الولوج بنا إلى ذاكرتك الثرة ..

تحياتي وكن بخير .. بخير أبداً ...
أبوبكرحامد
03-04-2006, 03:32 AM
أستاذنا صالح أبو شوارب .. المحترم

المكتوب ده كلام معتق .. لأنو جاي طالع من ذاكرة عشرين سنة .. ولأنو معبأ

بأحاسيس مختلفة ومركزة كمان ... وفيه كثافة من المشاهد عميقة جداً .. وكل

مشهد فيه احساس ونكهة بتختلف من المشهد التاني لكن التنقل بيناتم سلس ..

والإحساس يبدأ متعاطف مع أسرة محمد .. ويتحور لإحساس بالأمل لمدة قصيرة

إلى أن يسيطر علينا إحساس الغبينة تجاه محمد والأنانية الاتعامل بيها قصاد

أسرته ..وأجمل ما في الموضوع عمنا أبو شوارب أنك ما شتتنا بالرغم من أنو

في أبواب كثيرة كانت ممكن تكون مدعاة لتسرب الاحساس من خلالها وكان

الواحد بيكون مستمتع نعم بالقصة لكن ما باحساس مركز .. يعني لو كان السرد

شمل مشاكل زوجته بتفاصيلها وموضوع المحاكم بكامل جرجرته وبعد كده عمل

شنو مع أولاده خلاهم للمصرية ولا أخذهم .. وإلى آخره لكنك يا عزيزي دخلت بنا

إلى بيت محمد وعاد محمد ووجدنا منتظرين في بيته ونحن نتابع ما خفي عليه

من أوضاع أسرته في فترة غيابه ... وما خفي على أسرته من تفاصيله في فترة

سفره .. وهذأ الضرب من ضروب السرد تحدث عنه العلامة سيد قطب .. في

كتابه التصوير الفني في القرآن والذي يتحدث فيه عن الصور البديعة والمشاهد

الحركية والتصوير الفني الذي يكتنفها .. فقسمها إلى مشاهد بديعة التصوير فمرة

تجد أن النظارة والبطل معلومة لديهم الأحداث وتفاجأهم النهاية معاً ومرة تجد أن

النظارة يعرفون النهاية مسبقاً حيث يتفاجأ بها البطل وأطراف الحوار .. ومرة

يعرفها البطل ويتفاجأ بها النظارة .. وكانت أمثلته في ذلك رائعة من القرآن كمثل

قصة الرجل الذي لم يستطيع صبرا فسأل لماذا يهد الحائط ولماذا تخرق السفينة

ولماذا ولماذا .. إلى أن عرفنا جميعاً ما المقصد .. والتصوير الفني في قصة

الأخوان الثلاثة الذين عزموا على أن لا يعطوا مسكيناً من حصاد حديقتهم

فأصبحوا ولم يجدو فيها شيئاً حيث أصابها وابل فأعدمها ..فكان النظاره يعرفون

ما حدث ليلاً وأبطال الرواية مغيبون تماماً عن ما حل بحديقتهم ..

وها أنت الآن تصور لنا كل مشاهد القصة ومحاورها تصويراً فنياً بديعاً .. ونحن

النظارة لدينا كل المشاهد وأبطال القصة تفاجئهم التفاصيل ...

فقط ما وددت قوله أن هذا العمل رائع لدرجة أنك تسمع صوت المؤجر والحجة

الضاربة مع أبو محمد ويتراى للأعين شكل الغرفة الواحدة ومنظر البنات وصوت

صفير الشتاء .. وكل تفاصيل أسرة محمد ...

أستاذنا وعمنا صالح أبو شوارب لك الود والتحية أين ما كنت ورجاء لا تحرمنا

من الولوج بنا إلى ذاكرتك الثرة ..

تحياتي وكن بخير .. بخير أبداً ...
اتفق مع سوباوى أن عدم الولوج فى تفاصيل التفاصيل أكسب القصة بعداً آخر ، وأضم صوتى لصوت سوباوى وأناشد أبوشوارب أن لايحرمنا من هذه الروائع المكتوبة بى نفس سودانى أصيل .

مشاققة : " على رأى ود الماحى "
ازدان منتدى ودمدنيات - أو كما يحلو لى تسميته بالبيت الكبير - بمرورك الزاهى وكل المنى أن تطل عليه بين الفينة والأخرى وتضمه ل " براحاتك "
صالح ابوشوارب
03-04-2006, 09:46 AM
شكرا الاخ بابكر

والله انت اصيل قعدة الكانون دى عندى بالدنيا
وشكرا
صالح ابوشوارب
03-04-2006, 09:54 AM
الاخ ود الماذون
والله الاديب والناقد سوباوى ما عندى ليه رد الا اقول
انا نزلت ضيف في منطقة ناس سوباوى والحقيقة اكرومونى شديد وكل واحد جاب صينيتو وقبل ما اشبع سوباوى جاب
لينا التحلية .. وحلينا .. ويا لها من تحلية .. اخوان سوباوى جابوا صواني وصواني لكن قلت خلينا نعيش على التحلية ..
فشكرا على التحلية والتى طعمها لازال في فمى وشكرا لاخوان سوباوى
ام قبس
06-01-2011, 02:28 PM
ياحليلك يعم صالح اتاري كلنا محمد وانت ماداري
خالدحربى
14-01-2011, 11:00 AM
فعلا قصص حقيقية زى دى كتير
وفعلا ياريتك ما رجعت يا محمد
الراجع ليها شنو
جاى اتكسر
ليهم
بدر الدين محمد
15-01-2011, 08:43 AM
القصة مؤثرة .. نسأل الله ان يكون هذا السرد عبرة للشباب
لك الشكر ونحييك
خالدحربى
16-01-2011, 01:40 AM
كثيرين فى مجعمين مثل هذا المحمد
ياريت لو اخترت لة اسم غير محمد
دة ما محمد اللة لاحمدو دنيا واخرى