المساعد الشخصي الرقمي

مشاهدة النسخة كاملة : دكان ود الصول كسح عفراء مول


Jamal Elmahi
10-03-2006, 05:20 PM
دكان ود الصول فيهو المعدوم في السوق وديمه خاتي القول
الكوارع تقول ياليل..الجقاجق تجقجق..والقدره مرسّفه فول
الراكوبه مرشوشه..الصعوط نديان ممطّر تشمو في تمبول
العنكوليب مرصوص مربّط وقصب السكر نقايو يرمي الزول
ريحتو خلطه مدنكله ..بصل..شمار..كسبره..وصعوط ممطّر بي ديتول
حفيرات السيجه وصفرجت عامرات..والدكان أمانه ما لامّي فحول
ود الماذون كلامو دوام موزون..ساعة الصفاح مأذون ووقت الكوره بس جقدول
وباقي الشلّه ونستم ترد الروح وتصحّي الطاشم المسطول
دكان ودالصول تب ما قارّي لعفراء مول ..نافخ سدرو ذي الغول
كان قلتو التكنولوجيا فيهو الكاش ريجستربريموت كنترول
مقاشيشو ماساعله في الهوفر تخم السّفه القدر الكعكول
القعده فيهو خمسه نجوم وعناقريبو النوع البلولي الزول
وبرضو تقول لي عفراء مول.....

جمال الماحي
أبوبكرحامد
11-03-2006, 03:08 AM
ود الماحى سيد النضم والنمَّة
كلامك سمح فيهو العيون تنجمَّ
مولاى احفظك ... بى سر تبارك وعمَّ
Jamal Elmahi
11-03-2006, 05:15 AM
مرحب حباب ودالمـأذون

المتلك أأبوي ما بتلدو تاني بطون
فرّاج الضلمّه النورو عمّ الكون
نضميك اتلصف اللؤلؤ المكنون
بحضورك اتبكمنا وأضحي اللسان مسجون



جمال الماحي
madaniboy
11-03-2006, 07:34 AM
هههههههههه
حلووه يا جمال والله يديك العافيه
فاقد حنان
Jamal Elmahi
13-03-2006, 06:58 AM
أخونا نبع الحنان....يا الكلّك حنان....
شكلك غرقان في الحنان للاضان...
وحكاية فاقد ..علي فرعون يا هامان..


جمال الماحي
bakri
17-03-2006, 10:53 PM
ياجمــال انــــت مـــــن البطــــانه ولــــــه شــــــنو

اديـــــك الـــــــعافيه ومــــاتـــــحرمـــنا مــــن الــــنمــــات
ضياء الدين احمد
18-03-2006, 04:08 AM
ياسلام عليك ياود الماحي وخصوصا الحته بتاعت السعوط النديان دي والله لمان شلوفتي رجفت
سفه مدنكله تعدل مزاج الزول
وتخلي الاصم ينضم يحسن القول
وراحك النمش وديني ود الصول
وانا عارف دواي ، السفه مو بندول
أبوبكرحامد
19-03-2006, 12:50 AM
ياسلام عليك ياود الماحي وخصوصا الحته بتاعت السعوط النديان دي والله لمان شلوفتي رجفت
سفه مدنكله تعدل مزاج الزول
وتخلي الاصم ينضم يحسن القول
وراحك النمش وديني ود الصول
وانا عارف دواي ، السفه مو بندول
أهلاً حباب مرحب بى ود وداعة
دكانا فاتح أربعة وعشرين ساعة
بشوفك تسف لابتتركض لاعندك لكاعة
مو زى ناس ود هاشم وباقى الجماعة *
.................
* الجماعة : جماعة الرقدو قش
ضياء الدين احمد
19-03-2006, 03:55 AM
واقول حاجه ياود المأذون انا بسف وناوي اعرس تاني كمان دي ودهاشم بقدر عليها؟
Jamal Elmahi
19-03-2006, 09:32 AM
ياجمــال انــــت مـــــن البطــــانه ولــــــه شــــــنو

اديـــــك الـــــــعافيه ومــــاتـــــحرمـــنا مــــن الــــنمــــات

مرحب حباب بكري....حباب الدخري....بالحيل أأبوي أنا عربي بطانه....والجواب يكفيك عنوانو...علي قول الحناكيش ما هو باين في العيون...


ود الماحي
Jamal Elmahi
19-03-2006, 10:33 AM
ياسلام عليك ياود الماحي وخصوصا الحته بتاعت السعوط النديان دي والله لمان شلوفتي رجفت
سفه مدنكله تعدل مزاج الزول
وتخلي الاصم ينضم يحسن القول
وراحك النمش وديني ود الصول
وانا عارف دواي ، السفه مو بندول


مرحب حباب ود وداعه...هازول الخشيم المابسف شن بدوروبو...عليّ الطلاق حتي نضميهو مسيخ...

السعوط التقيل الجردقتو ما كاتول
مو للحناكيش للناس الرجال وفحول
من الشمّه مترين يهوّي الزول
وفراقو حرقة حشي وعقل مشلول


وبالمناسبه يا ود وداعه حالتو أخوك عمرو ماسفه....


ود الماحي
أبوبكرحامد
20-03-2006, 01:30 AM
واقول حاجه ياود المأذون انا بسف وناوي اعرس تاني كمان دي ودهاشم بقدر عليها؟
ود هاشم ياضياء سمانى زعيم الرقدو قش ، هسى انا لادايرو اسف صعوط ولادايرو اعرس تانى ، بس خليهو اسوى لينا كمونية فى بيتو ومعاها ام فتفت!!!!!!!!
ضياء الدين احمد
20-03-2006, 05:47 AM
اديك الجدعه دي ياود الماحي وكما ذكرت من قبل دي شاركت بيها في اليوبيل الفضي لحقة عبد الحق وكا الاحتفال في البركس في حضرة محمد عبد الحق وبعض الاخوان
السفه ياسبب الهنا******** يالفي الخشيم ليك كم سنه
اصبحت ادمن ختتك****** وشلوفتي صبح مدمنه
يا احلي من كل البرنجي******** وكل سيجاره مدخنه
عطرونك الاصفر لذيذ ***** ولما اللسان فيك انتني
حسيت باني وسط جنان *****والحور ينقذن وسطنا

هوي يااخوانا ما تقولوا دي دعوه صريحه لانتشار هذه العاده انما هي بعض من الهزر يعني اخوانيات
وياود المأذون كان مستني كمونية ود هاشم واطاتك اصبحت
راسكال
20-03-2006, 06:25 AM
ياأخوى ياجمال والله ابتعدة
وبكلامك المعسول خليتنى التقول
مسسسسسسسسطول
وياريت ماتحرمنا من كلامك البطير النوم
ضياء الدين احمد
20-03-2006, 06:33 AM
ود الماحي جاء وفوق البرش عاد قيّل
وطلع كيس سمين والله صعوطو مدنكل
ولمان داير اقوم قرب اقع واتكّل
اديني النسف اشاءالله لو اتحنقل
ياود الماحي بعد وصفك ده وتقول لي ما بتسف انت خايف من الجماعه ولاشنو
عزيز عيسى
20-03-2006, 10:23 AM
جيت ماري بجنبكم لكن رائحة الصعوط دوختني..
أمانة ما التمباك عندكم !!
وكمونية ودهاشم دي لسه ما نضجت ؟؟
Jamal Elmahi
20-03-2006, 12:38 PM
اديك الجدعه دي ياود الماحي وكما ذكرت من قبل دي شاركت بيها في اليوبيل الفضي لحقة عبد الحق وكا الاحتفال في البركس في حضرة محمد عبد الحق وبعض الاخوان
السفه ياسبب الهنا******** يالفي الخشيم ليك كم سنه
اصبحت ادمن ختتك****** وشلوفتي صبح مدمنه
يا احلي من كل البرنجي******** وكل سيجاره مدخنه
عطرونك الاصفر لذيذ ***** ولما اللسان فيك انتني
حسيت باني وسط جنان *****والحور ينقذن وسطنا

هوي يااخوانا ما تقولوا دي دعوه صريحه لانتشار هذه العاده انما هي بعض من الهزر يعني اخوانيات
وياود المأذون كان مستني كمونية ود هاشم واطاتك اصبحت

ود وداعه والله الجدعه عندك....طلّع من القديم المعتّق خلنا ننبسط...أخرتا كوم تراب...

ود عماري معسول مظبّط واللسان جاري...
من الشمّه تريّل وتنطط خفيف كمساري...
علاّ كان شافنّو البنات واشريري واكشف حالي...

ود الماحي
Jamal Elmahi
20-03-2006, 12:50 PM
ياأخوى ياجمال والله ابتعدة
وبكلامك المعسول خليتنى التقول
مسسسسسسسسطول
وياريت ماتحرمنا من كلامك البطير النوم


حباب أبوي ...حباب راسكال...
حباب أخو البنات ساتر الحال...
حباب العشّاي سمح الفال...
حباب ودبلدي سيد العمّه و الشال...
ما تغيب يا الحبيب عود لينا تاني تعال....

ود الماحي
Jamal Elmahi
20-03-2006, 01:29 PM
ود الماحي جاء وفوق البرش عاد قيّل
وطلع كيس سمين والله صعوطو مدنكل
ولمان داير اقوم قرب اقع واتكّل
اديني النسف اشاءالله لو اتحنقل
ياود الماحي بعد وصفك ده وتقول لي ما بتسف انت خايف من الجماعه ولاشنو

أفو أأود وداعه ...تلمّني مع الرقدو قش...أنا أأبوي مع الهبرو ملو...ضربو أم فتفت وقرشو الفجلو...
وبمناسبة الرقدو قش ...أقول ليك النكنه دي ...والله يكفينا شر الكيزان والعاملين عليها وفي الرقاب والغارمين...
قالوا يوم القيامه في لافته كبيره معلقه في باب الجنّه مكتوب عليها ..أيّ زول كان بيسمع كلام مرتو يقيف هنا عشان يدخلوهو الجنّه..وطبعاَ الصف حدو حسن من الجنّه لغاية النار الاعمي شايل المكسّر واقفين في الصف دا...وباب الجنّه التاني فيهو لافته مكتوب عليها الكانت مرتو بتسمع كلامو يقيف هنا عشان برضو يدخلوهو الجنّه لانو ضابح لي مرتو الكديسه ...الصف دا ما فيهو غير راجل واحد بس....الملائكه اتكيفو جداَ من الراجل دا وقالوا ليهو ياسلام عليك يابو الرجال انت الوحيد الممشي مرتو علي سنقت عشره وموريها العين الحمراء...عفاريم عليك انت ارجل راجل في الدنيا...قام الراجل قال ليهم ها ناس رجالة شنو وعين حمره حقت شنو والله أنا لاني راجل ولا شفته الرجاله...قالو ليهو طيب الموقفك هنا في الصف دا شنو؟؟؟ قال ليهم ما دي مرتي حمرت لي ونهرتني وقالت لي أمش أقيف في الصف داك....

ود الماحي
زيكو منيب
21-03-2006, 08:43 AM
دكان ود الصول فيهو المعدوم في السوق وديمه خاتي القول
و الله ما قصرت في مدحك للدكان يا ود الماحي
Jamal Elmahi
21-03-2006, 12:58 PM
و الله ما قصرت في مدحك للدكان يا ود الماحي

حباب أخوي حباب زيكو منيب
حباب الضو حباب الحبيب...
تشيلك عيونّا قبل العناقريب..


ود الماحي