عضم الشيطان حقي تاعبني شديييييييد

[خالد هاشم علي]

احبتي لكم التحية.... امبارح صحيت من النوم وبدون مناسبة كده لقيت ليك عضم الشيطان بتاع كرعيني الاتنين موجعني وجع شديد لمن غالبني المشي قمت قعدت اتشكي للولية ام هاشم ... وبعد ماإنتهيت من التشكي والجرسة قعدت أسال في نفسي .... كيف يعني أقول عضم الشيطان ؟؟؟ وليه سموها عضم الشيطان؟؟؟؟ وهل الشيطان يملك جزء من أجزاء جسمنا عشان نقول الحتة دي حقت الشيطان؟؟؟( بالمناسبة للذين لا يعرفون عضمة الشيطان فهي العظمة التي توجد في ظاهر القدم وباطنها وهي المفصل الذي يربط بين الساق وأسفل القدم) ... سؤالي ليه أهلنا في السودان سموهو عضم الشيطان ؟؟؟ أفيدونا

[aborawan]

خالد هاشم النبي ما اخير
والله يا ود هاشم اخوي حيرتنا زاتو
بعدين يا شقي الحال عمرك ده كلو ما عرفتا تجي تسأل الا الليلة
غايتو انا جيت وحااكون متفرج سااااااااااي لحدي ما اشوف سر التسمية وين

شكرا ليك كتير لانو لو جاك زول ووراك سر التسمية كده بنكون عرفنا معلومة
وسلامتك من وجع عضم الشيطان :d:d

تحياتي

[عماد الصادق]

سلامة أبوهاشم يادكتورة...
وسبب التسمية ترانا منتظرين.. مع حبيبنا أبوروان
ولكن حسب مكان العطب.. يخيل لي العلاج
في الكوارع..
ولا يفل الحديد إلا الحديد..
نوصيك بالكوارع.. ماتنسى تعزمنا عشان الحكاية
دايره لمّه.. فأكل الكوارع داير شداعة..

أها نحن أمبارح مقيلين عديل كده مع دكتورة الأسنان..
أنا والمدام.. وماتتخيل الخوفة الدخلتنا مما عرفنا الحكاية
فيها بنج.. والحقنة حقت البقر الله يكرمنا..

وكلو مرة أتساءل الناس ديل لسه مالقو لينا حل غير الإبرة دي!!!!

سلاااااامات

[خالد هاشم علي]

العريس ( سابقاً) ابو روان... التحية ليك ... النبي كيف ماأخير؟؟؟ والله ياابو روان الغربة والقهر والضيق بخلوك تفكر في حاجات لو كنت في السودان ووسط أهلك ماكنت حتفكر انك تفكر فيها ... يعني شوف طول عمري عارف انو العضمة دي اسمها عضمة الشيطان ومافكرت في يوم من الايام أعرف السبب وسر التسمية شنو... لكن هسة مابسكت وبحكها حك شديد لغاية ماربنا يفرجها ويجي واحد من الحبوبات الكبااااااار زي صالح ابو شوارب كده ويوريني سر التسمية شنو؟؟؟ وللوقت داك ترانا مستنيين...

[خالد هاشم علي]

الغالي عمدة ود الصادق ( ابو اشواق)... سلام وشوق شديد ياجاري العزيز... كلامك في محلو ياحبيب لكن الكوارع دي باقيلك الولية الحنكوشة دي حتعرف ليها؟؟؟ لكن لو ام اشواق حريفه فيها فانا من الليلة بمشي المسلخ واجيبها بس شوف لينا الحاجة ام اشواق وماتقوم تطلع حنوشة زي ام هاشم دي ... قلت لي كنت مع الدكتور لكن ماوريتني منو المتحسس فيكم انت ولا الحاجة ولا اشواق؟؟؟ وزي ماقلت ياعمدة الناس طلعوا القمر وغالبهم يشوفوا ليهم حل غير الترزة دي؟؟؟ بخصوص عضمة الشيطان زي ماقلت لي ابو روان ( ترانا مستنيين لمن ربنا يفرجها ونلقي الإفادة

[أبوريلان]

ود هاشم

عوافى وسلامتك

أها مافرجت لسه ، العجائز كلهم الأيام دى مختفين الرطوبة قايمة عليهم من شدة البرد .

[مزوني]

هههههههههههههههههههههههههههههههههههههههههههههههههه هههههههههههههههههههههههههه

جابت ليها شكيات وبكيات

وربنا يستر من الوفيات

رطوبه ............ دي طبعا فريده من نوعها

ألف سلامه ليك منها حبيبنا أبو الخلد

وانا غايتو حالي حال باقي الجماعه

بقيف أنتظر في الصف لعل وعسى نعرف حاجه

[سوار الياسمين]

تحياتي أخي أبو هاشم

والله الموضوع ده شدني لمان جننتا الناس المعاي

عشان اعرف سر التسمية ده شنو ولسة ما عرفتو

لكن انا في سعي معاك عشان السؤال ده

غلبني خلالالالالالالالالالالالالالالالالالالالاص

وانا معروفة اني شمشارة

واحاول اعرفو ليك


تحياااااتي

[admin]

هنالك مقولتين حول هذا الخصوص وهما:
الاولى : اذا لاحظنا للساق من الركبة ونزولا حتى تلك العظمة نجد تناسقا وانسياب شديد .. وتاتي تلك العظمة ببروز حاد لانها تربط بين الساق والقدم .. وخصوصا عند اهلنا في السودان الذين امتازوا بضعف شديد في البنية تبرز تلك العظمة بشدة .. وهذا البروز هو خروج وشذوذ عن قاعدة التناسق والانسياب التى سبقته في الساق .. وعندما يشذ شخص عن الاخرين نصفه بالشيطنة وذلك لشذوذ كبير الشياطين (ابليس) عن بقية خلق الله تعالي .. فتجدنا في السودان نقول الولد دا شيطان خلاص .. وهنا نقصد ان نصف ذلك الصغير بالشقاوة والشذوذ عن بقية اقرانه ومن في سنه.. وهنا جات تسمية تلك العظمة بعظمة الشيطان.

الثانية: يقال انه وللبروز الشاذ لتلك العظمة كثيرا ما تتعرض للصدمات سوى بالحجارة او بالاشجار الصغيرة او حوافر الاغنام والمواشي او ادوات الزراعة .. حيث كما تعلمون اشتهر اهلنا في السودان بالرعي والزراعة .. فكانت ادواتهم كثيرا ما تصدم وتضرب تلك العظمة البارزة .. ويقال ايضا ان الالم الناتج من تلك الصدمات الم حاد جدا ويشبه كثيرا لسعة الكهرباء .. لدرجة ان الصدمة او الضربة اذا كانت قوية يمكن ان يتعرض الانسان للاغماء .. فكان اهلنا في السودان يقولون انضربتا ضربة حارة تقول ضربني شيطان .. ومن هنا سميت تلك العظمة بعظمة الشيطان نتيجة للالم الشيطاني الذي ينتج عندما تتعرض للصدمات.

اها رايكم شنو .. ريحتكم تمام صاح .. انا غايتو شكلي بقفل المنتدي دا وبمشي افتح لي منجرة في السوق الجديد .. عشان اقعد انجر على راحتي .. ويا ودهاشم الجاتك في عضم الشيطان دي كبيرة وجياك من تحت اعمل حسابك وماتبلع بندول كتير.

[aborawan]

الف شكر حبوبة بكري ويديك العافية ريحتنا تب والله :):)

[saly]

الاخ خالد

سلامات اول شي وما تشوف شر

بعدين احر ضربه لمن تنضرب في عظمه الشيطان دي بتكون حاره شديد.....

وبيني وبينك ما عارفه تسميتها شنو

لكن شايفه الادمن رده اسع وعرفنا معلومه جديده

وبعدين والله وقسم بالله امس اتعشيت بكوارع بالشطه العظام بقيتها هيكل عظمي

(( ما بعرف اسويها طبعا اشتريناها من المطعم السوداني تاكل اصباعك وراها))

[سوار الياسمين]

الأخ ادمن

الله يريحك دنيا واخرة

لانه الموضوع ده تاعبني شديد من كثر ما انا شمشارة

ويديك العافية على الاجابة

[معتز محمد طه]

والله حقيقه هنالك بعد الاشياء التي يقف عندها ولايعرف لها مسمس مثل عضم الشيطان كما قلتي فعلا
لكن طبعا هذا اسم اجدادنا لكن الشي المتاكد منه انهم مش بخطئوا كثيرا فاذا كان المعني بعيد لكن بكون بدل علي شي معين عندهم احتمال وهذا الارجح سمي عضم الشيطان بهذا الاسم لانه حتي قويه اي يعني الواحد بنضرب فيه بقوه بعد ده مش بنجرح لذلك اطلق عليه الشيطان هذا تفسيري اذا وجدتم تفسير تقيق افيدوني
taha_mutaz@hotmail.com

[أبوريلان]

يا خالد هاشم سلامااااات والجاتك فى عظمك سامحتك ، دى طبعا علامات الكبربر يا تفتيحه لو ما عارف لكن كتر من شوربة الكوارع وأقيف من ثلاثة شهور وخلى إجازتك السنوية فى الصيف عشان رطوبة جدة ، طبعا حبوبة بكرى ماقصر ربنا يديه الصحة والعافية وقطعت جهينة قول كل خطيب بعدين يابكرى المنجرة بتاعتك دى فعلا لازم تكون فى السوق الجديد لأنو عظم الشيطان دا بظهر غالبا عند السودانيين لأن أجسامهم نحيفة ولكن عند الشوام لايظهر لأن ماشاء الله رجولهم كطفايات القاعة ولا حسد ، بس تعرف البوست بتاعك دا اليوم من ماصحيت من النوم عشان أوصل الإبنة ريلان حيث تتلقى علمها وأنا أفكر فى معنى عظم الشيطان الدوشتنا بيه دا ، لكن وأنا أتجاذب أطراف البطانية لأتدفأ من عشرة الراعى حتى تجهز ريلان ، دار فى رأسى جسد الإنسان وبالأخص جسم الطفل وفكرت فى معانى كلمات نقولها ولا نعرف معانها ومنها كلمة ( نافوخ ) عند الأطفال الرضع يقال لك نافوخه لين أعمل حسابك ما تلمسه ونسمع هذه الكلمة كثيرا عند حبوباتنا ( الأدمن ) ما مقصود أنت !!! فقلت أقترح أن تسمى بوستك هذا بأسم آخر مثلا (( أسماء دارجية نستعملها لأعضاء فى جسدنا ولا نعرف معانيها )) ويثبت وكل شخص يصعب عليه مسمى يطرحه داخله ، أها رأيك شنو ؟؟ وأنا الآن منتظر دخول العجائز وين ناس عزيز وأبو شوارب والأدمن عشان يقولوا لينا ما سر تسمية (( نافوخ )) ؟؟ ولنا عودة

[ابو الزعيم]

ابو هاشم ... سلامات يا راجل
والله ان دخلت على الموضوع ده من اول يوم .. وشغلني جداً وبدات عمليات التحري الخاصة لمعرفة سبب التسميه ونسبه لانني هذى الايام في الخلاء بسبب العمل لم اجد اسباب كافيه .. وزعلت جداً لانو ذي ما قالت سوار الياسمين ..الشمار حرقني
لكن انا ارجح قول اخونا ابوبكر الثاني ...
وكدي ادوني صنه كده انا بجيب ليكم خبره ... بس خلوني ارجع اشوق حبوبتي ...
اما يا ابو ريلان موضوع النافوخ ده كمان جديد ... والله دي دايره ليها قعده ... وانا اثني على اقتراحك بطرح مثل هذه الاشياء في هذا البوست ...
بس حركو لينا اعمامنا ناس عزيز وابو شوارب خليهم يفتونا

واخيراً لكم كل الحب
وسلامتك الف سلامة ابو هاشم

[غفران]

الف سلامه عليك اخي هاشم
طبعا بصراحه ما كنت بعرف المقصود شنو بكلمة عضم الشيطان وليها سموها كده بس الله اديه العافيه اخي الادمن وضحها لينا اديكم الصحه والعافيه يا رب

[admin]

عملتوني حبوبة عديل كدا يا ابوروان وياسر .. دا بدل ما تقولوا لي البروف ادمن ..ههههههه

نجي للنافوخ .. اولا يجب تصحيح ثلاثة مفاهيم خاطئة لدي اغلب الناس وهي
اولا: لايقصد بالنافوخ الراس او اعلى الراس او حتى المخ كما يعتقد الجميع
ثانيا: كلمة نافوخ ليست سودانية بحتة بل تستعمل في كافة الدول العربية.
ثالثا : انه لاعلاقة لحجم الراس ونوعية المخ بداخله بهذه الكلمة .. كما انه ليست هنالك اي علاقة لعملية النفخ بالموضوع كان ان يقول احدهم ان الراس منفوخا كا البالون مثلا.


http://www.gulfkids.com/images/head.jpg وكلمة نافوخ هي ترجمة عامية للكلمة الاساسية وهي اليافوخ او اليأفوخ .. وهي كلمة عربية 100% واليكم بعض الشرح الطبي عن هذه الكلمة وماذا تعني:
منطقة اليافوخ هي منطقة في الجمجمة لم تتكلس بع( لم يتكون فيها العظم). و لو نظرنا الى الجمجمة بشكل عام عند المواليد فان الله قد خلق الجمجمة على شكل قطع متلاصقة من العضيمات المسطحة(على شكل جزر) بينها "فراغ" صغير هذا الفراغ بين العظيمات يكبر في مناطق كمقدمة الرأس و مؤخرته. ففي المقدمة يسمى هذا الفراغ الكبير اليافوخ!

اها واهلنا زمان كانو بحذرونا من انو نهبش المنطقة ديك ما عشان خايفننا نقد راس الولد بس لكن لسبب تاني وهو ما يسمي بالانغلاق الياخوفي.. فهذه الفراغات بين عظيمات الجمجمة و اليافوخ(الامامي و الخلفي) تسمح للجمجمة بالتوسع و ايضا(و بشكل اهم) تسمح لما بداخل الجمجمة (الا و هو المخ) بالنمو و الكبر.. لذلك لو "انغلقت" هذه الفتحات و اليافوخ بشكل مبكر فان ذلك "قد" يمنع المخ من الكبر و يحد منذ لك بشك كبير. و هذا يحدث اذا انغلقت عدة فراغات و ليس فراغ و احد..ومع تقدم العمر و بعد توقف المخ من النمو(عادة قبل السن الخامسة من العمر) فان هذه الفراغات تنغلق تلقائيا..هناك نوعان من الانغلاق المبكر للفراغات و اليافوخ معها:
النوع الاول نسمية انغلاق اولي
و هذا النوع يكون ناتج عن "خلل" في تخلق الفراغات اي ان الفراغات لم تخلق
و هذا يستعي التدخل الجراحي لفتح و "انشاء" هذا الفراغات لكي تسمح للمخ بالنمو
النوع الثاني نسمية انغلاق ثانوي
و هو ان هذه الفراغات "مخلوقة" و لكنها انغلقت في وقت مبكر لان المخ لا ينمو بشك كبير... و لذلك فهي احست ان المخ لا يحتاج الى هذه الفراغات و لذلك انغلقة

اتمني الاستفادة للجميع

[أبوريلان]

الأخ بكرى الأدمن

تحياتى ليك يامبدع

والله وفيت وكفيت فى الشرح ، بس المرة دى شرح علمى مابتاع حبوبات ههههههههههههههه ، أديك العافية وكدى النشوف ليك حاجة تانى كمان !! ودا كلام نقلتو ليك من موقع الأم والطفل عشان تتضح الرؤيا ، ولا عدمانك .الــرأس:
يشكل رأس المولود عند الولادة ربع طول جسمه، وبما أن الرأس تكون كبيرة على مرورها فى قناة الولادة، تتراكب عظام معينة فى الجمجمة أثناء عملية الولادة لتقليل حجم الرأس بشكل مؤقت. هذا هو ما يعطى رأس المولود الشكل المخروطى الذى قد يلاحظه بعض الآباء عند الولادة. هناك بعض الأماكن اللينة فى الرأس تسمى "اليافوخ"؛ وهى ما تسمح بالتغير الذى يحدث فى عظام الرأس. بالرغم من ضرورة الحذر مع رأس الطفل عند التعامل معه، إلا أن العناية العادية لن تضره، فيمكنك غسل شعر المولود الصغير برفق وتصفيفه أيضاً برفق باستخدام فرشاة ناعمة. بمرور الوقت سوف تلتئم العظام وسوف يختفى "اليافوخ" تماماً بمرور الشهر الثامن .

[بابكر]

شوف ياخلودى عظم الشيطان بيوجعك من كترة الجرى والرحيح ذى مابتقول امى 00 بس اوعك تسألنى عن الرحيح ده00 لانى والله انا ذاتى ماعارفو00 وسلامة عضم شيطانك 00(( الكبر دخل ولاشنو)) 00اسأل الدكتوره 0يكون عندك روماتزما00 خد0( فولترين)ودفىء كرعينك يا بطل وسلامتك وماتشوف شر ان شاء الله وشرك مقسم فوق الدقشم0

[خالد هاشم علي]

[COLOR=[SIZE=5]Blue]الأخوة الكرام ازيكم وكيفنكم... ياسر ابو ريلان... مزوني العسل... سوار الياسمين بتاعة الشمارات.. الآدمن النجار...سالي الغالية...العزيز معتز محمد طه... ابو الكل ابو الزعيم ...ست الكل غفران .. وعمنا ابو نزار... ليكم التحية كلكم وبدون فرز وااحد واحد ... وبشكر الآدمن الحبوبة علي التوضيحات دي لكن بيني وبينكم كده تفسير عضمة الشيطان ده شكلو كده قاطعو من راسو سااااااااااااااي وقال احسن اتفسح بالناس ديل لكن تفسير النافوخ مية المية وماعندنا عليهو اي اعتراض عشان كده يابكور شوف لينا حاجة تانية لي عضمة الشيطان دي وأسال لينا الحبوبات في السودان... ياحبوبة... مشكورين مرة تانية علي المرور ... واقتراحك جميل ياابو ريلان وبثني عليهو بس مين يقنع الإدارة؟؟؟؟؟؟؟؟؟؟]

[rasheed]

قالووووووا 000 لما ربنا سبحانه وتعالى خلق الإنسان هيئة في البداية وقبل نفخ الروح 00 جاء إبليس إبن الكلب والشمار كاتلو كتل 00 ودخل ليك جوه *** النادم*** ده وحام وصال وجال جواهو ، ولقى فراغات كتيرة ( محل محتويات الراس فوق ،، ومحل الكرش وكده 00 ولمان مشى للكرعين وماشي على القدم كده لقى الموضوع مختلف شوية فقام ركلس = تكل = إستراح هناك شوية من دون باقي الجسم ليييييييييييييييييه ؟؟؟؟ لأنو لقى المحلة مليانة تمام ،، فركلستو دي ولا قعادوا ده بقى محل تسمية لهذه المنطقة من الجسم 00 وبس والله أعلم 00 وزي ما عارفين في حللانا أو قرانا يجي واحد يقعد في بكان بعيد كده يقوموا يسموا المنطقة بأسمو ((( شتان بينهم ))) 0 أهه كيف يا مولم آدمن بترضى بي معلم ولا صبى معاك في المنجرة وأنا بقترح تكون وراء أبو ظريفة الزمان يعني مع الحداحيد بين العياشة وأبو ظريفة 0 ;) ;) (( النادم : كلمة تستعمل عند أهلنا غرباً لإبن آدم ))

[خالد هاشم علي]

[SIZE=5][COLOR=Blue]هههههههههههههههههههههههههههه والله حلوة منك يالرشيد ومش تنفع تكون مساعد للمعلم لا ده انت كمان معلم زي بكور... لكن قلت الشي ده مركلس هنا قبلو... كان كده ماتعب معانا ...معناها اي ضربة في الحتة دي حتكون جاتو في نص راسو... من هنا اناشد جميع الاعضاء انهم يشوفوا اقرب مرق سرير من النوع الماااااااااااااااااكن ويدو عضمة الشيطان دي كم دقشة كده عشان ذاتو نطير ليهو النوم ده من عيونو....هههههههههههههههههه.... ياصالح ابو شوارب ولا ابو المهتدي ولا عمك تنقو ماتلحقونا من بكري والرشيد ديل

[ابراهيم]

يا ابو الخلد مشتاقين والله
وعوافي لي عضم الشيطان حقك ...
لكن تعرف الوجع دة ظهر لي حكمة عشان نعرف سر التسمية
وبالمرة نعرف الجماعة تربية الحبوبات وعجايز المنتدى
وحسي شايف الآدمن وعمدة والرشيد
اها دلوقت عرفنا اسرار للتسمية لكن يا الرشيد الشيطان دة ما اختار الا الحتة ديل ليه؟
مع انو المواقع الاستراتيجية كتيرة

[خالد هاشم علي]

برهوتة ياغالي........... وينك ياحبيب ومشتاقين رسمي وشعبي وبي زيارتك بيتنا نور.... وقلت لي في مواقع استراتيجية كتيييييييييييييرة

[عماد الصادق]

والله يا الرشيد إجابتك بتاعة مساطيل..
وزي ما قال ليك ابراهيم هناك أماكن أكثر استراتيجية..
والشيطان الغبيان ده مالقي إلا هناااااك...
شوف ليك واحدة تانية...

بعدين ماغريبة إنو الألم اللي جه لأخونا أبوهاشم في العضمين مع بعض!!!!
يعني وجع العضمين مع بعض ده صدفة!!!!
أفتونا ياناس الإختساس....

تخيل من اليوم داااااك ياأبوهاشم وأنا بقنع في المدام بحكاية الكوارع ...
وكل مرة تعاين لي ... ووتجس ببض الحرارة ..
ياربي تكون ماسمعت بي الكوارع قبل كده؟؟؟
ولا الجماعة ديل لقو الضل الباااارد ده ونسو الكتاحة...
عجبي ....
بس المحاولات جارية .. والنقة إن شاء الله تجيب نتيجة!!!

[عماد الصادق]

عدم المراجعة الإملائية مرات بدخلنا في أماكن ضيقة..
تصحيح في الفقرة الثالثة

تجس نبض الحرارة ... بدل ببض الحرارة!!!
عادي..

[خالد هاشم علي]

إيه رأيكم لحدي هسة مالقيت زول يفشني في موضوع عضم الشيطان ده والظاهر الناس اقتنعت بي النجرة بتاعت الآدمن بخصوص تعريفه لي عضم الشيطان...
أها انا فتحت الموضوع تاني وياريت القي لي حبوبة قديمة تفشني في موضوع العضمة دي

[صلاح ودالطاهر]

احبتي لكم التحية.... امبارح صحيت من النوم وبدون مناسبة كده لقيت ليك عضم الشيطان بتاع كرعيني الاتنين موجعني وجع شديد لمن غالبني المشي قمت قعدت اتشكي للولية ام هاشم ... وبعد ماإنتهيت من التشكي والجرسة قعدت أسال في نفسي .... كيف يعني أقول عضم الشيطان ؟؟؟ وليه سموها عضم الشيطان؟؟؟؟ وهل الشيطان يملك جزء من أجزاء جسمنا عشان نقول الحتة دي حقت الشيطان؟؟؟( بالمناسبة للذين لا يعرفون عضمة الشيطان فهي العظمة التي توجد في ظاهر القدم وباطنها وهي المفصل الذي يربط بين الساق وأسفل القدم) ... سؤالي ليه أهلنا في السودان سموهو عضم الشيطان ؟؟؟ أفيدونا

يود هاشم دي الكبر ساي الله يديك العافية وبان ليك الامان معارفين نمسك انت ذي القرموط ياراجل ياعجوز قال عضم الشيطان قال................................

[همسة شوق]

سلامتك ياابو هاشم
كدة سيبنا من التسمية وخلينا فى الالم دة جاك من وين
شكلك كدة كنت فى ( السلمى )