ابناء المغتربين

[امير عبدالباقي]

الاخوه الاحبه الاعضاء
شدني لكتابه هذا الموضوع اخونا عماد الصادق في رده لي في موضوع التساكن وتكلم عن ابناء المغتربين
فعلا جميعا ممكن ان نلاحظ وعند زيارتك الي احد بيوت المغتربين في دول الاغتراب تجد ابناءهم يتصرفون مع الضيوف بطريقه غير مهذبه وان يقوم الطفل بضرب الضيف وسبه امام ابيه والاب لايقول له شي ويمكن اذا قام الاب برد فعل اتجاه ابنه يقوم الابن بسب ابيه او ضربه ....
ماهي الاسباب التي ادت الي ذلك هل هي
1/ عدم رعايه الاب لابنائه وانشغاله بالعمل
2/ هل الحبسه وعدم الخروج واحتكاكم بالناس جعلتهم متوحشين
3/ هل هي من عدم توجيههم
4/ هل مشاهده القنوات التلفزيونيه صارت هي الموجه لهم
هنالك اسئله كثيره تحتاج الي اجابه وماهو الحل
لكم كل الود والمحبه

[saly]

الاخ امير
ازيك يا مان وكيف حالك
اول شي يمكن عن تجربه انا بتكلم في الموضع ده
امسك ليك ولدي اقرب مثال
اول شي كان اتلفت ساي يضربك بي اي شئ قدامو صعب شديد
ومجنن اي زول كان طلعنا السوق يمسك ده ويفك ده
كان في البيت لو بس سهيت ونمت اخر مره لقيت 8 شباشب جنب راسي ومعاها كبايه
ده كلو فقلني بيهو
يعني باختصار ما مخلي زول ولا حد في حالو
حتي في الحضانه ما حصل ما حصل ما حصل فت يوم اجيبو ما لقيتو خاتنو في السرير ولا رافعنو في الكورنه او مقعدنو براهو
ومما ادخل اي بت تقول لي خالتو خالتو ولدك عضاني ولدك ضربني
غلبته معاهو حيله

بس يرجع لي شنو
يمكن اول سبب هو صغير لكن ما معاناها ولد اي مخترب كده
لانو في السودان في الاولاد الشياطين

اما الرعايه
الشغل برضو ما سبب يخلي الواحد انو ما يهتم باولادو اصلو الواحد عندو شنو غير عيلتو في المقام الاول

الحبسه
لا حبسه ولا شي انا عاده اي فرصه نلقاها دائما بنطلع فيها لو زياره او مكان العاب
يعني ده ما سبب

القنوات التلفزيزنيه
هو يمكن صغير لسه ما يقدر يستوعب حاجات زي من عنف وغيرو

اما الاجابه
فكدي النشوف البعدي بقول شنو

[عماد الصادق]

الأخ أمير.. لك التحية وأنت تطرح بلسان حالنا مايؤرقنا..
وردأ على الأخت سالي
وثقافتنا التربوية مرجعنا لها ليس العلم الحديث...
ولكن مرجعنا آباؤنا... وأجدادنا .. وأساتذتنا الأجلاء
فكل كان غدوة..
أنا بعتقد التربية بتبدأ منذ خروج الطفل من بطن أمه..
سبحان الله .. له في خلقه شؤون ..
نحن نعلم أن من السنة أن يؤذن للطفل في أذنه مع خروجه للدنيا..
وهذا ليس من فراغ .. لابد أن هناك حكمة وراء ذلك..
قل مانفهم من ذلك أن الطفل بيكون واعي من أول لحظات حياته..

يعني أنا بشوف في موضوع الأخت سالي لازم يكون في خلل ما
في الفترة التي سبقت تصرف إبنك..
أنا بعتقد الطفل الذي لا يسمع كلام والديه أو يكون عداوني
بطريقة ملفته للنظر بسبب التربية الغير سليمة
ولنا عودة فالموضوع شااااائك

[saly]

اوردأ على الأخت سالي
يعني أنا بشوف في موضوع الأخت سالي لازم يكون في خلل ما
في الفترة التي سبقت تصرف إبنك..
أنا بعتقد الطفل الذي لا يسمع كلام والديه أو يكون عداوني
بطريقة ملفته للنظر بسبب التربية الغير سليمة
ولنا عودة فالموضوع شااااائك

علي فكره هو يادوب عمرو سنتين
واعتقد مساله العمر كمان ليها وقفه هنا

[مزوني]

والله الموضوع دا يا جماعه فعلا شائك جدا جدا

والمشكلات على دي كتيييييييييييييييييييييييييييييره

والتربيه انا شايف ليها دور أكبر في المحافظه على هدوء

الطفل وبعدين بالجد كدا هي مشكله كبيره وطبعا دي بكونوا أدرى بيها المغتربين المتزوجين

وربنا يكون في عون الجميع انشاءالله

[امير عبدالباقي]

الاخت سالي
مشكوره علي المداخله الجميله هي فعلا دي مشكله الاطفال المولودين في دول الاغتراب واعتقد ليس من التربيه ، اعتقد من التوجيهات الكثيره علي الاطفال التي يتلقاها من الوالدين وفي كثير من الاوقات تكون مضاربه ومثال علي ذلك
اجلس ياولد ، لاتعمل كده مما يودي الي تضارب افكاره ولايعلم ماهو الصحيح ، من المفترض يعلمون الاطفال ماهو الصح من الخطا افضل من ماتعمل كده واجلس ياولد وضربه،، اشياء كثيره ....
الاخ الفاضل عماد
لك الف تحيه ايها الحبيب انت عارف ياعماد زي ماقلت في الاول التوجيهات المضاربه هي البتخلي الطفل ماعارف الصاح من الخطا وزمان كان الشارع بساعد الاباء في تعليم الاطفال الصاح من الخطا والاعمام والاجداد يعني مابقولو ليك ماتعمل كده بس لكن بوجهوك للصحيح وطريقه عمله بطريقه افضل
الله يصلح الاعمال

[خالد هاشم علي]

التحية للجميع ..أمير الغالي ...سالي.. عمدة... مزوني .. وكل المشاركين... كيفنكم ياناس... انا في رأئي انو الحكاية كلها هو التدليل والدلع والتنظير والافكار الجديدة والتربية الحديثة ...هم أولاد المغتربين مزودنها حبتين لانهم ينقصهم الإحتكاك مع الاصحاب في السن المشابهة أو المتقاربة وبالمناسبة دي حاجة مهمة شديد والواحد بتعلم كتير من الإحتكاك سواء سلباً او إيجابا لكن في إعتقادي الجانب الإيجابي يغلب علي السلبي...بعدين ياخونا ليه الطفل مايضربوهو ؟؟؟ بالعكس الطفل ده عقله خطير جدا جدا وبحاول امتحن الناس بي التصرفات ويجرب الحكاية لو عدت بدون عقاب تاني علي طول حيواصل فيها... زمان مابتذكر واحد قعدنا ورانا الصاح من الغلط لكن كنا بنشوف التصرف من أخوك الاكبر منك ولا من اصحابك ولا من اي واحد المهم كنا لمن نعمل الغلط بنكون عارفين انو ده غلط وحيكون في عقاب ده طبعا قبل المدرسة بشوية وأثناء الابتدائية ... بعدين ياخونا زمان كنا بنلقي التربية في كل مكان يعني اخوك يربيك ابوك يربيك عمك خالك خالتك ود جيرانكم جاركم سيد الدكان سيد اللبن سيد العدة يعني اي زول أكبر منك يقدر يوجهك وكان قليت أدبك يديك علقة بت كلب لكن شوف هسة الزمن ده ياخي ماتقدر توجه ولد أخوك عشان إحتمال والدتة ماترضي ولا توجه ولد اختك عشان برضه إحتمال والده مايرضي... يعني الزمن إتغير شديد ... خلاصة القول أنو المشكلة من الكبار نفسهم والحل بي ايديهم... ماتدلعوا الاولاد زيادة عن اللازم خلوهو يعرف الغلط والصاح ولو غلط لااااااااااااااااااااااازم يكون في عقاب ( العقاب اشكاله كتيييييييييييرة) وفي حاجة مهمة وبقت عادي في اليومين دي وهي انو تلقي الولد الصغير قاعد في نص الناس الكبار ويسمع في كلام ده ويقاطع ده وحركات زي دي ... وده غلط كبير الولد يقعد مع الناس القدرو وبس ... والله ياجماعة زمان كان عندنا صالون لاستقبال الضيف وكان قاعدين فيهو أخواني الكبار ..أقسم بجلال الله انا ماأذكر إني دخلتو في يوم من الايام لانو كان محظور علينا تماما وقالوا لينا الصالون ده بدخلوهو بي شهادة الثانوي العالي... يعني كنا بنجيب لي أخواني الشاي ولا الموية وتدق الباب وانت بره ويجي واحد منهم يستلم منك وانت ترجع... اتغرست فينا معاني حلوة وإحترام للكبير يفوق التصور ... عندي شقيقي الأكبر ]( دفع الله) وهو كبير بيتنا .. تصدقوا انو حتي هذة اللحظة لو كنت انا ولا اي واحد من اخواني التانيين راقدين ولا ماخدين راحتنا وجاء (دفع الله) ده معدي طوالي كلنا نقوم نقعد علي حيلنا ونتصلح مع إنو انا واخواني بقينا كبار وأخواني التانيين اولادهم في الجامعات لكن برضه مانسينا انو دفع الله ده هو الكبير .. اها نحن نقعد ونتصلح وتلقي اولاد دفع الله ماشاغلين بيهو الشغلة يلعبوا وينططوا وشغب شديد ويستغربوا من الاحترام الزائد ده ....يعني المشكلة في الكبار ولو ماصلحنا الغلط ده حيجي زمن الولد يدي ابوهو علقة عاااااادي.... ربنا يسترنا ومايحضرنا الزمن ده

[امير عبدالباقي]

[/b][b]الاخ مزوني مشكور علي المداخله
الاخ خالد فعلا الدنيا تغيرت وزي ماقلت ويلك اذا ضربت ود اختك او وداخوك اذا ماتكلمو معاك امو او ابوه تجد الوجوه تغيرت والله الحال تغير كتير ربنا يستر من القادم

[عماد الصادق]

الأخت سالي..
كما ذكرت فإن الطفل بيكون قابل للتقبل منذ الثواني الأولى في حياته..
أضيف على قول أمير بأن تضارب الأفكار وحبسة الشقة دي هي ذاتها تربية في حد ذاتها..
والمشكلة أعتقد بقت عامة مش خاصة بالمغتربون.. لأن الأب والعم والخال
وودالجيران وسيد اللبن على قول خالد هاشم بقو ممنوعين من الصرف!!!

وتعقيباً ثانياً
يمكن أن ننظر للموضوع من ناحية التطور الذي نعايشه.. وأساليب التربية الحديثة
منها يقول ليك الطفل تخليهو على راحتو.. ماتضربو.. وأوعك تنهرو !!! وهلمجرا
يبقى العيب في تربيتنا سوا أكان ذلك داخل السودان أو خارجه..
يعني هسه معقول الواحد ماخد ليهو تكية كده.. وأبوه جه داخل ..
هل حيكون على نفس وضعه؟ أكيد حينط من غير ما يشعر ويقعد.. ويتأدب..
لكن الآن اختلط الحابل بالنابل .. وماتعرف الكبير منو!!!!
اختلاط الشفع بالناس الكبار في مجالسهم ومحاورتهم ومجادلتهم
فيها عدم تهذيب..
زماااان الواحد كان لمن يلاعب طفل عشان يسرق منه ابتسامة بريئة..
لكن هسه تحاول تلاعب ليك شافع .. شوف تاني اللي يفكك..
ده لو مافكاك بفردة جزمة ولا تف فيك..
ولنا عودة إذا شاء الكريم...

[عماد الصادق]

ملحق..
طبعاً ياجماعة الواحد بيتكلم عن الموضوع بصفة عامة
ولا ننتقص من أن هناك الكثير الكثير اللي يفرح القلب
ولسه الدنيا بخيرها..

[بابكر]

[[ أنا بعتقد الطفل الذي لا يسمع كلام والديه أو يكون عداوني
بطريقة ملفته للنظر بسبب التربية الغير سليمة
ياجماعه الطفل ده 00ذى العجينه 00 تشكله ذى ما انت عاوز00 تعلمه فى الاول كيف يحترمك ثم كيف يحترم الآخرين واذا لم يكن كذلك فلاتنتظر منه ان ينفعك فى المستقبل
والطفل الذى يتعود ان يمد يده ليضرب ابوه مهما كان صغيرا ليس فيه خيرا00 ولن يكون فيه ,,فى المستقبل
والتربيه مش لعب انها غرس صفات منذ نعومة الاظفار
والطفل امانه
يجب ان نؤدبه
ونعلمه الاخلاق 00والقيم الفاضله
ونعلمه احترام الآخرين
ومن امن العقوبه000ساء الادب
ومن ساء الادب 00لن ينفع احدا
انتبهوا
انتبهوا ]