ناس الدنمارك ....ياعوض دكام

[saly]

اسماعيل رجل (بتاع شمارات ذي ما بقولو) دخل فوجد عم الطيب مسترخياً في (عنقريبه) الاثيري فباغتة

بالسؤال..:

اسماعيل سمعت بالكلام ده..

_كلام شنو ياراجل ..كدي قول بسم الله ...

* الجماعه الماعرف جنسم شنو ديل ..

_ جماعة منو ومالهم عملوا شنو..

* قالوا رسموا صور كاريكاتير للرسول ..صلي الله عليه وسلم

_ اعوز بالله شوف الكفار ديل والله براهم جنوا في نفسهم والله الله ينزل عليهم زلزال يدمرهم ليك دمار..

يدخل في هذه اللحظة عمر ابن حاج اسماعيل وهو يحمل صحيفة ...

والله ياعم الطيب انتوا بس اقعدوا راجين الله يدكهم دكا وكلام ناس زمان ده .. الحاجات دي انتهت زمان .. زمن المعجزات

ولي ياحجاج..

عم الطيب: لا حول الله ياولد انت كفرت ولا شنو ؟ ولا دي حركاتكم بتاعة الشيوعيين ديل ..

عمر : شيوعيين شنو ياعم الطيب .. انتوا فالحين فينا بس

اسماعيل: امشي بالله من هنا قبل ما الله ينزل فينا صاقعة بي سبب كلامك ده...

قوم يالطيب ارح الجامع الجمعة خلاص وكتا جا .. نشوف الامام حيقول شنو ؟

يتوضي اسماعيل ويخرجان ..

الامام في المسجد يشجب ويدين ويستنكر ما فعلته الدنمارك وينهاهم عن اكل جبنة بوك وقشطة امك وكافة السلع

الدنماركية ويقول لهم ان من يأكل هذه المنتجات يدخل في دائرة الحراااااام ومن يشجع منتخب الدنمارك في كاس العالم

القادم يكون قد شجع الكفر والفجور ..

ويخرج المصلون في تظاهرة بعد صلاة الجمعة يشجبون ويدينون ويستنكرون ويرددون هتافات ... خيبر خيبر يايهود

جيش محمد سوف يعود

وبعد قليل يقول اسماعيل للطيب...:

انت يا الطيب كورة ساحل العاج ونيجيريا قربت..؟

الطيب : والله خلاص بعد ده التعليق بكون بدا ارح سريع نلحق

اسماعيل: لكن الليله نيجيريا بتغلب ساحل العاج قالوا جاي جاي اوكوشا لاعب..

الطيب :يازول اوكوشا شنو والله دروغبا حلف بالطلاق الا يشيل الكاس

اسماعيل : ارح سمح نحضرها عند ناس عباس عندهم اي ار تي بي صوت عصام الشوالي

و... خيبر خيبر يايهود جيش محمد بداء يعود

[بابكر]

و... خيبر خيبر يايهود جيش محمد بداء يعود
شكرا لك سالى الرائعه وفعلا كلام ياعوض دكام

[admin]

لذيذة القصة .. وللاسف دي الحقيقة

[al zeer]

ياهههههههههههههههه
بتين تتغير الحقيقه الحقيقه المرة ......


لا يغير الله ما بقوم الا ان نغير ما بانفسهم

ربنا اعينا على مافية الخير
الله اديك العافيه سالى

[waheeb]

حلوه يا سالي ..
(اصبحنا نشجب وندين ثم نشجب ثم ندين ، كل الكره الارضيه تقدمت للامام ونحن نشجب وندين)

[madaniboy]

خخخخخخخخخخخخ
حلووه يا سالي بس الحمدلله انه منختب الدنمارك وعلى ما اعتقد ما مشترك في كاس العالم الجي المره دي ولله الحمد
ويسلموو يا سالي
فاقد

[مزوني]

هه

والله للأسف انها قمة في المسخره

والأقبح من دا كلو انو فعلا هي دي الحقيقه

وربنا يهدي الجميع


تسلمي يا الغاليه سالي وربنا يديك الصحه والعافيه