دجاجي يلقط الحب ويجري وهو فرحان

[ابراهيم]

زماااااااااااااااان كان الواحد بردد وبكل براءة
(دجاجي يلقط الحب ويجري وهو فرحان)
لكن لما كبرنا شوية وكبر معانا دجاجنا
اصبح حلم دجاجي الحب (بفتح الحاء) يفتش وهو حزنان
وحلمي الحب (بضم الحاء) طرطشني وبقيت فزعان
لا أنا ولا دجاجي بقينا الاتنين ما لامين في الحب
حالة بطالة
زمان دجاجي كان اغنيته المفضلة (في الليلة ديك)
لكن مرت الايام والغنية اتحولت لي .. !! عجب
يعني نحن الاتنين بقينا رايحين لا الدجاجة لقت الديك
لا انا لميت في مريم الشجاعة ... وخلينا زيدان حايم في النص
يا جماعة دي حالة عادية جداً بمر بيها اي زول عشان كدة خلوني اهترش شوية وماف زول يحجزني
يا ريت كمان تجو تفتشو معاي الماضي ... اصلو يا جماعة الواحد لما يفتش الماضى بلقى حاجات جميلة انا زمان بتذكر عمري كان (خمسة سنين) اها في الليل خالص شالني ليك حمار النوم وقال لي ارح معاي مرقنا باريتو ليك لمن وصلنا بيت الجيران ولما وصلنا هناك الحمار فات خلاني اقاسي مرارة الذكريات .. اول مرة يشيلني حمار النوم بتذكر كنت شايل معاي مسدس تبخ اها لقتني مرة الجيران حايم بمسدسي في الحوش والدهشة الياها شبكتني ليك يا ولد قول بسم الله وعلقت وانا ما قصرت سمعتها ليها سورة الحمدو كاااااااملة .. مرة الجيران الخلعة الدخلت فيها لغاية حسي ما مرقت .. اها نرجع لموضوع الدجاجة عشان ما تروحو ولا تقولو طلعنا من الشبكة.. طبعاً بتتذكرو "الدجاجة الصغيرة الحمراء" .. ومقولتها الشهيرة "الفولي فولي زرعته وحدي وحصدته وحدي وسآكله وحدي" طبعاً اصحاب النفوس الضعيفة بقولو الجدادة دي بخيلة على وزن زهرة بخيلة لكن الجدادة دي ما بخيلة يا جماعة لكن بس الايدولويجة بتاعتها كانت ما بتظهر المعاني المقصودة من مقولتها الشهيرة .. فكانت بتقدم نصايح في قالب قهري لانو سياسة اللين مع الارانب ما بتنفع .. وهنا تتجلى شهرة تلك الدجاجة ويا ريت لو كل الجداد استدل بحنكة وذكاء وسياسة الدجاجة الصغيرة الحمراء ما كان لحقو عملوهم كنتاكي أنا متأكد فكرة الجدادة الصغيرة الحمراء دي لو دخلوها في نظم الإدارة والحكم ولو الناس اغتدت بالفكرة كان السودان بقى اكبر دولة راسمالية اشتراكية قومية ديمقراطية شعبية عظمى .. وكان مافي اجعص ارنب يقدر يقول حاجة .. المهم كدى حسي خلونا من الوهمات الجغرافية دي لأنو الجغرافية دي واسعة هضاب وكناتير وخرايط وجبال ومنعطفات حسي كان لاقانا مضيق ساي الواحد حسابو بكون اتنشط .. وعلى الطلاق حسابك كان لحق اتنشط تاني الآدمن الكبير ما يحلك .. يخلوك تقعد تغني لمتين يلازمك في هواك مر الشجن .. ولمتين لمتين على قول عثمان حسين مد الله في ايامه طبعاً الراجل دة يا جماعة انا لمن اسمعو بتمسكني ملاريا شجونية بحتة وبشعر بي قشعريرة في قلبي والتهابات في بيوت الشوق والحنين بالذات لمن يقول الحسرة ما بتنفع وما بجدى العتاب وفي حالة زي الواحد لو ادوه حقنة حنانوفيل او وصفة بتصحي المشاعر بلحق انعاش ناس عبدو طوالي عشان باقى نحن حساسين وبنخشى على نفسنا من غدر الليالي ..
نيصحة ليكم يا اخواني اسمعو كلام الدجاجة الصغيرة الحمراء وخلو عندكم بعد نظر زي الزرقاء .. عشان ما تبقى علينا البقت على الارانب ..

ما يجي واحد يقول الارانب حصل ليها شنو ...

العايز يعرف يراجع كتاب "مريم الشجاعة"
رقم الصفحة موجود في الكتاب

[aborawan]

يا هيمة انا ما قلتا ليك تاني ماااا ......................................... ؟
الواحد يغفل منك كده تجري جري عشان تلفها :):)

تحياتي

[أبوريلان]

يابرهوته سلاماااات من الملاريا ، كتاب مريم الشجاعة صفحة كم قلت ؟؟؟؟ تعرف يابرهوته دجاجى يلقط الحبة فى السعودية مابلقط ولا حبة الدجاجة ناس كنتاكى بدخلوها الفرن من عمر يوم ، لكن الصفحة البتتكلم عنها دى فى كتاب مريم الشجاعة الجنب أندرو والأسد ولا الحطاب الطماع .

[admin]

يا ابراهومة شنو ياخوى الحكاية .. ما سمعتا بانفلونزا الطيور .. دجاجي دي ما طيور انتا قايل شنو .. خليك في الارانب ومولوخية الارانب .. ليك وحشه يامان .. ان شاءالله بكرة يكون في كسوف للشمس عشان الزول يشوفك ههههههههههههههه ..ما عارف بتخاف تشتغل بالنهار مالك (علما بانو الجداد بنوم بالليل)

[نيازى كشك]

ابراهيم اللة يعطيك العافية
وماتبقى تفكر كتبر فى الماضى والتاريخ
انت زكرتنى بحجات قديمة من سنة حفرو البحر
نا س دجاجى يلقط الحبة
وكويس عرفتنا بالحاصل000000000000
0000000000000000000000000000000
بس هناك قصة الكديسة
كان عندى قطة صغيرة سميتها سميرة
ياريت نعرف لية سماها سميرة

ولك الود حاول تنوم بدرى

[عزيز عيسى]

زمان دجاجي كان اغنيته المفضلة (في الليلة ديك)
لكن مرت الايام والغنية اتحولت لي .. !! عجب
يعني نحن الاتنين بقينا رايحين لا الدجاجة لقت الديك
لا انا لميت في مريم الشجاعة ... وخلينا زيدان حايم في النص ]


ابراهيم يا عجيب،

والله يا ابراهيم انت وودالمأذون ليكم طعم ونكهة خاصة لما تدخلوا علي المنتدى.. افتقدناكم كثير..

كويس انو زيدان نفسو في الديك.. جدادتك الرايحة وبتفتش علي الديك تلقاها هسع حايمة في الفريق تكاكي من ضل لي ضل..
مريم الشجاعة دي انت بدور عليها لي شنو؟.. طالبها قريشات..

زمان لما كنا صغار الواحد فينا لما يقولوا ليه أمشي أقبض الجداد بنكون فرحانين شديد ونجري نحوش في الجداد..
ولما الواحد يقبض الجدادة أو الديك بيفتكر نفسه خلاص الود بطل وممكن يقبض أسد..



ولما وصلنا هناك الحمار فات خلاني اقاسي مرارة الذكريات ..
دا حمار ما عندو ذوق ولا حتى بيعرف الأصول.. ولا الظاهر شاف ليه جزرة وخلاك..



نيصحة ليكم يا اخواني اسمعو كلام الدجاجة الصغيرة الحمراء وخلو عندكم بعد نظر زي الزرقاء ..
النصيحة غالية وكلام الجدادة بنسمعو.. لكن ما تخاف علينا النظر حديد..

احتمال تتذكر الابيات دي لكن ما أظن تتذكر اللحن بتاعها..

برز الثعلــب يومــا في ثيــاب الواعظيــنا
ومشى في الارض يخطو ويسب الماكرينا

والثعلب بتاعي دا لو جاء ماري ولاقى جدادتك دي في طريقو ما بيحتاج يعملها كنتاكي.. بيمزمز بيها..

ولك كل الود،

عزيز

[مزوني]

ههههههههههههههههههههههه

والله يا أبو خليل كلام عجيييييييييييييييييب

احنا طبعا ناس أبو ريلان ناس ماضينا دجاج كنتاكي وكدا

لكن برضو هبشنا كتب شفعنا من أخوانا الصغار على اولاد أهلي على اولاد الجيران

وفعلا حاجه روعه

تسلم حبيبنا ابراهومه وربنا يخليك لينا يا غالي ويديك الصحه والعافيه

[عماد الصادق]

ابراهومة يا غالي
ابراهومة مشتاقين ليك ولأهاااااتك ..
وآهاتك دي كل كتب الجبر والهندسة وحساب المثلثات
ولا التفاضل ولا التكامل بيحلوها..
دي ميتافيزيقيا عديل...
وباين عليك لا نسيت .. ولا ناوي تنسى..
ولا عاوز تنسى..
وبطريقتك دي حتكتكل ليك زول..
أقول ليك شنو .. والله الواحد على حسب فهمو
ما عندو غير ... عبارة ...... أنسى يا عثمان .......
بعيدين حمار الجن ده اللي وداك الجيران ..
وداك بخشم الباب .. ولا بالحيطة ؟؟
ونتوقع أنت تجينا الحالة والشعور باللا محال ..
ونقدر نعقب ليك على هذه الشجونيات..
وأصلو حالنا هذه الإيام بقى يصعب على الكافر..
لا عارفين نمشي ولا نقيف ولا نقعد..
ولا نعمل نايمين..
تصدق مرة من المرات
وفي الصباح الباكر
القومة البدري
والحمام والدخول في الهدوم بلا انتظام
ورحت المكتب في المواعيد بالتمام..
لمن وصلت المكتب لاقاني ليك العامل الهندي
ايش في..
شنو ايش في .. ما في نفر يجي اليوم؟؟
ايش هذا اليوم ما في شغل !!!
مافي شغل ؟؟؟؟
أيوه اليوم جمعة..

وعااااادي

[ابراهيم]

يا هيمة انا ما قلتا ليك تاني ماااا ......................................... ؟
الواحد يغفل منك كده تجري جري عشان تلفها

يا ابو النسب .. براحة علي
اصلو ما بتعذروا الزول لو عبر عن طفولة متأخرة
او حصل ليه تنويم ميغناطيسي
بس طوالي جاري لسعة الخيال:D

[ابراهيم]

يابرهوته سلاماااات من الملاريا ، كتاب مريم الشجاعة صفحة كم قلت ؟؟؟؟ تعرف يابرهوته دجاجى يلقط الحبة فى السعودية مابلقط ولا حبة الدجاجة ناس كنتاكى بدخلوها الفرن من عمر يوم ، لكن الصفحة البتتكلم عنها دى فى كتاب مريم الشجاعة الجنب أندرو والأسد ولا الحطاب الطماع .

ابو ريلان يا حاج متذكر الله يسلمك اصلاً الحمى جات خفيفة
نحن جدادنا دة عليك الله من ناحية جغرافية كدا ... ما كنتاكي؟
ياخ خط الاستواء دة .. نحن ذاتنا بقينا فيهو كنتاكي
بعدين متذكر ناس الحطاب الطماع
يمين انت شكلك كنت يا استاذ مطالعة
يا استاذ تاريخ
تحياتي يا لذيذ

[ابراهيم]

يا ابراهومة شنو ياخوى الحكاية .. ما سمعتا بانفلونزا الطيور .. دجاجي دي ما طيور انتا قايل شنو .. خليك في الارانب ومولوخية الارانب .. ليك وحشه يامان .. ان شاءالله بكرة يكون في كسوف للشمس عشان الزول يشوفك ههههههههههههههه ..ما عارف بتخاف تشتغل بالنهار مالك (علما بانو الجداد بنوم بالليل)

الإدارة سخسياً بي جاي
لا لا دة حدث تاريخي مفروض نوثقو
الزمن داك ما كان في انفلونزا لا طيور ولا بشرية كان مغالطني أسأل ابو ريلان بعدين انفلونزا الطيور دة بجي للطيور المتحنكشة أما جدادنا .. كان خلاص الجدادة متحنكشة بجيها سمير:D
يا آدمن باقى ليك الطلوع في الشمس مع ناس هريدي ديل بينفع:confused:
بعدين نحن ناس ظهريين والطيور على اشكالها بردلب:D

تحياتي

[ابراهيم]

مريم الشجاعة دي انت بدور عليها لي شنو؟.. طالبها قريشات..

عزيزنا الغالي سلام من القلب
مريم دي عشان شجاعة ما شفتها انغذت القطر كيف من الحريق
بعدين كانت ساكنة براها في حتة مقطوعية انا لو ادوني مليون دولار ما بسكن فيها
عشان كدى زولة زي تستحق الزول يفتشها:)



<TABLE style="FILTER: shadow(color=#666666, direction=225)">برز الثعلــب يومــا في ثيــاب الواعظيــنا
ومشى في الارض يخطو ويسب الماكرينا <TBODY></TBODY></TABLE>


والله ماشاء الله على الذاكرة الحديدية
طيب ايه رايك انا متذكر اللحن بتاع القصيدة دي بتاعة الثعلب
اخوك صعب في الالحان
لكن يكتبو ليك اللحن كيف

تحياتي

[ابراهيم]

ابراهيم اللة يعطيك العافية
وماتبقى تفكر كتبر فى الماضى والتاريخ
انت زكرتنى بحجات قديمة من سنة حفرو البحر
نا س دجاجى يلقط الحبة
وكويس عرفتنا بالحاصل000000000000
0000000000000000000000000000000
بس هناك قصة الكديسة
كان عندى قطة صغيرة سميتها سميرة
ياريت نعرف لية سماها سميرة
ولك الود حاول تنوم بدرى


كتاب الماضي والتاريخ بنرجع ليهو لكن في صفحات كدة بنفطها هههههههههه الصفحات الفيها "حاجات تانية حاميانا" لكن لازم نرجع
اما قصة الكديسة دي دقسونا بيها لكن بعد كبرنا انا غايتو عرفت الشاعر كان قاصد شنو
وهي كلمة "قطة" اريد بها "حاجة تانية" انا غايتو عارفها لأنو ما ممكن كديسة بتاكل فيران تاخد الغزل دة كلو ... وسماها سميرة لشيء في نفس الشاعر لم يفصح به ...
انا كان نمت بدري يا نيازي يا اخوي في حاجات كتيرة بتفوت علي وببقى ما مواكب:D

ابقى طيب

[ابراهيم]

ههههههههههههههههههههههه
احنا طبعا ناس أبو ريلان ناس ماضينا دجاج كنتاكي وكدا
لكن برضو هبشنا كتب شفعنا من أخوانا الصغار على اولاد أهلي على اولاد الجيران
وفعلا حاجه روعه


مزوني صادوه "الصياد الصغير"
انا كلو ما اشوفك بتذكر مقلبك الخرافي ..
انت يا صادوه من مواليد سنة كم بالظبط؟ انا من الليلة مسميك صادوه كان ترضى كان تزعل:)
انت دفعة ابو ريلان:eek: ولا شنو؟
تسلم يا غالي
وتحياتي

[ابراهيم]

دي ميتافيزيقيا عديل...

ازيك يا عمدة .. والله لو عارفين جيتك كان من زمان شتتنا الحب
بعدين مالك مودينا لي ما وراء الطبيعة .. خلينا في مطالعتنا دي
لانو لو هبشنا الانتولوجيات دي بنروح ساي وتاني كان فتشونا في Google (http://www.google.com/mgyhp.html)
ما يلقونا


وباين عليك لا نسيت .. ولا ناوي تنسى..
ولا عاوز تنسى..

اهلنا قالوا النسى قديمو تاه واصلاً الراح راح ... عشان كدة قلنا الواحد يتشعبط قبل عشان نحافظ على الباقي

بعيدين حمار الجن ده اللي وداك الجيران ..
وداك بخشم الباب .. ولا بالحيطة ؟؟
ونتوقع أنت تجينا الحالة والشعور باللا محال ..
في الليلة ديك طبعاً في حالة زي دي الواحد بكون بين صاحي ونايم "خاطف لونين"
لكن حسب الدراسات الطبوغرافية والمسح الجغرافي الذي اجري بعد الحادثة قالو الباب كان مقفول بي جنزير .. وما زالت الاجابة على هذا السؤال معلقة في رقبة الحمار:D


ونقدر نعقب ليك على هذه الشجونيات..
وأصلو حالنا هذه الإيام بقى يصعب على الكافر..
لا عارفين نمشي ولا نقيف ولا نقعد..
ولا نعمل نايمين..

والله جيتك طارنها ودايرنها يا عمدة
وحالتك دي صعبانة علينا والله بس ذكرتني بي قصة الولية الراجلها زهجان منها قال كان ماشي الشغل قام قال ليها: انا ماشي الشغل كان جيت لقيتك نايمة طلقانة وكان لقيتك قاعدة طلقانة وكان لقيتك نايمة طلقانة .. قالوا وكت جا من الشغل لقاها بتنطط:D


تصدق مرة من المرات
وفي الصباح الباكر
القومة البدري
والحمام والدخول في الهدوم بلا انتظام
ورحت المكتب في المواعيد بالتمام..
لمن وصلت المكتب لاقاني ليك العامل الهندي
ايش في..
شنو ايش في .. ما في نفر يجي اليوم؟؟
ايش هذا اليوم ما في شغل !!!
مافي شغل ؟؟؟؟
أيوه اليوم جمعة..
وعااااادي

هو شوف يا عمدة المنظر دي عادي وبحصل في ارقي المجتمعات
لكن كونها تجيك من هندي دي بس صعبة شوية:D
تخريمة:
الهندي دة هو علي العليه هندي وعايش في السعودية وشكلك كدة انت علمتو كلام سوداني
خليتوه مجهجه في النص جاب ليهو لغة كدة ما تعرف هيروغلوفية ولا سعوسوهندية ما عارف
ابقى طيب وانا راجيك

[عمار بيلي]

والله يا إبراهيم .. قدر ما فتشنا الماضي ده .. نلقي حاجات غريبه
خلاص .. مريم الشجاعه او ( الشداعه ) في روايه اكثر عمقاً .. محمود
الكذاب ..وحسن والبيض ( بيض ناصيه ) .. وحاجات تمحن .. !!
بس الغريبه كلها بتجي تبقي ونسه زيها زي هناي البايخ داك ياخ
(طه القرشي) اشهر شخصيه في كتاب المطالعه السودانيه .. بعد شرف والاسد طوالي .
:D :D :D
المهم .. ماقلت لي الحصل علي الارانب شنو ..؟ خاصه وإنو الطبعه نفدت من
السوق لأنو الظاهر محقق رقم اعلي مبيعات ..
تحياتي لك وانت تضفي علي المنتدي
نوعاً من الإتكاءه المرحه
ولا زلت في القلب ياِتلش ..
زي العين من الرمش ...
عانقتك العافيه

[الـــدباغ]

حقيقة يا إبراهيم ........... إنت عبقري والمضوع حجمو كبير جداً الرموز الفيهو ... بتشتكي للمستقبل المظلم وبتحكي تفاصيل حياه قديمة جميلة ... لو

الناس فعلا كانت دي البدايه لمشوار حياتهم ...... المفروض يكون التقدم والحضاره والرقي منبعها القديم ودجاجي الآن أصبحت التاريخ والماضي البعيد

ليه الناس بتبعد عن الماضي مع إنو أجمل شئ في حياة الفرد!

[محمد احمد]

أخي هيمه اولاً تحية مسائيه عطرة لاني طبعاً عارفين بدخل المنتدي في المساء
وبعدين يا أخي لفيت مكاتب بنغازي لعند راسي لفا عشان الاقي كتاب مريم الشجاعة
ومالقيت اي كتاب وين ياابراهيم الكتاب دا ويبدوو لي حتي في السودان مافي
ولو في حد عندو ابعتو لينا طوالي عشان نتمو القصة معاكم

أخي إبراهيم والله بجد ومن غير اي مجاملة ابداع وبساطه
ونحنا في اشد الحوجة لماضينا الحلوووووووووو دا
عشان نضحك ضحكة صافية من الاعماق وتسلم ياغالي

[ابراهيم]

محمود الكذاب ..وحسن والبيض ( بيض ناصيه ) .. وحاجات تمحن .. !!
بس الغريبه كلها بتجي تبقي ونسه زيها زي هناي البايخ داك ياخ
(طه القرشي) اشهر شخصيه في كتاب المطالعه السودانيه .. بعد شرف والاسد طوالي .
:D :D :D


يا عمار اسمو حسن والصفارة ... حسن والبيض دة إلا يكون عملوه جديد مع العولمة دي



المهم .. ماقلت لي الحصل علي الارانب شنو ..؟ خاصه وإنو الطبعه نفدت من
السوق لأنو الظاهر محقق رقم اعلي مبيعات ..




الارانب ما لئتلهاش مطرح يا حسرة ..
وما زالت تتوسل الدجاج .. وبالنسبة للنسخة بتاعة الكتاب مافي حل غير تفتش الكراتين القديمة

[ابراهيم]

حقيقة يا إبراهيم ........... إنت عبقري والمضوع حجمو كبير جداً الرموز الفيهو ... بتشتكي للمستقبل المظلم وبتحكي تفاصيل حياه قديمة جميلة ... لو

الناس فعلا كانت دي البدايه لمشوار حياتهم ...... المفروض يكون التقدم والحضاره والرقي منبعها القديم ودجاجي الآن أصبحت التاريخ والماضي البعيد

ليه الناس بتبعد عن الماضي مع إنو أجمل شئ في حياة الفرد!

عليك نور يا الدباغ ... انت هبشت العمق
ومؤكد تقديري لكلامك ..
الموضوع وما فيه مسألة مباديء ورؤى على أساسها ينشأ المجتمع
وببساطة شديدة ... الأمثلة كثيرة امامنا ولكن
من يعتبر؟

[ابراهيم]

أخي هيمه اولاً تحية مسائيه عطرة لاني طبعاً عارفين بدخل المنتدي في المساء
وبعدين يا أخي لفيت مكاتب بنغازي لعند راسي لفا عشان الاقي كتاب مريم الشجاعة
ومالقيت اي كتاب وين ياابراهيم الكتاب دا ويبدوو لي حتي في السودان مافي
ولو في حد عندو ابعتو لينا طوالي عشان نتمو القصة معاكم

أخي إبراهيم والله بجد ومن غير اي مجاملة ابداع وبساطه
ونحنا في اشد الحوجة لماضينا الحلوووووووووو دا
عشان نضحك ضحكة صافية من الاعماق وتسلم ياغالي

محمد احمد الغائب والحاضر شعلة في الخاطر

"وين ما طليت ليالي" كما قال بيلي
وين طلاتك ولمساتك
والله ليك شوق ..
البتاع دة لا في بنغازي ولا الدول المجاورة ما بتلقاه ما تتعب نفسك
انا حاطبع نسخة بس جهزو لي الطلبية والقروش
عشان نحدد الكمية ..

تحياتي يا رائع