لماذا حين نختلف .. نفترق؟؟!!

[Mr Lonely]

الاختلاف في الرأي لا يفســد للود قضيــة

ما نسبــة صحــة هذه المقولــة

100%

أم 80%

أم 50%

أم أقل أم أكثـــر؟؟

فإذا كــان الاختلاف.. يؤدي إلــى -- القطيعة -- أيــن يذهب الود؟؟
فــإذا كــان الاختلاف يحتــاج سنين حتى تعود المحبــة من جديد
فأين الفضيلة في حديث الرســول صلى الله عليه وآله وسلم
(أفضل الفضائل: أن تصل من قطعك، وتعطي من حرمك، وتعفو عمن ظلمك)
وإذا كــان الاختلاف يؤدي إلى -- الهجـــر -- فأين تذهب المحبة؟؟
وإذا كــان الاختلاف يؤدي إلى --الأحقــاد -- فأين تذهب المصداقية ؟؟
الاختلافات لا بد منها وهي جزء لا يتجزأ في هذه الحياه..
.فهي سنه من سنن الحياه. بحيث ان سببها هو الانسان .
ولا ننسى ان الانسان معرض للخطأ .
والخطأ هو الذي يسبب هذه الاختلافات .
وبالتالي فإنها من الطبيعة الانسانية.



*·~-.¸¸,.-~*أختلافنا مع أصدقاؤنا*·~-.¸¸,.-~*
أحدهم يسمي صديق عمره (( بصديــــق الندامـــة ))
فيقول(عندمــا تقاتل بالأفعـال لتثبت لصديقك أنك تحبـه بنظــافه وتقدم له
الدلائل عشرين عاماً،لكنــه يترك كل هذه الأعوام ليسمع في يوم رأيـــاً
مشككاً من الخـــارج يعتبره الفاصل
فيكمن حقك ان تنزع الورقة التي سجلت بها اسمه في حيــاتك
وترميهــا في سلة المهملات)
لِمَ نســرع أحيــانــا في التخلـّـص من أصدقــاء فعلوا الكثير من أجلنـــا
وارتكبوا خطأ صغير أنهينـــا فيــه كل شيء!! وتكــون كل الذكريـــات
مجــرد ورقـــة وترمى في سلة مهملات!!

[خالد هاشم علي]

الاخ يوسف...
لك التحية والاشواق وكل سنة وانت طيب وربنا يحقق امانيك....
الاختلاف يفسد للود قضية عند اشخاص كثيرين يعني في ناس لو اتناقشت معاهو ساي في موضوع وكان رايك مختلف عن رايه تلقاهو زعل وماراضي واحتمال يقاطعك وده نوع من الناس انا بعتبره جاهل وماعنده روح النقاش والاختلاف.
كمان في نوع من الناس زي ماقلت مستعد ينسي كل الحاجات الحلوة اللي كانت بتربط بين الناس لاتفة الاسباب ويمسك في حاجة صغيرة ماتستاهل انو الناس تخسر بعضها عشانها.. والحكاية دي حصلت لي قبل كده مع اعز اصدقائي وسبق ان كتبت عن الحكاية دي في المنتدي العام بعنوان ( يااخوانا باركو لي) فقد انقطعت بينا العلاقات بسبب بسيط وسوء تفاهم خفيف لمدة تزيد عن العامين وكنت برجع اجازتي وبقابلو من بعيد لي بعيد ...يعني العلاقات بيناتنا خربت لي درجة بعيدة ...قمت بادرت بالاتصال بيهو وقلت ليهو ( عليك الله الحاصل بيناتنا ده في ليهو داعي ؟؟؟ ياخي لو انا غلطت عليك فانا آسف وبعتذر ليك.. ولو انت غلطان علي فأنا مسامحك ويلا نبدأ صفحة جديدة) وفعلا حصل... وصديقي قعد يبكي من جوه قلبو واتصافينا ورجعنا زي الاول .. ولو سألونا السبب كان شنو مانقدر نعرفو؟؟
يعني في حاجة مهمة يايوسف... حتي لو الشخص التاني رمي بي كل حاجة في سلة المهملات عليك انت ان تبادر وصدقني حتكون مرتاح وزراضي عن نفسك شديد... وخليك دايما فوق ...خلي كل الناس تغلط معاك لكن حاول بقدر الامكان انك ماتغلط علي الناس... وحتي البغلط معاك خليك انت المسامح...
لو سمعت اغنية صلاح بن البادية ( كلمة) تلقي فيها تصوير بديع لي موضوعنا ده وبقول في مقطع منها:
وتخاصمني عشان بس كلمة... واحلي قصايدي نظمتها فيك..
ياريت لو سمعتها كلها يامستر لونلي ولو في واحد خاصمك سمعوا الاغنية دي وصدقني حيجي براهو يعتذر ليك..

[التيمان]

الف شكر مستر وحيد


ومشكور عزيزى خالد


ويديكم العافيه ويدوووووم

[Mr Lonely]

الاخ خالد كل عام وانت بخير وصحه وعافيه
كلامك كلو صح والله
وفعلا زي ما قلت في ناس لو اختلفت معاهم في الرائ صدقني حتخسرو
وكونك تخلي وتسكوت منوعشان ما تخسرو بعض عشان نقاش كمان حتخسرو
وبالجد زي ما قالت ده جاهل
يعني انت في الحالتين خسران خسران
يديك العافيه اخ خالد
تشكرات

[Mr Lonely]

التيمان كل سنه وانتو طيبين
ويديكم العوافي وربنا يحقق الاماني
الكبار قبل الصغار
ولكم جزيل الشكر علي المرور

[مزوني]

حبيبو يوسف
انا شخصيا عندي نظريه مريحاني جدا جدا
مع انها في نوع من الخطوره وبقدر ما حاولت اني اخليها لكن جايبا حقها في بعض الاوقات
اول حاجه اني ما بحب أفرض رأي على زول مهما كان انا اقول رأي في الحاجه وبعمل نايم على كدا
الزول عبرني ما عبرني ؟؟ عادي جدا جدا
وبعدين غالبا تلقاني عكس الزول المعاي
هو عصبي انا هادي .. هو هادي انا عصبي.. هو بخيل انا مبذر.. هو مبذر انا بخيل
كدا لأنو في رأي المتواضع الحكايه كدا بتكون متوازنه وبعدين بوري الزول من البدايه انو دا طبعي
وهو نوعا ما مريحيني مع الناس البتقدر وبس
ط\وطبعا لي كل زول وجهة نظر
وموضوعك راااااااااااااااائع يا غالي وما عدمناك يا حبيب الروح
وربنا يديك الصحه والعافيه

[عماد الصادق]

الاختلاف لا يفسد للود قضية..
ياريب لو الناس تتعامل بطريقة الاخ خالد هاشم وتعرف التسامح..
بعدين الاختلاف أنا بشوفو حاجة من طبع البشر ولازم تكون آراؤنا متباينة
مستحيل أن نرى هذا الكون بعين واحدة.. فما تراه أنت جميل أنا أراه غير ذلك..
لكن في بعض الناس راسه قوي وعنيد ويغالطك في القميص اللابسو .. وما يقتنع أبداً
تقول ليهو شمال يقول ليك يمين .. يعني في واحد معانا .. مبالغة .. النقاش معاهو دايرك طوالي تتنازل وتستعمل طريقة مازوني.. وهي طريقة غير مريحة بالنسبة لي.. لأنو هناك ثوابت لازم الناس تتفق عليها يعني يا مازوني مامكن تكون دايما عكس المعاك .. لازم يكون عندك رأي واضح وصريح ... يعني كيف إذا إنت كنت راجل حلو وظريف ولاقيق ليك واحد حلو وظريف زيك كده .. تقوم تقلب وتبقى شين ودمك تقيل عشان تعمل موازنة..!!!
موضوعك حلو مستر لونلي..
ويعجبني جدا جدا الزول المبادر بالتسامح.. واعتبرها رجالة ونضوج ما بعده رجالة ولا نضوج والسلام عليكم ورحمة الله وبركاته .. وتعالو بدري. وكل سنة وانتو طيبين.

[saly]

************************

[ALJOKER]

موضوعك جميل اخوي وصراحة اتمنى لو انو كل اتنين عزيزين اختلفوا
يقدروا يحلو مشاكلهم لانو صراحة اتعس شعور
هو انك تخسر عزيز بسبب رايو أو رايك في نقطة معينة
وتنسو كل الفات كأنو ماكان بينكم شي لان المحبة في القلوب
والمعزة حاجة خالدة فينا
والله مايفرق بين اعزيزين

[محمد احمد]

الاختلاف في الرأي لا يفسد للود قضية
كلام في الصميم أخ يوسف وصاح 100%
والله لايجيب زعل بين الاحباب والاخوة
وتكون ايامنا كلها تسامح وحب واحترام
ويديك العافية مستر وحيد وكل سنة وانت طيب