الدهب الدهب كاد عقلهم أن يذهب... بل قد ذهب

[عماد الصادق]

[أولاً أريد أن أوضح بأن أمثالي لا يجب أن يخوضوا في مثل هذه المواضيع..
لأني ببساطة فاقد لهذا الشئ.. وفاقد الشئ لا.............
لكن موضوع الأخ صالح أبوشوارب ورقصة العروس ..
خلاني أعقب على الموضوع بموضوع ..

ألا وهو زينة (نسائنا ) بالذهب.. فما زال هناك العديد منهن
نجدهم بكثرة في المناسبات العامة والخاصة ...الرقبة مدلدلة بالذهب......
ومن الكوع للبوع (بوع شنو ياخي) من الكوع للمرفق الغوايش بتشاكل في بعضها
والحركات المتعمدة لإظهار وإبهار خلق الله ..
وأما التعليقات بعد نهاية المناسبة ...
شفتو فلانة كيف .. ما شاء الله ما شاء الله ..
شايفين حالهم مش زينا .. تخيل راجلها شغال بمرتب عادي
لكن عرفو يوفرو .. ولا فلانة ديك .. ( صراحة ياجماعة أنا ما قادر أوصف.. والبركة في خيالكم وإن شاء الله ما أرمي إليه قد وصل...)

عاوز أعرف رأيكم في موضوع الزينة بالذهب..

وأنا أول من سأدلو برأيي..

منظر غير مريح .. ومريع في نظري إذا لبست المرأة ما يلفت النظر ..
غير مريح .. ومرييييييع

ولا الما بتلحقو جدعو ... ولا شنو ...

[صالح ابوشوارب]

الاخ عماد الصادق

اولا شكرا لك للاشارة لموضوعي . لكن ياراجل تنطرب في حفلتى وتعرض في حفلتكم

ثانيا موضوع الذهب ان شئت او ابيت فهو السكاتة لحريمنا اشترى ليها اى حاجة وخليها تسكت

ثالثلا الافارقة كلهم يحبون الالوان البراقة والالوان الصارخة في الملابس والذهب والسكسك ( يمكن عشان السماحة )

رابعا ياخي انت لاقى تكون عندك بترينة متحركة ( تكشكش وهى ماشة )

خامسا الجامعية والجاهلة والقروية وبت المدن ( ليس بينهم فرق فى هذا الموضوع )

سادسا تعال سوق الدهب والملايات والتياب ( النساء كوم كوم )

عندك لينا زوجة ما بتحب الدهب ؟؟؟؟؟

يالطيييييييييف

[مزوني]

صح لسانك يا ابو الصلح
وفعلا دي كااااااااارثه حقيقيه
البنات وجن الدهب والله يستر علينا ساااااااااااااااااااي
وتسلم يا عمده على الموضوع وربنا يديك الصحه والعافيه

[Jamal Elmahi]

أخونا العمده...
ذي ماقلته المابتلحقو جدّعو....والكديس لمّا ما لحق الدهب أقصد اللحم قال عفن....وشكلك المدام زانقاك في دستة غويشات ملونه وكرسي جابر ولاّ كرسي أبوشوارب...فالصقر كان وقع كترت البتابت عيب...فأحفر للريالات المغرّق ليها ديك وخلّي المره تكشكش مع المكشكشين ...وكلام أخوي أبوشوارب ما ترميهو البحر..وبالمناسبه بعد ما تشتروا الدهب الجديد الرسول عليك كان ما سلفتونا دهيباتكم القدام...

جمال الماحي

[عماد الصادق]

أخي أبوشوارب..

كما قلت حقيقة التعليم والتمدن لم يغير شئ فكلهم في ذلك سواء..

بعدين في الكشكشة.. المشكلة في انفلات أمني وإرهاب منقطع النظير..
وهذه الوجاهة الذهبية بتثير حماقة الناس اللي ماعندهم ذوق..الحرامية)
بقصد أنك حتصبح مستهدف..
بعدين بتجيب الحسد والعين.. وحفاظاً عليكم من عينا الحمرا وشراره
ثانيا وده الأهم بتسبب لينا أزمات مفتعلة مع زوجاتنا العزيزات..

تعرف أول ما موضوع النقاش أو الونسة بعد زيارة أو مناسبة بكلمة ... شفت ..
خلاص الموضوع باااااظ وإلا واحد من الإثنين يفوت التاني بالصبر ..
ويضيع الفرصة على اللي كان السبب


ويا جمال الماحي

فعلا أخوك زمان كان طوالي خاتنو في خانة اليك..
لكن الزمن علمنا الحرافة..
ووحياتك في كل عام بقدرة قادر نقدر نشتري لينا كم قويشة
عشان نسكت بيها متلقي الحجج عند أهلنا الطيبين
وبنهاية الإجازة السعيدة نفكها ونرجع مدلدلين الأيادي .. عسى ولعل أن يكون ذهب العام القادم أكثر بريقاً.. ويجاري الموضة ..

ثم ثانيا ..
ياجماعة العندو قريشات يشتري الذهب..
فالقرش الأبيض لليوم الأسود..
لكن ...
أنا ضد طريقة العرض .. يعني طريقة لبسه.. والحندكة لعباد الله المساكين

[أبوريلان]

عماد يا رائع

كيف حالك

عساك بخير ونعمة

فعلا طريقة العرض والحندكة بتكون قاسية على البقية لكن ياعمدة زى ماقلت القرش الأبيض لليوم الأسود وعشان كده كتر من الدهب وبدل تكدس ريالات كدس دهب وخلى الجماعة يحندكو زى ما الكل بحندك .

وأما بنعمة ربك فحدث

[التيمان]

والله ميه ميه



ميه ميه ويسلمو

[عزيز عيسى]

طبعا سمعتم بقصة المره الجننت راجلها وقالت ليه علا تجيب لي غويشات.. الراجل حالتو تعبانه لكن باصرها جاي جاي وجاب للمره الغويشات.. المرة انبسطت شديد وعايزه توريهن لجارتها علشان تغيظها وتولع النيران.. قامت رفعت يدها الفيهن الغويشات فوق حيطة جارتها وبدأت تنده عليها وتكشكش في الغويشات علشان تلفت نظرها: يا عشة يا عشة عليك الله أديني مفراكتم.. عشة لما شافت الغويشات عرفت حقارة جارتها ماردت عليها لكن وقفت تعاين وتحسب كم غويشة في يد جارتها.. عدتم 8 غويشات يرقشن.
من الحيطة وعلي طول مشت علي زوجها وقالت ليه شوف زهرة جارتنا راجلها راجل السرور جاب ليها كوم غويشات.. انت شن راجي.. ماك راجل؟.. حلفت عليه علا كمان يجيب ليها 12 غويشة أو يرجعها بيت أهلها.. المسكين مشي شال القروش المحوشها كلها واشترى 12 غويشة عشان يرضى عشة وخاطر عيون عشة.. قومي يا عشة شيلي المفراكة وأمشي علي الحيطة ونادي علي زهرة: يا زهرة يا زهرة .. لما جات زهرة قالت ليها عشة قبل يومين يا زهرة سمعتك بتسألي عن المفراكة تعالي أهي شيليها وهي تكشكش في الغويشات لفترة من الزمن علشان تقدر زهرة تشوفن..

ويا عماد أنسى موضوع القرش الأبيض لليوم الأسود اشتري الدهب للولية واسمع كلام اخوانك الفوق ديل وخليها تكشكش مع (المكشكشات)..

[Jamal Elmahi]

الاخوة العمده وابو شوارب..
بما أنكم من الذين يكنزون الذهب والفضه ولا ينفقونها في سبيل الله....
فقبل أن يحمي عليها في نار جهنم وتكوي بها جباهكم وظهوركم أحسن تزكوها وترسلوا لينا الساهله انشاء الله كرسي جابر....القحّه ولا صمّة الخشم...

جمال الماحي

[عماد الصادق]

أبوريلان اللخو..
لو قلت ليك أناعرست من غير شبكة بتصدق..
وحتى الدبلة شدة ما شينة أم أشواق رضت علي وقبلتها على مضض..
لكن.. صبرها كمل وفي لحة صفاء قالت لي مافي داعي للدبل والعوارة دي..
ملصناها وجدعناها.. وهل تصدق إنو الجانا هدية الحرامي شالو وشال معاهو الثياب
والقمصان القشرة حقت شهر العسل.. ومن ديك وكان تصدق الحكيتو فوق حقيقة..
وشدة مابنكون مقهورين من موضوع الدهب ده بعد مابيع الفيهو الفايدة بنوزع الختم هدايا.. نكاية!!!!!



أبو عزيزه .. قصدي أبو عيسى (رأيك شنو في أبوعزيزة دي... جات براها)

تعرف دي فرصة كويسة لتفعيل هذا الموضوع وصياغة قانون يحكم حريمنا المصونات
في لبس هذا المعدن اللي حيودي ناس كتيرة في ستين داهية.. أنا غايتو ما منهم...
بعدين قصتك دي إنت أديتا كوز ولا شنو.. لأنو العدد شوية كبير.. وهذا يجرح كبريائنا..
خلي النسبة 2 إلى أربعة ...

ياجمال الماحي.. أقول ليك شنو عاد أكثر من القلتو ليك... وبكرر أنا غايتو ما منهم..
خلي نصيحتك تمشي مدبلة لأبوشوارب..


الإخوة.. مازوني (بدل مزوني) .. التيمان
شكرا للمرور