رحبوا معي بالضيف الجديد على الكرسي الاخ كاظم [الأرشيف]

سوباوي

03-12-2005, 05:16 AM

المرهف .. كاظم الزعيم ...

ردهة مضيئة تقود لأبواب داخلية :

تبدو استفهاماتي مبعثرة بعض الشيء الآن .. فقط هو اصطفافها أمام ظاهرة شابة مثلك وأنت تملك ناصية اللغة فطرةً

وتخصصاً ..وتستفيد من جغرافياك لتتحسس تضاريسها وتندغم في أجوائها وفقاً لانفعالاتك الخاصة ..

- هل في رأيك عزيزي كاظم أن التخصص يصقل الموهبة أو الملكة أن جاز التعبير أم أنه يقيدها وفقاً

لقواعدها ولزوم أدواتها ومن ثم يزج بها في دهاليز الأكاديميات فتفقد بذلك بريق سجيتها ومتعة تلقيها، أم أن

التخصص يسيرها وفق المجريات والقوالب الصحيحة المناسبة ويقننها فتأتي أكثر متعة وبريقا ومتانة ورصانة من

كونها مجرد موهبة ؟

الولوج نحو أبواب مشرعة التفاصيل :

الحميم .. كاظم دلفت نحو عوالمك الممتعة قاصراً تعرفي على ما شرعته من نوافذ .. وهي (هنا – حصة قدر – مسدار

الضل الميت – مشتاقون يا خرطوم مهزومون يا أكتوبر – فاطنة بت المطر – لقد تأخر كثيراً – الخرطوم تقرأ – إيفا ترد

على الأجنحة – الأجنحة – فليذهب قرنق – الذكرى السابقة لاستشهاد محمد عبد السلام – كفروا هذا الفاجر تمولليلت –

وطن ستمحى ذاكرته)

هنا : نص يغرقه الحزن يتشح بالسواد ينتظم إيقاع الوجدان فيه خافضاً على تراتيل معزوفة حزينة، هل يقودك الحزن

للكتابة مباشرة أم يظل الحزن رهين ذاكرة تشفي جراحها الأيام ثم تعاود أنت كشاعر العودة لتلك الذاكرة الحزينة

لتدلق عليها ترياق الكلمات في تطبيب حذق لتعود أكثر اتزاناً ورضاء عن الذات؟ .. ما الحزن لديك إن صحت صيغة

سؤالي ؟

(فاطنة بت المطر – فليذهب قرنق) نصيين نثريين يعودان بالكاتب لذاكرة طفلة/صبية وترسخ تفاصيل تلك المرحلة كحوار

بين الذات والذات إلى أن يجد لها الكاتب مخرجاً هل إذا استطاع كل منا الاحتفاظ بتفاصيل ذاكرته الطفلة سيكون نتاج

تلك الفترة غزيراً في مرحلة النضوج ومن الممكن أن تكون بداية خط سير واضح يكتشف الإنسان فيه نفسه أن

باستطاعة ذاكرته تخمير الأشياء إلى حين .. السؤال هل تتوفر هذه السمة لكل الناس أم أنها للكتاب و أصحاب الملكات

وحدهم ؟

(لقد تأخر كثيراً – الخرطوم تقرأ – وطن ستمحى ذاكرته)

هناك صوت احتجاج عالي يخرج من قاع وطني غيور .. تفتح فيك هذه النصوص باباً ترتفع حماك معه، إن ولجته تفوح

منه رائحة الغيرة، الوطنية، عدم الرضاء لوطن منهوك من جراحاته الكبيرة ومثخن بجراحات ما من داعي لها . رأي

الكثيرين من متذوقي الأدب أن الحس الوطني العالي لا بد وأن يظهر في نصوص الأديب ومن ثم يقود لنشاز النص الذي

كان يجب أن يكون الإحساس فيه بعيداً عن كل المؤثرات، ورأيي الشخصي مخالف لما ذكر من وجهة نظر خاصة ولي

مبرراتي فما رأي الأخ كاظم في ذلك؟

(حصة قدر – مسدار الضل الميت – كفروا هذا الفاجر – تيمولليت) التحية لك وللأديب محسن خالد .. أولاً أعجبت تماماً

بحوارك وتبادل وجهات نظرك مع المهذب المشرف عمر 114 حول رواية تيمولليلت، كما أعجبت تماماً بالنصوص التي

اهديتها صديقك محسن خالد ..

الراقي كاظم .. أعرف أن محسن خالد قد فاز بالمرتبة الأولى في الرواية والثانية في الشعر على نطاق ولاية الجزيرة

كما فزت أنت بالمرتبة الأولى في الشعر على نطاق الولاية هل بالإمكان أن تحدثنا عن تلك التجربة مع إدراج النص إن

أمكن وما هي أسباب استبعادكما في الخرطوم وهل في رأيك ما سيق من أسباب لاستبعادكما كان منطقياً، ومن

وجهة نظري الخاصة أن مثل هذه التجربة ما هي إلا مزيداً من الحماس للكاتب ومزيداً من التجربة ومزيداً من التحليق الحر

في فضاءات الكتابة أتوافقني الرأي في ذلك ؟

(إيفا ترد على الأجنحة – الأجنحة) نص واقعي تشم في رائحة التفاصيل الحية لتجربة معاشة هل من تعليق؟

(الذكرى السابعة لاستشهاد محمد عبد السلام)

ذلك الشاب النقي .. ابن قانون البار .. الفتى الفكرة الذي كان سيحتفي به الوطن ابناً باراً .. ذاك الشاب الذي كان يعتق

حضوره الهادئ كل أمكنة تواجده وكان صاحب قبول عالي لكل من صادفه .. سيظل جرحنا الأليم الذي لا يندمل

وبالمقابل سيظل وصمة عار وعقدة ذنب في جبين وقلب قتلته إن كانوا يملكون ولا أعتقد .

هل تعتقد أن النشاز السياسي يخدش حس المبدع ؟

هل تعتقد أن وطن مثل السودان تقوده فئة تعاني فواقد كثيرة ابتداء من الأدب وانتهاء بالسياسة أو بمعنى آخر أن

قيادة لا تحترم الأنسان مطلقاً جديرة بأن تولي اهتمام للمبدعين؟

هل توافقني أن هناك كم من هائل من محمد عبد السلام قد أعلنوا قبض أرواحهخم في هدوء وكأن شيء لم يكن إن

كان نعم فأين نحن كشعب سوداني ومن ثم يقودنا السؤال إلى أن هل مثل هذه الفوضى جديرة بأن تشردنا في

المنافي قصرية كانت أم اختيارية كما نحن الآن أم كان لابد من تواجد كل المبدعين والوطنيين والسياسيين بالداخل

لتغيير ما يمكن تغييره ؟

الرحيب كاظم للحديث معك أريحيته الخاصة كما أنه لا زال باليراع مداد وفي الخاطر أسئلة أتمنى أن لا أكون قد

أبعدتك أسئلتي عن سياج عوالمك الأنيقة هذه .. ولكني فقط وددت أن أجالسك من خلال هذه النصوص، وما تبقى من

أسئلة يجوز أعود لك به مرة أخرى وأكون بمزاجية أعلى وترتيب أفضل لأنني أكاتبك الآن من وسط زحمة العمل ودون

أي كنترول لتحديد الأسئلة .. وجد لي العذر مرة أخرى أن عجزت في توصيل أسئلتي أو لم تسعفني اللغة .

تحياتي ،،،

الشريف الهندي

03-12-2005, 05:37 AM

حبابك حبابك مليون ومرحب بيك في الكرسي الساخن وربنا يكون في عونك وخالص التحيات اخونا وحبيبنا كاظم
اخوك الشريف الهندي :)

الوفي

03-12-2005, 05:48 AM

حبابك حبابك مليون ومرحب بيك في الكرسي الساخن وربنا يكون في عونك وخالص التحيات اخونا وحبيبنا كاظم

كاظم

03-12-2005, 06:33 AM

الشفيف جدا سوباوي ........
هذه التساؤلات في مجملها وتجاوزا لعلامات الاستفهام التي تسكن اخرها .. هي نص ابداعي راق ومتماسك ... وسأحاول اخي سوباوي ليس الاجابة على هذه التساؤلات وانما .... فلنسمها بوح او دردشة او اي شئ اخر ولكن (الاجابة) ماعون لايسع ما نناقشه ...
- الى الان لم احظ بلقب معين (شاعر) مثلا او (قاص) او ما الى ذلك مما يطلق على من يكتبون في المجالات الادبية التي طرقت ابوابها ..فقط اعي حقيقة واحدة وهي انني (اكتب) وبدأت اكتب في سن مبكرة جدا وشعرت انني في حوجة ماسة لتجويد ما اكتب وربما وجهت دراستي املا في ذلك .. صدقني لا اذكر والى الان انا في كامل القناعة ان ما درسته (اكاديميا) لم يفدني كثيرا في الرفع من مستوى ما اكتبه ربما افاد من ناحية (لغوية ) بحتة بتجنب الاخطاء الاملائية والنحوية وما الى ذلك ولكن في غير ذلك فهو في اطار ضيق للغاية ..ولم اصطدم بمسألة ان تقيد الاكاديميات هذه موهبة الشخص الابداعية وهذا بناءا على تجربتي الشخصية فأنا مثلا درست (عروض الشعر وقوافيه) والى الان لم ازن بيتا كتبته ولو من باب التمثل ..ودرست مدارس الشعر ولم اوفق الى اليوم في ان (أسجل) واحدة من قصائدي في واحدة من هذه المدارس ..وفي رأيي ان مسألة ان تصقل الدراسة الموهبة (على اطلاق هذه المقولة ) ربما يجب ان نتعامل معها بكثير من الحذر اذا تعلق الامر ب( الموهبة الادبية) ...
الحزن .. الحزن ... سأعود يا سوباوي

كاظم

03-12-2005, 06:39 AM

الشريف الهندي وكلما التقيك ساقول اولا(ما اجمل هذا الاسم)
تحياتي يا شريف القلب والروح .. وامتناني لهذا الترحيب ( الضخم) خطا ومعنى .. وربنا يهون يا رجل ..
تحياتي وابقى قريب

الوفي .. اولا الواحد بقى لما ما يشوف اسمك يوماتي منور الموقع كلو بحس انو في شي كتير ناقص ..
اقعد عافية ودم بخير

كاظم

03-12-2005, 06:46 AM

اميمة بت عشرية ...
( ولد في جوفو كل مساقط الانهار ...
وقالت ليهو .... ما تدمع )
والله انا الاسعد انو الليلة متلفحة توبك وطالة علينا .. وطلتك بعشرة طلات وردة وخمسين طلة شمس يوماتي .. ومطرتين من بلادنا
ابقي قريبة

saly

03-12-2005, 07:53 PM

الاخ كاظم
تحياتي اولا ليك
وحبيت ادخل و اسلم المره دي بس
بس جاااااااااياك بالتقيل بعدين

waheeb

03-12-2005, 09:52 PM

أخي كاظم حروفك الدافئه خير عون لك علي برد سيدني القارص... كنت تكتب وانت داخل السودان بين الاهل وانت تشعر باحاسيس متباينه .. حدثنا.. هل وجدت فرقا وانت تكتب في الغربه خصوصا وانت في بلد غريبة الجنس واللغه؟..من الذي دفعك للغربه والي استراليا بالتحديد؟

كاظم

04-12-2005, 02:40 AM

الاخت العزيزة سالي ... وسلامي لك ايضا ... وحضورك يعطي المكان نكهته الخاصة ......
والله يستر معاك والله يا سالي لانو متابعك وبالراحة علينا يا ستي ...
على العموم كوني دائما بخير وابقي قريبة ...

كاظم

04-12-2005, 03:05 AM

البهي ... وهيب .. اولا امتناني بقربك الحميم ...
- وهيب .. لقد اتيت الي منفاي هذا وذاكرتي قد اكملت تمام نضجها هناك في بلادي .. هذه الذاكرة تسيطر تماما على ما كتبت وما اكتب وما سأكتب .. هذا فيما يختص بكيفية تناولي للعمل وسمته وطريقتي في التعبير عنه .. واذا كنت تقصد موضوع الكتابة في حد ذاته فالى حد ما طرأ القليل من التحول ولكنه تحولا غير جذري اطلاقا فلا زلت انا رهين تجربتي هناك ...

- من؟ اعجبتني فكرة انك تسأل عن (الكائن الحي) الذي دفعني الى الغربة كخيار .. وربما لو كان السؤال (ما) لما كفت هذه المساحة لشرح دوافعي الى ذلك .. واستراليا والله يا وهيب ما كانت (مشروع) هي (غربة والسلام)...
وهيب والله انا سعيد بالونسة .. ربما افردنا لها مساحة اكبر ان كان في العمر بقية

كاظم

04-12-2005, 02:54 PM

سوباوي ...
الحزن كتفصيل حياتي او فلنقل يومي اذا وضعته جنبا الى جنب مع تفاصيلك اليومية كموعد للقاء صديق او انجاز عمل ما( وهذا بالطبع بناءا على (تشعبطه) الاذلي بالذاكرة ) لن تجد كبير عناء في ان تصنفه في خانة الاركان الاساسية للالهام عند كل من حاول التعبير عن مكنوناته فنيا (شعر - قصة -تشكيل ..... الخ )... هو ليس موضوعا لاكتب في مداه او مناسبة تحركني لاتناول قلمي واكتب ... ولكن ما ذكرت من تعلقه الاذلي بالذاكرة جوز له احيانا ان يسم ما اكتب ... وهذا في حد ذاته خلق عندي نوع من التوازن ولعلك تلاحظ في القليل الذي طالعته مما كتبت انه لا كبير اشكال بيني وبينه فانا احترمه واسمح له بالخروج وقتما شاء(هنا) ويحترمني بالا يجعل ما اكتب حكرا عليه ... ويا صديقي ربما ناقشنا هذا في اطار اوسع في مرات قادمات ....

- التاثير الخارجي واثره على نفسية ومن ثم العمل الابداعي لمن يكتب ... انا ايضا اشاركك الرأي فيما ذهبت اليه تماما وادلتنا كثيرة فاذا ضيقنا الاطار داخل بلادنا فقط فمن منا على سبيل المثال يمكنه انتزاع حقيقة شمولية (حميد ) وشاعريته الفذة رغما عن كونه كتب ما كتب وهو اسير لبرنامج حزبي غاية في الضيق اذا جاز التعبير وهذا الضيق انما ذكرته نسبة للايدولوجيا المحكمة التي تسيطر على ملامح هذا الحزب (فكرية - برامجية ) فحميد في كثير من حالاته اذا دققت النظرتجده (يتملص) مما يحكم فكره فتجد في قصيدة واحدة جزئية لن تصدق ان كاتبها هو ذاته كاتب الجزئية التي تليها .. وهذا لا ينفي وقوع البعض في هوة (تأثير) واحد وبالرغم من نضوج اعمالهم الى ان دورانها في فلك واحد افقدنا الكثير من متعة متابعة ابداعهم ...
وعلى ذات النسق كنت اكتب وفق ما تمليه علي الكتابة دونما التقيد باختيار معين .... فاكتب عن حبيبتي وعن طفولتي واصدقائي ووطني وكل ما يخلف في احساسا( يشابي) لان اعبر عنه...

- ساعود

كاظم

04-12-2005, 03:41 PM

سوباوي استغربت جدا لكونك تعلم بعض تفاصيل ما حدث بخصوص فوزنا (شخصي والمرهف محسن خالد) في مهرجان الثقافة القومي الذي لا اذكر رقمه ... وكان من المفترض ان نمثل الولاية في الشعر والرواية وحدث الذي حدث وتم استبعادنا نهائيا من المشاركة بل ولم نعط حتى جوائزنا على نطاق الولاية وكانت حينها مبلغا ماليا محترما ... من وين جبت المعلومة دي يا شقي ؟
على العموم كانت مشاركتنا محاولة للقضاء على ديناصورات الثقافة بمدينة مدني وكانت حينها في جفاف ثقافي رهيب بعد ان سيطرت مجموعة تابعة لنظام الخرطوم على مقاليد العمل الثقافي بمدني وبدأت في زعزعة المبدعين على كل المستويات الثقافية (شعراء .. مسرحيين .. تشكيليين وغيرهم) وجافى اهل مدني كل ما له علاقة بالثقافة حينها واعلن حينها عن هذا المهرجان فاقترحت على محسن ان نشارك ونرى .. ولعل لجنة التحكيم كانت الي حد ما محايدة وبالفعل فقد اجيزت اعمالنا ككمثلين للولاية في هذه الجوانب .. شارك محسن بديوان ( اطلس ضد الجغرافيا - شعر ) ورواية نسيت اسمها .. وشاركت انا بعملين ( مسدار الضل الميت - صابحة) وفازت رواية محسن بالمركز الاول في الرواية وديوانه بالمركز الثاني وفازت قصيدتي ( صابحة ) بالمركز الاول(الشعر) ... قصيدتي التي فازت ربما ارسلتها لك كاملة لاحقا نسبة لطولها ولكن مطلعها ...
يا طلعتك يا صابحة من لهب البدايات والمدى
يا روعتك والليل مخدات النجوم ..
زاحمني عندك وارتدى الصمت الهلام
سامرني ما فض الحكايات البتول ..
لا دق في الشارع بواباتنا القدام
ساهرني والفجر انسرق ..
والعصافير لسع نيام
وتفاصيل استبعادنا ايضا واستبعاد لجنة التحكيم كانت مهزلة مضحكة ارجو ان تعفيني يا سوباوي من ذكرها هنا ...

- سوباوي اتخيل لي في فترة ما......... قريبة ما بعيدة كانت في ملييون (ايفا) في بلادنا وهسة اجزم ليك انو عدد كبير من المغتربين المعاك اذا ما كنت منهم اي واحد عندو (ايفا) خاصة بيهو ... (ايفا) خاصتي زهجتها لدرجة انها كسرت حاجز الانتظار .. على قدر ما سعيد انها عملت كده على قدر ما حزين انو (الايفات) بقو شوية جدا ... كدي بنطلع عناقريبنا في همبريب قريب وبونسك .......

- محمد عبد السلام .. ( المخستك) كما يحلو لرامي جعفر ومحمد عمر ونجلاء ميرغني مناداته .. كان رائقا كما الطل .. وعنيدا كا الجبال التي لا تبرح مكانها مهما حدث ... ثم سافر هذا السفر الجليل ... صدقني لم يكن يحني رأسه ابدا ولو على سبيل المزاح حتى حينما هشموا رأسه ورموه في احد ( خيران كافوري ) وجدوه متكئا كانما ليأخذ قسطا من الراحة لينهض مرة اخرى ... كأن دمه (حارا جدا) حتى انه كان يقطر لليوم الثاني من بين طيات كفنه .... سيظل محمد في ذاكرتي ما دام هذا الوطن ...

الزبير محمد عبدالفضيل

04-12-2005, 08:10 PM

حبابك حبابك مليون ومرحب بيك في الكرسي الساخن وربنا يكون في عونك وخالص التحيات اخونا وحبيبنا كاظم

وسوف اعود لك مابين س وج ولك مني اجمل التحيا

ابو الزعيم

04-12-2005, 09:04 PM

مرحب بيك الحبيب كاظم ...
ونورت الكرسي ... وماظن سوباوي خلى لينا حاجة نقولها
بس حبينا نسلم ... وبعدين نرجع ليك تاني
تحياتي

admin

05-12-2005, 12:06 AM

السلام عليكم كاظم .. كيف حالك كدا .. منور الكرسي .. شايف الجماعة بدوك في الاسئلة الباردة ويادوب سوباوي بالماشة بقلبك في الكرسي الماسخن لسه .. وهاك دي اسئلتي:-
ما سر النقاط في بين الكلمات يعني لو شفتا جملتي الفوق دي بتلقى نقتطين (..) تكرروا بين الكلمات؟ وانتا شايفك بتخت ثلاثة نقط في نص الكلام وفي اخر الجملة بتخت ستة نقط او سبعة .. الحكاية شنو اوع يكون الشغلانية فيها رتب وانا ماعارف قافل نفسي في ملازم اول دي والناس بقو نقباء.... ههههه
اسم كاظم دا غريب على الشعب السوداني .. فما سر التسمية؟
من ردك الفوق على سوباوي من تقصد بديناصورات الثقافة بمدينة مدني ؟ ولماذا كنتم تريدون القضاء عليهم؟ وماهو دورهم في تجفيف الحركة الثقافية في مدني؟ وماهي العلاقة بين الشعراء والكتاب والهيكل الوظيفي الحكومي المتمثل في المؤسسات الثقافية؟ انا قصدي الشاعر والقاص بيكتب عادة لنفسه ام للاخرين ام لكي يحصل على جوائز ام هدفه مادي بحت ويبحث عن العائد من طباعة اعماله؟
هنالك من يقول ان شجرة الادباء هي ملتقى الشعراء والكتاب والفنايين في ودمدني هل تتفق وذلك؟ وين تقع تلك الشجرة؟ وهل هناك طوائف مختلفة .. اي البعض يلتقى تحت تلك الشجرة واخرون لديهم اشجار اخرى؟ وماهي اسباب الاختلاف؟
اخيرا : لم اجد اي من اعمالك على صفحة محراب الاداب والفنون الموجودة بموقع ودمدني على الرابط التالي
http://www.wadmadani.com/html/finon/finon.htm
لماذا تبخل باعمالك على الموقع والصفحة الخاصة بالاداب والفنون؟ هل لديك اي راي عن الاعمال الموجودة في تلك الصفحة؟ ام لك راي في ادارة ذلك القسم من الموقع؟
والسؤال اخيرا دا موجه ايضا ل: سوباوي واميمة وكل من لديه الموهبة في العزف بالكلمات سوا كان قاص او شاعر او كاتب؟

رايك شنو سخنتا بيك صاح .. معليش الايام دي عندي امتحانات وعايش في جو الاسئلة والاجوبة

خالد حمد موسى

05-12-2005, 01:04 AM

مرحب بيك كاظم وانت ضيفا علي الكرسي

وان شاءالله يكون بردا وسلاما عليك وقبلي مااسال عني اي شي

ياريت تنزل لينا صورتك الشخصية وعشان تتكمل المعرفة

وانتظرنا بباقي الااسئلة. مع خالص ودي لك.

كاظم

05-12-2005, 06:32 AM

السفير ... تحياتي اولا وخالص تقديري وسعيد جدا بحضورك .. وابقى دايما قريب ..

ابوالزعيم وينك يا راجل ؟ مشتاقون جدا ...
سوباوي والله ما يقع في يدو زول الا ويحاوطو بمفردات مجاراتها ساي مشكلة ناهيك عن انو تفتفت مضمونها عشان اجاباتك تكون بعمق اسئلتو ..
وجودكم يا ابو الزعيم ما بشبهو القمر البتاوق من سما .. ومستنيك ..

كاظم

05-12-2005, 07:35 AM

الادمن .. اولا تحياتي وفائق احترامي لك دائما .. وفخر لهذه المدينة ان يحملها ابناءها في حدقات عيونهم وييعكسون وجهها المشرق اينما حلوا ..
وممنون ايضا لاستقبالك الدافئ وترحابك المعهود ...
سوباوي ذي ما قلت لابوالزعيم صبور جدا ومركز الى درجة تجعلك في حالة من التوتر لمجاراة هذا الفتى في كل ما يحاورك و(يناورك) فيه ..
وعموما هو يضفي بمداخلاته الثرة الكثير من المتعة والترقب اللذيذ ..

-..... النقاط .. استخدامي لها يا ادمن استخدام عفوي جدا هي عندي مثل ان تطرق رأسك لتواصل الحديث .. او ان تسكت برهة لتواصل .. واغرب مافي الامر انني لم احسب كم نقطة اضع ولم انتبه الا بملاحظتك الدقيقة عليها .. اذا دققت قليلا تجد انها شائعة الاستعمال (من غير تحديد لعددها) خاصة لمن يكتبون الشعر بصورته الحديثة غير المقيدة ببحر شعري معين والذي لن تجد مكانا شاغرا لتضع فيه نقطة واحدة .. ربما اثر ذلك علي وعليهم فصرنا نستخدمها في كل شئ
-(كاظم) ... صدق يا ادمن انا لمدة اسبوعين من ولادتي يعني بعد السماية باسبوع كان اسمي (قصي) والوالد الله يطول عمرو كان ما حاضر اظن كان في عطبرة تقريبا فلما جا ضبح تاني وسماني كاظم .. سألتو انا مرة فقال لي سميتك على الشيخ موسى الكاظم بالعراق ولم يزدني حرفا واحدا ولم اصر عليه ليواصل .. بالمناسبة بشرق السودان خاصة منطقة سنكات ينتشر هذا الاسم بكثرة ولا اظن ان المسألة لها علاقة بقبيلة ما فانا عرقيا انتمي لقبيلة الكواهلة التي لا علاقة لها اصلا بشرق السودان .. هذا كل ما اعلمه عن اسمي ..
- ديناصورات الثقافة بمدني الذين عنيت والذين كنا نطلق عليهم هذا الاسم هي المجموعة المعينة من قبل الحكومة لتسيير شؤؤن الثقافة بالمدينة وقد كانوا ابعد ما يكون عن المدينة ذاتها ناهيك عن الثقافة بها .. ولعلك بقليل ملاحظة ستبصر ما الت اليه مدني في فترة من الفترات وعلى كل المستويات وليس المستوى الثقافي فحسب .. كلمة القضاء عليهم ربما لا تحمل معناها بصورته التي تخيلت هي تعبير عن محاولة جادة لكسر احتكار عدد من الاسماء لكل ما له علاقة بالشعر او الرواية او غيره من ضروب الابداع انذاك حتى لتخال احيانا ان المدينة خلت الا منهم واصدقك القول ان محاولتنا هذي سبقتها العديد من المحاولات لشباب صارعوا ليجدوا لهم متنفسا داخل مدينتهم فما افلح ذلك .. وحاولنا ونجحنا ثم خسرنا لان البعض ابى ان يمثل مدني غير اولئك الذين ذكرت بغض النظر عن ماذا قدمت انت فالمعيار حينها كان( من انت) ..
بخصوص السؤال لماذا يكتب الكاتب .. شخصيا انا فقط اكتب ولو وجدت ان ما كتبت جدير بالنشر سانشر .. لقد قرأت قبل ان افكر في ان اكتب والذين قرأت لهم لم افكر لحظة واحدة لماذا كتبوا ..
- مدني حواريها وازقتها تعج بالمبدعين ولم تكن الشجرة او غيرها هي المجوز لك لكي تحظي بلقب شاعر او قاص او روائي .. والفن عموما وبشتى ضروبه في رأيي انه ليس نوع من انواع السياسة او ضرب من ضروب الفلسفة ليختلف اصحابه حوله او يتفقوا الفن على اطلاقه عالم رحيب يسع الجميع كل بموهبته وادواته التعبيرية .. مفردة اختلاف على ما اظن خاصة بالمتلقي ولا علاقة لها البتة بصاحب العمل الفني الذي يعجب فلان ولا يعجب غيره وهذا ايضا لايقود الى اختلاف بمعناه الذي نعلمه فطوال حياتي لم اسمع ان شخصين اشتجرا لان احدهما يحب الشاعر الفلاني والاخر لا يحبه قد يختلف الناس في تشجيع فريق رياضي ويقتتلوا في الدفاع كل عن رأيه ولكن في الفن .. لا اعتقد

- محراب الاداب والفنون زرته كثيرا وفي بداية اشتراكي ارسلت الى المشرف الاخ استاذ عمر غلام الله رأيي في نوعية بعض الاعمال المنشورة والتي كانت في رأيي لا ترقى الى مستوى نشرها عبر المحراب وتناقشنا قليلا حول هذا الامر .. والامر ليس له علاقة البتة بمن يكتب بل كان بالنظر الى الاعمال المنشورة ولعل المجال هنا اضيق من ان نفصل في هذا المسألة .. ولا اعتراض لي البتة في المشاركة واتمنى ان تكون هذه الدعوة قد وصلت الى سوباوي واميمة وكل المبدعين لاثراء المحراب..

ادمن .. سعيد جدا بالحوار معك والذي اتمني ان يتواصل على مستويات اخرى .. وكن بخير

كاظم

05-12-2005, 07:57 AM

خالد حمد موسى .. الخلوق المهذب والفنان .. تحياتي يا رجل ومتعك الله بالصحة والعافية .. وكثير امتناني لحضورك .. وساحاول ان ارفق صورتي عبر هذا البوست ..
كن دائما بخير

saly

05-12-2005, 08:23 PM

الاخ كاظم
اها شيل شيلتك جيتك انا تاني بأسلتي

يلا بسم الله ابدا ليك

هواياتك ... احلامك ... ماذا يخيفك ... متى تبكي ... متي تفرح ....ماذا تعني لك مدينه ود مدني.. صورة ودمدني بداخلك هل ما زالت بنفس الوضوح ام بهتت الوانها بحكم الزمن والبعاد وانت بعيد عنها في استراليا ؟؟

الرومانسية في حياتك الى اي مدى ؟؟؟

من هو مثلك الأعلى؟؟؟

كيف تفسر موت الدكتور جون قرن ؟؟؟؟

كيف ترسم مستقبلك ؟؟؟؟

بكل صراحه منتدي ودمدني في سطور ؟؟؟؟

هل تؤمن بالكلام دا:

1- هذا الشبل من ذاك الأسد

2 - ود الوز عوام

اذا كانت الاجابة نعم ما مدى تحقق ذلك في شخصك

واذا كانت الاجابة لا ليه.

كيف تتصور السودان بعد 50 عام

اها اكمل باقي الاسئله ولا كفايه عليك

كفايه اعتقد لكن برجع ليك مره تانيه

مزوني

05-12-2005, 11:34 PM

العزيز والغالي كاظم
تحياتي الخالصه ليك يا غالي
وانت تحارب الاسئله من كل جانب
ونتمنى ليك التوفيق يا حبيب
طبي
ماهو موقفك من السياسه ولاي مدى يصل اهتمامك بها
وما هو موقفك من الرياضيه وناديكم المحلي يشارك في كأس العالم للانديه في اليابان يوم 12 من الشهر الجاري
وما هو احرج سؤال قابلك أيام التدريس ( من الطلبه ) لانك قلت متعود على الاسئله المفاجاه
وما هو أظرف موقف مر عليك في التدريس وفي حياتك العامه
وكيف قدرت تتأقلم مع جو مدينة سيدني مع ملاحظة انو الاغتراب لي جهجه خاااااااااااااااااااااااااااااصه بعرفها برااااااااااهو
وانشاءالله تكون أسئله خفيفه ومريحه يا حبيب

صالح ابوشوارب

06-12-2005, 12:16 AM

الاخ الفاضل كاظم

ربنا يكون في عونك

اولا اشم رائحة العنجهيه في رئيس وزراء استراليا

هل الشعب الاسترالى نفس العينة ؟

وهل له اهتمامات سياسية ومعرفة بالشعوب والجغرافية ولا مسطح ذى الامريكان ؟

وهل منساقون وراء السياسة الامريكية ام لهم رأى آخر في مشاكل الشرق الاوسط ؟

بعد احداث غزوة منهاتن هل تغير الوضع للمسلمين وللعرب ؟

السؤال الاخير عايم وبعيد عن السياسة

ماهو الفرق بين الاسترالى والسواكنى ؟

-------------------------

ابو منار

كاظم

06-12-2005, 02:18 AM

الاخت العزيزة جدا سالي .. مساك الله بالخير وامنياتي الصادقة لك بدوام التوفيق ...
وربنا يقدرني على اسئلتك وبسم الله احاول اجاوب ليك يا ستي ..
هواياتي يا سالي انا زول محب بشكل خرافي للقراءة ويمكنني بمنتهى اليسر ان اصرف جل وقتي فيها .. اقرأ كل مايقع في يدي مكتوبا ... بحب الرياضة برضو وهلالابي على السكين ذي ما بقولو و(عبيط جدا) في التشجيع ... بسمع فنانين كتار ومغرم بالفن السودان عامة ..
- احلامي بسيطة جدا هسة .. والله يا سالي مشتاق للسودان بدرجة تدعو للرثاء واحلامي حاليا فقط العودة والاستقرار هناك .. برضو عندي حلم بعيد كده بانو اصحى الصباح القى العالم ما فيهو حرب .. ادعو معاي انو احقق ولو واحد فيهم ...
- ببكي لو حسيت انو انا داير ابكي .. ومحفزات انو تبكي كتيرة في الزمن ده (دي ما زوغة من السؤال يا سالي) بالجد ما بتتعب كتير لو حسيت انو انت مغبون وعايز تبكي .. ببساطة انا الفي وضعي ده ممكن يتذكر ليهو كم حاجة كده عندها علاقة بوطنو وبعديها يقول نادوا البسكتني .. بكون حننتك مش ؟
- بفرح لو لاقيت زولين بتسالمو بحميمية وصدق .. وبفرح اكتر لما اتذكر انو دايما هناك في فرصة تانية ممكن تحقق فيها البتحلم بيهو .. واسعد لحظات عمري على الاطلاق حينما اهاتف افراد اسرتي واندمج معهم في ونسة دافية وحنينة ..
- اييييييك يا سالي .. مدني .. يكفي اختي انها وضعت الخطوط الاساسية في بناء شخصيتي وبلغ تاثيرها حد انني حملتها معي منذ نعومة اظافري والى الان انا احملها كشئ عزيز .. احملها برفق (كشئ قابل للكسر) واعتز بانتمائي لها اينما ذهبت وكنت كلما التقيت شخصا جديد علي تمنيت قبل كل شئ ان يسألني ( انت من وين في السودان ؟) .. مدني لم ولن تبهت صورتها ابدا ابدا في خيالي وها انا ذا ابحث عن كل ما له علاقة بها اسعد بوجودي الان بين ابناء مدني واحس انني قريب جدا اليها .. وبالرغم من تاثير المنافي علي وعليك وعلى معظم ابنائها الا انني اظن ان هذه المدينة منحوتة في مكان ما فينا .. نحت غير قابل للمحو بفعل عوامل التعرية ..
- سالي ... سأعود

كاظم

06-12-2005, 03:08 AM

سالي مساء الخير مرة تانية ..
- في رايي اختي سالي ان كل الناس يحملون قدرا متساويا من الرومانسية في داخلهم ويكون الاختلاف في طريقة تعبير كل فرد عنها .. وهنا يكمن الاختلاف .. وتاتي مقولة ان فلان رومانسي وعلان لا علاقة له اصلا بالرومانسية .. شخصيا تعبيري عنها تعبير لا استطيع تقييمه .. خذي مثالا واحكمي فانا ميال الى معرفة الناس وخلق نوع من المودة معهم مهما كلفني ذلك من وقت وجهد .. ومجامل الى حد مرهق .. ومحب لكل ماهو جميل .. ( رومانسي ولا زول ساي؟)
-بخصوص مثلي الاعلى اسمحي لي ان ارد عليك بسؤال .. مثلي الاعلى في ماذا ؟ طلبت هذا التحديد لاكون اكثر دقة في الاجابة عليك ..
- دكتور جون قرنق .. بفهم حياتي بسيط ( ماكتير على الخلقو) .. ويبقى موته في الجانب الاخر فهم جديد لطبيعة مجتمعنا في السودان بتعدده الثقافي والعرقي والاثني والديني وغيره .. لقد كان موته اكبر تاكيد على هشاشة العلائق التي تربط بين مواطني جنوب السودان وشماله .. فلندع مسائل النقاش على المستوى الادبي وحديثنا عن قوة الصلات بين مواطني هذا البلد وشعارات السودان الواحد الموحد وتعالي لنناقش الامر بقليل من التفكر في مجريات الاحداث بعد موت (قرنق ) وعلى ما اظن انه نقاش يطول وربما فتحنا الحديث عنه في بوست منفصل اذا شاء رب العباد ..
(وجعتي يديني يا سالي الله يسامحك)
- ارسم مستقبلي ... بهدوووووووووووووووووووووووووء .. وهدف واحد ساعي لتحقيقه ان اصل الى مرحلة من الاستقرار تمهد لي العودة وعيش ما تبقى لي من ايام بهدووووووووووووووووووووووووووووووووووووء
- (بكل صراحة) .. اذا كنت تقصدين المنتدي العام على جماله غير انك بقليل من الملاحظة ستجدي بعض العيوب هنا وهناك .. مثلا احيانا تجدي ان قائمة المواضيع ومضمون المواضيع متشابهة الى حد كبير وبعد فتحك لموضوع او اثنين ستشعرين بقليل من الملل .. وبعض كتاب المواضيع استخدامهم للغة الموضوع استخدام يشوبه بعض السوء مما يفقدك الاستمتاع بمحتوى ما كتبوا .. اخطاء املائية هنا وهناك .. اخطاء نحوية هنا وهناك .. ركاكة في الاسلوب في بعض الاحيان .. عموما الشكل العام جميل جدا وهنالك جهد مقدر مبذول من قبل المشرفين لاخراج المنتدى بشكله الامثل .. واملي بان يكون منتدانا (زينة منتديات المواقع ) وهذا بقليل من الاهتمام سيتحقق باذن الله ..
- اومن تماما بالمقولتين اللتين ذكرت .. بعض الاشياء تورث هذا لا شك فيه .. تحقق ذلك في شخصيتي الى حد ما فاخي الاكبر (احمد الزعيم) كان يكتب الشعر احيانا وهو شعر جيد على ما اذكر ايضا اختي التي تكبرني مباشرة (فائزة الزعيم) كان لها محاولات جادة في الكتابة وانصرفت عن ذلك الان .. وقبل ذلك كله فوالدتي (فاطمة مهدي) وبرغم انها امية الا انها كانت تنثر شعرا عاميا في مناسبات معينة كان ترثي عزيزا لديها رحل او تفخر باخوتها واهلها .. وفي ذات الجو نشات ولكنني كنت اكثر جدية من بقية افراد الاسرة وحاليا هناك اخي (فائز) وهو طالب بكلية الغابات بجامعة الخرطوم اعتقد انه يكتب بصورة جادة واتمني ان يصبح شاعرا مميزا في مستقبل ايامه ..
- السودان بعد خمسين سنة .. السودان بعدين خمسين سنة .. طالما اننا لا زلنا نقتتل في (الفارغة والمليانة ) اعتقد انه سنظل كما نحن .. ( وربنا يكضب الشينة يا سالي )
اختي سالي اتمنى حقيقة ان تكون اجوبتي بعمق اسئلتك ..
وبالمناسبة ما خايف منك .. راجيك
اقعدي عافية يا سالي وشكرا لهذا الجمال ..

كاظم

06-12-2005, 05:20 AM

مزوني الحبيب سلام واماني صادقة بدوام التوفيق .. والله يا مزوني حرب شديدة وجابت الادمن مرة واحدة كدي وانا سوباوي وسالي ما مريحني ..
بالنسبة لاسئلتك اللذيذة جدا ..
- السياسة في زمان مضى احببتها اذا جاز هذا التعبير ولا اخفيك انني كنت مؤمنا جدا بحقيقة انها من الممكن ان توصلك الى تحقيق اهدافك على المستوى العام كأن تؤمن بقضية ما ومن ثم تنتهج منهجا ما لايصالك الى تحقيق ذلك وانخرطت فعليا في واحد من احزابنا السياسية بالسودان (ايام دراستي الجامعية) وبعدالغوص بداخله شعرت بان انضمامي اليه لم يكن موفقا خاصة بعد قربي اكثر من خطه الفكري وبرنامجه فتركته وانضممت الى تنظيم اخر وواصلت العمل به الى تاريخ تخرجي ومن ثم تضاءلت الفكرة بعد ضغوط الحياة العادية .. استفدت من التجربة حقيقة يا مازن وخسرت ايضا .. ومابين الكسب والخسران تكونت افكارا عدة ربما تناقشنا فيها في مدى غير الذي نحن فيه ..
- هلالابي انا يا مازن ذي ماذكرت في واحد من الردود .. وكرة القدم هنا في استراليا ما عندها معجبين كتار يعني معظم الاستراليين مجانين برياضات تاني ذي الكريكت والركبي .. حتى لما غلبوا الاورغواي قبل كم يوم وخشوا كاس العالم بعد غياب طويل عنو كانت الفرحة اقل من فرحتهم بفوزهم على الانجليز في الكريكت وغالبا ضغط الحياة على المهاجرين الزينا ما بديهم كبير مساحة في انو يهتمو بالرياضة كتير ...
- اها اسئلتك بقت صعبة يا مزوني .. الاسئلة المحرجة كتيرة من قبل الطلبة الغلبة .. كدي بجيك راجع يا حبيب ..

اميمه عشريه

06-12-2005, 05:29 AM

في بلد تموت من البرد كيف تسلل الدفء الي كتاباتك ؟
لمن تكتب ؟؟ ولماذا تكتب ؟ ومتي تكتب ؟
نص اعجبك جدا احسست انه يشبهك وتمنيت لو انك كاتبه ...( غير المغربيه ديك بالله ) هاها
هل الحزن يا كاظم اداه تعتبر الاهم في الكتابه ام الفرح من يا تري يجد طريقه سهلا معبدا الي حبر قلمك ؟
دمت ... وساكون حتما في الجوار يادوب ابتدا المشوار

كاظم

06-12-2005, 10:20 PM

مزوني العزيز سلامات مرة تانية ..
- نرجع لقصة الاسئلة المحرجة من الطلبة ويا مازن تعفيني لسببين الاول انها عايزة ليها شرح يطول لانو حاضطر احكي ليك السؤال ومناسبتو وكده والتاني ما قدرت احضر ليك هسة موقف من المواقف من المواقف دي ووالله ما زايغ يا حبيب ..
- بخصوص سدني .. بالمناسبة ازيع ليك سر على مستوى طقسها فهي اقرب ما تكون لطقسنا بس بردها شوية صعب .. وهسة يا مزوني انا بكتب ليك والدنيا برة سموم مبالغ فيهو .. اما التأقلم على المستوى الاجتماعي فيعني عانيت في الفترة الاولى لاختلاف الثقافة واللغة وغيرو بس شوية شوية المسائل وقعت لي وهسة اخوك تمام التمام ..
مزوني والله اسئلتك بالجد اخف اسئلة وشكلك مجامل وما بتحب ترهق المعاك ..
تسلم يا مازن وما تنقطع

كاظم

06-12-2005, 10:40 PM

ابومنار .. تحياتي وفائق احترامي لك .. وتحياتي للامورة جدا جدا جدا منار وربنا يخليها ونشوفها عروس كده .. مش هي الفي الصورة دي ؟
- جون هاورد .. ربما نظرتك سليمة الى حد ما .. هذا الرجل استطاع في فترة وجيزة ان ان يقود اقتصاد بلده الى الاستقرار بل والتقدم ..هذا النجاح على ما اعتقد خلق في نفسه نوع من الزهو فتراه دائما (منفوشا) ومتبخترا ومتحدثا بثقة اقرب هي الى الغرور منه الى الثقة .. الشعب الاسترالي من ناحية طبيعته منقسم .. السكان الاصليون مسالمون جدا ويقبلون الغريب بمنتهي اليسر خاصة وهم (ماخواجات زرق زينا كده ) .. الانجليز ( واللي هم ديل احفاد اللصوص الجابوهم للسجن هنا) سكان المدن منهم عنصريون لحد بعيد ولكنهم مقيدون بقانون صارم جدا منعهم من اظهار عنصريتهم وعنجيتهم على الاجناس الاخرى الا فيما ندر ..( ووالله انا ما شفت الامريكان لكن الشايفهم انا ديل اظن اجهل من الامريكان) .. لا تعرف لهم دينا ولا ملة وجاهلون تمام الجهل بما ذكرت من جغرافيا وشعوب اخرى وما الى ذلك رغما ان بلادهم تعج بالمهاجرين .. نظرتهم الى الاسلام نظرة حذرة جدا ونظرتهم الى قضايا الشرق الاوسط بالطبع نظرة امريكية بحتة ..وقلة منهم من تجد انهم يرفضون انقياد حكومتهم للادارة الامريكية ..وبعد الاحداث التي ذكرتها كان التاثير على العرب والمسلمين في اطار ضيق جدا وغير مزعج البتة ولكننا نرى ان المسائل تزداد سوءا يوما بعد يوم فمع كل حدث ارهابي حول العالم تجدهم قد زادوا من تشديدهم الامني خاصة على كل من له علاقة بالعروبة او الاسلام..
- السؤال الخير عجيب والله هاهاهاهاه .. الفرق يا ابو منار انو فرق السما للارض بين السواكني والاسترالي .. السواكني اجمل وانقى واطهر من من كل الاستراليين ودي معايشة للاتنين يا بو منار ..
الغالي ابو منار دمت دايما بخير وعافية وتحياتي ابدا للاميرة منار
وابقي طيب ومتعافي

الاساسي

07-12-2005, 10:47 AM

الغالي جدا كاظم
تحيه عطره لك معبأه بكل الاشواق لك تحملها ذكريات لاجمل ايام العمر قضيناها معا اشتاق اليك كثيرا ايها الكاظم
واشكر منتدي ودمدني الذي الغي كل الحواجز الجغرافيه وجمعنا علي صفحاته مره اخري وذلك ليس بغريب علي
مدني واهل مدني .
عزيزي انت تعلم جيدا ان باستاطاعتي ان اجعل الكرسي الساخن كرسيا ملتهبا ليس بسؤالك احد الاسئله بل بان اعيدك لايام جميله عشناه في ربوع مدني واذكرك بماضي جميل لن يعود .
لا اريد ان اطيل عليك فانت تعلم لو تحدثنا عن تلك الايام فلن تكفي تلك الساعات لاجترارها
واسألك اذا اعطيت الخيار لتغير شئ في حياتك ماذا تحب ان تغير

بتقولي لا

عزيز عيسى

07-12-2005, 01:06 PM

الاخ العزيز جدا كاظم،

أحيك أجمل تحية من بلاد العم سام وأنت تجلس علي الكرسي الساخن سخانة استراليا في عز الصيف.. والحمدلله أخوك مرّ من زمان بالمرحلة دي ومازلت أشعر بحرارة الجلوس علي الكرسي..

أنا واحد من المعجبين بأسلوبك ومداخلاتك الشيقة وجرأتك في النقد البناء خاصة نقدك حول ردود الاعضاء علي المواضيع المكتوبة في المنتدى..

أسئلة خفيفة:

1) بعد أالهجرة الى أستراليا.. هل تعمل الآن في مهنة التدريس هناك أم في مهنة أخرى.. وأيهما أفضل لك نوع عملك الذي تؤدية الآن أم التدريس؟

2) كيف تصف علاقات السودانيين في استراليا.. هل هنالك علاقات وتواصل مستمر فيما بينهم خاصة الأسر السودانية..

3) هل توجد مضايقات من ناحية الاستراليين البيض تجاه القوميات المهاجرة من افريقيا..

4) أذكر لنا حادثة حصلت لك أول مرة عند قدومك الى أستراليا..

5) كم (كنجاور) الآن حايم خلف منزلكم؟

ابراهيم لسه ما ظهر.. الله يحلك من أسئلته.

ولك مني فائق التحية والتقدير،

عزيز

صالح ابوشوارب

07-12-2005, 10:10 PM

عزيزنا كاظم

ليك منى السلام ومن الامورة منار السلام

وبعدين موضوع فرق السواكني والاسترالى

يا راجل في خروف جميل ونقي وطاهر

ها ها ها ها ها ها ها ولا انت قصدك !!!!!

يظهر انت عايز تعملينا مشكلة مع ناس جميل

==========

وبعدين باى صفة دخلت استراليا وعن طريق اى بلد ؟

------------------

ابو شيبة

saly

07-12-2005, 10:22 PM

كاظم وهج الكلمة وكت تتغنى
بالخير الكثير وحلى المطرة التشيل
وشيل من شوقنا ليك
وخلى مطرتنا التسيل
انتو لما الدنيا تقسى
غيركم انتو منو البشيل
كثير من فيض رؤانا
وامزج الكلمة بحنانا

ضع من القائمة (أ) ما يناسبها من (ب)

القائمة (ا) ----------------------------------------------------- القائمه ( ب)
الوطن ----------------------------------------------ياريتني لو اقدر اقول فيك الكلام الما انكتب

الامل -------------------------------------------------------- زي عصفورة تطير وترك

مدني ------------------------------------------------------- يا موت لو تركتو مننا قد سرقتو

القلم ---------------------------------------------------- منو الغيرك بيفتح باب عزابي الحي

لحرية ---------------------------------------------------------- تحبا وتمسك وتاني تفك

زبد البحر أبيض
ملح الارض بين اللونين
قيل لي أن الطفل
في شاطئه أيضا أبيض؟

فهل هذا صحيح ؟
في اي اللحظات تحتضن المعاناة كي يولد ابداعك مكتملا (تسعة شعور وتسعة ايام).

زول زيّك .. مليان أدب ، مسكون فن ، ومترع بالحب
كيف بفيض النيل وإنت ماسك إيدو من أقصى الشمال ؟ ( سؤال افلسفت فيهو شويه معليش )

ومتى تعود من الغربة وتطلقها طلاقا ابديا ؟

نظرتك لأدباء مدني؟

لمن تقرأحينما تدخل منتدي ودمدني لأول وهله ؟

من بمنتدي ودمدني يهمك رأيه جداً ؟

ماذا اخذت منك استراليا وماذا اعطتك ؟

اذكر اي عيب في؟؟؟؟

المنتدي العام,,,,,,, الثقافي ,,,,,,,,الرياضي,,,,,,, ودمدنيات,,,,,, الترحيب و التهاني

في الختام

لو قلت لك ان تهديني احد اعمالك فماذا تهديني ؟ :)

كاظم

07-12-2005, 11:57 PM

saly

08-12-2005, 12:07 AM

ابوروان وباقي الجماعة ..
يا اهلنا ياخي بالراحة علي .. الكرسي الساخن ده انا متابعو فردا فردا ما لقيت زول بزرزروا فيهو جنس الزرزرة دي ... يعني في المنتدى ده الواحد الا يقول الرووووووب .. ابوروان شوف لينا حل ياخي ..
ورغم هذا ..
احبكم جدا ...

ههههههههههههههههههههه قربت اقع من الكرسي من الضحك
وانت شفت شي
ابوروان بعدين جايك بالتقيل و حيمدد ليك فتره اسبوعين تانيات

اها جيتك بالبشره ولا لا

كاظم

08-12-2005, 12:21 AM

العزيزة اميمة عشرية .. عاطر ودي لك اينما كنت ..
سؤال زميل المهنة دايما بكون صعب .. لنفس الاسباب التي جعلتك رغم الذي كان تكتبين كل هذا الجمال استطعت انا اصنع عالمي الخاص وجملته ايما تجميل ..اجعله صيفا بمزاجي والدنيا وراء نافذتي تتهاطل ثلجا .. وبنفس المزاج اكسو الشجر اوراقا بهية الاخضرار والشجرة التي تطل من نافذتي وحيدة ومنتوفة الاوراق .. وهكذا ..
لمن ؟ ولماذا ؟ ومتى؟ .. لكل ما حرك في احساسا ولو ضئيلا .. اكتب ..
منقادا الى ورقة بيضاء وقلم .. وموضوع ... اكتب ..
(حالة) اجزم انها تحتلك ايما احتلال تقودك لان ... تكتب ..
- كثيرة هي النصوص التي اعجبتني .. وكثير الذي تمنيت ان اكون كاتبه .. ربما لن تكفي هذه المساحة لايضاح ذلك ( صدقي يا اميمية في كتابات ليك ولسوباوي لابراهيم ولرايعين تانين في المنتدى ده اتمنيت انو اكون ولو مشارك بس في كتابتها ) ..
- الحزن .. ذكرت في احد ردوردي انه ركن اساسي من اركان الالهام .. الفرح قد يأتي في مرتبة ابعد قليلا .. الا ان لكل حالته .. (اميمة حارجع ليك السؤال ومستني ردك) ..
- وطالما انك وعدت هذا الوعد الزاهي بان تكوني الى الجوار فلن اقول كعادتي .. ابقي قريبة ..

كاظم

08-12-2005, 12:29 AM

محمد عمر (المطوفش) .. يشهد الله يا محمد عمر انا لمجرد انو بس اسمع خبر بعييييد من واحد فيكم الا وما بعرف امشي وين وبكون محاصر بحاجات اظن انت ادرى بيها ..
ويا .. بسمة في ثغر الزمن ..
منسوجة من عبق القصايد
الكلام ما انتي قلبو ..
ليك القصايد يخضعن ..
تبتديك انتي الكتابة .. والمعاني تدقي بابها
وتشتهيك
(خالد عوض الله) (حاتم اسماعيل ) (محمدعبدالسلام) (رامي جعفر) (نجلاء ميرغني) (اماني علي)(امير محجوب ) و(............
احبكم جدا وافتقدكم جدا ..

كاظم

08-12-2005, 12:34 AM

سالي انتي بتهظري ولا جادة ؟ والله حرقتي اعصابي عديل كده .. يا سالي والله اخوك بقى ذي الممتحن شهادة سودانية بعد بكرة وما قاري التكتح ...

كاظم

08-12-2005, 01:03 AM

استاذنا العزيز جدا/ عزيز عيسي .. تحياتي وامنياتي الصادقة ..
اها يا عزيز انت مريت بالمرحلة دي مفروض اقلاها تبصصنا شوية .. الشباب ديل تقول طالبني تار ..
استاذنا عزيز / كم المنافي الان بتوقيت بلاد العم سام؟
وهذه تجربة اخرى يبدو لي انك اجتزتها بنجاح احلم به انا الان ..
وشكري الجزيل على هذا الاطراء الحميم والذي ساضعه (نيشان ) على صدري طالما انه جاء منك استاذ عزيز ..
- بخصوص الاسئلة ..
- عملي الان لا يمت الى مهنتي الاساسية(التدريس ) لا من قريب ولا من بعيد ومهنة التدريس اخي عزيز لا يضاهيها في الجمال مهنة اخرى هذا استنادا على تحيزي لها وثانيا لالاف الاسباب الاخرى التي اعلم جيدا انك تعلمها .. الانبياء كانوا معلمون .. اول وحي نزل على حبيبنا المصطفى (ص) حمل في طياته عمق هذه المهنة وابعادها .. ووو ...اذن فالنصف الاخر من السؤال اعتقد ان الاجابة عليه صارت اكثر وضوحا ..
- هجرات السودانيين الى استراليا هي في مجملها هجرات حديثة جدا .. ورغم ذلك فان هنالك تقسيما للمسألة حسب الزمن .. اقدم فاحدث وهكذا .. المهاجرون الاقدم يمكنك ان تحس بعمق الروابط التي تجمعهم والتي صنعتها قلة اعدادهم انذاك فاصبحوا الى حد كبير مترابطون على المستوى الاجتماعي .. الهجرات الحديثة اولا تميزت بالكثرة فمن خلال تجوالك في مدينة سدني على وجه الخصوص ستكتشف ان اعداد السودانيين لا يستهان بها وهي جاءت بعد توسيع برنامج اعادة التوطين من قبل مكتب الهجرة هنا والذين استقبلوا في فترة وجيزة اعدادا هائلة من اللاجئين السودانيين والذين من الوهلة الاولى ستعلم ضعف الروابط التي تجمعهم اللهم الا في اطار محدود جدا عبر الجمعيات السودانية التي يكونونها لمساعدتهم في بعض الامور الحياتية ..
-الاستراليون البيض يحكمهم قانون صارم وعنيف فيما يختص بتعاملهم مع المهاجرين الى بلادهم وهم كثر .. ولكنك في اطار محدود تحس بعنصريتهم وعدم قبولهم للسود في بلادهم وحتى هولاء لا يستطيعون التعبير علانية عن ذلك ..
- الحوادث كتيرة يا عزيز الحصلت لي هنا وطبعا بتكون انت برضو الى حد ما مريت بجنس المسائل دي .. وناوي بالمناسبة اعمل لي بوست خاص ببعض ما رايته هنا ..
- عارف الكنجر هنا بسيط جوة المدينة فلما نشتاق ليهو بنطلع على الحلال البرة نتفرج ..
- تحياتي الخالص للرقيق ابراهيم .. ولك اخي عزيز ,, وسعيد جدا بحضورك البهي ..
وابقي واصل

كاظم

08-12-2005, 01:22 AM

العزيزة جدا والفنانة جدا سالي .. التحيات النواضر والتمنيات بدوام الصحة والعافية ..
طلاتك يا سالي تفرح الزول وتوترو والواحد يكون مركز انتي حتجيهو من وين المرة دي ..
رقيقة هذه الابيات وتحمل رائحة (دعاش) سادفع نصف عمري ثمنا لاستنشق عبقه مرة واحدة ...
- يا سالي القايمة (ا) (باء) بالجد صعبين .. بحاول ...
* الوطن .. ( منو الغيرك بيفتح باب عذابي )
*الامل .. (ذي عصفورة تطير وترك)
* مدني .. ( يا ريتني لو اقدر اقول فيك الكلام الما انكتب )
* الحرية ..( تحبا وتمسك ... وتاااااااااااااني تفك)
القلم .. ( الجملة الفضلت دي ابت تركب معاهو قدر ما حاولتها .. اها الراي شنو يا سالي ) وبالمناسبة لو مريت كلميني ..
ساعود

سوباوي

08-12-2005, 01:34 AM

أخو دمي كاظم ...

تحيات موشحة الورود إليك .. لا يفوقك في زرزرتك هذه إلا زرزة المديون ساعة ضيق .. ولكني أرى أجاباتك رحيبة

بدرجة تستحي منها الرحابة ..

عزيزي أعود إليك ببعض أسئلة في الخاطر تتقافز استفاهماتها في الذاكرة بين حين وآخر ..

سأعود بك لذاكرة قد يجوز ولا يجوز أن تنقلك إلى أحداث أثق في دواخلي أنها لا تبارحك وقد تهيج فيك الكثير

فقط لأنها ستحتلك بمساحة لوطن نقبض على جمره جميعاً ...

الراقي كاظم .. ما آثار تجربة عام 1997م وأنت بين جدارن المعتقل على :

1/إحساس الكاتب بداخلك ؟

2/ على الحس الوطني بداخلك وهل تعتقد بعد التمعن في هذه التجربة وبينك وبينها العديد من السنين أنك أو قل أننا

كنا على حق وعلى أضعف الإيمان أوصلنا صوت اعتراضنا .. أم أنهم كانوا على حق وأنجرفنا نحن نحو نزواتنا

السياسية أو بمعنى آخر هل كان الوعي السياسي والحس الوطني بغض النظر عن اللون الحزبي كافي ومستوي

النضوج لخوض تجارب مثل تلك التي عايشتها؟

3/ من وجهة نظري الخاصة والخاصة جداً أن الوطن يعاني الآن من أزمات عديدة أولها يعاني من أزمة قيادة وثانيها

أزمة وعي وطني وثالثها أزمة سياسين محنكين يقودون زمام الأمور وثالثها أزمة أخلاق ولا أسند تحليلي هذا لتصنيف

السودان في مؤخرة الدول التي يستشري فيها الفساد ولكنها النظرة لواقع محسوس لسفينة تعاني من تلاطم الأمواج ..

ما وجهة نظرك في هذه القضية ؟

4/ ومن وجهة نظر خاصة جداً أيضاً أن ما يحدث الآن من منازعات قبلية عرقية أو أقليمية هو إنعكاس حتمي لتمزيق

الحكومة لكينات محددة أو دعني أقول : أن الإنسان والإنسان السوداني تحديداً بطبعه كئن اجتماعي ولا بد له من

تحقيق أو توظيف موفور ما يملك من نظرة أو منطق أو أي شيء بتكتله مع فئة محددة يجد فيها تحقق أماله وطموحاته

على مستوى المصلحة العامة .. وتفتيت الحكومة في فترة ماء للكيانات الحزبية وحلها للنقابات والاتحادات هو السبب

الذي أدى أو قد يكون أحد الأسباب التي أدت إلى هذه الجراح التي أثخن بها الوطن أخيراً قبلية أو اقليمية ؟

الجزء الأخير من السؤال ودعني أخرج بك من الحدود السياسية قليلاً ..

الأليف كاظم .. ولأطرح السؤال على نفسي وعليك عن وجود العلاقات الاجتماعية في الشاطيء الآخر "السودان"

ونحن في غربتنا هذه نمني أنفسنا بتواصل كل مدخراً من الجميلين الذين تركناهم هناك ..

هل كل الذين في الضفة الأخرى يمارسون تواصلهم تجاه بعض بتجلي واضح ودون شوائب؟؟!! ..

هل القرب يسلب الأشياء بعض ودها ويأتي بوجهه المغاير تماماً وهو الضد لأفعال التواصل طالما هو متاح؟! ..

هي النفسية الآدمية المعقدة في معظم الأحيان .. واشتهاء النقيض عند الوصول الإرادي إلى ضده .. يقول مصطفى

محمود في إحدى إصداراته الأولى .. يحس الإنسان بالإحباط مرتين .. عندما يفشل وعندما يصل إلى غاية ما يريده فها

قد وصل .. وهكذا نحن نسير في كل الاتجاهات ولا تعجبنا .. وتقول الأديبة الجزائرية أحلام مستغانمي في (فوضى

الحواس) يجب أن نترك مقود القيادة للقدر فعندما نستعجل الأشياء في كثير من الأوقات نصل متأخرين عن أحلامنا

بخيبة .. وأقول أنا سوباوي صاحب التجربة غير الناضجة تماماً إلى الآن في الغربة

أننا نفني كل العمر لنصل

إلى نصف ما نصبوا إليه ونفني نصفه لنصل إلى لا شيء.. فكل المعادلات هزيمة ..

فما قولك أنت من خضم هذه التجارب التي تكتنفك ؟

أخيرا ً اخو دمي كاظم أعتذر إن اثرت فيك بعض الشجون أو أنكأت فيك بعض الجراح الغائرات

ولكن للتواصل معك طعم آخر يا صديقي

وأخيرا أقول :

فليكن تواصل الآخر هو ثروتنا الدائمة ..

يتم تحويجنا لبعضنا بالتواصل ..

تحياتي ،،،

يجوز أن أعود ...

الشريف الهندي

08-12-2005, 08:18 AM

بسم الله الرحمن الرحيم
عزيزي كاظم ،،، ابعد منك وين؟ ومن روعتك وذوقك وفنك الرائع تمنياتي ليك بالصمود أمام وابل الكلمات الرائعه مصاغة في شكل الاستفهــام خارجه من افواه أشخاص كانو للحب والـــود أهــلاً واراك مخلصــا لهم متنقلا بين الود لهم والصدق معهـــم فابعث الـيـك آلاف التقـــدير لشخصــــك الرائع الذي ترعـــــرع بين الذوق والادب والشعــر
لكن تتـــوق نفســـي لأن اغـــوص في قـــلب ذاك القلـــب النابض بالحـــب والحنان شخصـــك الجميل وأســأل عن مافي قلبـــك ! غير الريــــده للناس التي كونت لينا صوره عنها بأدبك وذوقك فعايز اعرف اكتر عن رومانسيك التي قد لاتخفى علينا مع أنك لم تتحدث عنها بحقيقة صورتها عندما سألتك سالي عنها،،،،فعرفنا منها فرحتك يوم تلقا زولين بتسالمو بحميمية وصدق وحبـــك لمدني الخلاك تتصور انها منحوته فيك . بالجد اديتني صوره جميله عنك فبديت ارسمك في داخلـــــي صوره جميلة فياريت تساعدني وتحاكيني عنك أكتر واكتر
وخالص تقديري لسحابه طلت علينا ظلتنا،، ومن قطرات الحب أمطرتنا ،،، فياريــــــــت
أبور وران يطول لينا فيها كمان وكمان

كاظم

08-12-2005, 03:31 PM

الرائعون دوما ... ( فرحي بيكم سال ملا حتى الكبابي) ..
سأحاول في يومي الاخير على ( الكرسي الوسير ) للاخ ابوروان ملاحقة اريحية هذه (الونسة ) الحميمة .. سأحاول ملاحقة اسئلتكم الودودة واعذروني ان تداخلت الردود ما بين هذا الجميل وتلكم الرائعة فلكل منكم مقعده الفخم في قلبي ...

كاظم

08-12-2005, 05:13 PM

العزيزة جدا ( والمشاكسة جدا جدا ) سالي .. صباحاتك بلون الورد .. لحديثنا بقية ..
- يا لهذا السؤال .. وتكمن المعضلة في ان تختلف القراءات حوله .. قراءتي وفق ذاكرة بسيطة وغير معقدة بتاتا .. (زبد البحر وملح الارض والطفل الذي على شاطئه ) .. سالي .. لاتعليق (ان كانت هذه اجابة مسموح بها في مقامكم هذا)
- سالي .. المعاناة التي اعرفها لا تحتضنها انت .. هي التي تحتضنك وتهشم اضلعك وذكرياتك واشيائك الجميلة .. وبالمقابل فرغما عن خسائرها هذه تجد انك قد اضفت الى قاموسك الكثير من القيم والكثير مما يستحق ان تعيش له .. والمعاناة الحقيقية تظل عالقة تماما بكل ما تكتب ويظهر ذلك حتى في تعبيرك عن اشياء لا علاقة لها اصلا بالمعاناة .. قدرتك على التعامل مع المعاناة وتطويعها ان جاز التعبير هو المخرج لخلق التوازن المطلوب في دواخلك وهذا يشمل جميع خلق الله وليس المبدعون فقط .. وكسائر خلق الله وخاصة بانتمائي الي بلد تتنفس فيه المعاناة والاوكسجين في ان معا كنت من ضمن من احتضنتهم المعاناة وخلقت معها علاقة لا باس بها وتعاهدنا على ان اتركها لتأخذ دورتها وتتركني على ان تترك معي بعض ما يخصها ..
- يا سالي وهو انا كان عارف حاطلق الغربة متين كانت دي حالتي ؟ .. لكن قالوا ( السايقة بتصل ) وده بالمناسبة مثل سوداني ممكن تضيفيهو للبوست بتاعك حق الامثال السودانية ومعناهو انك اسعى وبتصل ..
- أدباء مدني .. كثيرا ما يساورني احساس غريب بان ارض هذه المدينة حين خلق الارض فتقت من رقعة الالهام .. جربي هذه التجربة ادخلي الي اي بيت من بيوت هذه المدينة ستجدي اما شاعرا او مغن او قاص او رسام ولو من باب الهواية .. وعلى ذات النسق من تعامل منهم باحترافية ستجد انه خلق لنفسه مكانا في خارطة الابداع .. هذا ليس رأيي فقط انه رأي الجميع في مبدعي هذه الفاتنة سليلة النيل الازرق ..
- ( كيف بفيض النيل وانت ماسك ايدو من اقصى الشمال) .. من قال لك انني امسكت يده من اقصى الشمال .. ؟ للفيضانات مواسم .. ومواسمي ربما تاخرت قليلا .. وربما هي امنياتي بان تكون مواسم الفيضان التي ارجوها مسالمة وطيبة كأهل بلادي .. ففي خاطري دائما قول (حميد):
تنبت شتلة .. لا هدام .. ولا فيضا يفوت الحد ..

- خلاص يا سالي قمتي على الزرزرة والقبقيب من اللياقة ونحن وسط السوق .. هسة ما كنا رايقين ...
عارفة انا بتعجبني العناوين المثيرة ذي باقي السودانيين .. وفي ناس متخصصين طبعا في انو يشدوك بعنوان ذي ناس جريدة (الدار) المرات يكتبو ليك : بالصورة والقلم ..( امرأة تلد عتودا بامبدة .. ) .. (هذا على سبيل المزاح يا سالي ) .. هوايتي بطبيعة الحال البحث اولا عن قصيدة او قصة قصيرة او موضوع له علاقة بالادب .. ومن ثم ابدا في تقليب المواضيع الاخرى بصبر .. المعرفة اختي سالي تكمن داخل كل ما هو مكتوب وصدقيني لم افتح بوستا واحدا ايا كان موضوعه الا وخرجت منه بفائدة ما وعلى مستويات مختلفة .. تعجبني بوستات ابراهيم وسوباوي واميمة عشرية وعمر غلام الله وعشوشة ولواء وسالي وابوروان .. وتعجبني مداخلات صالح ابوشوارب وعزيز عيسى ومزوني .. مغرم بحميمية نيازي كشك وفاقد حنان .. وحبيبة الى نفسي اغنيات خالد حمد موسى .. واحب جدا رقة الاخ صلاح .. سأفرد لاحبائي الاخرين صفحات اخر ..
- عيوب (هههههههااا) كتيرة الكلمة دي يا سالي على المنتديات دي .. تعالي نسميها ملاحظات او اي حاجة غير ..
سمات كل منتدى في رأيي من الاجدى ان تكون بعنوانه وهذه رسالة الى كل الاعضاء لتصنيف كل عمل حسب مضمون المنتدى ومن ثم نشره .. هذا اجدى في تسهيل التصفح على رواد المنتدى الاعضاء او الضيوف .. بس.
- بهديك اجمل مافي العمر اختي سالي .. لكن ده نص عفيتو ليك لوجه جمال الود ..

صلى الحمام ... سلم
بحزنو اترنم
لملم جناحو وطار ..
على قبلة ما بترحم
غمض عيونو وطار ..
لكنو كان بحلم
يشرق صباح النور ..
تبقى البلد ارحم

طار الحمام كم طار ..
في الضلمة اتخفى
شايل همومو غريب ..
من موجة لى مرفا
طاير مخلي بلاد ..
خوفا .. بقت منفى
سفرا قليل الزاد ..
وجرحا بعيد يشفى

قدرك تطير يا حمام ..
وتزامل الغيمات
تدي الافق منديل ..
تدي السما النجمات
وتنوح وحيد يا حمام ..
تبكي الزمان الفات ..
وتشيل جواز الريح ..
ما اصلو وطنك ......... مات.

سالي العزيزة جميل هذا الحضور .. وانيق حد الاناقة هذا المدى ..
فلك الجمال .. ولك الاناقة .. ولك المدى ..
وكوني دائما بخير ..

كاظم

08-12-2005, 05:38 PM

سوباوي ..
( محاصر فيك ..
بسأل عن سكة تطلع منك ..
اوسكة تودي عليك
بسأل عن مخرج منك وليك
ذي نهر بينبع و مالاقي مصب ..
بتمدد عشقك ..
من اقصي ضواحي الروح ..
لى اقصى نواحي القلب ) .. ازهري
- ولمفرداتك الوهيطة فعل السحر في انحاء روحي .. كيمياء متشابهة اطالع ادلتها عبر هذه الاستفهامات الموغلة في العمق الى (اقصى نواحي القلب) .. في تعريف قديم للانسان حينما فشل الفلاسفة في تعريفه بخصوصية تميزه عن بقية الكائنات الحية ركنوا الى تعريف واحد وهو( انه الكائن الحي الوحيد الذي يستفيد من تجاربه ) .. وفي ذات الاطار تدور اسئلتك دائما دليلا على انسانيتك الكاملة من غير نقص ..
- تجربة 97 وما شابهها من تجارب في ذلك الزمان( اللديح القيح) خلفت ما خلفت في دواخلي .. وربما تعرضت انت لتجارب على شاكلتها لتشاركني احساسها ..
سوباوي سأعود ( ضيوفا دقوا بابي)

ismail

08-12-2005, 06:48 PM

السلام عليكم الاخ كاظم حبابك الف الله يعينك

aborawan

09-12-2005, 09:52 AM

الغالي كاظم احييك على هذا الصمود وماشاء الله رغم الزرزرة في الاسئلة شايفك لسه ما انزريت واحب من هذا المنبر ان ازف لك خبر تمديد فترة استضافتك شهرين تاني كمان :):) وشيل شيلتك والله يعينك طبعا حالياً التمديد حا يكون اسبوع وده مني انا براااااااااااااااااااااي :):) لو الاعضاء طلبو الزيادة الا ترحل يا عمك :):)

تحياتي يا غالي

saly

09-12-2005, 11:45 PM

يبدو انك ..
مهر جامح في صهيلو
فكرة عابرة ما بيه تطلع
شوق سنيني الراودنك
بس مجرد إنت توفي
لو تأكد ...
اني كايس في رحابك
وعد اخضر
يبقى أجزم ..
إني مسكون بي وجودك
وإني بترجاك خاطر
واني ساكت
ساك دروبك في منامي
وليلي ماطر
ساهي محتار في البدسك
حقو تديني ارتياحك

غايتو عفارم عليك يا ابوروان ويا كاظم شفت كلامي ما وقع الواطه و لسه انت قاعد

عشان كده حبيت اكون اول المفتتحين هنا لاسبوعك الثاني.

حاجه فيك تقطع نفس خيل القصائد
تشده أجراس المعابد ...
متي ينقطع نفس خيل قصائدك

في مرحلة ما ،، يقف الإنسان قليلاً مع دواخله ،،، وما بين تلك الوقفة والإستمرارية يأتي ألق الإحساس بالتأمل للمعاني وما تحمله دواخلنا بمختلف ألوانها .....
هل مررت بذلك المنعطف ؟؟ أم واصل مطرك الهطول دون رزاز ؟؟؟ وإن كانت هناك وقفة،، كيف كانت خطاك تجاهها ؟؟؟

كيف الفرح عندك بكون ساعة دخولك للمنتدي ودمدني ..
والمساءات والنهار كيف بي حروفك ببتدو ؟؟

لو ارسمك كيمياء البنفسج والرماد
فيزياء البعاد
دورق تفاعل للحنان
عدسة بتشتت لوعة الحب والشجون
كان الحديث يصبح
جنون
لو ارسمك

بتخاف من شنو وبتفكر كيف ... ومتين بتتخذ قراراتك ... وما هو أصعب موقف مر بيك .. واطرف موقف كذلك ؟؟؟

ماهو رأيك فى هجرة الكوادر السودانيه عن الوطن ...؟
ولماذا نحن كسودانيين بالتحديد نجد صعوبة في العودة من الغربة ؟
اول سنه عشتها هناك...في الغربه غيرت فيك شنو؟

انا من متين واقف حداك؟
متلهفك ...!
كب الوجع .. شان أغرفو
واملي الفراغ ..
عبيه تـبّْ .. بي طلعتك
برسم على الهامش .. شعار
حرفين قيام ..
خط في الوسط ..
لون في الإطار

لمتين ح تتحمّل خطاك وجع البعاد ؟
أستراليا.. البعبع ، الحلم ، الحضارة ، الحقارة
أي واحد من الحاجات أعلاه ممكن تحدث فيك ثورة ضدّها ، معاها ، ولييه ؟

من هو الانسان الذي ترك اثر في شخصية كاظم ولماذا ؟؟؟

لمن أبوح لى نفسي بى
شوق السنين
واعبر معاك خط الافق
بي فد جناح ..
زي ليلي داك ..
الخاتي عينو على الصباح
أعفيني من همّ الوجع
لمني لو هاجت رياح

كلمة لمن ...................... تقولها ؟؟؟ ( سبت ليك المجال مفتوح ) بس اوعه توجهها لي و تقول لي فكيني من اسئلتك دي

وبرجع ليك تاني
لي عوده

كاظم

10-12-2005, 12:59 AM

سوباوي .. بنواصل في سكك تانية ..
سؤال :
رحلتو ؟

كاظم

10-12-2005, 01:09 AM

كاظم

10-12-2005, 01:20 AM

اسماعيل تحياتي يا راجل ..
وامتناني الكثير لوقوفك ودعواتك ..
كن دائما بخير وابقي قريب يا سمعة

كاظم

10-12-2005, 01:26 AM

ابوروان العريس .. تحياتي ياخي وامنياتي انو ربنا يهنيك دنيا واخرة ..
وتاني والله يا ابوروان غايتو الزرة الختيتني فيها حياتي ما مرت علي .. واظرف حاجة الشباب يسألوك عن المواقف الصعبة المرت عليك .. وهو في اصعب من كرسيك ده يا محمد ..
على العموم انا حارفع ليك صوت احتجاج واطالبك بانك تتدخل لو حسيت انو ضيفك دايرين يودوهو علي ركن ويقزقزو بيهو .. يا ابوروان انا ضيفك ياخي .. ولا شنو؟

كاظم

10-12-2005, 01:28 AM

سالي العزيزة (صباحك سكر ) ..
خليني اول اطلع من اندهاشي بالنصوص الكاتباها دي وبعدين ارد ليك ..

saly

10-12-2005, 01:41 AM

سالي العزيزة (صباحك سكر ) ..
خليني اول اطلع من اندهاشي بالنصوص الكاتباها دي وبعدين ارد ليك ..

الاخ كاظم

لا تندهش !!! فحينما نبحث عن الحرف فى ذاتنا ...ونجده،، حينها يكون ليس للكلمة وطن ،،، او مقر ،،، او افق ،،، هل عرفت كيف ان الاندهاش يولد الرؤيه فى ارقى معانيها ــــ فقط كن معى ـــ ومارس الاندهاش بالنقاء الملائكى يا وريف
أدهشتني انت في الاول حتى صارت الدهشه غير معبره عن ذلك الانفعال مقدرتك على تطويع الأحرف والكلمات لتعبر عما يجول بخواطرك
قولى اى حاجه ...واى حاجه منك بتدى الكلام نغم

اميمه عشريه

10-12-2005, 02:22 AM

بس بعايييييييييييييييييييين بعيوني !!!!!!!!!!!!!!!!

saly

10-12-2005, 02:29 AM

بس بعايييييييييييييييييييين بعيوني !!!!!!!!!!!!!!!!

يا اميمه عليك الله ما تجرسي الولد ده

waheeb

10-12-2005, 03:34 AM

اخي كاظم ها قد عدت اليك .. فاجأني ذلك السيل الجارف من الاسئله ولكني تمتعت حقاً بمتابعه ردودك .. اين كنت تخبي كل هذا يارجل .. تمنيت جلوسك في هذا الكرسي من زمان ... وانا اول المؤيدين لأخونا ابو روان في زايدة المده شهر آخر حتي نرتوي من نبع تلك الحروف العذبه...
وذي ما قالت أميمه بس بعاين بي عيوني..!!!!

لواء

10-12-2005, 05:03 AM

الحبيب الرقيق / كاظم

الآآآآآآآآآآآآآآآآآآآن جاء دورى ،،،،
كنت ارقبك بعين الدهشة وانت تتمطى بين الحروف ،، ثم تتثاءب طووووووويلاً ،، ( ويا لروعة التثاءوب حينما يجئ منك ) ، وانت تنهض بكسل نشط ،، ثم تضع قبلة الصباح على خد كل من اصابته الدهشة فى منتدى ود مدنى بروعتك ،،،، دعنى اضع لك افطارك الصباحى على مائدة شوقى ،، واطعمك من يدى شهداً بين الجمال الحرفى ، الذى سطرته اناملك ،، ( كنحلة ) تقاسى الألم حينما تلد!!!!!!!! الشهد المعبق وداَ ،،،،،
تنقلت عبرك فى تلك امساحات التى اخذتنى بعيداً ،، وتلك المحطات الرائعة فى قطار حبك ،،، ( محمد عبد السلام ) إييييييييييه يا صاحبى منه ،، صديق الطفولة والدراسه والفكره ،، كان اول من اقابله عندما افتح باب المنزل ،، وآخر من افارقه ،،، كم جلسنا الليالى نتحدث عن ذلك ( الحلم القادم عبر جبال الالب ) مصطلحٌ كنا نطلقه على احلامنا ،، واتفقنا على تسميته ،،، يتحدث فى ذلك الليل ،، الحبيب ( هشام عمر الحاج ) ثم ( خالد عابدين ) و ( محمد عبد السالم بابكر ) وشخصى الضعيف ،،، ثم افترقنا ،،، انا اولهم الى سوريا ،، ثم لحق بى خالد عابدين ،، ثم هشام الى الهند ليدرس حلمه ( هندسة الطيران ) وبقى محمد عبد السلام وحده ،، الى جأءنى ذلك الخبر الذى نقص نومى ،، هل تصدق اننى وفى ظرف يومين ،، تلقيت اسوأ الانباء منذ خروجى فى العام 96 ،، استشهاد محمد عبد السلام اولاً ،،ثم رحيل ( صفاء ) الإختيارى ، تلك الفتأة التى احببتها من كل قلبى ،،، ثم عدت الى السودان فى العام 2002 ،، لاجد هشام ،، اتم حلمه ،، جالساً فى ذات الركن الهادى ومعه خالد عابدين بعد ان فارقنى الى العراق ،، ولم اجد محمد عبد السلام ،،ذلك الذى كان يضحك حينما نتحدث عن احلامنا ،، ويقول ،، اذاهبوا انتم ،، وعندما تعودون ساكون بانتظاركم ،، عدنا ولم نجده ،،كان بانتظارنا قبره المعنون بالشهيد ،،، ومن عجيب الصدفه ،، وجدته يرقد وعن يمينه جدى ،، ومن يساره جدتى ،، كان هشام يشير الى قبره وهو يحكى تلك الاحداث التى حصلت بمراره ،،، حتى القمر كان يحكى ،، فقد كانت الساعة الثانيه عشر ليلاً ،، حينما وصلت الى مدنى ،،، ولم التقى باهلى سوى الساعة الرابعة صباحاً ،، فقد شغلتنى فروض اللقاء مع اولئيك الرائعون من الذهاب الى المنزل ،، حتى صاحب السياره الذى جاء بى من المطار ،، ذهب معنا الى المقبره ،، ووقف حداداً فى صمت وهو يشهد تلك التراجيديا ،ولم استطع حيناً الجلوس سوى اربعة اشهر ،، وكان الفراق من جديد ،،، وما زال محمد عبد السلام يشكل لنا رابطٌ ،، وما زال موجوداً معى ،،،، إيييييييييييهٍ يا صاحبى ،، عذراً ان اخذتك معى بعيداً ،، ولكن المؤلم فيها والمفرح ،، انك تعرف محمد عبد السلام بامه الرائعه الخاله ( الرساله ) واخاه بابكر وعمر ،، واخواته الرائعات ،،، احداهن استلمت الرايه ،، وما زالت تناضل ،، لها الله فى هذا الطريق ،، اما نحن فقد ( جبنا ) وآثرنا السلامه وخرجنا بعييييييييداً ،، ننعم ببعض الحرية التى افتقدها اهلنا ،، ولكن عزاءى اولئيك الرجال الذين صدقوا فمنهم من قضى نحبُه ،، ومنهم من ينتظر ،،، دعنى قليلاً استرح ثم اعود ،،، يبدو ان دورى لم يحن بعد ،،، احتاجك بكل الصدق لتحكى لى عن ذلك الرائع ،،،، والى ان يحين دورى ،، كن بالف عافيه ،، حتماً ساعود اليوم لاجلس معك قليلاً

ابراهيم

10-12-2005, 10:55 AM

في زحمتي .. وتوهاني في غيابي
وجدت نوراً .. دلني إلى هنا
وشممت رائحة ورد رمقتها في طريقي عن بعد .. الي هنا
كيف لا..! والسحر يغطي المكان بصاحب الحضور الاسطوري ..المفردة السحرية .. المدهشة
والنسق الموسيقي الدافيء .. في قصائده وتعقيباته
أسعدني تواجدك هنا وهذا المناخ الجميل (الواحة الدافئة) وليس الكرسي الساخن
الزعيم ....

اندهشت قبل يومين دخلت المنتدى في شوق عصيب وكنت على عجالة
فوجدت مكتوب: ( رحبوا معي بالضيف الجديد على الكرسي الاخ كاظم (http://wadmadani.com/vb/showthread.php?t=8235))
وتيب ما تورونا ياخ ...
من الدهشة ما قدرت اعمل حاجة وطلعت وجيت حسي بس عشان أحيي
واسجل حضوري ... لأنو دة حدث حرام يمش بدون ما نسجل فيهو توقيعنا
حزنت والله عشان تأخيري لكن لكم العتبى ..
تابعت هدير الأسئلة .. وأنغام التعقيبات استمتعت كثيراً ...
وهكذا انت دوماً كلما قرأنا لك إنفتحت شهيتنا العقلية والروحية للتلقى والاستزادة
وهكذا تنجب مدينتي ...
بس خليني امش الملم اشتاتي وارتب حاجاتي واجيك
وبيناتنا المحبة والشوق

كاظم

10-12-2005, 10:23 PM

الجميل جدا وهيب تحياتي ايها العذب ...
.. انا الان ابهى ما يكون واكثر وسامة من ذي قبل .. فقط لانني معكم ..
كونوا معي دائما ..

كاظم

10-12-2005, 10:46 PM

الاخت العزيزة سالي .. استميحك عذرا في تاخير الرد عليك قليلا ..

اميمة عشرية .. عيونك كفاية على البوست ده .. مع انو استنيتك ...

saly

11-12-2005, 12:30 AM

الاخت العزيزة سالي .. استميحك عذرا في تاخير الرد عليك قليلا ..

اميمة عشرية .. عيونك كفاية على البوست ده .. مع انو استنيتك ...

المبدع كاظم
حتما إكتمل الترف حد التخمة لمعانقتك هذا لنزيف المرهق,,,,, ما أروعك وأنت تجىء’ إلينا محملاً برائحةِ الدعاش ,,,وحنين الوجد لكلِ الذين نحبهم ونحسهم ,,,,، ردودك غايةً فى الجمال,,,, يعكس مدى شفافية روحك العالية الرقيقة ،,,,, فلا تحرمنا أيها المشعل المتوهج من ألقك الذى يسكن الاعماق وتراً وحنين .

,,,,,,,,,,,,,,,,، لك ودى

وحتما ساعود مره اخري

كاظم

11-12-2005, 12:53 AM

الفخيم فخامة الحزن كمفردة نتعامل معها بشكل يومي ...لواء ..
ايناك يا هذا الممتطي عنوة اخر اغنيات الصحو الخفيف ..؟
لشئ في نفس الحزن مهد لنا هذا اللقاء .. رقصت انت رقصة الحزن الاخيرة .. وخاصرت صفاء التي اظنها نسيت ان تترك بطاقة اعتذار ورحلت في هدوء غامض .. وعانقت محمد عبدالسلام وانت تتلو بذلك الجمال الكوني ( الاصدقاء .. والى اللقاء) وحملت اشواقك ورجعت لتجد ان المنفى ربما كان اكثر رقة من هذه الوحشة التي رفعت راياتها بقبر انيق ضم كل هذا الشموخ لصديقنا الطيب (محمد) ..
لواء في محطة ما سانتظرك .. ترى هل ستاتي ؟

كاظم

11-12-2005, 12:59 AM

ابراهيم .. (الروح مشحتفة في البلود الفيها ريحتك ) ..
افتقدتك حد الفقد ..
وافردت لك مساحات شاسعة جدا .. ثم انتظرتك طويلا .. وفي البال انك ستأتي .. وها انت ذا كغيمة تغالط صيف الايام النجسة ..تاتي ..
حبابك يا رفيق الدم ..
جر نفسك .. كمل قهوتك قبال تبرد .. وبعدين بنكمل ..

كاظم

11-12-2005, 01:03 AM

saly

11-12-2005, 08:32 AM

سالي العزيزة .. ردودك تطول العمر والله ..
معادلة صعبة تلك التي انا بصدد التعامل معها الان .. كلمات تحتاج الى حاشية من الجمال لسبر اغوارها .. جمال في انتقاء المفردة .. وقبله جمال هذه الروح الفنانة ..
كلمات اقل ما يقال عنها اختي انها مغموسة بشكل جيد في غيمة مسافرة .. وملفوفة في اوراق الورد ..
شكرا لهذا الجمال وسنعود ..

مساء الخير أعرفك يا كاظم عندما تتيه’ بالنصِ جملةً وتفصيلا ، فتأتى رائعاً لتمتع للقارىءِ جوانباً لم يقرأها فى ردودك التى أمامه من خلالِ تحليلاتك له فتعطيه بعداً أروع ، أما الروعة الأساسيةَ فتكمُنُ فى صاحبِ وكاتبِ الاسئله، فإن كان التحدُثَ عن ذاك (الانثي او الزكر ) الذى يعرف كيف يدوزن الأحرفَ ليصوغها كلمات’’ تعبرَ عن كل فردٍ يقرأها ، فإنكَ ياصديقى أصبتَ فى كل ماكتبت ، ونحن’ فخورون بأنك بيننا وأنت عصير’’ من الدهشةِ التى تجتاح منتدي ودمدني، إذن للحديث عن الرمزيةِ والأبعاد الجمالية الأخرى فى كتاباتك ، رونق الوصول وينداح قلمك بين حنايا الحقيقة ليرسم لوحة فنان مبدع تطلع الكلمة لتسبح فوق السحب تحمل معاني الجمال تعتريني الدهشة انا ايضا حينما ادخل للكرسي واري ردودك فهذه المقطوعه الجميلة التي اتحفتنا بها در من درر الخيال اشبعنا منك اكثر فالكل جوعا لحديثك العذب
الاخ كاظم
تأكد إننى عائده’’ لا محالةَ فى مداخلةٍ كاملة فحتى حينها لك منى كل الود والاحترام

كاظم

11-12-2005, 12:11 PM

سالي سلامات مرة تانية .. وكان عندك باقي اسئلة محتاجة رد ...
- سالي اشرت في بعض ردودي انني فقط اكتب .. اكتب ما احس انه يستحق ان اعبر عنه بشكل من الاشكال .. الوقفة مع الدواخل كما اطلقتي عليها اقفها في غير الكتابة .. ربما لاناقش تجربة مررت بها وربما للتأمل في بعض المسائل الحياتية ولكن للكتابة وضعها المختلف جدا عندي .. وصدقيني لقد وصلت مرحلة تشكلت فيها اشيائي بصورتها النهائية ولم يعد هناك مالم اقطع فيه شكا بالوقوف والتامل .. تشكلت ذاكرة الكتابة عندي فلم يعد باستطاعتي فعل شئ حيال ما اكتب ..
- بخاف يا سالي من حاجات كتيرة والله كدي اعفيني منها لانها (بتخوفني) ..
بفكر بعاطفية شديدة ودي مشكلة في حد ذاتها ..وحاولت كتير انو اتخلص منها كمسألة سلبية وغلبني .. حتى في المرات الحاولت فيها انو افكر بمنطقية اكتر واشرك العقلانية في الامر ورغم انو الى حد ما نجحت الا انو بالمقابل كنت بحس انو انا ما سعيد بالحققتو .. على العموم لى حدي هسة ما واجهتني مسائل واستحال حلها عبر التفكير ده وربنا يهون ..
- بتخذ قراراتي لما احس انو انا في الحد الادنى راضي بالقرار الاتخذتو .. بغلط طبعا وبزعل جدا للغط لكن بكون مبسوط انو ده قراري .. بشاور والله في امور كتيرة وبسمع للزول الاستشرتو وممكن اتخذ قرار لو حسيت انو كلامو على الاقل مريح بالنسبة لي ..
- كالعادة حازوغ من اسئلة المواقف المحرجة والطريفة ويمكن ده لاعتقادي انو ممكن يكون عندها مقام تاني بناسبها غير هنا ..
- ( لمتين حتتحمل خطاك وجع البعاد ) اولا الجملة دي شاعرية بشكل خرافي وتنفع مطلع قصيدة والله ياسالي .. متين .. متين .. والله ما عارف انو متين تروق خطاي دي ..؟ والله ما عارف .. انا ذاتي فترت ..
- استراليا يا سالي انا جيتها وانا زول كبييير في العمر .. بقي تعاملي معاها على مستوى القشرة ليس الا .. ما مهتم كتير بانو اغوص اكتر من كده .. انا غريب في هذه البلاد وساخرج منها غريبا على ما اظن .. معاها بحساب العيش فيها الان .. وضدها بانها لا تختلف عن كل منافي الارض .. وضدها الف مرة لانها لا تشبه وطني ..
- سالي ... ساعود

كاظم

12-12-2005, 08:24 AM

اختي سالي مساء الخير ..
هجرة كوادر بلادنا اصبحت من اكثر الظواهر اثارة للقلق .. المتامل الان لساحة الوطن على كل المستويات يحس تماما بذلك .. واينما يممت وجهك في ارجاء هذه الدنيا الواسعة ستجد احد ابناء السودان المتميزين في مجال ما وقد ااثر المنفى على بلاده .. ولعلنا لو فتحنا بابا للحوار في هذه المسألة اسبابها وتاثيراتها سيطول بنا الحديث ولكن تبقى هجرة العصافير بعيدا عن اعشاشها امر هو في غاية الايلام وغاية في القسوة ولعلنا الان جميعا ندفع ثمن هذه الهجرات .. سالي ربما نعود لنناقش هذه الظاهرة بصورة اوسع وحبذا لو تم فتح هذا الموضوع في بوست منفصل .. اما مسألة اننا كسودانيين نجد دائما صعوبة في العودة الى بلادنا قد لا اتفق معك تماما في هذا .. اعتقد ان سبب كل منا في الهجرة خارج بلاده هو الذي يحكم هذه الامر .. وحقيقة الامر انني لاحظت بلدانا بعينها هاجر اليها محموعة من السودانيين وطال غيابهم بشكل غريب (ليبيا) على سبيل المثال وبحثت كثيرا في هذا الامر وسألت عددا من الذين كسروا القاعدة ورجعوا واختلفت المبررات التي صاغوها لتوضيح هذه المسألة ولا زال هذا الامر عالق بذهني وربما معزى ذلك الى ان بعضا من معارفي ابتلعتهم هذه البلدان بشكل نهائي .. ما رأيك ايضا في افراد مساحة للسؤال عن اولئك الذين ذهبوا ولم يعودوا الى تاريخ اللحظة؟
- (سنة اولى استراليا) .. قرون .. قرون .. يا سالي .. بس.
- من هو الشخص الذي ترك تأثيرا على شخصيتي ؟ ( الاستاذ/ الفاضل السنوسي) .. هذا رجل من زمن النبل .. سأحدثكم عنه يوما ما ..
- كلمة اقولها و(المجال مفتوح) .. كل اهالي مدني .. ( اسمحوا لي ان احبكم .. جدا ) ..
سالي .. الزمن .. شافع روضة .. بستنى طلاتك ..
كوني بخير

ابو الزعيم

12-12-2005, 09:43 AM

الرهيف كاظم ..
حين يصبح الصمت ابلغ من الكلام فإن ذلك يتجلى في حضرتكم .

اسعد كثيراً وانا اتجول في ظلال هذا الكرس ( الساخن ) الذي احلته برداً وسلاماً علينا

ونشكر القائمين على امر هذا البوست لتمديدهم الفترة لك ...

اهداء ...
...........

خلي الباب مفتوح للمطرة
.................................

يا بخت الزمن الغطى الشمس
الفيك معتصمة
وشال الضو من خد النجمة
وسكن الجنة الفي عينيك ...
يا حظ الدرب الماشي وسايب
قلبو وطالع
ومنك راجع
وداخل ليك
يا بخت الشوق الفي البركان
متضرع وساجع
بحر مواجع
ثورة ريد متفجرة بيك
يا حظ الليل القاعد جنبك
بيك يتوارى
يقيف ويضارى
يغطي سماهو بضي خديك
يا بخت النام في غيمتك مطرة
تهب النار ولهيب الحضرة
تسيل دمعاتها وروحها عليك

****************

يا كل ميلاد مشدود في الخاطر
زاهي وناضر حسو جميل ...
يا وحي الوعد الرسم اللوحة
حديقة لون وقصيدة ونيل
يا زمن الشوق الخلى النبع يتمدد
في الاعماق غابات ونخيل
يا صوت الوتر الحايم في الاعصاب
نبراس ودليل
يا ليل مسقوف بالنجمة ولامع
بالاصرار الزينو عديل
لاقاك الشارع جنب القيف
الحبس الوردة
ودق نحاس البرق رحيل
يا شوقنا الطالع
ما تتدفق فيك مواجع
وما تتراجع
لما خيول الشفقة تميل
وخلي البيت مفتوح للناس
صدر حنين مليان احساس
وافتح باب للعزة اصيل
وخلي الزمن الصعب يتسهل
وخلي دموع الفرحة تسيل ...

............... د . معز عمر بخيت ...........

اسف للاطالة ....

مع محبتي

كاظم

14-12-2005, 03:40 AM

ابوالزعيم .. صديق البوح الشفيف والمفردات الانيقة ..
ما اجمل هذا الاهداء ..
وما اروعك وانت باختياراتك تلك تفوق الذي يكتب جمالا وبهاء ..
شكرا ابوالزعيم على هذه الكلمات ..
وكن دائما بخير

كاظم

14-12-2005, 03:45 AM

ابوروان .. سالي .. الادمن .. سوباوي .. اميمة عشرية .. عزيز .. لواء .. وهيب .. صالح ابوشوارب .. الوفي .. مزوني .. الشريف الهندي .. ابراهيم .. خالد حمد موسى .. ابوالزعيم ..
احبكم جدا ..
وخالص امتناني لمقاسمتي هذه المساحة
دمتم بخير

أبوريلان

14-12-2005, 04:08 AM

الأخ كاظم

كل الأشواق والأمنيات بعودة حميدة لأرض الوطن لتنعم بدفء وحنان ضفاف الأزرق الساحر .
الأخ كاظم
تصارعت أناملي والكي بورت كثيرا لكي أسطر لك أندهاشى لسحر أسلوبك لأن من دخل حصونك كان مؤججا بكل المفردات اللغوية وشخصي الضعيف لا يملك من السلاح حتى الأبيض لكي أدافع به عن نفسي وسط هذا الكم الهائل من جهابذة الكلمة الرنانة فأثرت على نفسي الصمت وأن أكون أحد المندهشين لهذا التراشق الحميم من المتداخلين بعذب الكلام المنمق والمخضب وأنت تعلم بأن المغمى عليه يحتاج لصدمة مشابهة للصدمة التي سببت له الإغماء لكي يفيق ولكنى كلما أفقت أغمى على ثانية من أسلوبكم الإبداعي الدافئ في هذا الشتاء البارد وكما ذكرت المبدعة أميمة عشرية سابقا (( في بلد تموت من البرد كيف تسلل الدفء إلي كتاباتك ؟ )) ، فالهواء متنفسه أريحيتك في الحديث والمشاعر والحرية متنفسها قلمك الفريد ، فهنيئا لمدني بأمثالك يا كاظم وأسمح لي بتهنئتك على صمودك لهذا الغزو من الأسئلة التي تتسابق لتعانق ردودك التي تمتزج بالذوق والأدب والشعر والفكاهة والحب والحنان لأهل مدني ولا أحب أن أطيل عليك لأن الأعضاء ماقصرو معاك فسوف اكتفى بسؤال واحد فقط :

# من هو المثقف من وجهة نظرك وهل يمكن أن نطلق على شخص أمي لايعرف القراءة والكتابة مثقف ؟ وهل هموم العصر لايراها أي شخص لا يلبس نظارة المثقف ؟

أعزرني لحضوري أخيرا كنت بتابع فيك من بعيد عشان كلامي نشاز. وكنت سعيد وأنا أتابع بعيوني .

كاظم

14-12-2005, 05:14 AM

ماي ريلان .. تحياتي وامنياتي الصادقة لك وسع ما تحمل الامنيات ووفق ما شاء لها صاحبها ان تكون ...
يا رجل هذه المداخلة الحميمة وما بها من مفردات تفسح لك مجالا واسعا لتحتل موقعا متقدما يشبه هذه الاريحية في كل مشاركاتك التي اتابعها جيدا عبر هذا المنتدى ..
وشاكر لك يا صديق هذا الاطراء الذي يجعلني اكثر بهاءا في حضرتكم ..
.. اييييييييييييييييييييك يا مايرلان لهذا السؤال ..
- المثقف لم يرتبط في ذاكرتي ابدا بالذي يملأحقيبته الجلدية المتسخة بالكتب ذوات الاسماء المستهلكة .. ولم يرتبط في ذهني بالذي يتحدث عن ( تصويرية التفلطح الشعوري في مسار الانتقال من الارتجاج الى السكون ) .. المثقف كان عندي دائما انسان عرف انه انسان وعاش حياته على هذا النسق ... واختصرت انت هذا المشوار الطويل في الشرح بانه من الممكن جدا ان ندغم حتى الامي في ذات الاطار .. ولعل مصطلح (مثقف) وبما اثير حوله لزمن طويل يجعل امر تفسيره مسألة في غاية الصعوبة .. ولكنني لا اتجاوز بحال من الاحوال رؤية الفرد الخاصة جدا في هذه المسألة رؤيته وفق نشأته وبيئته وتفكيره .. نشاته وفق خلفيته التاريخية من ناحية الجنس والعرق واللون والاخلاق .. الحضارة والتجربة على المستويين العام والخاص .. وذات الاسباب تجعلني بشكل تلقائي افرد مساحة للنقاش حول هذا المصطلح ولكل حق الاجابة وفق ما ذكرت من معايير ولعلي ابدا بك اخي ماي ريلان ...
شكرا ايها الجميل لما اضفيت من عذوبة بهذا النقاش .. وسنلتقي في محطات اخر ..
كن بخير

ابراهيم

14-12-2005, 11:45 AM

الرحيب .. كاظم
تحياتي واشواقي ...
ما زال الزمان يمارس بخله بإفراد سويعات للتآنس هنا
وما زلت امارس دهشتي بما أطالع .. فهذا الكرسي اروع
طيب ..

بما أنك عملت معلماً وتحدثت سابقاً عن ثقافة الاجيال ..
هناك تداعيات متعددة في هذا الشأن في سوء مستوى التعليم وتدني المستوى الثقافي ويبدو ذلك جلياً في مستويات الطلبة الخريجين الذين وفي الغالب لا تتجه الى التحسن الا في قطاعات محدودة وما يلفت النظر تلك المقارنة المؤلمة بين خريجي عقد من الزمان حيث تكون لصالح الجيل الاقدم فاذا تجردنا من الرؤية التقليدية .. والحنين الى الماضى، اين ترى القصور والى ماذا تعزى هذا التدنى؟

تحدث الجميع عن العولمة بأمطار من المداد صبت على الأوراق (صحف ، مجلات ، جرائد) عن نتاجاتها وآثارها ...
فكيف ترى موقف التعليم من هذا التوجه المعاصر وطوفان العولمة؟

قال أحدهم عن الكتابة انها لحظة القبض على جوهر الزمن وروح المكان قبل ان ينقضى أوان القول .. لأى مدى يتصالح كاظم وهذه المقولة أو صور لنا لحظة الكتابة عندك؟

أحياناً تقراء قصيدة فلا ينفصل فيها احساسك بالفكرة عن احساسك بمتعة القراءة ولذة التذوق وتشعر بأنك تتلقى عمل له خصوصيته فما هو القلم الذي يستقطب وعي كاظم؟

إلى اين تسترج مطاياك حينما يحاصرك الزمان الضنين؟

كاظم في السودان وكاظم في استراليا ما هي المتغيرات والثوابت بين كليهما في:
نفسية كاظم ... ثقافة كاظم .. كتابة كاظم

هل تفضل انفصال الجنوب عن الشمال أم الانصهار في بوتقة واحدة؟ (بدون دبلوماسية)

هل الكرسي ساخن؟

سؤال باغتك في هذا الكرسي؟

وكت روح ضلام الغربة طراني البلد بلحيل
هداوة الحلة
وكتين المغيرب خت حمل اليوم
شمر صبحو قاصد الشيل
حليل يمة بدور الشاي
حليل كانونك الدفاي

والله ما متذكر اسم الشاعر ولا حافظ باقي القصيدة .. لكن طبعاً قربت ابكي وانا زول دمعتي قريبة بالذات لما الكلام يكون فيهو حنين وشجن .. المهم... لما تسمع كلام زي دة بيحصل ليك شنو؟

في الغربة ترتع احياناً الأشواق من الحنايا حتى الوريد .. اشواق بتصحي من النوم .. اشواق تبكي .. اشواق تبشتنك وتخليك زي الطفل الصغير .. احكي لينا عن اشواقك يا كاظم شكلها كيف وبتسوقك وين طوالي ؟ وبتتصرف معاها بياتو اسلوب؟

ولنا عودة أخوى كاظم
بمشي وبجيك
كيف ما أجيك
الروعة منك وليك وفيك

ابقى عافية

الشريف الهندي

15-12-2005, 12:45 AM

شريف الروح .. الشريف الهندي (ما اجمل هذا الاسم) .. لك دائما الود في خصوصيته الفارعة وتشابيه الى من عنيت وااثرت ..
اولا جزيل شكري على هذا اللطف ...
ويا الشريف ياريت الواحد يبقى قدر ولو جزو من كلامك الطاعم ده .. واملي ايضا في ان تاخذ الحميمية مساحاتها التي سنفردها عبر تواصل لا تحده حدود اثير هذه الشبكة .. ربما حينها سأحدثك عن الكثير الكثير .. وانتظرني في وقت قريب ..
اقعد عافية يا الشريف وبنتلاقى كان الله هون ..

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــ
مين بس زيك.. يا موعود بالنيل والضل.. مين بتحدى جوارك ويصبح.. في بستانك شتلة فل.. مين يا سيدنا وروحنا وريدنا.. ومين يا نورنا وأمل الكل.. حيموت الجهل العيب والخوف.. والوطن ينزاح من صدرو السُل
حبيبنا الغالي وموجنا العالي

انت عارف يا عزيزي كاظم،،،،الروعه بالجد أحسها متمثله في شخصيتك الرائعه وفي كلماتك الحلوه للتعليق والنقاش مع اي شخص فاتمنى ليك التوفيق في كل خطوه تخطوها والى الامام عزيزي كاظم وخالص تحياتي وانشاء اه نتلاقا قريب ياحبيب الروح انت

admin

15-12-2005, 02:30 AM

والله يا كاظم ما شاءالله عليك .. سيطرة كاملة على الكرسي .. بردتا لينا كرسينا الساخن انتا مركب لديتر اضافي ولا شنو .. ههههههها .. دا الرد رقم 83 .. مبالغة صاح .. انتا ما محتاج تمديد فترة نحنا نفتح ليك قسم جديد نسميهو اسال كاظم .. ولا كاظم الشوق .. ولا حتى كاظميات على وزن ودمدنيات .. ربنا يديك العافية ويصبرك ويمكنك اكثر على كرسينا وباقي كراسي الدنيا والاخرة

اميمه عشريه

15-12-2005, 02:35 AM

انا الان كماُ من الاندهاش .. تأخذني نشوه جميله وانا اسرح ما بين الكلام حلو الكلام .. يشطط بي عقلي في حديقه مبهره وارفه تؤتي اكلها كل حين ... رائع انت يا كاظم والاروع هذا المنتدي الذي يطرق ابواب دواخلنا ويدلف الي حجر اكلتها العته والرطوبه فيبث فيها الدفء ويجلعنا نقترب اكثر من عمق اناس طيبون لم نلتقيهم في الحياه في حين مقرر لنا ان نلتقي بأناس يسلبون منا الفرح ولا يضيفون الي ارقامنا الا صفرا اجوف يسار كل الاعداد .. فكن انت في في خانه الاحاد رقما له مدلول ورجلا يسيل منه الشعر والابداع ليصب في رافد جميل هو منتدانا هذا ..
دمت ودمتم بالف خير .......

كاظم

15-12-2005, 04:29 AM

الجميل جدا الشريف الهندي (ما اجمل هذا الاسم) .. وهكذا انت دائما تفصل من الكلمات ما يناسب هذه الروح الجميلة التي تسكنك ثم والاجمل من ذلك كله انك تزركش الذي تفصله ثم تهديه الاخرين ..
بخير انا طالما ان حضوركم يملأ فارغ المساحات .. وسأكون طالما ان هنالك وعودا دافئة بانكم ستكونون الى الجوار ...
دمت يا الشريف

كاظم

15-12-2005, 04:35 AM

الاخ الرائع جدا .. ابوبكر (الادمن ) .. تحياتي وفائق التقدير ..
كدي قول ما شاء الله اول حاجة .. ما تسحرنا نقوم نتعصر ونحن باقي لينا ساعات بس في الكرسي الجميل ده .. وبصراحة يا ادمن اخواني واخواتي في المنتدى جملوا المساحة دي والله ايما تجميل فربنا يعافيهم ويبرد عليهم دنيا واخرة ..
دعوتك يا ادمن والله ما اجملها لكن كراسي الدنيا دي والله ما دايرها ربنا يدينا كراسي الاخرة جميعا ...
تسلم ادمن وربنا يقدرنا نرد ليك ولو قليل من جهودك في الموقع
وكن بخير والسلام

كاظم

15-12-2005, 04:39 AM

الطيبة في الزمان الشين والكعب .. اميمة ..
تحياتي .. وامتناني لهذه الكلمات السمحة جد ..
وتحيات خالصة وصادقة لكل اخوتي في المنتدى ..
ابقى قريبة يا اميمة وكوني بخير

كاظم

15-12-2005, 07:14 AM

(ليك يا اخر الخيول .. فرس الرهان الما كبا ) اجمل امنياتي ...
وطلتك في اااخر السكة بتدي الزول رونق فرحتو بانو وصل .. اهلا بيك تاتاي في رحلة شوق وصديق في العتامير ضل ..
- ابراهيم .. تدني المستوى المعرفي والثقافي في بلاد مثل السودان امر لا نستغربه .. جرب هذه التجربة اسأل كل من تجده امامك من السودانيين وستجد انهم الشعب الوحيد الذي يجيبك انه(زمان كان احسن ) .. و(زمان) هذه هي اجابة تحمل في طياتها شرح طويل لمسيرة من التأخر زاملنا على كل المستويات منذ ان اخذ السودان صفته كدولة .. وجميل انك تحايلت عليها بعبارة (الحنين الى الماضي) هو ليس حنينا في وجهة نظري هو نظرة منطقية تماما حينما تبدا في عقد المقارنات .. ذكرني حنينك هذا بابيات غاية في القسوة للشاعر المرهف عاطف خيري في قصيدة دارجة قال في احدي جزئياتها ( لولا الترك وحبة انجليز .. كان الفرحة صريناها في مخلاية) .. على العموم .. لعلني من خلال مهنتي كمدرس كنت اكثر قربا الى هذه الفجيعة .. فجيعة من حيث التدهور الكيفي لجيل اليوم على المستويين المذكورين .. لن اعدد الاسباب كثيرا ولكن سأقف في نقطة في اعتقادي انها مهمة .. المنهج الذي يدرس لابنائنا اليوم .. لن تجد كبير عناء في اكتشاف خلوه من كل ما يعطيه هذه الصفة (منهج) .. افرتضنا انه (منهج) من الذي وضعه ؟ وكيف ؟ واين تم تجريبه وكبرى المدارس القومية التي من شأن القائمين بامر هذا المنهج تجريب هذا المنهج فيها قد اغلقت (بخت الرضا على سبيل المثال ) .. فماذا ننتظر من طالب يتم امتحانه في (19) كتاب في سبعة اشهر وهذه الكتب في حد ذاتها خالية المضمون والمحتوى .. بالله عليك يا ابراهيم انظر الى غباء اولئك النفر الذين يعلمون صبيا في السادسة عشر من عمره (فك وتركيب الكلاشنكوف ) و(التكتيك الحربي ) .. انظر الى طالب فرقة (الكديت ) بمدرسته اقوي من (الجمعية العلمية ) او (الجمعية الثقافية) .. هل تعتقد ان هذا الطالب سيرهق نفسه بالبحث عن التثقيف الذاتي .. وفي الحد الادنى هذا الطالب لن يشعر بانه يعاني من اشكال معرفي او ثقافي هذه تلاحظها انت وانا وابناء جيلنا والاقدم منا فقط ولكن هو لن يشعر بذلك اطلاقا .. وحتى لو شعر بذلك فهو في اطار ضيق جدا وحينها سيجد صعوبة بالغة في معالجة ذلك ..
ابراهيم هذا السؤال لن تكفي هذه المساحة بتاتا للنقاش حوله ولكنها اضاءات حوله نرجو ان تتوسع في مساحة اخرى ..
- واستميحك عذرا ابراهيم ان اؤجل الاجابة على تاثيرات العولمة في بلادنا على التعليم .. لا لعدم تكوين رأي في المسألة حتى الان ولكن لايمان قاطع ان بعض المواضيع تستحق لوحدها ان نفرد لها مساحات اكبر .. هذا بالاضافة الى ان التعليم في بلادنا لا يحتاج الى كبير عناء لتؤثر عليه عولمة او غيره .. التعليم عندنا الان مكشوف الصدر بالفوضى التي تعم الادارة في بلادنا في الداخل .. ومكشوف الظهر بتغيرات على المستوى العالمي تأخذ في طريقها كل شئ..

- جميلة هذه المقولة التي تتحدث عن الكتابة فلأول مرة اطالعها .. وربما تصالحت معها دون ان ادري .. وكثيرما سؤلت هذا السؤال .. لحظة الكتابة عندي .. لا اجد وصفا دقيقا يا ابراهيم لهذه اللحظة .. مثلها والذي اشترى سمكة ليتغدي بها ومر اثناء عودته على النهر فرمى السمكة وذهب واشترى سنارة وجلس ليصطاد .. ستسأله هل طعم السمكة التي اصطدتها اجمل من تلك التي اشتريتها ؟ سيجيبك : لا ادري ..فالاولى لم اتذوقها .. وستسأله : هل تحب ان تتعب في الحصول على الشئ لتستمع به ؟ سيجيبك : لو كان كذلك لاصبحت صيادا فانا احب السمك .. وهكذا .. انها لحظة عصية الوصف ويصعب حتى وصف جزء ولو يسير من احساسها وانت في غيبوبتها الكونية تلك .. انا شخصيا اشعر بضيق ما قبل ان اكتب .. سمها (نوبة) وهذه (قبل) .. واشعر براحة ما بعد ان اكتب وهذه (بعد ) .. ثم لاشئ لاصفه اثناء ذلك ..
- ابراهيم ساعود

كاظم

15-12-2005, 10:53 AM

ابراهيم الجميل .. مساء الخير .. وعدنا ...
- صديقي ابراهيم .. انا اقرأللكثيرين .. وعاشق للرواية بشكل مرضي (من مرض) .. ويجانب ذلك عشق قديم للشعر .. وبين هذا وذاك مساحات شاسعة من التفكير في كل نص اقرأه .. احيانا تكون هذه المسألة مقلقة اثناء القراءة وذلك بالتركيز الناتج عن ماذا يحمل هذا النص بالرغم من المتعة الناتجة عن سلاسة المفردة وتطورها .. موسيقي النص ومفرداته تأسرني خاصة اذا احسست ان صاحبها يكتب وفق ما تمليه عليه موهبته دونما البحث عن قالب يصب فيه فكرته .. اذا تاملت قليلا في مجمل النصوص ستقول ان هذه الفكرة لن تصلح الا في هذا القالب وعلى ذات نسق الموسيقى والمفردة التي كتبت بها واي محاولة لصياغتها في غير هذا الشكل ستفقدها شيئا من طعمها .. وهناك الكثيرون ممن يكتبون وهم جديرون بان نقرأ ما يكتبون .. احب جدا شعراء السودان واجزم تمام الجزم بانهم اجمل من يكتب الان ..

- سأحدثك حديثا فيه شئ من الغرابة في مسألة اين اسرج مطاياي اذا ضقت ذرعا بالزمان .. انا فقط (أتذكر) ! هذه المفردة قد لا تستوي في ان تكون حلا ولكنني الجأ الى ذلك في معظم الاحيان .. مثلا قد اصحو صباحا وانا ضيق الصدر فأقرر بشكل او اخر ان افتح مساحة ما في ذاكرتي اختزن فيها ملامح جمال كنت ادخره لهذا اليوم ثم اصرف ساعات في السفر عبر هذه المساحة .. اختزن في ذاكرتي الكثير من الجمال الذي كان مرتبطا باشخاص بعينهم او اماكن بعينها او اوقات بعينها ثم احاول جهدي ان اتماهى في هذه الذكريات وصدقني لقد صادفت نجاحا في حده الادنى يفصلني بصورة جيدة عن الحالة التي اعيشها .. قد ادعوك الى ان تحذو حذوي على سبيل التجربة ليس الا ..

- ابراهيم لقد اتيت هذه البلاد وانا في تمام النضج ومتسامحا مع كل اشيائي وحتى محاولاتي البائسة للخروج من سابق التكوين باءت بفشل مريع .. خذ مثالا .. رؤيتي للجمال بشقيه المادي والمعنوي .. الى الان اخي ابراهيم ان رهين لجمال كوني يسكن تفاصيل بلادي بنيلها وشمسها وغبارها ومعاناتها .. الفتاة الجميلة عندي هي التي تضع طرحة على رأسها وتبتسم في حياء حميم .. الجمال الذي اعرفه يكمن عندي في (كيف قيلتو) من جار طيب وودود ..جمال اسرتني تفاصيله التي لا فكاك منها .. وعلى ذات النسق كانت بقية اشيائي .. ماذا تنتظر من تغيير على شخص ذاكرته مشفرة ومغلقة هناك في بلاد الشمس ؟ .. لشد ما يبعث فيي احساسا بالزهو هذا الذي احدثك عنه .. حتى في اطار الكتابة بقيت انا انا رهين بذاكرة نشات هناك ونضجت هناك ..وعلى ما يبدو انني سأظل هناك الى الابد .. ما تبقى من تغيير قشري هذا لا يعدو كونه متطلبات لجغرافيا انت فيها الان ومكره على التعامل مع كائناتها الحية التي تحيط بك ..

- (بدون دبلوماسية) .. وهو نحن ذاتو مش عيب علينا نصل مرحلة انو نصل درجة انو نسأل نفسنااو بعضنا عايزين انفصال ولا ما عايزين ؟ والله البلد دي يا ابراهيم لو انفصل فيها شبر بكون عندي ذي الفصلو جزو من قلبي .. ما بقبلو وما متخيلو حتى .. بس .

- الكرسي يا (ابا) ساخن وما ساخن .. نص نص كده .. عارف الاجابة لون زينب لكن ده الحاصل ...
- سؤال باغتني .. سؤالك بتاع انفصال الجنوب خاصة وانت ضيقتها جدا وما فضل ليك الا تقول لي ( من غير لف ودوران ) وغايتو ماقصرت لفلفتها في ورق ملون وبلعتها لاخوك .. وبلم فيك في زقاق يا ابراهيم ..
- والله العظيم ببكي ... ده رد على سؤال الابيات الحنينة الفوق ده ..
- اشواقي يا ابراهيم .. جروحها تلاميذ مدرسة .. تقعد الليل كلو تحنس فيها عشان تنوم .. ونهارك كلو ترد على اسئلتها .. وبين الليل والنهار مسافة قدر ما تشرب ليك كباية شاي .. قدر المسافة دي يا ابراهيم ظنك بتاخد ليك غمدة ؟ الاشواق يا ابرهيم لو حاولت تصارع فيها نهارك وليلك ما بتقدر عليها .. خليها التقلاك قلي البن وبينك وبين نفسك قول .. ( بت الذين دي هي الوحيدة البتديني برهان انو انا لسة زول ) ودي بمصطلح تاني ( انا اشتاق .. اذن انا موجود ) .. وهكذا ..
- يا سلاااااااااااااااااااام يا ابراهيم على ونستك دي ...
اخدلك لفة وتعال .. ( صيفين وشتا ورشة مطرة ) بستناك ..