ضيفتنا هذا الاسبوع المتألقة أميمة عشرية [الأرشيف]

اميمه عشريه

19-11-2005, 11:48 AM

لكم التجلي اهلي واحبابي ايها السمر في كل رقعه من بلادي ومن كل رقعة تمتد فيني من قلبي وتصب في شراييني .. لكم الشكر اجزله لانكم تضعوني تحت المجهر حتي اكون اقرب منكم واليكم فأنتم اهلي اللذين لا انفصل منهم ابدا اتشرف دوما بأننا ابنة لهم حرمتني الغربه كأكثريتكم من التواصل مع الاهل فغدوتم انتم اهلي ...اشكر استضافتكم الكريمه اشكر دوما حسكم الرفيع ,,,
لازم يعني البطاقه دي جنسيه ما بتنفع هاها
دي بطاقتي التعريفية :
الاسم بالكامل / اميمه صلاح الدين عشريه •
تاريخ الميلاد/ 10/6/1971 • ( لا تسأل المرأه عن عمرها ولا تسأل الرجل عن راتبه ) دعونا نكسر جمود هذه المقوله ...!!
مكان الميلاد/ السودان – امدرمان الثورة
البطاقه الاجتماعية :
متزوجه من الدكتور مهندس/ عبده علي الطيب احمد من ابناء الجزيرة ايضا .. لدي ابنان محمد وصلاح الدين
لدي من الاخوان اربعه اشقاء ولاء الدين- مجيد - محمد - نور- واختي هبه الصغرى .. وسته اخوه غير اشقاء ..
والدتي استاذه فاضله من الرعيل الاول في الحركه التعليميه بالسودان .. ووالدي رحمه الله عليه صلاح الدين عشريه شاعر مرهف الاحساس يشبه الي حد بعيد صوره الرحاله المرحوم خالد عشريه الموجوده في طيات المنتديات ..
البطاقه الاكاديمية:
جامعة امدرمان الاسلامية – كلية الهندسة – قسم العمارة والتخطيط العمراني سنه التخرج 99 بكالوريوس الهندسه .. بدأت فكره الماجستير لم اكملها لظروف اسريه ...

كده كفايه لحين الاسئلة الاخري _ خلوها بارده شويه والا حاضطر اجيب معاي مكيف ..!

aborawan

20-11-2005, 03:43 AM

بسم الله الرحمن الرحيم

الاخت اميمة لك التحية

اولاً اراك وبسم الله ماشاء الله عليك خريجة هندسة سؤالي هل امتهنت العمل بهذه المهنة سواء في السودان او في بلاد المهجر ؟
ان كانت الاجابة بنعم فكيف توفقين ما بين العمل ودورك كربة منزل وام ؟
كيف سمعتي عن منتديات ودمدني وما الشئ الذي شدك للتسجيل ؟
رايك في المنتدى بمنتهى الصراحة ؟

لي عودة

تحياتي

مزوني

20-11-2005, 08:32 AM

هلا بيك الاخت الغاليه اميمه
ومرحب بيك وانتي تجلسين على الكرسي الساخن
واللي بي صراحه انا بشوف انو نور للأعضاء للتعرف على شخصيات كلها نور وحنيه وحب
طيب
انا أسئلتي خفيفه زي العاده
اممممممممممممممممممممممممممممممممممممممممم
مشكلتي والله مابعرف أسئل لكن مادام خشيت ما بطلع سااااااااااااااااااااااي

الأمومه ودا احساس عظيم لكل انسان على الوجه الارض
طيب
الامومه في السابق كانت بتعني ليك شنو
ووجهة نظرك ليها كانت شنو؟؟؟
وماشاءالله بعد ما بقيتي أم ( ربنا يوفقك انشاءالله ) لقيتيها كيف؟؟؟؟
وخاصه وانتي مع طفلين وكمان أولاد ( ههههههههه يعني شغب ووجع راس شديد ) (ربنا يعينيك ويحفظهم ليك إنشاءالله)

وكفايه لحد هنا
وانشاءالله تكون اسئله بارده عليك يا غاليه

الشريف الهندي

20-11-2005, 09:23 PM

بسم الله الرحمن الرحيم
الباش مهندسه أميمه عشرية
السلام عليكم ورحمة الله تعالى وبركاته
الحقيقه الشكر أجزله لأهل المنتدى الكريم الذين أتاحو فرصة اللقاء والتعرف عبر هذا المنبر الذي جمع
اطراف الجسد السوداني الواحد الذي مع الايام تشتت في انحاء العالم ومن هنا بندأ وننطلق لنتعرف على بعضنا
أما عن سؤالي ليك :
1/ منتدى ود مدني يعني ليك شنو ؟
2/ وانتمائك ليه هل لعب اي دور في انك قد استفدتي منه ؟
3/ أو كان يلعب اي دور في أن يخفف من آلام الغربة ؟
علما بان المنتديات السوادنية واخص ود مدني لعب دوراً كبيرا في توازننا العاطفى والنفسي
حبث أنه كان الاهتمام الاول لي في يوم العيد في الغربه بعد الصلاة والاتصال بالأهل
وخالص تحياتي وربنا يخلي ليك ابنائك وابوهم وربنا يوفقك للانتهاء من اهم المراحل التعليمية الماجستير
اخوك الشريف الهندي

اميمه عشريه

21-11-2005, 03:15 AM

تحياتي .. قبل كل شي دعوني اعتذر لو تأخرت في الرد على التساؤلات اعتذر جدا يعلم الله انها اسباب خارجه عن الاراده فأنا من حوالي الاسبوع مرافقه لوالدتي بالمستشفي بصدر اجراء عملية جراحيه ... فاصبحت كالبهلوان تماما استغل فتره حضوري للمنزل لاسرع في عجاله لاقرا واجيب فاعذروني حقا والتمسوا لي السماح وطولوا لي بالكم شويه ..

اولا ابو روان اللطيف ساجيب علي اسئلتك واتمني اوفي..

اولاً اراك وبسم الله ماشاء الله عليك خريجة هندسة سؤالي هل امتهنت العمل بهذه المهنة سواء في السودان او في بلاد المهجر ؟
ان كانت الاجابة بنعم فكيف توفقين ما بين العمل ودورك كربة منزل وام ؟
نعم عملت حوالي الاربع سنوات خارج الوطن حيث اقيم لم اعمل في السودان للاسف الشديد لظروف الغربه الممتده منذ خمس وعشرون عاما .. التوفيق ما بين العمل والمسؤليات كان اولا بيد الله تعالي ثم مساعده والدتي ووقوفها الدؤؤب معي لا كلت ولا ملت ربنا يديها العافيه

كيف سمعتي عن منتديات ودمدني وما الشئ الذي شدك للتسجيل ؟
ود مدني ومنتدياتها علم على راسه نار .. سجل لي اخي عبد المجيد ودفعني للكتابه فيها وشجعني على ذلك لما رآني اقوم بعمل صفحه خاصه بي طلب مني الانضمام اليكم وكان هذا من بعض ابداعاته التي يتحفني بها بين الحين والاخر ان عرفني عليكم ....

رايك في المنتدى بمنتهى الصراحة ؟
المنتدي جميل لدي بعض التحفظات والاراء افضل ان اطرحها بشكل منفرد في حديث ذو شجووووووووون

شكرا ابو روان سلم على روان كتييييييييييير

اميمه عشريه

21-11-2005, 03:28 AM

نجي لمزوني .......... شكرا يا مزوني كتير على اهتمامك ودمت دوما بالف خير

الأمومه ودا احساس عظيم لكل انسان على الوجه الارض
طيب
الامومه في السابق كانت بتعني ليك شنو
ووجهة نظرك ليها كانت شنو؟؟؟

الامومه دي كانت من الاساطير التي عشتها قبل وقتها وتلمست احساسها بداخلي منذ زمن بعييييييييد كنت احلم واتخيل نفسي وانا ام اهدهد طفلي واناجيه والعب معه واحتضنه بدأت تكبر بداخلي حتي جاء وقتها وتحققت امنيتي فسويت البدع زي ما تقول لا حرم الله الارض من الامومه فأنا متاكده انها والمطر سبب اخضرار الارض وادام الله كل الامهات

وماشاءالله بعد ما بقيتي أم ( ربنا يوفقك انشاءالله ) لقيتيها كيف؟؟؟؟
وخاصه وانتي مع طفلين وكمان أولاد ( ههههههههه يعني شغب ووجع راس شديد ) (ربنا يعينيك ويحفظهم ليك إنشاءالله)

جميله جدا بعد ان اصبحت واقعا يغرق الطفل في بحور الحنان وتتفجر دواخلك بروائع عاطفيه نبيله جدا ليست ككل العواطف .. غايتو خساره ما حتقدر تبقي ام عشان تعرف احساسس هاهاها ..

اميمه عشريه

21-11-2005, 03:35 AM

نأتي الان للشريف الهندي ....... يستعدني جدا ان تشاركني بالاسئله ويشرفني الرد عليها تحياتي اليك كثيره
أما عن سؤالي ليك :
1/ منتدى ود مدني يعني ليك شنو ؟
منتدي ود مدني رئه اتنفس بيها واطلاله جميله على جذور في داخلي عجزت ان تقتلعها جرافات الغربه ...
2/ وانتمائك ليه هل لعب اي دور في انك قد استفدتي منه ؟
كثيرا ويكفي فقط هذا البوست منك ومن كل المهتمين من اولاد مدني هذه اكبر استفاده فمعرفه الناس كنز حقيقي.
3/ أو كان يلعب اي دور في أن يخفف من آلام الغربة ؟
افتح المنتديات لاشم رايحه بلادي واتحاور واتجاوب مع اهلي وناسي السمر واخاطب عقولهم ويخاطبوني عقلي ويتلمسون احساس الحنين بداخلي لبلد المليون حنين مربع ..
علما بان المنتديات السوادنية واخص ود مدني لعب دوراً كبيرا في توازننا العاطفى والنفسي
حبث أنه كان الاهتمام الاول لي في يوم العيد في الغربه بعد الصلاة والاتصال بالأهل
وخالص تحياتي وربنا يخلي ليك ابنائك وابوهم وربنا يوفقك للانتهاء من اهم المراحل التعليمية الماجستير
اخوك الشريف الهندي

تسلم الشريف الهندي تسلم اخوي كتير وشكرا ليراعك ولوقتك الذي امضيته معنا هنا في هذا الكرسي الساخن .. دمتم

عبدالمجيد عشريه

21-11-2005, 04:05 PM

سلامات اختي الرائعه والله ولكم سعدت وانا شايفك تحاوري ووتجاوبي اهل ثقافتنا
اولاد وبنات ودمدني الحنان.. انا فخور جدا بيك لما اعطاكي ربي من لباقه في الكلام
وصدق في المشاعر ..طبعا يا اخوانا (اونيه) دي كما كنا ندعوها ونحن صغار كانت
مسكينه والغنمايه تاكل عشاها ههههههه...اها السؤال شدي حيلك ما برحم انا ..كنت
داير ارسمو ليك لكن المزاج ما كان ياهو..بسم الله ...
انت كنت بتكتبي بتين!! اذا اصلا انا من ماشفتك وقمت ووعيت اليوم كلو بتشاكلي
مع هبه في البغسل العده منو...وريني بس بتين!!!!!!!!!![ :d

aborawan

21-11-2005, 09:04 PM

اخوي عبدالمجيد وينك من زمان ياخي كان تورينا اونيه دي كانت بتكون احلى في عنوان البوست (( اونيه ضيفة الكرسي الساخن الاسبوع ده )) :d:d

لنا عودة مع الاسئلة انشاء الله

admin

21-11-2005, 09:45 PM

ازيك يا اميمة وكل سنة وانتي طيبة .. شفتي الشباب ديل كيف يعني كان السؤال بارد وعادي يقوموا يسخنوا ليك على اساس انك قاعدة في الكرسي الساخن ..
سلامة الوالدة الف سلامة وربنا يواليها بالصحة والعافية .. عليك الله طمأنينا على صحتها اول بي اول .. وان شاءالله كرامة خروجها من المشفى بسلامة علينا..
من قبيل انا بكتب ليك وخاتي سؤالي في المنقد عشان يفور ويغلي .. بالمناسبة بتعرفي المنقد ولا لا؟ وسمو منقد لي؟ دا ما السؤال الاساسي دا الرزاز بس
بصراحة شديدة وبدون الدخول في موضوع مساواة المراة مع الرجل (عارفها حجتكم الوحيدة) انتي ماشايفة انو تخصصات زي الهندسة المدنية والكهربائية والميكانيكية تخصصات صعبة شوية وما بتتناسب مع الفتاة السودانية الحنون الرقيقة؟ خصوصا بعد ما تصبح ام ومسؤولة عن اولاد وزوج؟ وما كان من الافضل حصرها فقط على الذكور؟ ولامانع من حصر تخصصات اخرى للنساء؟
انا ما جبتا سيرتك وما قلتا هندسة معمارية ..
مع تمنياتي لك بالتوفيق والسعادة لك ولاسرتك الكريمة

saly

21-11-2005, 11:32 PM

اميمه عشريه
كيف احوالك اول شي وكيف امك الف سلامه عليها وما تشوف شر يارب

شايفاك ماشه كويس ونازلين ليك بالاسئله الشباب هروك

وبالله عبد المجيد ده اخوك انا قايله من العيله ساي ليه التحيه وانا متابعه موقعو عن كثب

اخش طوالي
واكتفي بسؤال واحد وبرجع بكمل ليك مره تانيه

رايك في الاعضاء ديل شنو بدون مجامله

1/ ابوبكر الادمن
2/حمدتو
3/ابوروان
4/سالي
5/ياسر ابوريلان
6/خالد حمد
7/بابكر
8/عبدالمجيد عشريه

طبعا الاسماء كتيره ما عاوزه اسردها كلها بكتفي بديل

ولي عوده طبعا معاك

سوباوي

21-11-2005, 11:53 PM

الأليفة / أميمية عشرية المحترمة

في البدء .. تظاهرة من أمنياتي لوالدتك بالشفاء العاجل .. بلغيها عني أن احد أبنائها يغريها مزركش التحيات ..

تحياتي واحترامي للمحظوظ إن جاز لي التعبير المهندس/ عبده علي الطيب أحمد

الأخت أميمة لم أدخل بعد في أسئلتي والتي أتمنى أن تصادف صحيح جفيرها لتعم الفائدة لي ولأهل هذا المسيد

الرائع منتدى ود مدني .. وعليك أن تتحمليني قليلاً

مقدمة تحليلية لأسئلة قادمة :

الكاتبة أميمة أنا الآن لا أخاطبك ولكني أخاطب الكاتبة بداخلك ..

أولاً : سؤال العبور لاستفهامات قادمة ؟

المتابع لمشاركاتك يجد كل مشاركاتك حكراً على المنتدى الثقافي وواحدة فقط منها في منتدى آخر عللي هذا الميول ؟

ثانياً : قبل السؤال معجبٌ أنا تماماً بكتاباتك .. سأنتهج في أسئلتي بعض التحليل من وجهة نظر خاصة إن سمحتي لي

سيدتي ..

في الغالب الأعم يكون انتاج الكاتب إفرازات بيئته وتجاربه الخاصة جدا والخاصة والعامة باحتكام أنه كائن اجتماعي لا

فكاك له من مؤثرات هذا الخضم ..

أجد نَفَس الكتابة في كل نصوصك النثرية يوحي بتجربتين عميقتين يتجلى فيهما بوضوح :

أ/ رهافة حس الكاتبة والتدفق الموفور لإحساس متعافي بأريحية تامة . ما تعليقك؟

ب/ ارتباط الكاتبة العميق بالأمكنة – قد أقول من وجهة نظري أنها العوالم الرحيبة التي تجد الكاتبة فيها ذكرياتها لا

زالت دافئة حية تكاد تسمع فيها همس الأمكنة كشاهد إثبات على لحظات ذات إحساس سري يكتنفها بعمق .. ما قول

الكاتبة في ذلك ؟

ذكرت أن للكاتبة تجربتين تخص العواطف قد تكون لشخص واحد تسقطه حيناً وترفعه حيناً أو بمعنى آخر يخفق حيناً ثم

ينجح حينا آخر، وهذا التلمس من خلال نصوصها التي زينت بها المنتدى :

التجربة الأولى : أحساس الكاتبة بأنها دلقت مشاعرها وعواطفها في المكان الخطأ وأنها أهدت قلبها لمن لا يستحق

تحس ذلك بوضوح في النصوص النثرية الآتية : "على الهواء مباشرة – علبة الألوان – مفكرتي خالية" ففي هذه النصوص

تستدعي الكاتبة كل مفردات الندم المهذب على أنها كانت معطاءة ولم يكن الآخر كذلك ثم تدلف على أن بعد

المسافات أو الغربة أو أي شيء له علاقة بالسفر أو البعد قد كان معاوناً مخلصاً لهذا الإخفاق ومن ثم تجد أنها تناجي

الأمكنة لتكن شاهدة على عمق وفائها وإخلاصها .

السؤال : هل كانت تنزف الكاتبة أنتاجا نثريا أو أن جاز تسميته انفعالاً توثيقياً لكل موقف أما أن الصبر معينها وأنها

تختذل الكثير ثم تتداعى حينما تريد أن تتنفس فقط ؟

التجربة الثانية : وهي تمثل الاستقرار العاطفي التام للكاتبة والذي لا يخلو من مخاوف الفراق والبعاد أو تجزئة العلاقة

جغرافياً لتكون بين الأمكنة مما يزيد الكاتبة التهاباً ممزوجاً ببعض خوف الفقدان ونجد ذلك في نصوص الكاتبة النثرية

التالية : " مرة واحدة دعنا نجرب – انتظرتك – إلى حضرة من أهوى – أشيائي وأشياء أخرى – حضارة أسمها الحب –

شمالاً جهة القلب – ألف عام ألف عام وألف أمنية صغيرة – شيء خطير جداً"

المتمعن في النصوص الواردة أعلاه للكاتبة يجد أنها في هذه النصوص متصالحة جداً مع نفسها ومع علاقتها مع الآخر

كما نجد سمات الرضا التام عن الذات وفرحة الانتصار والاستقرار في علاقة عاطفية متفائلة وزاهية .. ونجد أنها تعود

كأنثى ملك لعواطفها تنفعل معها وفقاً للموقف فهي تارة تنصح وتارة تعاتب برفق وتارة أخرى يصيبها القلق

الطبيعي للعلاقة نتيجة للخوف من المجهول أو بالتنبؤ بما لا يروق لأريحية العلاقة وهكذا .

السؤال الأول : هل نصوص الكاتبة عن واقع معاش أم أنه تفاعل مع أحداث تخص عزيز أو عزيزة لديها وهي عادة

الكتاب في مواساة الآخرين بتبني القضية نثرياً وإفراط ما يجوش به خاطر الآخر

ولا يحتمل البوح أم أنه الخيال الخصب ؟

السؤال الثاني : إلى أي مدى استفادة الكاتبة من هذه الهزات العنيفة ثم الاستقرار الآمن في تشكيل شخصيتها وما أثر

ذلك على كتاباتها ؟

السؤال الثالث : هل ممارسة الكتابة تعالج لدى الكاتب ما تعرض له من خدوش عاطفية أو تدعم ما حظي به من علاقة

نقية وإلى أي مدى ؟

أخيراً معذرة الأخت أميمه عشرية أن أثقلت عليك بعض الشيء .. ومعذرة سيدتي لهذا الحوار والاستفهامات غير المرتبة

وعفوكم أن ذهبت بتحليلي لكتاباتكم بما أهوى من منحى علماً بأنني لست بناقد ولا بمحلل وإنما متلقي فقط أو

متلقي شبه جيد كما أحسب نفسي ..

ملحوظة : هناك نصيين شعريين بعنوان "الوطن الدهشة – من زرع هذا الحلم ورحل" سنتعرض لهم في سانحة أخرى .

تنبيه : كل الأسئلة اختيارية .

وأخيراً تمنياتي لك بالتوفيق،،،

سوباوي

الشريف الهندي

21-11-2005, 11:53 PM

الاخت اميمة السلام عليكم ورحمة الله تعالى وبركاته
ربنا يكتب سلامة الوالده وماتشوف شر انشاء الله وربنا يخليها ويطول عمرها آمين
وابقى طمنينا عليها باستمرار ربنا يكتب سلامتها
ولنا عوده مع الاسئله
الشريف الهندي

كاظم

22-11-2005, 12:30 AM

اميمة عشرية .. تحياتي دائما .. سعيد جدا باختيارك ضيفة على الكرسي الساخن ... والاغرب في الموضوع مشاركتي وليس في خاطري سؤال واحد اريدك ان تجاوبي عليه وربما معزى ذلك الى انني اكتفيت باجاباتك من خلال كتابتك واعذريني في اكتفائي بما قرأت وان كنت مشدودا جدا الى ان تجاوبي على اسئلة الرقيق سوباوي قدر ما استطعت ... لك ولللصديق سوباوي محبتي ...

ودالحوري

22-11-2005, 01:00 AM

الاخت اميمه التحيه لك من علي البعد ولكن اذا اعطيتك ثلاث زهرات فلمن تهديها

saly

22-11-2005, 07:57 PM

اخت اميمه
جيتك من تاني مع انك ما جاوبتي الفوق
وكان عندي اسئله كتير فلقيت عندك كميه اسئله عاوزه وقت عشان تجاوبي

اسه بكتفي بصمتي لحدي ما تجاوبي الاسئله الفوق

وبرجع ليك مره تانيه

والله يعينك علي الكرسي وعلي سوباوي بالتحديد عاوزه ليك ساعه عشان تجاوبي عليه

السلامى

23-11-2005, 01:04 AM

مرحبا أختى اميمه سؤالى غريب وفضولى كيف قضيتى تلك السنوات الطوال فى الغربه خصوصا وعمرك يعنى فى منتصف الثلاثينات هل هناك هنالك تزوير فى عمرك الحقيقى اما تربيتى خارج السودان فهمينى

هبة صلاح عشرية

23-11-2005, 05:01 AM

لي أصحاب مسافرين معي قد تجهزوا وما تجهزت معهم
، لقد حملوا طيبات كثيرة وما حملت .... لا ، بل لي حمل أثقل كاهلي ... حمل يضر ولا ينفع .. فليت شعري ما الذي جعلني أحمل ما يضر ولا ينفع ؟

ثم ليت شعري إنَّ صحبي حولي أراهم قد حملوا الطيبات فسعدوا وارتاحوا ... أما نفوسهم فراضية مطمئنة ، وأما نفسي فحزينة متألمة..

كم مرة ٍ راودتني نفسي أن أكون معهم ؟

لكن خطواتي ثقيلة لا تتقدم نحوهم !!

فقلت لها يا نفسي إن لم تتحركي من أجل ما ينفعك فلا أقل من أن تتخلصي مما تحملين .

يا نفس لكم أثقلك ما تحملين ... يا نفس لكم ضرك وما نفعك... فلماذا تواصلين الحمل ؟

فلم تجبني..
فناديت : يا عيني فلتذرفي الدموع .

قرب وقت السفر واشتد الجمع له ، فمن حولي أمثال دوي خلية النحل من العمل والسعي الدءوب من أجل السفر .

نعم لأنه ليس سفرا ً مهما ً وفقط ، بل أهم سفر سنسافره جميعا ً ... إنه السفر للآخرة ، وهل هناك سفر اهم منه ؟؟؟

لكي التحية العطرة

هيبااااااااااش

اميمه عشريه

23-11-2005, 11:57 AM

مساء الانوار ... اتمناكم جميعا بالف خير والف سعاده تحلق بكم وتحلقون بها .. واتمناكم جميعا تتحلقون حول بيتنا الصغير الكبير مدني .. فاشكر تواصلكم واعتذر لتاخري لنفس العذر ... واطمن الجميع ان والدتي بالف خير لا زالت تحت تجهيزات العمليه الجراحيه.. ساوافيكم باخبارها لانها تعتبركم جميعا ابناء لم تنجبهم هي ..

طيب ابتديكم من وين وانتو كلكم حلوين ما بتكملوا ومسخنين ما بتبردوا ..
اشوف الاسبقيه كويس معاكم ...؟
اها السؤال شدي حيلك ما برحم انا ..كنت
داير ارسمو ليك لكن المزاج ما كان ياهو..بسم الله ...
انت كنت بتكتبي بتين!! اذا اصلا انا من ماشفتك وقمت ووعيت اليوم كلو بتشاكلي
مع هبه في البغسل العده منو...وريني بس بتين!!!!!!!!!![
__________________
عبدالمجيد صلاح عشريه

تسلم ايها الزاهي المفرح كلوحاتك تماما ايها النابض في دمي كنيل يسري بين اضلعي يا مجيد كلما رايت لوحه لك اصاب بزهو واظل افتش في اللوحه عن مجيد اخي ذلك الوجيه الضاحك .. وكم من لوحه اقتحمتها ولم ادر الي الان طريق الخروج منها دهاليزك هذه تغويني وتسلب عقلي .. حرمتنا منكم الغربه خمسه عشر عاما كامله وانتم بعيدون عنا هناك اشياء داخل الانسان كتب لها الحياه واشياء اخري ماتت والكتابه في داخلي من ضمن الاشياء التي رأت النور منذ ان حزمتم حقائبكم ورحلتم عنا في بلاد الثلج والمطر تركتمونا هنا نحترق من ورايكم فلم اجد الا اوراق وقلم يقطر حبرا ساخنا ... فلتحترق الاوراق حتي تبرد الاحبار ..

يعني انينه يا مجيد لم تعد همها فقط ان تتضار ب مع هبه (فيمن يغسل العده )... بل كبرت اهتماماتها وانتم بعيدون عنها
دمت ودامت ريشتك الانيقه يا صاحب الموهبه الرايعه والخطوط المستقيمه .... ارسم دايما ...حلما وطفله ودهشه ..

اميمه عشريه

23-11-2005, 12:24 PM

نجي للادمن عديييييييييييييل كده ...............
طبعا انت ذوقك عالي جدا ولك ان تعتبر هذه شهاده من ملايين الشهادات المماثله ضعها حيث تريد في حايط المطبخ او غرفه الجلوس هاهاه كل عام وانت بالف خير .. ودامت منتدياتنا عامره بوجوه مشرقه واقلام حقيقيه واهتمام يفوق الوصف كقلمك انت سيدي ..

اشكر سؤالك عن الوالده ... وهي بالف خير بنعمة من الله ..
اما سؤالك
اولا انا بعرف المنقد وبعرف الكانون لو ما عجبك انت قايلني حنكوشه من حناكيش الشهادات العربيه ولا شنو يا ادمن .. احنا الدخلنا مصطلح الصحروايين في الجامعات بدايه التسعينات وفي بيتنا بنتكلم لهجه بس زي البرنامج بتاع من بوادينا هاها

سالتني عن المساواه والتخصص والهندسه وما شابه ( خلاص ناوي تخسرني مش هاها)
الحياه الان تغيرت واكتسبت صبغه جديده علينا ...منا من ظل يستنكرها وهي تستنكره ومنا من هادنها وتصالح معها وسار في تيارها كذلك هو ايقاع الحياه العملي والاكاديمي لم تعد هناك الفواصل الوهميه التي ضربت علينا لقرون ان المراه لها كذا وكذا وتقلولبت في ( صبه اسمنتيه مسبقه الصنع) الان المراه خرجت من قبوها وشاركت الرجل في مجالات عديده اثببت الحياه العمليه انها لم تفشل ولم تخزل باقي الاناث دعونا نعطيها الفرصه لا لتتمرد علي انوثتها ( فما اجمل الخمره والدلكه والصندل والحنه المنقوشه ) لكن لن يضير ان اضيفت لها ( تي اسكوير _ بيبر روول ) خاصه ان العالم اصبح رقمي بمعني ان هناك كثير من الاشياء التي كانت تحتاج في السابق الي العضلات المفتوله اختزلت لتصبح فقط في كبسه زر ناااااااااااعم ( ناس المصارعه تاني ياكلوا نارم ) هاها
انا شخصيا اري ان العقليه الانثويه عقليه ذكيه جدا ومورد لم يستغل الا الان بكامل طاقاته دعنا نشجع ذلك في حدود عادات لن نتجاوزها وخطوط حمراء اري ان كل سودانيه ملتزمه ان لا تتخطاها

لو تعرف يا ادمن انا بعشق المعمار كيف ما حتصدق انت عارف لمن انتهي من مشروع تصميم من شده ما انا بكون عايشه فيهو بحلم بيهو وبسكن في كل مبني اصممه بسكن عدييييييييييل غرفه غرفه .. فالمعمار فن اصيل يحتاج لخيال جامح جدا لا يعرف صمت الجدران ..
دمت ابدا لك التجلي

اميمه عشريه

23-11-2005, 12:40 PM

نأتي الي الشفافه الممتعه سالي ..

بالله عبد المجيد ده اخوك انا قايله من العيله ساي ليه التحيه وانا متابعه موقعو عن كثب

اخش طوالي
واكتفي بسؤال واحد وبرجع بكمل ليك مره تانيه

رايك في الاعضاء ديل شنو بدون مجامله

1/ ابوبكر الادمن
2/حمدتو
3/ابوروان
4/سالي
5/ياسر ابوريلان
6/خالد حمد
7/بابكر
8/عبدالمجيد عشريه

تحياتي اليك كثيره جدا لا تعد ولا تحصى ورغبه صادقه لمعرفتك عن قرب انت وكل مبدعات المنتدي لنكون حزب نسائي ( ليكود) لرد جحافل هذه الخشونه التي تسيدت على المنتديات فاصبحنا القله القليله وسطهم اخاف ان يبتلعونا فأبداعاتنا الادبيه لم ترتقي الي الا لتنافسهم كما ( طبعا كيفا ما يحلموابدا) هاها

مبروك اولا الاشراف رغم انه تكليف لا تشريف ادعوا الله لك بالتوفيق وانت قدرها واكتر .. وسارد عليك
اولا عبد المجيد هو اخوي الوجيه اوجه واحد في البيت والكارثه الحقيقيه هو عارف كده ومكرهنا عديل بالحكايه دي .. مشكله حقيقيه تتخيلي يا سالي كدي حاولي حليها معاي هاها وحلفته يغير الصوره العامل فيها زي البعشوم دي ما عارفه العاجبه شنو فيها كمان خاتيها لينا في المنتديات ؟؟

1/ابوبكر الادمن....................... ذوق تهذيب وانضباط
2/حمدتو................................ مخلص في عمله كمشرف هميم
3/ابوروان................................ يعرف الواجب جيدا له موضوعات ذات وقع جميل من نفسي
4/سالي.................................. وددت لو عرفتها اكثر وساطلع قريبا على كل ما خطها بنانها باذن الله
5/ياسر ابوريلان ..................... سوداني اصيل
6/خالد حمد .......................... متذوق فنان
7/بابكر ............................ اسطوره كتابيه
8/عبدالمجيد عشريه ..............خرافه فنيه زاهيه

شكرا واعتذر اصبحت دايما على عجالي ..زي المأجره لي عجله هاهاها

اميمه عشريه

23-11-2005, 12:47 PM

سوباوووووووووي خليك في الاخر تحليه بس .. جااااااااااااااياك عايزه قعده بمزاج

احــــــــــاول فقط ان اطمــــح لارتقي باجوبتي الي اسلوب طرحك لاسئلتك ,,,,

( طبعا كاظم برضو واقف في الطابور احجز بطوبه قضي حاجاتك وتعال تلاقيني جضمت ليك سوباوي ده )

اميمه عشريه

23-11-2005, 12:52 PM

ود الحوري ......يا رايحه الاقحوان النيلي والجوري ... تحياتي
سالتني سؤال وردي جدا ؟؟
الاخت اميمه التحيه لك من علي البعد ولكن اذا اعطيتك ثلاث زهرات فلمن تهديها
-------------------------------------------------------------------------

سارجع لك الثلاث وردات واطلب منك ان تهبني حديقه كامله فالثلاث وردات لن تفي بالغرض ...من هم حولي يستحقون الاريج والعبق لحدايق وحدايق .......وحدااااااااايق

شكرا على هديتك الجميله اسعدتني ..

اميمه عشريه

23-11-2005, 01:00 PM

السلامي لك سلامي ودمت سالما
سؤالك لا يحمل اي نوع من الغرابه لم ازور تاريخ ميلادي فكل يوم من عمري يوم مهم لا ارتضي له ان يسقط ابدا سهوا او عمدا
اغتربنا العام 1981 جيت ودرست مع اخوتي كافه مراحلنا التعليميه في الامارات فاصبحت كوطن ثان لنا .. درسنا الجامعات في السودان والمانيا .. الغربه محيط لا يرتمي فيه الا من اجبرته الظروف ونحن جئنا مع والدينا فكانت اسنه الغربه اقل حده من اولئك الذين يغتربون بانفسهم تنهشهم الوحده ويضنيهم البعد والحنين...
اتمني باجابتي ان اكون قد اسهمت بازاله بعض الاستفهام لديك

دمت بخير

اميمه عشريه

23-11-2005, 01:05 PM

هبه صلاح عشريه

اللللللللللللللللللللللله يا هبو الليله فعلا مفأجاه جميله وانت تتحفيني باشتراكك في المنتدي شكرا على لطفك وتفاعلك

اعرفكم اصدقائي باختي الصغري هبه مواليد 80 وهي باحثه قانونيه وستكون باذن الله قريبا عروس نزفها لزوجها
شكرا هبه على اطلالتك لها معان تزلزل كياني تفرحني حتى الاغماء (( رشوني بالله قوووووووووووووام)

ابقي واصل ما العيون الفي انتظارك شوقا زي مطر الفواصل

عبدالمجيد عشريه

23-11-2005, 01:36 PM

هبه يا اخوانا داخله غلط يا هبه ,,,, الموضوع اميمه في الكرسي الساخن!!!!ما في التراويح هههههه

الشريف الهندي

23-11-2005, 08:14 PM

بسم الله الرحمن الرحيم
الظاهر يا اخوانا عبدالمجيد وأميميه وهبه نموذج لأجمل علاقه أخوة يربطها الرحم الواحد فياريت يا أميمه تعرفينا على الباقين
اتمنى أن يديم الله الود بينكم جميعا وبيننا وبينكم انشاء الله وتحياتي ليك الاخ الرائع عبدالمجيد
اخوكم الشريف الهندي

saly

23-11-2005, 08:25 PM

الغاليه دوما اميمه عشريه

رغم وجودك هناك ...
بس برضو حاسه طال غيابك،
رغم إنك فى الحنايا..
وفتشت عنك
فى عيون أطفال بريئه
وفى كراريس القرايه..
مناي بس شوفة عيونك
وطمأنينتى عنك باقيه غايه..
أسعدنى جدا ياغاليه ردك
وفرحت بوجودك معايا

اها طبعا ما صدقته رديتي علي الاسئله الفوق و جيتك طوالي انا

كنت فاكره إنى كملت الكلام
لكنى لسه مابديت.
أصلو البينَا أكبر
من حروف تتقال
على صفحة ورق..
ده الفينابحكمة إله
بالفطره جوانا إتخلق..

وبرجع بقول ليك برضو يا عزيزتي اميمه

مردودة من صرخة وصدى ..
مولودة في الزمن العقيم ..
رغم المسافة .. الدهشة ...
والشوق والندم ...
أدمنت تحديق السراب ..
هدمت في ليل الحزن ..
أوغلت في الزمن الغياب ..
أدمنت فيك عشق الحروف ...
رغم إنهزامي مع الظروف ..

ردودك حلوه ومنمقه وحسيت فيك حس الفكاهه و خفه الدم

ياااااه،،
ماأجمل تساميك
على الوجع..
بركان من محبه،
ومن معزه،
جوانا إندلع..
ثورة قيم
على كل زيف،
لكل أشكال النفاق تصفع..
ووطن من معانى
ليهو النفوس دوام تهجع..

بعد كل المقدمه دي اجيك بالاسئله
1/هل المرأه تمتلك أدوات إذا أردت إن تشن حرب بين دولتين لفعلت؟؟ ( كدي قولي بصراحه عشان الباقين يعملو حسابهم مننا من اليوم ورايح ).

2/هل تلك المخلوق الضعيفة لا تنكسر إلا بسلاح واحد هو المرأه نفسها؟؟( زي قوله الرجال المرأه لو عاوز تادبها ادبها باختها عرس فيها يعني )

3/وان المرأة لو حبة تحب بصدق ولو كرهت تكره بعمق ؟؟

4/هل صحيح إن في كل صدر امرأة سر لا تستطيع أن تبوح به لاي مخلوق مهما كان ؟؟

5/هل صحيح إن للمرأة طاقه وقدره علي التحمل تفوق عشرة أضعاف الرجل؟؟

6/ مدني بتعني ليك شنو؟؟

تقلته عليك موش
لكن برضو برجع ليك مره تانيه

الكلام كتير وردودك عليها مشوقه وممتعه

اميمه عشريه

24-11-2005, 12:48 PM

سلامات نأتي لسوباوي

اولا انت قدمت تظاهره من التحيات وانا ازف اليك مهرجان من الشكر وكرنفالات ملونه من الدهشه وانا اري اسئله جميله تطرح بشكل انيق تدفع الي رأسي ذلك الكروي المحمول على اكتافي بحمل اضافي كلما انزلت منه اراه يزيد ... وحتما رغم ذلك لا ابالغ ان قلت لك ان اسئلتك كونت في ذلك الراس الكروي افكار جديده واشتقاقات لاستفهامات اخري تتناسخ وتستنسخ ...
ابدأ معك سؤالك الاول :: أولاً : سؤال العبور لاستفهامات قادمة ؟ يا سوباوي هذا ليس عبور لاستفهامات قادمه انه اشبه بعبور لخط بارليف اخر في نفس بعيده الاغوار لم تسبر نهاياتها بعد

المتابع لمشاركاتك يجد كل مشاركاتك حكراً على المنتدى الثقافي وواحدة فقط منها في منتدى آخر عللي هذا الميول ؟

فقط لانني صنفت قلمي في اتجاه ادبي لم اقصد ذلك بينما واقع الحال هو الذي دفعني فأنا انثر واحيانا اشعر ومنذ الصغر عرفنا ان هاتان المدرستان ادبيتان فتوجهت هناك حيث اجد ان الثقافه ضرب من ضروب الادب والعكس صحيح وبيني وبينك وجدت هنا اذن صاغيه تعيرني اهتمام وانا غايه ما اطمح اليه شخص ينتقد واخر يضيف بعدا جديدا لكل ما اكتب يعني التجانس مع من هم في المنتدي الثقافي هو دافعي لاكون بينهم .... فاشكرك واشكرهم.......

نأجد نَفَس الكتابة في كل نصوصك النثرية يوحي بتجربتين عميقتين يتجلى فيهما بوضوح :

أ/ رهافة حس الكاتبة والتدفق الموفور لإحساس متعافي بأريحية تامة . ما تعليقك؟

ب/ ارتباط الكاتبة العميق بالأمكنة – قد أقول من وجهة نظري أنها العوالم الرحيبة التي تجد الكاتبة فيها ذكرياتها لا

زالت دافئة حية تكاد تسمع فيها همس الأمكنة كشاهد إثبات على لحظات ذات إحساس سري يكتنفها بعمق .. ما قول

الكاتبة في ذلك ؟

نأتي لتحليلك الثاني لكتاباتي ...
الانسان ابن بيئته مقوله حقيقيه ميه في المئه وكل ما يفرز في الكتابه هي اختلاجات نفسيه بحته لا تخرج من اطار عكس لنفسيات من يجلس قباله الورق وينزل حمولاته كلها فيها وكان الله في عون الاسطر ..الكتابه يا سوباوي حاله من حالات توحدي مع زاتي ومصالحتي لكل ذرة من ذرات كياني .. عندما اكتب افرح جدا .. لانني التقي صديقي اليراع الذي لا يملني ابدا .. عندما اكتب انسكب بشكل فجائي .. فهذياني وسخونه اصابعي قد انخفضت درجه حرارتها ... انا اكتب سوباوي عن الحب .. عن الحزن ... عن الفرح ... عن الوطن .. عن الشباب .. عن الامومه .. وعن جورج بوش ( من غير تعليق بالله عليك ) ..
عندما كتبت عن الحب بعذاباته المضنيه وبشغفه وبهلامياته وسيتوبلازماته الكثيره .. المتنوعه كنت قد عشته فكتبت عنه في حينه وكنت قد تخطيته فقذفته بحجاره الكلمات واسقطت عليه لعناتي وفي مرحله اخري كبرت معاني الحب لدي لم يعد ذلك المكبوت في الاهات المحترق بنيران البعد الملتهب صيفا وشتاءا فقد نضجت احاسيس الانسان وكبر فكنت اكتب عن الحب لاجل الحب فقط لا لاجل عنصر محايد يتلقي مني ما اكتب لا فقط لاجل الكتابه ... فليست التجارب وحدها هي من كانت محركتي وباعث عواطفي لاعبر عنها .. لا انا اضمن لك ان الخيال له اليد العليا في هذا الشيء منذ وعيت وانا اتخيل واتصور فكانت كل اتجاهاتي في الحياه والتي استطيع ان ابدع فيها بنيت في الاساس على الخيال ... والتصور ..

نكمل في بوست اخر باذن الله بقيه الاسئلة ...........

اميمه عشريه

24-11-2005, 01:01 PM

الامكنه يا سوباوي تسكنني واسكنها االفها وتألفني بشكل مباغت ... الامكنه هاجس يؤرقني كبر واستقوي بنار تنفثه فيه الغربه فكان البعد والمسافه والمكان مثلث يتلهف على الظهور عنوه من بين الاسطر اخبئه فيظهر اداريه فيظهر .. في الاخير سلمته الرايه فليظهر وليظهر ... المكان يرسم خارطه الطريق اليه فيسوقني اليه .. اي مكان التقيت فيه صديقه ....قريبه .. اخ ... اب ... ام ...اي كائن له ضلع في تكويني يقودني اليه بالذكريات والحنين .. واظل اذيل كتاباتي بالمواقع والامكنه فلا التواقيع تجدي ولا الامضاءات تحمل نفس البصمه الانيقه ... ونتابع ...........

اميمه عشريه

24-11-2005, 01:17 PM

السؤال : هل كانت تنزف الكاتبة أنتاجا نثريا أو أن جاز تسميته انفعالاً توثيقياً لكل موقف أما أن الصبر معينها وأنها

تختذل الكثير ثم تتداعى حينما تريد أن تتنفس فقط ؟

التجربة الثانية : وهي تمثل الاستقرار العاطفي التام للكاتبة والذي لا يخلو من مخاوف الفراق والبعاد أو تجزئة العلاقة

جغرافياً لتكون بين الأمكنة مما يزيد الكاتبة التهاباً ممزوجاً ببعض خوف الفقدان ونجد ذلك في نصوص الكاتبة النثرية

التالية : " مرة واحدة دعنا نجرب – انتظرتك – إلى حضرة من أهوى – أشيائي وأشياء أخرى – حضارة أسمها الحب –

شمالاً جهة القلب – ألف عام ألف عام وألف أمنية صغيرة – شيء خطير جداً"

المتمعن في النصوص الواردة أعلاه للكاتبة يجد أنها في هذه النصوص متصالحة جداً مع نفسها ومع علاقتها مع الآخر

كما نجد سمات الرضا التام عن الذات وفرحة الانتصار والاستقرار في علاقة عاطفية متفائلة وزاهية .. ونجد أنها تعود

------------------------
هناك اشاعه تقول ان الكاتب لا يكتب الا ان كان له ملهم ..من وجهه نظري الشخصيه جدا ليس لزاما فالكتابه فن ككل الفنون له ادوات لتجوده وله ادوات تحسنه وله ثقافات تكتسب من اجل الرقي به وان كان هناك ملهم فهو فرض كفايه ...لا فرض عين ..هذا يعني ان هذا الكلام ينسحب على ما اكتبه ... ليس شرط ان اكون غارقه حتي اذني في الحزن لاكتب عنه ولا منهاره من تجربه عاطفيه فاشله حتي اشبع الاوراق لطما وعذابا واهاتا ليس لها حدود ... احيانا يمكن ان تحس بالاخرين بمن هم حولك ان تحس احاسيسهم وتكسوها عبارات وبعد العبارات اسطر فموضوع متكامل في بنيته التشريحيه لتجربه كتابيه تعتبر انت والدها بالتبني فقط او حتي بالتجني ؟؟هي لك هل تجربتك ... الذي يعيشها غيرك ( سلبطه في احاسيس الاخرين بمعني اوضح )
عشت وسط صديقات جميعهن مرهفات الحس عاطفيات جميلات رقيقات اكسبني ذلك تجارب كثيره هي لهم وانا اعبر عنها وانا لدي من التجارب ما يعتبر يتيم لا اب له ولا ام ولا اخ ...صقلتني علمتني شذبتني جلعتني قويه صنديده اكتب واجازف واحارب واراهن بكل عاطفه جميله .. الان اعيش حب من نوع اخر مع زوجي حب يحتاج ان يدخل المعمل لاري بنفسي من اي نوع يمكن ان اصنفه .. لكن فقط ما اعرفه عنه انه ليس من ذلك النوع الذي يجعلني اكتب عنه .. فالتعبير عنه هنا تختلف ادواته كثيرا ومداخله ايضا مختلفه ليست الكتابه من ادواته ... ( السطر الاخير جمله اعتراضيه قفزت بسلاح المظلات الى رأسي )

اميمه عشريه

24-11-2005, 01:27 PM

بيقولوا العتره بتصلح المشي فالانسان دايما هو مشروع ناجح لكائن حي يعالج سقطاته وعثراته ويستخلص عصارتها زيتا يدهن به ركبه المدشدشه من هول السقطات هاهاها فالخدوش التي تتفنن في صنعها الايام هي ذاااااااااات الايام التي ستخطب ودك وتعالجها لك ...فقط لكل شي زمن ربما البعض يتجاوزه كثيرا وينتهي بقربه كل نتاج مصانع مناديل الاوراق وهو يمسح دمعه ويكفكفها وتتسرب الايام من بين يديه والبعض الاخر يتنفض ( زي الضاربينو كهربا ويفنجل عيونو ويقول خير يا جماعه ما حصل شي حاجه بسيطه ) ويواصل .. هذه هي الحياه وهذه هي الاصناف المتوفره للعرض من انواع البشر ... انا بقي بحسب نفسي في النص ما بين الاثنين الواحد ما يشتر الحاجات ويدي نفسه الوقت الكافي لبرأ الجرح مش كلفته سااااااااااااي كذلك ما يعمل ناييييييييييييم وبالع فاليوم لسنوات وسنوات كده ما كويس كده غلط ...

تحياتي ............

اميمه عشريه

24-11-2005, 01:30 PM

بكره بقي باذن الله نشوف سالي والشريف الهندي لانه والله سوباوي عمل لي جفاف محتاجه لي درب هسه ده .........لو ماظهرت ليكم بكره رسلوا للكشف بس ما تسلموهم لمجيد اخوي ...اسمعوا كلامي علييييييييييييييييكم الله

عبدالمجيد عشريه

24-11-2005, 04:37 PM

والله يا انينه انت خرافيه عديل ................معقوله اقدر ارسم انا زي ما بتكتبي انتي كده...بعدين والله الكشف ده
بالله لسه في حاجه زي دي ..ههههههه

aborawan

25-11-2005, 01:08 AM

احييك اخت اميمة وانتي لا زلتي صامدة على منصة الكرسي وازف اليك التهنئة بمناسبة :):) تمديد فترة جلوسك على الكرسي اسبوع اخر على حسب رغبة الاخوة الاعضاء وقد وصلتني 7 رسائل من اعضاء متميزين في المنتدى يطالبون فيها بابقائك اطول فترة ممكنة على منصة الكرسي فهنيئاً لك هذه الاسبوع الاضافي :d:d
( غايتو لو رأسك سخن وضرب عندك فيوز ياريت تعفي لي انا ما عندي اى ذنب ):d:d

تحياتي يا انينه

حسن على

25-11-2005, 11:38 AM

--------------------------------------------------------------------------------

الاخت اميمة السلام عليكم ورحمة الله تعالى وبركاته
ربنا يكتب سلامة الوالده وماتشوف شر انشاء الله وربنا يخليها ويطول عمرها آمين
وابقى طمنينا عليها باستمرار ربنا يكتب سلامتها
روحي ليه مشتهيه ودمدني

سوباوي

25-11-2005, 10:41 PM

المرهفة .. أميمة عشرية ...

مزركش تحياتي أولاً ..

شكرا لهذه الرحابة التي أجبتي بها على أسئلتي .. فخور بك أنا كمتلقي بأنه لا زالت أرضنا حبلى برائعات مثلك ...

يجوز أن أكون قد كتبت في بوست سابق .. عن من أعرف من اللائي يكتبن في وطني .. شكراً أنيقا لك أختي

أميمة وأنتي تشكلي إضافة جديدة وحقيقية لهذه القائمة سأعرفك على بعضهن هنا وإن كانت المساحة لمقعدك

الذي جعلته برداً وسلاماً ..

هناك عزيزتي من يستحقن أن نفخر بهن : وأولهن الراحلة ..

أماني محمد عثمان : تلك التي حين ألتقيها في نصها "ثلاث وجوه لميلاد آت" أدركت لماذا اختارت الرحيل ..

جزء من النص :

لأنني ..

أحب فيك خاطري وخافقي ...

تعلقت خطاي قيد رسمك المدار ..

تمرحلت رؤاي بين دفئك الحفي ...

ووجهك النهار ...

بحثت عنك في عيون من رآك خلسة ..

وجدت في عيونه بحيرة وظل

وموكبا يهل ونورسا حزين يشب قافزا حواجز المطر ...

ومنهن نجلاء عثمان التوم ... تلك التي التقيتها في منتديات الخرطوم .. تلك البنت الأعجوبة

وهي كفراشة تحلق لتعبق المكان بتناول الترجمة مرة وبالتصدي لمفردة الحداثة مرة أخرى ثم ترحق الورق بنصوصها

الشفيفة .. تقول في نصها السهل الممتنع : "تاكيت الباب واستنيتك"

تاكيت الباب واستنيتك

صيفين وشتاء

ورشة مطرة .. ما وشك كان صاحي وبخير ..

أللوانك واضحة ومختصرة ..

وكتين ما جيت .. ضايرت الخوف .. حزمت التوب ..

وصيت الغيمة تلاوح البيت وما تسد الباب جايين راجعيين ...

وأيضاً تلك الرائعة سعادة عبد الرحمن .. والظاهرة الخجولة هدى النصري .. وبالذاكرة كم من أسماء الرائعات ..

ليس الآن المكان المناسب للحديث عنهن وأنتي على مقعد الأسئلة ..

كل الذي استيطع أن أقوله الآن على عجل .. أنكن بنات وطني لستن بأقل شأناً من أحلام مستغانمي و سعاد الصباح

وكل الاسماء اللامعة في سماء الكتابة ..

أخيراً محبتي ملئ القلب إليكن .. سنظل نترقب منك الكثير الكاتبة أميمة عشرية ...

تحياتي أقصى ما تراه عيون ..

يجوز أن أعود لك بسؤال أو سؤالين ...

فقط أقول يجوز ...

Mr Lonely

25-11-2005, 11:16 PM

الاخت اميمه عشريه
السلام عليكم ورحمه الله
والف سلامه للخاله وان شاء الله ما تشوف شر

والله اسئله مافي لكن ما بطلع ساي

سؤالي

اذا خيرتي بين خيارين
الاول / ان تكوني مراقبه في المنتدي بشرط ان لا تشاركي
والثاني / ان تكوني عضو في المنتدي مع الحريه بالمشاركه وفي اي قسم .

ايهما ستختارين؟؟؟
ولماذا ؟؟
ولكي جزيل الشكر والتقدير

اخوك

Mr Lonely

اميمه عشريه

26-11-2005, 10:58 AM

اعمق من رائحة المسسسسسك ...
لا بل اقوى من عبق اللبلاب ...قالتها لي مره
كتعويذة حب لامرأة مدفونة تحت الاعتاب ...
كعشق فتاة مسكوب في قاروره عطر
من زمن الاطياب ..
كحرف ممزوج بالروح ومصلوب في دفات كتاب ..
قالت لي مره:
جاء كرمح مرتحل لاقصي وجهات شتاتي ...
كلواحظ حسناء في خدر تصيب القلب بشهاب ..
قالت لي مره :
خلع المعطف من كتفي ..
ليدثرني ما بين الاهداب ..
رحل ولم ادر بعد اي طريق لاياب ..

قالتها لي مره ..وكانت آخر مره لغيابي ..

اهديها للغاليه سالي .. ولكل السمر في بلادي يا بلادي

ونعود لنلتقي مجددا في الكرسي الحالف ما يبرد ديه ..

اميمه عشريه

26-11-2005, 11:32 AM

انا واقفه مع سالي لسه ما جاوبت علي كل اسئلتها ..
اول حاجه انت منزله شعر خرافي عديييييييييييل حاجه جميله شديده انرت بيه المونيترات كلها هاها
طيب يا ستي نجي نجاوب ( اللهم اعني ولا تعن علي )
1/هل المرأه تمتلك أدوات إذا أردت إن تشن حرب بين دولتين لفعلت؟؟ ( كدي قولي بصراحه عشان الباقين يعملو حسابهم مننا من اليوم ورايح ).

المرأه يا سالي لا تمتلك ادوات حرب هي كلها قنبله مصنوعه من قنابل جرثوميه وبيولوجيه ونوويه وانشطاريه ووووو ..المراه يمكنها برمشه عين ان تشعل حربا وبالرمش الاخر بس لو قبلت كده تطفئ هذه الحرب ... احترسوا من هذا المخلوق .. اللهم هل بلغت اللهم فاشهد ما تقولوا بعدين اميمه وسالي ما قالوا لينا .. وزول واحد يتعمق معاي ويسالني كدي يا اميمه ورينا اسلحه المراه وادواتا شنو بخسررررررررررررروا صدقوني بخسروا ....هاهاهاهاهاها

2/هل تلك المخلوق الضعيفة لا تنكسر إلا بسلاح واحد هو المرأه نفسها؟؟( زي قوله الرجال المرأه لو عاوز تادبها ادبها باختها عرس فيها يعني )

دي مقوله يقولها رجل ما متعولم وما رقمي وتصدقا مره لا زالت في التكل بعد .. اما غير ديل المقوله دي للاستهلاك المحلي فقط

3/وان المرأة لو حبة تحب بصدق ولو كرهت تكره بعمق ؟؟

دي كلام جميييييييل كلام معقول ما اقدرش اقول حاجه عنو ... اصلا انحنا ما سمعنا بالوسط يا كده يا كده ..مخلصات في اي شي ..
اللهم الا الركشات الطالعات جداد ديل عندهم نظريات تانيه غريبه كده خلينا سااااااااااي منها هاهاها

4/هل صحيح إن في كل صدر امرأة سر لا تستطيع أن تبوح به لاي مخلوق مهما كان ؟؟

نعم حتي لا نخرج من الاطار العملي دعينا نقول ا ن 99.9% هن كذلك..

5/هل صحيح إن للمرأة طاقه وقدره علي التحمل تفوق عشرة أضعاف الرجل؟؟

لاكون اكثر دقه تفوق قدرتها على التحمل اكثر من 100 فيل و300 جمل .و........ و.............. الرجل شنو ده اللي بتحمل والله قصه ... ديل انتهوا في الالفيه الاولي ..

6/ مدني بتعني ليك شنو؟؟

كل شي ................... تشبهني جدا كابنه لي واشبهها جدا كنخله مغروزه فيها ...

دمتي وسلامي لابنتي الصغيره ( خطيبه صلوحي )

اميمه عشريه

26-11-2005, 11:40 AM

تحياتي الشريف الهندي ........... كيف انت لم تطل علينا منذ ايام ... ياخي اسال عليك الله كان ما سألت انت زول رؤؤف بي وعالم بحالي .. ما تقطع اخبارك وبشكرك جدا على تحياتك ومرورك العاطر علينا ... بتستعمل فهرنهايت ولا شنو لانه رايحه البوست عجيبه وانت ماري علينا هاهاه

طلبت مني ان اعرفك على اخوتي الباقيين باذن الله تعالي حأذن في اضانم لمن كلهم يشتركو هنا تخيل نحن موزعون في بقاع العالم ونتخاطب انترنيتيا شفت الاخوه الرقميه دي هاهاها 0101010101010101 دخلت كل شي في علاقاتنا الحميميه ..
اتحدث مع ولاء ومجيد ومحمد في المانيا بالانترنت
تدخل هبه اون لاين من السودان .. احي زوجي واديه الاخبار في الرياض .. اسال عن ريما ورايف ورامز ابنا اختي في امريكا ده باقي ليك شي طبيعي والله احترنا عديل بتين نتلم ؟؟؟؟؟؟؟؟؟

تحياتي الشريف تحيات كثيره جدا واحترام ..........

اميمه عشريه

26-11-2005, 11:50 AM

احييك اميمة وانتي لا زلتي صامدة على منصة الكرسي وازف اليك التهنئة بمناسبة تمديد فترة جلوسك على الكرسي اسبوع اخر على حسب رغبة الاخوة الاعضاء وقد وصلتني 7 رسائل من اعضاء متميزين في المنتدى يطالبون فيها بابقائك اطول فترة ممكنة على منصة الكرسي فهنيئاً لك هذه الاسبوع الاضافي :d:d

اسبوع اسبوع يا ابو روان وانت زاتك لو عندك اسئله اساله ( على وزن لو عندكم كديسه نادوها زاتو ) اهئ اهئ اهئ ..
والله يا ابو روان انت جادي ؟؟ بتتكلم جد.. بس قول لي جماعه السبعه الارهابيه ديل منو ...... عشان ابلغ عنهم سفاره العم سام ...
غايتو والله انا سعيده جنس سعاده حأموت من السعاده وانا اشم رايحه شوائي في الكرسي الهيتر ده ..
لك الود وانت تزرع فينا الجميل هنا وهناك هاهاهاهاه
لكن بقترح والله تطلعوا بدل صمود في المناطق الساخنه دي .. اي شي انشاء الله زير مويه بارد ..

اميمه عشريه

26-11-2005, 11:53 AM

الاخت اميمة السلام عليكم ورحمة الله تعالى وبركاته
ربنا يكتب سلامة الوالده وماتشوف شر انشاء الله وربنا يخليها ويطول عمرها آمين
وابقى طمنينا عليها باستمرار ربنا يكتب سلامتها
شكرا حسن علي ....... الله يديك العافيه وتعيش وتسال ..الحمد لله هي بالف خير لا زلنا في التجهيزات لاجراء العمليه .. لانها صاحبه سكر وهي سكر زاتا ..
شكرا ليك كتير ... وابقي واصل

اميمه عشريه

26-11-2005, 11:58 AM

العزيز سوباوي ............ ايضا تعبر من هنا فيكون لعبورك صافرات واجراس .. ويطلق الحمام وتبدأ الاعراس ............. كل يوم ابقي مر ومر مر .......... وحلو مر

مداخلاتك جميله والاجمل ان تعدد لنا قافلات تحمل مبدعات بلادي ... ليعلم الجميع اي سمراوات هم ..واي اقلام تأبي الانكسار والانحسار وتخرج في وجه التتار ...

فأبقي مر ..

اميمه عشريه

26-11-2005, 12:05 PM

سؤالي

اذا خيرتي بين خيارين
الاول / ان تكوني مراقبه في المنتدي بشرط ان لا تشاركي
والثاني / ان تكوني عضو في المنتدي مع الحريه بالمشاركه وفي اي قسم .

ايهما ستختارين؟؟؟
ولماذا ؟؟
ولكي جزيل الشكر والتقدير

اخوك

Mr Lonely
__________________
سلامات يا لونلي ... ياخي شوف زول اقعد معاهو الوحده ما كويسه اسمع كلام اختك ..

سؤالك جميل شديد دون ادنى تفكير ساختار ان اكون عضوه اشارك هنا وهناك انت ما عارف انا مصنفني ((( طفله هايبر اكتيف ))
( عندي نشاط زايد ) يعني كوني اطبق يدي اشوف ده دخل وده طلع دي ما بقدر اعملا كلو كلو عندي قللللللللللق هاهاهاها

اميمه عشريه

26-11-2005, 12:08 PM

الله انتهيت ماشه البيت ....... اشوفكم بكره باذن الله تصبحوا علي خير اخخخخخخخخخخخخخخخخخخخخخخخخخخخ بتعملوا الانهاك الحراري انتو ..

Mr Lonely

27-11-2005, 03:29 AM

لا المره دي ما عندي سؤال
بس يا اخت اميمه ماشاء الله عيني عليك بارده

الله يديك العافيه

Ashria

27-11-2005, 02:27 PM

معقوله بس

و الله انها لمن غبطتي ان اري اختي وهي تتحاور وتتلاعب بالانامل الزاهيه الملئ المفعمه بكل جديد لها التحيه و التمنيات الجليه بالتوفيق لما يحب ربي ويرضي.
و وفقت يا اختاه و اتسترتي في الكرسي.. الجماعه ما مقصرين

و في الختام لكم السلام

اخوها البكر ولاء صلاح عشريه

saly

28-11-2005, 12:36 AM

الحبيبه اميميه عشريه

طبعا امشي افوتك وين بي اسئلتي دي الليله بقيت ليك زي نكير اعزريني

يا خطوتك يا خطوتك
يا خطوة ضاعت
بين صراخك والصدى
بين المسافات والنوى
بينك وبين كل ودمدني

ما رايك في جميع الاسئله التي طرحت عليك وانت علي الكرسي الساخن؟

كيف تبدو الذكريات ؟

كيف يبدو طعم أيام الشجن ؟

ما معنى أن نحيا .. ولا ندرى بأن العشق قد يبقى سجيناً فى الخلايا....؟

خبرينى
والمساء الشاحب الخطوات يحترف التعب..ورحيل أغنيةٍ توشوشُ فى خبايا الإنتظار؟؟

ومن وين بجيك فرح الحبايب لما تقفل باب حنينك ،
أو بمعنى أصح : متين الحنين بياخدك للناس هنا ( في ودمدني ) حبية الكل ، برغم الفيها من وجعة .. وبرغم الضيق ..
طبعا سؤالي ده ليك لاني متغربه انا. :)

الغربة اقسى نضال ، الغربة سترة حال ، ما بين النضال وسترة الحال اذا سألك احد يريد الاغتراب عن الغربة بماذا تجيبيه؟

بقولو النسوان السودانيات اكثر النساء فى العالم من حيث الشمارات والقطيعه والنميمه والغيبه رايك شنو ..........وانتى وين من الحته دى؟؟

هؤلاء يمثلون تاريخ امه ما رايك به
1- الصادق المهدي
2- دكتور الترابي
3- قرن
4- تناضر شيخ الدين
5- مصطفى سيد احمد
6- وردي
7 الفلاتية
9-مصطفى عثمان اسماعيل
10- والرائعة روضه الحاج

وشان بنوتنا لا لانن ولا هانن
ولا كانن قليلات شان
مضامينن مسك عنبر
شبابيلن كما ليلن
معبقه بي عطر مزدان
أصالة نفيسه في الجوهر
يقشن دمعتك بالدم
يكسرن سيرتن بالنم
نساويناً قريب ما يحلفن حرم
ترابك لا رخص لا هان
ولا شافن غيرك يا وطن أكبر
مهيرة الوطن المتألق

اقرب زول لحلم حياتك شنو ؟؟
حاجه لما تعمليها بتكوني مبسوطه ؟
اسعد لحظه مرت بيك في حياتك ؟
ماهي المرأة المثالية في نظرك ؟
المرأة السودانية ( الماضي - الحاضر - المستقبل ) كيف تنظرين لها ؟

ما هو رايك فى الرجل؟؟؟؟؟؟؟؟؟؟؟
الاب؟
الاخ؟
الجار؟
الزوج؟
الحبيب؟
وايهم اقرب اليك؟؟؟؟؟؟؟؟؟؟؟؟؟

اميمه عشريه

28-11-2005, 01:26 AM

ابو منيه تحياتي شكرا يا ولاء
اطلالتك الراقيه تلك تذكرنا دايما بحضورك المموسق الذي يصحب وراؤه كل الوان قوس قزح فنفرح ويفرح كل ما حولنا لانك معنا ..

لجميع الاهل والاصدقاء بالمنتدي اقدم لكم اخي ولاء صلاح عشريه هو اخوي الكبير ( ما كبير شديد ) مواليد 67 .. ! اكتشفت مؤخرا انه مسجل هنا في المنتديات من العام 2003 يعني قبل ميلادنا انا ومجيد وهبه بس المشغوليات اخدته اتمني ان يثري معنا المنتدي ونستفيد من تجاربه في الحياه فهو دعامه لافكار جميله واطروحات نادره ... دمت ولاء لك الود وكل الشوق

اميمه عشريه

28-11-2005, 02:10 AM

تسوقني خطاي ليك يا مناي
الاقي حليوه واقفه بعيد
تفرح تضحك تشكي نواي
سالي ايتها الاقحوانه الجميله ... كلما سألتيني سؤال اجد ان المسافه التي تفصلنا تتقلص وتنكمش فنقترب كثيرا ..من نقطه تآلفيه جميله .. فأسألي ما شاء الله لك ..

مارايك في جميع الاسئله التي طرحت عليك وانت علي الكرسي الساخن؟
قد لا تدرين مدي سعادتي وانا اخاطبكم .. فكل سؤال يحمل معه احساس جميل بالتفاعل والمشاركه والتجاوب كأننا نجلس في صالون نحتسي الشاي باللقيمات ونتجاذب اطراف الحديث الواحد يقترب كثيرا من الاخرين بالتخاطب معهم يحلق في سماواتهم ينصهر في تجاربهم يقهقه من نكاتهم هذه هي الصداقه التي لا محاباه فيها لشكل او مظهر او مركز فقط نعرف بعضنا عبر الاثير فلا شي يظهر منا سوا هذه الكلمات النابعه من اعمااااااااااااق هنااااااااااااااااك بعيده ...جميع ما طرح علي له مكانه خاصه في نفسي حتي وان قصرت في الرد وبقيت هناك شي من حتي في داخلي الا ان شي افضل من لا شيء .. للجمييييييييييييع تحياتي وخالص احترامي

كيف تبدو الذكريات ؟
الذكريات ........... الذكريات ...........الذكريات صادقه ونبيله .. لدي مخزون من الذكريات يا سالي خرافي جدا ذكريات بمدينه الابيض وذكريات بالثوره وذكريات الشجره وذكريات بمدني وجامعه الجزيره وذكريات بجامعه امدرمان الاسلاميه وذكريات بالامارات والمانيا وهولندا ومصر وذكريات اسرتي وصديقاتي واساتذتي ومع اصدقاء الانترنت ايييييييييييييك يا سالي ذكريات محفوره في خاطري وكلما بعدت عني زمنيا اقترب منها روحيا .. ذكريات الزواج وذكريات الطفل الاول وذكريات المقال الاول الذي نشر في الجريده وانا في الصف السادس وذكريات الذكريات ... ياااااااااااااااه العبره تخنقني .. احس بالحنين الي رائحه الماضي ... الاشياء كانت اكثر اشراقا ..واكثر حميميه ..

كيف يبدو طعم أيام الشجن ؟
تبدو لي الان جميله لانني تركتها ورائي .. وتبدو لي حميمه لانني استمد منها انسانيتي .. وتبدو لي اليفه لانها جزء مني .. وتبدوا لي مهمه لانها من روزنامه ايامي ... وتبدو لي بطعم الملح لان دموعها جفت ... تبدو لي الحياه لانها تهز داخلي كائن يلجأ للبيات الشتوي كلما كثرت رياح العواطف وهبت اعاصير الشجون .

.ما معنى أن نحيا .. ولا ندرى بأن العشق قد يبقى سجيناً فى الخلايا....؟
لا معني له ... ولا حياه هنا ..

خبرينى
والمساء الشاحب الخطوات يحترف التعب..ورحيل أغنيةٍ توشوشُ فى خبايا الإنتظار؟؟
سأخبرك باي شي .. الا عندما تتثاقل الخطوات في الدرب فيهرب الدرب من تحتها ... وعندما تختار الاغاني الرحيل فلا معني ان ننتظر مجئيها فهي لن تأتي ابدا .......

متين الحنين بياخدك للناس هنا ( في ودمدني ) حبية الكل ، برغم الفيها من وجعة .. وبرغم الضيق ..
طبعا سؤالي ده ليك لاني متغربه انا.
لو قلت ليك ان مدني عشتها حلما فقط ورحلت اليها في احاديث والدي واهلي لن تصدقيني .. مدني يا سالي لم اعرفها في حياتي الا اشهر فقط اشهر تحتسب .. رغم ذلك هي مغروسه داخلي بشكل يقاوم جبروت الايام وضبابيه المدن الاخري ... حنين مورث وشوق اليها كان من ضمن وصايا والدي فهم لم يورثنا فيها الا ارض بحنتوب واطنان من العشق بدواخلنا وذكريات اجدادي هنا وهناك اتلمسها وابحث عنها واتأكد ان جذوري لا زالت ضاربه هناك في العمق ..................مدني انا منها وهي في ..

يتبع .........

اميمه عشريه

28-11-2005, 02:12 AM

من جحيم اسمه وجع الازمنة المزمن أنا أهرب .... ومن ألم انتهاك حرمة القلب وامتهانه الي تقديس متناه للمشاعر ... من شح الحب وندرته الي ترف مهول اسمه السعاده والوله ......ومن وقوفي على اروقه النصوص الاضافية الي ولوجي الي دائرة الضؤ ..ومن انتظاري على هوامش الكتابة وحواشيها السفلية الي جوهر المواضيع ... عجبا!! من النقيض الي النقيض .. ولازلت على قيد السعادة ... احكمت خطة الهرب الي الحياة .. تسلقت على ألآمي وعبرت محيطات من الدموع لالتقيك بعدما عشت دهرا وانا موصومة بالهرب ومتهمة بالفرار .. ما أحببت الحياة بقدر ما احببتها عند ادراكي أنك فيها .. وما هربت مني الكلمات مستحية الا حينما توقفت عن الهروب ورست سفينتي بعد حروب ضارية ضد التتار وضد القبح وضد الملح وضد الشح وضد كل ما يسلب الاحساس .. اكتشفت أن هناك عالم جديد ويخطئ من يظن ان العوالم كلها اكتشفت .. معك اصبحت ابتكر وجوها غير مألوفة .. واشرعة لم تمزقها بعد قسوة الرياح .. وافراح عذراء لم تمسها بعد مخالب الاحزان .. واحرف من نور تتراءى الآن أمامي لاخطها عنك .. فأخيرا بت امتلك بيتا ألجأ اليه من مناخات الحياة المتقلبة .. واخيرا .. صارت لي ركيزه اتوكأ عليها اذا ما هزتني رياح الحياة وزلزلتني رياح الخوف .. اخيرا تدفقت الدماء في عروقي محملة باكسجين الفرح .. وبفراشات بألوان الحب .. فرجعت أعرف اوجها مشرقة لهذه الدنيا .. وتبدل لون دفاتري من لون التلاشي والذبول الي لون البنفسج والزهول .. وصار حبري عطر ينزفه القلم على الورق لتفوح منه رائحة الحياة !! واخيرا وجدت حضنا ملاذا يتمناني ويشتاق الي ... ويتسع لهمومي .. ويذيب جليد العالم من دفئه ...

اخيرا .....

نجحت خطة الهرب الي الحياة ,,,,,,,!!

اميمه عشريه

28-11-2005, 02:33 AM

نكمل يا سالي ........

الغربة اقسى نضال ، الغربة سترة حال ، ما بين النضال وسترة الحال اذا سألك احد يريد الاغتراب عن الغربة بماذا تجيبيه؟
اذا سألني احد عن الغربه .. ساقول له اغترب لا امنعه ندعه يجرب فالغربه تجعل من كل اعصابنا اوتارا حساسه والغربه اختبار حقيقي ومعمل يقيس فيه الانسان درجاته العاطفيه جميعها من حبه لاهله وترابه وانتمائه ومفاضلته بين ما هو مادي وما هو معنوي .... جرب فقط فالتجربه هي الفيصل ..

بقولو النسوان السودانيات اكثر النساء فى العالم من حيث الشمارات والقطيعه والنميمه والغيبه رايك شنو ..........وانتى وين من الحته دى؟؟
لا سبقهم الا ذلك المجال اخواتنا في .............و.............. ( يعني حتي هذه لن ننال براءه اختراعها ) ما خلو لينا شي هاهاها
سالي الفراغ اما ان تقتليه او يقتلك ... كنت اتمني ان اجد اي وقت امارس فيه سودانيتي بكل ابعادها بس بشكل اكثر تشذيبا .. فاعراض الناس ليست علكه نمضغها كيفما شئنا ... اكره هذه العاده جدا واحمد الله انه لهاني في روحي عندي من المشغوليات لمن روحي طلعت عديل لفيت ما بقدر اتلفته ..

هؤلاء يمثلون تاريخ امه ما رايك به
1- الصادق المهدي
2- دكتور الترابي
3- قرن
4- تناضر شيخ الدين
5- مصطفى سيد احمد
6- وردي
7 الفلاتية
9-مصطفى عثمان اسماعيل
10- والرائعة روضه الحاج

كلام صحيح رغم الاختلافات في كيفيه تمثيلهم لهذه الامه ولتاريخها لكنهم يظلون ارقاما لا يمكن اسقاطها

اميمه عشريه

28-11-2005, 02:36 AM

اقرب زول لحلم حياتك شنو ؟؟

سأجيبك شعرا سيدتي ..

ما زلت احلم سيدي……

 لازلت احلم سيدي……
واحلم……….
بمن يهب الحلم أرضا
مروية………..
بمن يلقي في رحمي…
أجنة حلم وردية!!؟

 لازلت احلم سيدي…
بمن يأسرني لأعيش ….
الحرية!!!!!
من يسجنني في محاكم…
حب صورية..!!!!
من يقر أني……..
حرفا _ اسما _ فعلا…
في مجموعة عشق……
شعرية!!……
من يقنعني أن الجزر….
الخضراء بلا وله…
ستهرب إلى أرض …..
منسية……

 لازلت أغفو يا –سيدي-
فيراودني –طيفه-عن نفسي…
فأحلم بكوكب جديد…
غير الشمس في المجموعة…
الشمسية!!!!…
وبتاريخ عشق يجئ….
بعد السنة القمرية

 لازلت يا سيدي….
احتفظ بقليل من الواقعية
ومع نفسي- أحاول – أن..
أكون اكثر مصداقية…
أنا…………
أنا………

لا احلم برجل من نور…
أو يحمل جينات…..
ملائكية!!!!!
أريده إنسانا…
نعم أنسانا….
يحزن………..!
يفرح……….!
يغضب………!
يهدأ……….!
وغارق في الإنسانية…

 لا زلت اطلب يا سيدي…..
رجل لا أراه فقط ….
من خلال الشبكية…..!!!

 واستمر الحلم يا سيدي….
برجل ………
يرويني كأجمل……
حكاياته………!!!
ويطلعني وحدي على……
أسراره وأدق……
مجرياته………!!!

 ما زلت احلم بمن …….
يسقيني………
حد الارتواء…….!!!
يحو يني ……..
حد الانضواء……!!!
يضحكني……
نعم …..يضحكني.!!!
حد البكاء ….!!!!
من يقسم لي ألف ..ألف..
ألف………مره!!!
أن قصصه قبلي.. كلها ….
هراء………
يعلم مكمن ضعفي….
قوتي…. جنوني….
في الخفاء…….!!!

 لا زلت امتلك حلما …يا سيدي……

بفارس مغوار…..
كريم …. عطوف
يحطم معي أبراج …
الشقاء…….
يقيني شر نفسي…
ورعونتي الحمقاء…

سيد ي …….!
وسيد حلمي….!
وسيد كل أحلامي…!
لا زلت احلم….
بمن ينظم أحلامي…
كأجمل عقد في جيد…
عنقاء……!
من يشعل لي قلبه….!
في الليلة الظلماء…!
ما زلت اعتنق التفاؤل..
واحلم يا سيد الأشعار…
برجل يدرك أن الفرق…
بيني وبين كل النساء..
تماما كالفرق ما…
بين الأرض والسماء….!!!!

(هنا_ينتهي الحلم_ وتبدأ غيبوبة الحقيقة)!!!!

اميمه عشريه

28-11-2005, 02:39 AM

لا زلنا مع سالي ..

حاجه لما تعمليها بتكوني مبسوطه ؟ الكتــــــــــــــــــــــــــابه

عشقتُ الضاد حتي خِلتُ انه

لن يكون لغيرها نصيباً في هوايا

سُقتُ الحروف طوعاً وكرهاً لبناء

مجتمع ٍطيبٍ حسُنَ النوايا

فكتبتُ حتى صار القلمُ حيا

ناطقا نابضا في القلبِ بين الحنايا

جلتُ الكتب بحثا عن دررٍ

عّدها البعض من ضمن الفنايا

فأتخذتُ من الكلمات لسان صدقِ ٍ

ادفعُ به الظلم عن الحفايا

وان يوما ضللتُ الخطي

كانت الابجدية دليل خطايا

فكان مقالي حرفا فكلمة مصداقة

ابعد ما تكون عن الدعايا

وكانت همساتي نداءاً صارخا

لكل حرٍ اسمرٍ ترفع عن الدنايا

هي الحياة عندي نثرٌ وشعرٌ

وكلامُ سجع ٍوإلهام رؤايا

والحياة عندهم ساحات حرب

تُحصد فيها ارواح البرايا

وقناعتي ان من ولج القتال

لا يفر من الشظايا

وهكذا الايام تركض لا محالة

ويدور رحاها من رحايا

فإن اقعدني القدر يوما

لا تجزعوا فالكتابة سر دوايا

فكل نفس ذائقه الموت

وحسبنا الشجاعة في مواجهة المنايا

ولهذا فليظل حرفي بينكم

مصونٍ كريم ٍلا ليقتات البقايا

ولتنظروا لما اكتب من كل ركن

فأنا أشتاق لأن انٌظر من كل الزوايا ,,,

اميمه عشريه

28-11-2005, 03:41 AM

اسعد لحظه مرت بيك في حياتك ؟

كثيره هي اللحظات السعيده .. ودايما انتظر اللحظات الاسعد .. لكن اجملها مولد صلاح الدين ..
ماهي المرأة المثالية في نظرك ؟
دعيني ادون لك اجابتي نفسها التي جاوبت بيها على ذات السؤال الذي اشتركت به في مهرجان دبي للتسوق لاختيار الام المثاليه سألوني عن الام المثاليه والام هي المراه زاتها ........

سألتموني ما هي المثالية في نظرك ؟ قلت ان يصير الانسان او ان يحاول ان يصير اقرب ما يكون الي الكمال فالكمال بذاته لم يُخص به البشر بل هو صفة من صفات رب البشر ..
سألتموني من هي الام المثالية في نظرك : قلت تلك التي تحترق لتنير درب الاخرين وتلك التي تحس بأمومتها تجاه مجتمع كبير ليس فقط تجاه ما ينتجه رحمها من امشاج ...
قيل لي هل امك تعتبرينها مثاليه ؟ قلت : نعم .. وعندما قلتها احتدمت لدي كل الذكريات في شريط سينمائي طويل جدا ... لا املُُ تكراره كلما اجتمعت عليّ الآلآم وهددتني بالانتصار على نجاحاتي ... تذكرتها .. وها انتم الآن تدفعون اليّ بالسطور لأخطها في حق امرأه احزنني جدا اننا الي الان لم نتمكن من رد جزء يسير من الذي لها علينا... كم يحزنني ذلك يحزنني جدا ,,,,,,, ان نطوق بدين عظيم كهذا ...
عندما كتبت اليكم قصتنا نحن وامنا في الاسفل لم اكن ابدا اُمني نفسي بأكثر من الذي رأيته في عينيها من دموع وهي تقرأها ومن عبرهٍ وهي تجاهد في اخفائها احسست ان ما بداخلي تجاهها قد وصل اليها بعباراتي البسيطة هذه .... عشت السنوات الماضيه وانا اسعي فقط لأكرمها واسعي معكم لتساعدوني على ان اكرم بها كل الامهات فكلهن يستحققن عن جداره تكريم يومي لهن وان نفرد مع جناح الذل جناح العرفان علنا نستشرف من تحت اقدامن رائحة الجنه التي لا تخطئها الانوف ........ دمتم لانكم تقومون بشئ اقل ما يقال عنه انه انساني رائع ... دمتم بحق ودمتم بخير. ( هذا يا سالي كانت مقدمه اشتركت بها الاسبوع الماضي في المهرجان التكريمي للام وباذن الله سأحاول ان انزل اليكم قصتنا هنا ولو فازت ليك الحلاوه ..

المرأة السودانية ( الماضي - الحاضر - المستقبل ) كيف تنظرين لها ؟
المرأه السودانيه اتذكرها دايما باغنيه حجه امنه اراها فيها بكل عناصرها ........في الماضي مكافحه في الحاضر مناضله وفي المستقبل سيده النساء اجمعين لانها لا زالت تقدم ملحمات من التضحيه والمثابره لتكون الافضل ولتشق لنفسها مكانا محمودا لها وسط الحياه ... لها الاجلال والاحترام منبع الخير والسلام

ما هو رايك فى الرجل؟؟؟؟؟؟؟؟؟؟؟
الاب؟ ........... رجلي الاول والاخر
الاخ؟ .............. عندما اسقط اقول آآآآآآآآآآخ
الجار؟ ............... قبل الدار
الزوج؟............. متكأ..... مرفأ .....حضن دافئ
الحبيب؟........ يذوب في العلاقات الاخري فالزوج حبيب والاخ حبيب والاب حبيب

وايهم اقرب اليك؟؟؟؟؟؟؟؟؟؟؟؟؟

جميعهم له مدخل خاص يلج به الي زاتي جميعهم قريبون من الروح ..بل هم الروح نفسها

شكرا سالي صهرتيني جدا في بوتقه صدق مع زاتي كأني في جلسه تصوف اهيم فيها واخرج من الدنيا الماديه الي عوالم تخاطب الدخل من الداخل ...تحياتي وابقي وااااااصل

saly

28-11-2005, 07:32 PM

اجاباتك طبعا ابداااااااااع ومافيها اي مجال شك انك انسانه مرهفه وحساسه و متمكنه

تعرفي شئ

بقيت اكون ليك صوره في راسي من خلال كلامك روحك الحلوه المتجه للفكاهه وكلامك السلس الذيذ (برضو من صوره اخوك عبد المجيد وصوره ابوك الشفتهم )

بقيت اتخيل في شكلك كيف

غايتو بخليها للظروف يمكن تجمعنا ونتقابل وجه لوجه لاني بالجد حابه اتعرف عليك قرب اذا مافي مانع طبعا

ولي عوده تاني بالاسئله معاك. لانو معاك الطريق لسه طويله ما ليها نهايه

الزبير محمد عبدالفضيل

28-11-2005, 07:44 PM

الباشمهندس اميمه لكي الف تحيه ممزوجه برياحين ودمدني الجميله واتمني لكي التوفيق والسداد علي هذا الكرسي

طبعا انا زميل دراسه مع الاخ / انس خالد عشريه ايام مدرسة البندر ومدرسة ابوزيد الثانويه

لي ثلاثه اسئله

1ـــ تقرير او تلخيص مختصر عن منتدي ودمدني واعضائه

2ــــ ما هيه الاستفاده من الغربه وماهي مساويها مقارنة بالوطن

3ــ حدد ي الفرق بينا المجتمع السوداني والمجتمع السعودي

ولكي جزيل الشكر والعرفان والي الامااااااااااااااااااااام

صالح ابوشوارب

29-11-2005, 12:32 AM

الباشمهندسة اميمة

لك مني التحية

سؤالي الاول : هل هناك شبه بين المجتمع الامدرماني ومجتمع مدني ؟

اذا كانت الاجابة بنعم ماهو وجه الشبه ؟

السؤال الثاني : ماذا يعني لك

1 --- زوج يغار على زوجته بشدة ؟

2 -- وآخر لا يغار ابدا !!

*********

أبو منار

ابراهيم

29-11-2005, 10:47 AM

اختنا الباشمهندس والأديبة أميمة أزيك ..

اول حاجة ماشاء الله عليك وعيني باردة والله
صراحة كان عندي أسئلة كتيرة وكنت جاي أسأل ...
بس لقيتني سرحان في القراية حقيقة استمتعت حد الدهشة
وفيتي وكفيتي ما خليتي شي .. وبقينا نحن القاعدين في الكرسي الساخن
عشان نسأل
ردودك وتعقيباتك بشفافية وألق تستحق التقدير ..
لكي تحياتي واحترامي مسبقاً ..

ولاء صلاح عشريه

29-11-2005, 11:13 AM

يا ام صلوحي سلامات

سؤالي المحيرني ذي عبد المجيد انا من عرفته عندي اخت اسمها اميمه ما شفتها ماسكه ريشه مش قلم

من بتين اتأالقتي في الكتابه ؟ و مثلك منو في كتابة النثر الحر و بالله قولي لي بتكتبي كيف و عندك ولد ذي صلوحي ؟

[/SIZE][CENTER][I][COLOR=Blue]

اميمه عشريه

29-11-2005, 12:25 PM

الاخ العزيز سفير الاطلاله الجميله .. انتظرت حضوركم كثيرا .. وانتظرت اي عبق يأتي من مراقبي المنتدي لاسعد فقط بأن اجيب على اي سؤال يتبادر الي ذهنك ....
وانا معك الان على الهواء مباشره وعلى اجنحه السرعه ساجيبك ...

1ـــ تقرير او تلخيص مختصر عن منتدي ودمدني واعضائه

هنا لا يجدي التلخيص اعذرني يا سفير فأنا احتاج لزمن كالذي اعطي لمليس ( المحقق الالماني ) كي انجز مهمتي واضع بين ايديكم تقريرا لا يتسرب اليه الشكل ولا يرتقي اليه النقصان ... فالمنتدي واعضائه لا يمكن اختصارهم وان حاولت عبثا ( كلم ابو روان يديني تلاته شهور اضافيه مع بدل مهمات شاقه ومناطق استوائيه )

2ــــ ما هيه الاستفاده من الغربه وماهي مساويها مقارنة بالوطن

الغربه فيها فوائد كما لها مساؤي الغربه احتكاك بشعوب اخري وافكار مغايره اكتساب لمعارف متنوعه واجناس تختلف عنك لونا وشكلا وتفصيلا لذلك الغربه تجعل الذهن مكدس بثقافات متنوعه وافكار مغايره تأخذ ما يفيد منها وتترك البقيه .. الغربه ايضا تقوي الانسان وتجعله يعتمد على ذاته ويشد من ساعده ويشمر عنهما ويبدا بالعمل الجاد وغير ذلك
اما المساؤي احيانا تقسي القلب ... وتربي الجفوه ويبتعد الانسان من محيط كله حنان لعالم مادي بحت فتختل احيانا الموازين وتحدث اخفاقات واحباطات مر بها الكثيرون منا .. الغربه سلاح ذو حدين قد يجمع منها المال مقابل ان يرهن سنوات عمره النضره فيها سنه عشره عشرون لا يعلم الله لها من قرار رد الله كل السمر الي بلادهم سالمين غانمين

3ــ حدد ي الفرق بينا المجتمع السوداني والمجتمع السعودي

انا جاهله تماما بالمجتمع السعودي لانني اقيم في الامارات منذ نعومه الاظافر .. فدعني اقارن بينها وبين السودان ..المجتمع السوداني اكثر تكافلا اكثر عطاءا اكثر راحه بال اكثر معاناه اكثر اريحيه اكثر تسيبا وانفلاتا اكثر انصهارا فبيتك للجميع غذاؤك للجميع غرفه نومك للجميع .. الامارات العكس اضف الي ذلك ان العلاقات التي تقيمها لا تقام بسهوله اقصد بها العلاقات الصادقه المتينه بينما في السودان يمكن ان تنزل من الدفار ( او الروزا ) ولديك اربعه اصدقاء بمعني الاصدقاء هنا المجتمع اكثر انغلاقا رغم اني احمد الله ان اصبحت لدينا على هذا العمر الذي قضيناه هنا اصدقاء نحترمهم ويحترموننا اقمنا معهم علاقات وديه لدرجه انهم يتحدثون معنا اللهجه السودانيه الدارجه تعلموها منا .. المجتمع الاماراتي وحيث نقيم تحديدا اناس كريمون جدا لا زالت اخلاق البدواه الاصيله في نفوسهم .. هذا ما لدي وقد ارجع اليك في معرض المقارنات ما بين السودان والامارات فالحديث يطوووووووووول

لك شكري يا سفير واليك كل الفرح يطير خليني انا بس في هذا الهجير هاههاا

اميمه عشريه

29-11-2005, 12:32 PM

اميمه عشريه

29-11-2005, 12:48 PM

ابو منار الاخ صالح ابو الشوارب

سعدت جدا وانت هنا تشد على ساعدي وانا احترق في كرسي المنتدي الساخن والله انتو بقيتو ارهابيييييييييين هاها.. بعدين الكرسي ده شكلو كده شغال بالطاقه الشمسيه لانه ما عايز يبرد وموصليين ليهو جنريتر كمان للاحياط تقول لي ما ارهابيييين ؟

سؤالي الاول : هل هناك شبه بين المجتمع الامدرماني ومجتمع مدني ؟

نعم هناك شبه ..........
اذا كانت الاجابة بنعم ماهو وجه الشبه ؟

الاصاله هي زاتها ... الكرم هو زاته .. منابع الفن والروايع هي زاتها

السؤال الثاني : ماذا يعني لك

1 --- زوج يغار على زوجته بشدة ؟

2 -- وآخر لا يغار ابدا !!

والله يا ابو الشوارب انا شايفه من راي كده يعني لو لخبتوهم مع بعض بتطلع حاجه معقووووووووله يعني لانه كل واحد براهو كده غير محتمل كدي جرب لخبتم بدوك عرديب عجيييييييييييييب هاهاهاها

تحياتي ومر تاني وتالت ورابع وخامس ووووووووووووووو احنا نسعد معاك كتير
سلامي لمنار

اميمه عشريه

29-11-2005, 01:09 PM

سلامات الاخ الرايع ابراهيم بالله جيت ولقيت البوووووووخ بتاع الشيه في البوستات دي خلعك مش هو كرسي ساخن ساي ( دي قريل عديل بتاع الحدايق داك ) ؟؟؟يا ابراهيم زولا واحد يعطف علي مافي جبت اخواني قلت شويه يحامو لي لقيتم ليك وجع عديل ... قوموني من الكرسي باطحني ليك في الشيزلونج ( هاهاها) اقبل وين انا ياخي ؟؟

شكرا ابراهيم على ثناءك دمت ابدا ما تخاف اسال يا زول لسه فيني باقي روح كده واقفه في حلقي خساره تطلع سااااااااي

سلامي للكل بطرفك

اميمه عشريه

29-11-2005, 01:53 PM

عزيزي ولاء صلاح عشريه .........تحياتي اليك لسه البرد عندكم مبالغه ما تجي تبدل معاي شويه في الكرسي ديه ..؟ والله لو جربتوالذ من صحن بووووووش حار بزيت السمسم جرب كدي
طبعا الصوره الخاتيها دي ضحكتني لمن طلعت روحي انت بتجيب الحاجات دي من وين ..؟

قلت لي سؤالك كالاتي
سؤالي المحيرني ذي عبد المجيد انا من عرفته عندي اخت اسمها اميمه ما شفتها ماسكه ريشه مش قلم

من بتين اتأالقتي في الكتابه ؟ و مثلك منو في كتابة النثر الحر و بالله قولي لي بتكتبي كيف و عندك ولد ذي صلوحي ؟
عليك الله يا ولي انتوا سافرتوا بتين مش سنه 87 و88 و90 الكلام ده من كم سنه هسه ؟؟ اصلوا الموهبه يااخوانا الا تنزل مع التبيعه يعني ولا شنو هاهاها هسه بتهوفن وفان كوخ وموتسارت ديل كلهم من الروضه كانوا مبدعين هاههاها والله انتوا غريبين بعدين انا كنت بكتب في داخلي اكتر من الورق بخجل اكتب وانتوا تضحكوا علي بالذات مجيد شايف انه هو الفنان بتاع البيت هاها

الشق الثاني مثلي الاعلي كل مبدع كل صادق كل صاحب قلم جرئ
اما كيف بكتب ومعاي صلوحي اها ده بقي سؤال اصلي ما بعرف ليهو اجابه !! بتكون كرامات من الله يا ولاء هاهاا

saly

29-11-2005, 07:32 PM

سالي يا عزيزه ..... انت عارفه لو ما تشجيعك ده في المدرجات فوق ومعاي في الملعب انا كان بقيت ليكم زي المنتخب السوداني ( ههههههههههه) والله كان زمااااااااااااان جاتني ضربه شمس من السخانه الهنا دي عليك الله خليك قاعده لغايه البلنتات والشوط الاضافي الما عايز يكمل ده الله ما حرمني منك وقريبا باذن الله سارسل ليك كل صور اسرتي فتقبليها وتقبيلني

لكن يا سالي اسالك سؤال من تحت الطربيزه كده انت جكس المنتدي وينو مشيلينك انت الشيله كلها ؟؟ بمشن وين البنات ديل ؟؟

العزيزيه اميمه زي ما شايفاني كل يوم بدخل و بقرأ ردودك و طبعا مستحيل اطلع سااااااااااااي بدون تعليق او كتابه

تعرفي انا زاتي احترته من بنات المنتدي بيمشو وين مرات تلاقيهم كلهم في و مره واحده يختفو مره واحده الا اللهم القليلين منهم بس بقولو الغايب عزرو معاه ولا شنو

المهم
برجع ليك بالاسئله تاني يا ستي

فى إطار حياتك ( الغير خاصه ) وهى خاصه ،كيف تمارسين التربيه فى داخل الاسره الرااااائعه دى ، ( طالما ما انتى مبدعه هنا معناتا مبدعه فى بيتك الجميل )

عرفت من إجابتك ماذا يعنى منتدي ودمدني بالنسبه لك ،ولكن ( ماذا تعنين انتِ بالنسبه لنا كمنتدي لودمدني فى تصورك ) حاولى ادخلى جوه وشوفى وإتوقعى ......

على صعيد العلاقات الإجتماعيه العامه ، ما الذى يعجبك فيها وما لا يعجبك،

اميمه عشريه

30-11-2005, 03:14 AM

صحيبتي ورفيقه درب النضال ... سالي ! اليك التحايا اسوقها اليك ولاسرتك الصغيره والكبيره

دعيني اجيب عليك
،كيف تمارسين التربيه فى داخل الاسره الرااااائعه دى ، ( طالما ما انتى مبدعه هنا معناتا مبدعه فى بيتك الجميل )
التربيه يا سالي شي فطري غريزي لا يمكن ان استيقظ صحبا لاجد نفسي اضع معايير بالشوكه والشنكار يجب علي ان اسير عليها لا .. تأتي بشكل عفوي عندما تحبين شخصا تتمنين له كل الخير وكل الخير هذا يترجم بشكل سلس انسيابي فيأتي خوفك عليه وحرصك على مصلحته انا وضعي معقد قليلا لانني وجدت نفسي اربي ابني صلاح الدين لوحدي كأم مع والدتي فقط وكان لزاما علي ان انزل ساحات العمل لاوفر له حياه كريمه وارجع الي البيت لاهبه حب ام تشتاق اليه طيله نهارها الي ان ظهر الان في حياته زوجي فاصبح له ابا يحمل عني مسؤليته ويقيم معي التوازن المطلوب لكل طفل فلا يمكنني ان العب الدورين معا كام واب يشق علي ذلك جدا .. الحمد لله انا الان في رحله استجماميه من ضغط التربيه ..
بيتي يا سالي بسيط جدا ووظيفي جدا كل احلامي الورديه ادخرها لبيت اقيمه في السودان هناك فقط يمكنني ان اضع كل خلاصه تصميماتي وديكوراتي والواني المتمازجه لاني اشعر هناك انه بيتي حقا .. مملكتي الحقيقيه .. في بلادي يا بلادي

,,,,,,,,,,,,,,,,,,,,,,,,,,,

عرفت من إجابتك ماذا يعنى منتدي ودمدني بالنسبه لك ،ولكن ( ماذا تعنين انتِ بالنسبه لنا كمنتدي لودمدني فى تصورك ) حاولى ادخلى جوه وشوفى وإتوقعى ......

الله الله كنت اتمني ان يكون السؤال موجه بشكل عكسي ... ماذا اعني لكم كمنتدي لودمدني .. لا اريد ان اتصور اريدكم انتم ان تقولوا لي ........
فقط يحدوني كل الامل ان اكون دوما اختا للجميع وصديقه للجميع احب ان استمع للكل ادخل الي ذواتكم واتلمس هناك اخوه صادقه منبعها علاقه تبادليه ثقافيه وانسانيه في المقام الاول دعونا ننمي معرفتنا ببعضنا نخرج من اطار الاثير لنصبح اكثر تفاعلا ..
دعونا نصبح وطنا صغيرا يحمل في اعماقه وطنا كبير ....... همه الاول ان نرتقي ان نصبح كيانا ابداعيا واحد له نكهه خاصه وجمال مميز ........... اتمني ان اكون فعلا انسانه تحمل لو استطاعت عبء من احدكم او تدخل بسمه على شفاه احدكم او تزيح هما او تثلج صدرا .. او حتي تدعوا بظهر الغيب لاخوه لم التقي بهم ....

,,,,,,,,,,,,,,,,,,,,,,,,,,,,,,,

على صعيد العلاقات الإجتماعيه العامه ، ما الذى يعجبك فيها وما لا يعجبك،

ما يظهر لي في الاونه الاخيره ان العلاقات العامه اصبحت اقرب ما يكون للنفاق الاجتماعي .. المجاملات غطت على كثير من الاشياء ذات الاولويه .. احب التداخل والانصهار بس ما بالصوره اللي تفشت بها الان ... المجتمع السوداني كما قلنا سابقا تكافلي انصهاري .. لكن لحد السخف احيانا وهذا ما لا يجوز ان تذوب الحواجز حتي لا يستطيع الانسان ان يخلد للنوم في بيته هذا شي مضجر جدا ان تصحو من كابوس شخص يطرق على الباب الساعه 100 لتجد انه ما كابوس بل ابن عم خال جدك في زياره لك فهذا من اسباب ارتفاع ضغط الدم وتصلب الشرايين ( مظلومه السجاير والله) هاها ...... ان ينحشر بعضهم ما بين انفك وعينك ويتدخل في كل كبيره وصغيره _ ده ما صح كده غلط انا شايف انو ... بفتكر لا ما تعملوا كده بتخيل انه لازم الناس تعمل كده واييييييييييييييييك الخ الخ يعني شي يجيب للواحد انفلونزا الطيور .. والله يا جماعه اي نعم في فرق ما بين البساطه والسذاجه لم يعد هناك شي يجلعني نندلف الي حياه الاخرين ونقحم فيها انفسنا بهذه الصوره الشنيعه اعرف احدهم يتدخل في اي شي ويعتبر نفسه وصيا على كل من حوله فهو لازم يسمي اطفال الاسره وهو لازم يحدد ملامح المستقبل ولازم يعرف الناس دي الليله غداها كان شنو؟؟ دي طريقه بالله !!! كل شي اتحمله الا تلك العادات الردئيه لا اجامل فيها ابدا ولا استطيع ان اضغط على نفسي وابتلعها ......... ده موضوع يا سالي اعتقد انه يجب ان يطرح بشكل موسع جدا ليدلي الجميع دلوه نشوف ممكن نصل لشنو وممكن نصلح شنو وممكن نبلع شنو!! هاها

شكرا سالي اسئلتك كالعاده تبث في الروح ..

waheeb

30-11-2005, 04:15 AM

العزيزه اميمه ..
اولاً تحيه بقدر هذا الكم الهائل من التألق...
لا اريد ان اسأل الان بل بعد التمتع بمتابعه ردودك الشيقه وحوارات الاخوه الممتعه...
حتما ان اناملك تخرج الحروف بلون اخر ...
سأعود ان كان في العمر بقيه وان شاء الله سيكون سؤالي يدور حول كوكبك المضئ...

مع خالص ودي,,,

اميمه عشريه

30-11-2005, 10:52 AM

الاخ وهيب لا املك الا ان اهديك علبة الوان ............

من اين جئت الي ....؟

· من طاقة نور..... يحتمل !

· من اخر بدر....... يكتمل !

· من داخل قلب .... يشتعل!

من اين جئت الي ... لا اعرف ؟ ولكنك تعرف وتجعلني رهينة حدسي الذي ما خاب ابدا .. اعرف فقط انك عندما اتيت اهديتني الدنيا بما فيها مغلفة بورق للهدايا ممزوج بالوان ارجوانية ... وعندما ذهبت اخذت كل عطاياك معك فانتحلت البخل معي ولم تُبق لي سوي بعض مفردات .. وريشة صغيرة .. وحزن كبير!

الانكسار .. الابتسام.. الانهزام... الانتصار .. الانعتاق .. الاحتواء.. الانضواء .. الاكتواء .. الاشتهاء.. فالاحتراق .. كل هذه المفردات من صبها في قاروره حبري وعطري ودسها لي تحت وسادات الحلم الناعس .. وكتبها عني في دفاتر الايام ومفكرة المواعيد الجميلة ورسمها علي ضؤ القمر .. ومزجها بعبارات العاشقين في الارض فتسربت الي الافواه دونما شعور .. الست انت الفاعل ؟ الست مقبوضا بجرمك في جنح الليل الهادئ ؟ اتنكر انك احتكرتني للكتابة عنك فقط .. فأصبحت كاتبة مأجورة قبضت اجرها رحيلا وبعدا وفراقا كلها قبضتها نقدا .. وفرح بشيك مؤجل السداد ..! اي انواع البشر انت ؟.. واي قلوب المحبين تمتلك بين اضلعك؟

قبل مجيئك كانت حياتي تُرسم بألوان باردة وايامي بألوان باهته واحلامي بألوان الخريف الاصفر ... لكنها على الاقل كانت تٌرسم ! فقد تعمدت ان تذهب وتأخذ معك كل علب الوان الحياة .. حتى قوس قزح رحل وراؤك .. فماذا يرسم الاطفال بعد اليوم ؟ ماذا يرسمون وانت جردتهم من علب الوانهم الصغيرة وريشتهم الانيقة التي دأبو على رسم احلامهم بها ... !سلبتهم الطيف ولم تترك لهم خيار سوى اللون الرمادي ولون اليأس .. من بعدك كم أشفق عليهم من ايام بلا الوان وساعات بلون الرماد ودقائق بلون الاحتراق واحلام تأتي اليهم وهي محترقة وفي الرمق الاخير .. لما كل هذه ا لقسوة؟

كنت تعرف مسبقا انك تخطط في الليل للذهاب بعيدا والرحيل .. فلما أتيت اذن وجعلتنا نستوعب الحس الرفيع الذي استعصى علينا فهمه طويلا؟ لما اتيت ونحن لا نمثل لك سوى محطات فقط في تجوالك الكوني .. ومجرد ارقام في دفتر رحلاتك المزمعه والمنتهيه ..؟ لماذا جعلتنا نستقر فيك .. ونتوهمك الملاذ .. اخط وافرغ اخر قطرة لون فيتداعي الآن الي عقلي صورتك وانت تضغط على منابع الجرح فينزف حبا قاني اللون لتصبه في قوالب الالوان وتكتب به حياة جديدة لشئ قديم هو الهوى وشيء محال هو حبي لك .. ارجع لي علبة الواني وريشتي دعني ارسم حياتي بالوان الطيف والوان الحلم الأتي ......

شكرا لمرورك وحتما بانتظار كل ما يأتي من طرفك من تساؤلات لانها مكان احترامي وتقديري

aborawan

30-11-2005, 01:55 PM

احييك اختي اميمة على هذا الصمود وعلى هذه الاجابات النموذجية وبي طريقتك دي الظاهر علينا حا نخليك ضيفة في الكرسي لحدي ما نغني اليوم نرفع راية استقلالنا يعني فترة شهر بالضبط من تاريخ الليلة :):) ،بعدين عايز اقول ليك انو في 13 عضو طالبو بتمديد الفترة تاني بس خايفك تجي تخنقيني بعد كده :):)

اميمة رأيك شنو وبصراحة في الفترة القضتيها وانتي على الكرسي الساخن؟؟ عايز تقرير مفصل عن الكم يوم الفاتو ديل ،،،

بمنتهى الصراحة اكتر سؤال حسيتي انو سخن بيك كان من منو والسؤال شنو ؟

في ختام فترة جلوسك على الكرسي رسالة توجهيها لاعضاء المنتدى ؟

saly

30-11-2005, 09:03 PM

الساكنة فى بضاع الروح/ اميمه عشريه
والبوح حينما يتغلغل فى حنايا الاحرف ،فانه يكون من اثر امتعاض المعنى من عجز (الحرف ) عن تحمل المراد ،،والحرف يا رائعتى عاجزَ بفعل انبعاج المعنى فى حركية تنمّ عن الدهشة فى الأيحاء ،غير ان الاختباء هنا لا يجدى خلف الحرف ،الا بالمباشره والتى تجديننى اخاف منها كثيراً ، لذلك اكتفى ب ( إستفزاز ) الحرف عبر مغازلته تصريحاً ،وهنا يأتى ( النص ) مُرسلاً من قبل الحرف، بعد تلقيه تلك الإشارات (الإستفزازيه ) من المعنى ، فيأتى محرضاً ومعترضاً فى أنِ واحد، بالرغم من ذلك يا (عزيزتى ) اشعر بالنص مشوهاً ، وذلك ليس من (خللٍ ) فى الرؤيه ،ولكن كما اسلفت من عجز الحرف فى ايصال المعنى المراد،وما يفتأ ان ينشأ ( ديالكت ) غريب ينتج من قوة الطرد المركزيه " للنص " ،فى محاولة منه لارغامى من الخروج عن سُلطة الرمز ،والذى احاول جاهداً عدم الوقوع فى حبائل شراكه ( المتودده ) فيشغلنى عن الفعل الذى اسعى اليه بردوده ، فالفعل وردته ( كما تعلمين ) يجب ان يكون حاضراً حين تفعيل النص ،ليقول كلمته العُليا، الكثير من الاشياء التى اختذلها حيال ذلك ، كما اختذل اعجابى فى سرعة حركية حضورك هنا والردود بكل ثقه ، اشعر بان وقوع النص فى ( حبائل ) حروفك ليس بصدفه . غير ان ( حروفى ) دائماً ما تعجز عن الوصول بى الى فروض ( المعنى ) لاجد نفسى ملتزمتاً ب ( سُنن ) الإكتفاء المحرض للحرف ، الكثير هنا اود طرحه عن ماهية الحرف فى ( الكيف ) و ( الكم ) ، الا اننى اجدك تتعالين عن الحرف فى ايصال شكرى لك ،فهل تسمحين له ،

طبعا سعدنا كثيرا باستضافتك هنا في الكرسي و كنا نتمني ان تقعدي فيه اكتر
لكن بقولو لو حبيبك عسل شنو ما تلحسو كلو
واكيد حنقرا ابداعاتك هنا في المنتدي

وبس رجااااااء خاص

غيري شويه من المنتدي الثقافي ده خليك كده مشاركه في جميع الاقسام بنفس نسبه حضورك في الثقافي