سؤال صعب الاجابة !!

[دكتورة صغيرة]

في ساعة صفا قعدت أفكر في حياتي .. وعلاقتي مع اخواني ,تجمعني بأخواني علاقة قوية ... بحبهم حب ماعادي ومتعلقة بيهم بشكل غير طبيعي وخاصة بأختي ..مابقدر افكر براي لازم أشاورها في اي حاجة ..متشاركين حياتنا تماما كاننا شخص واحد .. احتمال اي واحد حيقرا كلامي دة
حيحس انه دة نفس احساسه .. لكن الموضوع ماكدة .. السؤال الخطر في بالي الساعة ديك هو ..!!
هل علاقتنا حتستمر كدة بعد عشرين سنة مثلا ؟؟؟ قدامي ناس كتار كانوا اقرب مننا في علاقتهم بأخوانهم لكن الدنيا شغلتهم حتى عن معايدة
أخوانهم في العيد !!!!!!! سألت اختي بخوف .. معقول يجي يوم علينا نبقى كدة ؟؟ ولايجي عيد مانعيد على بعض ؟؟؟
ردت علي وقالت لي ( لأ طبعا ) .. لانه ماكل الاخوان علاقتهم زينا ... انا محتارة !! معقولة الزمن ممكن ينسي الاخ اخوه العاش معاه عمره
كله ؟؟ معقول المسافات ولا الزواج ولا الاولاد يشغلوا الاخ عن أخوه ..
دنيا غريبة

[خالد هاشم علي]

دكتورة صغنوووووووووووووووووووونة...
لك التحية...
الموضوع كبير شديد ويحتاج لوقفات ... فانا اتفق معك تماما في ان كل منا يحس بمثل هذا الاحساس الدفاق نحو اخوته... وكمان بكون عنده علاقة خاصة شديد بي واحد معين من اخوتة...
وصدقيني لو قلت ليك لو العلاقة بين الاخوة سوية ويجمعهم الحب والتفاهم والتفاني فما ممكن يجي يوم والعلاقة تفتر.. مهما تفرقت بهم السبل والمسافات...
فأنا مثلا مغترب منذ خمسة او ستة سنوات... ولم انقطع عن اخوتي في يوم من الايام... ولم يفتر احساسي بهم ، سواء المتواجدين معي بالمهجر او المتواجدين بالسودان... ومنذ لحظات وقبل ان افتح البوست ده كنت بتحدث مع الوالدة حفظها الله من كل شر وتحدثت مع اخوتي بالسودان الذين اكن لهم كل مودة وحب وتقدير... وحتي اخوتي بالسعودية والحمد لله لم ولن نفترق ماحيينا... مع العلم بأننا كلنا متزوجين ولكل منا بيته واسرته.. لكن هذا لم يمنعنا من التواصل و عدم الاستغناء عن بعضنا...
وما أعتقد انه الزواج والاسرة تنسي الواحد مننا اسرته الكبيرة... اللهم الا إذا كان هناك شرخ في هذة العلاقة...
أنا أحس بأنني أحب أخوتي بصورة لا يمكن وصفها حيث انهم سندي وعزوتي ولحمي ودمي والسبب في ذلك هو مازرعه والدنا عليه رحمة الله في نفوسنا.. من قيم وترابط.. فعلمنا ان أخوك وأختك هم كل دنيتك ومن فوقهم الوالد والوالدة...وشبينا علي كده والحمد لله وحتي كتابة هذا الرد لم تحدث بيننا أي شائبة وابتهل للمولي عز وجل الا تحدث والا يفرقنا الزمن ولا الاقدار...
وماعايزك تتخوفي من الزواج وما بعده... لانه وعن تجربة مابغير أي حاجة في ارتباطك بي اسرتك... إحتمال تزيد مشاغلك ووتتغير ظروفك... لكن يستحيل تغير حبك وانتمائك لمن يحبوك... وما دايرك (تلخبتي الكيمان) يعني حياتك الزوجية دي كوم وحياتك مع اسرتك الكبيرة دي كوم تاني... ومافي اي تقاطع بينهم ولا وجه للمقارنة.
وبي نظرة بسيطة للواقع... أسرتك.. يعني امك وابوك واخوانك واخواتك واعمامك وخيلانك ومن تبعهم ..دي علاقة أختارها ليك ربنا عز وجل يعني انت جيتي في الدنيا ولقيتي ديل أهلك مش كده.... يعني ده أختيار ربنا سبحانه وتعالي..وزواجك ده علاقة من أختيارك انتي... مع الوضع في الاعتبار مسالة القسمة والنصيب... سؤالي ليك لو لا قدر الله واضطريتي للمقارنة...

علاقة أختارها ليك ربنا سبحانه وتعالي...
ولا علاقة أخترتيها إنتي بي محض إرادتك..؟؟؟؟؟؟؟؟؟؟؟؟؟؟؟
وزي ماقلت ليك الاتنين علاقات سامية شديد ومابتقاطعوا مع بعض ابداً عشان كده ماتقلقي وطمني أختك شديد... لو إنتي ولا هي فيكم خير لي بعض... فصدقيني حتنطبق عليكم أغنية مصطفي سيد أحمد:
عارفني منك...
لا الزمن بقدر يحول قلبي عنك...
لا المسافة ولا الخيال يشغلني منك...
عارفني منك...


مع أمنياتي لك بالتوفيق..

[أبوريلان]

الأخت الدكتورة الصغيرة

سلالالالاماااااات

طرجك جميل ومتفرد وربنا يحفظكم ويخليكم لبعض وهذه محمده أحمدى ربك عليها ، وأنا طبعا مداخلتى كانت لإعجابى برد الأخ خالد هاشم على لأنه فحص الموضوع من خلال مجهر طبيب متمكن وشمل الموضوع بكل المضادات الحيوية وما أفتكر بقدر أزيد كلمة على ما ساقه من سرد جميل لهذه العلاقة الربانية حفظكم الله جميعا ودمتم زخرا لأخوانكم وأهلكم .

[aborawan]

لا زيادات على ما سطره الاخ خالد ولا زيادات على تعقيب الاخ ياسر

فقط دعوة قلبية صادقة منبعها القلب وهي حفظكم الله ولا فرق الله شملكم

مع مودتي