فليذهب قرنق ...

[كاظم]

الساعة كانت ذي سبعة ونص صباحا ...
مدني ذي كل يوم هااااااااااااااااااااااااادية .. أطفال شايلين شنطهم ماشين مدارسهم ... عمال تقريبا ورديتهم قربت لانهم مستعجلين ومكنات المصانع ما بتستنى زول .. السوق فيهو حركة خفيفة لانو الدنيا صباح طبعا ..
مهند عبدالقادر فاجأني بقصيدة جميييييييييييييييلة ..قال لي : عارف قدر ما فتشت لشاعرها ما عرفتو ..
ضحكت وقلت ليهو تلقاك انت كاتبها ..
- اقرا ليك منها طيب ..

متوسد كوعك وطني
فرشولك برش منامات
تاكل من جوعك تتمنى ..
درشولك أردب كلمات
النيل فوق حجرك وتسقيك ..
الترع ..الايد وغمامات
ينجيك يشفيك ويعافيك..
شعبك ..ياوطني من الجات

لم يؤرقني البحث عن كاتب القصيدة بقدر ما شدتني تلك الكلمات ..
ترى بماذا تتوعدنا هذه السنين العجاف .. ماذا بقى لم يات يا مهند؟؟؟

الكلام ده يا جماعة كان سنة 95 ..
وكنت كل يوم بسأل شنو حيجي تاني بعد ده ..
ما اتوقعت والله انو الجاي ممكن يكون ذي الحصل في اليومين الفاتو ..

خمسه وخمسين سنة الحرب كانت هناااااااااااااااااك في الاحراش وفي الحدود ..
قرى نسمع بيها حرقت ..فلان ودجيرانا استشهد ..علان ودخالة فلان اسروهو ..
السكر سعرو زاد ..الحرب هي السبب .الرصاصة بي دولار .. البنزين انعدم من الطرمبات ..الحرب هي السبب .الحكومة اشترت ليها كم طيارة لانو الجنوبيين احتلو الحتة الفلانية ..
ويوم والتاني مفاوضات تقوم ومفاوضات تقع .. شهر والتاني السلام بقى قاب قوسين او ادنى ...
نيفاشا .مشاكوس ..امريكا شيكا بيكا ..موسفيني يتوسط ومجلس الامن يتوعد ..
علي عثمان وقرنق اتفقو ..ايووووووووووووووو ي ..

نواصل

[نيازى كشك]

انها العبة
لعبة السياسات يا عزيزى

واتمنى من بعد ه>ا كلة ان يستقر السودان
لنعيش بسلام وينعم البلد بالرفاهية


000000000000000000000
000000000000000

وانا فى انتظار بقية حديثك

[aborawan]

لك الله يا سودان العزة والشموخ ننتظر المزيد اخي الفاضل

[بابكر]

انت فى غاية الروعه اخى كاظم سردك للوقائع بجبر القارىء للمتابعه افتقدنا هذا الاسلوب المميز كثيرا شكرا لك0000

[كاظم]

الزغرودة دي سمعتها من (شايقية صر) حاجة كبيرة في العمر اسمها( امنة ) ربنا يمد في ايامها جارتنا من زمااااااااااااااااان ...

رطانة عربان مو اشو ..
ومولدين تلقانا أو ...

يكورك حميد من زمن ويكورك (خالدالرنك ) وخالد ده دينكاوي ومسلم وكان في الجامعه بعثي واول ما يدخل ركن نقاش بفتتحو ب(أمة عربية واحدة ذات رسالة خالدة .. ما تستغربو نحن بلد عندو مشكلة هوية والما مصدقني يمسك أقرب جعلي لونو يكون ذي الفحمة على شرط أسالوهو جدك منو كان ما قال ليكم العباس عم الرسول ما تدوني ايدكم تاني .. نحن بلد اكبر منظراتي فيها حد معرفتو بهويتنا السودانية بينتهي في تاريخ (اتفاقية البقط) ...ووالمخالف ليهو في الراي بتكلم عن زواج حبوباتنا من الشلك والنوير والزاندي بالتجار من شبه جزيرة العرب .. والمقرم من المنظراتية بخمنا بي صمتنا وويقول نوبة وجدنا فرعون عديييييييل لانو فرعون نوبي لكن اولاد بمبة المصريين اكلونا حنك ...وغرقو حلفا قاصدين ....
مرة كنت قاعد في محاضرة لبروفسور امريكي بتكلم عن الحضارات والتنوع وحاجات ذي دي .. سألتو انتو اصلكم شنو ..؟ضحك الخواجة وقال لي اعذرني ارد عليك بسؤال انت جنسيتك شنو؟ وقلت كدي اتنفشت وقلت ليهو :سوداني .. قال:( الولايات المتحدة القادمة) .. استغربت جدا وقلت ليهو :كيف يعني ؟؟ رد علي ببساطة شديدة :نحن الامريكان استفدنا من التعدد الموجود عندنا وبقينا ذي ما شايفنا ..انتو عندكم تعدد اكتر من اي مكان تاني في العالم فحتبقو زينا واحسن مننا .. تعدد تعدد تعدد ياربي الخواجة ده قاصد شنو .. وبعد ما كمل كلامو عاين لي وقال : انتو ناس طيبين ...


بلاد اهلها يرضعون الحزن
ومغرمون باللغط
وموغلون في المجاملة الي اقصى أركان العبط
بلاد اهلها طيبون ..................... فقط

زغردت حاجة امنة ..والتلفزيون ينبح (اهلا بالسلام ) والمسيرات تطلع ويهتف المواطن (دايرين سلام) ..وتحت تحت كده تسمع ليك كم صوت كده يكورك(لا سودان بلا عثمان) الواعيين عارفين انو قاصدين (علي عثمان) والشماشة قايلنو (عثمان العجلاتي) المعلق صورة قرنق في دكانو من سنة اربعة وتسعين..
تجي بشارع النيل بعد تقطع الكوبري القديم تلاقي يافطة كبيييييييرة فيها (علي )و(قرنق) ضاحكين ورافعين يدينهم ب(الورق ) الفيهو الاتفاقية وما تقولو يعني انا قاصد انها ورق ساكت عشان ما تجيبو لي مشاكل لكن لو مشيت خطوتين بتلقى يافطة اكبر منها فيها (الخرطوم عاصمة الثقافة العربية) واوعك تفتكر انك في بيروت لانو اليافطة تحتها (ابكر )سيد الترمس وابكر طبعا فلاتي .. عادي لكن ما نحن عملنا (حدايق عبود) في بحري وفي الخرطوم عملنا (حديقة القرشي) وبالمناسبة القرشي ده ما طقشتو عربية كتلو عبود

واتلمو ناس تانيين
شايلين على الاكتاف ..
نعشا من الياسمين
حسيت بانو حزين
هذا الذي قد نام .. مانادى لرفقو

ونواصل

[marwa]

wasel kazem

...وغرقو حلفا قاصدين ....
bas al7ta dy ana ma fahmaha

[الوفي]

بشكرك والله يديك العافيه سرد جميل وسطور اجمل شكرا ليك اخوي

اخوك العابر الوفي

[بابكر]

زدنا ايها الرائع كاظم000

[كاظم]

العزيز بابكر .. تحياتي يا زول وربنا يقدرني اكتب بقامة استغراقك المليح في القراءة



نيازي كشك... ربنا يكفي اهلنا شر اللعبة دي ..وعلي العموم سنجد مخرجا ما طالما اننا نحب هذه البلاد


الوفي شكرا على الاطراء الحميم وياريت كل مرة تجينا عابر وتسمعنا ونسمعك ...



مروة في اطار السرد لفت انتباهك ان المصريين قصدو يغرقو حلفا ودي سمعتها من باحث كان بتكلم عن حيثيات مشروع السد العالي وادعى والعهدة عليه ان حلفا القديمة ترقد تحتها حلفا اخرى اقدم منها فيها من الاثار ما يقلب تاريخ المنطقة راسا على عقب وادعى ان المصريين كان هدفهم الاساسي اغراق هذه الحقائق مع هذه الاثار ... ويا مروة ابقى طلي علينا




وسنعبر طالما ان في الجسد عرق ينبض بالحياة ..

نواصل

[أبوريلان]

رائع يا كاظم وحديثك مشوق ونتمنى أن يثبت موضوعك وتوعدنا بإستمرار الكتابة .

[اميمه عشريه]

كاظم,,,,, يا كاظمين الغيظ ده كله جواك ؟؟؟ كدي طللللللللللللللللللللللع وسمعنا والله لينا زمااااااااااان منك .

قد تتغير الرؤي وتنحرف بنا السبل ولكن حتما كل الطرق تصب في نهر النيل الذي يسري في دواخلنا

[marwa]

slaaaaaaaaaaam kazem
ana men zman shaka fe almsryeen deeeeeel
wallahy klamk '3aya fe alrw3a tslaaam
wasel a'7oona

[welly]

الغالي كاظــــــم
والله ما قصرت عديل كده
بس لكن مقصر في حقنا شنو يعني الغيبه دي
لا تلفون ولا رسايل
خلينا نعرف اخبارك ونطمن عليك

يسلموووووووو

[rasheed]

ياسلام يا كاظم يا رائع ،، أتابع بدون تعليق آخر 00 بس واصل ،، مع حبي ليكم

[عزيز عيسى]

ما اروعك يا كاظم.. كلام زي العسل والمنتدى فعلا يفتقد لمثل هذه المشاركات التي تشد انتباه القاريء وتجعله متابع للكلام المعبر والمشوق بكل احاسيسه.

أرجو أن تتحفنا بالمزيد يا رائع.

وتسلم،

عزيز

[كاظم]

الاحباء الكرام اعضاء المنتدى ... تحيات نديات
لظروف غاية في الصعوبة تاخرت في الرد عليكم وبالتالي تاخرت عن المواصلة في البوست .. ارجو ان تقبلوا اعتذاري

myrelanفي غاية الامتنان انا لزيارتك الكريمة والتي ارجو ان تدوم وعلى وعد بان نتسامر سويا ككائنات حبرية يجمعها قلم واوراق بيضاء


اميمة عشرية ...
أيناك يا هذا الجناح ؟
ترى ما لون الحياة وانت تتلمسين طريقك استدلالا بشواهد اخرى؟
هناك ما لا تستطيع ان تكظمه طويلا ..انت تكتب وهنالك اشياء تكتبك
ابقي طلي انا قاعد والله


مروة ..سلامات يا زولة ..بعدين المصريين ديل مالك شايلاها معاهم ..على العموم عندي كم سر كده بيخدم خطك ..كوني قريبة ...

رشيد تسلم يا حميم .. يكفيني انك تقرأ ما أكتب .. مسألة التعليق دعها الى حين ..دمت

ابواللول ..مشتاقين كتير ..ومقصر معاك والله ..لكن بلاقيك قريب ..


عزيز يا عزيز .. رحلتان الي بلاد بقامة الحرف .. وطن لك والاخر لي ..سنصبح أشقاء من دول شقيقة ..ولكن ..اليس البلدان بقامة الحرف؟ اذن نحن في امبراطورية الكتابة التي لا يغيب عنها الحزن ..اذن سنحمل بطاقة شخصية معلوماتها متشابهة ..اذن نحن من بلد واحد

[كاظم]

(15) و(ليمونة) و(دينق) كنا شغالين طلب سوا في سوق مدني سنة 92 و(15) ده اسم يا جماعة وبرضو ليمونة وكلهم كانوا من اولاد الدينكا ، كنا نتلاقى الصباااااااااااح عند مريومة ست الشاي نشرب الشاي بالعيش وبعد داك ندور شغل لى حدي خمسة مسا بنفطر سوا ونقسم الشغل بينا وكنا بنقسم حتى البسمة .
وجيرانا كانو (نوير) ونحن اطفال لعبنا سوا وقرينا سوا ولحظه ما حسيت انو في فرق لا من ناحية العرثق ولا الثقافة ولا كل ما ذكرو المثقفاتية في حديثهم عن السودان البلد متعدد الثقافات والاعراق ووووووو ...
امنين كنا ومطامنين .. وكنا في الوكت داك نسمع عن (جون قرنق) وكنا بنتخيلو كائن خرافي دموي ومتوحش .. كانت صورو نادرة والاحاديث عنو كلها احاديث غامضة وكريهة .. انا شخصيا كنت متخيل انو شخص لا وجود له يعني ذي (البعاتي) كده . .. كنا نتخيل انو المدعو قرنق يقاتل من اجل القتال كغاية وليس كوسيلة .. وسيلة توصلو لي شنو ..؟ ده سؤال كان اجابتو صعبة جدا .. لانو لو الزول ده قال انو بقاتل عشان قضية الجنوبيين المضطهدين وحقوقهم مهضومة يكون قاصد ياتو جنوبيين ؟ الابلة (فيفيان) جنوبية وهي قرتني في الروضة كنت مفتكر انها ذي خالتي (بتول ) الله يرحمها ..طيب تكون مضطهدة كيف ؟ مضطهدة كيف وهي ساكنة في ذات الحي الساكنين فيهو وكمان بيتها احسن شوية من بيتنا وعندها تلاجة كمان ...(يور) صاحبي في المدرسة عندو عجلة وبفطر ذات السندوتش البناكلو .. ده كلو في مرحلة عمرية ما في حياتي .. كانت افكاري فيها على نسق ما ذكرت ..
احيانا كنت بزور القرية الفيها اهلي اعمامي وعماتي وخالاتي في الاجازات ذيي وذي معظم السودانيين البكونو جذورهم في ريف ما من ارياف السودان وجو المدينة طلبا للرزق ولاشياء اخرى .. اهلي ديل (عرب) اذا جاز التعبير .. كنت بسمع اثناء ونساتهم كلمات ذي(عب) و0الخادم) وغيرها من الكلمات وما كنت منتبه كتير للمسألة وكانو هم بتناولوها كشي عادي واقسم بالله لو الكلمات دي كان بتتقال بعربي فصيح طوالي كنت حتتخيل نفسك في واحدة من (شعاب مكة) ...
الرادي قطع .. الكهربا قطعت .. الرادي اشتغل ...
مارشات عسكرية .. انقلاب .. ترقبوا بيان القوات المسلحة ...
(هذه البلاد لو ما جينا نحن كان ناس الصادق المهدي ديل انتهو منها ...
القوات المسلحة الباسلة تشيع الامن في انحاء السودان ..
العميد الركن عمر البشير ...
مجلس قيادة الثورة ...
الضباط الوطنيين اللحقو البلد في ااااااااااااااااااخر لحظه ..
28 ضابط صباح العيد (خونة ) دايرين ينقلبو علينا نحن الكايسين مصلحة الناس ..الشيوعيين والبعثيين اولاد الكلب ..
طبعا معظم الناس عارفة الهيلمانة دي كلها .. هنا ياجماعة عايز اسالكم سؤال واحد .. السودان البلد متعدد الثقافات ده .. مرة واحدة قريتو عن قبيلة في السودان عندها ثقافة (الجهاد والاستشهاد) ؟؟؟
والله لولا الله ما اهتدينا ..
خالدين في الجنة زمرا ..
الحور العين ووووووو ...
كيف ما تتكون عندي فكرة غريبة عن قرنق وانا متنازع ما بين حاجات غريبة .. (ابلة فيفيان) و(يور) و(15) و(ليمونة) و(دينق) .. ثقافة جديدة عمري ما سمعت عنها وانا قمت في بلد لو قلت السلام عليكم الشجر برد عليك .. اهل الافضلية عندهم بانت (ودمنو) .. كيف ما اكون متنازع وانا طفل بقرا مجلة ماجد وبعاين لاطفال الامارات العرب وانا اهبش شعري القاهو ذي السلك وود عرب.. واقرا تاريخ الوطن العربي والدولة العربية والجغرافيا العربية والعربية العربية واقارنو بتاريخي القى فرق السما للارض ..
امنين كنا .. وبرضو الحرب كانت هنااااااااااااااااااااااااك في الاحراش وفي الحدود ..
(الجنوبيون يطوقون العاصمة تماما بهجرات متسلسلة ومقصودة) دراسة اعدها صحفي ما في داعي نذكر اسمو لانو رفضو ينشروها ليهو .. بعد تسعة موقف (الشهدا ) امدرمان كلو جنوبيين وكذلك المحطة الوسطى بحري والسوق العربي الخرطوم ..
الثروة والسلطة اتقاسموها ..



يا بلدي يا فردة جناحي التاني ..
وكت الناس تطير لى عالمها
وواجعة الزول البجيك
ما يلقى فيك غير الهجير ..
ناسا توافي مسالمة
ونواصل

[ابو الزعيم]

ايها الفنان .... الرائع كاظم ......

لك الود وكل التقدير وانت تتحفنا بتلك الروائع وتجعلنا مشدودين مع كل حرف ... وانت تسطر بكل بساطة الواقع المعاش ... بلغة سهلة بسيطة .... واسلوب سلس مع حبكة درامية ... تنافس بها كبار كتاب السيناريو ... وحقيقة انت اضافة حقيقية للمنتدى .. ...
نسأل الله لنا ولك ولجميع رواد المنتدى التوفيق ...
ونحن في انتظار المزيد ...
بس ما تطول الغيبة ....
لك مني اجزل الشكر وكل الاحترام.....

[كاظم]

ابو الزعيم .. تحياتي يا راجل وامنياتي ليك بالصحة والعافية
وحقيقة الامر ان تعليقك في منتهى الحميمية واللطف واسعدني جدا ان تطالع ما كتبته
مسئولية يا ابو الزعيم انو الواحد يتناول تفكيرو ببساطة خاصة وانو الموضوع اصلا مقلق وحمال اوجه وما بستبعد انو مجموعة ما يروق ليهم تناولك ليهو لى حساسيتو واحد واتنين لانو زمن التناول برضو فيهو مشكلة
على العموم شكرا كتير على التشجيع وربنا يهون

[كاظم]

اتقسمو الثروة والسلطة ....
وهو الاشكال اشكال ثروة وسلطة ؟؟؟؟
ياتو ثروة القاصدنها .. ؟؟ الثروة الزراعية ؟ مشروع الجزيرة مثلا؟ مشروع الجزيرة البقى المزارع فيهو يبيع الوراهو والقدامو عشان يدفع للحكومة؟ الصمغ العربي الكنا بنقرا في جغرافيتنا المتهالكة انو نحن المتحكم في سعرو عالميا ؟ ولا البترول ؟
حقول هجليج وعدرائيل ووو تنتج في اليوم كذا كذا برميل يوميا ..
مصفاة الجيلي تنتج يوميا كذا كذا برميل في اليوم ..
ميناء بشائر يصدر كذا كذا برميل في اليوم ..
هيئة الموانئ البحرية .. الدخل اليومي كذا كذا في اليوم ..
المؤسسة العامة للجمارك الدخل اليوم كذا كذا في الثانية ..
والى الان نمت نحن بالملاريا والكوليرا ووووو.....
السلطة ؟ اي سلطة دي ؟
مرات كتيرة بقعد واسمع ليك الاخبار ..( الحركة الشعبية والمؤتمر الوطني وصلا لاتفاق حول اقتسام الثروة والسلطة ) وكنت بسأل .. هو السودان ده ما فيهو غير المؤتمر الوطني والحركة الشعبية ؟ وطيب الثروة لما يدوها لديل المواطنين يا ربي بدوهم شنو .. ؟؟
الجماعة ديل جو بالليييييييييييييل قلعو السلطة والصباح بدري قضو على الثروة .. وهسة لما ضاقت حيقسموها مع ناس الحركة ..
الحركة الشعبية الممثل لمواطني الجنوب .. قسمت الثروة والسلطة مع ناس المؤتمر الوطني .. دي مطالبهم العادلة .. وده الكانوا بحاربو عشانو من الاستقلال .. وقرنق بقى النائب الاول ..
قرنق مات موت الله ... نفترض انو كتلوهو الجماعة ديل ..
شفع المدارس ذنبهم شنو ؟؟؟
التجار والصيادلة والفراشة في سوق الله دخلهم شنو ؟؟؟

منو القال انو المسألة مسألة اقتسام ثروة وسلطة ؟؟؟
ذيي وذي اي مواطن عادي كنت بتمنى انو الجماعة ديل يقسمو قدر الفي ده ونرتاح نحن من (لواء القعقاع) و(متحرك شبشة بن طحلب) .. ويروق بالنا من (عرس الشهيد ) و(دمغة الجريح) و( زاد المجاهد) ..اتمنيت انو يوم الجمعة المسا ما يكون في برنامج اسمو (في ساحات الفداء) ..
ما نحن بنحب شاي الصباح
والمغربية مع العيال
والاصدقاء .. والي اللقاء
ذيي ذي اي مواطن عادي .. بحب امشي مطامن وسالم في شوارع بلدي ..
الصباح بدري بنفس الاحساس ده .. مرقو الناس على يومي حياتي عادي..
شفع ماشي مدارسهم .. عمال مستعجلين لانو شكلو ورديتهم قربت ومكنات المصانع ما بتستنى زول ..فراشة في الشارع يقولو يا فتاح يا عليم ...
الكلام ده يا جماعة كان بداية شهر تمانية السنة دي ..
باقي اليوم عارفين طبعا الحصل شنو ...

منو القال انو الاشكال اشكال ثروة وسلطة ؟؟
المسألة اعمق من كده..


ونواصل