(الزول الشين) خطاب العبيد وأبوروان الرائعون

[عزيز عيسى]

قبل يومين خطفت رجلي ومشيت على محلات البقالة العربية واشتريت لي مجموعة كروت للاتصال الهاتفي.. استأذنت من المدام والاولاد أن لا يزعجوني وقلت ليهم بأني حأكون مشغول شوية مع التلفون على الاقل فترة ساعتين تلاته لاجراء اتصالات هاتفية دولية.

دخلت واحدة من غرف البيت وقفلت باب الغرفة وبدأت ابحث في جهاز الكمبيوتر عن ارقام الهواتف.. أول رقم وقع على نظري رقم هاتف جوال الاخ خالد هاشم (أبوهاشم).. مسكت التلفون وابتديت اتصل برقم اخونا خالد.. حاولت كذا مره بس الحظ ما حالف اني احصله واتكلم معاه.. قلت يا ولد اتصل علي رقم البيت يمكن تلقاه بشاهد في مسلسل وداقي طناش للجوال.

(يلا أديكم الشمارات) لما اتصلت بالبيت رفعت السماعة الدكتورة ام هاشم.. تصدقوا أم هاشم دي كانت اول شخص من اعضاء المنتدي احظي بمكالمته.. ما شاء الله علي الدكتورة ام هاشم بمجرد ما عرفتها بأسمي حيتني بتحية أهلنا الطيبين واتونست معاها زي كأنها بتعرفني من زمان.. سألتها عن الشقي اللي بيضبح ( الكدايس) خالد.. قالت لي لسه في الشغل..

بعد ما انتهيت من المكالمة قفلت الخط وقلت يا ود اتصل بيه في المكتب واعمل ليه مفاجأة.. اتصلت بالمكتب رد علي عامل الهاتف وقام حولني علي مكتبه.. الجرس يرن ويرن وأنا منتظر.. بعد شويه جاني عامل الهاتف راجع تاني وقال لي الراجل ده الظاهر عليه مشغول.. قلت ليه ممكن اترك ليه رسالة.. قال لي ممكن.. قلت ليه من فضلك قول ليه عزيز عيسى اتصل وقمت (سكرت) التلفون..

قمت اتصلت بأخونا أمير عبدالباقي في الطائف.. علي طول الخط فتح معاي ورد علي أمير.. وطبعا فاجأته.. الراجل شبكني ليك سلام شديد وكان مبسوط جدا.. واعتقد انه كان بينطط من شدة الفرح.. وقال لي خالد هاشم معاه في الخط بالاضافة الى آخرين وهم الان بيسمعوا في كلامي معاك.. قلت ليه أنا ما أقطع ليكم محادثتكم لكن عليك الله سلم عليهم وقوليهم حأتصل بيكم مرة تانية.

المره دي اتصلت بالاخ أبوالمهتدي.. برضو علي طول الخط فتح معاي.. أبوالمهتدي في الاول ما عرفني.. قام قالي ازيك يا يابكر.. كيف حالك يا زول.. خليته مواصل في سلامه.. ولو ما لحقت وقفته كان اداني الشمارات كلها.. قلت ليه أنا ما بابكر لكن أول مره اكلمك.. قام قال لي منو؟.. المهم حيرته وفي النهاية قلت ليه أنا عزيز.. والله الراجل قرب يطير من شدة الفرح ومن شدة سلامو شعرت زي الكأنه بسالمني بالاحضان.. يا سلام.. انسان في غاية اللطافة والطيبة.. طيبة أهلنا في الجزيرة.. اتونسنا ورجعني لذكريات للوراء وذكرني بي ناس في مدني ومارنجان وأيام زمان الحلوة.. الونسة كانت حلوة وغاية في الروعة.. في اثناء الكلام سألت ابوالمهتدي عن رقم مفتاح منطقة ينبع بغرض الاتصال بالاخ بابكر ودالصول.. ورجعنا نتونس تاني.. ولو ما الكرت خلص ما كنت اتوقفت عن الكلام مع ابوالمهتدي.. المهم ودعته ووعدته بمكالمة اخرى في القريب العاجل.

حاولت الاتصال بالاخ بابكر ودالصول عبر الجوال عدة مرات.. وبرضو الهاتف كان بيرن لكن ودالصول الظاهر عليه كان لافي في السوق لسه بيكاوش في الشيلة لعرس ولده الدكتور.

بعدها حاولت الاتصال بالاخ ابراهيم – ولد مصر – وبعد مجهود كبير جدا استطعت الاتصال به ومحادثته.. لكن وجدت الكرت (اتلحس) كان فيه فقط 4 دقائق.. ما عارف ليه.. وفي اثناء السلام يقوم الخط ينقطع.. اتناولت الكرت التاني وبدأت احاول الاتصال مرة اخرى بالاخ ابراهيم.. وفي أثناء ما أنا بحاول دخل علي ابراهيم في الخط.. الراجل عرف انه في صعوبة في الخط وراح مشكور متصل بي هو.. على العموم (برهوته) ده ما شاء الله راجل ظريف لأبعد الحدود ويخليك تشعر بأرتياح من صفاء قلبه وتواضعه وحبه للجميع.. تحدثنا لفترة طويلة عن كل شيء وضحكنا ضحك ما بعده.. وبرضو زي الكأننا بنعرف بعض من زمن بعيد.

بعد داك اتصلت بالاخ ابوروان علشان اكلمه وأبارك ليه.. الهاتف رن لفترة طويلة ولكن ما قدرت احصله.. معليش باين عليه مشغول بالعرس.

وبرضو حاولت الاتصال بالاخ خطاب العبيد قلت أشكره على الاقل على اللفتة البارعة من خلال البوست اللي نزله
http://wadmadani.com/vb/showthread.php?s=&threadid=6707
وكمان ادردش معاه شويه.. التلفون كان بيرن وبرضو ما قدرت احصله.

على العموم قلت احاول الشخص اللى بعديه وكان الدور جاي على الاخ الاستاذ ابوبكر حامد (ودالمأذون) لكن الجماعة في البيت دقوا على الباب وقالت ابنتي الصغيرة بأنه واحد من اصحابي اتصل على الجوال وبيقول انه عايز يكلمك..

المهم صاحبي قال انه على مقربة من منزلنا وسيمر علي بعد خمسة دقائق.. بعد ما غادر صاحبي وجدت انه الزمن متأخر في منطقة الخليج وما في داعي اني اتصل وأقوم ازعج ود المأذون ويقوم يشيل حسي قدام خلق الله كلهم.. لكن سأفاجأه الاسبوع القادم بأذن الله.. كما سأفاجيء ناس تانين بس خليكم مستعدين.

والله ما عارف اوصف ليكم شعوري كيف بعد ما كلمت الاخوان.. والله شعرت بأرتياح كبير جدا وسعدت بلقائهم عبر الهاتف.. وأنا بدوري اشكر الاخوان ابوروان و(الزول الشين) خطاب العبيد علي هذه البادرة الطيبة ومناشدتهم لجمع الاخوان لتقاربهم من بعضهم البعض.. وانا بدوري أيضا اتمني من الاخوان المتواجدين في مدن واحدة أو متقاربة باجراء اتصالات وزيارات متبادلة للتعرف علي بعضهم البعض عن قرب.. لزيادة وتقوية اواصر العلاقات والصدقات والمحبة بين الجميع.. وياحبذا لو امتدت علي مستوى الاسر من اجل توسعة شبكة اتصالاتنا.

مع خالص ودي وتقديري،

عزيز

[امير عبدالباقي]

الاخ عزيز
جدا كانت لفته بارعه منك واشكرك عليها وانت تتجول عبر الاثير وتتحدث لاخوانك بجد كانت فرحتي لاتوصف وانا اتحدث اليك فعلا ياه دي الاخوه التي جنيناها من منتدي مدني الاخوه الجمعتنا بدون ان نلتقي وجهنا لوجه والحمدلله انتقلت بين الاسر واصبحت العوائل تتعارف مع بعضها البعض حتي اطفالي الصغار اصبحو يعرفو اسماء الاعضاء والحمدلله يمكن انا العضو الوحيد الذي حظي بمشاهده عدد كبير من الاعضاء جمعني بهم المنتدي ولم اشاهدهم من قبل؛ ياريت الكل يسارع بالتعرف علي الاعضاء وتفقدهم لو كانت المسافه قصيره بين المدن وخاصه ناس السعوديه ودول الخليج
ياكم ديل اهل السودان عامه دي صفاتكم الحلوه

[ابو المهتــدي]

بسم الله الرحمن الرحيم
الاخوة الكرام والله ةبكل صدق لقد جرفني الاخ عزيز الي ايام خوالي ونحن فعلا نجوب تلك الديار ولنا فيها زكريات واخوة كرام 0 ولم استقرب صوت عبد العزيز رقم ان لاول مرة نتحدث فيها عبر الاثير 0 فانه والله اخ وكنز يقتني
وربما جمعتنا الايام في ماضيها ولم نكن نعرف بعضنا 0 فهو ابن تلك الديار
التي نحمل سمتها وحبها وهذا مما جعل الالفة شي طبيعي 00عشمنا ان ترجع تلك الربوع الي سابق عهدها 0 تعو ونعود كما كنا 0 غدا نتمي ان تعود والله اتمني ان تعود انها مرتع زكري وايام خوالي 0 وما اصدق اخاء اهلها
باي وسيلة كانت 0 عبر الاثير 0 او بالاحضان فانهم اهل الجزيرة 0 ونحن منهم 0 والتحية مرفوعة لكل الاخوه في هذا المسيد

[ابراهيم]

عمنا العزيز علينا عزيز ...

ليست غريبة هذه الروح .. وليس سهلاً انا يناديك صوت من البعيد .. وينثر فيك احاسيس تفتقدها احساس بالوطن بالاهل بالاسرة في غربة تجلدنا فيها الثواني الساعات بل والسنين ... فمنتدى ود مدني هذا المنتجع والملتقى الطيب والبيت الكبير وبكل ما يحوي من اناس تشع دواخلهم إلفة ومودة ... آتى اكله وكانت الصلات الطيبة بين اسرة المنتدى هي رمز لأصالة ونقول هكذا وبكل اعتزاز إننا تفوقنا على المسافات والازمان لما يمثله لنا هذا الصرح من وطن واهل.

حينما اتاني صوت عمنا عبد العزيز في الهاتف ورغم إنها أو مهاتفة إلا أن الصوت لم يبدو لي غريباً .. فكان صوت ينم عن إلفة وطيب خاطر صاحبه كما عهدناه بشوشاً في المنتدى فتآنسنا بإلفة مدهشة وضحكنا وكأننا نعرف بعضنا من سنين .. وفقت مع نفسي بعد انتهاء المحادثة وخالجني شعور طيب ووسقطت دمعة فرح لم اعاندها .... شكراً أهل مدني لما زرعتموه في نفوسنا من سعادة ... أخونا أمير عبد الباقى وعمنا ابو المهتدى لم يتركو لي شيء لاقوله ففي حضرتكم تتبدل الكلمات الى احاسيس شفيفة يتخللها الود والاحترام اهديها لكم جميعاً ...


تحياتي

[خالد حمد موسى]

مشكور اخي عزيز علي اتصالاتك الهاتفية

بالاخوة الشباب وفعلا شئا رايع وجميل

ونسال الله الترابط الدايم لكل الاخوه

وجزاك الله الف خير علي المبادرة الطيبة

ولك كل الود ياغالي ...

[خطاب العبيد]

مشكور اخى الكريم على هذا الاطراء وهذا ديدن الكثيرمن اهل السودان الكرام ومدنى الحنينة .

والمره الجاية انا البتصل عليك وعلى باقى الاخوان بإذن الله وبالمناسبة شنو حكاية ابوروان والعرس الحاصل شنو الجبان ماورانا حاجة عن العرس قول ليه قاليك الزول الشين بجى الخريف واللوارى بتقيف نحنا برضو على بعد خطوات من دخول السجن الذهبى .

ولك كل الشكر اخى عزيز وربنا يقدرنا ونكون مع بعض

الزول الشين

[عزيز عيسى]

يا سلام علي الكلام الجميل يا أمير الكل.. ونظرا لبعد المسافة فكان ابسط شيء استطيع أن أفعله هو الاتصال الهاتفي والتحدث مع الاخوان.. ورحلتك مع عائلتك لزيارة عائلة خالد اسعدتنا كثيرا وأصبحت تاريخية لأن الناس في المنتدي كلهم يتحدثون عنها، خاصة عند وصف خالد لكيفية مقابلتك اول مره وكذلك قصتكم مع السمك.. بالله في احسن واجمل من كده.. يا ريت الزيارات تتكرر بين الاخوان و ابوهاشم يكرر الزيارة ليكم في الطائف.

ولا يسعني الا أن أدعو الله أن يجمع شمل الاخوان علي الخير وان تدوم الالفة والمودة بين الجميع.. مع امنياتي لكم بالتوفيق.

عزيز

[عزيز عيسى]

كاتب الرسالة الأصلية ابو المهتــدي
بسم الله الرحمن الرحيم
الاخوة الكرام والله ةبكل صدق لقد جرفني الاخ عزيز الي ايام خوالي ونحن فعلا نجوب تلك الديار ولنا فيها زكريات واخوة كرام 0 ولم استقرب صوت عبد العزيز رقم ان لاول مرة نتحدث فيها عبر الاثير 0 فانه والله اخ وكنز يقتني
وربما جمعتنا الايام في ماضيها ولم نكن نعرف بعضنا 0 فهو ابن تلك الديار
التي نحمل سمتها وحبها وهذا مما جعل الالفة شي طبيعي 00عشمنا ان ترجع تلك الربوع الي سابق عهدها 0 تعو ونعود كما كنا 0 غدا نتمي ان تعود والله اتمني ان تعود انها مرتع زكري وايام خوالي 0 وما اصدق اخاء اهلها
باي وسيلة كانت 0 عبر الاثير 0 او بالاحضان فانهم اهل الجزيرة 0 ونحن منهم 0 والتحية مرفوعة لكل الاخوه في هذا المسيد

ابوالمهتدي الغالي،
يا سلام عليك وعلي الكلمات الصادقة والله انك نعم الاخ الوفي وبشكرك كثير لاتاحة الفرصة للتحدث مع شخصكم الكريم.. وأرجو من الله ان يدوم الحب والمودة بيننا وتعود ايام الماضي الجميلة لتجمعنا مرة اخرى في بلادنا الغالية.. وانشاء الله سأكون على اتصال دائم بكم.

ودمت لنا اخا نعتز ونفخر بكم.

عزيز

[بابكر]

سلام يا عزيز شوف انا حاولت الاتصال بيك لكن صراحه ماقدرت والرقم ماجمع معاىفأرجو شاكرا ارسال الرقم كاملا او الاتصال بى 000 يعنى لازم وضرورى يافرده
ملحوظه رقم جوالى هو00===0504397030

[Jamal Elmahi]

عزيز العزيز

عهدناك دائماً سبّاق لكل ما هو جميل ورائع....
لقد أعجبني هذا التواصل والتمازج والتاَلف....فبمثل هذه الروح تنطوي المسافات ...تذوب الحواجز..تتلاشي الفوارق...وتسيل مشاعر الناس جداول....
فربنا يدوّم الود والاخاء والمحنّه...

إنشاء الله ياعزيز يوم شكرك مايجي...
ربنا يخدّر ضراعك ويكتّر نفاعك...

جمال

[عزيز عيسى]

برهوته الغالي،

والله يا اخوان أنا لما كلمت ابراهيم في اليوم التاني شعرت بأنه انسان قريب جدا لي.. ويحلو الكلام معه.. انسان بشوش ومرح لابعد الحدود.. وبسم الله.. ماشاء الله يتمتع بأخلاق وثافية عالية (ما يسحروك).. تحدثنا وضحكنا لمدة أكثر من الساعة.. طبعا الشمارات (ما تديك الدرب).. وعلي فكرة امبارح بعد مارجعت من العمل حاولت الاتصال بالاخ ابراهيم وكنت في انتظاره علي الماسنجر لفترة طويلة.. على العموم اليوم سأحاول مره ثانية وانشاء الله احصله.

ربنا يدوم الود والتواصل بين الاخوان.

عزيز

[عزيز عيسى]

الاخ خالد حمد موسى

شكرا على الاطلالة يا رائع.. وزي ما قلت ربنا يدوم الترابط الدائم بين الاخوان.. وتوقع مني مكالمة مفاجأة خلال الايام القادمة بأذن الله.

مع خالص ودي وتقديري،

عزيز

[عزيز عيسى]

كاتب الرسالة الأصلية خطاب العبيد
مشكور اخى الكريم على هذا الاطراء وهذا ديدن الكثيرمن اهل السودان الكرام ومدنى الحنينة .

والمره الجاية انا البتصل عليك وعلى باقى الاخوان بإذن الله وبالمناسبة شنو حكاية ابوروان والعرس الحاصل شنو الجبان ماورانا حاجة عن العرس قول ليه قاليك الزول الشين بجى الخريف واللوارى بتقيف نحنا برضو على بعد خطوات من دخول السجن الذهبى .

ولك كل الشكر اخى عزيز وربنا يقدرنا ونكون مع بعض
الزول الشين

الزول الشين اخوي خطاب،

التحايا والاشواق،

زمان لما كنت عايش في الخرطوم كان الناس هناك دائما بتسألني وتقول لي ناس مدني ناس كريمين وطيبين وعلاقاتهم مع بعضهم واسعة وبتمتد لخارج حدود مدني..هل صحيح ناس مدني بيتعارفوا كلهم مع بعض.. وماهو السر في ذلك.. قلت ليهم نعم الناس هناك غالبيتهم بيعرفوا بعض وبتربطهم علاقات تواصل اخوية واسرية متميزة قلما تجد مثلها في أي منطقة اخرى.. والناس في مدينة ودمدني نفسها تفرض عليك حب الجميع وتعلمك كيف تكون انسان كريم وطيب وتتعامل مع الاخرين بكل أدب واحترام.. نشأنا وتعلمنا في تلك الديار الطيبة.. وأعطتنا المدينة الكثير.. لذلك حبنا لهذه المدينة العملاقة نابع من صميم قلبنا ولا تحده حدود.

ونحن في ديار الغربة لابد لنا من التواصل ولنتفقد احوال ببعضنا البعض لنعيد ذكريات الحبية ولنحافظ على تلك الخصال الحميدة التي تعلمناها من أهلنا الطيبين.. وفي نفس الوقت الفضل يرجع للاخ ابوبكر (الادمن) الذي افرد لنا هذا المنتدى لنلتقي اخوة يجمعنا الحب والوئام..

والشكر يرجع لك انت والاخ ابوروان لتذكير الاخوان.. ونقول ربنا يجمع شمل الجميع.

فيما يتعلق بالاخ ابوروان اعتقد انتهى من مراسم العقد بالسفارة السودانية في الرياض.. لكن ما عندي فكرة اذا كان هناك احتفال بالعرس أم لا.. ولو الحكاية فيها حفلة اعزمونا خلونا نجي نسكسك.

مع خالص الود والتقدير،

عزيز

[عزيز عيسى]

كاتب الرسالة الأصلية بابكر
سلام يا عزيز شوف انا حاولت الاتصال بيك لكن صراحه ماقدرت والرقم ماجمع معاىفأرجو شاكرا ارسال الرقم كاملا او الاتصال بى 000 يعنى لازم وضرورى يافرده
ملحوظه رقم جوالى هو00===0504397030
اهللين يا فرده.. وليك شوق شديد،

فينك يا راجل غايب.. أتصلت بيك كذا مره على الجوال والجرس بيرن.. تأكدت من رقم مفتاح ينبع من الاخ عوض ابوالمهتدي وعاودت الاتصال لكن برضو ما بترد.
الحكاية شنو لسه بتجمعوا انت والمدام في حوائج الشيلة للعريس.. انشاء الله خلصتوا..

على العموم أنا حأتصل بيك غالبا في يوم السبت القادم نظرا لظروف العمل وفارق التوقيت.

على فكرة.. ممكن نلتقى علي الماسنجر تبع الياهو Yahoo وأنا عرفت من الاخ ابراهيم انو الاخوان بيلتقوا على الماسنجر تبع الهطميل Hotmail حأعمل ليه download علشان اقدر اكلمكم لأنه دي اسهل طريقة.

ورقم هاتفي في المنزل مع المفتاح الدولي للولايات المتحدة 0012814953660 وما عليك يا فرده الا ان تدخل الرقم وتتصل مباشرة.

عزيز

[عزيز عيسى]

كاتب الرسالة الأصلية Jamal Elmahi
عزيز العزيز

عهدناك دائماً سبّاق لكل ما هو جميل ورائع....
لقد أعجبني هذا التواصل والتمازج والتاَلف....فبمثل هذه الروح تنطوي المسافات ...تذوب الحواجز..تتلاشي الفوارق...وتسيل مشاعر الناس جداول....
فربنا يدوّم الود والاخاء والمحنّه...

إنشاء الله ياعزيز يوم شكرك مايجي...
ربنا يخدّر ضراعك ويكتّر نفاعك...

جمال

جيمي الغالي،

يا جمال يا بتاع الشعر الحلمنتيش الماهو خمج الظريف
في غيابك لقفشاتك وكلامك السمح أشتقت كثير متقريف
عودا حميدا من ايرلندا جبت معاك زخات مطر الخريف

أشكرك علي شعورك النبيل وعلى ذوقك الرفيع والكلمات الرنانة ذات الصدى علي القلب..
وربنا يجمع شمل الاخوان على الحب والمودة.

ودمت لنا أخا وصديقا وفيا.

عزيز

[Jamal Elmahi]

هلو....هلو منو...وعايز شنو....
أنا عزيز....
عزيز العزيز.....أهلين عزيز.....
شقه غريبه يا لذيذ...
دي من راسك ولاّ من كراسك...
ولاّ ضارب حبة نبيذ...
أسألو شوقي ليكم....
السماعه ليها رافع....
قلته اطق الحنك....
وعشان خوتنا ما تبقي خوّة قر قر....
أشرب شاهيكم بالخبيز....
ياسلام يا عزيز دي ماقلبته فيها هويه....
دي عبلانج ما يعملا...دي مديده بي روبا...
دي دايره ليها قعده وبنبر وسط الراكوبه....
دي عشاها لازم ويكاب او ملاح لوبه,,,,
كدي اسمع ...اديك تسلم علي حبوبه....


وتتواصل التلفونات.....


جمال

[عزيز عيسى]

عزيز:
هلو.. هلو.. منو.. انت منو.. واسمك شنو؟

جيمي:
أنا جيمي..

عزيز:
جيمي مين.. جيمي حقنا ود حتنا.. ولا جيمي الخواجه الما قاعد في الواطه

جيمي:
ده أنا جيمي ود الجنيد
راجلا كبير ماني وليد
ماني خواف بربط الاسد بالقيد
لكن اتصالي كله اصبح بالبريد

عزيز:
فينك مسجل غيبة.. ما من عوايدك.. دي حاجة غريبة

جيمي:
سافرت مع الاولاد ايرلنده
ورجعت الديرة خلاص لبدت
معليش ماكلمتك ماتزعل يا فرده
قصرت معاك بلاش تلومني بشده

عزيز:
ألف حمدالله علي سلامة العوده
كلام زعل الله لاجابو ياود الحته
وكان علي التلفونات تتكسر حته حته
المسافة قريبة ما بتحتاج لي خريطه
تسألني وتقول لي متين جاي هسه
بقول ليك اصبر بس مسافة السكه
تلقاني قدام بابك واقف بكل حنكه
نتسالم ونتقالد بكل شوق ومحبه
شن بتقول تاني ماعندك حيله

عزيز

[ابراهيم]

خترين يا جيمي وعزيز

سمعت حواركم اللذيذ

جيتكم بالشاي والخبيز

لكن يا عمنا عزيز طلعت خطير في الحلمنتيش وبقيت منافس لجيمي وماشاء الله عليكم ...

ربنا يديم المودة والعشرة الحلوة

انتهز الفرصة لأحي العزيز عزيز لما يبذله من تواصل ومودة فله منا خالص التقدير

[عزيز عيسى]

يا ابراهيم انت عارف جمال ده عنده موهبة عظيمة جدا في الشعر الحلمنتيشي.. وكمان خطير.. قبل فترة اعتقد في المنتدى الثقافي كان في مساحة افردت للشعر الحلمنتيشي يا ريت جمال يتحفنا وينزل لينا شوية من اشعاره الحلمنتيشية.

عزيز

[عزيز عيسى]

الاخوان التالية اسمائهم حادثتهم لأول مره خلال يومي السبت والاحد الماضيين.. والله ما قادر اوصف ليكم كيف عن مدى سعادتي حينما حادثتهم واتونست معاهم أيضا زي كأننا بنتعارف منذ زمن بعيد.. شكرا لكم اخوتي وانشاء الله يدوم التواصل بيننا:

ابوبكر حامد ودالمأذون:
اتصلت بودالمأذون وطبعا الراجل ما كان متوقع انه المتصل عزيز.. لكن سبحان الله من أول مره الراجل عرفني وقال لي انت أكيد عزيز عيسى.. الراجل وقع ليك فيني ترحيب وسلام شديد.. وبعدها تحدثنا في كل شيء.. راجل كلامه ياسلام زي العسل تستمتع بمحادثته وقفشاته الظريفة التي عودنا عليها.. أنسان بمعنى الكلمة ومهما وصفته لكم لن اوفى بحقه.. بس جربوا واتصلوا بيهو علشان تتأكدوا من كلامي..

عماد الصادق
عماد ده طبعا راجل دفعه.. كلمته وسلمت عليه وكان موعد خروجه للحاق بالعمل.. لكن اصر انه يواصل ويكلمني.. خلال فترة وجيزة تحدثنا عن أيام زمان.. وذكرتو بالصورة اللى نزلها ابوبكر الادمن في دكان ودالصول.. تصدقوا عماد قال لي انه ما شافها؟!

خالد هاشم
فاجأت أبوهاشم في البيت وطبعا ما كان متوقعني سلام شديد وبعد داك وقعنا ليك في الونسة الظريفة والضحك.. راجل حبوب لأبعد الحدود.. اتونسا لفترة من الزمن لكن في اثناء الكلام الخط انقطع وحاولت الاتصال مره اخرى لكن الخط حلف ما يرجع.

بابكر ودالصول.
الطريف حينما اتصلت بمنزل الاخ بابكر ودالصول.. طبعا بعد عدة محاولات في البداية رفع السماعة ابنه لكن الخط انقطع.. عاودت الاتصال مرة اخرى.. وفي هذه المرة رفعت السماعة زوجته وسلمت عليها وعرفتها بأسمي.. بعد قليل سمعت صوت من بعيد بينادي بابكر ويقول ليه عزيز في التلفون عزيز في التلفون.. ولما جاني بابكر الراجل سلم علي سلام شديد جدا وقال لي اسمك اصبح مشهور عندنا في البيت.. قلت ليه يا بابكر والله ينبع بتاعتكم دي احسن منها الواحد يتصل بي حلفا.. المهم تحدثنا لفترة قصيرة نظرا لارتباطه بمواعيد ووعدني بمحادثة خلال الايام القليلة القادمة.

الاخوان التالية أسمائهم حاولت عدة مرات الاتصال بهم لكن محاولاتي كلها باءت بالفشل ويبدو لي أن نوع الكروت اللي كنت بتصل بيها ما بتسمح للاتصال بالهاتف الجوال في السعودية خاصة اللى بيبدأ بالرقم 50.. على العموم سأحضر كروت من نوع آخر وأعاود الاتصال انشاء الله في القريب العاجل.. والاخوان الذين حاولت الاتصال بهم هم:

ابوبكر الادمن
ابوروان
صالح ابوشوارب
ياسر - ابو ريلان
خالد حمد موسى
جمال الدين - الزمن المريح - الهاتف مشغول.
السفير


ولكم مني كل الود،

عزيز

[عماد الصادق]

بالمناسبة يا عزيزنا .. وكت انت اتصلت انا كنت في غفوة الضهرية
وبيني وبينك عندي نومة بين الساعة 3 و 4 ومرات أجرها حتى قريب
الدوام لقرب مسافة المكتب من البيت (دقيقتين) ..
وساعة التلفون رن أنا كنت في وادي تاني .. لدرجة أني لم استوعب
عبدالعزيز (who) ...
لكن أفضل وأقول أسعدني اتصالك .. كما أسعدني أيضاً لقاء الأخوة
(قبل يوم من اتصالك) إدمون خالد هاشم أبوروان العريس وغابة الأبنوس
وجد المنتدى خلق جو من التآلف والتحابب والإنسجام..

ربنا يديم المودة ويزيد التعارف .. ونشوف بعض (وجهالوجي)

وبالمناسبة توقع اتصال من أخي بتاع ريشموند

ولكم التحية

[عزيز عيسى]

انت عارف يا عماد نومة الضهرية دي أنا لما كنت في جده لازم أنومها بعد الرجوع من العمل لأنه الواحد بيكون منهك ومدروخ وعايز ياخد ليه قسط من الراحة بعد تعب العمل.. المهم ما عليك يا أبوالشباب أنا مقدر الظروف وانشاء الله المرة الجاية اتصل بيك في وقت اريح علشان تكون مفتح ونتكلم عن الذكريات.

اتصل بي اليوم في المكتب اخوك جلال الدين من Richmond, Virginia وما شاء الله انسان عسل اتونسا لفترة واخذت ارقام هواتفه في البيت وفي العمل وحتى الموبايل.. وعلى فكرة أنا وأسرتي مسافرين يوم الجمعة القادم بأذن الله الى ولاية ميريلاند وهي قريبة من ولاية فرجينيا لحضور عرس شقيقة المدام.. وسأحاول بقدر الامكان اني اصل الى الاخ جلال الدين في منطقتهم واتعرف عليه عن قرب.. وحأعزمه للعرس.. وبعد ما أرجع سأحكي ليك.

عزيز