شنو يا ناس المنتدى الرتدوق ده بتعرفو ولا ما بتعرفو [الأرشيف]

امير عبدالباقي

10-07-2005, 09:18 PM

احبائي الاعضاء
تحياتي لكم ...........................فكرت كتير قبل ان اكتب هذا الموضوع لقد قمت بزياره احد الاسر القادمه من السودان ووجدت اطفالهم لديهم مسطلحات غريبه لم اسمع بها من قبل وسالت عن معانيها فضحكت كثيرا وقالو ده كلام الرندوق
مثلا شروق لموزين تعني القروش (والله الزول ده شروق لموزين كتير) يعني قروشه كتيره (مقندل)
ودي بعض المصطلحات
القروش (( الشرتيتة ، الكنزب ، الشروق ) الجنس اللطيف (( الجكس ، البرتق ، الحشر )) االعربية (( الحديدة ))
اها ياجماعه كدي ادوني رايكم في الموضوع ده هل كلام الرندوق ده بضيع اللهجه العاميه ويسيطر عليها وياريت كم كلمه من عندكم من الرندوق

عزيز عيسى

11-07-2005, 09:46 AM

يا أمير الراندوق ده أسأل عنه اختنا عشوشة وأخونا ابراهيم.. وبعد ما يعلموك وتعرف كيف تدقه وتبقى تفتيحة وشايل مفاتيحها يا فرده يا مجبص (عكس مشرتت) بعد داك تعال ورينا علشان ندقه معاكم وبعدين نشتت.

عزيز

ابراهيم

11-07-2005, 12:23 PM

والله لكن لقيتم صعبين في الرندوق يا امير وعزيز .. لكن الرندوق ذاتو بقى حسب البيئة وحسب المهنة وحسب المجتمع يعني محل ما تمش بتلقى رندوق مختلف مثلاً رندوق الشماشة البروتاريين بختلف من رندوق الشماشة البرجوازيين وقس على ذلك اصحاب المهن والمجتمعات تقعد في وسطهم تشعر بي نفسك كأنك قاعد وسط صينيين كلام كلو كركبة وكشلوة وخشلعة ... وما تفهم اي حاجة ... وعندك الشرتيتة والكنزب والحديدة دي بقت دقة قديمة اوع تدقسو وتتعاملو بالمصطلحات دي عشان ما يضحكو عليكم...

المصطلحات الجديدة

نايل بور Nile power ومعناها أهل العوض مع الاعتذار لصاحب الغنية

وعندك "حسام حسن" ولما يقولو ليك الزول دة عملو ليه حسام حسن يعني حسموه او ادوه شاكوش في رواية اخرى ..

"احمد الخطيب" فلانة عملوا ليها احمد الخطيب يعني خطبوها

"عبد العزيز المبارك" او "عزة نفسي غالية علي" يعني عامل فيها تقيل و "تقلية في رواية اخرى ..

"فلسطين" على وزن "مجبص" اي مفلس

"زيدان ابراهيم" مثلاً لو انت بتاكل والاكل خلص تقول للحاجة اعملي لينا "زيدان ابراهيم" يعني زيادة

ولنا عودة

لكم التحية أخ امير على هذا البوست الجميل
وعمنا عزيز على المداخلة الجميلة

aborawan

11-07-2005, 08:45 PM

مشكور امير مشكور عزيز مشكور برهوتا وفعلا الرندوق بقى يختلف باختلاف المهنة والمجتمع
الزول ده عمل (( خوجلي عثمان )) يعني خجل واستحى
دقيقة نعمل (( ابراهيم الكاشف )) يعني نشوف ونكشف الشارع
اعمل للزول ده (( عبدالسلام حميدة )) يعني سلم على فلان ده
يلا نعمل (( صديق منزول )) يعني يلا ننزل

عشوشه

11-07-2005, 09:40 PM

ههههههه
الاخ عزيز بالجد صعبتها معاى سجمى اسى ناس المنتدى يقولوا البنت شمس وكده الستره واجبه
عارف نظره الناس للشمس
بعدين تعال هنا انا مش علمتك كل الراندوق يلى جاء الدور العليك تعلم فارات السعوديه ناس ابوروان وابو ريلان وكل المغتربين الداقسين
بالمناسبه ما قلت لى اخبار المعجم الراندوقى الحصل فيه شنوا اوع يكون راح شمار فى مرقه
المهم احنا فى انتظار نوزيع المعجم والعروض ما ليها حد الكل فى انتظار المعجم انت سوى ليك شويه همه وخلص
عاين بطل اى زول رايح تقول ليه امسك فى عشوشه
ههههههه

امير عبدالباقي

12-07-2005, 08:24 AM

الاخوه الاحبه
عزيز شنو ياحبيب مااديتنا من كلام الرندوق بتاع عشوشه كدي فتو لينا الشمار حرقنا والله
ابراهومه شنو يعني قالو عندك كلام الرندوق بالكوم ماتدينا منو شزيه
الغالي ابوروان تسلم ياغالي بس الشي البعرفو عنك عندك لغه خاصه للرندوق ماتعلمنا ليها ياخي
الاخت عشوشه غايتو عزيز فتاهو وطلعك شمس كدي تعالي ودينا من العلمتيه لعزيز
تسلمو لمشاركاتكم

التيمان

12-07-2005, 02:26 PM

قنش يا درف قبيتو تتلكمو يب الدارنوك

شنو يا فرد بقيتو تتكلمو راندوك

راندوك الصوره

مك مليجا ول قبينا ادصقاء

امير عبدالباقي

12-07-2005, 09:35 PM

تلاخ مصطفي (التيمان)
تصدق الكلام ده لسه مابعرفو ونفسي اتعلمو
كدي ادونه قواعده في البدايه

عشوشه

12-07-2005, 10:53 PM

شوف ياباشا لى اى لغه اصول ولازم تكون عارف اصول الفغه يعنى اسى الرندوق بتاع التيمان ده ساهل عديل زول ممكن يتعلموا بكل العليك تشقلب الحروف بس لازم يكون بسرعه وجمله كامله مثلاً
الصاحل نشو
الحاصل شنو
هفمت يارفده
اما الراندق الغير العادى فهو مصطلحات يعنى مثلا القروش
ممكن تكون
الجيز ..... القنزب...... الضحكات ....... الشرتيت.................الخ
البنات يقولوا ليهم الجكس والحسس والنحل وووويك ما تعد كتر اسامى
اما التفاتيح ديل بعرفهم عزيز عيسى لانوا اسى بقى تفتيحه وماسك مفاتيحه
طبعا ابوا روان زول مفتح وعندو مصطلحات خاصه بيه بس اليوم هو ما باين ونحن عارفين هو وين خليه بكره بعمل عبد الظاهر
تانى ابراهيم برهوتا زول مفتح خالص جانى شمار انو كان بقعد جم كليزوم يتعلم اصول الراندوق على ايدى الخبراء
وانا طبعا زوله داقسه خالص يعنى اى شافع ممكن يدقسنى بالراندوق
ويلا لسام

التيمان

13-07-2005, 12:10 AM

اسمكو يف شعوعه وقى بترويكم لك الدارنوك

يا شعوعه اي ملعمه

ابومرام

13-07-2005, 03:42 AM

ههههههههههههههههههههههههههههههههههههههههههههههههه

والله ياامير ماقصرت انت عارف لحدي اللحظة الكلام بتاع الرندوق دا ما فهمت منه ولا حاجة كمية من المصطلحات واختلاف افهام بس انا لمن انزل السودان محتاج لاخونا ابرهيم وعشوشة عشان اتعلم منهم لكن الاجازة بتكفيني اتعلم يا عشوشة مادام فيها اساسيات اللغة والنحو والقواعد واشياء جمة يعني الواحد في البداية بقعد يتلفت يمين شمال لمن ايامة تخلص ويجي تاني من جديد 0انت عارف ياامير الواحد بد مايكون همة في الاسرة والبيت اصبح همة يعيش كيق مع الناس بالمصطلحات الجديدة دي 0بس يا ايرهومة بالله عليك ما تنساني تكون معاي وعشوشة كمان انا عارفك شايلة مفاتيحه 00

عزيز عيسى

13-07-2005, 04:10 AM

كاتب الرسالة الأصلية ابراهيم
والله لكن لقيتم صعبين في الرندوق يا امير وعزيز .. لكن الرندوق ذاتو بقى حسب البيئة وحسب المهنة وحسب المجتمع يعني محل ما تمش بتلقى رندوق مختلف مثلاً رندوق الشماشة البروتاريين بختلف من رندوق الشماشة البرجوازيين.

يا ابراهيم يمكن امير يكون احسن مني كثير في الراندوق.. انا لسه بتعلم منكم انت وعشوشه.. وبتقول الراندوق حسب البيئة وحسب المهنة وحسب المجتمع.. طيب تفتكر لو مشيت مدني مثلا حأجد راندوق الخرطوم بيختلف عن راندوق مدني.. الراندوق ده عايز ليه دراسة مكثفة علشان الواحد يتعلمه.. وزي ما قلتوا لازم الواحد فينا يمشي السودان.. ثم ثانيا أول مره اعرف انه في شماسة بروتاريين وشماسة برجوازيين.. تطور خطير لكن.

وقس على ذلك اصحاب المهن والمجتمعات تقعد في وسطهم تشعر بي نفسك كأنك قاعد وسط صينيين كلام كلو كركبة وكشلوة وخشلعة ... وما تفهم اي حاجة ... وعندك الشرتيتة والكنزب والحديدة دي بقت دقة قديمة اوع تدقسو وتتعاملو بالمصطلحات دي عشان ما يضحكو عليكم...

اكون جالس مع ناس بتتكلم كلام الصينيين ده واكون مافاهمو.. ده الخايف منو.

المصطلحات الجديدة
نايل بور Nile power ومعناها أهل العوض مع الاعتذار لصاحب الغنية

هسع عليكم الله أهل العوض ديل ذنبهم شنو يقوموا ناس الراندوق يلزقوا ليهم الكلمة دي.

عزيز

عزيز عيسى

13-07-2005, 04:13 AM

كاتب الرسالة الأصلية aborawan
مشكور امير مشكور عزيز مشكور برهوتا وفعلا الرندوق بقى يختلف باختلاف المهنة والمجتمع
الزول ده عمل (( خوجلي عثمان )) يعني خجل واستحى
دقيقة نعمل (( ابراهيم الكاشف )) يعني نشوف ونكشف الشارع
اعمل للزول ده (( عبدالسلام حميدة )) يعني سلم على فلان ده
يلا نعمل (( صديق منزول )) يعني يلا ننزل
والله يا ابوروان تراك ما ساهل.. اهو أنا وأمير اتعلمنا منك كلمات جديدة.

مشكور يا ابوالشباب.

عزيز

عزيز عيسى

13-07-2005, 04:31 AM

كاتب الرسالة الأصلية عشوشه
ههههههه
الاخ عزيز بالجد صعبتها معاى سجمى اسى ناس المنتدى يقولوا البنت شمس وكده الستره واجبه
عارف نظره الناس للشمس
بعدين تعال هنا انا مش علمتك كل الراندوق يلى جاء الدور العليك تعلم فارات السعوديه ناس ابوروان وابو ريلان وكل المغتربين الداقسين
بالمناسبه ما قلت لى اخبار المعجم الراندوقى الحصل فيه شنوا اوع يكون راح شمار فى مرقه
المهم احنا فى انتظار نوزيع المعجم والعروض ما ليها حد الكل فى انتظار المعجم انت سوى ليك شويه همه وخلص
عاين بطل اى زول رايح تقول ليه امسك فى عشوشه
ههههههه

عشوشه يا اختي والله الراندوق بتاعكم ده صعب شديد.. انا افتكرت انحنا الناس البعيدين منكم ديل مدقسين وانو ناس الخليج ديل ناس تفتيحة.. لكن أمير خزلهم واتضح لي انهم مدقسين خالص.. مش احسن اعلمهم كلمتين تلاته من اللى بتعلمهم منك انت وابراهيم وابوروان؟
أما فيما يتعلق بالمعجم.. طلبت من اخونا Rasheed انه يرسله لي.. لكن ختاني شرحبيل احمد وعمل فيها تقلية وشتت وتاني ما رجع واخباره الارسال انقطع.. ولو عملتي معروف ترسلي لي المعجم أكون هاني شاكر.

و ملتسي.. أو ملستي.. لساني قرب يتعوج.. المهم اقصد تسلمي.

عزيز

عزيز عيسى

13-07-2005, 04:38 AM

كاتب الرسالة الأصلية امير عبدالباقي
الاخوه الاحبه
عزيز شنو ياحبيب مااديتنا من كلام الرندوق بتاع عشوشه كدي فتو لينا الشمار حرقنا والله
ابراهومه شنو يعني قالو عندك كلام الرندوق بالكوم ماتدينا منو شزيه
الغالي ابوروان تسلم ياغالي بس الشي البعرفو عنك عندك لغه خاصه للرندوق ماتعلمنا ليها ياخي
الاخت عشوشه غايتو عزيز فتاهو وطلعك شمس كدي تعالي ودينا من العلمتيه لعزيز
تسلمو لمشاركاتكم
أمير أنا لحدي الان ما عارف نوع الراندوق اللي بتكلمه أنا ده بيدخل في أي باب.. هل هو من النوع البورتاري ولا النوع البورجوازي.. عشوشه وابراهيم هم اللى بيقدروا يفتونا في الموضوع ده..
وبعدين أنا حاولت اقرأ كلام اخونا التيمان.. لكن لقيت نفسي مدقس خالص وما قدرت أفهم حاجة.. طيب.. أي نوع من الراندوق اللى دقاهو لينا اخونا التيمان.. ده بتكلم صيني ولا شنو؟.. الحكاية صعبت شوية.

ياسر فقيري

13-07-2005, 04:39 AM

يا جماعة الموضوع دا جميل ما تقوموا تعملوا ليه كمال ترباس ...

التيمان

13-07-2005, 06:45 AM

ولحين يا شباشب قبيتو تتلعمو

يا عشوشه والمعلمين ندى ندروس بالقروش بعده عملنا دعايه

عشوشه

13-07-2005, 10:10 PM

الميتان دكه افتقنا نعلما بى رقوش شعان نرشتت لوا ليك راى ناتى
شوف يافرده انا ما بقبض الا بالدولا افتح اضانك يا عزيز يعنى ترسل الشرتيت نعمل ليك المرسال
(القاموس)
ابراهيم انت نعانا صاح اقلاه الواحد يطلع حق البارد
اما ناس الخليج لانهم مساكين ما بنقدر ناخد مهم كاش عليهم يغيروا الموبايلات كل تلاته شهور حسب اخر جيل
اتفقنا
الدروس ح تكون تحت شجره ضل المنتدى كل زول يجيب كمبيوترى ويجى لزوم التسجيل وكده
لخاص يارفد افتقنا
عم لسامه

welly

13-07-2005, 11:19 PM

سنو شمار سا يايات عسوسه شمار سغاله شمار سى فرفور ساس نوار السليج خريف
سنتى ابونى سايله قرقور سحن نوار سايين جرجير سن مرمر سين ورور

والساليك قرقور سنو مرمر سساكين مرمر

سييييييييييي همام سعملى ابونى سسابك حمام

بتشيل الحرف الاول من كل كلمه وبدل على بمعنى تانى

يلا رايك شنو يا عشوشه فى ناس الخليج

انشاءالله تعجبكم

امير عبدالباقي

14-07-2005, 01:17 AM

الاخت عشوشه
كدي قولي بسم الله كدي ورينا حبه حبه عشان نفهم عليك الله براحه علينا نحن مابنعرف الحاجات دي اعملو فينا معروف
الاخ وائل
حسي عليك الله ده كلام شنو والله مافهمت اي حاجه والله دقستونا يافرد عاوز منك تشرح لينا القواعد بتاعته لانو الظاهر كده ده اصعب كلام رندوق حتي الان التقول صيني

عزيز عيسى

14-07-2005, 04:44 AM

كاتب الرسالة الأصلية welly
سنو شمار سا يايات عسوسه شمار سغاله شمار سى فرفور ساس نوار السليج خريف
سنتى ابونى سايله قرقور سحن نوار سايين جرجير سن مرمر سين ورور

والساليك قرقور سنو مرمر سساكين مرمر

سييييييييييي همام سعملى ابونى سسابك حمام

بتشيل الحرف الاول من كل كلمه وبدل على بمعنى تانى

يا أمير،

والله أنا أفتكرت Welly ده بتمتم.

يا عشوشه و Welly زي ما قال ليكم أمير.. عليكم الله ادونا الراندوق ده حبه حبه.. فهمونا قواعده.. كيف نشيل الحرف الاول من كل كلمة ونبدل.. أنا غايتو لغاية الان مسطح ما فاهم شيء زي اخوي امير.

عشوشة.. يا فرده يا مجبصه.. أنا ما عندي مانع اني أشرتت بالدولار ولا حتى بالدينار.. وأمير يمكن ما عنده مانع يشرتت بالعملتين معا بالاضافة الى الريال.. بس انتو كيف تعملوا لينا المرسال القاموس.
وكان علي الدروس أنا جاهز وجايب معاي فروتي وبرش.

عزيز

Jamal Elmahi

14-07-2005, 01:02 PM

راندوق مدني ولا عربي دمشق....
الراندوق كما قال أخونا إبراهومه خشم بيوت....واحياناً اخري خشوم من غير بيوت...
وكما قال الباحث الشماشي عكليته ان الراندوق اسرع لغات العالم تغيراّ...وأن معطم الراندوق لا قواعد له كما قالت الخبيره عشوشه...
واضاف عكليته ان الراندوق قد يكون بين إثنين فقط من الشماشه أو العاملين عليها...
كما أن ظاهرة الراندوق ظاهره عالميه وليست محليه ...يعني الخواجات عندهم راندوق...

مرّه في سوق الحصاحيصا إستوقفني أحد الشماشه وقال لي تساهيل ومن مدت إيدو عرفته إنو عايز قروش... قمته أديته الف جنيه...قام رجعا لي وقال لي صلحا...عاينته للورقه مكرفسه وين صلحتها ورجعتها ليهو بكل حسن نيه يامومن ياصديق...
قام رجّع لي الورقه تاني وقال لي إتصلّح معانا وصلّحا... فهمته إنو عايز ذياده...إتصلّحته معاهو وذتو خمسه الف...وببسمه قال لي تبروقه.....وهنا سطّح اخوكم....وقلته يا ولد بدل ما يسطّح بي الشماشي أحسن أنا أسطّح بيهو....فبسرعه قلته ليهو إبريق حديد...
قال لي زلط سمك كبشور....
قلته ليهو شوك الشوّك بغطّس حجرك...
قال لي ضريسه بقرشا الحصحاص فراشنا...
وعضّ الشماشي جلابيتو في خشمو متأهباً للانطلاق....
فقلته ليهو بعافيتك....
ولله في خلقه شئون...

جمال

ابراهيم

14-07-2005, 01:36 PM

والله عجايب يا جيمي

الشماشي "سرح" بيك

واتعامل معاك بي منظور مادي نفعي، ودة غير "الطيران الرندوكي" تعرف الشماشي دة فلسفتو الرندوكية متحررة نوعاً ما من القيود الشماشية وفكرته في التقنية الرندوكية متقدمة ويبدو ذلك في استخدامه جملة "زلط سمك كبشور" والتي اول مرة اسمع بيها وهذا على ما يبدو اتجاه جديد .. و"تبروقة" هذه مفروض تصنف ضمن احسن خمسين كلمة ويدو عليها الشماشي جائزة نوبل وبالمرة تتغير النظرة الدونية للشماشة .. لما بذوله في اضافات حقيقية في البنية اللغوية ..

لكن تبروقة دي عجيبة وبالغ فيها

عليك الله يا جيمي الشماشي دة ما عارف لي نمرة موبايلو كم

:D :D

Jamal Elmahi

14-07-2005, 04:41 PM

كاتب الرسالة الأصلية ابراهيم
والله عجايب يا جيمي

عليك الله يا جيمي الشماشي دة ما عارف لي نمرة موبايلو كم

:D :D أخونا عظيم الشان إبراهومه...

الشماشي أبو عيون كحيله عندي أيميلو ينفع....

eklitahasahisa@hotmail.com

جمال

التيمان

15-07-2005, 12:24 AM

الراندوق كمل ولا شنو ادونا الجديد

يا شباشب

شباب

امير عبدالباقي

15-07-2005, 07:55 AM

الاخوه الحبائب
والله ماقصرتو ابراهومه وجمال الماحي وجد عندكم فلسفه حلوه جدا
لكن ياجماعه عاوزينكم تفتحو فصول تعليم الرندوق وماتبخلو بيها علينا وانا ارشح البروف ابراهومه والعميده عشوشه والاستاذ وائل لفتح فصول تعليم لغه الرندوق وخاصه لغه وائل الصينيه

شاكسس

15-07-2005, 01:26 PM

انا شاكسس توم مصطفى ملك الراندوق

انا مجتبى

بعض المصطلحات
1.البنات(لقو.فجص.حسس.طرحه.علم.ارنب.)
2.الطعام.(علايق.جومه.وزقه)
3.القروش(ضحاكات.القالب.الباسطه.مسحت راس)
4.الحفلات(طرب.بهجه.مزيكا.صيحه)

دى جاحات من طرف الطشنه
انشاءالله تكونوا عرفتوا جاحه

عشوشه

15-07-2005, 09:38 PM

هلا شباب
باين عليه الموضوع ح يجر
والحديث زو شجون بالذات فى حته الرندقه واتمنى كل يدلى بدلوه عشان نعمل تنيور للناس ما ناقشين يعنى ما اشيل الشيله براى وانتو تعملوا زغبير اكيد فى ناس تفاتيح بس عاملين فيها نايمين
اها امبارح لقيت الاولاد الصغار بتونسوا من انا جيت قالوا خلاص الهوا برد انا فهمتها طوالى انى انا الهوا قمت عملت فيها قتيته وقفت لعلى اسمع بعض الكلمات عشان اجيبها ليكم
اثناء ما بتونسوا قالوا نهايه دى مستحميه ونهايه دى يعنى هنايه
مستحميه يعنى نضيفه ولا لونها ابيض
قام التانى قال ليه مستحميه بى صابون نط واحد تات قليهم انتو وهم ولا شنوا دى مستحميه بى شامبوا
والشامبوا ده اقصى درجات النظافه والظرافه.
طبعا الاستحمام ليه معانى ودرجات يعنى لما يقول ليك موضوعى استحمه معناها الموضوع باظ
ونواصل

بوتشى

16-07-2005, 02:29 AM

يا ماخ ويا فرده الكلام ده ما بغير اللغه او اللهجه العاميه
لكن ده كلام بين الشباب ومشكور على الموضوع الرئع ده
واديك العافيه

امير عبدالباقي

16-07-2005, 08:51 PM

الاخ بوتشي
لك كل الود
يافرده خليك مفتح اصحا للون نحن ماقلنا الرندوق بغير اللهجه العامه لكن يمكن تدخل علي اللهجه العاميه بعض المصطلحات

الزبير محمد عبدالفضيل

16-07-2005, 09:56 PM

وكمان مانتنسوا اللهجه العاميه وخاصه اللهجه الدارجيه

ابراهيم

17-07-2005, 01:55 PM

يا جمال الشماشي دة صيني ولا شنو قدر ما حاولت اقرا اسم الايميل ما قدرت لا بالانجليزي ولا بالعربي ولا بالاتنين عموماً انا اضفته عندي لكن كان قعد يقول لي تبروقة وزلط سمك كبشور تتحمل النتيجة موضوعو استحم على قول عشوشة رائدة الرندوق في العصر الحديث

غايتو الشماشي دة كان لم في ناس عمنا عزيز الا يجيبو ليهم مترجم

:D :D

rodinaa

18-07-2005, 05:12 AM

تم سا سيوة محبة دل كرتا يا
يعنى السلام عليكم
احيك على الموضوع دا لانو جايب (قحو) حق
مثلا:
الزول دا عمل الفتحاب,كبا البيرك,وانكشح,..................بمعنا مشى
الزول دا فرعون,اسمع ياماخ ويابصحى الغلش دا مالو ماجايب قحو
السان دا وين شتت

امير عبدالباقي

18-07-2005, 10:16 PM

شايف الاساتذه عملو نايمين ماعاوزين يدونا الدروس ماتخافو عزيز قال ليكم الدفع بالدولار
ابراهيم يلا
مشكوره ردينه علي المشاركه وعاوزين المزيد

عزيز عيسى

19-07-2005, 07:47 AM

يا شباب أنا عايز أسألكم سؤال.. الراندوق ده موطنه الاساسي وين؟.. وظهر سنة كم في السودان؟.. وأول منطقة ابتدأت تتكلمه؟.. لأنه المسألة عايزه ليها بحث دقيق علشان نقدر نفهم المصطلحات العجيبة دي.. أنا في رأي بتشبه الصيني والهندي..

يا برهوته لو الايميل بتاع الشماسي ما قدرت تتصل به ممكن تستعين بالـ Website بتاع الجمعية العامة لشماسة السودان.. لازم يكون مسجل عندهم: وهاك الويبسايد بتاع الشماسة:

www.communitycenterofsudaneseshamasa.net

ادخل عليه وممكن يدلوك على الشماسي اللي ذكره جمال ده.. ولو ما اتحصلت عليه بعد ده اتصل بالشرطة.

يا عشوشه.. احمدي الله انو الاولاد ديل ما قالوا عليك مستحمية بصابون غسيل.. لكن برضو عرفنا حاجة..

أمير.. طبعا بتسجل في الكلمات الجديدة علينا دي.

شاكس.. يا مشاكش.. دي حالتها من طرف الشنطة.. طيب افتح الشنطة وأدينا من اللى جواها.

rodinna قالت الاتي:
تم سا سيوة محبة دل كرتا يا
يعنى السلام عليكم

علي باليمين دي رطانة هنود.. وما استبعد أبدا انه روندا دي سمعتها في فيلم هندي..

عزيز

التيمان

19-07-2005, 09:14 AM

فيك يا شباشب

والله يارودينا طلعت معلمه

ده ماهندى دى رطانه دناقله

ابومرام

19-07-2005, 09:20 AM

ياشباب ابرهييم امير عشوشة عزيز ياجماعة ختو الكورة في الواطة وشوشية شوية علينا وخلونا نفهم معاكم كلمة واحدة والله اول مرة احس باني بعدت عن السودان لمن مرقت من الموضوع د اكلو من غير ما اعرف كلمة احدة بس ياامي اسرع علينا بفتح المدرسة وذي ماقلت الاستاذ ابراهيم بس اهم حاجة يكون الدق مافي وتسلموا يالغالين بالجد اسعدتونا ربنا يديكم الصحة والعافية

ابراهيم

19-07-2005, 12:19 PM

سلامات يا حلوين .. شايف الناس انداحت في موضوع الرندوق وكدة

بالنسبة للموطن الاصلي يا عزيز اتخيل اي بلد عندهم رندوق خاص بيهم مثلاً عندنا في مصر هنا بتلقى كلام ما تفهم فيه اي حاجة يخلوك زي الاطرش في الزفة أما ظهر سنة كم دي ما عارف والمعلومات دي غايتو الا ابو روان العريس يشوف لينا شماشي يستضيفو لينا في الكرسي الساخن عشان نفلفلو .. وعلى بال ما ينزل المنتدي كلو يكون اتعلم الرندوق .. بالنسبة للوب سايت بتاع الشماشة دة قدر ما دقيت الباب ابو يفتحو ...

الرندوق يمكن بشبه اللغة الهندية لكن ما بشبه الصيني ياخ اللغة الصينية كلها كركبة كشلنج وكانج وكلنج عليك ما اخير ناس تبروقة وزلط؟

اخونا الغالي ابو مرام

انت بس ابقى داخل وبتتعلم من الايام ما عندك مشكلة