الامثال الشعبية السودانية التي تضرب ومناسباتها

[عزيز عيسى]

التسوي كريت تلقى في جلدها..

هذا مثل شعبي سوداني صريح يضرب في كثير من الاحيان في حالة شخص يفعل شيء ويرتد مفعول ذلك الشيء عليه ولو بعد حين.. سألت احد الاشخاص العارفين عن المعنى والمناسبة في ضرب هذا المثل فقال:

كان احد الاشخاص يملك معزة.. وكانت لديه شجرة (القرض) وهي شجرة السدر التي تنبت على الطبيعة ويكثر انتشارها باقاليم مختلفة في السودان.. شجرة القرض هذه كانت مزروعة داخل حوش المنزل.. قامت المعزة بأكل كمية كبيرة من صفق شجرة القرض وتعبت من كثرة أكل الصفق وانتفخ بطنها الى أن قاربت على الموت.. وقبل ان تموت قام صاحبها بذبحها وسلخها ودبغ جلدها بالقرض لكي تصبح (فروة).. بالمعني المفهوم ان المعزة جلبت الشر لنفسها بنفسها.. فلذلك جرت العادة واصبح الناس يتناولون هذا المثل ويضربونه في مناسبات مختلفة على الاشخاص الذين يجلبون المتاعب على أنفسهم..

هنالك امثال شعبية آخرى مشابه تضرب تعادل في مضونها المثل التالي:

التسويه أيدك يغلب أجاويدك..


وأمثال أخرى مشابهه باللغة العربية الفصحى:

من حفر حفرة لأخية وقع فيها

السودان غني بالامثال الشعبية تقال باللغة السودانية الدارجية في مناسبات مختلفة.. ارجو من الاخوة والاخوات الكرام المشاركة في مدنا بأمثال شعبية اخرى.. ويا حبذا لو ذكرت المناسبة التي قيل فيها ذلك المثل مع الشرح لو امكن.. حتى تعم الفائدة..

ودمتم،

عزيز

[القناص فوزي]

أخـــــــــــــــــــــــــي :

azizeisa

والله نتمنى المزيد من هذه الأمثال

لأنها تعبر عن أصالة الشعب السوداني الكريم

فهي مرتبطة بالعادات الأصيلة للشعب الأصيل

وفكرة طرحها بالمنتدى فكرة جيدة تشكر عليها الشكر الجزيل

أخوك

القناص فوزي

[ابراهيم]

ربنا يديك العافية يا عمو عزيز ... وتشكر على البوست الجميل ودة نوع من الاصالة ..

"التسويه تلقى"
واظن معناه واضح ومعناه بتلقى برضو في الآية الكريمة " فمن يعمل مثقال ذرة خيراً يره ومن يعمل مثقال ذرة شراً يره "

"كان تجري جري الوحوش غير رزقك ما بتحوش"
يعني رزقك بجيك بجيك ومهما اجتهدت ما بتلقى غير المقسوم ليك


" القرد في عين امو غزال"
يعني مهما بقيت شين وقبيح وامك بتشوفك زي القمر وعسووولي والمعني المقصود انو الزول بشوف حاجتو سمحة ...

"تعيس الحظ يلاقي العضمة في الفشفاش "
ود بتقال للناس الحظهم سيء الناس الما محظوظين

[الدبلوماسي]

كاتب الرسالة الأصلية القناص فوزي
أخـــــــــــــــــــــــــي :

azizeisa

والله نتمنى المزيد من هذه الأمثال

لأنها تعبر عن أصالة الشعب السوداني الكريم

فهي مرتبطة بالعادات الأصيلة للشعب الأصيل

وفكرة طرحها بالمنتدى فكرة جيدة تشكر عليها الشكر الجزيل

أخوك

القناص فوزي

[نيازى كشك]

كويس واللة الواحد كان فى امثال كان ماعارف
معناها وكيس العرفنها

مشكور على هذة الباقة
العم الغالى عزيز

[عزيز عيسى]

الاخ القناص فوزي،

حياك الله وأبقاك،

أشكرك على المرور.. الفكرة هي في الاساس مجرد محاولة لتجميع اكبر عدد من الامثال الشعبية لكي نستفيد منها.. وبصفتك من ارض الحرمين الشريفين تلك الربوع الطاهرة أرجو أن تشاركنا بأمثال شعبية سعودية مقاربة للامثال الشعبية السودانية.. وأعطيك المثل التالى:
أهل مكة أدرى بشعابها

هذا المثل ذكرني بطرفة عن احد اخوانا السودانيين الذي عاد الى السودان بعد غربة طويلة.. عندما وصل الى مطار الخرطوم اخذ تاكسي وراح على ام درمان.. لما وصل التاكسي ام درمان بدأ صاحبنا يدور عن الشارع الذي يسكن فيه ولم يتمكن من معرفته.. لان الحكومة غيرت اسماء الشوارع القديمة المعروفة بأسماء الصحابة مثل - شارع معاوية بن ابي سفيان - والحارث بن زيد.. والزبير بن العوام.. وهلم جرا.. نزل اخونا من التاكسي وبدأ يصيح في الناس - يا أهل مكة دلونا على شارع ...

وتسلم،

عزيز

[عزيز عيسى]

برهوته يا غالي..

مالك عايز تكبر راسي.. والله شكرا ليك وكثر خيرك على مدنا بالامثال والشرح الوافي.. ويا ريت يا ابراهيم تزيدنا بأمثال لأني متأكد انك تحفظ العديد من الامثال الشعبية السودانية وما حتقصر.

وتسلم يا أبو الشباب.. وربنا يديك العافية،

عزيز

[عزيز عيسى]

الاخ الدبلوماسي،

شكرا أخي على المرور وسنحاول اضافة المزيد من امثالنا الشعبية.

وتسلم،

عزيز

[عزيز عيسى]

ا
الابن نيازي ابن الصديق العزيز حسن كشك

شكرا على المرور.. والله أنا برضو زيك في امثال شعبية كثيرة عايز اسمعها وأعرف معناها.

وتسلم،

عزيز
]

[aborawan]

عودا حميدا عمي عزيز والله افتقدناك

[عزيز عيسى]

هنالك أمثال شعبية أخرى يتناولها عامة الشعب السوداني وتقال في كثير من المناسبات لكن لم أجد لها علاقة واضحة أوتفسير و وجه شبه معين يربطها بمضمون المعنى.. واليكم المثال التالي:

اضان الحامل طرشه

طبعا هذا المثل يطلق على الاشخاص الذين يضربون بكلام الناس عرض الحائط أو بمعنى آخر (مصهين أم مطنش).. وسؤالي هل معنى ذلك ان المرأة عندما تحمل تصير اذنها طرشة.. وليه بس الحامل.. السؤال ده أنا عايز اخواتنا يجاوبن عليه وما يطنشن.

الخلاء ولا الرفيق الفسل

عايز واحد يفسر لينا المعنى وايه علاقة الخلاء بالفسل.

الجن بداوى.. الا الاندراوى

وأيضا:

الجن الكلكي.. اللابس ملكي

المثلين اعلاه بتركهم لأخونا الاستاذ أبوبكر حامد (ودالمأذون) يشرحهم.. سبق أن شرح الاول في احدى البوستات السابقة.. لكن عايزه يعيد لينا الشرح مرة اخرى ويقارن لينا بين المثلين.. ويوضح لينا ما هو الكلكي؟

درب السلامة للحول قريب

الحول هو العام أو السنة.. ومعنى المثل هو التمهل وعدم التسرع ولو المدة طالت سنة كاملة.

ويعادله:

في التأني السلامة.. وفي العجلة الندامة

والى اللقاء مع أمثال شعبية اخرى،

عزيز

[عزيز عيسى]

الاخ أبوروان الغالي،

شكرا على اهتمامك وسؤالك عني.. المشغوليات في العمل كانت السبب في اختفائي.. وها أنا أعود مرة اخرى الى أخواني واخواتي.. وأرجو من باقي الاخوان الذين اختفوا في ظروف غامضة ان يعودوا لمنتداهم الذي افتقدهم كثيرا.. وبنقول انشاء الله المانع خير.

وأنا برضو بسأل عن الاخوان أمثال:

عمك تنقو
ود المأذون
ادروب
مهيرة
Rasheed
الزمن المريح
فادي الماحي
أبو فادي
جمال الماحي
مزوني
فاقد حنان
JOVIAL
بوتشي
ودابكرش
اللمسة الساحرة
Myrelan
رهيب
زيكو منيب
نهر الفرات
مرافي الابداع
مازن سواح

وباقي الاخوة المختفين الذين لم تسعفني الذاكرة من ذكر اسمائهم،

وتسلموا،

عزيز

[عزيز عيسى]

كلام الطير في الباقير
ما عارف ايه هي علاقة الطير بالباقير.. حسب فهمي انه الباقير دي اسم منطقة بالقرب من الخرطوم واحتمال زمان كانت فيها بساتين وتكثر فيها الطيور.. على العموم المثل بيطلق في حالة انه شخص بيتكلم كلام ويجي واحد ما عاجبه الكلام ويعلق عليه..

جنى الوز عوام
يطلق هذا المثل في حالة قيام الابن بفعل شيء كان ابوه يفعله.. أي يفعل مثلما يفعل أبيه.

ضربني بكى.. سبقني واشتكى
مثل ظريف.. يطلق في حالة اطفال يلعبون.. يقوم احد الاطفال بضرب الطفل الاخر.. ثم يقوم الطفل الذي بدأ الضرب بالبكاء ويجري يشتكي لأمه قبل الطفل المضروب.. عجبي!

شر البلية ما يضحك
وهذا مثل واضح ممكن يطلق كرد على المثل اعلاه.

الجن البتعرفو احسن من الجن الما بتعرفو
هذا مثل واضح.. وهو من الافضل لك أن تحصر معرفتك بشيء تعرفه افضل من شيء آخر لا تعرفه.

البباري الجداد بيوديه الكوشة
مثل بليغ ويعتبر من اجمل الامثال الشعبية المضحكة.. وهو يضرب مثلا في حالة اشخاص يكونوا تايهين ويبحثوا عن محل معين.. ويقوم واحد من المجموعة ويدعي معرفته بالمكان.. يتابعه الجميع على اساس انه يعرف المكان.. لكن في الاخر يوصلهم لمكان آخر غير المكان المقصود..

المثل هذا يذكرني بأخ صديق في السودان كان دايما بيحب يقوله.. في كثير من الاحيان يصادف مجموعة من اولاد الحي.. يقوموا يقولوا ليه: وين يا أبو الشباب ما يلاك معانا.. يقوم يرد يقول ليهم البباري الجداد بيوديه الكوشة.. يخلي الجماعة كلهم يضحكوا.

والى اللقاء مع امثال شعبية أخرى،

عزيز

[ابراهيم]

بخيت شكروه قال داك شهر تانى
قالو واحد اسمو بخيت شاف هلال رمضان وسط جماعة من الناس فالجماعة شكروه قام قال ليهم داك تاني والمثل دة بضربو لما الناس يعملوها واضحة ويدّعوا معرف الحاجات اكتر من المعتاد

حواء تكوس لا أدم و أدم يكوس لا حواء
قالو ابو آدم وأمنا حوا لما نزلو من الجنة كانو مفترقين وبقو يفتشو لبعض فلما أمنا حواءشافت ابونا أدم قعدت تحت شجرة ومسحت رجلينها من الغبار لما وصلها ابونا أدم فرح لها وقال ليها انا مما نزلت بفتش ليك بتلهف وشوق وهي قالت ليه وأنا منذ نزلت الأرض في مكاني في مكان دة ما اتحركت منو وقامو بنات حواء ورثن عنها العادة دي فى كتمان الخب والتظاهر بالدلال علينا بكايات لكن بسيطروا علي نفسهن كويس

حساب ولا كوار
يعني الحساب بنظام في الوزن والكيل ويضرب المثل في حال اختلال الحسابات والموازين

اسمك خصمك يا علمك الدغاله يا علمك الهباله
يعني اذا اتوافق اسمك مع اسم زول تاني وكنتو الاتنين في مكان واحد وفي واحد تاني ناداك يا جابتو الاتنين ويكون المقصود واحد منكم التاني بتهبل ويا اما سكتو الاتنين والسكوت يعنى عدم مبالاة ودي معناها دغالة والله اعلم.

والشكر موصول لاعز عزيز

[عزيز عيسى]

ابراهيم الغالي،
عاجز عن شكرك ومشاركتك الفعالة يا أصيل.. يلا واصل معاي.. وعارفك ما بتقصر.

وتسلم يا أبو الشباب،


عريان سنة جنن الترزي في يوم
يطلق هذا المثل على الاشخاص اللى بتشوفهم دايما شفقانين وعايزين امورهم تؤدى لهم في وقتها دون مراعاة لظروف الاخرين.. زي اخونا ده عريان طول السنة وجاي يغلب الترزي بسبب تأخير يوم واحد.

يجي الخريف.. واللواري بتقيف
مثل يطلق في حالة انه شخص يكون في حوجة لشيء ما ويصادف ان هذا الشيء عند شخص اخر يعرفه.. يقوم الشخص الاخر يرفض اعطاؤه لها.. وبالتالي يقوم الشخص المحتاج بتذكير الشخص الاخر بأنه الايام ستدور وسيأتي يوم ويحتاج هو لشيء ما أيضا.

اثنين لو قالوا ليك راسك مافي ألمسه
وهذا مثل يقال في حالة انك تكون غير متأكد من شيء ما أو لم يكن واضحا لك.. فأذا اتفق شخصين على الصواب يجب عليك ان تصدقهم..

الناس في شنو والحسانية في شنو
هذا مثل يقال في حالة شخص يقول كلام مخالف لكلام الناس أو يتحدث بعيدا عن المضمون.. لكن ما عارف ايه علاقة الحسانية بالمثل.

من بره هلا هلا ومن جوه يفتح الله
مثل يقال على الاشكال والمظاهر التي تظهر امامنا بمظهر حسن ولكن من الداخل تختلف حقيقتها.


الما بتلحقه جدعه
اعتقد هذا المثل يقال في حالة انه شخص يتفوق عليك في شيء ما.. فما عليك الا ان تعمل ما في وسعك لكي تلحق به.


تاكل اكل السوسة.. والعافية مسدوسة
مثل يقال للناس الذين يأكلون كميات كبيرة من الطعام بشراهة.. ولكن يلاحظ عدم زيادة في وزنهم أو حجمهم فلذلك شبهوا بالسوسة.

عزيز

[أبوريلان]

الأخ عزيز العزيز علينا

سلالالالالامااااااااااااااااات

أشكرك كتير على سؤالك عنى وعن أعضاء المنتدى ، أنا موجود ولكن الشغل هو الشغل الشاغل وربنا يكون فى العون ، عجبنى شديد موضوعك ولكن الذاكره خربت بكثرة التفكير وسوف أديك ما تجود به الذاكره الآن ولنا عوده إنشاء الله .



علمناهم الشحده سبقونا على الأبواب
يطلق هذا المثل على الشخص الذى تعلمه شىء ويفلح فيه أكثر منك أو يقال الحمار الغلب سيدو .

الباب البجيب الريح سدو وإستريح
مثل يطلق في حالة تجيك مشاكل من أحد الأشخاص أو الجيران أو الأصدقاء .

الماعندو قديم ماعندو جديد
أو الماعندو كبير يشترى ليه كبير ، أكبر منك بساعة يعرف أكتر منك بسنة ويقال للتراث . يعنى الناس الكبار ، أو الشجر الكبار فيه الصمغ .

سماحة جمل الطين
يعنى سماحة وبتزول ، زى الطين يزول مع المطر أو الموية ، يعنى سماحة سريعة الزوال .

حلم الجعان عيش
مثل يقال للشخص لما يتمنى شىء بعيد المنال .


مد رجلك قدر لحافك
يقال للشخص المتطاول أو الشخص الماعندو وداير كل شىء يحصل عليه .


الزارعه الله فى الحجر بتقوم
كل شىء ممكن يحدث ولو ربنا كتبه والمكتوب فى الجبين بتشوفه العين .


ما كل مايلمع ذهب
تحرى من كل شىء قبل أن تقبل عليه .






[/QUOTE]

[عزيز عيسى]

الاخ أبو ريلان،

أنا واحد من الاشخاص المتابع لمواضيعك الشيقة والهادفة.. وقد افتقدت لفترة تعليقاتك القيمة على المواضيع.. وبشكرك كثير على المشاركة واثراء البوست باضافتكم للامثال القيمة.. ويا ريت الذاكرة تساعدكم لتزويدنا بما تجود به الذكرة لتعم الفائدة المرجوة.

مع فائق الود والتقدير،

عزيز

[عزيز عيسى]

الخيل تركض والشكر لى حماد
هو ان يفعل شخص ما شيء يستحق الشكر عليه لكن الشكر يذهب الى أشخاص آخرين.. أو في حالة فوز الجوكي والحصان في سباق الخيول.. وبدلا من ان يقوم الناس بتهنئة الجوكي والحصان لكن تذهب التهاني والتشكرات للشخص الذي يملك الجواد الفائز.

اعمل الخير وارميه البحر
المثل هذا ينطبق على الاشخاص الذين يفعلون الخير في سبيل الله ولا ينتظرون المكافأة.

خيرا تعمل شرا تلقى
وهذا المثل ينطبق على الاشخاص الذين يقدمون الخير لأشخاص لايستحقونه وكل ما يلاقوه منهم الا الشر.

الحسنة في المنعول (الملعون) زي الشراء في القندول
هذا المثل يعادل في مضمونه المثل اعلاه.

عمر الشقي بقي
يدل هذا المثل على استمرارية الشقاوة طول عمر الشخص الشقي.

التعيس تكته بتعتر ليه
نفس مضمون المثل اعلاه.

الشهر الما عندك فيه نفقه ما تعد ايامه
المقصود بهذا المثل انه اي موضوع لايعود عليك بالفائدة يجب عليك تجاهله أو التخلي عنه.

حلم الجعان عيش
يطلق على الاشخاص الذين يتوقعون دائما بأن الامور التي يتخيلونها في ذهنهم ستكون على ميرام.

الغريق بتشبث بقشة
يطلق على الاشخاص الذين يقعون في ورطة أو مأزق ويحاولون الخروج من هذه الورطة أو المأزق بأي شكل كان مهما كانت التكلفة.


عزيز

[أبوريلان]

الأخ عزيز العزيز

سلالالالالامااااااااااااااااات

تسلم يا غالى على الرد الظريف .


الجاتك فى مالك سامحتك
يطلق هذا المثل على الشخص فى حال يفقد ماله أو يسرق منزله أو ماشابه
عينك فى الفيل وتطعن فى ضلو
يطلق المثل على الشخص لما يوجه الإتهام لشخص آخر والمقصود موجود معهم .

سمح القول فى خشم سيدو
يطلق المثل فى حال تطلب من الشخص صاحب الموضوع أن يحكى الموضوع بلسانه .


ولنا عوده إنشاء الله . ولك كل الشكر والتقدير لإتاحة هذا الموضوع الظريف.

[عزيز عيسى]

الاخ ابو ريلان،

والله ما قصرت وكثر خيرك.. وبشكرك كثير على تجاوبك معي.

مع خالص التحايا والتقدير،

عزيز

[عزيز عيسى]

الايد الواحدة ما بتصفق
بجي الخريف واللواري بتقيف
الزول القصير اما حكمة واما فتنة
قائدين في سفينة بيقرقوها
طوله طول النخلة وعقله عقل السخلة
الكديس لما ما يلحق اللحمة بيقول عفن
القدم ليه رافع
عين الحسود فيها عود
لسانك حصانك ان صنته صانك وان خنته خانك
البطن بطرانه
الفار لعب في عبو
المفلس بيراجع في دفاترو القديمة
الكلب بريد خنقو
المشتهي الحنيطير يطير
العارف عزو مستريح
ضرب الحبيب الز من الزبيب
العميان شايل المكسر
البحر بشيل عوامه
صغير القوم خادمهم
الصديق عند الضيق
سيد الحق راضي شن دخل القاضي
الطمع ودر ما جمع
العثرة بتصلح المشي
مرمي الله ما بترفع
ادي الخبز لخبازه
حليمة رجعت لعادتها القديمة
رزق الهبل على المجانين
البقرة لو طاحت تكثر سكاكينها
طيره في الكف احسن من عشرة على الشجرة
جاء يكحلها عماها
الجمل شكرو برك
حبيبك لو عسل ما تلحسوا كله
الضحك بدون سبب قلة أدب
تطلع من بيتك تلقى الفرح وين
الضرب على الميت حرام
الغلب كتال
النملة شايلة القملة
جدادة الخلاء طردت جدادة البيت
الحيران بفتش خشم البقرة
الحشاش يملأ شبكته
خادم الفكي مجبورة على الصلاة
جنى الفار حفار
ابن الوز عوام
ابعد عن الشر وغنيله
الخواف ربى عياله
عين الحسود فيها عود
الايدو في الموية ما زي الايدو في النار
الفار لما يشبع بخرب العيش
الجبنة لما تفور بدفق
القزازة لما تنكسر ما بتتصلح
شوكة حوت لا بتنبلع ولا بتفوت
العجلة من الشيطان
القربة المقدودة بتخر المية
البيتو من قزاز ما برمي الناس بالحجار
اتلم التعيس على خايب الرجاء
ايد لي ايد تجدع بعيد
ديار الغربة ما بترحم

وهذه بعض الامثال بالفصحى يستعملها العديد من أهلنا السودانيين.

لاحياة لمن تنادي
تبيت الاسود جوعا ولحم الضأن تأكله الكلاب
لاتصطاد في الماء العكر
معظم النار من مستصغر الشرر
اذا عرف السبب بطل العجب


نظر لعدم تجاوب بقية الاخوان في مدنا بالامثال.. لذا رأيت أن أكتفي بهذا القدر.. وفي نفس الوقت بتقدم بالشكر الجزيل للاخوان القناص فوزي، أبوروان، نيازي كشك والدبلوماسي والاخوان ابراهيم و أبو ريلان على تجاوبهم وتفاعلهم في تزيين البوست بمشاركتهم الفعالة.

مع فائق الود والتقدير،

عزيز

[أبوريلان]

الأخ عزيز

سلالالالالالاماااااااااااااااات

أشكرك على هذه الأمثال الرائعة ، لكن ياريت لو تواصل فى مدنا بالأمثال وإنشاء الله الشباب يتفاعلو معك بس ما تيأس من التواصل ولك تحياتى .

[مصباحيه]

اليكم مجموعه من الامثال المتداوله فى البئه السودانيه اليوميه


1- الجايات اكتر من الرايحات
2- الخيل تجقلب والشكر لحماد
3- تجرى جرى الوحوش غير رزقك ما بتحوش
4- قدم السبت تلقلى الاحد
5- الحسنه فى المنعول زى الشره فى القندول
6- ملوخيه بى قرشين ولا جميلة الخولى
7- البيلد بيدفن والبسعى بضبح

[أبوريلان]

سلالالالالام عزيز

تأباها مملحه تأكلها ناشفة
ضربنى وبكى وسبقنى وإشتكى
مافى عود بقول طق بلا شق
كراع البقر جيابه
الايدو فى المويه مازى الايدو فى النار
الجمره بتحرق الواطيها
كراع البقر جيابه
سيد الرايحه فتح خشم البقره
جراده فى كف ولا الف طايره
الحارى ولا المتعشى
البقول راسو موجعو مابربطولو كراعو
مساك دربين ضهاب وركاب سرجين وقاع
ضل الدوم البضل بعيد

سلام