ظاهرة التقليد وعدم الإبتكار

[خالد هاشم علي]

أحبتي ...
من اللافت للنظر ظاهرة التقليد الأعمي في كل المناحي الحياتية وخصوصاً تلك التي تتعلق بالمناحي الحياتية.
فعلي مستوي الأفراد وحينما يفكر الشخص في مشروع ما ويبدأ في تنفيذه ويبدأ في جني ثماره يفاجأ بأن الجميع قلده ونفذ الفكرة بحذافيرها مما يضر به وبهم أيضا.
وسأضرب عدة أمثال علي ذلك حتي يتسني لنا دراسة هذة الظاهرة.

ظهرت في بداية التسعينات فكرة محلات تركيب العطور وكانت فكرة جيدة ومفيدة للمنتج وللمستهلك... لكن تعال شوف ... في ظرف كم شهر محلات تركيب العطور ملت مدني فل.

بعد كده ظهرت فكرة محلات مقدر الظروف... وبرضه كانت فكرة حلوة ونفعت الناس كتير وخصوصا الجنس الناعم وكانت مربحة لأصحاب المحلات أيضاَ... لكن برضه بقي في كل شارع تلقي مقدر ظروف...

بعد داك جات علينا ثورة الإتصالات وبدأت مراكز الإتصال في ممارسة أعمالها... وعينك ماتشوف إلا النور ... في كل بنك تلقي الناس مقدمة علي سلفيات عشان تعمل مركز إتصال... وبرضو مدني إتملت فل بي محلات الإتصالات وبين كل مركز إتصالات ومركز إتصالات برضو تلقي مركز إتصالات...

أها بعد كده ظهرت الركشات وماأدراك مالركشات... ياخي بقت ماتديك الدرب يعني كل فريق في مدني بل كل شارع تلقي فيهو كم ركشة وبدل ماكان بدخل جيب صاحب الركشة 50 ألف في البدايات بقي بدخل ليهو أقل من 20 ألف.

يلا نجي للأتوس... ياأخوانا الأتوس قربت تبقي أكتر من الناس في الشارع...


سؤال للنقاش....
ليه التقليد وعدم الإبتكار .؟؟؟؟؟
هل لدينا عقم في الأفكار ؟؟؟؟
أم نخشي المخاطرة بالدخول في المشاريع الجديدة ؟؟؟
وهل فكرنا بأننا عندما نقلد مشروع بعينه إنما نقلل من ربحيات هذا المشروع ؟؟؟؟ حيث يكثر العرض ويقل الطلب.


ولي عودة إذا أمد الله في الآجال

[خالد هاشم علي]

عودة مرة تانية...

وأنا في كنانة فكر أحد جيراننا في مشروع تربية دواجن... وبالفعل نفذها وبدأ في بيع البيض وبقي ماشاء الله يربح تمام التمام...

بس تعالوا شوفوا كل واحدة من نسوان الفريق قعدت تنقنق في راجلها شوف ناس فلان وفلانه عندهم مشروع تمام وليه نحن مانسوي زيهم ؟؟؟؟

وإتملأ الفريق بالدجاج والبيض لدرجة إنه بقي مافي واحد داير يشتري ولا حتي باأبخس الأثمان.

الدجاج بار والبيض بار وبقت خسارة عامة للكل وحتي لصاحب فكرة المشروع الأول.

[ضياء الدين احمد]

ههههههههههه والله كلامك في محلو يا ابو هاشم واتذكر برضو انو فتح محل بتاع مديده دخن جنب استوديو الساعه وبعدها انتشرت محلات المديده واذكر ان احدي المحلات اطلق عليها اسم مدد يا رسول الله
عشان كده ياود هاشم تعال نشترك ونعمل لينا مصنع كبير بتاع طيارات وشوف في راجل بقدر احاكينا

[أبوريلان]

والله يا ضياء الدين فكرة حلوة وبالمناسبة الآن أنا وأخى أبو روان بنعمل فى دراسة للموضوع عشان ننفذه طبعا بعدكم مباشرة عشان ما نقع فى الأخطاء بتاعتكم . هههههههههههههههههههههههه

[aborawan]

العزيز خالد
مصيبة السودانين الواحد ما بحاول يجتهد او يفكر في ابتكار منافذ جديدة للدخل المربح الواحد ما يشوف صاحبو او قريبو عامل حاجة مربحة الا يقول اعمل زيو

اكتر شئ انا بعيبو على السودانين انهم ما بحسبوها صح يعني الواحد ما بفكر في مشروع وما عندو حاجة اسما دراسة جدوى او دراسة سوق الخ الخ الخ كل البهمو يعمل زي ما فلان عامل والشئ البزعل انو العاملو فلان ما بكون ليه اى علاقة بتخصص صاحبنا ده يعني بكون اطرش في الزفة والكلام ده انا بقولو من تجربه لاحد من اصدقائنا الذي امتهن مهنة الصيدلة وعمل في دول الخليج المهم خلاص لما حسا بي نفسوا عندو قريشات قال خلاص الغربة كفاي عليكم الله يا ناس هسه لو زول بفكر وعندو مخ مش كان مفروض يمشي يستثمر حقوقو في استثمار ليه علاقة بي مجالو عشان يقدر يفهم فيه ويقدر ينمى راس المال اها انقروا الكاشف ده مشا عمل شنو





اشترى ليه 3 حافلات 30 راكب ما عدا ليه 4 سنه الا ويلقى ليك نفسو على الحديدة مافي ولا حديدة حتى الحديدة الصغيرة الكان راكبا باعها اها ليه ده كلو مش من عدم التفكير السليم ( شوف بالله شوف علاقة الصيدلة بالمكنكة وعالم الحديد شنو )
هسه لو حقوقو دي اشتري بيها كافلجين واندروس ساااي مش كانو زادو مرتين

انتا عارف يا خالد هسه انا عندي فكرة بت لذينا حا افتها ليكم هنا في المنتدى علني وهي طبعا اننا باسم منتديات ودمدني نعمل لينا مكتب لابتكار المشاريع المربحة ونخلي لينا كم دراسة جدوى لكذا مشروع ونقع ليك في المغتربين ديل هاك يا بيع

فكر في الموضوع لانو الفكرة دي وراها عائد مادي كبير جدا :):)

[خالد هاشم علي]

الغالي ضياء .... العريس
والله الشيلة شالتك مننا مرة واحدة...

لكن ياحبيب برضو الجماعة حيعملوا زينا حتي لو يبيعوا هدومهم ويشيلوا سلفية ويكتبوا ليهم كم شيك طاير كده لزوم الدين بي عين قوية...

[خالد هاشم علي]

الغالي ياسر...
والله ياريت الناس تتعلم من أخطاء غيرها ... ماكان حصل زي كده..


كلام بيني وبينك....

أوعك تشارك أبوروان... والله صاحبك ده ياكل حق النبي...
ده تاجر ولد تجار وفداسي كلها تجارة... يعني يوديك البحر ويرجعك عطشان....


كلمة أخيرة

وين رسايلك وين كتاباتك إليا

[خالد هاشم علي]

الغالي أبوروان...
وينك يالحبيب...
والله كلامك مليون المية ... ومعظم السودانيين مابحسبوها صاح...
وتلقي صاحبك ده بعد ماإشتري الحافلات كتب عليها ( حصــــــــــــــــــــــــــاد الغربة ) مش كده...يعني تقليد في كل حاجة وبالمناسبة شارع مدني الخرطوم كلو مليان حافلات مكتوب عليها حصاد الغربة... أكيد أخونا الصيدلي ده حيكون عنده فيهم كم واحدة...


بخصوص المشروع بتاعك فأنا جاهز ورهن الإشارة وحنلقي في المنتدي فطاحلة في المجال ده.. بس المشكلة بعد مانبيع المشاريع ونقبض القروش ... القسمة كيف ؟؟؟؟ لأنك مامضمون... ولا شنو ياأبوريلان

[aborawan]

انا عن نفسي ما عايز منكم ولا شئ يكفيني ابتسامة مرسمومة على شفاهكم ودمتم ولا عدمناكم

[فادي الماحي]

كاتب الرسالة الأصلية خالد هاشم علي
عودة مرة تانية...

وأنا في كنانة فكر أحد جيراننا في مشروع تربية دواجن... وبالفعل نفذها وبدأ في بيع البيض وبقي ماشاء الله يربح تمام التمام...

بس تعالوا شوفوا كل واحدة من نسوان الفريق قعدت تنقنق في راجلها شوف ناس فلان وفلانه عندهم مشروع تمام وليه نحن مانسوي زيهم ؟؟؟؟

وإتملأ الفريق بالدجاج والبيض لدرجة إنه بقي مافي واحد داير يشتري ولا حتي باأبخس الأثمان.

الدجاج بار والبيض بار وبقت خسارة عامة للكل وحتي لصاحب فكرة المشروع الأول.
بالمناسبه دي انا عندي اختي بتتخرج من كليه الانتاج الحيواني السنه الجايه
ومفكرين نعمل ليها دواجن ؟؟؟؟
ولك التحيه اخ خالد

[ابراهيم]

فعلاً يا ابو الخلود الظاهرة دي منتشرة والتقليد دا في عالمنا بقى حاجة اساسية يعني لو مثلت مجنون بكرة تلقى السودان كلو جن ..

مرة عملت لي دش براي جبت الغطا بتاع المروحة وعملت ليه مكثف وربطت فيه اريل وحبة خزعبلات ووصلت مع التلفزيون واقرب دش في الوقت داك كان في حي الزمالك ونحن في جزيرة الفيل والعملية نجحت .. انت قايل بعد اسبوع ناس الفريق كلهم ما ربطو مراوحم فوق هههههههههه

التقليد دا كسل وعدم اجتهاد .... لو ملاحظين حتى في الغناء الناس بتقلد وبمهارة وتواصل في التقليد ودي مشكلة كبيرة .. بتذكر مرة في حفلة كان بغنى فيها واحد كدا بيقلد الكابلى .. في نفس اللحظة الكابلي جا ماري وسمع الصوت وقف عربيتو نادى واحد قالو ليهو عليك الله نادي لي الراجل البغني دا .. صاحبنا جاه الكابلي قال ليه والله انت صوتك جميل وبتعرف تغني تمام لكن حاول بقدر الامكان انك تعمل ليك شخصية وفعلاً كلامو في محلو ... والتقليد ذاتو خشوم بيوت يا جماعة حسي في واحد بيقلد فرفور زي دا يقولو عليه شنو ..

التقليد كتييييير تقليد في الاساليب وتقليد في الغنا وتقليد الكتابة وتقليد في اللبس وتقليد في الكلام وكلو ما جايب حقو ...


مشكور يا خالد على الموضوع

ولكم تحياتي