المساعد الشخصي الرقمي

مشاهدة النسخة كاملة : إسلام الخواجه


Jamal Elmahi
12-05-2005, 11:33 AM
إسلام الخواجه


عمل الخواجه وتنقل في معطم مدن السودان....
عشق حياة الشماشه والعنقاله والجربنديه واجادها باتقان...
سف التمباك وسعي حقةً ذات ابعاد ثلاثه يشار اليها بالبنان....
وتفنن في اختيار العماري الجيد واصبح في ذلك شيطان...
حتي صدئت اسنانه واصبح لونها نحاسياً غامق الالوان...
ذهب ذات يوم للانادي محل المرايس مع شلة من الاخوان...
ابتهجت ست المريسه وجاءت بالكرسي للخواجه عظيم الشان...
رفض الخواجه الكرسي وقال معاذ الله جيبي لي بنبر في هذا المكان...
فقالت ست المريسه خلاص سوو للخواجه الشية ويا حبذا شية لسان..
فرد الخواجه بل ساكل المراره وام فتفت والكمونيه التي يعجز عن وصفها البيان...
فتعجبت ست المريسه وطلبت ويسكي للخواجه بدل المريسه حتي لا يطرش ويلم الضبان...
فنهرها الخواجه جيبي عبارين مريسه ونزلي الرايه واطربنا يا فنان.....
فزغرتت ست المريسه..ايووووووي جد لينا لقد اسلم الخواجه فاشهد يا زمان....


جمال الماحي
ابراهيم
12-05-2005, 12:14 PM
والله يا جميمي كديستك غير كديسة الخواجة

بالغت وشذيت مع الخواجة في هذه النونية مع الخواجة

قصيدتك فلتة والخواجة فلتة


رفض الخواجه الكرسي وقال معاذ الله جيبي لي بنبر في هذا المكان...
فقالت ست المريسه خلاص سوو للخواجه الشية ويا حبذا شية لسان..
فرد الخواجه بل ساكل المراره وام فتفت والكمونيه التي يعجز عن وصفها البيان...

الابيات دي مفروض تصنف ضمن أجمل ابيات شعر في بوست اخونا ياسر

احييك اخوي جمال على الابداع الحلمنتيشي وشوقتنا للباقى المدسوس

لك التحية ولك المودة التقدير مسبقاً
ابو المهتــدي
12-05-2005, 01:08 PM
بسم الله الرحمن الرحيم
الله يعطيك العافية شنو ياجمال الخواجة ده لابس ليهو عراقي دموريه عنده كركاسة في طهرو ولا شنو 00000000
فادي الماحي
12-05-2005, 01:50 PM
سلام أخونا جمال :
يا خوي أنت جمال الماحي حق الجنيد ولا جمالاً تاني
انت والله فنان عديل
وبالمناسبه
قبل شويه كنت مع محمد صديق الطيب ويهديك تحياتو
وتحياتي للجميع
Jamal Elmahi
12-05-2005, 02:59 PM
الاخ ابراهيم


اخو الاخوان عظيم الشان ابراهومه....
ستجمعنا الايام حتماً ما بين مدني والمايقومه...
وفي شجرة منتدانا سنعمل ليك اكبر عزومه...
ننحر الابل ولزوم المذه عنبلوك ابو جاكومه...
ونشغل اغاني هابطه كيتاً للحكومه....
فالهابط من الاغاني من تراثنا منظومه...
وقد يعتبرها البعض بدون قيمة او كينونه...
و ما علينا ان نقنع الديك بل ندخله في كرتونه....


جمال الماحي
Jamal Elmahi
12-05-2005, 03:41 PM
الاخ ابو المهتدي


ابو المهتدي ستكون لشجرة منتدانا منارةً بها نهتدي....
فيتقاطر مريدينا من القضارف ..كوستي ..جوبا..تندلتي..مروي و اربجي....
تكسو شجرتنا البساطه والظرافه والشفافيه مع الحديث الشجي....
بعيدا عن السياسه والحراسه وحظر التجول الابدي....


جمال الماحي
Jamal Elmahi
12-05-2005, 04:00 PM
اخي فادي


اخي فادي الجنيد بعدكم خلا من البحر حتي الجميعابي....
وإذا رخيت اضانك ستسمع بت يوسف الحنينه ليك تنادي...
يا فادي يا فادي خلي الريالات والغربه وتعال بي قادي...


جمال الماحي
ابو المهتــدي
13-05-2005, 10:19 AM
بسم الله الرحمن الرحيم
اخي الحبيب 0 في تلك الشجرة 0واجد نفس متربعا متحكرا باسطا يدي خلف ظهري مغبرا اصابعي بذاك التراب 0 بعد ان نبشتة اظافري 0 سارحا ببصري 0 رافع الهامة 0 في رحيل لتلك الربوع بزكريات 0
فيا لدوك الذي دفقني من غياب ظلمة جب الغربة بعد تلك السنين الي تلك
الرياحين التي مازالت احلام الرجوع لها قائم 0
عزيز عيسى
13-05-2005, 11:03 AM
الخواجه راسه مقطوع مبهدل وواحد صايع
مشى السودان ارتكب ذنب وعمل افظع الفظائع
شربوه المريسه العيشا طازه من الصوامع
خلوه يمشي يضيع ويتسكع من شارع لشارع
ماقادر يمشى عديل يترتع ويترتح قايم وواقع
في نظره السودان جنه وكل شيء فيه رائع
خلاص اتلحس ولي بلده ما اظنه تاني راجع

ابشر بالخير،

عزيز الشاعر
بابكر
13-05-2005, 11:45 AM
الابيات دي مفروض تصنف ضمن أجمل ابيات شعر في بوست اخونا ياسر

احييك اخوي جمال على الابداع الحلمنتيشي وشوقتنا للباقى المدسوس

لك التحية ولك المودة التقدير مسبقاً
Jamal Elmahi
13-05-2005, 12:06 PM
الاستاذ عزيز الشاعر....
ويحك كيف تجرح للخواجه المشاعر...
لقد انقلب وجهه كالفشفاش وما زال للفم فاقر...
ولزوم التهدئه بخروه بي بخرات الشيخ الباقر...
وبرضو حالف طلاق الاقيك في فرقه يسكنك المقابر...
فصلح علاقتك معاو بهديه دستة بنابر...


جمال الماحي
فادي الماحي
13-05-2005, 12:32 PM
اخونا جمال لك التحيه ذي ماقالو الجماعه بالغت عديل دي حالتك لا ضكتها ولا جالستها . دي شميته من النعمه بت التايه ولا شنو
عاوزين واحده من انتاج حكم ويكون راس القايده علي الامين ودريسه والفنان احمد عبد الله


تحياتي لجميع من معك


ابوفادي
امينو
13-05-2005, 01:36 PM
والله يا اخ جمال منتهى الابداع ومستنين الجديد منك
Jamal Elmahi
18-05-2005, 04:46 PM
Dear Amino

Thanks a lot for your comments...my arabic program is messed up
catch u later in arabic....take care

Jamal Elmahi
نهر الفرات
19-05-2005, 02:07 AM
تسلم على الموضوع الجميييييييييل
والله يهدي شباب الامه

نهر الفرات