المساعد الشخصي الرقمي

مشاهدة النسخة كاملة : [b]دعاش و الحلمنتيش[/b]


Jamal Elmahi
06-05-2005, 04:11 PM
اعجبني اقتراح الاخت دعاش لشجرة المنتدي .....البنابر مرصوصه مع شوية عناقريب هبابه لزوم الاتكاء .....تقاطر الشباب من كل فج عميق....ولسان حالهم يقول وامدنياه...وانشيشيبتاه...واحصاحيصتاه...وارفاعتاه.. ..واجنيداه....دور شاي دعاش الماخمج....الشاي التقيل الفرطق الكبايه.....شئ بالنعناع وشئ بالقرنبهان قرنفل + هبهان....ضربني الهمبريب,,,شيطان الحلمنتيش تلب جواي ...دايرلو شيتا من غناي...قلت اقح لدعاش مسدار مسدارين....القحه و لا صمة الخشم,,,,
دعاش يا همبريب المحنه الجانا راش..
دعاش يا الشجره الظليله الشاربه من القاش......
دعاش يا ست البنات ليكي الاصاله فراش....
بعد شتاتنا لميتينا في ضلا خضار ما غباش.....
دعاش من شاهيك المنعنع راسنا داش.....
وشارع النيل الطويل بقينا نشوفو طشاش...
ولي ستات الشاي في مدني ضربنا طناش.....
وكباية شاي بيمينك بتعمل ارتعاش.....
وتقلصات في القصبه الهواءيه وللقلب انكماش....
وخمة نفس وشحتفة روح و شوية التباش..
دعاش شاهيك هضرب بي خلاص انا ماش...
جمال الماحي
ابراهيم
06-05-2005, 05:08 PM
يا سلام عليك يا جمال...

وهذه الإطلالة الجميلة

جيت ماشي جنب الحيطة والنصيحة ريحتة قرنفلكم وهبهانكم تجيب الضهبان قلت اجي اشرب لي معاكم كباية شاي واستريح شوية في عنقريبكم واستنشق همبريبكم باقى انا تعبان شديد ...

لكن شيطانك يا جمال غير كل الشياطني
دي كباية شاي واحدة جابت شيطان قدر دة
يبدو انو الحتة حتبقى سمحة جنس سماحة
وانا من حسي حجزت بنبري معاكم
اها قولك شنو يا دعاش

دفقي الشاي بالقرنفل
كبي حبة هبهان

باقى ود الماحي متقريف
ومعاه ابراهيم كمان


:D :D
تسلم يا جيمي
امير عبدالباقي
06-05-2005, 07:31 PM
الاخ جمال الماحي
قصيدتك جمياه وكنت ناشدت الاعضاء بالاسراع الي كبايه الشاي من يد دعاش واتمني من الاعضاء الجلوس تحت الشجره الضليله
ودأبكرش
07-05-2005, 03:12 AM
قصيده جميله الاخ جمال
لكن دعاش محدد بها شخص معين
لان القصيده من داخل اعماقك
مزوني
07-05-2005, 04:44 AM
يديك العوافي يا جيمي
وتسلم على الموضوع يا عسللي
ابو المهتــدي
07-05-2005, 11:02 AM
بسم الله الرحمن الرحيم
الحبيب جمال لك التحية والود 0 طلتك علينا تفرح بعد تلك ذاك الترحال عناء
نتمني ان تكون طلتك جمع انس نشتم فيها تلك النسمات الدعاشية من خلال
ظل الديار بين اشجار ة التي تحمل مودة الجمع بفناجين القوة وكبابي الشاي 0 بكل تلك النكهات 0 مرحب حبابك الف 0 نالف ان اتكون بين جمعنا
Jamal Elmahi
07-05-2005, 01:50 PM
الاخوه الحبايب ,,,,,,
ابراهيم
مزوني
امير
ود ابكرش
ابو امهتدي.....يا حيا الله الربع....والله مشتاقين...
ود ابكرس حنفرش ليك برش وفيهو ماك نندرش تحت شجرتنا....
دعاش حبيبي رمز الاصاله...اخت اخوان...مرت ضيفان...ويكفيها شرف انها لمتنا.....

جمال
مرافئ الابداع
07-05-2005, 01:56 PM
والله ياخوي جمال كباية شاييك تزبط الراس والعجب حلمنتيشك
يالله منتظرين كباية القهوه
ماتتاخر بيها علينا
وتسلم
مــ سواح ــازن
08-05-2005, 05:55 AM
فكره جميله منك يا جمال
وجد كلمات رائعه
من تراث بلدنا
وطلع ما عندك من ابداعات عشان نستفيد منك والا شنو
ويديك العافيه
الزبير محمد عبدالفضيل
08-05-2005, 11:26 PM
صراحه كلام جميل وكمان دعاااااااااااااااااااااااااااااش المطر اجمل انت رسمت لوحه جميله جدا جدا جدا عن تراث البلد



تحت شجره وبنابر وعناقريب وهمبريك يعني لوحه طبيعيه 100%


يديك العافيه ةالي الامام وفي انتظار جديدك حبيبيبي



سبحان الله العظيم وبحمده
Jamal Elmahi
09-05-2005, 11:43 AM
يا مرافي الابداع......
شجرتنا بدونك بنبر بلا كراع...
و لشاهينا انتي القرنفل و النعناع...
ووجودك بيننا حدث في البي بي سي يذاع...

جمال الماحي
Jamal Elmahi
09-05-2005, 11:56 AM
سواح يا مازن...مازن يا سواح......

مازن ننصبك لاموال شجرتنا خازن...
و ان تظبط الميزانيه و تخلق فيها التوازن...
لاتدفع ضرائب لللانقاذ بل تكون مهم حازم....

جمال الماحي
Jamal Elmahi
09-05-2005, 12:06 PM
السفير.....
نتوجك لشجرتنا في الامم المتحده سفير....
و سنقيل كوفي عنان او نجعله غفير....
و اول مهامك ان تضيف لشجرتنا برميلين و زير...
و ان تشكر الوالي بان جمع لنظافة شجرتنا نفير...

جمال الماحي
فادي الماحي
10-05-2005, 11:12 AM
الاخ العزيز ( جمال الماحي ) حتي يتطابق الاسم رمز لخوة الرحم والدم والوطن والدين
سلام من الله عليك
ومرحب بيك بيناتنا في أرض السودان التي بعدنا عنه ونحن لا ندري لم بعدنا وها هو يجمعنا السودان وايضا من البعد .
لك التحيه لمشاركتك الجميله
والله انا لو ما عارفك وين كان قلت الكاتب قاعد في عنقريب هباب وفي (ودغلوقة) كمان ...... ( عشان ما يفهموا حاجه )
ونحن في انتظار ابداعاتك
ولنا لقاء انشاءالله
Jamal Elmahi
10-05-2005, 12:27 PM
الاخ العزيز فادي الماحي..

اردت من قبل الاشاده بمواضيعك الهادفه...لكن فعلاً القلم ليهو رافع....اضافة الي إني مستجد في الطباعه بالعربي(كلمه كل خمسه دقائق) وما اصعبها عندما يكون الكي بورد انجليزي اقعد افتش لما يعادل الحروف العربيه ولسان حالي يقول....
ان الحروف العربيه كدقيق فوق شوك نثروه...
ثم قالوا لحفاة يوم ريح اجمعوه...
صعب الامر عليهم فقيل اتركوه....
لكن اخوك مازال يكابس لزوم المشاركه...ولكن ببط السلحفاة....
تحياتي لكل الاهل بتبوك....

جمال الماحي
ابراهيم
02-05-2006, 11:27 PM
وين الحلوين وين راحو
منتدانا يضوو صباحو
Jamal Elmahi
03-05-2006, 11:03 AM
وين الحلوين وين راحو
منتدانا يضوو صباحو

العزيز أبراهومه...دي هسع قلّعتها من وين...كان الواحد بيلملم الحاجات دي كان هسع عمل ليهو ديوان وأن بطلت أوضه انشاء الله جالوص....
وياحليل دعاش ياأبراهيم ...وكر علينا الما أترناها...حال الدنيا أأأبوي...


ود الماحي
ALPRENS
03-05-2006, 07:50 PM
يديك ألف عافيه
وماقصرت اخوي جمال
Jamal Elmahi
04-05-2006, 10:46 AM
يديك ألف عافيه
وماقصرت اخوي جمال

حباب البرنس...حباب الفنجري...أبقي داخل أأأبوي ...أشرب لك كباية كركدي...

ود الماحي
سواااح
30-03-2007, 07:09 AM
بس يا جمال ..

كبايتك وخلصت ...

لكن ما وريتنا انت ماشي وين ؟؟

دمــــــــــــــــــت ،،