هل تساعد زوجتك في اعمال المطبخ؟!

[عزيز عيسى]

هل تساعد زوجتك في اعمال المطبخ

في مثل قديم يقال للمرأة - أقرب الوصول الى قلب الرجل بطنه - وهو مثل جميل له معنى ذو شجون تستطيع به المرأة ان تكسب به قلب زوجها كما أن له ايضا اهمية في تقوية اواصر الحب والعلاقة الزوجية بين الرجل وزوجته..خاصة ان الرجال لديهم الشهوة على الطعام اكثر من النساء.. ولا أدري هل اخواننا في السودان يعطون مثل هذا المثل اهمية أم لا.. لأنه الرجل وخاصة الرجل السوداني دائما بيحب انه عندما يرجع البيت من العمل ان يجد زوجته مجهزه له وجبه شهية من الطعام وبعدها كباية شاي لزوم الترطيب وبعد ذلك يمدد ارجله على السرير ليأخذ قسطا من الراحة ونومة خفيفة (نومة العصرية).. وليس له دعوى بالمطبخ او كيف تم اعداد الوجبة الشهية له.. وهنالك نوعية من الرجال نادرا ما يظهرون اعجابهم على الطبخة التي تعدها وتقدمها لهم زوجاتهم..
كما أن هنالك العديد من الرجال لايدخلون الى المطبخ بتاتا لمساعدة زوجاتهم ولو لمره واحده في اعمال الطبيخ أو حتى ابسط شيء غسيل الاواني أو اعداد الشاي.. وهنالك بعضا من الرجال من يقول لك ليس لدى أي فكرة عن اعمال المطبخ ولا احب الدخول للمطبخ لانني لست ملما بأعمال الطبيخ.. والاخر يقول بأنه يكره الطبيخ وهلم جرا
فترة العزوبية التي عشتها في السعودية علمتني الكثير من اعمال المطبخ.. ونظرا لانني كنت اكره الاكل في المطاعم (لعدة اسباب لا اريد ذكرها).. فلذلك تعلمت الطبيخ وغسيل الاواني رغما عن نفسي.. كنت في البداية اجد صعوبه بالغة في كيفية تجهيز مستلزمات الطبيخ من لحوم وخضروات وبهارات ومن اين ابدأ اولا.. لكن بمرور الزمن تعلمت الكثير من انواع الطبيخ واصبحت لى هواية مفضلة ومحببه.. وليس لدي مانع ان اطبخ كل يوم لاني وجدت في الطبيخ نوع من المتعة والتسلية وممارسة فن الغناء بتقليد الفنانين اثناء تقطيع الخضروات والطبيخ..
ولقناعتي التامة بأن اعمال المنزل يجب ان تكون عامل مشترك بين الرجل والمرأة ولابد ان يكون هناك تفاهم بين الطرفين وان يساعد بعضهم البعض في ترتيب كل ما يتعلق بأمور المنزل.
ايام العزوبية كنت اسكن مع اربعة من الاصدقاء في شقة.. طبعا اسسنا (الميز) واتفقنا على ان يقوم كل اثنين مع بعض باعمال المطبخ من طهي الطعام وغسيل الاواني لمدة يومين متتابعين ثم يقوم الشخصين الاخرين بنفس الدور لمدة يومين متتابعين ايضا.. اما في يوم الجمعة كنا متفقين على ان ندخل جميعنا المطبخ وكل واحد فينا يقوم بمهمة معينة.. استمر الحال على ما يقرب من شهر كامل .. وفي ذات يوم اتي الدور على الشخصين الاخرين بأن يقوموا باعداد الطعام.. لما رجعنا من العمل لم نجد الطعام حسب الخطة المرسومة.. سألنا الشخصين عن عدم اعدادهم للطعام.. اعتذر لنا واحد منهم وهو الوحيد الذي كان متزوجا وأولاده في السودان قال بأنه يكره العمل في المطبخ وزاد على ذلك قائلا بأنه عندما كان في السودان زوجته كانت تعد له الطعام ولم يدخل المطبخ أبدا بعد ان تزوج.. هذه الكلمات كانت جارحة بالنسبة للجميع وبعدها تركنا (الميز) وفي ساعة غضب شديد قلنا له انتظر زوجتك لكي تطبخ لك..
بعد ان تزوجت اصبحت اساعد زوجتي في اعمال المطبخ كل يوم لانني كما ذكرت بانني اجد متعه في اعمال الطبيخ.. حتى ان زوجتي مع انها تجيد فن الطبيخ اصبحت تحب الاكلات التي اقوم بطبخها.. وكثيرا ما تطلب زوجتي مني ان اطبخ لهم اكله معينه خلال العطلة الاسبوعية.. ليس كنوع من الانتهازية للتخلص من اعمال المطبخ .. لكن لاجادتي فن الطبيخ وبالتالي وجود شعبية معينة داخل بيتنا الصغير واقبال كبير على الاكلات التي اطبخها..
اكثر شيء اعجبني ايام العزوبية بعض الكلمات من اقوال الشيخ فرح ود تكتوك اتى بها اخ وصديق زميل عزيز لن انساه ابدا اسمه عوض الخير محمد خير من ابناء كوستي اتخذناها كشعار وكنا نعلقها فوق الحائط عند حوض غسيل الاواني :

يقول الشيخ فرح ود تكوتوك
الماعون اللين غسيله هين

هذه الكلمات حكمة عجيبة.. كان كلما يأتي الينا صديق او زميل أو ضيف زائر في المنزل ويقرأ هذه الكلمات.. يضحك من اعماق قلبه ويعلق عليها.. والادهي من ذلك يقوم ذلك الضيف من تلقاء نفسه بغسل الاواني بعد ان يفرع من الاكل ويلح على غسلها بنفسه..

والسؤال الذي اريد ان اطرحه هنا موجه للطرفين وهو قابل للنقاش:

هل تحب ان تدخل المطبخ لتساعد زوجتك في اعمال المطبخ؟
وانت يا اختي.. هل ترضين بأن يدخل زوجك المطبخ ليساعدك؟

وفي الختام اقول لاخواني من الرجال المتزوجين..
اذا اردت الوصول الى قلب زوجتك اطبخ لها طبخه شهية وبعد ذلك احكم في حبها لك..

ولكم ودي،

عزيز

[فادي الماحي]

وإن لم أساعد زوجتي فمن أساعد إذن ؟

لك التحيه أخ عزيز

[aborawan]

الف شكر الغالي عزيز ودي تعتبر وصفة مجانية للعذابة وعلى قولة اخوي فادي كان ما ساعدتا زوجتي حياتي اساعد منو :):)

[هناد]

هههههههههههههههههههههههههههههههههههههههههههههه


والله موضوع فيه شك لانو لو قلنا بنساعدها إقولو بنخاف منها
ولو ما ساعدناها إقولو كعبين



لكن انا في راي انو نساعدها لانو ذي ما قالو اخوانا (لو ما ساعدناها نساعد منو ؟)
اكيد بنساعدها لانو الزوج والزوجه شريكين في كل شي داخل منزلهم
واسف علي الاطاله

[ودأبكرش]

ده اذا كنته متزوج
بس اساعدها اخليها هي التمشي
الشغل وانا اسوي الاكل
ههههههههههههههههههههههه

[مــ سواح ــازن]

الله يجيبها
بعدين نشوف نساعدا والا لا
كدى التجي والله أساعدها جنس مساعدا هي

[Jamal Elmahi]

اخى الخواجه... عزيز..
الحنكشه عرفناها كمان جابت ليها شغل مطبخ مع الحريم...... هو نحنا ناقصين....
اللهم هذا حالنا لا يخفى عليك و هذا ضعفنا ظاهر بين يديك و بالذات في المطبخ....

جمال الماحي

[عزيز عيسى]

الاخوان الاعزاء ابوروان،
فادي،
هناد،
ود ابكرش،
مازن،
وجمال،

اشكركم احبتي على المرور..

أولا ارحب بالاخ العزيز الصديق جمال الماحي العضو الجديد.. وبالمناسبة جمال ده معانا هنا في هيوستن وانشاء الله حيتحفنا بمشاركاته..
ويا فادي اهو جرينا ليك جمال جبناه ليك في المنتدي..
أها تاني عندك كلام يا فرده؟؟.. وشويه شويه اجيب ليك الجنيد كلها..
هههههههه
ثم ثانيا الشيء اللى أنا عارفه انه ابوروان وجمال ديل متزوجين.. بس مافيش ولا واحد فيهم قال
لينا بيساعد زوجته كيف في المطبخ.. وشنو البيعرف يطبخه..
أكان على جمال ده خلوني امرمطه ليكم.. انا عارفه كويس.. زي الراجل اللى خرب لينا الميز..

ثم ثانيا يا فادي وهناد ومازن اعتقد انكم عذابه.. وزي ما قال عمكم ابوروان دي وصفة مجانية..
اعملوا بيها لما تتزوجوا وما تزوغوا..

ويا ود ابكرش،
بتقول:
ده اذا كنته متزوج
بس اساعدها اخليها هي التمشي
الشغل وانا اسوي الاكل

والله انا خايف انك تقوم بالحلة لوحدك وبعدين الولية لما ترجع من الشغل ما تلقى حاجه تاكلها..
صدقني حتقوم تطلقك بالثلاثه.. وتاني ما تلقى طريقة ترجعك..

مع كل الود،

عزيز

[ابو المهتــدي]

بسم الله الرحمن الرحيم
الاخ الحبيب عزيز لك التحية 000 لنا في رسولنا الكريم اسوة حسنة ومن تعاليمة مشاركتة الفاعلة لزوجاتة في كل ضروب الحياة 0 وقولة خيركم خيره لاهلة
ومن هنا تكون المشاركة الفاعلة 0 علي حسب المقدرة والطلب 0وظروف المنزل 0 والمشاركة تخلق تودد بين الطرفين ورابط لايحد بحدود 0 حتي في امر العيال هناك مشاركة 0 وخاصة في الغربة 0 وانا احد الذين يدعمون ويشاركون 0 في كل مافي المنزل 0حتي في السودان 0
تحياتي لك 0 وتحية خاصة للاخ جمال الماحي 0

[صالح ابوشوارب]

0
الاخ عبد العزيز

لك التحية

احلي حاجة المساعدة اللينة يلا قول معاي

الماعون اللين غسيله هين

الماعون اللين غسيله هين

أما بخصوص الميز في مرة من المرات ونحن عزابة عزمت ليك عزابة اصحابنا على ملوخية والملوخية في النار شايفها رقيقه يعني مويتها كتيرة والملوخية شوية ومواعيد الاكل خلاص جات وقلت اتخنه شوية فلقيت دقيق واديتها شوية شوية بعد عشرة دقايق ياخبر اخضر بقت لقمة خضره وتعال يادي الكسوف وتوبة

[امير عبدالباقي]

الاخ عزيز
مساعده الزوجه مهمه لكن جد العمل في السعوديه مابخليك تعمل حاجه لانو دوامين اخوك طباخ رقم واحد ممكن اطبخ والليله في الغداء عملت بوفتيك ليهم طلع حاجه ماتخلص الاولاد قالو لامهم خلي بابا يعمل لينا الاكل اكلو حلو قالت ليهم خلاص خليه يعمل ليكم كل يوم عاوزه ترمي المسئوليه علي طبعا قالت الكلام ده من الزعل ؛طبعا اتعلمت الطبيخ من الوالده كنت بدخل المطبخ معاها كتير وطبقناها ايام الدراسه في الهند
صالح ابوشوارب لكن مابالغته لكن دي عمليه تعمله

[زيكو منيب]

كاتب الرسالة الأصلية aborawan
الف شكر الغالي عزيز ودي تعتبر وصفة مجانية للعذابة وعلى قولة اخوي فادي كان ما ساعدتا زوجتي حياتي اساعد منو :):)

و الله زي ما قال عمنا ابو روان بس بختلف معاه في حاجه لو ما ساعدتها ساعد امك لانه انا عارف زوجة الولد دايما بتكون مع خلاف مع امه:D ولا شنو :)

[هناد]

هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههه
والله يا اخونا (صالح ابو شوارب) انت زاتك مجنون في زول عازم ليه عزابه اعمل ذي ما عملت والله بالغت عديييييييييل هههههههههههههههههههههههه ديل بكونو كشفو حالك عشان كدا لازم لازم تشوف ليك مره تعمل ليك الاكل

ههههههههههههههههههههههههههههههههههههههههههههههههه

[الزبير محمد عبدالفضيل]

بسم الله الرحمن الرحيم
الاخ الحبيب عزيز لك التحية 000 لنا في رسولنا الكريم اسوة حسنة ومن تعاليمة مشاركتة الفاعلة لزوجاتة في كل ضروب الحياة 0 وقولة خيركم خيره لاهلة
ومن هنا تكون المشاركة الفاعلة 0 علي حسب المقدرة والطلب 0وظروف المنزل 0 والمشاركة تخلق تودد بين الطرفين ورابط لايحد بحدود 0 حتي في امر العيال هناك مشاركة 0 وخاصة في الغربة 0 وانا احد الذين يدعمون ويشاركون 0 في كل مافي المنزل 0حتي في السودان 0
تحياتي لك 0 وتحية خاصة للاخ جمال الماحي 0

سبحان ربي وبحمده

[waheeb]

كاتب الرسالة الأصلية aborawan
الف شكر الغالي عزيز ودي تعتبر وصفة مجانية للعذابة وعلى قولة اخوي فادي كان ما ساعدتا زوجتي حياتي اساعد منو :):)

[خالد هاشم علي]

الغالي عزيز...
تحياتي لك ياعزيزنا...
أول حاجة أبوروان مامتزوج ولسه عزابي لكن من هسة العروس مورياهو العين الحمرة ونحن السابقون وهم اللاحقون...
مشاركة المدام في المطبخ لا تنقص من قدر الرجل شيء بل تزيد من ذلك ، وقد كنت أشاهد والدي عليه رحمة الله يصحو باكرا ويعمل الشاي لأنه عندو مزاج معين.

عني أنا فلا أخفي عليكم بأنني لا أحب شغل المطبخ وخصوصا غسيل العدة. لكن مرات بكون عندي مزاج في حاجات معينة بقوم أدخل المطبخ أعملها براي .. خصوصا الحاجات زي ( كبدة الإبل وأمفتفت وكده) وذلك لحنكشة الدكتورة ، وكمان الحاجات دي دايره الواحد يعملها بي مزااااااااااااااااااااااااااااااااااااااااااااج . ولا شنو ياأمير وياحمدتو ؟؟؟

[ابراهيم]

كاتب الرسالة الأصلية azizeisa
والسؤال الذي اريد ان اطرحه هنا موجه للطرفين وهو قابل للنقاش:

هل تحب ان تدخل المطبخ لتساعد زوجتك في اعمال المطبخ؟
وانت يا اختي.. هل ترضين بأن يدخل زوجك المطبخ ليساعدك؟


سلامات اخوى عزيز دايماً مواضيعك شيقة

وبما انو نحن لسا عزابة

لكن مافي شي بمنع من دخول المطبخ ومساعدة الزوجة

وهو في أجمل من كدا .. وخاصة الواحد الغربة علمتو حاجات كتيرة من فن الطبيخ لكن الخوف الهوا يقلب وتبقى في المطبخ على هههههههههه

ليك تحياتي وودي اخوى عزيز

[عزيز عيسى]

يا شباب والله أسف جدا تأخرت عليكم في الرد معليش سامحوني لانه والله كنت مشغول مع عرس بتاع جماعة معارفنا اثيوبيين.. امبارح السبت مشينا الحفلة وكانت رهيبة جد .. واليوم الاحد برضو معزومين صبحية.. يعني الناس ديل عاداتهم ما بتختلف عن عدادتنا السودانية.. كدى خلوني احكي ليكم عن الحفلة شويه..
يازوووول ما تقول لي .. الجكس شرط للارض وحاجه تمام.. والرقيص للطيش..استمتعنا بالغناء والموسيقى الاثيوبية الرائعة والرقيص..طبعا اخوكم في نص الحلقة وآخر فنجطه.. الناس ديل عندهم تراث عظيم جدا والشيء اللى عاجبني فيهم انهم لازالوا محافظين على تراثهم القديم خاصة الاغاني القديمة مع ادخال بعض الالات الموسيقية الحديثة والرقيص الشعبي للقبائل.. غايتو شيء ما بقدر اوصفه ليكم.. لو كان في طريقة كان قدمت ليكم دعوة وتجوا تحضروا معانا اعراس الاثيوبيين.. واخوكم ما شاء الله أي اثيوبي في البلد بيعرفني.. علشان كده دائما على رأس قائمة المدعويين في كافة المناسبات الاثيوبية في هيوستن..وسأحكي ليكم فيما بعد ايه اللى خلاني اتعلق بالاثيوبيين.
أنا والله ما كنت متوقع الموضوع اللى كتبته ده بيلقى تجاوب من عدد كبير من الاخوان بالشكل ده خاصة اخوانا العذابة (الغلابة الشقيانين) والباقين المزوغين من شغل المطبخ.. ولاحظت انه مافيش ولا واحده من الاخوات اعطتنا رأيها.. الظاهر عليهن عايزات يحتكرن شغل المطبخ ده براهن.. على العموم سأبدا بالرد على مداخلاتكم على جزء منكم والباقين انتظروني لغاية ما ارجع من الصبحية لانه من جد ما عايز افوتها.
ولكم كل الود،
عزيز

[بابكر]

الاخ الفرده عزيز
لك الحب والتحيه
شوف يافرده والله انا لو دخلت المطبخ المره تنادى لى الشرطه لانى حأجوط ليها المطبخ وابوظ اى حاجه عشان كده انا مريح نفسى ومابدخل الا لمن تكون فى السودان
وانت اسع مالك فاتح الموضوع ده انت بتخاف ولاشنو ؟؟؟؟؟؟
مساعدة شنو الفى المطبخ كمان والله ياهو الفضل يعنى مش كفايه شغل بره وكمان طبيخ 000000 هوووووووووووووووووووووى ياعزيز الظاهر عليك انت من حزب المفراكه 0000

[وجود (السعوديه)]

الله على الموضوع الاكثر من رائع ......
انا فرحانه بردود الاخوان مرررررره.......
لكن اعتقد انها ردود مثاليه لكن في الحقيقه نادرااااااااااااا مايساعد الرجل زوجته في المطبخ.
لكن يااااااااااااااااااااارب ابعثلي عريس الطبخ عنده زي شرب المويه ...
لكن بصراحه انا اشوف إن الرجل في زمنا هذا متكبر ولا يتنازل بمساعده زوجته (يمكن هذا اكثر في السعوديه)
وبعدين اللي يقول كفايه اشتغل برا وجوه البيت ماهي المزاه صارت تشتغل برا وجوا صح
ويشششششششششش الفرق ؟؟؟؟؟؟

[أبوبكرحامد]

تشكر عزو على الموضوع الجيد وهو جدير بمشاركة كل أعضاء المنتدى لأهميته ، من وجهة نظرى أن مشاركة الرجل لزوجته فى أعباء البيت عموماً يزيد من الترابط والحميمية بين أفراد الأسرة ويقدم مثالاً حياً للأبناء عن التعاون والتآلف بين أفراد الأسرة ، وأذكر دوماً فى عيد الأضحى عندما يقوم الوالد عليه رحمة الله بالذبح فيما يوكل لنا مهام السلخ والتكسير ، وبعد ذلك نساعد الوالدة والأخوات فى تقطيع اللحم وإعداد الشطة ، وحينها تجد الجميع سعداء لهذه الروح الغير مألوفة فى الأيام العادية ، عن نفسى فقد أضافت لى الدراسة بمصر مهارات الطبيخ والتنظيف ومؤكد سأساعد زوجتى فى أعمال الطهى لأن الحياة تقوم على تقاسم المهام بلا استعلاء أو تكبر فقد مضى زمن سى السيد إلى غير رجعة ، وصدقونى لو فهمنا النساء كما ينبغى فستزول لغير رجعة المشاكل والمناكفات فالمرأة مخلوق لطيف يسهل إرضاؤه مثلما يسهل إغضابه ، فالمطلوب أحبائى أن نستوصى بالنساء خيراً فهن مكرمات عند المولى عز وجل فكيف نهينهن نحن العبيد الضعفاء ، ولى عودة.
ود الماذون

[عزيز عيسى]

حبيبنا الغالي أبوالمهتدي،
النصيحة التي قدمتها والمتمثلة في استدلالك على الغدوة الحسنة التي يتبعها الرسول الكريم في معاملة زوجاتة ومساعدتهن قمة الروعة.. فلذلك اذا اردنا ان نبني حياة اسرية مترابطة وقوية فلا بد لنا من ان نقتدي باتباع تعاليم المصطفي (ص) والاستفادة منها لما لها من اثر في اصلاح الامة ..و ديننا الاسلامي الحنيف حثنا ويحثنا باستمرار على احترام الزوجة والمحافظة على حقوقها ويستوجب علينا مساعدتها والعطف عليها لانها شريكتنا في الحياة الزوجة.. فلذلك لابد ان نساعدها في اعمال المطبخ حتى اذا لم نستطع الطبيخ لكن ذلك لن يمنع عن مقدرتنا في مساعدتها ولو في ابسط الاشياء مثل غسيل الاواني كما ذكرت ولا نترفع نحن الرجال ونقول بأن مثل هذه الاعمال للستات فقط.
الاخ جمال الماحي معجب كثير بالمنتدي ومتابع كل يوم وشايفه متحمس ومنبهر جدا لانه اليومين هذه تعلم كيف يطبع بالحروف العربية لاول مره في حياته.. حرف واحد في كل 35 دقيقة ومتفائل بيقول السرعة في تحسن.. يعني لو عايز يطبع ليه سطر واحد عايز ليه يوم كامل.. الله يعينه!

وجزاك الله عنا خير الجزاء.
مع خالص حبي وتقديري،

عزيز

[عزيز عيسى]

الغالي صالح ابوشوارب، يافرده يا عجيب،

وأنا مني ليك ألف تحية حاره بالاحضان،
وبالله كيف الاخوان في أم سنط والله مشتاقين كثير.

لكن يا صالح ما قطعت مصاريني من الضحك مع الملوخية.. ومثل ما قال اخونا امير بالغت عدييييل.. بالله دي عملية تعملها في الملوخية.. الظاهر شلاقه بس.. وكت ما بتعرف تطبخ اللي خلاك تهبش شنو؟!.. لو شفت ليك غسيل عده مش كان احسن ليك وتبطل فضائح مع العذابة.. ثم ثنانيا انت ماك عارف انه الملوخية دي احب اكله انا بحبها.. وما لقيت ليك حاجه ثانية تبهدلها غير الملوخية.. واخوانا العزابة المظاليم المغلوب على امرهم طبعا نفذ صبرهم وفضلوا يمشوا على المطاعم.. لكن أنا لو في محلك طلما مويتها كثيره وبقت رقيقه كان تديها ليهم يشربوها وتقوليهم تغيير ياشباب.. ولا تقول ليهم دي (ملوخعصيده) اختراع جديد.

لما كنت في جده المدام كلما ترسلني السوق علشان اجيب ليها خضار أخوك دائما يختار في الملوخية لانه بحب ريحتها هي والشمار (الشبت) بشكل ما تصوره.. الوليه تقول لي انت اسمع السوق ده غير الملوخية مافيش خضار غيره؟؟.. بقول ليها هو في احسن من الملوخية.. ويا سلام لو كانت مفروكة وبايته يوم.. دى مع الكرسه حاجه ما تخلص.. ومستعد كمان العق اصابعيني لغاية كوعي..

أها بردد معاك.. الماعون اللين غسيله هين.. الماعون اللين غسيله هين.. الماعون اللين غسيله هين..
يا صالح انت فاكر نفسك في حلقة ذكر.

مع خالص حبي وودي،
وتسلم يا أبو الشباب،
عزيز

[عزيز عيسى]

أمير عبدالباقي يا ملك يا رائع،
اطيب التحيا،
والله فعلا مسألة الدوامين في السعودية دي مهلكة وما بتخلي الواحد يقدر يدخل المطبخ ويساعد زوجته.. لكن يعجبني فيك انك قدرت تتغلب عليها وتدخل المطبخ في يوم العطلة الاسبوعية.. وكمان بتتفنن تعمل بوفتيك.. ده انت رهيب.. المره الجاية جيب ليك كرسي في المطبخ وخلي زوجتك تجلس عليه تونسك وانت بتطبخ.. شوف الحكاية تحلو ازاي!.
الاولاد ماعندهم زوق ليه يكلموك قدام امهم ويقولوا بابا اكلو حلو.. هو طبعا مافيش طبيخ احسن من الستات.. لكن الاولاد الظاهر عليهم اذكياء لانهم عايزين يشجعوك.. بس المره الجاية يا ابو الشباب ما تطبخ حاجات واسعة زي دى تقوم تزعل ام الاولاد..
انت عارف الاولاد حبوا طبخاتك ليه.. لانه يمكن بضيف في الطبيخ البهارات الهندية.. كرى سااااي!
وتسلم اخوى،
مع كل ودي وتقديري،
عزيز

[عزيز عيسى]

العزيز زيكو،

اسمك ذكرني بصديق عزيز اسمه عاطف زيكو رائع كروعتك،

اشكرك على التعليق.. لكن يا زيكو لو أنا قادرعلى مساعدة والدتي مش برضو واجب على اني اساعد حماتي؟..انت عايز تخلي حماتي تكرهني ليه؟.. يا راجل مالك عايز تطفش لينا الجماعة من شغل المطبخ كدى خليهم يساعدوا زوجاتهم في الاول بعدين نفكر في مساعدة الوالدين.
وتسلم،
عزيز

[عزيز عيسى]

هناد هناد

انت قلت:
-----------------------------------------------------------------------
والله موضوع فيه شك لانو لو قلنا بنساعدها إقولو بنخاف منها
ولو ما ساعدناها اقولوا كعبين
-----------------------------------------------------------------------

انت يا هناد كدى اتجوز في البداية وبعدين ساعد زوجتك وخليك من كلام الناس المتخلفين ديل.. صدقني لو شافوك بتساعدها في المطبخ حيراجعوا نفسهم ويغيروا من رأيهم.
وطبعا انت تنقلت مع والدك كثير.. ويبدو لي انك تعلمت تطبخ اكلات شهية مختلفة.. علشان كده بقول تكون محظوظة اللى تتجوزك..
وشخص عايز يتعلم الطبيخ ممكن يتعلم يجرب في العزابة اولا.. مثل ما عمل اخونا صالح ابوشوارب.. والعزابة ديل اسألني عنهم أنا لانهم غلابه وممكن ياكلوا أي شيء.. وصالح لو قدم ليهم الاكله - اللى مامعروف اسمها ايه - كان اخوانا العزابة اكلوها ودعوا ليه كمان.
وتسلم،
عزيز

[عزيز عيسى]

الاخ العزيز السفير،

اطيب التحايا،

اشكرك على المرور.. وابوالمهتدي زاد الموضوع روعه بكلماته الرائعة..

وجزاكم الله عنا خير،

ودمتم،

عزيز

[عزيز عيسى]

الاخ العزيز وهيب،
اشكرك على المرور.. بس ما عرفناك انت في صف المتزوجون أم في صف العازبون؟
وتسلم،
عزيز

[عزيز عيسى]

أبوهاشم حبيب الكل،

سلام مني ليك بلا حدود.. سيل عديييل،

بتقول ابوروان لسه ما متزوج.. معليش أنا غلطان افتكرت والله انو متجوز.. أها طيب اسم روان ده من شنو يا ربي؟

انت عارف ابو روان لو بيعرف يعمل كبدة ابل يمكن تخارجه يقدر يكسر عين العروسة.. الزول ده اضغطوا عليه شويه وخلوه يكمل نصفه علشان يدخل معانا المعمعة.. كيف مع الطبيخ.. بيعرف يطبخ ولا أي كلام.. انشاء الله ما يكون غسيل عده وبس؟!

طبعا لو شاركنا الزوجة في عمل المطبخ ما حينقص من قدرنا انحنا الرجال شيء بل يزيدنا تقدير واحترام من جانب الزوجات ويخليهن يشعرن بالراحة بأنه أنحنا بنهتم بيهن ونفهم ونقدر حجم المسؤولية الواقعة علي عاتقهن.. وأنا بعتبر والدك – رحمة الله عليه – كونه يعمل الشاي بنفسه والله كثيره منه لانه زي ما عارف كثير من الاباء في السودان ما بيعرفوا طريق المطبخ من أي ناحية في البيت.. وكثير منهم عمرو ما دخل المطبخ.. لكن الزمن تغير ولابد لنا نحن الجيل الجديد من تغير تلك المفاهيم الخاطئة..

يا أبو هاشم لما انت ذكرت بانك بتظبط كبدة الابل افتكرك حريف مطبخ احسن من ابوروان.. تقوم تقول لي تكره الشغل في المطبخ وغسيل العدة.. ليه مخيب ظني كده.. وزي ما بقول المثل – جيتك يا عبدالمعين تعين (في ابوروان) لقيتك تعان.. ده انت اللى طلعت حنكوش يا ابوالشباب.. طيب انت خلى الطبيخ للدكتورة بس قوم بغسيل العدة وفي اثناء ما بتغسل العدة جرب معاها شوية غناء وبعدين شوف حكاية غسيل العدة دي حتعجبك كيف مع الطرب.. صدقني حتنسى موضوع انك تكره غسيل العدة وتحبها اكثر واكثر لو استمريت في الغناء الدكتورة حتنبسط منك.. وتعلمك حاجات زيادة في شغل المطبخ.. انت بس روق المزاج علشان العدة تكون نظيفة.. وناس امير وحمدتو ديل خليهم في مزاجهم.. ديل ناس كبد ساااكت.

مره انا وصحبي جمال الماحي استغلينا فرصة انه زوجاتنا خارج المنزل لزيارة جاره سودانية.. قمت دخلت ليك جمال المطبخ وطبخنا ليك ملاح رجله كارب كربه شينه خلاص.. قلت لي جمال ملاح الرجلة ده طالما انه جميل أنا في رأي ما بستاهل انه ناكله بالرغيف.. قال لي طيب يعني ناكله بي شنو؟.. قلت ليه والله الرجله دي بتحتاج ياكلوها بكسره.. قام قال لي طيب نجيب الكسره دي من وين في هيوستن.. قلت ليه بسيطه ايه رأيك نجهزها برانا..
قمنا جبنا نوعين من الدقيق وخلطناهم عملنا منهم عجين خفيف للكسرة وبعد داك استعنا بكروت بلاستيك خاصة بالهاتف عملناها قرقريبه وجبنا لينا طوه كبيره من النوع غير اللاصق وتعال شوف ليك جنس عواسه.. الحكمة انه كنا موفقين في كل شيء صدفه.. خلطة العجين طلعت ظبط والكسرة احرف ست كسره في السودان ما تعوس زيها.. وزوجاتنا لما رجعن وقعن ليك في الاكل لطع شديد.. ومن شدة ما الاكل كان طاعم اتخيل لي كانن بيبلعن بلع وما بمدغن.. بعد ما شبعن قالوا لينا انتو جبتوا الكسرة دي من وين؟
ولك كل الود،
عزيز

[عزيز عيسى]

ابراهيم الخليل الرجل الطيب،
مرحبتين حبابك يا زينة شباب المنتدى،
وليك سلام خاص مربع،

الظاهرعليك يا أبو الشباب ضارباك الجرسه من هسع .. اسمع كلامي..انت بس قول بسم الله اتزوج في الاول وبعدين لما تدخل المطبخ خلي معنوياتك عاليه وما تعمل فيها تفتيحة في الطبيخ وتجني على نفسك.. ولو شفت الحكاية عايزه تقلب اديها العين الحمرا زي ما قال خالد حتخجل وتقوم تساعدك.. وبعدين العروس اعمل فيها معروف شويه.. بس ارجوك ما تأكلها كشري كل يوم وتقطع ليها مصارينها!
مع حبي وتقدير لك اخي الغالي،
عزيز

[عزيز عيسى]

ود الصول الحبيب،

تحية حب وتقدير وليك شوق كثير يا فرده،

يا ود الصول شاريني مالك.. قلت لي اتوقع منك مكالمة هاتفية.. وحياتك كل يوم بترقب في التلفون اني اتلقى مهاتفتك.

ندخل في موضوعنا.. انت يا ود الصول عليك الله حصل شفت ليك واحد في حي البوليس نادوا ليه الشرطة ده انت الحكومة بذاتها يا راجل.. وكويس انك بتدخل المطبخ وبتعمل حاجه على الاقل.. انت فاكر نفسك الشخص الوحيد اللى بيجوط المطبخ ياما في ناس كثير بتجوط المطبخ.. أنا بقوليك جوط المطبخ وعلشان تفرحها كمل جميلك ونظفه خليه لحدي ما يرقش عشان تتفادى الكواريك.

قلت لي:
وانت مالك فاتح الموضوع ده انت بتخاف ولاشنو ؟؟؟؟؟؟

والله يا فرده أنا ما بخاف لكن نفسي ما بتسمح لي اني اكون جالس في الكاوتش وماسك الرموت كنترول في ايدي واغير من قناة لي قناة ادور على البرامج الجميلة علشان اقدر اشاهدها واستمتع بيها وفي نفس الوقت الولية تكون مشغولة في ترتيب البيت ونظافته وكاتله روحها ورانا وانحنا ما نديها أي اهتمام او نحس بيها.. صدقني في ناس كثير بالشكل ده.. لكن اخوك والله ما برضى ونشيط من الناحية دي.. كل واحد فينا بيمسك ليه مهمة معينة في البيت يقوم بيها.. طبعا بالنسبة لي مهمتى ان اقوم بكنس الصالات والغرف بالمكنسة وغسيل الاواني بوضعها في الغسالة.. ولو طلبوا اطبخ ليهم كمان اكون سعيد جدا.. وديل أنا بعتبرهم مهمات بسيطة للغاية واي راجل ممكن يأديهم مقارنة بما تقوم به هي من تنظيف الملابس في الغسالة والاعمال الاخرى التي لاتسمح الزوجة بأن يؤديها زوجها وبعد ما نكمل شغل البيت مع بعض بعد داك نجي نجلس نشاهد التلفزيون العائلة كلها مع بعض.. صدقني مافيش احسن من كده.

وبمناسبة اخاف دي.. معانا واحد اخونا اسمه ابراهيم موسى من اولاد ام درمان راجل ظريف ونكته.. لما نكون جالسين نتونس تلقاه واقع ليك في الحريم شغل شديد جدا.. الحريم سوا لينا الحريم عملوا لينا.. بس وبمجرد ما تظهر زوجته يقوم يغير الونسه يقول ليك.. (والله الراجل الما بخاف من زوجته ده ما راجل).. يقوم يخلي ليك الناس كلها تضحك.

وكمان بتقول:
مساعدة شنو الفى المطبخ كمان والله ياهو الفضل يعنى مش كفايه شغل بره وكمان طبيخ 000000 هوووووووووووووووووووووى ياعزيز الظاهر عليك انت من حزب المفراكه

انت مالك يا اخوي بقيت لي زي اخينا جمال الماحي الظاهر عليكم انتو ما بتمشوا على المطبخ الا يجيبوا ليكم المفراكة.. انا غايتو لما تكون قافله معاي ومزاجي عكران وماعايز اسوى أي حاجة وتقوم المدام تطلب مني اسوي ليها حاجة في البيت.. مش لو جابت لي المفراكة.. لو جابت لي المرحاكة ما بقوم اعملها ليها..

مع كل الود،
عزيز

[عزيز عيسى]

الاخت وجود،

شكرا على المرور.. وعلى التعليق الظريف.

اخيرا.. واحده من الاخوات ظهرت لتعطي رأيها.. يا ريت الاخوات عشوشه واللمسة الساحرة ومهيره وباقي الاخوات يفيدونا برأيهن في هذا الموضوع.

بتقولي:
الله على الموضوع الاكثر من رائع ......
انا فرحانه بردود الاخوان مرررررره.......
لكن اعتقد انها ردود مثاليه لكن في الحقيقه نادرااااااااااااا مايساعد الرجل زوجته في المطبخ.

لكن بصراحه انا اشوف إن الرجل في زمنا هذا متكبر ولا يتنازل بمساعده زوجته (يمكن هذا اكثر في السعوديه)
وبعدين اللي يقول كفايه اشتغل برا وجوه البيت ماهي المزاه صارت تشتغل برا وجوا صح
ويشششششششششش الفرق ؟؟؟؟؟؟

أنا في رأي الرجل العربي بشكل عام من طبيعته كسلان.. وبيحب الاتكالية.. ودائما بيحب انه يتهرب من المسؤولية ويترك امور البيت للزوجه.... وتلقاه دائما خارج البيت يقضي وقته في الاستمتاع مع اصحابه من لعب كتشينه وونسه وامور دنوية عديمة الفائدة وخلافه.. وفي نفس الوقت تلقى زوجته المسكينة تقتل روحها وتبذل جل وقتها في شغل البيت وتربية الاطفال.. لكن تعال شوفوا الاسرة في الغرب.. تجد المسؤولية مشتركة بين الرجل والمرأة في البيت وخارج البيت.. لذلك لكي يتخلص الرجل العربي من مثل هذه السلبيات - وهو الذي يملك الحق في ذلك - وحتى يبرهن عدم استغلاليته للمرآة، في رأي عليه ان يضع حد للكسل ويعمل مثلما يعمل الرجل الاوربي.

قلتي:
لكن يااااااااااااااااااااارب ابعثلي عريس الطبخ عنده زي شرب المويه ...

يلا يا شباب.. عايزين لينا واحد جدع بيعرف يطبخ كويس يتقدم.. بس يا وجود اوعك تستغليه ساعديه في المطبخ علشان تكونوا سعيدين مع بعض!

وايضا تقولين:
وبعدين اللي يقول كفايه اشتغل برا وجوه البيت ماهي المزاه صارت تشتغل برا وجوا صح
ويشششششششششش الفرق ؟؟؟؟؟؟

أنا بخلي الموضوع ده للشباب العزابه يردوا عليه؟

وتسلمي،
عزيز

[عزيز عيسى]

ود المأذون العريس،

سلام كثيييييييييييير وتقدير بلا حدود،

يا راجل يا دبلوماسي يا رائع .. ويا سلام على الكلام الحلو.. كلامك ده ما أقدر ازيد عليه أي شيء.. ودي ايضا تعتبر وصفة مجانية منك لاخوانا المتزوجين والعزابة.. ودون شك سيستفيدوا منها. لو عملوا بهذه النصيحة.. وندعوا الله ان يوفق الجميع لما فيه صلاح الاسرة.

اقتباس:
(تشكر عزو على الموضوع الجيد وهو جدير بمشاركة كل أعضاء المنتدى لأهميته ، من وجهة نظرى أن مشاركة الرجل لزوجته فى أعباء البيت عموماً يزيد من الترابط والحميمية بين أفراد الأسرة ويقدم مثالاً حياً للأبناء عن التعاون والتآلف بين أفراد الأسرة ، وأذكر دوماً فى عيد الأضحى عندما يقوم الوالد عليه رحمة الله بالذبح فيما يوكل لنا مهام السلخ والتكسير ، وبعد ذلك نساعد الوالدة والأخوات فى تقطيع اللحم وإعداد الشطة ، وحينها تجد الجميع سعداء لهذه الروح الغير مألوفة فى الأيام العادية ، عن نفسى فقد أضافت لى الدراسة بمصر مهارات الطبيخ والتنظيف ومؤكد سأساعد زوجتى فى أعمال الطهى لأن الحياة تقوم على تقاسم المهام بلا استعلاء أو تكبر فقد مضى زمن سى السيد إلى غير رجعة ، وصدقونى لو فهمنا النساء كما ينبغى فستزول لغير رجعة المشاكل والمناكفات فالمرأة مخلوق لطيف يسهل إرضاؤه مثلما يسهل إغضابه ، فالمطلوب أحبائى أن نستوصى بالنساء خيراً فهن مكرمات عند المولى عز وجل فكيف نهينهن نحن العبيد الضعفاء ، ولى عودة.
ود الماذون)

مع خالص ودي وتقدير،

وتسلم اخوي،

عزيز

[صالح ابوشوارب]

.
الاخ عزيز الفردة

لك التحية

بالله موضوع الحفلة والزقني خليه في بوست براهو

عشان ماشي اجيب ( ابو جمل ) بالمناسبة الحناكيش

بتاع المنتدي ما بيعرفوا ( ابو جمل ) خليه في سرك

وتحياتي للاخوان المعاك وتحياتي للاثيوبيين المعاك واحد واحد

ونفسي في رقصة بتاعة القطر وانت عارف الرقصة والمسكة

يسألك الله في الحفلة شربتو ابو جمل

[عزيز عيسى]

صالح الشقي،

سلام بالكوم،

سبقتني في موضوع الزغني ده.. انا برضو كنت مفكر اني افرد ليه بوست لوحده ونتكلم فيه
عن اخوانا او بالاحرى اهلنا الاثيوبيين..

كاتب الرسالة الأصلية صالح ابوشوارب
.
الاخ عزيز الفردة

لك التحية

بالله موضوع الحفلة والزقني خليه في بوست براهو
عشان ماشي اجيب ( ابو جمل ) بالمناسبة الحناكيش
بتاع المنتدي ما بيعرفوا ( ابو جمل ) خليه في سرك


(ابوجمل) دي يمكن واحدين يعرفوه ويمكن واحدين ما بيعرفوه.. عشان كده نخليها في السر.


وتحياتي للاخوان المعاك وتحياتي للاثيوبيين المعاك واحد واحد
ونفسي في رقصة بتاعة القطر وانت عارف الرقصة والمسكة
[/B]
سلامك موصول لناس البلد كلهم.. ورقصة القطر دي يا شقي بتاعة الارتريين ما الاثيوبيين (انت نسيت انو الناس ديل انفصلوا من بعض) ..لكن برضو كان في بعض الفواصل للاغاني الاريترية ورقصنا معاهم رقصة القطر.. وده يبرهن ليك انو الناس ديل ما قادرين يستغنوا عن بعض.. لكن أنا بالنسبة لي كلهم حبش.


يسألك الله في الحفلة شربتو ابو جمل [/B]
بالبوز كمان..

هههههههههه .. أنا بمزح معاك اخوك مابشرب.. وبلاش فضايح
شربت شاي بي لبن.. دي فيها حاجه ولاحاجة كمان.
لكن يا صالح والله الحفلة كانت كاربة بشكل.. والجكس ما يديك الدرب.. وزي ما ذكرت من قبل انو الشباب شرط للارض وما تعرف تعاين لمنو وتخلي منو.. اخوك طبعا وزارة الداخلية كانت معاه وحراسة شديدة.. أنا لغاية هسع مخلوع من الشوفة وروعة الرقيص.. والناس ديل راقيين لدرجة شديدة وصدقني في الحفلات ما بنحصلهم ابدا.. وبيحترموني احترام شديد كرد جميل للسودانيين.. علشان كده انا بطلت امشي حفلات السودانيين.. لانه كل مره امشي حفلة سودانيين يجي واحد سكران يفرتق ليك الحفلة.. ويبوظ لينا اليوم كله.. ده غير الجوطه وعدم النظام.. والسودانية ياهم زاتهم.. يعني لو طاروا السما برضو ياهم.
عندى كلام ونسه كثير بقوله ليكم مره ثانية.
ودي،
عزيز

[madaniboy]

يسلموو على الموووضوع بس انا لسه ما متزوج لكن ابوي بعد المرات بشووفه بدخل المطبخ بيساعد ماما<-------------- مسويي نفسه مدلع امه يبس تستاهل الدلع
كركركركركركر














كركركركرركركركركركر

[عزيز عيسى]

فاقد حنان العزيز،

سلام تعظيم،

اولا انا معجب بالصور والخدع اللى بتنزلها.. الظاهر عليك شقى شديد..
بس حاسب شويه انت مش عارف في ناس عجايز في المنتدى ده
ما بتحملوا المفاجآت؟.

ونصيحتي ليك انك تدخل المطبخ مع الحاجة وتتعلم منها الطبيخ
لانه بعدين حيفيدك بعد ما تتزوج.. والدليل على ذلك انه ابوك بيساعد
والدتك في المطبخ.. ولو بيعرف يطبخ برضو ممكن تتعلم منه.

وتسلم،

عزيز

[ابراهيم]

هل تساعد زوجتك في اعمال المطبخ

والسؤال الذي اريد ان اطرحه هنا موجه للطرفين وهو قابل للنقاش:

هل تحب ان تدخل المطبخ لتساعد زوجتك في اعمال المطبخ؟
وانت يا اختي.. هل ترضين بأن يدخل زوجك المطبخ ليساعدك؟

وفي الختام اقول لاخواني من الرجال المتزوجين..
اذا اردت الوصول الى قلب زوجتك اطبخ لها طبخه شهية وبعد ذلك احكم في حبها لك..

ولكم ودي،

عزيز

سلامات يا عزيزنا
والله انا بشوف التعاون سمح .. وبعدين الواحد مع الغربة والعزوبية دي اكتسب خبرة
هسي اخوك خطر وموهوب في طبيخ البطاطس وسلطة الدكوة وحاجات تانية حامياني بس غسيل عدة ما معانا:o
اها الموهبة دي تروح ساكت؟ اكيد بعدين الواحد بكون اساسي في المطبخ مع المدام لكن بالاول خلى المدام تجي
ومساعدة المطبخ هينة ..

[الجندي المجهول]

موضوع جميل للغاية ومشاركة الاخوان اجمل وعن نفسي ( والله بساعدها مع العلم انا لسه ما متزوج لكن حا اساعدها بكل طيب خاطر وانا بضحك لي هنا ومبسوط كمان) يا رب ساعدنا نفارق العزوبية دي خلاص ؟؟؟؟

[عزيز عيسى]

سلامات يا عزيزنا
والله انا بشوف التعاون سمح .. وبعدين الواحد مع الغربة والعزوبية دي اكتسب خبرة
هسي اخوك خطر وموهوب في طبيخ البطاطس وسلطة الدكوة وحاجات تانية حامياني بس غسيل عدة ما معانا:o
اها الموهبة دي تروح ساكت؟ اكيد بعدين الواحد بكون اساسي في المطبخ مع المدام لكن بالاول خلى المدام تجي
ومساعدة المطبخ هينة ..

ابراهيم ازيك،

ما تبطل جرسة.. تطبخ للعروسة خضروات بطاطس وسلطة طيب ما تطبخ ليها جرجير وتجيب ليها برسيم إنت فاكرها (بقرة)..
ولا إنت خايف من انفلونزا الطيور؟! :D :D
غايتو لو جات العروسة بكلمها أقول ليها سلميهو العدة يغسلها وبس وأبعديهو من الطبيخ..
ولو كمان ابحبحت شوية وغسلت ليها الهدوم وتكويها مكوة (سيف) تكون أعظم زوج في الدنيا..

[عزيز عيسى]

موضوع جميل للغاية ومشاركة الاخوان اجمل وعن نفسي ( والله بساعدها مع العلم انا لسه ما متزوج لكن حا اساعدها بكل طيب خاطر وانا بضحك لي هنا ومبسوط كمان) يا رب ساعدنا نفارق العزوبية دي خلاص ؟؟؟؟
الاخ الجندي المجهول،

سعدت جدا بمرورك وتعليقك على الموضوع..
ربنا يخارجك من العزوبية وديك بت الحلال وتعرس..
ولما تعرس وتجيب زوجتك في بيتك ما تنسى تعزمنا
علشان نجي نشوف شغلك في المطبخ نظيف ولا أي كلام..
وكان على عمك ودالماحي.. من مراتو تشوفو (مقنطر) سفتو
بتخلي ليه المطبخ و (تحرد) الأكل..
المشكلة (كايس) لي حقتو دي لي سنين ماني لاقيها..

[ابراهيم]

ابراهيم ازيك،

ما تبطل جرسة.. تطبخ للعروسة خضروات بطاطس وسلطة طيب ما تطبخ ليها جرجير وتجيب ليها برسيم إنت فاكرها (بقرة)..
ولا إنت خايف من انفلونزا الطيور؟! :D :D
غايتو لو جات العروسة بكلمها أقول ليها سلميهو العدة يغسلها وبس وأبعديهو من الطبيخ..
ولو كمان ابحبحت شوية وغسلت ليها الهدوم وتكويها مكوة (سيف) تكون أعظم زوج في الدنيا..


يعني يا عزيز ..
طبيخ ، وغسيل عدة وهدوم وفوق لي دة مكوة وسيف كمان؟
دة ما بقى زواج وانت بالطريقة دي عايز تطفشني
زواج زي دة اخير منو انفلونزا الطيور

[عزيز عيسى]

يعني يا عزيز ..
طبيخ ، وغسيل عدة وهدوم وفوق لي دة مكوة وسيف كمان؟
دة ما بقى زواج وانت بالطريقة دي عايز تطفشني
زواج زي دة اخير منو انفلونزا الطيور
يا برهوته أنا ما عايز أطفشك..
لكن لما تتزوج حتشوف المتعة لما تدخل المبطخ مع زوجتك..
لو ما بتعرف تطبخ.. زوجتك حتعلمك الطبيخ..
وممكن تعلمك كيف تغسل العدة والهدوم..
وبمرور الزمن تجد نفسك لوحدك مشيت دخلت المطبخ
وابتديت تطبخ وتغسل بدون ما هي تطلب منك..
بس أقول ليك حاجة لما تجي تقطع البصل
ألبس نظارات وقفازات ولازم تضع مشبك غسيل على أنفك..
إنت عارف المتعة في إنك تطبخ أو تغسل العدة وتغني..
صدقني حتكتشف نفسك لوحدك..
وتقول: يا دنيا ما فيك فناني غيري.
بس أوعك تفتري علي الولية..

[ابراهيم]

يا برهوته أنا ما عايز أطفشك..
لكن لما تتزوج حتشوف المتعة لما تدخل المبطخ مع زوجتك..
لو ما بتعرف تطبخ.. زوجتك حتعلمك الطبيخ..
وممكن تعلمك كيف تغسل العدة والهدوم..
وبمرور الزمن تجد نفسك لوحدك مشيت دخلت المطبخ
وابتديت تطبخ وتغسل بدون ما هي تطلب منك..
بس أقول ليك حاجة لما تجي تقطع البصل
ألبس نظارات وقفازات ولازم تضع مشبك غسيل على أنفك..
إنت عارف المتعة في إنك تطبخ أو تغسل العدة وتغني..
صدقني حتكتشف نفسك لوحدك..
وتقول: يا دنيا ما فيك فناني غيري.
بس أوعك تفتري علي الولية..



غايتو يا عزيز كلامك دة كان خلاصة تجربة ابشر يا المطبخ جاك زول
والله حياة الاشتراكية سمحة لكن كعبة الانتهازية
بس بالطريقة دي المدام ما بكون عندها شغلة
لكن اجمل حاجة انك تطبخ وتغني دي عجبتني