بصراحة بصراحة

[aborawan]

في البداية التحية لكل الاعضاء بدون فرز وابدأ بتحية اهل الاسلام السلام عليكم ورحمة الله وبركاته

اصبح من الواضح في المنتدى كثرة المواضيع التي لا يستفيد منها القارئ اي فائدة ولا توجد اي اسباب او دوافع توجب وجودها في المنتدى لاننا في منتديات ودمدني اجتمعنا من اجل الفائدة العامة ( نفيد ونستفيد ) سواء كانت هذه الفائدة ثقافية او اجتماعية ولا يخفى على الجميع انا منتديات ودمدني من اجمل المنتديات من حيث الترابط بين الاعضاء واحترام الذات وعدم المهاترات الخ الخ وبسم الله ماشاء الله عشان ما نسحر روحنا على العموم عشان ما اتفلسف كتير انا حااسجل ملاحظتين انا عن نفسي لاحظتهم في المنتدى واتمنى من كل عضو يطلع على الموضوع ان يسجل ملاحظاته سواء كان من المؤيدين لكلامي او المعارضين واختلاف الرأي لا يفسد للود قضية

ملاحظاتي :
1 / تجد للعضو 6 او 7 مواضيع جديدة في اليوم الواحد وكلها تكون مواضيع لا تفيدنا باي شئ ( كيف دي بس )

2 / بعض المواضيع تكون منسوخة من المواقع الخليجية وباللهجة الخليجية المطلقة وممكن الواحد يقرا الموضوع ما يفهم شئ غير اسم كاتب الموضوع او ناسخ الموضوع (( طبعاً ما في اشكالية من النسخ يشهد كلنا بننسخ :) )) لكن لابد من مراعاة الاختيار الجيد للموضوع المنسوخ من اجل الفائدة لكل المتلقين وساعدونا باللهجة السودانية الحلوة او العربية الفصحى عشان نقدر نفهم محتوى المشاركة او الموضوع

ختاماً ان اصبت فهو من عند الله وان اخطات فهو من عندي


في النهاية كلنا مبدعون وكلنا متميزون وكلنا حبايب


وفوق فوق مدني فووق

[عزيز عيسى]

ابوروان الغالي،

انا بثني على كلامك..

وأرجو ان اسجل ملاحظاتي مع احترامي للجميع..

يا شباب.. والله الواحد فينا بقى يحاور محاوره شديدة علشان يلقى ليه موضوع مفيد يقدر يدخل عليه ويناقشه.. وبعدين مسألة النسخ دى اعتقد ما فيش ليها داعي لان معظم المواضيع المنسوخة تلقاها دائما طويلة ومردده وكمان الناس عارفها.. ياريت الشخص ناسخ المقال اعطاء خلاصة للموضوع حتى يستطيع القارىء من قرأته وفهمه وهضمه بسرعة ثم الاستفادة منه - ويجب ان لا ننسى أن خير الكلام ما قل ودل.
كما امل من الاخوة الاعضاء المحافظة على مستوى المواضيع الرائعة للمنتدى لكي تعم الفائدة المرجوة .. واللى ماعنده موضوع يكتبه ليستفيد منه القارىء يمكنه الدخول على المواضيع الاخرى لمناقشتها واعطاء الرأى..
كما اننى أيضا لاحظت ان بعض الاخوة الاعضاء يكتبون موضوعا.. وفي اليوم التالي تجد ردودهم على الاشخاص الذين يمروا على الموضوع في مكان آخر وبأسم مختلف تماما عن الموضوع الاساسي..

فأرجو ان انبه الاخوان للرد على نفس البوست بدلا من فتح بوست جديد للرد.

ولكم كل الود والتقدير والاحترام،

وتسلم ابوروان،

عزيز

[خالد حمد موسى]

اولا الشكر لك عزيزي ابوروان وانت تلفت انتباه كل غايب

عن الحقيقة وياريت الناس تعمل بهذة الملاحظات

وتتقبلها بصدر رحب وفعلا كلامك عين الحقيقة

وانا من خلفك اقف وكان قبلي كدة الموضوع دة

انا طرحتة مع الاخ ابراهيم واخذنا واعطينه فية

عبر الماسنجر واحيك علي هزا الطرح والله ماجاينا

الي هزا المنتدي الا للاستفادة ولتعارف بين الاخوان

وياريت الكل يراعي حقوق الاخرين وارجو ان تعم الفائدة

للجميع ومشكور كثير اخي ابوروان علي هزا الموضوع

ونرجو من الجميع ان يعمل بهذا الكلام ومني لكم جزيل

الشكر اعزائي واحبابي اعضاء المنتدي الكريم...

[صالح ابوشوارب]

0
العزيز ابو روان

لك التحية

والله كلامك وكلام الاخ عزيز مظبوط

عشان المواضيع المهمة تأخذ فرصتها في النقاش

-- والله في احد الايام كان لاحد الزملاء 11 موضوع

-- ولكن يا ابو روان برضو خلي بالك مواضيع ( الكرتلة )

هي التي عليها الرواج

[ابومرام]

اخي ابو روان اولا اهنيك على كل المجهودات التي تقوم بها عبر هذا المنتدى ولطرحك لهذا الباب والله عين العقل بصراحة الواحد قد يكون الزمن بالنسبة ليه هنا محدود يكون متابع موضع فجاء تلاقي الموضوع مشى الصفحة الثانية نسبتا لكثرةالمواضيع قد لايسع الوقت اساسا للاطلاع عليها والهدف الاساسي كما ذكرت هي الفائده العامة نفيد ونستفيد ويلا خلونا نشوف مدني دائما فوف !!!!!!

[الزمن المريح]

تسلم ابو روان

فعلا هناك مواضيع مملة ،، و اوافقك الراى ان هناك العديد من من يخاطبنا بلهجة خليجية ،، او ينقل لنا موضوع من متصفح خليجى ،، و احتمال كبير هو نفسه لم يقرأه فقط زيادة الكوم ،،

رحمة بنا يا اخوة ،، فنحن احببنا هذا المنتدى لما يتميز به من مواضيع مفيدة و جادة تضيف لنا الكثير ،، و اتمنى من كل ناسخ موضوع ان يدخل عليه لمساته ،، و يا تينا بالفائدة منه ،،

و كثير من المواضيع مملة جدا لطولها و قلة فائدتها ........
كلنا مبدعين فقط عليك المحاولة و حتما سوف تكتشف انك قادر على المساهمة بموضوعك الذى ينسخ ليشارك به فى منتديات أخرى بدلا من ان تنقل ،، ينقل لك ،،،،،،،

و الله المستعان ،،،،،،،

[مزوني]

والله ما شاءالله عليك يا ابو روان دايما سباق للخير
وفعلا انا مؤييدك تأييد كامل على ما قلت
كثرت المواضيع وقلة الردود
ودالا كلو ما في صالح هذا البيت العامر بأفراده
والكويسة انك حصلت المسألة دي سريع سريع
وانشاءالله انا واثق كل الثقة من أخواني واخواتي
في هذا البيت العامر انهم حيتفهموا المسألة دي
انشاءلله
وهو في المقام الاول بقى بيتنا قبل منتدانا ولا شنو؟
وربنا يديكم الصحة ولعافية

[صالح ابوشوارب]

يا ابو روان

الساعة الان العاشرة والنصف ليلا

والمزاد وصل عدد 8 مواضيع لاحد الاعضاء ؟؟؟؟؟؟؟؟؟؟؟؟؟؟؟؟؟

من يزيد يا شباب

[نيازى كشك]

الاخوه الاعزاء
بعد الا حترام

الزين يشكون من ان المواضيع المضروحة بعضها ليس منة اى فايدة
او لايستفيد منها القارى
اعتقد دة مسئولية المشرفين والمراقبين القائمين على خدمة هذة المنتدى
واتمنى الناس تقدر حتى تعم الفائدة للجميع

وانشاء اللة خير واى قرارات جديدة حاضر للتنفيز انشاء اللة

واللة معاكم يسدد خطاكم

[ابراهيم]

السلام عليكم جميعاً

أحييك اخوى ابو روان لهذه الخطوة الصريحة واثارة هذا الموضوع كما احيي الاخوة المتداخلون فقد اوفيتم وصراحة المنتدى اصبح ممل وكثير من الاعضاء نفروا من المنتدى بسبب المواضيع المكررة والمملة والكثيرة .. وعدم النقاش في المواضيع الجادة واهمالها، نحن هنا يا جماعة فينا مبدعين لا حصر لهم ماشاء الله لكن ما لاقين الحيز عشان يترجمو الابداع في المنتدى ودا من كثرة المواضيع والتي أغلبها ماف ليها داعي ، في بعض الاعضاء تلقاه مزادو عامل 8 مواضيع مرة واحدة زي ما قال اخونا ابو شوارب اها يردو ليهو كيف بس؟ يا جماعة السكر لما يبقى كتير بمسخ عشان كدا الناس تسيب شغل الكميات جانب ونلتفت المغزى والفايدة المرجوة .. المنتدى قد يخسر الكثير وقد يكسب الكثير لماذا لا نجعله يكسب وهو واجهتنا التي نعبر بها عن مدني ناس مدني من خلال المواضيع المطروحة والردود عليها ... حتى نجبر الناس على الاشتراك بدل من ان نجبرهم على النفور ..اذن وبقدر ما أعطانا هذا البورد .. وجب علينا أعضاء ومشرفين أن نمسك بناصيته جيداً ، ونحكم قبضتنا عليه ، وذلك بحضورنا وبجديتنا ومواضيعنا الهادفة وبتفعيل المشاركات بالنقاش والتعقيب السليم، كل هذه المعطيات لها معان مباشرة وغير مباشرة ، فالبورد رائع روعة اهله حميميتهم تواصلهم وتوادهم فهناك الكثيرون بالخارج يتملكهم عشم الدخول تستهويهم هذه الروعة ويجذبهم ترابط ، تلقائية وود لمسوه في اسرة منتدى ود مدني فقليل من الترتيب وقليل من همة وجدية وموضوعية الاعضاء الكرام سيكون سيكون منتدانا الاول.
هذا وما زال في النفس أشياء وأشياء ، ولكن لا أحبذ الإطالة .. ولست أدري إن افدت أم لا فالسماح وهذا ما استطعت كتابته ..

ولكم العتبى حتى ترضوا اذا سمحت لنفسي بأكثر من حقي .. ولكنه حبي ايضاً لهذا المكان وعنصريتي يدفعاني..

[aborawan]

مشكورين احبائي اعزائي على مروركم ولا عدمتكم ودمتم ذخراً لممنتدى

عمي العزيز الرائع ابوشوارب والله انا كمان كنتا متابع للمزاد ده وحتى كان معاي الاخ خالد هاشم على الهاتف وكنتا بحسب ليه في مشاركات العضو النشيط صاحب المزاد العلني الذي تصدرت مواضيه الصفحة الاولى من المنتدى


الاخ نيازي والله نحنا بدورنا ما حا نقصر وكل البنقدر نعملو حا نعملو لكن انا كتبتا الموضوع ده حتى ينتبه كل عضو من المشاركين ويشارك معانا بالمفيد الجديد المختصر واتمنى من الكل يدرك معنى الكلام ده لانو ما عايزين تكون في اي حساسيات في المنتدى لانو انا لو حاولتا امسح او احذف مشاركة لعضو ممكن يتفهم الحكاية دي غلط وانو مقصود من قبل المشرف والخ الخ عشان كده يا اخوان رجاءاً المواضيع الهادفة المفيدة ولا عدمناكم :):)


برهوتا جد ما قصرتا ووفيت وكفيت وما احلى الصراحة يديك الف عافية حبيبي

[خطاب العبيد]

اكيد يابوروان المواضيع اليوم تنحت عن القضية الاساسية التى جاء من اجلها هذا المنتدى وهوا الفائدة العامة والمواضيع التى تعم بالخير الوفير الى الاعضاء والمجتمع كافة .

ارجو ان يعى ذلك كل الاعضاء ونرى مواضيع تشع بنور العلم والمعرفة والفائدة العامة .


لك كل شكرى اخى على هذا البرنامج الجيد بصراحة بصراحة وفى الواجه والاتجاه المعاكس ياقمر صناعى


الزول الشين

[aborawan]

تشكرات خطاب اخوي ويديك الف عافية حبيبي

[فادي الماحي]

الأخ أبو روان : -
أولا التحيه ليك لطرح هذا الموضوع المهم جدا جداً
والواضح من الردود أنوا أغلب الأفراد متفقين معك وأنا بفتكر دي الخطوه الاولي وعشان ما يكون كلام للاستهلاك الناس مفروض تشوف الخطوه الجايه شنو حتي لا يصبح المنتدي كبقية المنتديات كما أشرت من ناحية الانضباط والفائده التي نرجوها :
ولذلك أنا بقترح :
انو اللجنه المسئوله من المنتدي تضع معايير معقوله للمشاركات وقبل ما يتم تنفيذها تعرض علينا هذه المعايير في شكل تصويت لمعرفة القبول حتي لا يكون الطرح قسريا علينا ومراعاةً لأراء الكل .
ولك شكري
و
و
ولكن أعتب عليك قليلا في الانتماء العنصري الزايد لمدينتك وهذا حقك ؟ ويكفيكم أسم المنتدي ؟؟
ولذلك لو قلت :
فوق فوق سودانا فوق تعلو هامتك أعلي
ولك امتناني وشكري

[aborawan]

اولا شكرا كتير الغالي فادي لاهتمامك بالموضوع وكمان شكرا كتير لطرحك حل للمشكلة قد يكون سبب رئيسي في الارتقاء بهذا المنتدى نحو القمم


اما بالنسبة للعتاب فلك العتبي حتى ترضى وانا لم اقصد عنصرة لاننا كلنا شرقا او غربا شمالا او جنوبا اولاد بلد واحدة ونتمنى جميعا ان تحتضننا سماء هذا المنتدى منتدى مدينة ودمدني لكل ابناء السودان ولك حبي وودي

[صالح ابوشوارب]

up.

[أبوريلان]

الأخ أبو روان

سلام

ياريت كل الأعضاء يسمعوا ويعوا هذا الكلام .

وفعلا كثرت المواضيع لا تفيد ، ولكن إذا كانت مواضيع تطرح للنقاش أكيد كل شخص بيدلو بدلوه وبنخرج بنتيجه وآراء مختلفة وهادفه ويستفيد منها الأعضاء وزوار المنتدى ،

عذرا أخونا فادى الماحى فى الجملة التى نادى بها الأخ / أبوروان فوق فوق مدنى فوق وكلنا خلفه بنردد فوق فوق مدنى فوق وهذا المنتدى ليس به عنصرية مع العلم بأن الأخ أبو روان من أبناء فداسى الحليماب يعنى ليس هناك عنصرية والمنتدى يحمل أسم مدنى ومدنى جزء من السودان ، والمنتدى أسس لرفع أسم مدنى عاليا عبر الأثير .


فوق فوق مدنى فوق

[madaniboy]

كاتب الرسالة الأصلية azizeisa
ابوروان الغالي،

انا بثني على كلامك..

وأرجو ان اسجل ملاحظاتي مع احترامي للجميع..

يا شباب.. والله الواحد فينا بقى يحاور محاوره شديدة علشان يلقى ليه موضوع مفيد يقدر يدخل عليه ويناقشه.. وبعدين مسألة النسخ دى اعتقد ما فيش ليها داعي لان معظم المواضيع المنسوخة تلقاها دائما طويلة ومردده وكمان الناس عارفها.. ياريت الشخص ناسخ المقال اعطاء خلاصة للموضوع حتى يستطيع القارىء من قرأته وفهمه وهضمه بسرعة ثم الاستفادة منه - ويجب ان لا ننسى أن خير الكلام ما قل ودل.
كما امل من الاخوة الاعضاء المحافظة على مستوى المواضيع الرائعة للمنتدى لكي تعم الفائدة المرجوة .. واللى ماعنده موضوع يكتبه ليستفيد منه القارىء يمكنه الدخول على المواضيع الاخرى لمناقشتها واعطاء الرأى..
كما اننى أيضا لاحظت ان بعض الاخوة الاعضاء يكتبون موضوعا.. وفي اليوم التالي تجد ردودهم على الاشخاص الذين يمروا على الموضوع في مكان آخر وبأسم مختلف تماما عن الموضوع الاساسي..

فأرجو ان انبه الاخوان للرد على نفس البوست بدلا من فتح بوست جديد للرد.

ولكم كل الود والتقدير والاحترام،

وتسلم ابوروان،

فاقد حنان

[ودأبكرش]

(ومنكم نتعلم)
شكرا على الملحوظه
يديك العافيه

[فادي الماحي]

والمنتدى أسس لرفع أسم مدنى عاليا عبر الأثير .


إذا كان المنتدي من أجل ما ذكرت فأنا منذ هذه اللحظه سأعتبر خارجا عن المنتدي وفي حل مما ينادي به
ولك الشكر علي تنبيهي ؟؟؟؟؟؟؟؟؟؟؟؟؟؟؟
فوق فوق سودانا فوق

[امير عبدالباقي]

الاخ العزيز فادي الماحي
ليس هنالك تعصبيه ياخي والاخوان هنا ماقصدهم شي وسيبونا من الكلام الذي لايقدم كلنا من السودان والسودان ابونا وارجو من الاخ فادي ان يوسع صدره وينظر الي اغلب مشرفي المنتدي ليس من مدني اذن اين التعصب ونحن هنا نناقش موضوع مهم جدا يااخي وارجو ان لانخرج من صلب الموضوع
لان الموضوع المطروح مهم لرفع منتدانا الذي جمعنا جميعا تحت مظلته من غير عنجهيه واصبحت بعض المشاركات لاتخدم منتدانا
فوق فوق سودانا فوق لان السودان فوق مدني

[aborawan]

مرحباً بكم في منتديات ودمدني للجميع



فوق فوووق الجنيد فوق
فووق فوووق فداسي فوووق
فوق فووق مدني فوووق
فوق فوووق كسلا فوق
فوق فووق الخرطوم فووووق


فووووق فووووق سودانا فوووق

[خالد هاشم علي]

الغالي أبوروان
الأخوة المشاركين...
سلام كتير وأعتذر ياأخي أبوروان للتأخر في المشاركة وذلك لظروف سفري خارج جدة...
ولا أظن أن الأخوان تركوا شيء لأعقب عليه فقد أوفوا وكفوا...
لكن مداخلتي للأخ الحبيب فادي الماحي ذلك العضو الرائع الذي أتابع كتاباته... فياأخي فادي...
لا تفهم قصد أخونا أبوريلان غلط ، فهو حتما لا يقصد ذلك المعني ... فمدني مثل ماقلنا مرارا وتكرارا وعاء يسع للجميع ولا يخفي عليك وجود أعضاء وهم في قمة التميز وهم ليسوا من سكان مدني...
ثم رفع شأن مدني لا يغضب أحد فرفع شأنها هو رفع للولاية ورفع للسودان ولا عصبية وتعصب في ذلك...
أخي فادي...
رفعة مدني عبر الأثير لا تتاح إلا بمشاركاتكم وتضامنكم وحبكم وتآخيكم في هذا المنتدي ، ونعول كثيرا عليك وعلي أمثالك في رفعة كل بقعة من بقاع السودان الحبيب... فلك العتبي حتي ترضي ومرحب بي مشاركاتك التي نعتز بها.


ودمتم...

[الزبير محمد عبدالفضيل]

اخي ابو روان اولا اهنيك على كل المجهودات التي تقوم بها عبر هذا المنتدى ولطرحك لهذا الباب والله عين العقل بصراحة الواحد قد يكون الزمن بالنسبة ليه هنا محدود يكون متابع موضع فجاء تلاقي الموضوع مشى الصفحة الثانية نسبتا لكثرةالمواضيع قد لايسع الوقت اساسا للاطلاع عليها والهدف الاساسي كما ذكرت هي الفائده العامة نفيد ونستفيد ويلا خلونا نشوف مدني دائما فوف !!!!!!

[أبوبكرحامد]

تشكر عمنا أبوروان على هذا الحرص على المنتدى واوافقك الرأى أن الكثير من الموضوعات للإستهلاك فقط وتفتقر للمضمون ، فقط أختلف مع من اقترح تدخل المشرفين لحذف بعض المشاركات فالرقابة يجب أن تكون ذاتية من العضو نفسه لإدراج مواضيع قيمة ، كما ان تدخل المشرفين لحذف موضوع يثير الكثير من الحساسيات ، أما عن التعصب لمدنى فهو شرفٌ لاندعيه غير أن ذلك لايعنى إلغاء الآخرين وسأكرر بلا ملل مقولتى التى مفادها أن أعضاء المنتدى من غير أبناء مدنى هم الأولى بالمنتدى لأنه اختيارهم الحر والواعى فمدنى هى سودان مصغر يسع الجميع بلا تمييز ومدنى هى مزيج من الأعراق والثقافات التى انصهرت فى بوتقة قومية يندر وجودها فى غيرها من المدن .

[رهيب]

كاتب الرسالة الأصلية أبوبكرحامد
تشكر عمنا أبوروان على هذا الحرص على المنتدى واوافقك الرأى أن الكثير من الموضوعات للإستهلاك فقط وتفتقر للمضمون ، فقط أختلف مع من اقترح تدخل المشرفين لحذف بعض المشاركات فالرقابة يجب أن تكون ذاتية من العضو نفسه لإدراج مواضيع قيمة ، كما ان تدخل المشرفين لحذف موضوع يثير الكثير من الحساسيات ، أما عن التعصب لمدنى فهو شرفٌ لاندعيه غير أن ذلك لايعنى إلغاء الآخرين وسأكرر بلا ملل مقولتى التى مفادها أن أعضاء المنتدى من غير أبناء مدنى هم الأولى بالمنتدى لأنه اختيارهم الحر والواعى فمدنى هى سودان مصغر يسع الجميع بلا تمييز ومدنى هى مزيج من الأعراق والثقافات التى انصهرت فى بوتقة قومية يندر وجودها فى غيرها من المدن .

[aborawan]

تشكرات يا حبايب على تفاعلكم مع الموضوع ونسال الله ان يستوعب الجميع محتوى الموضوع ويساعدونا عشان نقدر نعمل حاجة لرفعة المنتدى مع حبي ومودتي

[أبوريلان]

الأخ فادى الماحى

سلام كتييير

أخى فادى أخذت ردى بعصبية زائده وأنا آسف أخى لو كان كلامى به أى نوع من أنواع العنجهية أو التعصب لمدنى ، ولكن ماذكرته وأكرره على الملأ إذا كان ماسوقته من حديث عن أن هذا المنتدى لرفع أسم مدنى عبر الأثير يزعج الآخرين لهذا الحد فأقولها مدنى فى حدقات العيون وأهلها يعشقونها بشقف ونعتز بهذا المنتدى الذى زاد إنتماءنا لها من على البعد وآخى بين أبناء مدنى فى شتى بقاع العالم عبر الأثير ، وهو مجهود أبن مدنى المهندس أبوبكر محمد المبارك ، الذى تفتخر مدنى بإنجابه ، ولكن أخى فادى كل من أتى طوعا أفردنا له حبا بحب وأصبح من نبع مدنى قلبا وقالبا ولا نعتبر أى عضو أو عضوه بهذا المنتدى إلا مدنيا حتى النخاع ولا نفرق بين عضو على الآخر ، أما أن تقول أنت فى حل مما ينادى به المنتدى هذا الكلام أعتبر نفسى أبدا ماسمعته لأنك عضو رائع وأنا شخصيا أتابع كتاباتك وأتلهف لقراءة جميع مشاركاتك ، أما أنا وأعوذ بالله من كلمة أنا عضو ليس له الحق فى أن يفصل أو يوقف أو يحذف موضوع أو عضو من المنتدى و أنا وأنت أعضاء فى هذا المنتدى ليس إلا والمنتدى باقى بدونى وبدونك ،وكما قال لك أخى خالد هاشم (مدنى وعاء يسع الجميع ) .

الأخ أبو روان

سلام كتييييير

آسف اذا شوشت لك فى موضوعك الرائع يارائع ومزيدا من الإبداع .

[waheeb]

اخي الغالي ابو روان.. والله انت دائما تطرق المواضيع التى تستحق النقاش وكثره المواضيع التي لا

تحوي مضمون جيد او منسوخه من جه اخري بلهجات اخري يجعل الانسان لا يستطيع متابعة كل

المواضيع .. نرجو من الجميع ومن انفسنا اولا ان نختار المواضيع الهادفه التي تنمي فينا الروح

الثقافيه والاجتماعيه حتي تجعل المنتدي اكثر تميزا..

اخي فادي نحن كلنا ابناء السودان ونحن لسنا من مدني ولكن عندما نقول مدني نوقن ان مدني هي

فعلا الوعاء الذي يجمعنا جميعا والمنتدي جعل جميع الاعضاء منصهرين في بوته واحده فنحن من

الباقير ال مدني ابناء مدني واذا بحثت في الاعضاء تجدهم يشكلون كل مدن السودان وذلك لسعه

صدر واريحية مدني وناس مدني ..

ونقول معاك فوق فوق سودانا فوق.. فوق فوق جزيرتنا فوق- فوق فوق مدني فوق..

مشكور مره تانيه أخي ابو روان...

[خالد هاشم علي]

ياسلام عليك يا أبوريلان يارائع....


عجبني كلامك وتوضيحك للأخ فادي فقد إعتذرت له بالصورة التي ترضي الجميع ، وأنا علي يقين بأنك لم تكن تقصد ماوصل إليه أخي فادي..

الغالي فادي...
إتصلت علي رقمك ( حصلت عليه من عنوانك بالرابطة ) مرتين ولم أحظ برد... عسي المانع خير..
كل المني يافادي أن توسع صدرك ومرحب بيك مليييييييييييييييييييييييييييون مرة في موقعك الذي نعتز جداً بأنه يضم خيرة أبناء السودان...

أخي وهيب...

كل يوم تكبر في نظري زيادة ... سلمك الله وأدلمك ذخراً للمنتدي...

[فادي الماحي]

كاتب الرسالة الأصلية aborawan
مرحباً بكم في منتديات ودمدني للجميع



فوق فوووق الجنيد فوق
فووق فوووق فداسي فوووق
فوق فووق مدني فوووق
فوق فوووق كسلا فوق
فوق فووق الخرطوم فووووق


فووووق فووووق سودانا فوووق

[ابراهيم]

اخواني اعضاء ومشرفي منتدى ود مدني

السلام عليكم ورحمة الله

أستميحكم العذر بكتابة هذه المشاركة والتي هي اعتقاداً منى لاهميتها
وملاحظتى لما كتبه اخونا naz_imam في بوست دعوة لعودة العصافير المهاجرة (http://wadmadani.com/vb/showthread.php?s=&threadid=5941) كما أن هناك ما فى المنتدى من مشاركات وردود يدورفى نطاقها 0

أتمنى أن لا يكون منتداتنا مجرد متنفسا عما يعتمل فى قلوبنا وصدورنا من تفاعلات تنتهى بمجرد ان نرى اسماءنا وموضوعاتنا منشوره على صفحات المنتدى ونظن ان بذلك قد عملنا ما بوسعنا .. فكما ارضينا انفسنا هل ارضينا الآخرين؟ .. ما اود ان اوصله هو فكرة المشاركة حيث لا يكون المنتدى منتدى الا بالمشاركة الفعالة حيث أن بعض الاعضاء لا يشاركون الا في بوستاتهم والتعقيب عليها وارضاء انفسهم وكتابة بوستات جديدة أخرى اذاً فهذه أنانية فقط ولا تحقق الهدف المنشود من المنتديات التي هي للأخذ والعطاء وتبادل الأفكار والآراء واحترام وجهات النظر والغاية في النهاية الوصول الى اجماع بل الى توافق فى الرؤى و الاولويات والاتجاهات .. اذاً حتى يتثنى لنا المشاركة وتحقيق اهدافنا والاستمتاع بوجودنا هنا فلابد من وقفة من الجميع والوقفة تكون كالآتي:

1- التقليل من فيض البوستات ولنفرد لانفسنا مساحة لمشاركة الآخرين ولنترك لهم حيز لمشاركتنا وهكذا تكون المتعة.

2- مراجعة المنتدى اول بأول قبل كتابة اي موضوع لتفادي التكرار.

3- المحاورة في المواضيع بوعي وفهم وعدم الاكتفاء بالرد بكلمات بسيطة التي تنهي مواضيع النقاش دون الوصول الى نتيجة مرضية مقنعة للجميع.

4- احترام وجهات النظر ... وقبول النقد برحابة ..

5- وضع المواضيع في مواعينها (العامة ، الثقافية ، الرياضية ، مدنيات، ترحيب، العاب وطرائف وصور ،) "بحيث لكل مقام مقال" .

6- تفقد الاعضاء الغائبين .. وهذا من شأنه توطيد روح التواصل وبث المودة بيننا.

هذا ما جادت به قريحتي ربما اصبت وإن اخطأت لكم العتبى واتمنى من الجميع بوضع كل ما يراه مناسباً .. من أجل مدني فالمنتدى بدا ينتشر بصورة واسعة وواضحة لذا وجب علينا اظهاره بصورة تليق بمدني وتعكس ثقافة اهلها..

يا جماعة ما تقولوا الزول دا عملوه مشرف عايز يورينا عضلاتو والله دا بس حبي للمكان دا واحترامي للناس الفيهو ..

ولكم تحياتي وتقديري

[أبوريلان]

أبراهيم

ينصر دينك

وقطعت جهينة قول كل خطيب .


مشكووووووووووووووووووووووووووووووووور

[السنيوره]

يديك العلفيه ياابو روان كفيت ووفيت وماقلت حاجه غلط كلامك عين الحقيقه

[aborawan]

ابراهيم انا ما قادر اقول ما عايز اصرح لكن بالجد ما خليت شئ يتقال يديك الف عافيه

[مهيرة]

كاتب الرسالة الأصلية أبوبكرحامد
تشكر عمنا أبوروان على هذا الحرص على المنتدى واوافقك الرأى أن الكثير من الموضوعات للإستهلاك فقط وتفتقر للمضمون ، فقط أختلف مع من اقترح تدخل المشرفين لحذف بعض المشاركات فالرقابة يجب أن تكون ذاتية من العضو نفسه لإدراج مواضيع قيمة ، كما ان تدخل المشرفين لحذف موضوع يثير الكثير من الحساسيات ، أما عن التعصب لمدنى فهو شرفٌ لاندعيه غير أن ذلك لايعنى إلغاء الآخرين وسأكرر بلا ملل مقولتى التى مفادها أن أعضاء المنتدى من غير أبناء مدنى هم الأولى بالمنتدى لأنه اختيارهم الحر والواعى فمدنى هى سودان مصغر يسع الجميع بلا تمييز ومدنى هى مزيج من الأعراق والثقافات التى انصهرت فى بوتقة قومية يندر وجودها فى غيرها من المدن . ]

لك التحية الأخ أبو روان

[امينو]

فعلا الموضوع دا رااااااااائع جدا وبشجعنا احنا الاعضاء الجدد انا اننا نفكر مليون مرة

في الموضوع اللي ممكن نقدموا للاعضاء بحيث انو الفائدة تعم على الجميع وديل

نقطتين انا شخصيا بعتقد يجب توافرهما في الموضوع المطروح للنقاش :

1- الموضوع لازم يكون متفرد وجديد او على الاقل مطروح باسلوب جديد وبأفكار جديدة

2- ان يكون مضمونه يهم جميع شرائح المجتمع وليس موضوع شخصي يعبر فيه

الكاتب عن افكار شخصية .

وشكرا على التنبيه وارجو من الجميع التعاون لرفع شأن المنتدى اللي هو في الآخر

مننا ولينا .

وفوووووووووق فووووووووق سودانا فوووووووق

[aborawan]

مهيرة

امينو

يديكم الف عافية

[shashi]

يديك الف عافية اخي العزيز ابو روان .. عداك العيب .. ارى ان تحذف المواضيع المكررة وذلك بواسطة المراقبين مع ارسال رسالة اعتذار وتبرير الحذف لصاحب الرسالة .. المواضيع التي تجتمع الآراء على انها ليست زات جدوى تحذف مع الاعتذار لصاحبها ومشكور على ذلك وشوفوا اراء الناس ايه ويديكم الف عافية
مع تحياتي ابو احمد

[روبش]

[QUOTE]كاتب الرسالة الأصلية ابراهيم
[B]اخواني اعضاء ومشرفي منتدى ود مدني

السلام عليكم ورحمة الله

حتى يتثنى لنا المشاركة وتحقيق اهدافنا والاستمتاع بوجودنا هنا فلابد من وقفة من الجميع والوقفة تكون كالآتي:

1- التقليل من فيض البوستات ولنفرد لانفسنا مساحة لمشاركة الآخرين ولنترك لهم حيز لمشاركتنا وهكذا تكون المتعة.

2- مراجعة المنتدى اول بأول قبل كتابة اي موضوع لتفادي التكرار.

3- المحاورة في المواضيع بوعي وفهم وعدم الاكتفاء بالرد بكلمات بسيطة التي تنهي مواضيع النقاش دون الوصول الى نتيجة مرضية مقنعة للجميع.

4- احترام وجهات النظر ... وقبول النقد برحابة ..

5- وضع المواضيع في مواعينها (العامة ، الثقافية ، الرياضية ، مدنيات، ترحيب، العاب وطرائف وصور ،) "بحيث لكل مقام مقال" .

6- تفقد الاعضاء الغائبين .. وهذا من شأنه توطيد روح التواصل وبث المودة بيننا.

[aborawan]

مشكورين حبايبي لاهتمامكم بالموضوع ويديكم الف عافيه

[konan_great]

احب اولا اشكرك ابو روان على الموضوع الهام ده:


فعلا الموضوع دا رااااااااائع جدا وبشجعنا احنا الاعضاء اننا نفكر مليون مرة

في الموضوع اللي ممكن نقدموا للاعضاء بحيث انو الفائدة تعم على الجميع وديل

نقطتين انا شخصيا بعتقد يجب توافرهما في الموضوع المطروح للنقاش :

1- الموضوع لازم يكون متفرد وجديد او على الاقل مطروح باسلوب جديد وبأفكار جديدة

2- ان يكون مضمونه يهم جميع شرائح المجتمع وليس موضوع شخصي يعبر فيه

الكاتب عن افكار شخصية .

وشكرا على التنبيه وارجو من الجميع التعاون لرفع شأن المنتدى اللي هو في الآخر

مننا ولينا .

وفوووووووووق فووووووووق سودانا فوووووووق [/B][/QUOTE]

[بوتشى]

ابوروان الغالي،

انا بثني على كلامك..

وأرجو ان اسجل ملاحظاتي مع احترامي للجميع..

يا شباب.. والله الواحد فينا بقى يحاور محاوره شديدة علشان يلقى ليه موضوع مفيد يقدر يدخل عليه ويناقشه.. وبعدين مسألة النسخ دى اعتقد ما فيش ليها داعي لان معظم المواضيع المنسوخة تلقاها دائما طويلة ومردده وكمان الناس عارفها.

[aborawan]

مشكورين اعزائي على اهتمامكم بالموضوع ويلا ختو يدكم فوق يدنا وايد على ايد انشاء الله قريب نطير السماء :):)

[صالح ابوشوارب]

ابو روان

المباراة اليوم مولعة

النتيجة الآ ن 5 مواضيع مقابل 6 موضوع

وانتظروا كووووووووم من الاهداف

[zola]

شباب روقو وروقو .. الموضوع ما مستاهل أنو أخونا فدي يسنحب من المنتدى عشان إقتراح أو رأي والذي نتمنى أن لا يفسد للود قضية وأخونا وعمنا أبو روان الله يديه العافية والمصلحة للجميع إنشاء الكريم ... فكلنا أخوان وكلنا من السودان وكلنا من مدني والموضوع عادي ياشباب ولا عنصرية بيننا .... أحب مدني وكل أهل مدني كحبي للسودان وكل أهل السودان ....

[aborawan]

العم العزيز ابوشوارب

انا متابع المباراة معاك بس نعمل شنو ؟؟؟؟

زولا اخوي
مشكور على مرورك بس ما قدر افهم انتا قاصد شنو

[الدبلوماسي]

السلام عليكم ورحمة الله وبركاته
بعد التحية ...

وتحية الود والإخاء لأهلنا أهل الجزيرة الطيبين أهل الثقافة والأدب والفن لأنكم أنتو ناس طيبين عشان كده نقول الكلام ده للناس الطيبين .

بعد قرائتي لموضوعك وملاحظاتك أخ أبو روان أعجبت بصراحتك العظيمة ونقدك البناء لمصلحة منتدانا أو بيتنا إن صح التعبير .

صراحةً لم أجد ما كتبة كل مرة أكتب وأمسح فالاخوان وفوا وكفوا .

وأنا أيد الموضوع وأييد الأخ الماحي على اقتراحه بأن يكون هنالك معايير معقولة للمواضيع الجديدة...وفي اعتقادي و انشأ ألله أن الأخ صاحب المزاد لم يكن في نيته غير مشاطرتنا المواضيع التي حس أنها مفيدة ولاكني أنوه علية وأقول له رويدك فهنالك أخوان يردون أيضاً مشاطرتك مواضيعهم
وك مني وافر التحية والإخلاص
الدبلوماس

[ود الدبلوماسي]

اولا اشكركم على لفت انتباهي لهذا الموضوع اما بالنسبة للرد فهو مطروح في موضوع جديد

[صالح ابوشوارب]

تشكر عمنا أبوروان على هذا الحرص على المنتدى واوافقك الرأى أن الكثير من الموضوعات للإستهلاك فقط وتفتقر للمضمون ، فقط أختلف مع من اقترح تدخل المشرفين لحذف بعض المشاركات فالرقابة يجب أن تكون ذاتية من العضو نفسه لإدراج مواضيع قيمة ، كما ان تدخل المشرفين لحذف موضوع يثير الكثير من الحساسيات ، أما عن التعصب لمدنى فهو شرفٌ لاندعيه غير أن ذلك لايعنى إلغاء الآخرين وسأكرر بلا ملل مقولتى التى مفادها أن أعضاء المنتدى من غير أبناء مدنى هم الأولى بالمنتدى لأنه اختيارهم الحر والواعى فمدنى هى سودان مصغر يسع الجميع بلا تمييز ومدنى هى مزيج من الأعراق والثقافات التى انصهرت فى بوتقة قومية يندر وجودها فى غيرها من المدن .

قرب تعال ما تبتعد !!!!!!!

[خالد هاشم علي]

الغريبة الساعة جنبك تبدو أقصر من دقيقة... والدقيقة وانت مافي مرة مابنقدر نطيقها..