ضيفنا الاسبوع ده خالد هاشم [الأرشيف]

خالد هاشم علي

30-04-2005, 12:09 PM

البطاقة الشخصية:

خالد هاشم علي محمد
مواليد 1971 بمدينة تمبول حيث كان والدي عليه رحمة الله مهندس بوزارة الري ، وكل كم سنة في منطقة.
بكالريوس تجارة تخصص تسويق.
أسكن حي مايو بالأربعين ( جار طارق التوم ) بجوار مظلة الشهيد نقيب طيار / عصام الدين هاشم علي. بعد محطة الشجرة.
متزوج .
اعمل مدير تسويق في مؤسسة الأساوة للخدمات التجارية.
اهوي الرياضة والفن بصفة عامة.
التعليم الإبتدائي : بقرية الكمر ، وقرية البعاشيم ريفي 24 القرشي بإمتداد المناقل
المتوسط : مدرسة مدني الأميرية
الثانوي : مدرسة السني الثانوية ، حيث كنت عضو لإتحاد الطلبة في دورة 88-89 م وتقلدت منصب نائب رئيس الإتحاد وسكرتير العهلاقات الخارجية.
نقلت إلي مدرسة كنانة الثانوية وذلك لظروف سفر شقيقي الأكبر لكورس بالخارج وإضررت للمكوث بكنانة مع أسرته.
قمت بتكوين أول إتحاد لطلاب مدرسة كنانة الثانوية وتقلدت منصب رئيس الإتحاد في دورته الأولي.
التعليم الجامعي . بجامعة الإسكندرية ثم العودة للسودان للتكملة بجامعة السودان كلية الدراسات التجارية.
والدي متوفي منذ إثني عشر عام والدتي الحاجة آمنة حامد (ربنا يخليها ويديها الصحة والعافية ) وترتيبي وسط أخوتي كالتالي :

1/ سلوي هاشم علي متزوجة ومقيمة بالخرطوم.
2/ دفع الله هاشم علي كبير الكيميائين بشركة سكر كنانة.
3/ عصام الدين هاشم علي نقيب طيار وأستشهد بحرب الجنوب في عام 1984
4/ أبوبكر هاشم علي محاسب بشركة الأمين الطبية وقد سافر لللإستقرار بالسودان
5/ عمر هاشم علي مهندس سيارات بجدة
6/ عثمان هاشم علي مدير التكافل بشركة شيكان ببتأمين بودمدني
7/ علي هاشم علي مدير الشرطة الأمنية ببورتسودان ( رائد شرطة
8/ العبد لله
9/ آخر العنقود (م/ محمد هاشم علي ) خريج جامعة الجزيرة تكنلوجيا الأغذية الدفعة 16 موظف بإحدي شركات المغربي بجدة .

شفتوا أقدميتي تعبانة كيف؟؟؟؟؟

خالد هاشم علي

30-04-2005, 12:13 PM

احبتي

مزوني : مشكووور ياعسل وبالمناسبة أنا عندي إحساس إني بعرفك ماعارف ليه ، لمن نتقابل في مدني ح اقدر أتأكد وحتي لو ماكنت بعرفك فنحن إتلاقينا مرة في خيالي وفي شعوري ألف مرة.

خالد هاشم علي

30-04-2005, 12:17 PM

أبوبكر العريس

والله إنت ابو الناس كلهم ومشكووور علي كلامك .
وبالمناسبة ذكري الختان أكيد حتكون عالقة بذهن كل واحد مننا ، عني فاأخوك عمل فيها اكروبات عديل كده وآآآخر مضاربات وجري وسك ( التقول حرامي ) وكان إسمه عم بابو وما بنساهو طول عمري ، وعلي أخوي ( ضرب مني قروش الخته ). ولحدي هسة قاعد أطالبو بيها ، لكن هو ضابط بوليس ومابلقي معاهو حق.

خالد هاشم علي

30-04-2005, 12:19 PM

الغالي خالد .... ياسمي
الزول الوجيه ، أول حاجة مبروك الخطوبة وربنا يتمم ليك بي خير .
بالمناسبة ياخلود زوجتي واقفة جنبي وقالت ليك ربنا يكون في عونك ، يعني هن عارفات إنهن ( وجع قلب).

nana

30-04-2005, 09:53 PM

الاخ خالد
السلام عليكم ورحمة الله تعالى وبركاته
اتمني ان يكون الكرسي باردااااااااااااااااااااااا عليك
وسوالي صغيروني
من خلال سيرتك الذاتية تنقلت كثيراً فماذا اضافت لك هذه التنقلات في المدن ومدى الاستفاده

امير عبدالباقي

30-04-2005, 09:58 PM

لاخ العزيز خالد
لك الف تحيه
سوالي الاول من اين استوحيت تكوين رابطه اعضاء المنتدي؟
2/ ماسبب قله الاعضاء في الاشتراك فيها
3/ لماذا لم توضع حتي الان البنود لها ؟ وايه رايك بالاشتراك الشهري لها حتي تري النور
ولنا بقيه

ابومرام

30-04-2005, 10:49 PM

] ابوهشام منور( والله بيتنا نور كلو زينة ) وانت تعطر الكرسي بالجلوس وانشاء الله يكون برد سلام وانا شايف الجماعة منتظرنك بفارق الصبر وربنايقدرك عليهم 0
سؤالي المرة الاولي خليه خفيييييييييييييييييييييييييييييييييف
حسب تخصك في قسم التسويق ماهي رويتك المستقبلية للسودان في هذا المجال بعد الاوضاع الجديدة لك التحية ولينا عوده اذا مده الله في الاجال 00

الزبير محمد عبدالفضيل

30-04-2005, 11:29 PM

الاخ خالد يسعد اوقاتك مشكور علي هذه البطاقه التي عرفنا ك من خلالها

سؤالي احب ان تتحفنا بما يجيش في خاطرك من ذكريات عن مدني

وماهي مكانت ودمدني داخل نفسك

أتمني لك التوفيق والازدهار في حياتك

بسم الله الرحمن الرحيم علي نفسي وأهلي ومالي

ضياء الدين احمد

01-05-2005, 04:23 AM

والله سلامات يا ابو الخلد ‘ قلت لي بابو اوعي اكون بابو الهندي يا ابوهاشم
بعدين تعال هنا يا ابو هاشم انا غايتو حكاية انك مواليد 71 دي ما مقتنع بيها
يا خالد انا بعد عرفتك انت كنت زول كبييييييييييير وبنتعلم منك امور الحب والجكيس ههههههههههههه ؟
سوالي اولا ماذا تعني لك مدينة الدويم ثانيا ماذا تعني لك ودمدني الاهليه
وفي الختام تحياتي لمحمد هاشم وعثمان هاشم

خالد هاشم علي

01-05-2005, 09:43 AM

نانا يانانا مسختي سكرنا كملتي...
تسلمي ياصباح علي مرورك ... وبخصوص سؤالك
أنا تنقلت كثيراً سواء في المدن أو الريف وقابلت معظم سكان السودان بقبائله وعاداته وتقاليده وطقوسه ، فمثلاً مدينة كنانة هي مدينة صناعية في المقام الأول وتبدأ الحركة فيها منذ صلاة الفجر في الأيام العادية ، أما في موسم الإنتاج فالحركة لا تتوقف ليل نهار فقد تعلمت من كنانة الإنضباط في العمل والدقة والسرعة وتحمل المسئولية.
تنقلي في الريف أفادني أكثر وأكثر فقد عايشت أهل القري وسكنت معهم وأكلت معهم ملاح ( أم تكشو وملاح الويكاب وأم شعيفة ) يعني عشت القرية بكل إحداثياتها ، وقضيت بينهم أجمل أيام عمري ولا زالت علاقاتنا مستمرة مع أهل القري ، وقد إكتسبت منهم كل الطيبة وحلو المعشر فأنا راجل عشري شديد.

مشكورة مرة تانية..

خالد هاشم علي

01-05-2005, 11:39 AM

أمير المنتدي يارايع....

أولا مشكور علي إتصالك الهاتفي وياها المحرية فيك دايما بتتفقد الأخوان.

بخصوص سؤالك...
نبعت الفكرة بعد النداءات التي أطلقناها لتكريم الأخ المبدع أبوبكر محمد المبارك ، فقد كان الموضوع يستحق التحرك والتحرك السريع لتجميع الناس في كيان واحد لتنطلق منه نشاطاتنا وأهمها تكريم الآدمن.

قلة المشاركة لا تعني الرفض بل تحفظات لدي البعض بخصوص إعطاء البيانات الحقيقية كاملة ، ونحن نعشم في المزيد المزيد من المشاركة وطريق المليون ميل بيبدأ بخطوة ولا شنو ؟؟؟
وضع البنود والدستور مرحلة لاحقة لحصر العضوية فنحن الآن في مرحلة التسجيل والحصر . بخصوص الإشتراكات فستتم لاحقاً بعد تكوين المكتب التنفيذي وإجازة الدستور ( ماااالك ياأمير عايز تطفش الناس وتخليهم يكبوا الزوغة).

خالد هاشم علي

01-05-2005, 11:47 AM

الغالي أبومرام... سلام
السودان مقبل علي مرحلة هامة وحساسة جداً من تأريخه ، وهي مرحلة مابعد الحرب وخطط التنمية.
المستهلك السوداني يختلف عن أي مستهلك في العالم فهو علي العكس تماما يتقبل كل ماهو جديد في السوق ويحب التغيير وليس له ولاء لسلعة معينة أو ماركة معينة...مثلاً المستهلك السعودي يفضل حليب المراعي أو رز أبو كاس وليس من السهل إقناعه بأي منتج آخر إلا بإتباع أساليب تروجية مثل تخفيض الأسعار والهدايا المرفقة مع المنتج والجوائز والسحوبات وهكذا.
لكن عندنا في السودان فلا تحتاج لمثل هذة الشياء فلدينا تقبل فطري للجديد وعلي فكرة ده قمةالذوق.
ومشكوووور ياأبومرام...
ملحوظة:
تبقي مشكلة إزدواجية القرارات التي تؤثر سلباً علي التجارة والتسويق والإستثمارات.

خالد هاشم علي

01-05-2005, 11:50 AM

سعادة السفير

يكفي أن أقول:

(مدني في حدقات عيوني باقية في جواي أثر)...
بخصوص ذكرياتي بودمدني فقد بدأت الكتابة عن هذا الأمر في موقع ودمدنيات في بوست للأخ الرائع ( الزمن المريح ) بعنوان حديث الذكريات...

تسلم ياسعادة السفير ...

خالد هاشم علي

01-05-2005, 11:58 AM

ضياء وداعة....
سلام كتير ياحبيب
وأنا غصباً عنك من مواليد 71 وشهادة ميلاد ماتسنين ، لأني من مواليد الأرياف وماعندنا تزوير في الأرياف والتزوير عندكم إنتوا ياناس المدن.. بعدين الكبر الشفتني عليهو ده كان كبر عقل سااااااااااكت. وتقول لي أنا علمت أمور الحب والجكيس ؟؟؟؟ ياخي إنت من ماولدوك تبكي وتجعر في الجكس ، وكل ماأزور مدني الأهلية ألقاك من ضل شجرة لي ضل شجرة ( أوع بس خطيبتك تكون معانا في المنتدي وتقرأ كلامي ده)

الدويم هي وطني الثاني حيث أصول الوالدة الله يديها الصحة والعافية ، حيث الفسيخ والجبنة الأصليات. والمعلومة دي جبتها من ويييييين ؟؟؟؟
الأهلية... برغم إني كنت بجيها زيارة إلا إنه كنت أرتاح فيها وأهم ميزاتها إنها عرفتنا بي بعض يارائع.

روبش

01-05-2005, 11:58 PM

أخي .. خالد
لك التحية ..
تبقى سيرتك هي الكلام ..
شنو قصة انا ( جار طارق التوم ) ده .. ما لقيت غير طارق التوم يعني للوصف
اتمنى ان تكون اجابتك صريحة وتورينا الحاصل بالضبط شنو ( مع طارق التوم ) وخليه بيني بينك ( يعني كلام في الاضان )

خالد هاشم علي

02-05-2005, 02:06 AM

الغالي روبش... اسامة
سلامي الكتير ليك ولكل ناس قطر...
بالمناسبة لأنا كتبت موضوع كامل بعنوان ( لماذا جار طارق التوم ) في منتدي ودمدنيات وذكرت فيه الأسباب التي دعتني لذلك وهي أنه وبمجرد إستقرار الاسرة بحي مايو وكلما كنت أعطي وصف منزلنا لأي شخص وأقول ليهو حي مايو بالأربعين بعد محطة الشجرة جوار المظلة ، يقوم هذا الشخص يسألني علي طول ( وييين لي ناس طارق التوم؟؟؟؟).
وبيني وبينك وكلام في الاضان :
طارق التوم بي سجمه ورماده إلا أنه علم علي رأسه نور ونار ، وأعتز جداً بصداقتي به وجيرتي وعشرتي معه التي تجاوزت العشرين سنة ، فعبك أرسل تحياتي لهذا الرائع المبدع في كل شيء.

ودمت...

عارف إني ماريحتك ياروبش وكان نفسك أشتغل ليك طارق ولا شنو ؟؟؟؟؟

مهيرة

02-05-2005, 05:11 AM

الأخ خالد
نشكرك أولا علي فكرة الرابطة الهائلة

---

أصبحت متجول سوق قبل الدراسة الجامعية !!

زمان الناس هداوة بال
وانت زمانك الترحال
وما
أجمله من ترحال !

تمبول - مدني - المناقل -الكمر - البعاشيم - 24 القرشي
سكر كنانة

الإسكندرية

هذه السياحة في العمر قد لا تتكرر - وهناك واحة من الأحلام ونحن صغار تتكون في هذه الأسفار
مابين الواقع والأوهام

هذا السفر مابين وفاة الوالد عليه رحمة الله وحرية الخيال وجماعية الأخوان
ماهي الخريطة التي كونتها شخصية خالد في :
الرأي
الحلم
الشجاعة
الإنتماء
اللون السياسي
الزواج
الأبوة

تسلم 0-0

خالد هاشم علي

02-05-2005, 08:50 AM

الغالية مهيرة بت عبود...
سلام ليك ولي ناس عمان... وبالمناسبة داير اسجل إعجابي بكتاباتك وشخصيتك التي تتضح من خلال الكتابة والتي تنبيء عن مستوي تفكير رائع ، وأمس كنت قاعد ( أقطع فيك مع نفر كريم من أهل المنتدي والمشرفين ) وطبعا جبنا سيرتك بكل خير وربنا يوفقك وتتحفينا دائما بالروائع.
بعدين عليك الله براحة علينا من الكلام الهبر هبر ده ، والحاجات دي تقوليه لي أبوبكر حامد وناس ضياء الدين والرميساء وكده ، وسأحاول أن أرد علي حسب فهمي لصياغة السؤال وعذراً إذا خرجت عن النص. وسأجيب عن أسألتك بدون تحديد للنقاط وبدون ترتيب فتحمليني.
والدي عليه رحمة الله أعز شخصية بالنسبة لي وقد كنا مثل الأصحاب في كل شيء برغم ترتيبي المتأخر بين الأسرة ، إلا أن ذلك لم يمنع من التقارب الذي لا تخطأه عين ، وقد كنت أتمني وادعو الله في كل وقت أن يحين أجلي قبله لأني لا أقوي علي فراقه ، لكن... شاءت الاقدار ، وربنا يجمعنا به في جنات الخلد بإذن الله.
علاقتي بالوالد سمحت لي بأن أنهل منه كل ماهو جميل فقد كان مثل صديقي ، وزرع في نفسي كل الحب لأسرتي حتي أصبحت أحبهم أكثر من نفسي.وأنتمي لهم بكل جوارحي
وقد كنت أستشيره في كل شيء ( حتي أمور الجكس ) وكان لي نعم المعين فقد علمني أن أنظر للموضوع من كل جوانبه قبل الخوض فيه وكان عنده حكمة بقولها لي علي طول ، كان بقول لي ( ياولدي إرتبط بي البتحبك ، مش بي البتحبها ) في البداية ترددت من منطقه وإعتبرته منطق غريب ، لكن سمحت للتي تحبني بان تقترب مني لأعرف مكنوناتها وبدأت أحترم حبها لي ثم بدأت أحبها وأتعلق بها ، وها نحن معاً في قصة حب تكللت بالزواج دامت لأكثر من 19 سنة ( فشكراً لك ياوالدي ).
بخصوص الشجاعة وكده فمثلي مثل أي سوداني أصيل ( الفينا مشهودة عارفانا المكارم نحن بنقودها والحارة بنخوضنا ).
أما اللون السياسي فلا ثم لا ... حيث ومن وجهة نظري المتواضعة لا يوجد حزب في السودان يستحق أن أنتمي إليه وأن يمثلني ويمثل الشعب السوداني.
تزوجت منذ عام ولم نرزق بالذرية حتي الآن ن وذلك لظروف عدم إستقرار المدام معي حيث تركتها بالسودان ولم تلحق بي سوي من عدة أشهر فقط وربنا يرزقنا ( دستة عيال ) آآآآآآآمين يارب.
شكرا كتييييير ليك يامهيرة إنك خليتني أطلع حاجات كانت جواي وأسعد جداً بالكلام عنها خصوصا فيما يتعلق بالوالد عليه رحمة الله. وآآآآسف علي الإطالة بس حبيت أغطي كل جوانب أسألتك...

ودمتي..

أبوبكرحامد

03-05-2005, 06:31 AM

أخونا أبوهاشم ...............سؤالى حارقنى وعاوز أسألو : علاقتك شنو بالحقل الطبى لأنو زوجتك دكتورة ، وكمان عذبت ضياء فى قصيدة ناس الصيدلة ، فالحكاية شنو؟ سؤال برىء

ابو المهتــدي

03-05-2005, 09:36 AM

بسم الله الرحمن الرحيم
ذالك الحي مايو اربعين ومحطة الشجرة 0 تجد فيها انسان القرية بكل الصفات 0رقم مدنية المكان 0 مع العلم ان مدني بكاملها نسيج مدينة وقرية
لمحات مصورة منك لهم لك التحية 00

خالد هاشم علي

03-05-2005, 10:47 AM

الغالي بكري حامد...
سلام وحب وشديد سلام بردو ليك يابكري سلام عليك

تعرف ياحبيب علاقتي مع الحقل الطبي زي علاقة ضياء الدين مع الكورة ( تصدق ماعنده معاها شغلة ).
وبالمناسبة جني وجن المستشفيات والحقن والمرض وكل حاجة تتعلق بالحقل الطبي ، لكن عاد نسوي شنو مجبوووووووورة خادم الفكي علي الصلاة.

قصيدة ناس الصيدلة عندها موقف حلو ولذيذ يتضح من خلال القصيدة ، عشان كدة يابكري دايرك تقيف لي ضياء الدين ألف أحمر وتصر عليهو يديك القصيدة عشان تنزلها.

تسلم يالحبيب

خالد هاشم علي

03-05-2005, 10:52 AM

عمنا العزيز أبو المهتدي...
تحية من القلب لك ايها الرائع في كل شيء.

حي مايو ذلك الحي الهادي المتشبع بروح القرية وشووووووية من طبع المدن أعتز جدا بإنتمائي له ، وإرتباطي بأهله.
فحتي هذة اللحظة لم تفتر بين سكان الحي تلك الاحميمية التي تجدها في القري وأحياء ودمدني القديمة ، وبرغم أن الحي يعتبر من الأحياء الجديدة (بالنسبة لمدني القديمة ) إلا أن معظم سكانه يعود أصلهم لأحياء مدني القديمة أو القري المجاورة مثل أبوحراز والشبارقة وخلافه.
لهم مني كل كل كل التقدير واإحترام الذي لم ولن ينقص مهما إمتدت بيننا المسافات وفرقت بيننا السبل.

ناس حي مايو ... أدامكم الله

waheeb

03-05-2005, 06:52 PM

الاخ / العزيز خالد هاشم علي ..

الي الان الكرسي بردا وسلام عليك وذلك بسبب اجاباتك الدبلوماسيه أحيانا...

سؤالي الاول: ترحلت كثيرا ولكن لابد من ان هنالك قريه او مدينه لها مكانه خاصه لديك ما هي؟

سؤالي الثاني :- شغل التسويق شغل يعتمد علي مقدرات المسوق ما هي مواصفات المسوق الجيد؟

الثالث :- امنيه في الخاطر؟

لك ودي واحترامي...

خالد هاشم علي

03-05-2005, 10:33 PM

أخي العزيز وهيب...
تحياتي...

تظل منطقة 24 القرشي والريف المحيط بهاهي في خاطري حيث قضيت بها أجمل أيام حياتي وهي مرحلة الطفولة وقد تكونت شخصيتي في تلك المنطقة . وصدقني ياوهيب حتي هذة اللحظة وعندما أكون غارقاً في النوم والأحلام ويمر بحلمي ناس بيتنا وبيتنا وجيراننا أفاجأ بأن بيتنا في الحلم هو البيت الذي نشأت فيه في منطقة 24 القرشي.

بخصوص التسويق فأنا معك تماما بأنه يعتمد علي مقدرات المسوق وإمكانياته وصفاته التي يتميز بها وأهم هذة الصفات :
1/ أن يكون مقتنع تماما بقدراته ومقتنع جداً بالمنتج الذي يسوقه ، فلا يستقيم أن تقنع شخصاً بشيء تكون أنت نفسك غير مقتنع به ، فعليك أن تحب منتجك وأن تعرف كل مميزاته وعيوبه وأن تعمل علي إظهار مميزاته بكل حماسة وتتحدث عن عيوبه ومحاولة التخفيف منها حتي (لا تكون كاذبا).
2/ اللباقة وإحترام عقلية المستهلك .
3/ الإهتمام بالمظهر الحسن.
4/ الزبون دائما علي حق ، وعليك أن تصبر وتتحمل تساؤلاته وإنتقاداته والرد عليها بكل رحابة صدر ، فأمزجة المستهلكين تختلف ويجب أن تتعامل معها.

ملحوظة :
يوجد نوع من الأصناف لا يحتاج لمسوق يحمل هذة الصفات وغالبا ماتكون هذة الأصناف تسوق نفسها بنفسها ولا تحتاج لإقناع مثال لذلك ( البيبسي ).

أمنية في الخاطر.....

متيييييييييييييييييييييييييييين يامسافر عودة للسودان؟؟؟؟؟

الزمن المريح

03-05-2005, 10:48 PM

الاخ العزيز خالد هاشم
التحية لك و مرحبا بك فى كرسى المشاهير ،،،،

بردا و سلاما عليك الكرسى ،،

عمك بابو ،، مستشفى 24 القرشى ،، ماذا تعرف عنه الان ،،،
هل تعرف ابنه امير ،،،

هل تعرف عمك حسن قبوجة ،قدوم كلب ،، حسن منقة ،، لاعب الاتحاد الشهير ترة
و فريق الرابطة ،،

بالمناسبة يا خالد بالجد ذكرياتك جميلة و حلوة جدا فياريت تزيد من كتابتها ،،

اذا قلت لك انك اضافة الى المنتدى فماذا تقول ،،

بالتأكيد لعبت كورة ،، ففى اى الفرق او الروابط لعبت ،،

و اخيرا فرصة للعتاب ،، لماذا لم ترد على الايميل ،،،،

اتمنى لك كل التوفيق فى حياتك و ربنا يرزقك الذرية الصالحة ،،،

خالد هاشم علي

04-05-2005, 02:53 AM

الغالي الزمن المريح...

ياسلام عليك ياخي وأنت تعيدني إلي 24 القرشي ، كل الأسماء التي ذكرتها أعرفها جداً جداً وخصوصاً بدر تره فهو صديق شخصي لي ولأخواني الكبار ، وبالمناسبة كان الفضل لوالدي عليه رحمة الله في تسجيل تره للإتحاد ، حيث أنه كان ينوي التسجيل للأهلي وبالفعل تمرن معهم ، إلا أنهم ماطلوا في التسجيل ومر علينا للزيارة حيث أننا إنتقلنا في ذلك الوقت لمدني ، فعرض عليه الوالد اللعب للإتحاد . وذهبنا به للتمرين في ميدان الملك ، ولأول مرة أشوف تسجيل لاعب يتم بهذة السرعة.
وأذكر تماما أول مباراة لترة وقد كانت ضد الزهرة وأحرز فيها ترة ثلاثة أهداف. إنقطعت أخباره عني مؤخراً بعد إنتقال الفريق العسكري للواء 20 إلي منطقة كوستي ( طبعا ترة يلعب لفريق اللواء 20 ).
والله يازمن يامريح ماشفت رسالتك لكن بإذن الله اشوفها واتصل بيك هاتفياً وصدقني إنت إضافة أكثر وأكثر بكثير.
بخصوص الذكريات فساأواصل كتابتها في البوست بتاعك الرائع ...
الذكريات صاقة وجميلة...
مهما تجافينا بنقول حليييييييييييييييييييييييييييييييييييييييييييييييي يييييلها

مشكور يالحبيب...

أبوريلان

04-05-2005, 03:08 AM

الأخ العزيز

خالد هاشم

جار طارق التوووووم والأخ طارق التوم زميل عمل وصديق له التحية من على البعد

سلام كتييييييييييييييييييييييييير ليك أخ خالد

أنا شخصيا ما عندى سؤال ليك محدد لأنى دخلت اليوم وعرفت جلوسك فى الكرسى البارد وتابعت كل الأسئلة والردود الأروع من رائعه يا رائع .

## أمنيتى أن ألقاك شخصيا ونتعرف عن قرب ولك مودتى ##

عزيز عيسى

04-05-2005, 04:20 AM

الحبيب الغالي خالد،

أنا جيييتك يا أبو هاشم..

اشكرك على تفضلكم بالجلوس والرد على اسئلة الاخوان والاخوات..
ويا سلام على ذكرياتك و اسلوبك الجميل في الرد على الاسئلة..
وما تخاف سؤالي خفييييييييييف.. بس عايز افتفتك شويه..

زي ما بقولوا - مدني كفر ووتر - لاحظت انك بتهوي الرياضة والفن..
أي نوع من الفنون.. هل الفن بجميع اشكاله ولا في نوع معين من الفنون بتهويها..
هل تمارس العزف على أي نوع من الألات الموسيقية.. وهل لديك ميول للغناء؟

مع فائق حبي وتقديري لشخصكم الرائع،

عزيز

خالد هاشم علي

05-05-2005, 11:15 AM

الغالي ياسر ... أبوريلان

تحياتي وسلامي الكثير وفعلاً إنت مسجل غياب في الفترة الأخيرة ، إنشاء الله خير.
أعتز جداً بمعرفتك وح أتصل بيك في الأيام الجاية لمزيد من التعارف.

تحياتي لك ولأفراد أسرتك...

وربنا يديم الأخوة والمحبة...

خالد هاشم علي

05-05-2005, 11:23 AM

ياأعز عزيز
سلام وشوق مطر عديل كده.
أول حاجة حمدلله علي سلامة بنتك وعرفت من أبو روان إنها تعرضت لحادث خفيف ، وإنشاء الله تكون بخير..

بخصوص سؤالك فأنا أحب الإستماع للأغاني بصفة عامة والقديم منها بصفة خاصة ( الفن الأصيل) وطبعا ماعندي أي مهارات في العزف ولا حتي في الغناء ( إلا في الحمام).

لك كل تحياتي وفائق إحترامي....

ودمت

waheeb

05-05-2005, 01:25 PM

شكرا اخي خالد هاشم علي الرد الوفي علي الاسئله..

24 القرشي- هنالك صديق لي عارف محمد الحسن... هل تعرفه؟

عزيز عيسى

06-05-2005, 10:36 AM

ابوهاشم العزيز،

شكرا ليك والحمدلله بناتي الاثني ربنا سلمهم..
وبشكرك ايضا على تفضلك بالاجابة على سؤالي..
وحكاية الغناء في الحمام دى في ناس كثير بتغني في الحمام..
لكن ما لاقيا اللى يكتشفها..!!

وتسلم،

عزيز

ابراهيم

06-05-2005, 06:34 PM

سلامي عليك يا استاذ خالد كان نفسي اجيلك من زمان ونأسف للتأخر عليك في هذا الكرسي واحيي للصنددة حتى الآن والسيطرة على الاوضاع ... والشكر للأخ ابوروان الذي اتاح لنا هذه الفرصة والتي تعرفنا من خلالها على خيرة ابناء مدني والى الاسئلة ------------------------------------>

1-بحكم إنك درست بالاسكندرية والسودان:
أ/ ما هي أوجه الشبه والاختلاف في الدراسة بين السودان ومصر؟

2- بصفتك خبير في التجارة ومدير تسويق في مؤسسة للخدمات التجارية.
أ/ ما هي أوجه القصور في المؤسسات التجارية السودانية؟
ب/هل استطاع السودان الاستفادة من مغتنياته من موارد (تجارية، زراعية، بشرية) نسبياً؟
ج/ إلى أي مدى ساهم الحاسب الآلي في تنمية التسويق والتجارة عموماً؟

3- رايك في الكيزان شنو؟

4- استاذ خالد الكمبيوتر والانترنت بحر علم واسع فى رايك ما هى الطريقة المثلى للاستفادة من هذا العلم الغزير وما هى انجع طريقة لتطوير الذات فى هذا المجال؟

5/ما الذي لفت انتباهك في منتدي ودمدني؟

ارجو أن تكون اسئلة خفيفة عليك
ولك العتبى إذا اثقلت عليك...
وتقبل احر تحياتي

صالح ابوشوارب

07-05-2005, 08:16 AM

.
الاخ خالد سلامات يابتاع ( الجكس النظيف ) هههههههـ

ماهي اخبار المشط والتسريح

اوع تقول لي بقي ميدان بللي بعد هذه الفترة

.

خالد هاشم علي

07-05-2005, 09:40 AM

الغالي إبراهومة...
سلام ومرحب بيك في أي وقت...
الدراسة في مصر والسودان لا تختلف كثيراً في المضمون بإستثناء أن مصر تتبع النظام الفرنسي والسودان يتبع النظام الإنجليزي. لكن وبعد دخول العولمة وأنظمة والتجارة العالمية تتضاءل الفرق كثيراً . أضف لذلك صعوبة النظام المتبع قي السودان ( لوائح الجامعات ) . كما لا يخفي علي الجميع الفائدة القصوي التي تجني من السفر والتنقل . وأنت في مصر لا تحس بالغربة بمعناها الحقيقي.
أوجه القصور في المؤسسات السودانية تكمن معظمها في الروتين القاتل المتبع في البيع والشراء ، وكذلك عدم الرغبة في التطوير علي المستوي الذاتي والمستوي العام.
السودان غني بموارد كثيرة لم يستغل منها إلا نسبة ضئيلة جداً من تلك الموارد ، وحتي التي أستغلت لم يجني المواطن شيئاً ( ماعارفنها بتمشي وين ؟؟؟).
الحاسب الآلي وفر كثيرا من الجهد والوقت لإتمام عملية العرض والبيع والشراء فقد أصبح العالم قرية صغيرة وتستطيع أن تشتري من أمريكا وأنت جالس في السعودية وأن تبيع في الصين دون تعقيدات.
كما تفضلت ياأخي أبراهيم فالكمبيوتر والنت عالم واسع لكن علينا أن نأخذ منه ماينفعنا ( كل علي صعيده الخاص وتخصصه ) وأن نبتعد عن مساوئه التي لا تخطأها العين ، وأمثل طريقة للإستفادة من الكمبيوتر هي أن أعرف تماما ماذا أريد وأن أراقب نفسي قبل كل شيء ، أراقبها حتي أوجهها التوجه الصحيح بعيدا عن بلاوي النت.
منتديات ودمدني وماأدراك ماودمدني...
أنا أحب كل شيء يمت لمدني بصلة ... أحب ناس مدني ..أحب تاكسي مدني ... أحب القبة وشارع النيل وشارع سنكات جبرونا وبانت والدباغة ودردق وحي مايو .... وكل شبر في مدنينا.
لفت إنتباهي في المنتديات تلك الحميمة التي تربط بين الأعضاء والعلاقة الطيبة التي تجمعهم ورغبتهم الصادقة في تطوير العلاقات أكثر وأكثر.

مشكووور ياإبراهومة وأسألتك ماخفيفة ولا حاجة لكن أصبر لي ح أردها ليك لمن تنزنق زنقتي دي ها ها ها ها.
ملحوظة..
شفتني زوغت كيف من سؤالك بتاع الكيزان... هوووووي ياإبراهيم ماتودينا في داهية.

تسلم ودمت..

خالد هاشم علي

07-05-2005, 09:45 AM

الغالي صالح أبوشوارب...

الجكس فضلت خيرك ... إنتي من مربع 11 يعني أستاذ في الجكس لا شنو ؟؟؟؟ هاها ها.

لكن تعرف ياصالح خلاص كل حاجة طارت لينا وبقي مافي لا مشط ولا مراية ... خلاص كبرنا ....
مشكوور علي المرور ...
بوسة قوية لبنتك الأمورة دي وقول ليها دي من عمو خالد...

ابراهيم

07-05-2005, 12:37 PM

الغالي خالد بالنسبة لسؤال الكيزان ..

استخدم الدبلوماسية ولك الحق أن تستعين بصديق .. افو

وبالنسبة للزنقة كان غيرك اشطر انا سبقتك زماااااااااااااااان

كان ليك هههههههههههههه

أبوبكرحامد

07-05-2005, 11:33 PM

حبيبنا أبوهاشم ..........الإسكندرية مدينة تنام نهاراً لتصحو ليلاً وهذا دأب الدبايب " طلاب جامعة بيروت العربية بالإسكندرية " - رابطة أبناء مدنى ودورتها الرياضية المميزة - الترام فى ترحاله من محطة الرمل وحتى سان استيفانو مروراً بالجامع وبكله والهداية " محلات الفول " - مؤكد ألقت هذه المشاهد بظلالها عليك - فإلى أى مدىً أسهمت فى تشكيل رؤاك ؟

خالد هاشم علي

08-05-2005, 12:00 AM

ود المأذون ياغالي...
الظاهر عليك إسكندراني درجة أولي ( يامرسي ياأبو العباس ).
جليم ومحطة الرمل والمنتزه والإبراهيمية وسيدي بشر وسيدي جابر المحطة شارع الجيش وشارع صفية زغلول .... كلها في الذاكرة ولا تنسي...
رابطة مدني بالإسكندرية التي ولدت عملاقة كان يرأس أحد دوراتها الناجحة شقيقي عثمان هاشم علي ( جامعة بيروت/ دبيب كبيييييييييييييييييييييييير).
كانوا شعلة نشاط ، وفعاليات مستمرة فلا نكل ولا نمل ولا نحس بالغربة ‘ وخصوصا الدورات الرياضية حيث كان يقود منتخب مدني المبدع ( ناجي حسن ) حارس مرمي النادي الأهلي.

تشكلت في دواخلنا الكثير والكثير من المعاني الحلوة وأهمها أن نحب بعضنا البعض وأن نكون مثل الأخوان وزيادة ...
أن تكون همومنا مشتركة وأن تكون قلوبنا علي بعض....
وأهم حاجة يابكري وإنت سيد العارفين كان جيبنا وووووواحد.
يعني لو ناس الشقة كلهم حوالاتهم تأخرت وفي وااااااحد بس حوالته وصلت ... حيتكفل بالبقية ويتحمل كافة مصاريفهم إلي أن تصل حوالتهم .. وحتي عندما تصل الحوالات لا نتحاسب ( أديتني كم وداير مني كم ؟؟؟) يعني العندو قروش يعمل ، وبدون إتكاليه.

ياربي الحاجات دي لسه موجودة؟؟؟؟؟

خالد هاشم علي

08-05-2005, 12:04 AM

إبراهومة ياحلو....
برضو بلاقيك في زقاق مضلم وأوريك ضرس... وح أطالب أبو روان يعمل لينا إعادة بالتصوير البطيء... عشان أمزمزك....

تقول لي أستعين بي صديق عشان سؤال الكيزان؟؟؟؟ أها لو الصديق ده نكر وقال أنا ماقلت لي خالد كده ؟؟؟ البحلني شنو ؟؟؟

عزيز عيسى

09-05-2005, 10:41 AM

ابوهاشم الظريف،

والله ضحكتني بردك على ابراهيم.. انت عارف برهوته ده فعلا جاري بي وراك يعصر فيك وعايز يورطك بأي شكل كان مع الكيزان علشان يضحك عليك في النهاية.. انت كان تسأله هو برضو ما صديق ليه ما يرد على الموضوع ويريحك.

عزيز

خالد هاشم علي

09-05-2005, 10:44 PM

ياأعز عزيز...

والله فكرة مية المية ونجدتني بيها من زنقة إبراهيم...

ياإبراهيم... كلام ليك يالمنطط عينيك...

رأيك في الكيزان شنو؟؟؟؟

خالد هاشم علي

09-05-2005, 10:56 PM

الغالي وهيب...

ماقادر استحضر الاسم لان الفترة طالت.. لكن لو شفت الشكل احتمال كبير اعرفه...

أبوبكرحامد

11-05-2005, 05:46 AM

ماعندى سؤال جاهز بس واجعنى كرسيك البارد ده تقول كرسى مساج ، طيب أحكى لينا قصة أول شكلة حصلت ليك مع المصريين وانت برلوم ، وعاوزين نعرف موقف برلمة حصل ليك فى اسكندرية.
أنا طبعاً درست فى الزقازيق لكن اعتدت أغسل أحزانى وأشرها فى شاطىء الأبيض المتوسط الفسيح

خالد هاشم علي

12-05-2005, 12:45 AM

الغالي ود المأذون...
سلامي وأشواقي...
تقول لي الكرسي بارد؟؟؟ وين مع ناس إبراهومة ،،، وكلام مهيرة الكبار كبار ده.

تظل الإسكندرية مدينة لا تمحي من الذاكرة... ومن الذكريات وأول يوم أسافر للإسكندرية من القاهرة مع شقيقي عثمان بالقطار وطبعا أخوك كان فاتح خشمو مترين ( مذبهل ) وأتفرج يمين وشمال وكان قلبي مقطوع لأن القطار كان ماشي بسرعة رهيبة وكان قطار جديد يادوبو نازل الخدمة من كم سنة ويطلقوا عليه إسم ( المارلبورو) لأن ألوانه كانت تشبه ألوان علبة السجائر.
المهم شوية كده إتعودت وكان معنا في العربة مجموعة من السودانيين وبدأنا نتعرف علي بعض ، وقد تعرفنا علي أسرة مكونة من بنتين ومعاهم ولد جايين سياحة ( طبعا كان جكس نضيف) وبعد كده ماحسيت بالمشوار .
وصلنا الإسكندرية وطلعنا من المحطة ، ونحن قاطعين الشارع عشان نركب التاكسي من الناحية التانية إندفع نحونا شاب مصري في سيارته وقرب يصدمنا وقعد يقل في أدبه. طبعا نحن ماسكتنا وأديناهو ليك من النوع أبو كديس. إتضح لنا إن الشاب ضابط شرطة في المباحث ، لكن برضو ماخفنا منه .
حجزونا الناس والشكلة قربت تنتهي لكن الضابط تاني قل أدبه.. في هذة اللحظة تصادف مرور فتاة سودانية من جنوب السودان وسمعت إساءة الضابط لينا.. والله يابكري البنت دي طلعت ليك شبشبها ووقعت ليك في الضابط ده رصيع صاح لمن قام جاري... وسمعته ليك فارغة لمن شبع وقالت ليهو ياكلب نحن قاعدين عندكم بي فلوسنا...
أنا سبت الشكلة وقعدت أعاين لي البنت دي... شوف السودانيين وقت الشدة كيف ؟؟؟ شوف الوحدة الحقيقية ( مش وحدة السياسيين) .

أول برلمه لي كانت مع( الإنتركوم) وكان موجود في العمارة عندنا وهو طبعا زي الجرس( يعني الواحد يضغط الزر وأنت ترفع السماعة من جوة الشقة وتعرف مين الزاير وبعد كدة تضغط علي زر والباب ينفتح) المهم دق الجرس والشباب قالوا لي في واحد عايزك ... طبعا أخوك رفع السماعة وقعد يسلم ليك علي الراجل وشبكته ليك سلامات صاح ومشتاقين وإنت وين ماعايز تجينا زيارة( كنت فاكر دي سماعة تلفون ).وإنت ضارب من وين هسه؟؟؟ طبعا أخوك بقي مضحكة وكل الناس عرفت بي الموقف ده. وبعد كده بقيت سنير وبطبقه في الجنيور والبرلم.

aborawan

24-02-2006, 04:59 AM

بتشجيع ودعم من بعض الاعضاء قررنا نحن الموقعون ادناه باستضافة الاخ خالد هاشم على الكرسي الساخن
الموقعون :
محمد ابوروان
محمد ابوروان
محمد ابوروان
محمد ابوروان
محمد ابوروان
محمد ابوروان
:):):):)

طبعا ود المأذون كابي جرسة شديد وكان مفروض يكون الضيف وهسه بكون اخر انبساط بي قعدتك دي ما اوصيك نزلتك من الكرسي تختارو هو بعدك عشان تتفشى :):)

يلا نخش في الاسئلة

رأيك وبمنتهى الصراحة في تبادل الصور ما بين الجنسين عبر الماسنجر والبريد الالكتروني ؟

راجعين ليك

أبوبكرحامد

25-02-2006, 03:43 AM

لود الماذون فرحتان ، فرحة عدم جلوسه هذا الإسبوع فى الكرسى الساخن ، وفرحة بمناسبة استضافة ابو هاشم " أشوف فيك يوم ياظالم". بالجد ياابوروان من الصباح دخلت على الموقع وريقى ناشف ، لمن لقيت الضيف خالد هاشم جريت نفس عميق .

ابراهيم

25-02-2006, 09:01 AM

ابو هاشم سلامات ..
والله مشتاقين ..

لود الماذون فرحتان ، فرحة عدم جلوسه هذا الإسبوع فى الكرسى الساخن ، وفرحة بمناسبة استضافة ابو هاشم " أشوف فيك يوم ياظالم". بالجد ياابوروان من الصباح دخلت على الموقع وريقى ناشف ، لمن لقيت الضيف خالد هاشم جريت نفس عميق .

ههههههههههه
ود الماذون ازيك ياخ بالطريقة دي بتطفش الراجل ... وتلحقو عمك ابو شوارب
لكن يا ابو هاشم دي وقعة تقع فيها؟ .. انا غايتو اسى جيت اسلم عليك واهنيك بجلوسك في الكرسي الساخن
واهديك غنية (خواطر فيل) بالمناسبة السمحة دي ..
وبجيك تاني لما تخلص من ود الماذون انشاء الله الحق..

تحياتي وتقديري

aborawan

25-02-2006, 09:05 AM

لكن صدقني مافي اى مفر ولا زوغة وخليك مستعد شايف خالد هاشم لبد وشكلنا حا نحذفو من عضوية المنتدى عشان جرستو دي لانو هنا ما عايزين جرس وبكاء

نعد تنازلي لحدي 10 لو ظهر مبروك عليك يا ود الماذون واجهز بالاسئلة
لو ما ظهر يبقى يا ود الماذون هنا المشكلة ولازم تبل راسك عشان تكون مستعد لي موس ابراهيم الله يكفيك شر اسئلتو شفتا الدنيا دوارة كيف نلف وتلف وتجيك تاني
9
8
7
6
5
4
3
2

ابراهيم

25-02-2006, 09:18 AM

ابو روان انت مفروض تعمل قوات حفظ الكرسي ..
عشان يحافظوا على سخانة الكرسي وبالمرة يمنعو الزوغانات ..
بعدين ابو هاشم دة صنديد انا بعرفوا كويس وانا ما عندي ليهو اسئلة كتيرة بس عندي سؤال من السنة الفاتت لي حسي ما جابوا لي.

aborawan

25-02-2006, 09:33 AM

يا جمااااااااااااااااااااااااااااااااااااااااعة هووووووي ود هاشم طلع متجرس جد جد هسه اتصلت عليه بالتلفون فتح فيني النيران وجاتني مكالمة قطعت تلفوني معاهو بي صريح العبارة المكالمة الجاتني دي حلتني منو ومفروض اتصل عليه تاني حسب ما قلتا ليه لكن لاااااااااااااااااااااااااااااااااااااااااوزتا

ياود هاااااااااااااااااااااااااااااااااااااااااااااااشم ياخي ما انا القعدتك و زي ما قلتا ليك الزول داااااااااااااااااااااااااااك ياهو الاختارك وطلبك بالاسم (( الزول داك منو الله اعلم احتمال كبير اكون انا :):):) )) ابقى مارق يا زول وخلي اللبدة يا اللابد :rolleyes: :rolleyes: ;) :rolleyes: ;) لبوووووووووووووووووووووووووووووووووووووووووووووووو ووووووووووودة

خالد هاشم علي

25-02-2006, 12:10 PM

أفو أفو أنا بزوق كمان ... انا خالك ياشوشو... أنا ...أنا الدلمة التقيل دمو انا المابياهو بت عمو... بس والله النت فاصل عندي في المكتب لأسباب فنية بحتة... عموما أنا جاااااااااااااااااااااااهز

خالد هاشم علي

25-02-2006, 12:17 PM

ود المأذون الجرسة وزعيم منظمة الراقدين قش ...ليك التحية وكل الأشواق ياحبة لكن بقول ليك أعمل حسابك الدنيا دي دوارة وسداااااااية ورضاااااااية... وخفف الأسئلة لأنو ح ألبت ليك في اللفة وإعتبر ده تهديد واااااضح وصريح..... برهوتة ياغلي تسلم لي إنت وانشاء الله ماأعدمك ...بس سؤال شنو اللي ماجاوبتك عليهو من السنة الفاتت...ياخي انت قلبك أسود ولا شنو؟؟؟؟؟؟؟؟؟ بعدين ياخي السنة بتسقط الديون خلي الأسئلة.ههههههههههه بس عليك الله براحة براحة في الأسئلة علي عشان أنا يتيم وأبوي ميت... تعرف يابرهوتة أنا ماخوفي إلا من سوباوي وكاظم وسالي وناس المنتدي الثقافي لأنو تعرف كلامهم كباااااااااااااااااااار وتقعد نص اليوم عشان تقدر تحدد السؤال وين.........عليك الله وصيهم علي وياحبذا لو خلو البساط أحمدي وسألوني بالعربي.ههههههههههههههه

خالد هاشم علي

25-02-2006, 12:23 PM

نجي لي سؤال الجنا المرض ده ( ابو روان).... بخصوص تبادل الصور بين الجنسين في النت فانا ارفض ذلك جملة وتفصيل لاسباب كتييييييرة اولها انها بداية للدخول في الخطوط الحمراء والوقوع في المحظور... واتخيل معاي يامحمد انك كنت مع واحد صاحبك ولا زميلك قام فتح ليك اإيميل بتاعو ولقيت صورة لي واحدة قريبتك ( اختك ولا زوجتك ولا حتي زميلة ولا معرفة) كيف حيكون رد فعلك وتصرفك في الموضوع ده؟؟؟؟؟؟؟؟؟؟؟... طبعا حيكون رد فعل رهيب وحتزعل وتقلب الدنيا... عشان كده انا حاجة مابرضاها لي نفسي مابعملها مع غيري ودمت لي ياغالي ..... ( النبي كيف ... ماأخير؟؟؟)

saly

25-02-2006, 10:38 PM

الاخ خالد ازيك

امس خشيت النت بالليل وتحديدا بعد واحده بالليل هفت لي اقرا كرسيك كده

وقريتو سطر سطر لقيت اجوبتك كلها عايمه ومفطفطها ده كلام ياراجل

بجيك بكم سؤال خفيف عشان ما تقعد تكبكب بعدين وغلبت النصيحه ما عرفت اجيك بوين

***ما هي معالم التاريخ السودانية فهل صحيح ان التاريخ السوداني مفبرك وان التاريخ السوداني علي هواء الساسه

والحكام ؟؟؟

***وهل كل ما دون في التاريخ السودان كان يصب لمصلحة فئة او جماعة معينه ؟؟؟

***قـــــوة الإراده والعــــــزم على فعل المستحيل ... هل يمثل شيئا في حياتك ؟؟؟

***لو خيرته بين ثلاث محطات يمر بها كل انسان ايهما تختار و تفضل ان تعيش

الطفوله, نفس عمرك , الكهول و لماذا ؟

***بين الليله وبين يوم بكره .... في شنو في رايك ؟؟

***الحاصل شنو في شمال ولز وماذ اذا تدخل ثوار الكونترا في عملية خليج الخنازير وما هي مشكلة صواريخ الروس

النووية المنصوبة في كوبا ؟؟؟

***هل تضرب امريكاء ايران قريبا علما بان نشوب حرب بين امريكا وايران نسبة الاحتمال تصل الي 85%؟؟؟

***الإنسان دوما يعانق الجمال والروعة ويبحث عنهما حتى ولو بيد غيره هل أنت من هؤلاء؟

*** ماذا اخذ منك الانترنت ومجتمعها وما اعطاك الانترنت؟

***صفه تعجبك في ""خالد هاشم "" وصفة تتمنى أن تتغير؟

واخر سؤال

/...............؟ انت عارف وانا عارفه؟؟؟

ويهدي النكلمك

خلي زوغاتك دي

وامسكهم لي سؤال سؤال

امشي اختصرهم في سطرين وخلي عايم

يلا بستاذنك اسع واكيد لي عوده كان الله سهل

عشوشه

26-02-2006, 01:46 AM

عماد الصادق

26-02-2006, 06:25 AM

عاوزين نخش نحي أبوهاشم..
ونشجع أبوهاشم...
بعد ماتجاوب على سالي وعشوشة
وسؤال ابراهيم البايت...
بعد داك ندردش معاك....

أبوبكرحامد

26-02-2006, 09:18 PM

sambaaa

26-02-2006, 10:06 PM

الأخ / خالد

سلام الله يا أخوي

والله بصراحة كده ... سمعنا عنك إشاعات كتيرة جداً ..

قالوا انك بتاع مظاهراااااااات .. وحرق لساتك .. وجديع حجار ..

وقالوا كنت بتفرتك الحفلات .. ومدمن سينماااااااااات ..

وكمان بتاع فتن .. لأنك فتنت عمنا ابوشوارب مع مرتو ..

وقالو ... وقالو .... والله قالوا كتير ..

ما هو ردك على هذه الاتهامات ؟؟؟

وبصراحة اكتر ... نطالبك بكتابة مزكراتك الشخصية .. بكل تفاصيلها .. كرد جميل لعمنا ابوشوارب

وما هي علاقتك بأخوانا اولاد بمبا ؟؟.. ( قالو اسكندراني )

ماهي علاقتك بسوووووق عتيقة .. بتاع الخضار ؟؟؟
وشكراً يا باشا :)

خالد هاشم علي

26-02-2006, 10:41 PM

ما هي معالم التاريخ السودانية فهل صحيح ان التاريخ السوداني مفبرك وان التاريخ السوداني علي هواء الساسه
والحكام ؟؟؟
***وهل كل ما دون في التاريخ السودان كان يصب لمصلحة فئة او جماعة معينه ؟؟؟
شوفي التاريخ نحن ما زلنا نفتش ليها فى التاريخ ونسال عنها الاجداد ونسال عنها الاحفاد ونسال عنها الاحفاد ونسال عنها المستقبل اللسع سنيينوبعاد
السودان انظري بس للناس الاشرفوا على الخرطوم عاصمة الثقافة وتعرفي السبب؟
اين الشعراء اين الادباء اين المفكرين
يا سالي ما ممكن نجيب زول من المنطقة الصناعية ونعملوا امين عام للخرطوم عاصمة للثقافة ؟
واحد غايتو مرة كتب لكن ماب اقدر اجيب اسموا قال فى مقال طويل
الخرطوم عاصمة السخافة

قـــــوة الإراده والعــــــزم على فعل المستحيل ... هل يمثل شيئا في حياتك ؟؟؟
قوة الارادة والعزم على فعل المستحيل حاجة بنظر ليها منظور سامي جدا وبعتبرها من الحاجات المهمة جدا في حياتي لانو مافي هدف ممكن يتحقق من غير ارادة ولا عزم .. وديل عاملين اساسيين للنجاح في حياتنا وتحقيق تطلعاتنا

لو خيرته بين ثلاث محطات يمر بها كل انسان ايهما تختار و تفضل ان تعيش
الطفوله, نفس عمرك , الكهول و لماذا ؟
طبعا الطفولة .. احلى شي الطفولة والبراءة وانا بموت في شي اسمو الاطفال .. وبحس انها احلى مرحلة ممكن الواحد يمر بيها في الحياة ..

بين الليله وبين يوم بكره .... في شنو في رايك ؟؟
في حرف الواو

الحاصل شنو في شمال ولز وماذ اذا تدخل ثوار الكونترا في عملية خليج الخنازير وما هي مشكلة صواريخ الروس
النووية المنصوبة في كوبا ؟؟؟
احيك والله على السؤال ده لانو سؤال مهم جدا ومتاكد كثير من الاعضاء ما بكونو سمعو بعملية خليج الخنازير وانا عندي عنها معلومات بسيطة ومن زمان منتظر ازيد معلوماتي عن العملية دي وواضح جدا من سؤالك انك على علم تام بالعملية وانا من هنا استأذنك بافتتاح موضوع يحمل اسم خليج الخنازير وتتولين انتي سرد قصة هذه العملية بالتفصيل الممل ومافي اي زوغة

دي المعلومات العندي وملخصها أن الـ Cia كانت قد أعدت خطة للهجوم على كوبا في عهد سلفه الرئيس السابق أيزنهاور، وذلك بإرسال مجموعات من الكوبيين المهاجرين في هجوم لاحتلال جزيرة كوبا بدعم من الجيش الأميركي. أمر كنيدي فور توليه الحكم بتنفيذ الخطة وذلك في إبريل/ نيسان 1961. لكن الهجوم البرمائي على خليج الخنازير فشل فشلا ذريعا باعتراف كنيدي نفسه.

في أكتوبر/ تشرين الأول 1962 اكتشفت المخابرات الأميركية أن السوفيات يبنون قواعد لصواريخ هجومية في كوبا. اعتبر كنيدي أن وجود صواريخ للمعسكر الشرقي على بعد أقل من مائة ميل من حدوده يعتبر تحديا واستفزازا متعمدين. فأمر البحرية الأميركية بمحاصرة جزيرة كوبا برا وبحرا وتفتيش كافة السفن والطائرات المتوجهة إليها ومصادرة أي أسلحة هجومية مرسلة إليها أصبح العالم على حافة حرب نووية لكن التدخلات أدت إلى فك الحصار مقابل وعد الاتحاد السوفياتي بعدم إرسال أسلحة إلى كوبا من شأنها أن تهدد الولايات المتحدة.

هل تضرب امريكاء ايران قريبا علما بان نشوب حرب بين امريكا وايران نسبة الاحتمال تصل الي 85%؟؟؟
الله اعلى واعلم

الإنسان دوما يعانق الجمال والروعة ويبحث عنهما حتى ولو بيد غيره هل أنت من هؤلاء؟
احبب فيغدو الكوخ كوخا نيرا وابغض فيمسى الكون سجنا مظلما
من ذا يكأفى زهرة فواحة اومن يثيب البلبل المترنما
لو لم تفح هذه وهذا ماشدا عاشت مذممة وعاش مذمما
يا سالي عندما نحب بصدق وعفوية يصبح الكوخ متوهجا بالضياء واذا حصل العكس اظلم الكون

ماذا اخذ منك الانترنت ومجتمعها وما اعطاك الانترنت؟
الانترنت اخذ منى الكثير اخذ منى الوقت وهو اثمن ما املك واعطانى أصدقاء اعتبرهم كأَشقائي

صفه تعجبك في ""خالد هاشم "" وصفة تتمنى أن تتغير؟
شكار نفسو ابليس ولا احب ان اغير صفة من صفاتي انا كده مية مية

واخر سؤال

/...............؟ انت عارف وانا عارفه؟؟؟
طيب الناس الما عارفة يعملو شنو

(( شكراً اختي بت مدني يا بنت النيل يا بنت يا كول على اسئلتك واتمنى اكون وفقت في اجاباتي عليك ومنتظرين رجعتك ))

بيني وبينك :-
اسئلتك قمة في الروعة وعليها شوية شقاوة كده وسبحان الله شقاوتك ذكرتني بشقاوة ابنة خالتي السودانية الاصل الهولندية الجنسية والمنشأ طبعاً اسمها كيوت ومن يوم الليلة انا حااسميك كيوت الشقية

الف شكر ليك يا كيوت وما تتاخري علينا في الرجعة منتظرنك

سوباوي

27-02-2006, 02:01 AM

الحبوب .. خالد هاشم ...

الآن لا أسأل .. ولكني أحدد وجهتي من أي الأماكن أبتديك .. يحضرني الآن قول صديقي

"شارف" ذلك الرجل الممعن في الصوفية .. حين يقول الريد المن الله وفوق الله .. ها أنا ذا الآن

عزيزي خالد هاشم أمام حضورك الوسيم .. ولي تجاهك كم من الريد المن الله وفوق الله ..

وهكذا تجد أن العلاقات الحميمة لا تحوجنا لشرطية اللقاءات المسبقة مع الآخر .. أتوافقني على

ذلك ؟
الراقي خالد هاشم .. الآدمي ماعون الخير والشر عارض .. ومحاسبة الذات غسيل أدرانها ..

ومباشرة الرحيم من الأفعال مبادرة نحو السليم من الدرب .. هزني ذلك البوست الذي

تصالحت فيه مع صديقك (يا اخوانا باركوا لي) .. هزني تماماً ما كتبت فغافلني إحساس الدفء في عيني

ف ت س ر ب ت .. دمعتين .. هل لمثل هذا الذي قد حدث أن ما نحتاجه هو أن نلعن الشيطان فقط ..

أم هي الوقفة الجريئة أمام الذات لمحاسبتها أم أن أول خطوات الحل هو التعرف على المشكل ..

عزيزي عذراً لاختراقي لخصوصيتك .. ولكن أي الأماكن وقفت فيها ففعلت ؟

معذرة يا صديقي أن يكون الحديث قد أنجرف بي نحو استفاهمات لم أقصد انتعالها في درب هذه

الدردشة الأنيقة .. فالآن أنا لا اسأل .. ولكن للمنتدى إلفته الخاصة .. وللرائعين أمثالك بوحنا

الجهور في خاطرهم .. فالخواطر كما المدن بها متسع وضيق .. والآدميين كذلك .. فبهم من

أستوت طينته ومن لم تستوي أي بمعنى أنه تفاوت درجات الإلفة تجاههم .. أي الصفات تفتح

لها نوافذ إلفتك لدخول الآخر ؟

الأنيق خالد هاشم .. سأغادرك الآن .. لأعود لك سائلاً ما شاء للاستفهام أن يحتمل ...

الآن بخاطري لعثمان البشرى مقاطع أتذوقها بلعاب خاص .. هل أن تشاركني وما تعليقك

عليها وعليه ..

تحياتي وكن متعافي ونديان ...

ومرقتي شارعين

رجعوك لهتاف سنابل وجرتقة

كان البلد محموم

وشفع مدرستنا في حصة الطين حاولوك

نطيت في التيبار حفيرة ومستكة

وأنا مااغتسلت معاك في النيل

ساورتني الحمى .. لميتك حداي

يا دثريني وزملي الغنا في صفيحة الناى

سألتك بالذي خلقك ..

سألتك بالذي دساك في وردة

وأظنك إنتي مارستي إقتراح الطل على الوعي الإلهي

وكنت سويتي العبير قبلة

ضحكتي إتفتح المدخل فراشة وسنبلة

ودخلت بيتين في الرغيف

إتعلموك المتعبين

غنيت معاك تسقط كلاب الحر وناموس السواري

ويا جلاليب الخلا الجواني شيلي الصبر

دقي بيبان العمارة الطافحة بين ضلك وحوش الطين

وسويلنا الضحى القايلة

إتخمج فنجان مساك

والقهوة يبست من غياب الطقس فينا

وما دفينا .. ما دفينا الحزن مافي

وما نسيناك لما حت البال صفق شدر الجلا الفي الحلة

تاوقناك .. مكندكة بالغبار والليل

وريحة حنتك شايلة

"عثمان بشرى"

خالد هاشم علي

27-02-2006, 01:55 PM

الاخ ابو هاشم مبروك عليك الكرسى اللسه ما سخن
انا ما ح اسال كتير يادوب سؤال سؤالين كده بما انك زول بتاع تسويق وبتفهم فى التسويق والسياسه سؤالى بقول هل تعتقد انو الحكومه دخلت فى نفق استهلاك اموال البترول فى البنى التحتيه من دون الاهتمام فى استثمار عائدات البترول فى مشاريع ذات فائده ؟
بما انى متهمه بانى جندريه فاكيد ح اسال سؤال انحيازى شايفه الاخوه مركزين على موضوع الجكس كتير معاك ده بدل على انك ضليع فى امور الجكس
سؤالى اعقد مقارنه وضع المراة السودانيه مع المراه العربيه.
بما انك اسكندرانى المنشأ علاقتك بالبحر شنو ؟
الأخت عشوشة التحية ليك ومرحب بيك في البوست...بخصوص سؤالك فياريت تكون الحكومة فعلا إهتمت بالبني التحتية لأنو لا يخفي عليك أن السودان يفتقد للبني التحتية في كل المجالات من مواصلات وتعليم وصحة وخدمات وخلافة.. لكن هل فعلا الحكومة الآن تهتم بالبني التحتية ؟؟؟؟؟؟؟؟؟ لا اعتقد ذلك...بخصوص المشاريع الإستثمارية فلي تحفظات وراي واضح بخصوصها حيث انها تتم بمعايير سياسية وتخضع للترضيات والمصالح الشخصية للمسؤلين... كل المني ان يهتم ولاة الامر بالتطوير الحقيقي لسودانا الحبيب...بخصوص السؤال التاني فانا بريئ من تلك التهمة براءة الذئب من دم ابن يعقوب لكن لو حاولنا عقد مقارنة بسيطة بين المرأة السودانية ونظيراتها العربيات فانا بعتقد ان المراة السودانية تتميز بكل جميل من قيم واخلاق وكل الصفات الحميدة لكن كمان فيها عيب خطير وخصوصا بعد الزواج وهو ان المراة السودانية بعد زواجها وانجابها يصبح الزوج هو آخر اهتماماتها ويتختي في الرف لانها بتكون انجرفت وراء الاطفال ومشاكلهم وتاني ماحتولي الزوج ولا نصف الاهتمام الذي يحتاجه...ودي حقيقة في معظم البيوت السودانية... لكن عند نظيراتها من العربيات فالوضع يختلف تماما....بخصوص البحر وعلاقتي به فهل تصدقي لو قلت ليك انا جني وجن البحر وبخاف منه رسمي وشعبي ..غريبة مش كده..هههههههههههه

خالد هاشم علي

27-02-2006, 02:01 PM

عاوزين نخش نحي أبوهاشم..
ونشجع أبوهاشم...
بعد ماتجاوب على سالي وعشوشة
وسؤال ابراهيم البايت...
بعد داك ندردش معاك....

الغالي عمدة ود الصادق..أبو أشواق...ازيك ياحبيب وكيفنك أها أنا خلصت من سؤال سالس وعشوشة بس باقي لي سؤال إبراهيم بتاع الكيزان .. والظاهر انو الجنا ابراهيم ده ناسي انو انا راجع السودان وعايزني أفك آخري وأروح في ستين داهية لكن دي يلقاها عند الغافل...( يابرهوتة انشاء الله يكون رأيي في الجماعة ديل وصلك ضمنياً)

خالد هاشم علي

27-02-2006, 02:11 PM

أخونا خالد هاشم ........... الله قال بى قولك
ذكرت أنك تزوجت الدكتورة بعد قصة حب دامت 19 سنة !!
انتوا ابتديتوا متين وانت من مواليد السبعينيات ؟ آمنَّا ................
مؤكد هنالك الكثير من العقبات التى واجهتموها سوياً للإنتصار لعشقكم فكيف تغلبتم عليها " لك الحق فى إختصار الإجابة لدواعى الخصوصية "
نريد أن نشرك أم هاشم معك فى الكرسى لتعم الفائدة " الله استر عليك من مصير شواربو "

الغالي ود المأون سلام شديد يازعيم جماعة الراقدين قش يازواق ...مرحب بيك كتير ...بخصوص سؤالك فأنا والحاجة أم هاشم بدينا في المرحلة المتوسطة ( أمسك الخشب وقول ماشاء الله) ومرينا بكل العواصف زينا وزي الناس مشاكل تقلبات عقبات لكن وياسبحان الله ربنا كان موفقنا شديد لدرجة اننا كنا مضرب مثل في الفريق ومرات كتيرة بجونا ناس عندهم مشاكل ( مجكسين بعض ) ويقعدوا يحكوا لينا ويسألونا لو كنتوا مكاننا كنتوا عملتوا شنو؟؟؟؟ ..لكن وللأمانة ياود المأذون كان لأم هاشم القدر الأكبر في استمرار علاقتنا لأنها إعتبرتها علاقة جادة منذ البداية وعملت بكل جهدها لتستمر هذة العلاقة... مما أجبرني علي إحترامها وإحترام هذة العلاقة ومع الوقت بقينا ( روح واحدة في جسدين)

خالد هاشم علي

27-02-2006, 02:15 PM

الأعزاء جدا سامبا..............( جابت ليها إشاعات كمان؟؟؟؟) وسوباوي........جايييييييكم ياحبايب بس سامحوني لاني إنشغلت شوية بس أكيد جاييييييييييكم وإنتظروني ياحلوين

rasheed

28-02-2006, 03:55 AM

أنتظرنا جاينك يا حبيب

محمد احمد

02-03-2006, 01:11 AM

أخي خالد هاشم في البدء تحية حب واحترام وتقدير لشخصكم ولجهودكم المخلصة الصادقة لربط اواصر المحبة والصداقة بين الاعضاء
ولايخفي ايضاُ تتبعكم لكل ماهو إنساني في المقام الاول في منتدانا لتكتمل اللوحة الرائعة لشخصكم الرائع نسأل الله العلي القدير
ان تكتب لكم في ميزان الحسنات.
ثانياً ناسف للتاخير الغير مقصود طبعاُ والذي اسبابه فنياُ وادارياُ .
بما ان لتمبول والدويم صله وثيقة بكم أخي خالد فلن يخرج محور اسئلتي عن هذا الإطار .
أولاُ تمبول تلك القبلة التجارية لكل اهلي الطيبين في البطانة وماجاورها من مدن وقري
واذكر في خطاب شهير للنميري تحدث فيه عن ازمة ( الجاز والبنزين ) بأن طمأن المواطن السوداني بأن لا ازمة في المواد البترولية
وتوجد الان بكثرة في ( الحريز، وتمبول ) .
والسؤال أخي خالد
الا يزال سوق تمبول بهذا الرواج والذخم ؟
وماهي النظرة المستقبلية لكم لتطوير هذا السوق؟
يقولون ابن الوز عوام هل لسوق تمبول الاثر الثقافي والتجاري في تخصصكم العلمي .؟
ثانياُ الدويم القبلة الثقافية ايضاً لكل اهلي في السودان والتي ماذكرت الا وذكرت بخت الرضا بل وذهبت الدويم اكثر من ذالك لانها ايضاً
قبلة تجارية اي امتازت بالاثنين معاً لو صح التعبير .
الدويم الماضي التليد والوجدان الثقافي والحاضر المشرق .
هل اندثرت وتحتاج الي ترميم كآثار مروي اماذا أخي خالد ؟
أخي خالد الا توافقني الرأي بأن الدويم لو سخرت الدولة لها الامكانيات المالية والبني التحتية الا نستطيع ان نجعل منها كمدينة العاشر من رمضان والسادس من اكتوبر في مصر .؟
ماذا تعني لك رحلة بين النيلين الازرق والابيض ؟
وماهي الافكار التي تجوش في الخاطر ؟
ماهو الفرق بين ثقافة النيلين واثرهما لخالد .؟